بنت عايلة bent 3ayla

راوغوهم يا أخي!

2010-08-18T05:46:00.000+01:00

تسسس تسسسسست
الصوت خمسة على خمسة و حصوة في عين اللي ما يصلّي ع النبي و وررررررييييي

ايا سيدي نستهلّو على بركة الله تدشين ها البلوغ الجديد، و بمناسبة ها الإفتتاح العظيم بش نعملو لعبة حظ، اتنجمو تربحو فيها شلاكة نيلون بوصبع! إي نعم شلاكة نيلون بوصبع في شكارتها!
إتنجّم تترشّق بيها ع الشطّ، إتنجّم تقصّر بيها السّهرات الرّمضانيّة في إصطياد الفرازط، إتنجّم تتخابط بيها إنت و مرتك ماغير ما تخليلها آثار عنف تهزّك لبوفردة... الحاسيلو فرصة العمر يا سمر...
بش تشارك ساهل ياسر، جاوب ع السؤال التالي و ابعثلنا توقّعاتك ع الايميل...

زعمة قداه بش يصمد البلوغ هذا قدام نسمات الـ 404 ؟

في إنتظار الجواب على مثل هذه الأسئلة الوجوديّة، أكتفي بطرح أسئلة إكزيزتنسياليّة من نوع آخر. و كي تجي تشوف تساؤلات خطيرة برشا خاطر تهم أمن البلاد و العباد. التساؤل اللي أرّقني اليوم و خلاني نخرج من حالة الإغماء الرّمضاني، في الحقيقة قديم متجدد. كل مرة نجي راجعة للبلاد التونسية، من المطار، نبدى نخمم (و في رواية أخرى نندب) و نقول علاه يا ربي علاه؟ (بين قوسين، السؤال مش علاه راجعتلها البلاد ، و لو أنّو تساءل مشروع أيضا) و لكن علاه دون مطارات الدّنيا - ع الاقل اللي إتعديت منهم - و إنت داخل للبلاد، يعني هابط من الطّيارة، يعملولك لجنة إستقبال متع زنفليقة رجال شرطة و حفلة تفتيش و يعديو الباقاج آمان bagage a main ع الفحص الفني و الأشعّة ما فوق المحشية؟

السّؤال هذا مشروع و لعدّة اسباب.
أوّلها انّو انت م المفروض من بلد الخروج اتعديت ع التفتيش و امورك سانك سانك. يعني م المفروض منطقيّا انّو كان فوقك حاجة راك توزّرت من غادي لغادي.

و ثانيها، انّو و على فرض انّك فوقك حاجة و الجماعة فركسوك و فطنو اللّي فوقك حاجة و مع هذا خلاّوك تتعدّى لأسباب إستراتيجية بحتة تتجاوز إدراكنا نحن المواطنين البسطاء، لنقل مثلا مثلا وسيلة عصريّة للضغط على النموّ الديمغرافي، ماو كي تضرب طيّارة فيها مياة ولا ميتين فرد مرّة، سترايك! توفّر ع المجموعة الوطنيّة شهر من الجهود في إختلاق حوادث الطّرقات ولاّ حتى موسم كامل من المباريات الكرويّة... المهم، بما أنّك تعديت باللي فوقك و طلعت في الطيّارة م المفروض انّك اتّصرّفت و فكّيت زنقتك في الطيّارة، مش تستنّى حتّى تهبط لمطار تونس قرطاج و تعمل الموبقة متاعك!

و ثالث الأسباب و أهمّها -في نظري طبعا- أنّو مهما تكون الحاجة اللي فوقك خطيرة و تهدّد الأمن الوطني، صدّقوني ماهيش بش تكون أخطر م السّلاح الكيمياوي اللي يتكوّن في صبّاط مسافر عندو ع الاقل شطر نهار لابسو وشاقق بيها شطر الكورة الأرضيّة و تجي إنت تنحيهولو في وسط حضبة متع عباد تاعبة و تْنُوس تقولش عليها مرشوشة بالفليتوكس.
و لذلك رجاء، رحمةً، رفقا، إعفيونا من ها الإحتياطات الأمنيّة الزايدة ولاّ ع الاقل حضّرو أقنعة متع اكسجين على ما ياتي.

بتداعي الأفكار الرّمضانيّة، خاطر النّهار طويل و الواحد لازمو يقصّرو، لقيت أنّو فمّا تقارب في التعامل مع عديد الأوضاع الأمنية الحسّاسة. ممّا يدلّ انو المسألة ماهيش عبثيّة كيما ممكن الواحد يغلط و يستخايلها و لعلّ فيها حِكمة نعجزو نحن المواطنين البلهاء عن إدراكها...

المهم، توا يجي شهر م الزّمان، إتعديت لأحد الأصدقاء اللي يخدمو في المنطقة الصناعية الجنوبية، عسلامة يسلّمك، يا ولدي اشبيه وجه اصفر كي الليمونة؟ طرّدوك؟
- يراه في راسك !
- ما خلّصوكش؟
- ما يخلّصونيش؟؟ راني دغرتهم بسكينة !
- إمّالا شبيك؟
- يا سيدي بن سيدي جماعة ما عرّفوش بصفتهم، و لكن على ما يبدو من الامن جاو للشركة و طلبو الاطلاع على بطاقات التعريف متع العملة الكل... و السّبب؟ الله أعلم! دواعي أمنية!
- إي انت اش مقلقك؟ هارب م الجيش؟ روشرشي؟ سارق سريقة؟
- لا اما بهتت شنوة ها الدّواعي الأمنية اللي بش تدخل لشركة و تبتب علّي فيها!
- ربي يستر و برّا. لعلّ تنظيم القاعدة بدا يخمم في إستغلال الطاقات الحربية الخفية لمعامل المقرونة في الجهاد. برا إرتاح قالو دواعي أمنية.

الحاسيلو، ماغير ما نطوّلو في الهدرة، علّينا المسجّلة و انغمسنا في نقاش أهم و هو شكون بش يخلّص الفطور. خاطر كي تجي تشوف، أمر عادي بش أمن البلاد يكتنفو شيء من السريّة، الجماعة أدرى بمصالحنا و أكيد فمّا أمور تتجاوز إدراكنا نحن المواطنين التّعساء...

لكن علاه مش إيجا يا زمان وإمشي يا زمان، ما يجيش جمعة بعد ها الحديث الملئ بالتشويق و الإثارة، ما نتعداش من اكا البرّ، و نلقى الكيّاسات سبحانك يا ربي، مانيش بش نقول تزفّتت و تريقلت و تسيّقت و لكن "إتزرعت" كيفها كيف الأشجار اللّي بقدرة خالق إتغرست و كبرت في عشيّة و الحيوط إتبيّضت و الزبلة إتلمّت...

توا إلى حد الآن، من ها العوامل برك، يظهرلي الواحد بدى يعرف "شكونو" الدّواعي الأمنيّة و ليس "شنوّة" الدّواعي الأمنية... و اكا السريّة و التشويق يظهرلي إنتفات أسبابها...
تخيّل إنت الواحد يزيدك زيادة، و في حالة لعلّ ما فهمتش انت يا مواطن، نزيدو نعلّقو بلاكة تسدّ عين الشّمس، "المدينة الفلانيّة ترحب بـ........."، "الفرع الجهوي لدرا شنوة يساند و يعاضد و يجدد العهد مع ...."، و زيد كان مزلت ما فهمتش، نكمّلو نحطّو التصاور ع اليمين و ع اليسار.
علاه نمشيو لبعيد؟ اللي خايف ع "الدّواعي الأمنيّة" يجرّب يجيب طفل بو أربعة سنين و يمدلو كعبة بنّي بنّي و يقلّو برا تبّع الدرابوات. بالجاه إلاّ ما يوقّف البلاد على ساق وحدة.

و لكن و بالرّغم من ها المآخذ الأمنية، الواحد يحاول يلقى تفسير منطقي. و شخصيا ما لقيت حتى تفسير بخلاف كونهم حارصين على انّو الطّريق يكون واضح و جليّ للي يسوق و ما يغلطش و يحيد عن الطّريق المرشوم بالدّرابوات!

خاطر، سبحانو ربي في ظرف أربعة أيام، وحدة م النّاس خممت بش نقترح على البلديّة تقدم مطلب إنضمام للإتحاد الأوروبي في خصوص الشّارع اللي بش يتعدى منّو الموكب. الواحد يولّي يتعدى منّو بالفيزا مش لعب. تخيّل لو كان اللي يسوق يخطف دورة غالطة؟ دورة غالطة و في الضّاحية الجنوبية! يا للهول!
و لإدراك حجم المصيبة، الواحد لازم يقدم تعريف للكيّاس في الضّاحية الجنوبيّة.. التى يكون فيها الكيّاس عادة رقعة ترابية ضيّقة مشقوقة وديانا وديانا و تخترقها آبار إرتوازيّة تفيض في الأيام الممطرة و يحدّها على الطرفين أكوامٌ أكوامٌ من الزُّبالة و تهبّ عليها صيفا نسمات الأوناس.

المخاوف من أنّو الموكب يغلط في الدورة مشروعة جدا و واردة جدّا. و آثار مثل هذه الغلطة غير محمودة العواقب. لكن في نفس الوقت، رشمان الطريق لأصحاب ذوي النّفوس المريضة زادة فيه مجازفة. و بالتّالي نرفعو صوتنا لبلديّات الضّاحية الجنوبيّة و نطلبو منهم بكل رجاء أنّهم يراوغوهم، و يصعّبو عليهم المهمة .

أما رانا مازلنا ما طحناش على روسنا بش نطالبو بالمرافق اللي ينص عليها قانون البلديّات و اللّي ندفعو على خاطرها في الزبلة و الخروبة، خاطر اكا الفليسات ماهيش ماشية في التراب! نجيبو بيها المزاودية في المهرجانات و نصرفوها على أعوان البلدية بش يتكّاو تحت الكالتوس يطيّبو التاي و يشعلو حريقة. أما ميسالش، بربي كي تواتي و تهلّ علينا مناسبات كيما هاذي، يا حبّذا كان يوسّعو شوية من العمليّات الجراحيّة التجميليّة متع الشوارع و يِسْهمو شارع ولاّ إثنين أخرين و الله لا يضيع أجر المحسنين .

جنّة يا وطننا...حتّى نارك جنّة

2010-02-27T20:37:00.001+01:00

عندي مدّة ع التدوين. من جهة ضيق الوقت و كثرة الالتزامات، و من جهة (و يمكن خاصّة) بدات النفحة تطير. ماو الواحد كي عينو بشوية عرك و ادرينالين، يعمل عركة على بزّو و معناه و يهبط يحوّس في السنترفيل ولاّ يمشي للصبّاغين خاصة اليوم سبت و يا من ادراك. قالّو عرك افتراضي و كعك ما يطيّر جوع. اذا ما يسيلش فيها الدّم و توفى الحكاية في المركز ما ثمّاش كيف.

اليوم شدّيت المزفّت و قصدت ربي ماشية لسوسة. عندي مدّة على ها البرّ و آخر مرّة نثبت جيت فيها لهنا (ماني نكتب في البوست في سوسة مطيّشة كي اليتيمة في قهوة م القهاوي بعد اللّى إمّالي البلاد ما حبّوش يفرحو بيّا)، جيت بش نحضر عرس وحدة صاحبتي ياخي بطل العرس و الحقيقة متع ربّي قمنا بالواجب و في عوض نهديو النفوس، شفينا غليل صاحبتي و اهلها و قريب لا حجّرنا اهل العريس. من وقتها خفت لا نطلع روشرشي ولاّ موصين عليّا في ها البرّ.

اي عاد، اليوم قيّنت عليّا (قلتلكم اللّى امالي البلاد ما فرحوش بيّا و اللي هذا خيطك يا اللي ريتك و رصاتلي مطيّشة كي المطرّدة في قهوة؟؟ اي ما تنساوهاش هاذي) و زيد ما لقيت حدّ يونسني في الثنية، م الصباح نلبّ في الشوارع وحدي. و كي تجي تشوف جات بالصلاح، خاطر عندي مدّة ما ربحتش راحة عقلي و ما جاتنيش حالة الصفاء و السكينة و التأمل اللي جاتني اليوم. مستانسة نهوم مع جماعة اختصاص شباط و عرك، تقول بش يهبّطو لقشة م السّماء و كي نوصل للبلاصة نقول الستّار ربي ما صارتلناش بعض الحاجة، خاطر نسوق بالحاسة السادسة، الثنية ما نخلطش بش نشوفها. اما المرّة هاذي سمحتلي الفرصة بش نفهم الدّنيا و نرى الطبيعة و نملى عينيّا من منظر تونس في الرّبيع. سبحانو الخالق اش بدع في ها البلاد، زينها و سحرها ما ريتو في حتّى برّ. و كي كلّ مرّة جاني سؤال كيفاه الواحد ينجّم يبعد عليها؟ كيفاه ينجّم يفارقها و يتهنّى في الغربة؟

من خاطرة لخاطرة، تذكرّت فازة صارتلي عندها يجي جمعتين .ماو كتّب عليّا ربّي انّى كلّ فترة و فترة نهزّ روحي و نعمل تنقيزة لفرانسا، للضرورة احكامها و مكره اخاك لا بطل. و سبحانو ربي، لا فمّا بلاد عندي ليها حساسيّة و تتوتّر اعصابي بمجرد ذكرها قد آكا البلاد. شي ربّاني، و ممكن عقدة م الصغر ملّى كنت نتعدّى قدام باب السّفارة و نرى اكا العباد مطيّشة كي الكدس في الريح، تحت الشتاء، تحت الشمس، و هوما لا رحمة لا شفقة بيهم. ريت و ريت و مشيت لسفارات لكن اكا الخنّار و اكا الذّل عمري ما ريتو. و كنت واعدة روحي انّو مستحيل يجي عليّا اكا النّهار و ناقف اكا الوقفة... لكن ما يعجبك في الزّمان كان طولو.

المهم، جاء وقت تجديد الفيزا. وكّلت الخالق و بديت ندور كي المكّوك الحايك نحضّر في الوراق. و لو عارفتها مهما نحطاط بش ترصيلي نمشي و نرجع. ماني حافظة السيستام متاعهم. الفرنسيس مغرومين ياسر بتبديل القواعد و القوانين و كل شهر شهرين تسمع هبطت اوردوننس جديدة و كل مرّة يزيدو في التعقيد ليس يسّهلو ع العباد. برّا ربّى يضيّقها عليهم دنيا و آخرة.

صبّحت النّهار الموعود، عملت ثلاثة عركات مع دارنا، ضربت راسي ع الحيط حتى حسيت بمطعم الدّم و زدت ضربت شطر كعبة آتاراكس بش تلعب عليّا الدوخة. هكّاكة نفرّغ شحنة العصب و ما ترصيليش خانقة واحد غادي و مسلسلة في جرّتهم النحسة. و كي العادة، تفاهمت مع خويا بش نهبط نشدّ الصّف و كي قريب نوصل للباب نطلبو بش يخلط. خاطر كان انا انجّم نشد روحي هوّا بش يعمل نَتْنة و لا فايدة.
ايّا سيدي وصلت بسملت و حوقلت و استغفرت و كي النّاس الملاح بديت نتكولف ع العباد و نقلّهم اش ناقصهم و اش زايدهم، ماو في بالي حافظة السيستام و فرد مرّة انقّص م الصّف و نزرب شوية بش ما يضيعش النهار في تقعيد العود. وصل طرحنا دخلنا، اتمسمرنا في اكا البطحاء اللي عاملينها للعباد بش تستنّى فيها حتّى عيّطولنا. مزلت كي مديت وجهي في الشّباك، قبل لا السلام عليكم لا كيفنّك، الراجل رجّعلي الوراق و قالي لا، الورقة هاذي نحبو منها فوتوكوبي.
يا ولدي ماو مستانسين تاخذو الاوريجينال و اكاهو؟
قالّك لا اتبدّل السيستام و برّا جيبلي فوتوكوبي.
- الله يقدّر الخير!

خويا نرى فيها الدّخان بدا يخرج من وذنيه، قتلو اقعد لهنا هاك في الدفاء و العيشة كي قدّر عليا ربي نخطف روحي نطبع و نجي. دقيقتين م الزّمان و رجعت هازّة الورقة كي الحرز. عاودنا مدّىنا وجوهنا في القيشي. الراجل غزر غزر... ثبّت ثبّت، مسح مراياتو و تنحنح و قالّى
- لا، هاذم ما يكفيوش.
- علاه انشاء الله خير؟ اش ناقص؟
- صحيح انت جبت الاوراق المطلوبة و التأمين و التساكر مشي و جي و ما يثبت انّكم مزلتو طلبة و ما يثبت انّو عندكم وين بش تسكنو و عندكم باش بش تصرفو... لكن ماذابيّا تكمّل تجيبلي مدخول بوك و امّك زادة، على ماياتي و الاّ كان تنجم، جيبلي شهادة ملكية في حويجة، دار، بلاص، سانية، شطر تونس، حويجة هكّا...
- يا وخيّ، ماو كنتو تطلبو هكّا و نحيتوها م الصّيف؟
- اي نحيناها... و هانا رجّعناها!
- الله يبارك!
استغفرت و حوقلت، خلّيت خويا consigne عندهم و مشيت نجري بش نكمّل الوراق قبل نص النهار خير ما ترصيلي في نهار آخر منقوب. مشيت جبت اكا الورقتين و رجعت فرحة مسرورة. لقيت الطفل مزال يتنفّس و ما استنقطش م الغزّول. عاودنا مدينا وجوهنا المستبشرة المزبهلّة للراجل.

- اي يعطيك الصّحة. هاذي بداية حُجّة...
-بداية؟؟؟؟؟
- اي توا ماذابيّا تكمّل تجيبلي مضامنكم!
الحق متع ربّى جداقي طاح م البهتة! و بعد قلت لعّل الرّاجل معذور و ما فهمش خطّى (ماو تخربيش دجاج) يا وخيّ ياخي قتلك جاية بش نكتب الصداق انا؟ رانا طالبين فيزا سياحية و صلّى الله و بارك!
- اي اي في بالي، أما اشنوّة اللّى يثبت اللّى هاذوكم بوك و امّك!
- يا ديني اهوكا مكتوب في الباسبور!
- لا لا هاذاكا ما يثبت شي، لازم المضمون!
- يا حاج راهو الباسبور معمول على بطاقة التعريف اللي هي بيدها ما تعملها كان بمضون. يعني كان حاطينلي اللي هاذوكم بابا و امي حتّى كان ماهمش بابا و امّى يولّىو بابا و امي بالسيف حتى نبدل البطاقة!
- انا هاني نقلك اش لازم و انت تتحمّل مسؤوليتك! كان تروفزت ليّا و ليك ربي!
- ميسالش صُب المطلب و يعمل الله دليل امبعد... (انا في مخي كان بش ترصي لخويا يعاود يرجع مرّة اخرى ما نضمنش انجم نرجع. كان ما يسفرلي بروحي في الاثناء).
- باهي و بوك....
- اش بيه زادة؟ تحبني نكمّل نجيبلك صداقو هو و امّى؟؟
- لا لا اش عندي في الصداق. ويني الورقة اللي تثبت اش يخدم؟
- اهيكا عندك ورقة المداخيل!
- لا لا لازمني بخلاف ورقة المدخول، ورقة م الخدمة يشهدو اللي هوا يخدم فيها الخدمة هاذيكا!
- صُبّ المطلب يهديك!
- باهي و بوك عندو فيزا؟
- اي عندو على عام.
- وويني الفيزا متاعو؟
(الله يجيبك يا طولة البال)
- ويني زعمة؟ في الباسبور متاعو! وين تحبها تكون!
- و علاه ما جبتوش معاك؟
- اوخذي!!! و فاش قام؟ ياخي هوا بش يسافر ولاّ نحن؟
- امممم... وقتلي امك عندها فيزا؟
- اي، عندها و قبل لا تسأل ويني، راهي في باسبورها زادة!
- و الله اش بش نقلّك. راهو عندكم ريسك كبير بش ما يتقبلش المطلب.
- ( بدا تأثير الدواء يتنحّى و بدا القاز يطلعلي للمخي و ربي يقدر الخير) يكون منّك العقل صُب المطلب و توا نكمّل اللي بش يكمل امبعد!

ما نطوّلش عليكم اكثر من هكّا، تصويرة الفيزا و من غير مبالغة ما تبعدش ياسر على ها التصويرة

و حتّى بعد ما خذيناها الفيزا المحنونة قعدت الحكاية تحزّ في نفسي و عشيّة كاملة نرقل م الغزول. الواحد لو كان مش اللزز اش هازّو بش يتشمّتو فيه اكا الخلق و يمشوروه. تي اش ناقصها بلادنا حتّى نتشعبطو لاخر الدّنيا؟
ها الافكار الوطنية قعدت تمحر فيّا نهار كامل، حتّى لين جاتني هبطة لاريانة في الليل. فمّا شكون استنجد بخدماتي و ساكن قريب من مارشي اريانة، كي العادة اخلطلي و اجريلي. ماكنتش م العاكسين مشيت و وقفت الكرهبة و قعدت نتسنى في الظلام. بالصدفة وقفتها بحذا زبلة كبيرة وراء المرشي. انا قاعدة في الكرهبة، و على جيّة راجل كبير، قلّيل، يربش في الزبلة بش يدبّر قوت نهارو. هوا يفرت فيها، و على جيّة طفل آخر، وسط عمر كيف كيف يلوّج بش يستقات.

الواحد يقول زوز قلالّة في زبلة وحدة ربي يستر لا يدور فيها ضرب امّاس. وحدة م الناس تزرفت في الكرسي و هبّطت الشّباك بش ما يفوتني شي، سبكتاكل لايف و حصريا في شوارعنا التونسية...
اما يا خيبة المسعى و الله العظيم لا نزيد عليكم حرف، الزوز رجال طاحو يتعاونو على اكا الزبلة فرتوها مع بعضهم و الراجل الصغير ماو بدنو مساعدو، يحل في الشكاير و يعطي للراجل لاخر و يقلّو و الله عندك و تُحرم عليّا. و الراجل الكبير يرحّم على والديه و يزيد ينصحو بالخبرة الكبيرة متاعو في ربشان الزبابل و ينعت فيه ع الزبلة اللي يلقى فيها الخيرات الكل. كمّلو لمّو اش كتب من ربّى و باسو بعضهم و بقّاو بعضهم على خير.
بربي بلاد فيها ها المودة و ها الرّحمة بين العباد حتّى في ربشان الزبلة، اش مزال الواحد بش يخيّر عليها؟ جنّة يا وطنّنا...حتّى نارك جنّة.

لينا و يا لينا

2010-02-25T19:02:00.002+01:00

المرة هاذي لينا تحجبت... مش مدونة لينا...
خاطر اللي يحجب مدوّنتها و يكمّل يسكر بالشمع البروفيل متاعها في الفايسبوك، ماهوش مستقصد افكارها برك و خاصة انو اخر حاجات اتكتبت ما فيهاش ما يبررّ الحجب.

و الخطوة الجاية شنوة؟ تكمّلو تلبسوها طاقية الاخفاء في الدنيا بش ماعادش تترى جملة؟ فاش قام عليكم؟ كمّلو اعملولنا مشانق جماعية و ارتاحو منّا الكل؟
فمّا ناس بوعيهم يحجبو خيرة شباب البلاد؟ هاذم اساتذة جامعيين و صحافيين متواجدين ع الساحة العالمية و مشرفين تونس. فيقو! الطريقة هاذي ماتجيبش اكلها... الحرّية ما تنجمش تحجبها، الحرّية ريح!

تساؤلات.... ليلية

2010-02-11T22:47:00.002+01:00

الفترة الاخيرة في البلقسفير شهدت تصعيد من نوع غريب .
غريب خاطرو من نوع الاتهامات الخطيرة على صاحبها، بما انها تنجم تؤدي بمن وجّهها لبوفردة. محاكمة نوايا، افتراء، تشويه، ثلب، قدح، اتهامات بالتطرف، الخ الخ... بالطبيعةالمتضررين هوما اصحاب الحق في القيام عليه/هم بنازلة، لكن هذا ما يمنعش انّي عندي شوية تساؤلات ع الهامش...

المريب في ها الهجمة هاذي انها قاعدة اتّم بالمتاجرة باسم الحزب.
توا واحد عندو مشاكل مع ناس، جرّب يشري الشبوك معاهم ما نجمش روحو، الله غالب يا اخي ماكش ندّهم، اش تعمل لعمرك؟ تتفافى على بدنك؟؟ مش مشكلة خلي عندك روح رياضية لعل في الماتش الجاي، صفي حسابك معاهم منك ليهم، لكن انك تقدم نفسك على اساس انك حامل لواء الحزب و تتحصّن وراء بلاكة الوطنية و تبدى تلقي في التهم و تشري في الشبوك في محلّ من المفترض انّو يقوم بالدعاية للحزب، و كاينو الحزب موافق على ها التوجه و التصعيد، و كاينو فما شكون وكّلك و فوّضك بش تخوض في مهاترات من ها النوع باسمو، هذا نوع من التشويه لصورة الحزب.

حوصلة ها الرحلة التدوينية الوطنية في البلغسفير كارثيّة.... و على جميع الاصعدة.
فشل ذريع في القيام بدعاية لايقة في الفضاء الافتراضي، لا و الله خلق عداوات و حساسية لكل اوجه الدعاية الحزبية ماكانتش موجودة. يعني اللي تبني فيه اللجان و الجهات الرسمية قاعد يطيح في الماء... زعمة الخوض في عرك شطلي اطلي باسم الحزب في فضاء مفتوح يتعدى منّو مئات الآلاف كل يوم قدّاه ينجم يأثر بصفة سلبية على صورتو؟ قداه من مجهودات و من فلوس اتصرفت على الدعاية ضاعت حرام كي غالبيّة القراء تخرج بانطباع سلبي جدا على المتكلمين باسمو؟

من الغريب انو ناس تدّعي الالتزام بالتوجهات الحزبية تتناسى واجبها في تقديم الصالح الحزبي قبل المصالح الشخصية و تزج باسمو في ها المتاهات للدفاع عن مصالح ضيّقة لا تزيد عن ترجيع فازات، حتّى الواحد يدخلو الشّك ياخي هاذم يدافعو عليه ولاّ من المندسّين بش يشوهولو صورتو؟؟؟
وحدة م الناس لو جيت م الواصلين فيه، راني نطلب القيام باستجواب في اقرب الآجال.

يا اللي تحب تتحاور مع الشباب، هاي اخبارو الشباب

2010-02-06T11:17:00.000+01:00

م الاول حبيت نعمل عدة تدوينات، كل وحدة ليها موضوعها. التضامن مع الطلبة (ولو بعد خمسة فيفري، خاطر التضامن ديما)، و حجب مدونة ســـــــــي طارق الكحلاوي (و هاذي سي بالحق متع قدر مش التّى اريد بها التمقصيص على عباد اخرى ياخي غلّطتهم بالفارغ و نفختهم كي شكارة النخّالة). لكن خ نفرّغ الشكارة بكلها.

١. اعبر عن ذهولي الشديد لحجب مدونة سي طارق. مدونة ذات قيمة كبيرة، تدويناتو الكل من نوع جوّ جوّ، de haute volee . فيها مواقف متوازنة و تُعنى كما يليق باكاديمي محترم، بطرح الاسئلة و تحريك السواكن على عكس مدونات اخرى طُفيّلية تعنى باعطاء دروس و مواعظ من نوع قصّ و لصق ولاّ هاذا الطرح الوحيد و ليس بالامكان افضل ممّا كان و تبعونا تربحو خدمة ولاّ حتّى بونوات متع فطور.

و يشرّفني ضم صوتي للبرباش و انتيكور و ياسمين، و ارسال دعوة ليه و لبقية المدونين المحجوبين بش يكونو من المشرفين على ها المدونة و يكتبو فيها، و ان كانت دونهم مقاما. كثير منهم اختلف معهم في الآراء و التوجّهات، لكن الشي الاكيد انّى استنكر و بشدّة حجبهم.
مستعملي الانترنات في تونس ماهمش رضّع و لاّ محجور عليهم بش يحتاجو لشكون يوريهم الثنية و اش يصلح بيهم و اش ما يصلحش. يزينا من عهد ددّاش كبر و عاش.

راهو السياسة هاذي اكبر اعتراف بفشل ذريع في تحقيق التطور الاجتماعي. اش معناها بعد واش و عشرين سنة من التغيرات الثورية و الاصلاحات الجذرية، و لازلتم ترون ان التوانسة عديمي اهليّة؟ هاذا الكل هوما غير قابلين للتطور و للتنوّر؟ ولاّ انتوما فشلتو في النهضة البشرية؟ ولاّ بالعكس هوما امخاخهم محلولة اكثر ممّا يساعد؟؟؟

٢. التضامن المطلق و غير المشروط مع الطلبة المسجونين لانّهم طالبو بحق اساسي و بديهي من حقوق البشر. كنت بش نكتب ع الموضوع بشوية سخرية كي العادة ياخي لقيت طعم الملح و المرارة هوا اللي غالب. المشكلة هاذي فيها فرعين . فيها "معضلة" السكن و فيها الرد العنيف بالسجن و بعقوبات قاسية على الطلبة. باااهي، هات نفركوها الرمانة.

بالنسبة لحكاية السكن في حد ذاتها، و تكلفتها العالية بالنسبة للدولة و اللي ها المبيتات بش تنقبلها الميزانية، يظهرلي الحلول واضحة و ساهلة. يا امّا تطبق بكل صرامة سياسة اللامركزية و كل طالب يطالب بالسكن، مجبر بش يقعد في اقرب جامعة تابعة للمنطقة الجغرافية اللي هو اصيلها. اللهم طلب اختصاص مش موجود و الا تنازل على حقو في السكن.

تنجمو زادة يا سيدي بن سيدي تقتصدو من المصاريف الزايدة. نقصولنا من الحملات الانتخابية و اكا الدرابوات و السبوتات في التلفزة و الكسكروت بوبلاش في القرية الانتخابية و اكا الفليسات خصصوها للمبيتات اتوا تشوفو كيفاه العباد وحدها وحدها في الشارع متحزمة بالفولارات الموف و تهتف بحياتكم. يا سيدي لواه؟ برّا العشرة ملاين تونسي متبرعين بنهار ولاّ اثنين من بثّ التلفزة الوطنية (و لو هاذي خدمة تخدمونا فيها نقعدو ندعيولكم بطول العمر). سكّرو علينا البث و نقصو من الضو و م الموارد البشرية و استثمرو فلوس المواطنين في تسكين ولادهم، مش في الاقامة في السجون.

عجزتو و عجزتو؟؟ برا سيدي بيعو شوية من ملك الدولة بالدينار الرمزي للعباد اللي تحب تستثمر في ها النوع م السكن. ع الاقل ما فماش ريسك بش يشريوها باخ تف و يجيبو طلبة م الهند بش يسكنو غادي.

توا نجيو للعقوبات القاسية اللي اتفرضت علي ها العباد. بالله اقصى ما عملو شنوة؟؟ راهم تربّعو في القاعة و بداو يغنيو "اناديكم"، ياخي هبطولهم الجماعة الطيّبة كي القضاء المستعجل. يا ناس راهي ماهيش ردة فعل متناسبة مع الفعل. عام حبس؟؟؟ ليه؟؟؟ شديتوهم بامّاس في يديهم؟ يستهلكو في المواد المخدرة؟؟ فعل فاضح في الطريق العام؟؟؟

التصعيد اللي صاير ها النهارين مع الطلبة و مع غيرهم من الشرايح، ماهوش حلّ. ممكن ظرفيا تنجم تخلي العباد تدخل ببوشتها و تبعد ع المشاكل، لكن هاذا مش مناخ viable

تحبو تتحاورو مع الشباب؟؟ يا سيدي الشباب يسلّم عليكم و يقلكم حلّ مشاكلنا مش اكا الارديناتور برتابل اللي تربحو كي تبعث اس ام اس... كي تبات في الشارع ما عندك وين تشرجيه.

من معاناة تونسية في العاصمة

2010-01-22T07:07:00.001+01:00

ها النهارين قول فما شكون كتبلي على الهبطان للسنترفيل، تقول صرّتي مقصوصة غادي، النهار اللّى ما نمشيش فيه مرّة، ترصيلي ماشية مرتين . و ما يخفاش عليكم قدّاه الواحد يبدى فرحــــــــان و سعيـــــــــد و الدنيا خضراء في عينيه كي يكتّب عليه بش يهبط للسنترفيل في كرهبة. التجهيزات الاستراتيجية و النفسانية بدات م الدّار. مشيت للحمّاص و عملت استثمار في باكو موشوار (يصلح لمسحان الدموع مبعد) بش صرّفت ما تيسّر م الدنانير. هزيت ترموس القهوة، دبوزة الماء و فولارة و مفتاح على ما ياتي و شدّيت الثنيّة.

بالطبيعة قعدت ندور كي ذبّانة الخريف حتّى لقيت حاجة تشبّه لبلاصة في موقف قانوني سليم، خطوطو مرسومة تلوح كباقي الوشم في ظاهر اليد. خاطر انت و زهرك. تنجم تكون بلاصة قانونية لكن دهنها اتنحّى و في الحالة هاذي انت تخطف الدورة و هوما يخطفولك الكرهبة. في بلدان ربي الكل اكا الخطوط يبداو ظاهرين واضحين قول كل يوم يعاودو عليهم. و في تونس قول يجيو بالذمّة يقرقشوهم بش تبدا واحل زعمة هذا خطّ ولاّ حاشاكم زقّ عصافر؟

فتجيك بازيد دورة و بازيد تعب خير ما تجبد علي ساقيك من فوريار لفوريار. و بين قوسين، ما اكثرهم الهمّ! على كل زوز انهجة فمّا فوريار. لو جاو عملوهم باركينغات للكراهب راهي الازمة اتحلت ماكا العام. و انت و زهرك وين يهزّوهالك. تمشيشي تقول بالمنطق يهزوها لاقرب فوريار؟؟ تنجم توقف كرهبتك في باب الخضراء تلقاها هزوها لفوريار محمّد الخامس. اه امالا هكّا الدورة الاقتصادية اتمّ على قاعدة، كُتّ التاكسيات و ابدا دور.

ايّا سيدي، بعد تبادل حوار ودّي مع احدى الآنسات اللّى كانت ورايا و حاولت ما تخلينيش ناخو البلاصة، تمكنّت من الاستفراد بيها بعد تكشيرة جديرة بعركة في عرس فوق السطح.
هبطت، عملت دورة تفقديّة، الخطوط موجودة، هبطت على ركايبي انثبت من لونها، طلع ابيض مش اصفر و لله الحمد، خرّجت دوبل ديسيماتر و بديت نقيس. باهي، بعيدة ع الخط ثلاثة مليماتر ماكانش تتعدالك تجاوزت الخطّ، و بعيدة ع المادّة زوز صانتي، ماكانش تتعدّالك طلعت فوق المادة. الحاسيلو كان تتعدّى للطوليي و تقسم كرهبتك في زوز بالطول، تطلعلك ارتح الحكاية.

العمليّات الارضية مريقلة، لبست مراياتي و بديت نثبت ع اليمين و ع اليسار و بين اغصان الاشجار، ما فماش لا بوتو متع تزويد لا بوتو متع شنقال لا حتّى بوتو متع اعلان... توا قعد الصعيب. تسلّحت باكا الخمسمياة فرنك و مشيت للاوروداتور و يدي علي قلبي. دخّلت الخمسمياة (و هاذي نصيحة ديما ابداو بالخمسمياة خير لا تقعدو تتغبنو ع الدينار)، للاسف، طلع ما يخدمش، بلع اكا الخمسمياة فرنك يرّاهم حرام على اماليهم، و خرّجلي لسانو.

و يجيشي لمخك تقول نخطف الدورة نمشي للنهج اللي وراه بش ناخو تسكرة؟ رُدّ بالك! اللهم اني بلغت فاشهد. اللّهم، تبداشي في نهج مقابل بحيث كرهبتك ما تختفيش على نظرك و تمشي للاوروداتور البعيد مارش اريار، عينيك ع الكرهبة و انت موخر حتّى تسطع في بعض الحاجة ولاّ تطيح في فوسي ولاّ قمة. اما و الله ماكش بش تتمرمد اكثر من وقت اللّى يهزوهالك.
كي الناس الملاح رصاتلي عاودت خرجت الكرهبة و بديت نلوج على بلاصة جديدة فيها اوروداتور يخدم و هوما عمّال ماشين و ينقصو، قول بالشماتة يكسّرو فيهم بش تتلز تحط الكرهبة و يهزوها.

المهم، دعاء الوالدين يجيب، لقيت بلاصة اخرى، ثبتت من العمليات الارضية بالدوبل ديسيماتر، اتهنيت على البوتوات و الممنوعات، الامور زادة مريقلة، مشيت نجري للاوروداتور، اما المرة هاذي حطيّت يدي علي جبهتو و بديت ندعي و نقرى ما تيسير من السور بش يطلع يخدم.
انا عملت هكّا بش نحط الخمسمياة فرنك، و نسمع في العيطة : لاااااا ردّ بالك تحط!
اسم الله العظيم، اش فمّا؟ يطلعشي ولد حلال يحب ينبهني اللي هوا ما يخدمش؟ جاني راجل ملتف في قشبية و في يدو دبّوس. السّلام السّلام،
- اش تعمل بنتي؟؟
- كيما ترى بش نقص تسكرة للكرهبة.
- و فاش قام عليك؟ هات خليها عندي.
- لا و الله لا صارلها يعيش يا حاج. (ماو كلمة خليها عندي، نسخايبو يحب يخلص علي التسكرة)
- لا ما فمّا حتّى مشكلة، هاك تشوف، مصلّى ع النبي، الناس الكل تخلي كراهبها عندي و تمشي متهنية.
و يعمل هكّا يخرجلي من تحت البرنوس شكّ مفاتح ما يقلش ع العشرين مفتاح كرهبة، و على كل لون يا كريمة م التراكسيون للمرسداس. و بدى يوشحل ساعة على سرقة جماعة الشنقال و على استقطاعهم.

الحق الحق دخت في امري. توّا بانا منطق انسان يجي يعطي مفتاح كرهبتو لواحد واقف في الشّارع، لا يعرفو لا يدري عليه. اي واحد ياقف غادي يوريه شك مفاتح و يقلي كون مُهِنّي و يهز روحو و يمشي مطمان. تي نعرف عباد ما تعطيش كراهبها لا لمرتو لا لولادو لا لصحابو. اعميه في عين و ما تطلبوش في كرهبة. كيفاه انسان يجي و يسلّم بثقة عمياء في راجل مجهول في الشارع؟!

السبب الوحيد و المنطقي، هو كونهم على قد ما تليّعو م الشنقال، و العشوائية متاعو وصل بيهم الغل بش ياثقو في عبد مجهول و ما ياثقوش لا في بلدية لا في شركة لا في قطاع منظم. و يفضّل انو يمد خمسمياة فرنك و مفتاح كرهبتو لراجل في الشارع و لا يحط دينار في مكتوب الشركة!
علاه، هذا الكل حسد و بغض؟ ولاّ خاطر عارفين انو اعوان ها الشركات ماهيش تحترم في القانون؟ و عارفين انو بالحق قانون غاب و حكم القوي ع الضعيف؟

ها التجاوزات هاذي ماهيش بش تخلّى العباد تفقد الثقة في المنظومة بكلّها؟ (بون نعرف شكون بش يقول علاه كان عندهم فيها ثقة من اصلو؟). لكن نقصد انو اذا في ابسط الحوايج و في اقل خطوة تلقى اللي يحب ينتّفك و يتخبى وراء غطاء القانون و الشرعية، ف توموتيكي توموتيكي بش يولي عندك القانون و الشرعية حاجة جوفاء ما تعني شي و تولي تهرب منها تقولش عليها الجرب و تفضّل تقمّر كيما عملو جماعة المفاتح و لا تربّحهم فرنك من عندك!
و ها الشي نشوفو فيه في كل اوجه الحياة، ابدى م التهرب الضريبي، لظاهرة الرشوة، ولاّ مساومة البوليسية ع المخالفات، للعباد اللي ترضى تخدم بلاش وراق وبلاش تصريح عند السي.ان.اس.اس الخ الخ الخ... و شكون الخاسر في الاخر؟ ما خاسر كان المجموعة الوطنية اللي بش تمشي بمنطق ذراعك يا علّاف !

الحاسيلو عمّك الحاج باللي حكالي غرايب و عجايب و مواقف مأساوية، نسمع فيه و ندوّح في راسي متع اي معاك يا حاج لا تباركلهم و لا تختملهم، اما هي هي و قصيت اكا التسكرة المحنونة. و خرّجت ماركور اصفر فاقع سطّرت بيه ع الوقت (ماو عملوهالي قبل هزوها و مزال فيها وقت و كي العادة قيد ع الحوت و سيّب في البحر، قالك بلاّر كرهبتك ياسر نظيف ياخي عكس الضوء ياخي ما ريناش الوقت ياخي لازمك تدفع بش المرة الجاية ما تنظفش كرهبتك و ما تعطّلناش). المهم، رجعت للكرهبة و حطيت الورقة المدهونة بالاصفر، و كمّلت لصقتها بالسكوتش ، اش كون يعرف؟ يطلعشي فمّا كورون دار بش يطيّرها من بلاصتها؟
اما هيّ هيّ عطيت نومرويا للحاج مع دينار بش كان فمّا هكّا ولاّ هكا يطلبني... و يا جيبي لا تحزن!

بنت عايلة سبب التخلّف في تونس و العالم الثالث

2010-01-20T21:59:00.002+01:00

الغلبة هاذي صارتلي عندها مدة، ايامات راس العام. و شوف سبحانك يا ربي من راس العام لتوا و انا مزلت نرقل عليها و كل ما نتفكرّها يديّا تبدا تاكل فيّا و لتوا لا بردت و لا صفيت.
بسبب ظروف شخصية -بكلّكم عرفتوها طبعا- امّى قاتلي لازم نفرحو بالناس و نحضرو عشاء قمقموم. يا بنتي فكّ علينا اخطانا اتوا نتّكاو على الخبزة اللي بش يجيبوها و صلّى الله و بارك. و انا قلبي ما قايلي خير و قلت يا ذنوبي كان فيها عشاء الحكاية، كان اصلا ما وفاتش بنَتْنَة (و توا في مناسبة اخرى نحكيلكم علاه). زايد، شدت الصحيح و رصاتلي كي الناس الملاح هازتها لجيان بش تقضي اللي كتب من ربي.

وصلنا، الدنيا تملى و تفرّغ. العباد الكل، عيني ما تضر تشري و تكدس. و هاذي خاصية هايلة عند التونسي، في نطاق التعايش السلمي مع الحضارات و تلاقح الشعوب، كل ما فما مناسبة فيها ماكلة وهرج كل ما هو محتفل، سواء يمّن ولا ما يمّنش. العيد، عاشوراء، خرجة سيدي بوسعيد، عيد ميلاد بوذا، اللي حاضر يززي...

ايا سيدي امّى عجبتها القنّارية، فيولات جديدة تعمل الكيف. قاتلك نعملو قنارية محشية. الله يبارك. بدات تكدس و تحط و تتلفتلي هوما ياخي قداه؟ استنى اساعة، نحن قداه؟ عندك نحن و عندك كلوفية هذيكا نعرفها ما تجيش وحدها و عندك دار خوالك و دار عمامك و عندك جارتنا فلتانة و بنت عمتها فلانة، و عندك ولد عم بنت خالة جار العطار متع الحومة، مايجيش عشرة عمر ما نستدعاوهمش!
نطقت من اجنابي، قلتلها و انت فاش قام عليك ما تستدعاش العباد و تقعد في الحشمة، مش كان نسكرو النهج بباش و نعيطو لأمة محمد خير؟

باللّى قلت باللي سميت، شي، انا نجري بالشاريو و هي تجري ورايا و تكدّس في القنّارية و تسميلي في احبابها و انسابها اللي بلاش بيهم كل شي يبطل.
آخر ورقة في يدّى، خنقت صوتي تقولش عليّا خانقتني غصة البكاء و قلتلها كان ما الجماعة يتفجعو م الحضبة و يوهقو و يشدو المزفّت و نقعدلك على قلبك...
بالتصوير البطئ، امّي يدها اتجمدت في الهواء...عاودت هبّطت القنارية بهدوء شديد. و على مرتين بش تعاود تفرغ الشاريو و تعطي على ساقيها للريح لا عشاء لا حتى شربة ماء و تمشي تلم سبعة حجرات بش ترميهم ورايا نهارة اللي نخرج م الدّار.

ما صدّقت لربي، مشيت نجري للراجل اللي زارعينو في وسط الخضرة بش يحطلي الاسوام و يحطهملي في شكاير و انا ندز في الشاريو بكلو حشيش قول بش نعلف بهيم. ايا وصلت، لقيت قدامي زوز نساء، استنيت دوري كي المرا المليحة. جا بايي، بديت نرصّفلو و نكدّس و الراجل العرق البارد يسلت عليه. بما انو حكايتي مطوّلة، ما نعرفش كيفاه شبكنا الحديث و بدا مسكين يتغبّن على سعدو و وعدو.

طلع مسيكن امترز في الانقليز و ما نجحش في الكاباس قداه من عام. ما لقاش خدمة في دومينو و اهلو ما عندهمش باش بش يصرفو عليه، رصاتلو خدم على اكا الميزان شدّان يد. هوا مزال بدى يحكيلي انّو خطيبتو تحب تفسّخ الخطوبة خاطر تقدّملها ولد الجيران اللي ما يكتبش اسمو ع القلّة اما بوه عملّو حمّاص، و انا مندمجة في الحديث، فجأة نسمع في العيطة:

- لاااااااا، مش معقول هذا مش معقول!
على نيّتي، اتلفتت للمرا اللي ورايا و قلتلها:
- شفت بالله ملّا غلبة؟ الشهايد ماعادش توكّل خبز!
- انا شهايد و انا خبز؟؟ مش معقول اللي تعمل فيه انت يا للّا !
- انا؟؟؟ اش فمّا؟؟
- لااا حتّى شي! شنوّة اللي حاطتو فوق الكنتوار هاذا؟
- شنوة هاذا؟ قنّارية!
- اي مش معقول بش تعطّلنا الناس الكل!

تلفتت ورايا نلقى صفّ لا باس بيه، يجي عشرة م الناس يستناو في طرحهم بش يوزنو الخضرة. توا صحيح انا عندي كميّة كبيرة، لكن انا في حقّى جيت قبلهم. و لكن بما انّو الحكاية مزالت ما وفاتش و نحب نعرف الخطيبة شكون بش تاخو، قلت بربي خ نجبد روحي على جنب و نعديهم و ناخو راحتي في التنسنيس. انا مزلت بش نعمل خطوة على جنب و فجأة نسمع الجملة اللّى جابتلي حالة الثّور (و اللّى نسى شنوة هي حالة الثور و الّا مزال جديد بيناتنا هاو الليان اللي يرجعلو) :
- هاو علاه نحن التوانسة بش نقعدو متخلّفين، ما نقدّروش الاخرين و ما نعرفوش الاحترام!

بالتصوير البطئ ايضا، ندورلها و نعمللها كحرة تحكي معايا سيادتك؟
و بدات المدام تعمل في موشّح اندلسي على احترام الاخرين و على التقدم و التُّخُلّف و بش تشكي بالراجل اللي شادد الميزان و كان لزم بيّا انا، خاطر العباد اللي كيفنا هوما السبب في الفوضى و تخلّف بلدان العالم الثالث...
ما غير ما نشعر نطقت قلتلها :
- و الاحتباس الحراري؟
- إح... إح... تتمقصص عليّا؟؟؟
- امالا اش تحبني نعمل؟ تي احمد ربي شادة روحي لتوا لا اتطرشقت بالضحك!
- علاه مسكرتّو قدامك؟
- بربي يا مدام، النظام و التطور و احترام الاخر، مش لازم عليك تحترم كوني انا جيت قبلك؟ و اللي انا في حقّى؟ و اللّى سيادتك قاعدة تعتدي عليا بالقول و تقلّق فيا و انت على غلط؟
من حقّى نشري قد ما نحب و من حقي -كي يبدا طرحي- نتعطّل قد ما نحب و من واجبكم بما انكم جيتو بعدي تستناو حتّى نكمل. هاذا هو النظام و هذا هو التحضّر.
- اي و انت علاه ما تقصهاش وحدك القنّارية؟ علاه هوا يقصّهالك؟
- خايفة على ظوافري. باهي هكّا؟؟ مدام تابعة خدمتو، انا يا اخي نحبو هوا يقصّهالي. اتدبّر فيا اش نعمل و اش ما نعملش؟ اللي مزروب يمشي يقضي من بلاصة اخرى. اي عاد وين كنّا في الحكاية يا خويا، اش عملت مع ولد مولى الحمّاص؟

المرا بدات ترقل ترقل حتّى قلت تموتشي في جرتي العزا؟ و قلبي عاود حنّ و قلت بربي خ نخليهم يتعداو. انا مزلت ما نطقتش و وحدة اخرى تبعثلي زريقة ارض جو :
- بنات عقاب الزّمان. حتّى طرف قنارية ما تعرفش تلويها...
- لا اختصاصي لويان العناكش... ( و الجملة هاذي بسترة ربي زرفت منّى بالشوّية، ما سمعتهاش كانشي راهم دوّرو جيان للمركز).
- اش قلت؟
- قتلك عندك الحق. و انت تبارك الله حاذقة، مش كيفي. ايا اتفضّل مدّ يدك للبركة و عاونو بش نكمّل فيسع و تتعداو!

المرا الثانية كيف كيف غزّلت غزّلت و خلات الخضرة و هزّت روحها و روّحت. ياخي اش عندي قلتلها انا؟ ربي يعفو.
ايا سيدي انا بديت نلم في فرتي و قريب نكمّل و امّى جاية من بعيد تشلوح بقطة معدونس و شكارة بصل قاتلي ايا خلّطتهم. نخطفها من غادي لغادي قبل ما يدغرها واحد بسكينة و قلتلها هات لهنا، خلّي امبعد خير ما نتعفّسو ها الليلة!
نهاية الحديث، المرّة الجاية رد بالكم واحد يخطرو بش يتعدى قبل الاخرين ولاّ بش يغلب العباد بالصوت. فما حظوظ وفيرة بش نكون شادة الصّف و ما نضمنلكمش كل مرة بش نتمالك اعصابي!

غــــــــــــــزّول كــــــــروي

2010-01-18T22:09:00.001+01:00

قررت كي نبدى نغزّل على حكاية طول نكتبها. خاطر كي تبات نبخل عليها و نقول بربي علاه نكسر في كرايمي على حكاية بايتة. و برشا خرافات نسيتهم و الا بردت عليهم في حين كنت نتمنى نرجع نكتب و نشكر كل من سأل على مولات الحانوت و استفقدها.
الليلة فما تصاور متع ملاعبية المنتخب في قعدات خاصة قاعدين يدورو و عاملين buzz و العباد قاتلك الخنار هاذا هوا السبب العميق للفشل الذريع والمدوي لفلالس كرتاج.

و لو ماعادش عندي اهتمام بالكورة من اكا العام، و لو ما نعرفش لا شكون يلعب لا مع شكون، لكن ها التصاور و بلبلة المدربة الوطني على تونس سبعة خلاو الدم يغلي في راسي، خاطر نفد م العباد اللي تعمل ضجة و خوماضة بش تضيّع حقوق الناس في باطلها. نوع عرك اغلبو بالصوت و اتفرشلو موت.

اساعة سي المدرب الوطني جدا متاعنا عجبني في اكا التخميرة متاعو و كيفاه دخّل خطاب الوطنية و ما عندكمش الحق لا تسألو لا تناقشو لا تقولو هنا بير. لازم من باب الوطنية لا تتكلم لا تنقد. تكتّ الفلوس و فمك ساكت و يديك تصفق و تنصر منتخبك رابحا او مربوحا. و ما نعرفش علاه ها الكلمتين ذكروني بخطاب الوطنية و التخوين اللي ولّى لوبانة.
اللي هذا يحطلي درابو تونس عاملو cache-misere . و كي تحل فمك و تقول شنوة ها الخندق اللي وراء الدرابو، يقلك آآآآ تحكي على درابو تونس؟؟ و تونس هي بلادي و تونس هي موجودة قبل ان يكون التاريخ، و نحن خير من السيراليون و عنّا حرية خير من وزيرستان الخ الخ الخ...
الخــــــــــــــــواء الفكري، ماعندهاش كلمة اخرى.

هذا بالنسبة للسيد المدرب، و اللي لا هوا لا اعضاء الفريق من الأيمّة ولا من الرسل منزّهين ع الخطأ و معصومين و لا تجوز لا مناقشتهم و لا محاسبتهم. تقولش باعثين جيشنا يحارب و نحن وراه بالهلّالو، انزاد النبي و فرحنا بيه. راهي كورة ياناس و راكم ماكمش شادين علينا السماء لا تطيح و ماهيش مزية. قاعدين تخلصو و تخلصو شحم يهود، من لُقمتنا و على حساب قراية ولادنا و على حساب سبيطاراتنا و على حساب أمننا في كياساتنا. الدولة مش تجيب فيهم م الواد اكا الملياردوات بش سيادتكم تتشلحقو على طولكم في طيارة يرتع فيها البهيم.

هاذا بالنسبة لحكاية مبدأ المناقشة و المحاسبة من اصلو. اما بالنسبة لاكا التصيورات اللي يدورو و اللي هذا يتحي و لاخر يزكي، فما نراش فيها الا بداية لجعل الملاعبية كبش الفداء من قبل المسؤوليين الحقيقيين و تعبير عن كبت و حقد من شباب محروم من ابسط رفاهيات العيش.
توا كوارجي كي يعمل كنتراتو مع المنتخب، كنتراتو شنوة ياخي؟ يلتزم بش يترهبن و انا ما فيباليش؟ تخلّص فيه بش يقعد عاقل و متربي و م التران للدار و م الدار للتران؟
شباب في منتصف العشرينات و تخلص فيهم بالملاين، اش متوقع يعملو؟ يبني جامع و يمشي يبحث؟ ماو بش يغرم زمانو، و كي تجي تشوف هوا حر يا اخي ما نحاسبوش على حياتو الخاصة.

تقلي خرج يسهر ليلة الماتش و الا تخلف ع التمارين و الا ماكانش متوازن بحيث اخل بالمستوى المطلوب، وقتها نعطيك وذني و نقلك اي بالحق امالا لازم تمشي تفسخ العقد و تسترجع فليساتك. اما بش زعمة زعمة تنشرلو صابونو قدام الخلق في هاو سكر هاو سهر هاو بنات، يظهرلي حاجة ما تخصكش و راهو كنتراتو كورة ماهوش استعباد بش تدخل تحقق معاه اش عمل في حياتو.
و انما المسؤول الحقيقي هو العبد اللي في بالو بها الخنار الكل و مع هذا مشى تعاقد معاه و يخلّص فيه باربعة او خمسة اصفار على اليمين. هاذا العبد اللي ما توخاش الدقة و الانضباط و اهدر الاموال العمومية. ايجا لهنا، كي انت في بالك بيه ما يصلحش، اش موصلك ليه؟ ليه ترمي في فلوسنا في التراب؟

و فرد مرة ، العباد اللي كانت شادة ها السكوبات ع الكوارجية، شبيها سكتت لتوا؟ علاه استنات حتى زلقو بش خرجتهم؟ العبد الحريص على مستوى بلادو و على تمثيل اسمها من زمان يفضح الاعوار و ما يخليش الامر يستفحل.

بربي اخطاونا من حكاية الكورة. هاتوهم الفلوس رخصولنا فرنك في حق الخبزة ولاّ اعملو خمسين دينار جراية عاطل عن العمل، تي بربي براو لمو بيهم العباد اللي بايتة ع التروتوارات و الا العباد اللي تلقط في الخبز م الزبلة، ماهمش زايدين علينا ها الفلوس.

ديــــــمـــقـراطــــــــية 1/1

2010-01-06T21:53:00.002+01:00

رجعت و ما عيني في رجوع ها المدّة. غير الله يهدي اللي كان السبب.
ماو كي نمشي عند مدوّن مفكّر و فيلسوف و خاصة خاصة ديمقراطي و يدعو الى الحوار البنّاء و عدم الاقصاء و نخلي تعليق، و نقعد نقانص نستنى تفسيرو و مع هذا يطفي الضو لا يجاوب، لا ينشر التعليق من اصلو، نحس بالغبن .
اش نعمل وقتها؟ ندق باب الجزيرة، منبر من لا منبر له؟ و تتعدالي تهمة الاستقواء بالاجنبي؟ ماو كي الناس الملاح نتذكر اللي عندي حانوتي نعاود نحلو و نعاود ننشر التعليق و السؤال...
اشكون يعرف؟ لعل السيّد ما وصلوش التعليق؟ لعل اتشال و ترفع بقدرة قادر من غادي لغادي و نطلع ظالمة الراجل؟

و لو نحب نطمّن الناس اللي تدخل في حوارات مع "الوطنيين " انو حوادث اختفاء التعليقات تتكرر برشا، و لذلك لا داعي للجزع. يا حسرة قبل ايام الغفلة، كنت نبلع السكينة بدمها و نقول البيّنة على من ادّعى. اما بعد ما حلّولنا عينينا على اختراع توثيقي عظيم اسمو كابتور ديكرون، وليت كي الناس الملاح حتى انا نخبي تحتي مستنداتي على ما ياتي.

للي ما تبعش الحكاية، نقلو الهدرة و مافيها، انو البرلمان الافتراضي حبّ يعمل انتخابات جزئية. في اطار المدّ القزوردي اللي صاير ها النهارين، فما جماعة وطنيين حبّو يترشحو و يمثلو التيار الوطني في البرلمان الافتراضي (و لو هاذي اكبر مفارقة ريتها في حياتي).
اغلبية الجماعة فدّو و قالولهم يا اخي خالطين علينا لهنا؟ ما يزيش وين نقبّلو نلقاو طلعتكم البهية؟ اعتقونا لله في سبيل الله . اما هي هي، و في اطار اكا مكبوبة السعد الحرية، قالك يا اخي خلّي يترشحو اما متأكدين التصويت مش بش ينصفهم... و كذلك كان الامر.

الجماعة يظهرلي شموها قارصة و الا تنبزو من برشا زرارق ارض جو، خذاو في خاطرهم و قالك انتوما جماعة خاطيكم الديمقراطية و جماعة ما فماش معاكم حوار. في خضمّ ها الاحداث الشيّقة، زوز مدونين خوان (اخوة يعني مش اخوان لا نصبحو نبحثو ها الليلة) ما بيناتهم كان الصلاة ع النبي، صار بيناتهم حوار ودي جدا في اطار تفاعل الحضارات.

يجي المدون "فكّر و انجز" على اثر ها النقاش البنّاء و ينشر الحوار في مدونتو يتشكّى قالك مضامين و جانبهم مهضوم
Même lorsqu'un interlocuteur de bonne volonté tends sa main pour faire un vrai débat pluriel, l'opposition ne sait pas lui tendre sa main. C'est bien dommage entre compatriotes... et c'est bien dommage pour la démocratie !
.وينتهز الفرصة بش يعمل اسقاط ع المعارضة و يكمّل في سيري تدوينية بشكل ما تبرر عدم استحقاق "الرعاع" للديمقراطية، طبعا على لسان افلاطون، خاطر نحن عايشين في المدينة الفاضلة.
ليعالجه فيما بعد ببوست ثاني وقع فيه اتهام المدوّن تيتوف انو خااااااف و اترعب و جاه بوصفير من محضر اثبات الحالة، ياخ مشى يهرول و فسّخ تعليقاتو من حيط البرلمان.
La crédibilité d'un député, quel que soit le parlement dont il est membre, ne tient qu'à sa parole. S'il est convaincu, si c'est un vrai militant, si c'est un vrai patriote et s'il a le moindre respect pour ceux qui l'ont élu, il persistera, coûte que coûte, en âme et conscience. Non pas par idéologie, non par par obstination aveugle mais par honnêteté intellectuelle. Par honnêteté tout court ! (...)
Alors qu'il a complétement dérapé, il a cru qu'il suffit de supprimer ses propres commentaires sur FB pour que l'oubli cache définitivement son dérapage. Il a oublié qu'Internet a de la mémoire et que les captures d'écrans ne mentent pas
بالطبيعة اللي يتبع مدونة موطني ، يعرف اللي سي تيتوف متعود على اللهجة الحادة في النقد متاعو و اللي مافماش علاه بش يخاف من "فكّر و انجز" و كرشو تدور.

بااااهي توا واحد لحد هنا يقول فخّار يكسّر بعضو. لكن، كي يتبيّن بالكاشف انّو اللي فسخ التعليقات ماهوش تيتوف، و كي يتبين بالكاشف انو اكا الاتهامات متع التخاذل والجبن ماهيش موجودة، اضعف الايمان لمن يدعو للشجاعة و الصمود و للنزاهة الفكرية و النزاهة تو كور، م المفروض انو يمشي يا يعتذر (و هاذيا تبطى) و الا طبعا يمشي يفسخ البوست بكلو، لانو فيه اتهامات مبنية على واقعة ما صارتش.

لكن non seulement سي الديمقراطي متع الحوار تلّف الهدرة، و اتعدى يكمّللنا في دروس الديمقراطية، و انّما ما نشرش تعليق ليّا نسأل فيه شوية اسئلة وجودية. و كررت الطلب مرة اخرى و قتلو وينو تعليقي، بالطبيعة حتى هذا تاه عن طريقه في مجاهل الانترنات.
و حبيت ننتهز الفرصة بش نحط التعليق هنا (بفضل محاضر الاثبات اللي تعلمناهم من عندو) و نستنى ردو عليها طبعا.

بااااهي، هاذا بالنسبة لها البلبلة اللي ما عندها معنى، غير متع واحد يتلكّش. توا نجيو للغابة اللي وراء ها السجرة. عنّا مدة زارتنا البركة و حل بين هذه الربوع ركب الوطنيين و الحق الحق رخينا فيهم العين و ما فرحناش بها الاطلالة. كي تجي تشوف معذورين، وين نقبّلو نلقاوهم، في التلفزة، في الفايسبوك، في الجرايد، في الخدم، في الشعب، في المهرجانات، في القهاوي، و يزيد يكملو يخلطو علينا لهنا؟
قول باهي يا سيدي، ما فرحناش، لكن ما قيمناش القيامة و ما اضطهدناهمش و ما قمعناهمش و ما همّشناهمش. اللي يرى ليستة التهم و التشكي و التبكي يقول هدّو عليهم في ديارهم و عطاوهم طريحة نبّاش القبور.

ماو يطالبو في حقهم في التعبير ( و لو هاذي نكتة الموسم)، يا اخي من حينك، قول ، عبّر، صوّر، اشطح، النبي مولاك. لكن يا اخى نحن زادة عنا حرية عدم الاستماع. عنّا حق عدم ازعاجنا. لازم انت تكتب و انا نبارك؟ و لاّ انت تقص و تلصق و انا نهلل و نعلق؟ اللي تكتب فيه ما يهمنيش، ما يمتعنيش، ما يقدمليش اضافة، انا حرّ بش ما نتفاعلش معاك. بالسيف زادة؟
تي هي التلفزة اللي ماشية بالاتاوة، الواحد حتى كي يفكر يقول نحلل فلوسي و نتفرج فيها، يقول ليه على خمسة دينارات نركب لروحي السكر و الدم؟ في المال و لا في صحة الابدان.

و السؤال الاخير، شنوة الهدف متاعكم من ها المد القزوردي المفاجئ و القصف العشوائي بالبندير؟ آشنية الغاية؟ بش تستقطبو الشبيبة؟ يا اخي الشبيبة عايشة في تونس راهي، اكا اللغة متاعكم ممكن توكل خبز في المحافل الدولية و حتى العربية، تي برا قول جماعة بوتسوانا و انغولا، اما نحن توانسة، دود الخلّ منّو فيه، شنوة بش نبهبرو على بعضنا؟ ولاّ الزيت المعلق؟؟؟
و زيد تبارك الله و الصلاة ع النبي، الحزب مش في حاجة لاستدراج منخرطين، خاطر حسب الارقام اللي تقدمو فيها متع زوز ولاّ ثلاثة ملاين منخرطين، ما قعد كان جماعة الحضانة و المحرومين من الحقوق المدنية ما انخرطوش فيه!

و آخر كلمة بما انو ها الموضوع ماهوش عندي بالاهمية بش نعاود نرجعلو، علاه بعد اكا الخوماضة على حق الانضمام لتن بلوغز و حق التعبير الخ الخ، بات الحسّ و قيّنت الدنيا بالقص و اللصق، ياخي دارت جبدان شبوك مع المدونين . هاو واحد تجبد، هاو واحد قوّلتوه اللي ما قالوش، هاو بروفيلات مضروبة ع الفايسبوك تدخل تنسنس بيها ع المدونين، هاو بروفيلات موازية لبروفيلات المدونين تنتحل فيها صفتهم، الخ الخ من العاب توسيع البال متع واحد فاضي شغل...

و بما اني طولت الحديث و الجماعة مغرومين بتلوين الكلام المهم بالاحمر، هاو شنوة النقاط اللي طالبتهم،

سحب بوست حيط داخل في تونسي
تفسير سبب دخولكم للمواقع المحجوبة و موقفكم منها
تقيلونا من حقكم في التعبير خاطر قاعدين تمارسو فيهو اذا عندكم هدرة تصلح و تهم العباد، توا وحدهم وحدهم يشدو الصف بش يناقشوكم
تعتقونا من الصبيانيات و شريان الشبوك م الهواء

المـــــــقاربة الهــــررية في مجال الصـــحة العــــمومية

2010-01-01T13:02:00.000+01:00

عيدكم مبروك و سنين دايمة و انشاء الله السنة خير من عمناول. و بين قوسين، مازلت مش متأكدة النحس متاعو موجه ضدي شخصيا ولاّ حالة عامة. الشي الاكيد انو ما تعداش عليّا في حياتي كاملة، عام اتعس منّو. وقت اللي خرج، قريب بش نخرّج عشانا و قازنا و صالتنا وكان لزم بابا و امي صِدقة، غير جات حشمة م الضياف و اكاهو... الحاسيلو، ها العام أَبَى ان يفارقنا الاّ ما يزيد يمركي حضورو. في آخر ايامو كمّل هزّ معاه وحدة حبيّبتنا، الله يرحمها و ينعمها.

المرا مسيكنة كان عندها "اكا المرض الخايب"، اهوكا مراعاة لحساسيات بعض العباد اللي يخافو م الفال و يخافو لا تنقزلهم العدوى حتى م الايكرون، ما سمّيناهش (ولو لتوّا نحب نفهم ها النظرية شكون طلع بيها، و كيفاش ينجم واحد "يِتعدَى" بيه، و اللي يمرض مسيكن، الناس الكل فِرْ فِرْ من بحذاه).
الحاسيلو، المرا مسيكنة ما اتقصفتش في شبابها بيه. يا ريتو. ع الاقل الواحد يقول عمل اللي عليه و الباقي على ربي. اما مشات ضحية بهامة العباد...

توّا فماشي انسان يداوي بالكيمياوي (مش متع صدّام) و المناعة متاعو في الحضيض و الكريات البيضا تلعب ع السقوط، تمشي انت تهز روحك و تلصقو و تبدا تبوس و تعنّق و تتلبّق... خاصة وانت عندك في داركم شكون مريض بانفلونزا الخنازير؟؟؟ الانسان الواعي يقلّك، لا ما نمشيش خاطر انجم نكون porteur sain !
باااهي، يجيشي منو انسان يداوي بالكيمياوي و المناعة متاعو ضاربها بو سخسوخ و انت لا يزي porteur sain و تزيد ضمانا للنجاعة الهجومية تكمل تهزّلو واحد هوا بيدو مريض بانفلونزا الخنازير؟؟؟ الانسان الواعي يقلك نلطخ راسي على حيط!
و هذاكا اللي صار. مرا حبيبتها مشات تطل و تزور و هزّتلها في يدها بنتها مريضة بالانفلونزا و تعمللها بوس تتّا.... يعطيك و الله وباء... نهارين في الانعاش و العناية المركزة و صاحب الامانة هزّ امانتو...

توا المرا توفات و الله يرحمها. لكن اللي نحب نفهمو، شنوة قلّة الوعي الصّحي اللي عنّا؟ علاه اللي تقلو يا اخي ما نحبش نسلم بالبوس نخاف لا نتعدى ولاّ لا ننقل الجرثومة لعبد مريض، يشيخ عليك بالضحك و يقلك يا قننّو. ولاّ يطيح يحب يبرهنلك اللي ما فماش منها الحكاية و اللي هي خطة صهيونية بش المسلمين ماعادش يبوسو بعضهم و تتقطع بيناتهم اواصر المحبة و صلة الرحم؟
يا سيدي، اوصلني من بعيد لبعيد، ما نحبش ناخو الريسك بش نحط عبد في الحنديرة (انا لقّحت و وفيت) بش سيادتك تشيخ كي تدبغلي وجهي بالحميّر. تسالني؟

علاه ولّى الخمج و العفن عنّا حاجة عادية جدّا، و علاه اللي يعترض ع الخمج يولّى تكركيرة عند العباد؟ توّا يا رسول الله معقول تدخل لمطعم تلقى قطوس مجراب يتدحنس ع الطواول و ساعة ساعة ينقز فوق طاولة ياخو و يعطي معاك في الكلام و كي تتجرأ و تعترض، يقولولك قطوس الرستوران؟

تي في المطار الدّولي متاعنا، اي اي اكا مطار تونس قرطاج اللي يهبطو فيه التوريست، واجهة البلاد، ماو وين الاسانسور، فما قعدة بالكراسي و وراها فمّا حوض حاطين فيه شوية نباتات بلاستيك مغروسين في طرف حُصحاص؟ يجيشي لمخك انت قاعد في امان ربي و يدخل قطّوس، يحفر حفرة في اكا الحصحاص و يعمل عملة و يردمها و العباد تتفرج عاااااادي و لا تحركتلهم شعرة...
يخطرشي على بالك، انّو في مؤسسة طبيّة عريقة كيما الرابطة، في العمق الهجومي لقسم القلب، في الحصن الحصين متع العناية المركزّة، اكا اللي العباد بيدهم ما يدخلولهاش، و يطلّو على إمّاليهم م الشباك من وراء القضبان تقولش عليهم يزورو فيهم في المرناقية، و وسط ها الاجراءات المشددة، يخطرشي على بالك انو قسم العناية المركزة عندو "قطّوسو"؟؟ و يبات في خزانة الملاحف المعقمة؟ و الصباح يتدحنس ع المرضى و ينقز يستقات باللّى فيه النصيب م البلاتوات متع المرضى؟
اش كون يعرف يا اخي، لعل عنّا عرق فرعوني و نقدسو القطاطس و مافيباليش...

تدويـــــــــــــنة بالجــــــــافال

2009-12-25T18:27:00.003+01:00

و كسبنا رهان تنظم باليه فوق السّحاب

2009-12-12T07:51:00.000+01:00

برغم الاجواء العامّة في البلغسفير التونسية و اللي ما تشجعش ع الكتابة بالمرة، قلت برّا سيدي ارمي عصاتك مع العصي و حاول تكتب باللي قدرك عليه ربّي في انتظار تصير موبقة م الموبقات ولاّ تندلع عركة م العركات و تحلّ بركة ربي و يحمي الوطيس و يحفل الجوّ...

المهم، اختفائي المفاجئ من شاشات الرادار كان بسبب زيارة عاجلة إلى احدى الدّول الشقيقة و الصديقة. اهوكا مسخّنة ظهري بالدول العربية و كان كلات بعضها نمنع من تهمة الاستقواء بالاجنبي، ماو كلّنا في الهمّ شرق؟
و بين قوسين، مانعرفش علاه كلّ ما نتعثّر بها الجملة العظيمة متع الاستقواء بالاجنبي تجيني الضحكة. في مخّى طول تجي تصويرة رياضة رفع الاثقال !
اهوكا اتخيّلو المعارضين متاعنا هازّين كوشنار ولاّ ساركوزي، في عوض البار الحديد و هوما يهزّو فيهم على كرايمهم بش يقوّيو عضلاتهم، و يبداو النبي مولاك، لفوق اللّوطى، لفوق اللّوطى و العرق يِسْلت...

معليناش يا خويا، من ها المواضيع الزلقة و خلينا في فركة الصابون متاعنا. اي عادي سيدي، كيما في كلّ سفرة، ماغير ما تشعر، بعد نهارين ثلاثة يصيرلك adjustment و ما ترجع تحسّ بالموروث الثقافي و الهويّة الوطنية إلاّ عند اوّل احتكاك مع الكائن الناطق الذي درجت بقيّة الشعوب على تسميتو "بالتونسي" و لا بد من الاشارة هنا لوضع حدّ للاقاويل و الشائعات المغرضة، الى انّه من المرجح كونو، وبرغم جميع المؤشرات الاوّلية، الفصيلة هاذي تنتمي الى صنف البشر.
خاطر كي تبدا جاي من امريكيا، على دخلتك لاوروبا تحسّ بصدمة ثقافية، معقول. تبدا داخل من اوروبا لدولة منغوليّة (اهوكا بش ما نقولوش متخلّفة)، باقي يتعدّى... لكن داخل من دولة شقيقة الى تونس و مع هذا تجيك صدمة ثقافية، ماقالش بيه ربي!!! اشكون قعدلنا بش نهزّوا اكتافنا عليهم و نبهبرو؟؟؟

الحكاية و مافيها، انّو المرّة هاذي، ما قمتش أنا بعمليّة التسجيل في الكاونتر متع الخطوط التونسية ( اللي بش نودّهم بتدوينة وحدهم بش نفرّغ قلبي فيهم على قاعدة)، و بالتالي، ما اخترتش الكرسي بنفسي. و اللّي سجللّى، الله يهديه و إلاّ الله يدّيه، كيما تحبو افهموها، في بالو خدمني خدمة العمر و دلّلني دلال لا قبلو لا بعدو، يعمل هكّا يوخّر و يقدّم و يزرعني في آخر كرسي في الطّيارة!
التشخنيق مش باهي، حتّى كي طلعت الطيارة شطر فارغة (ماو انا من احباء السّفر في الفجاري)، قلت خ نشد اكا الكرسي اللي مكتوب باسمي، حتّى كان صارت حاجة ولاّ حاجة لا قدّر الله يعرفو انا كركاسة يمدوها لدارنا.

ايا سيدي، شديت بلاصتي، اتلفتت يمين يسار، و الله البلاصة مش دونيّة لاكا الكلّ. عندي نظرة بانورامية ع القاعدين اذا تاقت نفسي للتنسنيس و ما فمّا حد بحذايا بش يكسّرلي كرايمي، كانشي زوز شباب عاقلين، خانسين حتّى عينيهم يحلّو فيهم بالسيف (وين و وين بش فهمت اللي الزّويّز شاربين حتى دايخين) ، ساقتهم الاقدار قدامي بالضبط.
نفخت المخدة الجويّة متاعي (الحمراء طبعا)، جبدت الايبود دكّيتو في وذني و فركت يديّا فرحة مسرورة نهنئ في نفسي برحلة مريحة على متن خطوطنا الوطنية و في احضان شعبنا العظيم...

بش ما نكذبوش، من الناحية الموضوعية، شهقات الاعجاب و السرور و الغبطة من اخواننا العرب بالطيّارة و نظافتها و حداثتها، خلاّت اوداجي تنتفخ فخرا و ازبهلالا بالقفزة النوعية اللي تشهدها بلادنا و بتجربتنا الرائدة بين الدول المتخلّفة و بالاهتمام الخاصّ الذّي يوليه ...... ستـــــــــــــــــــوب! ظاهر فيّا ضربت عدوى سندروم تونس سبعة اللّي قاعد يدور في المدوّنات ها النهارين! هاو شلبوق ذاتي بش نفيق.
اما بالحق، على مستوى التجهيزات، نوثيغ تو ساي... و هذا اللي يدّعم الرأي القائل بكون ازمتنا ازمة على المستوى الانساني بصفة أولى و كان (و سطّرلي تحت الكان) كسبنا رهان النمو الاقتصادي و تعصير البنية التحتية، رانا خسرنا الانسان و افرغنا العباد من السوفتوير

اسّاعة يا سيدي بن سيدي، و بحكم التموقع الاستراتيجي متاعي بحذا تركينة المضيّفين، انتفعت بالبث المباشر لنقل وقائع سهرة حميمة بين المضيّف و مرتو في تفاصيلها الدقيقة. و ما شفعليش الايبود اللي علّيتو ع الاخر و لا انزلاقي تحت الكرسي بش نمنع من ها التشويق و الاثارة... على قدّ ما تكمّشت و تذوبنت ، راسي دخل بين اكتافي كي الفكرون و باقي شي !
اما الحق الحق خذيت في خاطري منهم، خاطر في بالي انفردت بالبث الحصري، ياخي طلع صوتهم واصل لاخر الطيّارة، ما سكتو كان كي قاملهم راجل سبّلهم سلسبيل عرشهم من حامورابي و انت هابط.

ايا مش مشكلة، قلناها قبل، المخبّي ع الاحباب عذاب، شدّينا المزفّت و حلّقت بنا الطائرة في الاجواء و استتب الهدوء و الامن. مزالت ما خذاتنيش عيني، هكّا كيما تقول بين نومين، و فجأة بدون موسيقى جينيريك، نلقى روحي في فيلم السيّدة ولاّ عصفور سطح... عياط و زياط و سبّان و نعلان و اللّى بيك و اللّي صفتك و احترم نفسك و بش نجيبلك الامن اوّل ما نوصلو و مانيش بش نخلّيك تدخل للبلاد و بش نستفعل فيك، الى اخره من عطر الحديث...

طلعت راكبة تعاركت مع الشّافة متع المضيفين (لتوا لاني فاهمة علاه امّا ع الاغلب الحكاية فيها قحرة ولاّ حُقرة ولاّ الزوز مع بعضهم، الله و رسوله اعلم)، نتّفوا ريش بعضهم في زوز و قريب لا وصلت لليدين! ساعة و نص يا خلق ربي، ساعة و نص و زوز نساء بقدرهم و بكرامتهم و بمستواهم، معلقين في السماء بين لطفو و قضاه و هوما هابطين شطلى اطلي و عرك متع حمّام و العرب مخرّجة باكوات الشيبس تتفرّج عليهم و تقرمش و ساعة ساعة كي تتقال مفردة ما يفهموهاش يستعينو بالمهارات اللغوية المحلية من الركّاب التوانسة!

لا و الغلبة وين؟ ما حلاتلهم العركة كان بحذا التواليت! ساعة و نص و هوما سادّين الدخول لبيت الراحة ع العباد، اللّى م الغصرة ولاّو يرقصو في الباليه على طراطش ساقيهم و يجبهيو عليهم و يعرّضولهم في السيّدة المنوبية و سيدي بلحسن بش هزّو رواحهم كمّلو الطرح لبعيد. هوما فكّو الحصار من هنا و راقصي الباليه دوّروها طرح كاتش شكون بش يدخل قبل، ربح فيه واحد م العاقلين اللي كانو يسكرو.
و لو نحب نحييه، خاطر برغم اللي السكرة طيّرتلو مخّو، قعد فيه م العقل ما يكفي بش ما يفكشّ ضيقتو في الكولوار، على عكس اكا الزويّز اللي حلّوا خندق كامل قدام الخلق لا حشمة لا جعرة...

في ها السفرة السعيدة، في ظرف ساعتين م الزّمان، كمشة من مواطنينا الاحبّاء، حسسوني بفداحة خسائرنا مقارنة - مانجبدوش ع الاجانب و ع الغرب الكافر الشيوعي الملحد الصليبي الصهيوني العميل- و انّما مقارنة بدول عربية كيفنا كيفها، لا و الله كنّا نسخايبو رواحنا خير منها...
علاه في أغلب الدول العربية ما تسمع كان الكلمة الحلوة و نحن عنّا الغزل م الحزام للوطى؟ علاه هوما تمشي في شوارعهم مطمان، سواء ليل ولاّ نهار و اللّى تسوّلو نفسو بش يقلقك يهدّو عليه الف يدقدقوه؟ علاه ماعادش عنّا شهامة؟ علاه نسانا ماعادش عندهم كرامة؟ لوين هجّت الاخلاق؟ علاه ما عادش عنّا هويّة؟ علاه الكورة و الفيس ولاّو طموحنا و اكبر قضايانا؟
توّا تنفعنا القناطر و الملاعب المعشّبة كي خسرنا الانسان...

فقـــط حـــــتّى لا اسـتنـــقط

2009-11-16T06:43:00.000+01:00

توا عندي اشهرة يدي تاكل فيا على ها البوست، و كل مرّة نقول العن الشيطان، الامر لا يعدو ان يكون حالة استثنائية، ما تعممش، صوابع يديك مش قد قد، التوانسة اوعى من هكّا ببرشا... اما زايد، اليوم بالذات، ع الصباح يا ربي العمالة عليك، تجيني زريقة لا تقرا لا تكتب، نفيق م الضربة لولا، نتكبّس بالثانية، مزلت ما صحصحتش، يتعدا خوه يعطيني على راسي... فديت!
فديــــــت...
لا..... فديييييييييييييييييت!

اللّى يتبع فيك عندو اشهرة، يجي بالحجة و البرهان، يقلك :
- كشفتك يا فلان (و يعطيك اسم مدوّن معروف)، هاك زعمة زعمة تحصّل في الجماعة عملت بلوغ تحكي فيه باسم طفلة..
- لا خويا، غالط في الاندريسة، شوف الحانوت اللي مبعد..
- لا انت هوا، بالامارة اهوكا الزوز تبلوغيو ع البلوقر، و الزوز مقعارة...
- هكّا ظهرلك؟ ايا امالا اللي قلتو مبروك... ما نلويش العصا في يدك

و اللّي يجيك، يقلك صارة انت هنا يا زياد؟
- لا خويا، محرزية معاك
- اي تسخايبني ما شلقتش بيك، يا عميل يا صهيوني يا مُنْبَت...
- ثكلتك بنت عم ام اللي جابت امك! ظاهر فيك عمرك لا قريتلي بوست و جاي تطلفح!

و اللي يجيك برجولية،
- بالجاه، حلفتك ببوك و امك و مماتك وبنت عمة خالتك و بالنعمة و بسيدي النبي و بالسيدة المنوبية و بالستين حزب (يراهم طايحين فيك)...
و انت م الطاروح هذا برك، تمد يدك لجيبك تتفقد قداه عندك صرف بش تحن بيهم عليه، انت مزلت تتغصور و هوا يلعج عليك... امانك، بربي، قلّى اللي انت راجل!
- علاه؟ و كي نطلع مرا؟؟؟
- لا لا يستحيل!
-باهي مشات معاك، امالا راجل!

بانا لغة و بانا منطق ترخيوني من حكاية طفلة ولاّ راجل؟ انا XX و لست XY. نقطة للسطر. صعيبة ع الفهم هاذي؟ وشحلت في الراديون، قالك مش انت، جايبة شكون تحكي في بلاصتك، حطيت تصويرة متخبية وراء بلاكة "انا فاطمة"، قالك صاحبتك كاريتها بالفلوس... اش نعمل؟؟ نوشّم على جبيني انا بنت عايلة و نهبط نعمل تور دو تيران في الحبيب بورقيبة؟

نعرف اللي الشعب التونسي، برغم لغة المساواة و الالتحاق بمصاف دراشنوة و السير على درب اش اسمها، و اكا التجغجيغ الكل، مزال شعب ذكوري و مربّط و زيد م الفوق راكبتو عقدة م النساء، خاطر عظّموهم وباقي يجريو.. لكن لها الدرجة يا رسول الله؟
شنوة ها الكليشيات؟ المرا مارقة، المرا قينيا، المرا سطحية، المرا ثقافتها قشرة، الخ الخ الخ...

ماتنجمّش تكون مرا.. علاه؟
- خاطرك فدلاكة!
- بالجاه!

- خاطرك "رجولية"
- يعز مقدارك!

- خاطرك ذكية
- سبّة ولاّ نقراها بالعكس؟

و حتّى اللي تقابلهم في الدنيا و تتعرف عليهم، تجيهم البهتة و خيبة الامل... امممم فمّا حاجة ناقصة، ويني التشليطة في وجهك؟ شبيك وجهك نظيف؟ شبيك ماكش خليقة؟ شبيك نرمال؟؟
بالله؟ هذا اللي بيك؟ اتوا نمشي نغرّز على خاطركم!

الحكاية ماهيش مربوطة بشخصي الكريم، خاطر طفلة ولاّ زرزومية، ماهيش هاذي القضية، اما مرتبطة بالنظرة الهايلة ياسر اللي عنّا ع النساء. امالا تعرفوشي كيفاه؟ اللّي هذا حدّ نيتو، و بالحق جادة عليه الكليشيهات، راهو امالا ما يعرفش النساء... يزي خير لا نطيح نستنقط، اكاهو، وفى!

آرابيكا.... انثى الانين و الجرح

2009-11-06T02:49:00.004+01:00

آرابيــــــكـا...

أنثى البوح التّى تتقفى اثر الجرح

اخرسوا فيها انين البوح

و صنعوا منها أكبر جرح

.

برلمان الديمقراطية الافتراضية

2009-11-04T04:00:00.003+01:00

اللّى مزال فيه نفحة ع الانتخابات، و الاّ اللي خذلو العمدة و ما عطاهش بطاقة ناخب، و الا اللي عطاوه اما الفيّاقة عملتها فيه، اهوكا عملولكم اشواط اضافية في برلمان تونس الافتراضي. التجربة حلوّة و التيارات متعددة و التشويق موجود و العرك و الخصام ساعة ساعة، ماو لا محبة الا بعد عداوة.

الحكاية ماخذة صدى طيب في وسايل الاعلام العربية، بالطبيعة شطرهم محجوب، انا نعلمكم و انتوما تشعبطو بش تدخلو، بالتسوّر او الخلع.
عندكم يا سيدي، شد عندك، في المأسوف على شبابه موقع الجزيرة، و الحوار الذي انتقل الى الجوار، و المغفور له موقع جريدة الوسط، و اخيرا و ليس آخرا، اللّى مزال يتنفس فيهم، موقع القدس برس.

ظهرولي المدونين مستقيلين م الحكاية و فمّا كعبتين على ريحة الريحة، انا بهتت في بالي بيهم فرسان العالم الافتراضي (هاو التبندير). لا واحد فيكم ترشح لا نوّه بالتجربة؟ عيب و الله عيب. ايا سيدي من حينك، ادخل و اطّلع ع التوانسة كي يتنظموا في ديمقراطية مباشرة آش يعملوا.

اختكم من المترشحين في البرلمان و من توا نقلكم اللّى ما يدخلش يصوتلي، كي ننجح في الانتخابات بش ننتقم منّو. وقتها عاد حصانة و يامن ادراك. ولو ربي يستر لا تجد عليهم الحكاية و نتوزرو الجماعة الكل و تتفرجو فيا رمضان الجاي في دور مساعد مع بريزون بريكة.
اللّى يحب يدخل يطّلع ع البرامج و عملية التصويت تكون بكتيبة اسم المترشحين ع الحيط. لا خلوة لا سريّة لضمان الشفافيّة، و الله لا يضيع اجر المحسنين.

بنت عايلة، مترشحة حالية و مشروع سجينة.

بقر الله في زرع الله

2009-10-30T22:46:00.003+01:00

بالله فماشي ولد حلال يفهمني الفرق. اختكم بقر الله في زرع الله. و الله لا يضيع اجر المحسنين

بين هذا و هذا و هذا و هذا و هذا

عمّـــــــــــــــــار خـــــــــــــــــــــجّ

2009-10-29T01:22:00.006+01:00

ها النهارين تشوينا على مدونة الكلاندستان نمبر وان و حتّى الحوينة الجديدة ما خلطش يتهنّى فيها. اما مهما كان، قالك يا سيدي هاذي حاجات تمس المصلحة العليا للبلاد و للعباد و اش كون يعرف يطلعشي الكلاندستان عميل ولاّ يحرض على افعال منافية للاخلاق و لاّ خلّى عاد كان خلاها و جلاها و اقترف جريمة التفكير (سواء معارض او غير معارض، مايهمش، مجرد التفكير يعتبر جريمة راهو).

لاسباب اكاديمية ما تلهيتش بش نكتب كلمتين تنديد و شجب و استنكار، حتّى نحن المدونين راس مالنا الكلام و بيعان الريح للمراكب، مافرقنا علّى نلومو عليهم في حتّى شي.

اما اثناء انشغالي الاكاديمي، الحق الحق طحت بدمغة لا تقرى لا تكتب، خلاّتني نرقل في بلاصتي شعرة لا هبطت مستنقطة. تبع مليح و حلّ عينيك،
ع السيت الرســــــــــمي لهيـــــــــــئة الـــــــسوق المالــــــــــــية، اللي حسب علمي ، اولا هيئة حكومية، ثانيا اختصاصها بعيد كل البعد ع السياسة، خلّى المعارضة، لقيت ما يلي

كي الناس الملاح، نزلت ع الليان متع القــــــــــــــــــــــــــــــــانون

و لذلك يا كلاندستان هوّن عليك، راهو المقص طال الهيئات الحكومية و القانون و البرلمان، و ولذلك انا وحدة م الناس نحمد ربي اللي ما كمّلوش عماولنا عينينا بش لا نراو لا نكتبو فرد مرّة و بانقص هرج.

حكاية الفار و القطوس

2009-10-17T14:09:00.002+01:00

يسر بلوغ بنت عايلة ان يصبح كي حيط البلدية، اللي عندو نص، شعر و الا مرثية ما عليه كان يبعثلنا و نحن نحطوه بلا مزية.

بوست اليوم كاتبو اخ اسمو
Mastourahmeni
قالك يضرب ع القيتارة و يغني في الريقي، و اهوكا انتوما بيدكم اتخيلوه تقولش عليه مغنّى على ريتم الريقي، حتّى توصلنا التريسيتي و نوليو نحطو الاخ يغني فيه في فيديو.

حكاية الفار و القطوس

عامل يومي
عامل عملة
عامل بعمالو في الحومة
خوه سائق سيارة أجرة
و زادا سارق سيارة أخرى
: سي البوليسي قال لُمُّو
و سيقارو شاعل في فمّو
شرطة تحكي معاك
شربة ماء, يرحم والديك
ولادك شيحولي ريقي
و كان ما جا بوهم صديقي ,
راهم في الفينقة من هاك العام
عام في بحر تقول عليه,
بعد ما شرب كاس الماء
غزرتلو و ضحكتلو و ورقة في يِدُّو حطتلو
بالشفا و الهنا, لا تنحّيك علينا…

لا خير لا في الفار
و لا خير في القطوس
, لولاني خالي الدّار
و الثاني عمالو كالسّوس...
و الشعب يحب اللّعب
و على ولاد بلادي… ليس بالأمر الصعب...

أشـــــعر بالغــثـــــيان

2009-10-09T03:25:00.002+01:00

بعتم الوطن، أرخصتم الإنسان
وجّهتوا رصاصكم الى صدرونا
و سوّرتوا ارواحنا بالقضبان
توسّلتوا..
كي تَقْبَلَ بِرَفْسِكُم اقدام صهاينة العدوان

صفقة محمول؟؟
لِمَ بِعْتُونَا في سوق العَمَالَةِ بأبخس الاثمان
لِمَ لَمْ تقولوا لم تعد تكفيكم كراسي الطغيان؟
كنّا في مناقصة الوطن وهبناكم ما تركتم لنا،
اغانى الاسرى و حتّى لقمة الهوان...

حُماة الدّيار... الى مزبلة التاريخ سيروا
ليس لكم منّا سوى "تفوووه عليكو"
عمر من الحقد و بحر من الغثيان

.

"الحب".... طريقة الاستعمال 3 - الحب الخانق

2009-10-08T02:20:00.000+01:00

مأساة الحب مشكلة توقيت فحسب... فحُبّ الرجال ينتهي عندما يبدأ حب النساء.
حب الرجال صاعق، مباغت، هادر... و سريع الانحسار. حبّ المرأة جمر. صعب الاشتعال لكنّه طويل الانفاس... فبعد موجة الاغراق العشقي الاولى، يتحصّن الرجال بالصمت، تاركين خلفهم آلاف الاسئلة المحرقة.
لا أَلُومُهُم...

عندما تعشقك المرأة، تتبنّاك! تحيا لاجلك و من خلالك. تحاصرك بالاهتمام و الغيرة، تتصل آلاف المرّات يوميا كي لا تقول شيئا. تحصي عليك اهتمامك بغيرها، مهما كان الغير، امّك، عملك، هوايتك، اصدقاءك... ولا تغفر لك ابدا ان تحيا خارج عالمها، هي التّى تتنفّسك...

كثير من النساء لا يفهمن ماذا حدث؟ فيما اخطئن؟ ما الذّي اطفأ ذلك الاهتمام و تلك اللهفة التّى غمرها بهنّ الرجال في اول العلاقة؟ و يجابهن الفتور بمزيد من الاهتمام و الحصار و الاتّصال...

نصيحتي الوحيدة... لا تندفعي في اهتمامك. احبّيه دون ان تعبديه. اي حماقة تلك ان تختزلي حياتك في رجل؟ اكثرنا نرجسيّة يملّ من عبادة صورته الف مرّة في اليوم...
لتكن لك حياتك و اهتماماتك و شيئ من الانانية. الرجل يحب المرأة الانانية، كل ما يعجز عن ادراكه و تملّكه، تحدّ له... كوني دائما حبيبة على وشك الرّحيل، فقط حتى يَسْتَبْقِيكِ!

!Girls... for God's sake, get a life

"حب"... طريقة الاستعمال2 - لماذا يرحل الرّجال؟

2009-10-07T08:33:00.001+01:00

القاعدة الثانية : لماذا يرحل الرّجال؟

الرجل ينجذب إلى الألَق.
من منّا لا يحب الجمال، الدلال، الرقّة، الذكاء، سرعة البديهة، سحر الانوثة و خفّة الروح؟
و مع هذا سيرحل.

و صدّقيني من الافضل له ان يرحل. ذلك انّ الرجل و ان انجذب الى "المرأة"، ففي غالب الاحيان، سيستقر مع... مجرّد إمراة. صعبٌُ على ايّ كان ان يقضي حياته في صراع ليكون له الى جانب ألقك مكان. نجاحك و حضورك شهادة في فشله.

الرجل يبحث عن امرأة عادية تجعل منه الاهها، او يقزّم آلهة لتكون مجرد امرأة له. النساء في اوطاننا لا تملك ان تصنع الاضافة، فحسبك من الدنيا ان تكوني مضافا له...

أيتها الانثى، العاشقة، اللاسعة، الضاحكة، المفكرة، اللاهبة، قدرك ان تكوني العشيقة. انت غارات ماضيه كي يواجه كآبة بؤسه و ينسى بلاهة يومه. و ان تزوّجك... في احسن الحالات سيكتفي بخيانتك!
اقول في احسن الحالات، ذلك انّ الخيانة مع جسد امرأة اخرى قتل رحيم. فالرجل ان لم يكن ندّا لك، على غفلة من شبابك يطفئ نارك و يقتل منك الرّوح.
فباللّه عليك دعيه يرحل!

.

"حب"... طريقة الاستعمال 1 - الحب الخالد

2009-10-07T07:59:00.004+01:00

تحذيرات اوليّة :

قبلا، لم اعرف للخريف علاقة بموجة الحب... و لكن كثرت في الفترة الاخيرة طلبات الاصدقاء و الغير اصدقاء، لنصائحي العشقية. في البدء ظننتها طلبات استثنائية و متفرقة، الاّ ان الايام كذّبت ظنّى. لا اعلم لماذا الآن و لا اعلم لماذا ظنّوا ان الاجابة قد تكون عندي.
و بعد شئ من التردد، قلت لست بالتأكيد افشلكم حبّا. ذلك انّ للحب معايير خاصّة، لا تقاس بالنجاح في الحب، بل بقلّة الهزائم. فالحب بدءا، استسلام و تسليم، خضوع و خنوع... الوقوع في الحب اولى الهزائم و ليست آخرها.
ايّها العشاق... اواسيكم و اشدّ على اياديكم...

القاعدة الاولى : الحب الخالد...

سينتهي... او في افضل الاحوال، يُنهيك!
كلّنا نحلم بالحب... بالالف و اللام رجاء!
كلّنا نبحث عن قصة حب موغلة في الروعة، موغلة في الالم، قصّة حب يتغير بها التقويم و تولد بها من جديد. حبّ عاصف، جارف، يجتاحك من الوريد للوريد...
لا اعلم كيف يفوتنا ان نحتاط من هكذا حب، اشبه في وعوده بافلام الرعب.
لا ادري هل أُهنّئ الواقع فيه ام اواسيه.

نصيحتي الوحيدة... لا تقاوم. اجمل اللحظات تلك هي التي تذوب فيها عشقا. كلّ البدايات جميلة، وحدها النهايات موجعة.. لانّه سينتهي!
لا تسأل لماذا او كيف و متى...فلا وجود لحب خالد. اجمل القصص تحمل في ذاتها نهايتها. لا يمكن لك ان تظلّ في حالة احتراق دائم. فهكذا محرقة لا بدّ ان تنهيها... او تقضى فيها.

الحبّ بقلم الرصاص

2009-10-05T02:49:00.005+01:00

لم اطلب منك شيئا..

لا ذهبا و لا عطايا،

لا عطورا و لا هدايا،

لا تفرّغا، لا وفاء، و لا حتّى حبّا،

و غفرت لك جميع الخطايا...

آمنت انك ستتعب من التعلق بأكاذيب النساء

و ستمّل الحكاية،

و انتظرت ان تعود لي بين قصتين،

ان تبكي على صدري

و اواسيك من نهاية تمحوها ببداية

اعتقتك من كذب الكلمات و تكلّفها

من أُحِبُّكِ و اشتقتك

و انفقت على جحودك كل صبايا

فشل حبّى في ان يرتسم كيّا

على جدران قلبك و ان يملأ كل الزوايا

و لكنّك علّمتني...

كيف يكون الحب بقلم الرصاص،

امحوك و امضي الى غيرك من الضحايا...

حدث اليوم .... و سيحدث كثيرا في كل يوم

2009-09-30T17:53:00.000+01:00

فرحت اليوم كي جاو قالولي بربي حط الحكاية هاذي ع الانترنات، لانو الطلب جاني من عبد لا علاقة له بالتدوين و لا حتى بالاعلامية. لكن هذا يدل اللي التوانسة فاقو اللي الانترنات مساحة حوار شبه حر و وسيلة اتصال بين العباد و خاصة وسيلة توصيل الافكار بين العباد.

و سامحوني بش نحل قوس بش نجبد على حكاية الاختلاف و الحروب الافتراضية اللي قايمة كل نهار نهارين. انا وحدة م الناس مع الاختلاف في جميع اشكالو و الصور متاعو و حتى كي تاكل بعضها نفرح.. تونس كبلاد كنت نفد فيها و نحس بالاحباط، خاطر بكلنا "على فرد كلمة" و بكلنا باهين و الجرائم استنثاء، و بكلنا مسلمين وحتى البقية توا ربي يهديهم، و بكلنا نحبو الفن الراقي اما نتعطفو على الناس البسطاء و "نعديولهم" الفن الشعبي... يعني بكلنا ناس عاديين و لو الكلمة الاصح، منافقين!
خاطر ها اللحمة و ها الحب و ها الاتفاق ما تلقاهش في عايلة بين الوالدين و ولادهم تي بين الواحد و روحو ما يبداش متفاهم و لوجيك هكّا. بقدرة قادر عشرة ملاين بكلهم عندهم نفس الذوق و نفس النظرة للدين و للاخلاق و للسياسة؟ ما اختلفو كان في الكورة ولا في الماكلة تطيب بالكركم ولاّ بالزعفران؟!

المهم بش ما نطولش، ها الانترنات الباهي فيها كونها كشفت برشا اعوار و لو الكلمة الاصح برشا افكار. و طلعنا و لله الحمد مختلفين خاطر كان ماناش مختلفين، امالا سامحوني ما نكونو كان متخلفين ذهنيا... و هذاكا علاه الانترنات قاعدة تتحول الى اخر معاقل التعبير و الحرية للمواطنين. فبالله عليكم، خليّو الكفار و العملاء و الشواذ و المعارضين و المجرمين و المتطرفين و السّقاط و النّفاط كان تحب زادة، بالجاه خليوهم يحكيو. خاطر تراهم يحكيو و تعرفهم اش يحكيو خير ما تغمض عينيك و تمحيهم من مجالك البصري و تبدا سعيد في عالمك المشرق و فمّا سوسة تنخر في البناء الاجتماعي و اللحمة الوطنية. خاطر اللي انت ما عندكش استعداد، مش بش تحكي معاه ياريتو، و انما لمجرد الاستماع اليه، راهو ها الشي ما يخليهش يراجع نفسو ولاّ ينقد منظومتو الفكرية و انما بش يزداد تعنتّا و بش نلقاو رواحنا خلقنا مشكلة لم تكن موجودة لو كان خلينا هامش الحرية

المهم، الله غالب طوّلت، و السيّد وعدني بش يكتشف التدوين و بش يكتشف الانترنات اذا كتبت على الواقعة اللي صارت اليوم. الواقعة في حد ذاتها بسيطة و لكن خطيرة على برشا اصعدة.
اللي صار يا سيدي بن سيدي، انو في احد المعاهد الثانوية في الضاحية الجنوبية، فما طفلة حاشاكم جاها غرض الرّدان، طلبت م الاستاذ بش تخرج. في طريقها للخروج م القسم، تعمل هكّا تتفرش على طولها و تطيح ما في عينها بلّة. حاجة عادية و تصير في كل يوم و في كل معهد. بالطبيعة، الجماعة يقومو بالواجب، و نظرا للغياب العادي للمسؤول على وحدة التمريض في معهد فيه آلاف التلاميذ، يمشيو يعطولها الحماية المدنية. الواحد حد هنا يقول ربي يكثر منهم الناس و الواحد يبعث ولادو يقراو و هوا متهني عليهم.

ما نكذبوش، الحماية ما قصّرتش، جابو رواحهم في اكا الكرهبة اللي تقيم الموتى م القبر و اللي يلحموها كراهب بقية المواطنين بش يتعداو في الضو الاحمر و ينجمو يجريو. المشكل كونهم كي وصلو للمعهد و دخلو للقسم. وقفو من بعيييييييد و مصمصو شفايفهم بكل حسرة على الطفلة و شبابها و اتغبنّو عليها، اما ما نجموش يسعفوها. علاه؟
خاطر خافو لا يكون عندها اكا المرض المريع الفضيع، انفلونزا الخنازير. باهي، الخوف ممكن يكون مشروع، اتخذ الوسايل الاحتياطية و قوم بالواجب.
لكن اللّى يوقف المخ، كونهم جماعة الحماية المدنية قالك ما عندهمش حتى وسيلة حماية، حتى مجرد اقنعة ما عندهمش!

يعني بلاد داخلة في معمعة متع وباء عالمي لازم نحدو من انتشارو، و يبرّحو في التلفزة و في وسائل الاعلام المرئي و المسموع، كونها تونس بش تصنع اللقاح في مخابر سيف بندّارة فلوس، و مارجينلنا الكبدة بسبوت ديبيل، قول موجه لجماعة في الحضانة، مش لمواطنين، متع طبّة قالولك ما نغلبوه كان بالماء و الصابون و بالامارة يعلمونا كيفاه لازمك تغسل يديك. تجيب قالب صابون، تحل الماء، تحط يديك تحت الماء، تفرك يديك بالقدا و تسكر الماء!!!
اي اما وقت الجد، ما تلقى حد! طفلة مطيشة على طولها ع القاعة، الله اعلم اش ينجم يكون جاها و ممكنشي تتعكر حالتها كان وخرو في اسعافها، و جماعة الحماية خايفين لا يقربوها متجاهلين او جاهلين اللي مبدئيا ما عندهاش علامات المرض.

ممكن ياسر الدولة استعدت للمرض بكنتراتوات بملايين الدولارات، لكن للاسف، العنصر البشري و الفورماسيون متع اعوان الصحة و الانقاذ مزال ناقص ياسر. و اذا اعوان الصحة بيدهم ناقصين وعي و راكبهم جني الخوف م المجهول، كيفاه تلوم على المواطنين اللي ماهمش فاهمين راسهم من ساقيهم و وين يراو واحد يعطس، يشهّدو و يروّحو يكتبو وصيتهم؟
خاطر الحكاية ما وفاتش غادي، الطفلة ع الاقل جابولها طبيب، اما التلامذة اللي في المعهد عطاو على ساقيهم و في الحما يا ستار. وعلى بال ما وصلو لمحطة المترو، الحكاية تهولت وولاّت قسم كامل مريض و زوز موتى و اللّى منعو، ناوين ما يقراوش السنة. و كانت تشخر.... زادت بف

المهم، مدام ما فماش اجراءات ملموسة و واقعية و تبسيط لها الوباء و الاقاويل عمّال تمشي و تكثر راهو ما عملنا شي. و تقلي نحط سبوت ديبيل في التلفزة نوعي في العباد، نقلك راك غالط على طول الخط. ابدا اساعة وعّى اعوان الصحة ووفرلهم الوسايل المادية الضرورية بش يكونو على الجبهة و ماهمش خايفين على رواحهم. امشي للمدارس و خصص اساتذة العلوم بش يوعيوهم و يشرحولهم اش نية المخاطر الحقيقة و كيفاه يتفاداوها.
ناقصين بالله احنا اسباب خوف، نزيدو نكملو نخافو م العباد و م الهواء؟؟

غزّول انتخابي

2009-09-24T19:40:00.002+01:00

م البارح نخمم و نقيس. نحب نفهم عبارة "امطار غير متوقعة"...
اش معناها امطار غير متوقعة؟ حاجة ما ظهرتش على شاشات الرصد الجوي؟ سحب و اعاصير سبيسيال عالم ثالث، ما تتعرفش عليها التكنولوجيا اللي نشريو فيها بكيّح دم؟ ياخي ما ينجموش يقيسو نسبة التساقط؟ ما يراوش غمامة كحلا زادمة من بعيد؟
لعلّ اعصار هبّطو ربي فجأة من سابع سماء؟ من قال ان زمن المعجزات قد ولّى؟

هوا قول باقي فيضانات البارح سلامات. ع الاقل يا اخي استعرفو بيها ها البلاد موجودة في تونس. اما الجمعة اللي فاتت الاعصار اللي ضرب الساحل قول ضرب في اندونيسيا. لا و الله اندونيسيا اكا العام جابوهالنا في الاخبار و بعثنالها اللي كتب من ربي اعانات... اما يظهرلي الساحل بيدو طلع اقليم تونسي... على غير المتوقع، مش جاتو امطار غير متوقعة.

اعلامنا المرة هاذي حبّ يفديها. اهوكا نقللنا الاحداث بالصوت و الصورة و على عين المكان. اما خسارة ماعناش نفس مفهوم الاولوية في الخبر. ما يهمنيش في شي بش نعرف شكون آذن و بماذا آذن، خاطر كي تجي تشوف ماهيش مزية، و م المفروض يبدا فمّا اجراءات موحدة و هيكل لاهي بحالات الكوارث الطبيعية (على فرض كونها كارثة طبيعية فقط). اما فوجئنا كونو في عوض نبعثو الجيش يهبط يلوج ع المفقودين تحت الانقاض ولا يحاولو توفير ملاجئ آمنة للبقية، عدينا السهرية نتفرجو في طيارات معبية بالجراري الموس و حكك الطماطم.

نجيو توا لحكاية في غالبها كارثة طبيعية. توا متافهمين اللي المناخ تغير و اللي الدنيا الكل داخلة بعضها و المطر ماعناش عليها سلطان. اما نحب نفهم عباد ما عندهاش حاجة مقصرة فيها و rien a se reprocher، علاه تبرر في هاو كارثة غير متوقعة، هاو امطار فيضانية و قريب بش يقولو ربي دقهم، و زيد احمدو ربي جاتكم باللطف، بالامارة هاو في استراليا و في تركيا صار و صار... و الا كاد المريب ان يقول هاني هنا؟
باهي الامطار غير متوقعة... و الفقر متوقع ولا لا؟

العباد اللي ساكنة في خشش، العباد اللي ما نابها م الدنيا كان القصدير و الياجور و ساعات بلاش سيمان، باش تحبها تواجه الطوفان؟ ماو قبر الحياة يولي قبرها و فرد مرّة وفّرو عليكم جهود تنقل مسؤول و فصول مسرحية تأبينية تثير الغثيان.
اه ما فيبالكمش؟ ما تعرفوش اللي تونس فيها الفقر و الميزيريا و العباد ساكنة على مجري الوديان؟
ما نتخيلش، بالامارة اهوكا البلديات و اعوانها اللي هاذا يمد يدو بش ياخو حويجة و ما يهدش بحجة البناء الفوضوي... بناء فوضوي... تي بالله كي قلّيل يخلط على حاجة تشبه لبناء احمد ربي، تزيد تحب تقاسطو فيه؟

و الحي السكني الراقي اللي يتعمل على آثار... اش اسمو؟ و العمارة على سادس ولا سابع طاق ع البحر، في تحدي صارخ لقواعد الملك العمومي البحري، اش اسمها؟
مافيبالكمش؟ ما سمعتوش؟ ما ظاهرلي، خاطر فما جيش مجند بش يحصي علينا كلماتنا و افكارنا و انفاسنا، كان ينجم بنفس المناسبة يرى بنية قد السخط ما تبعدش زوز كيلومتر ع القصر...

تعرف كيفاه؟ م الاخر، هانا قادمين على انتخابات و هيلمان. انا وحدة م الناس مستعدة مش نصوت برك، مستعدة نوشّم علي جبيني "عم الحاج مدى الحياة"، ما نحبش الديمقراطية، ما حاشتيش بالحرية، ما عندي ما نندب بحرية التعبير. ايجا اكا العقد الاجتماعي نعاودو نتفاهمو عليه. ريق فرنسيس قالو عقد اجتماعي و ديمقراطية. مش متاعنا...

انا معاكم، انا نساندكم و ما نبجل عليكم حد و نزيد نجيب معايا ولاد الحومة و ما تتلزوش تقيمو الموتى م الجبانة بش يصوتولكم. اما يا اخي اضمنولنا الي كي نخرج في الكياس ما يعتدي عليا حد، اضمنلي كي نحط زوز صوردي في تجارة ما ينتفونيش جماعة البلدية و جماعة الفيسك و جماعة الشعبة و جماعة صندوق التضامن و صندوق التنافسية و متع الخلية... اضمنلي كي تصب الشتاء ما نموتش في روقار ولا تحت حيط...

متنازلين على جودة الحياة... اما اضمنلي ع الاقل موتة بالقدر...

بالدليل العلمي القاطع و البرهان الساطع

2009-09-16T05:38:00.000+01:00

من بين المجلات اليتيمة اللّى قعدت نشريها، و كل مرّة نحس اللّى فلوسي فلوس حلال محلل خاطر بخلاف متعة قرايتها، نحس اللّى حصلتلي فايدة منها، مجلة science & vie. برشا بش يقولو اوه يا بابا، اش مجيبها للـ Recherche؟ تي مجلّة تبسّط ياسر، مجلّة ماهيش جدية برشا في اختيار مواضيعها، انا نقلكم هذاكا اش يشدني ليها. خاطرها تقرّب العلوم للناس البسطاء اللّى كيفي و في نفس الوقت ما تعطيش معلومات غالطة.

آخر عهدي بالعلم و العلوم، نثبت ع البرتابل موديل "خبزة" مزال فال و العباد تتفافى عليه، و الكارت سيم بمياة واربعين دينار جهرا و اربعماية سرّا. و حتى كيما عندي توا، اخر امتحان متع علوم، جابولنا عايلة متع ذبان جوانحو قصيرة ولاّ ماغير جوانح، والله نسيت، و انت اقعد دقّز ولادهم بش يطلعو شبّان بالجوانح ولاّ لا، و ولاد ولادهم بعد عمر طويل اش بش يطلع لون عينيهم.

الحاسيلو نحب نشكر المشرفين على اختيار و اعداد البرامج التربوية خاطر خرجت م الليسي بخبرة هايلة في فن التعامل مع الذبان، من علوم ربي الكل ما حصللنا كان نشّانو.
و شي يحزّن كي تحل كتبة فرانسا ولاّ اي دولة اجنبية و تلقاها تحكي على حاجات تهم الواقع الملموس و تساؤلات حقيقية للشباب، من نوع تفسير مضار التدخين بطريقة علمية معمقة (ومش حجّة فك عليك راهو يضرك). ولاّ هاو اكتشافات ع السرطان، ماو طلع كل واحد فينا عندو في بدنو خلايا سرطانية، لكن الكريات البيضا متاعنا تتعرف عليها و تهاجمها و بالتالي المرض ما يسرحش، و العباد اللي يجيها السرطان عندها اختلال في اكا الكريات البيضا، يلعب عليها الحول و ما تتعرفش على الخلايا المتسرطنة و الماء يسرح ع البطيخ. و من بين الدوايات اللي قاعدين يجربو فيهم، هي الـ génie génétique يشدو اكا الكور يبعولوهم و يبعثوهم يخدمو على رواحهم.

المهم سيدي، اليوم العشية امي دخلت محملة الاثقال بما لذّ و طاب م المجلات و الجرايد، قسمناهم على بعضنا كل واحد رزمة نستناو في الاذان. غطست في اكا المجلة العزيزة غطسة اللّي هي.
ما نعرفش كان يهمكم في شئ بش تعرفو كونو الزهايمر طلع مرض "معدي" (مش كي القريب يهديك و انما من خليّة لخليّة، كيما البقرة المهبولة)، ولاّ كان حكاية انّو فمّا حُريقة "خالدة"، قادرة على انها كل ما تحس بروحها مهددة بالموت، تعاود تصغار se rajeunit، ترجع ترنكوشة بنت عشرة و اثنين، و هكذا دواليك الى ما لا نهاية له. الواحد يقول سبحانو ربي، طرف حريقة ما تجيش في كبر الظفر، لا عظم لا قشرة لا ببوشة لا شي، تي طرف هواء يقتلها، تنجم تخلّد و سيدي بنادم باللّى طلع، باللّى اخترع و اكتشف، مآلو التراب... يوضع سّرو في اضعف خلقو.

المهم، اخطانا من ها المواضيع الكل، فمّا فقرة صغيرة قد الطرف لفتت انتباهي و خلاتني مشدوهة الفاه، مزبهلّة العينين حتى لين اغرورقو بالدموع. و فهّمتني برشا حاجات على برشا حاجات.
قالّك جماعة علماء في جامعة Keele في بريطانيا، وسّعو بالهم و عملو تجربة مبتكرة (وفي رواية اخرى يظهرلي فاضين شغل، عملو تفدليكة بينات بعضهم. لعب ذرّي) جابو كمشة متطوعين و سطل ماء بارد بالقدا، 5 درجات برك، تقول انت كيما اللي يعبيوه بالقازوز و يسرحو بيه في الميتروات و المهرجانات في الصيف. و gبّضو على اكا المتطوعين و حطولهم يديهم في الماء البارد. و ما يخفاش عليكم قداه توجع العملية.

ما نطولش عليكم، غاية ها شلّة الـ postdoc فاضين الشغل، اللي يخلصو بثلاثة ولا اربعة اصفار ع اليمين (اللهم لا حسد، يلقاوه في صحتهم و في نظرهم)، مش كونهم بش يشوفو الحكاية توجع ولاّ لا. تي هوا الحاج ابن حزم الله يرحمو و ينعمو، وقت اللّى العرب مزالو يغنيو يا زمان الوصل بالاندلس، قالك "هذا الثلج إذا أدمن حبسه في اليد فعل فعلَ النار"...
خ نكمللكم الحكاية اساعة، قسمو المتطوعين زوز فرق، جماعة قالولهم سبّو سلسبيل عرش اللي تحبو و جماعة قالولهم السكوت و النبوت و اللي يحل جلغتو يموت.

يا سيدي النتايج طلعت مبهرة و خارقة لتوقعاتهم، قالك اكا الجماعة قلال الحياء اللي طاحو يسبو بوه على خوه، نجمو يخليو يديهم في الماء اللي يشوي مرتين اكثر م الجماعة الخانسين!
و بان بالدليل العلمي القاطع كونو ''lancer un juron diminue la perception de la douleur et accroît sa tolérance (...) jurer couperait le lien entre la peur et perception de la douleur, procurant des bénéfices à la fois psychologiques et physiques"

و طلع كونو السبّان راهو ميكانيزم من ميكانيزمات الـ survie. و لذلك اخوتي اخواتي، كي تراو جماعة كلامها بُضع و اخلاقها بشعة و لسانها مرزي، ما تتغششوش و ما تتنرفزوش. بالعكس، لازمهم يسخفوكم! مسيكنات راهو ما يلزهم ع الاخلاق المنحطة كان الخوف و الالم. و قداه من عبد تلقاه مسيّب معفرت في وسط العباد، شدوني لا.... (حاشاكم) ، تلقاه م الداخل يرعش كي الفلّوس ليلة شتاء.

و استنادا على ها الدراسة العظيمة، الواحد ينجم يبني عليها و يواصل التحليل السوسيو-دماغي. انا وحدة م الناس يظهرلي لقيت اجابة على سؤال كان محيرني. علاه الشعب التونسي من اسلط الشعوب لسانا و اعدمهم منطقا؟ هاو بان بالكاشف كونو ها الشي يساعدو على تحمل الالم و الخوف، يعني تولي تنجم تعرف درجة اطمئنان العبد في المجتمع متاعو، و تقيس درجة السكينة (بفتح السين، مش بالكسرة يهديك) متاعو من خلال مراقبتو في الفضاء العام ودرجة التزامو بالاخلاق. و ارحمو عزيز قوم ذلّ...

كثر م العسل يمساط خاصة كي يبدى ضمار ملسّق بالبزاق..

2009-09-02T02:49:00.003+01:00

حبيت نخلي تعليق عند الجماعة، لقيت ما فماش مجال للتعليق. كي تجي تشوف، عندهم الحق، خاطر الواحد ما عندو ما يعلّق، اللهم الفلقة لبعض الناس...
عندك كلمتين و قلتهم؟ مستقصد بعض الجماعة؟ ايا سيدي مبروك وصل المساج. اي القى صنعة اخرى عاد!
آخر كلمة، بالله اكبرو شوية، ما يليقش!

الصحة الشامتة و ليس الشاملة

2009-08-31T01:42:00.000+01:00

قبيليكا قررت بش نعمل حملة نظافة شاملة على ساكي، و في رواية اخرى سطوشي. بعد اللي كل مرّة ناقف بش نشري اي حاجة، كي تكون خبزة، ترصيلي نتغصور. ماو نحنا النساء و لاختلال جيني غير معلوم المصدر، اكا طرف الجلد يمثللنا الامان العاطفي و الاستقلالية البسيكوتقنية. وين احنا وين هوا، و خاصة وين احنا وين فرتنا اللي فيه الكل. و الغرض الاساسي منو، كهزان الفلوس و الوراق ينجم يولي هدف ثانوي برشا، و لذلك تشري سطوش صغير تحط فيه برتفاي صغير فيه الوراق و ماتابع، و معاه porte monnaie خارج عليهم الزوز و اكيد طبعا تروس متع ماكياج لحالات الطوارئ و للضرورة القصوى، و تحط المجموعة اللي تلمتلك الكل في ساك كبييييير موديل خُرْج ولاّ في رواية اخرى قفّة، للزايد الكل.

بطبيعة الحال، نهار بعد نهار المجموعة بش تكبر و تلقى روحك تكالي في ساك متع حمّام مش لعب. و بش تخلّص اقلّ حاجة يحبلك عمليات تنقيب ع البترول و انت مدخل يدك و تدوّر تدوّر و من خلال حاسة اللّمس تحاول تلقى الفلوس، خاطر c'est pas evident.

الكاسة اللّي تاقف فيها مرا، تلقى وراها صفّ قد ربي و عبادو، و تلقى فيها تشويق و اثارة من المستوى الرفيع، تقولش عليه فيراج متع ستاد. المرّة لولا تدخل راسها في السطوش و تبدى، تي وين حطيتهم؟ زعمة في السطوش الاحمر ولا في البرتفاي الازرق ، لا لا ماهمش وراء تصويرة راجلي... في الـ poche secrete ؟ زعمة نسيتهم في الكرهبة؟
و اكا العباد مسيكنات، الدخان خارج من وذنيهم و مستعينين بالصبر و رغم هذاكا يشجعو فيها و يبداو هوما بيدهم يعطيو في الاقتراحات، لعلّ في مكتوبك؟ لعلّ في الفيستة؟ لعلّ خليتهم في الدار؟

بعد عدّة محاولات مستميتة تقول سايي، هاني لقيت! تلقى العباد تترمى تهنّى في بعضها و تبوس، و الّي يمحي دمعة م التأثر و اللّى يهبط يصلي ركعتين شكر لله، فرج ربي حلّ و اللّي عندو مش صعيب...

هوما مزالو ما تمتعوش بحلاوة الانتصار، تقلّهم، لا لا خاطي، طلعت فاتورة متع مونوبري قديمة، سخايبتهم فلوس! تاخو نفس و تعاود تغطس في السطوش...
اللّى يدوخ، و اللّى يجيه شلل نصفي و اللّى يسب سلسبيل عرش النساء منين هب و دب، و اللّى مزال فيه نخوة، يقلّها هات الصفا توا نخلّصو انا ، غير اقلب منظرك برك...

اما فمّا زادة الناس اللئيمين، اكا العبد اللّى يجيبهالك في العظم... بعد ربع ساعة مستنّية، يا بنتي علاه هكّا، تي هاو شد السطوش اقلبو الكل و ارتاح!
تخيّل!!! انا وحدة م الناس، وين واحد يقلي ها الجملة، نهز روحي و في الحما يا ستّار!

برشا يغزّلو ع النساء و يقلّك بالجاه، اش فما في ها السيكان اللي نهار كامل و انتوما مخيطينهم في يديكم و اللّى يقرب سطوش مرا تقولش عليه اقدم على كبيرة م الكبائر! تي اش فيه التركة؟ برشا يقدّمو عدة نظريات.. فمّا اللي يقلك خاطر فيه حاجات محرجة، حاجات متع نساء، و فمّا اللي يقلك خاطر النساء يحبو يحتفظو باكا الهالة م السرّ، يعني الوجه كي الفترينة و السطوش هوا الكواليس، الدِبُّو اللّى فيه الماتريال... كل واحد يجيب ويجلّب. لكن اليوم بش نقلّكم ع السرّ الحقيقي... و بش نشبع فضول اجيال من الرجال لتوا لا وقفت عليه ها السرّ!

ما نحبوش نحلو سطوشاتنا ع المباشر، خاطر نحنا بيدنا ما نعرفوش اش فيه السطوش!
هاذي هي الحقيقة المرّة، في كل بساطتها! خاطر اللي يجي تحت يدينا، نعملو هكا ندكّوه في اكا السطوش. و بالتالي نبداو خايفين لا يتحل ع المباشر و تخرج حاجة نحن بيدنا ناسينها! تخيل الاحراج رعاك الله! هاو ما نمشيوش لبعيد، هاني توا ع المباشر توا نقلكم كي حليت سطوشي قبيليكة اش لقيت فيه (في حدود المعقول طبعا). بش تتأكدو اللي هي حكاية فارغة و غادي م الخيال الشاسع متاعكم..

موس cutter - ماكياج - مفاتح ما نعرفش اش تحل - قشار بطاطا (مش بش نقشر البطاطا في الفو الاحمر، اما مرة استعملتو في عوض التورنفيس) - #❊#❊❊# (حاجات مشفرة) - يجي خمسطاش حصن حصين (وشي النافع ربي) - كابسول نسبرسو (مهرّبتها) - cle USB (عطاهالي رئيس مؤسسة ناشئة، كنت نعاونو في شوية امور قانونية و مغروم بالمسرح، ما نعرفش اشكون زغرتلو في وذنو و قالو الطفلة مدام تفهم في القانون، لازم تفهم في المسرح، عطاني مسرحية كتبها، حطهالي على اكا الـcle بش نعطيه رايي فيها، هاي عندها عامين لتوا لا قريتها و الراجل لتوا شايخ على اكا قصيدة المدح اللي نظمتها في مسرحيتو) - باسبور بابا و امي (تقولش عليا حاجزتهم، اشكون يعرف يجيشي نهار تتقطعلهم شعرة معاوية اللي بينّا و بينهم، يخليوني انا و خويا و يهجو من وجوهنا؟) - شوية دوايات و حرابش (مسكنّات متع ألم، مش نروج فيهم يهديك، ترصيليش مسلسلة!) - بريكية (رغم اللّي ما نتكيفش، اما تعجبني ريحة البلاستيك المحروق، كي نفد نشعل النار في حاجة بلاستيك) - ستيلو و كرني بالطبيعة بش نقيد الافكار الفذّة اللّى تجيني على حين غرادة - نسخ من بطاقات التعريف متع عايلتي المضيقة و الموسعة الكل (بش كي عيني نشكي بيهم، نلقى كل شي على ظهر اليد) - تورش (هاذي بالذات شريتها بذمة اكا الغطسة في السطوش) - منديلة متع كوجينة، الله اعلم اش تعمل غادي - زوز دبابز برفان (وحدة نحبها ووحدة لا، بش كي يطلبو من عندي البنات، نعطيهم اللي ما نحبهاش بش توفى فيسع) - استدعاء لعشاء في رستوران بم بم ما مشيتلوش matricule fiscal - external modem متع شركة خدمت فيها قبل - ايبود و مصورة بطبيعة الحال - ورقة متع تحليل دم.....

و الورقة متع التحليل هاذي هي اللي جابتلي فكرة التدوينة، اما بالطبيعة نسيت و توسعت في الحكايات. اليوم بش نحكيلكم على ها التحليل! بطبيعة الحال ما يهمكش في شي بش تعرفو لا علاه حلّلت لا قداه طلع عندي سكّر في الدم... و لو برشا عباد يتمناو لو كان ربي يهز متاعو على قريب... المهم، يا سيدي بن سيدي، لظروف صحية، الطبيب الطيّب اللي مشيتلو قالي اعمل تحليل الدم هاذا و ارجعلي. كتبلي اساميهم على ورقة بخط مزيان و زاد نعتني على لابوراتوار قريب ماهوش على ليستة المخابر اللّى تعاركت معاهم و حلفت عليهم. ابتسملي ابتسامة عريضة وودعني الوداع الاخير، خاطر من نهارتها خليقتي ماعادش شافها!

من ليمة غدوة بعد اكا الموعد مع الدكتور، صبحت صايمة ، حلّىت ساكي كي الناس الملاح، تفقدت اش عندي فلوس. لقيت عندي مياة و عشرة دينارات. نعمة و بركة، خاصة و انو المياة دينار ورقتين بو خمسين، خضراء و كبيرة، تقولش عليها سجادة متع صلاة! واحد يفرشها مش يخلص بيها!

اكا الورقتين عاملة عليهم جو، مش خاطر مزالو فال، و انما خاطر نطّرتهم (بالمعنى الحرفي للكلمة) لولد الجيران، طفل يخدم في بانكة، مسيكن جا يتضيف بحذانا و يطل. من جملة الحديث خرّج الورقتين بش يوريهملنا زعمة زعمة سبق صحفي. ما نكونش م العاكسين، نلعب على عامل الميدان و الحضور الجماهيري الغفير، نخطفهملو من يدو و نعطيه ما يقابلهم م "الصرف" بو عشرات... اه وينك، مزالو يقضيو العشرة لاف؟ الطفل بلع السكينة بدمها، اما يظهرلي بات يسحسح فيا بالدعاء، خاطر اكا الورقتين ما عمّروش!

ايا سيدي، كي الناس الملاح، ضاربني الجوع ع الصباح، قلت نتعدى للمخبر الطبي نرميلهم تفتوفة دم يقصّرو بيها الصبحية يحسبولها الكْوِرْ البْيُضّ و الحُمُرْ في عقلهم، نخلّصهم في العشرة ولا عشرين دينار متاعهم، و بالباقي نمشي لشامبيون نقضي شوية فرت. ساعة و انا نتشهّى و نخطط اش بش نشري و اش بش نطيّب بش نعوّض اكا الساعة صيام.
بعد ربع ساعة و ثلاثة متحامين فيّا يلوجو عل العروق، تقلوش عليهم يشدو في فأر هارب، "اهوا، لا لا ، هرب، تي اكبس من غادي، شديتو شديتو، لا لا زايد امشي لليد الاخرى..." كمّلت جبدت الدم، و مشيت للاستقبال بش نخلّص. قلت الواحد يدفع فرد مرّة و يرتاح، نجي العشية ناخذ التحليل خفّافي. و الحمدوالله جاتني لمحة الذكاء البرّاقة هاذي ماكانش راني لتوا نغسللهم في البلايز البيضاء.
الطفلة اللي في الاستقبال، كشّرت عن انياب رقيقة في ابتسامة انيقة و قاتلي :
"- عندك تغطية مدموازال؟
- ريزو؟ اي يظهرلي عندي، علاه؟
- لا لا تغطية اجتماعية...
- يا اختي كان تلقى عندي غطاء حتى متع ستيلو، مش تغطية اجتماعية، بوك باي. هات خ نخلّص برك، الواحد ما يهوّنش على صحتو؟
- هوا كي تجي تشوف زايد، خاطر التحليل اللي طالبو الطبيب ما يرجعوش عليه، و زيد الطبيب مش متعاقد، يعني بانقص قلق...

اذا صدّقني ربي، كي اللّى ريت في عينيها ضحكة شماتة ولاّ حاجة تشبّه. خاطر بشوية تحليل لموقع الحادثة، يظهرلي مستانسين بحالات الاغماء اللّى صارتلي، انا دوب ما لعبت عليا الدوخة و ركايبي تحشّت، لقيت روحي جيت قد قد في الكرسي اللّى بحذا الاستقبال، ممّا يرجح كونو موقعو مدروس استراتيجيا.
يا سيدي بن سيدي، طرف تحليل الدم اللّي جاية عاملة مزيّة بش نرميلهم عشرين دينار و نافخة ريشي باكا المياة و عشرة لاف، طلع حقّو بـ 107.250 دينارا! يا فقط! هاو الصحة في متناول الجميع و نحنا ما فيبالناش! هاذا جرد تحليل دم، لا تصويرة، لا فرش، لا دواء لا شي... زيدو فيزيتة الطبيب تلقى روحك تحوس في ربع شهريّة، خلّى كان هبلت و مشيت للفارماسي باش تداوي نفسك! لا، و وينك، شوف تبرى شوف ما يوالـمكش، ترصيلك فسّخ و عاود مع طبيب آخر! بالله العباد كيفاه عاملة في ها البلاد؟ علاه نلومو علّى يداوي رعواني؟ حتى كان توكّل، اهوكا حاجة ربي، مش بسكتة قلبية كيما اللّي صارتلي و زيد كل ما نلقى ورقة التحليل نضرب ربع نهار نتغبّن..

اما ع الاقل، ولّى عندي ثقة في حكومتنا و في مواكبتها للواقع الاجتماعي و الاقتصادي، ما تقولوش راهم عايشين في برجهم العاجي و ما يعرفوش هموم المواطن مع غلاء المعيشة. اهوكا في عوض يقضيو ع الغلاء، يقضيو ع المواطن!
اكا الورقتين بو خمسين، كي خرّجوهم، مش اعتباطيا راهو... ابب! فيها حسابات و دراسات قوية ياسر. انا وحدة م الناس، اكا الورقتين قضاولي و سدّوا بلاصة ورقتين بو عشرة، بالضبط بالضبط! كل عام و اقتصادنا بخير و العاقبة للورقة بو مليون تولّى تقضي بيها م الحمّاص... لمن استطاع اليه سبيلا!

اش يقول الميت قدام غاسلو؟ عملت هكا جبدت الزربيتين بو خمسين فرشتهملها ع الكنتوار و تلفّتلها، قلتها اختي ميسالش تعاودو تاخذولي الدم بش تجيكم النتيجة الصحيحة؟ يظهرلي السكر طلعلي...

الضرورات تبيح المحظورات، بين قطة المعدنوس و المخدرات

2009-08-21T05:50:00.000+01:00

يقلك ما عندك في الهم ما تختار، اما الواحد كي يلقى روحو لا يزي في دولة متخلفة، لا يزي في عام ازمة، لا يزي في عالم عربي اسلامي، لا يزي مرا... يقول اش اكثر من ها الهم؟ و مع ذلك الواحد ما يياسش من رحمة ربي. ايا سيدي انا اليوم صبحت نبوس في يدي وجه و قفا و نشكر فيه اللي ع الاقل مانيش بش نعدي رمضان في مصر... ترصيليش مطيشة من بركون في العشر الاواخر؟؟ قالّك غادي هاذي هواية ولاّ عادة ولاّ تأثير غير مباشر للصيام لتوا لا فهموه. الواحد يقول علاه البركون؟ علاه العشر الاواخر؟ زعمة هي تخرج بش تأذن يدزها و يقلها ما يصحش؟ ولا تخرج بش تقلب القديد المنشور يقلها وقتو توا؟ ويني البريكة قبل؟ الدافع للجريمة مزال مقيد ضد مجهول، لكن الظاهرة ثابتة و اكيدة.

توا باهي الواحد يسمع بش يوصل لعلمو و يحمد ربي على نعمة العركة الخفافي اللي تندلع في الكوجينات التونسية. اما زادة باهي كي الواحد يحاول يفهم ها المجزرة الشُرفية (من شرفة مش من شرف لا ترصيلنا في حلّ و اربط يهديك)، بش الله لا يقدّر، نوقفو الوباء في الحدود قبل لا يوصللنا.
الرابط الوحيد في الحكاية حسب فهمي المتواضع، هوا الصيام. ايه و الله، خاطر الواحد في الاوقات العادية كي يحب يقتل، ماو يتكي على مرتو يززّها كي العلوش في بيت البانو ولا ع النوم... ممكنشي يحطلها الفتاك، تكثّر عليه بالمرج، تخرجو من سينتو يشد يخنقها حتى يخرجلها لسانها -يراه مقوصوص- كي البعيّة..
لكن جريمة متع تشد واحد تلوحو من بركون، فيها دلالات. لواه نمشيو لبعيد؟ تي الواحد كي تجّهلو، اش يقلك تره؟ يقلك ابعدني خير ما نشد نطيّشك م الشباك. يعني قمّة الفدّة و ضيق الخلق، كان ما تختفيش من انظارو الاّ ما يطيح يتخنق هوا بيدو، فمن باب اخف الضررين يشد يطيشك انت بكلك. الباقي عاد انت و زهرك، طحت م الطابق الاول ولا من صمعة، هذاكا لازم تحسبلو حساب وقت اللي تكري دارك! و ماذابيك تجرّب قبل لا تاخو المفاتح، مش بركون في شكارة...

المهم، اخطانا م الهزان و السبطان. هات الرسمي. وصلنا لقناعة و حقيقة يقينية كونو الصيام يعمل الفدّة حتى الواحد اللطف يولّي يسرق م الجوامع و يدز م البراكن، يعني بعبارة اخرى يخرج العبد من وعيو... كيفو كيف الشراب راهو!
و مدام النتيجة واحدة، بشوية تخديم مادة شخمة، و بالاستناد الى قواعد فقهية صحيحة و ثابتة ثبات المسمار في الحيط، اختار قاعدة رفع اخف الضررين لاتقاء اعظمهما ولاّ حالة الضرورات تبيح المحضورات ،كيما تحب، اللي يساعدك، فصّل و قيس...

اما خير بالله؟ تعدي نهار كامل صايم، دايخ، لايث، فمّك ابخر و تكملها بنَتْنة انت و مرتك توصل للي لا يحمد عقباه، و الا فرد مرّة، تشد دبوزة تتكّى عليها في ساعة م الزمان و تخرج تلبس شجرة ولاّ تقضي على عايلة كاملة، سترايك فرد مرة؟
مش هكّا نحققو اكثر انتاجية و مردودية على صعيد حوادث الطرقات، و جرايم القتل و الاعتداء على الناس واموالهم؟ مش هكّا ندوّروا الدولاب اكثر و الفلاّحة يلقاو كيفاه يبيعو العنب و الشركات توسق للداخل و البرة و الدورة الاقتصادية تتم!

و الله بالحق، الى متى بش نقعدو محصورين في عقلية متع الف و اربعمياة سنة لتالي؟ علاه ما نواكبوش العصر، نخلقو سوق للشراب متع عشرة ملايين نسمة، نخلقو الطلب بش نرتقيو الى مصاف الامم على الصعيد الاقتصادي. و زيد في ها النظرة هاذي، راهو البقاء و النشوء و الارتقاء بش يكون للافراد اللي بدناتهم تقاوم و اللّى ذراعاتهم في وجوههم بش كي يدور ضرب خنيفري و امّاس، ينجمو يعملو على صحة الابدان. يعني بكلمتين، ربح صافي...

و نمشي معاك اكثر من هكا... رمضان راهو شهر خطير، شهر الفتن و الجرايم... قداه من مرّة تلحم عركة قد ربي و عبادو في جرّة قطّة معدنوس! قطّة معدنوس يا ناس! معدنوس ياهووو! طرف حشيش اخضر ياكلوه حتى العلالش!
علاه ما ندوّروهاش افيون؟ مش درا اش اسمو قالك الدين افيون الشعوب؟ نقعدو نصيمو و نصليو و نعذبو في رواحنا بش نشيخو في امخاخنا؟ ليه؟ حتى ربي قالك راهو دين يسر و ليس دين عسر... نقلبوها طول افيون و نحن على ديننا!

انا من منبري هذا، نطالب حكومتنا و مسيّرينا بش يخذوا الاجراءات الكفيلة بتعميم ها الخير العظيم على الشعب كامل في اطار التنمية الشاملة و عدم اقصاء اي شريحة اجتماعية، اللي خالطة على الشراب المذخم و اللي يسكروا بكحول الشعول. و لازم نتخذوا اجراءات ردعية صارمة للمخالفين الكل. بون، م اللوّل الواحد ماذابيه يمشي بسياسة الترغيب، يمشيش يقولو دولة متع شيخة اما خسارة دكتاتورية؟
اهوكا السنة نعملو باراجات متع شرطة في الكياسات الكل، و نعملو "صيام تاست" في عوض الالكول تاست، اللي هاذا يمد لسانو، كان لقيناه اصفر و فمو ابخر، يطبطب البوليس على كتفو ويقلو ليه هكا عامل في روحك؟ حتى ربي ما يحبش، هاو دبيبيزة متع شدّان يد، شق عليها فطرك حتى لين تعوّل. اما في صورة شدّو نفس المواطن في حالة عَوْد، recidive بالعربي، ما يسيبوه كان ما يعدي شهرين في الشيلينق مع النفاذ... لِعْب امالا؟ البلاد على قرنو؟ يصوم و يعرض ارواح الناس و روحو هوا للخطر؟؟

----------------------------------
ملاحظة : عاد ما نوصيكمش كيفاه تقراوها التدوينة هاذي!

و الحديث قياس

2009-08-19T23:29:00.001+01:00

مرةً في كل مائة سنة يلتقي يسوع الناصري بيسوع النصاري في حديقة بين جبال لبنان ، فيتحادثان طويلاً ، وفي كل مرة ينصرف يسوع الناصري وهو يقول ليسوع النصاري : أخشى يا صاحبي أننا لن نتفق أبداً أبداً ؟؟

جبران خليل جبران
رمــــــل و زبــــــــد

رمضان جاء و الرحمة لا...

2009-08-19T20:16:00.000+01:00

ربي يستر، رمضان اخر الجمعة هاذي و ظاهر فيها السنة بش تاكل بعضها...
انا قبل كنت م الناس البهالل اللي تفرح كي يجي سيدي رمضان، الله غالب، ماشية هكاكة بالنية على عمايا. نقول شهر فضيل، شهر عبادة، شهر ماكلة و سهريات و دبش، و لمّة... شهر يولي الواحد عندو فيه فايض متع حب و حنان للجنس البشري الكل، شهر لربي و لعبادو quoi!
اي اما هاو طلع شهر هردة مش لعب! ربي يفتح على من فتح علينا...

قالك يا سيدي العباد تولي مجرّمة في ها الشهر. تكثر السرقة و القتل و الاجرام، و الجاه كيما نقلك، كلام علم و احصائيات هذا، نفدلكو معاك امالا؟! اللطف اللطف يا صاحب اللطف...
قالو شهر التسامح و شهر الفضيلة و شهر العبادة، فك عليك، هذاكا كلام متع اشهار راهو، يحبو يصوموك بالسيف، خاطر كي انت تصوم، الله اعلم اش يربحو هوما...

و نزيدك زيادة، قالك الانتاج و الانتاجية تولى في الحضيض في ها الشهر الفضيل.
اي الحق خاطر مستانسة في السماء الانتاجية، و نحن قلبنا حارقنا حرقة ع الانتاج. لواه الكذب؟ انا قداه من مرّة نبدى مروحة، نتلفت نلقى واحد رامي روحو على كبوط كرهبتو يبكي بالشهقة و يهبط فيهم حيار خاطر حاسس بالذنب كونو فصع م الخدمة ولاّ خاطر عطّل مصالح المواطنين...

انا وحدة م الناس، اساعة كنت نقول تبارك الله هاو الدولاب يدور و التجارة ماشية و العباد تشري، بالكريدي، بالحاضر، بالسلف، اللي هوا، المهم، هاو ماكلة، هاو لبسة، هاو جهاز دار، هاو خطبة، هاو فاتحة، هاو طهور... و الله كان ماشي في بالي الاقتصاد يتنعوش و سيدي رمضان يحل ببركتو ع الخلق.

صحيح نرى في التكركير و النوم في الادارات، اما يا أخي فما آية ولا سورة قالت من شهد منكم الشهر فليسهره؟ انا في بالي ربي كتّب عليكم الصيام، الباقي، تسهر،تشطح، تسكر، تصوم، تفطر، تعديه فوق سجّادة، عاد يظهرلي هاذيكا امورك. و ماظاهرلي كان الاسلام حرّم عليكم الخدمة، بالعكس، العمل عبادة. و اللي قلبو حارقو ع الخدمة، من حينو، اشكون شدو؟ ولاّ ما فلحنا كان في التعلاّت؟

ايا سيدي تعرف كيفاه؟ رمضان مبروك علّي صام و علّى ما صامش، اهوكا ع الاقل يدبر بزايد ماكلات بنينة و سهريات و جو، و ربي يعيدو علينا بصحة و عافية ع الاقل الواحد يشبع من لمّة العايلة و من دفاها، ولاّ حتى هاذي فيها انّ؟

خالتي منوبية Vs طالبة الاستاذية

2009-08-14T15:15:00.001+01:00

الاســـــــــــــــــــــم : xxxxxx xxxxx
الـــــــــــــــــــصفة : طالــــــــبة
المستوى التعليمي : الاستاذية في الحقوق
الســـــــــــــــــــــن : 25 ســـــنة

المقولة المأثورة : "ان مصادر التشريع متفاوتة في الاهمية و العلوية. و التشريع الالاهي يعلو على القانون الوضعي، و لذلك لا بد من تنقيح مجلة الاحوال الشخصية حتى تتماشى مع تعاليم الشريعة الاسلامية. اني و بوصفي امرأة مسلمة اطالب باستعادة الرجل التونسي حقه الالاهي في تعدد الزوجات..."

الاســــــــــــــــــــم : خالتي منوبية
الصـــــــــــــــــــفة : بياعة حمص في مدخل السوق البلدي
المستوى التعليمي : ما تعرفش تكتب اسمها ع القلّة
الســـــــــــــــــــــن : ممكن 78 سنة

مرا هبطت تشد نصبة الحُمص في عوض راجلها اللي استنقط، ربّات اربعة صغار، خدمت في الديار، مرضت بالسرطان و هزمتو. فرحانة بالصانتي شعر اللي طلعلها بعد العلاج الكيمائي، ياخي كنّتها المتتلمذة على قنوات بيع الصدقات الجارية قالتلها عيب، شدّ دارك و استر حالك.
المقولة المأثورة : "خدمة النهار ما فيها عار، و نزيدك زيادة، النار ولا الخمار."

كل عام و نساء تونس بخير، كل عام و نحن راجعين بالتوالي في صعدة الحداثة...

الوجه الحقيقي للمدونين

2009-08-08T17:03:00.000+01:00

برشا يسألو المدونين، علاه التخفي، علاه التنكر، شكونك انت كان عندك شجاعة...
انا وحدة م الناس، نجاوب على السؤال بسؤال يظهرلي اوجه ببرشا... وانت علاه تدخل تقرالو ها المدون؟

يظهرلي الشي الوحيد اللي يهمك فيه في ها الفضاء، هوا كَوْنُو مدوّن، انسان يكتب، يصور، يفكر، يشعر، يسب،... اللي هوا. و هاذي الصفة الوحيدة الي تربطك بيه.
بش يغير حاجة لو تعرف وجهو ابيض ولاّ اسمر؟ طويل ولاّ قصير؟ غني ولاّ فقير؟ خنانتو هابطة على وجهو ولاّ سنيه داخلين بعضهم؟
بش تولى تحبو اكثر ولا بش تكرهو اكثر؟ ولا بش تفهمو اكثر؟

فما شكون اختار انو يدوّن باسمو و لقبو و تصويرتو و مضمون بوه و امو. و فمّا اللي لا!
علاه تحاسبو على اختيار الانونيما؟ و تبدى تجري تلم في الاخبار عليه كي المفتش كرومبو؟ و علاه تحب بالسيف تعرفو في الدنيا و اذا رفض يولي بيه و عليه وصفتو و نعتو؟

لِكُلٍ اسبابه، و تبعد كل البعد عن الخوف، خاطر في نهاية الامر، ماناش نحكيو في اختراع الذرة. و علينا احترام ها القرار، احترام الخصوصية.
و زيد ما تنساش اللي المدونة راهي تعكس جانب من الانسان اللي وراها، لكنها ما تختزلوش. و مش ديما صاحب المدونة ينجم يفدلك او يتفلسف او يكون كما يجب ان يكون، او بالاحرى كيما نحبوه يكون، مدوّنة بالصوت و الصورة، ثلاثية الابعاد.

نصيحة، اكتفى بالوهم و بالعالم الافتراضي، احيانا يوفر عليك برشا خيبات...

الحب حول طاجين ساخن

2009-08-02T16:34:00.000+01:00

على خاطر بعض العباد اللي احلى م العسل ع القلب، هاو بش نعمل تخنتيبة فيسع فيسع، اما و الله مشنوقة من شوافر عينيا و نشهق ما نلحق و غيابي ها الفترة ما عندو حتى علاقة بالقراء ، لا انونيم لا بهيم و نرجع نتأسّف للمعلقين ع الموستيكار اللي عملتو ع التعليقات خاطر الصيف جاء و حاشاكم الحشرات تكثر. لو جيت فاضية شغل راني ممكن خليت الماء مسيّب ع البطيخ و نعدي النهار نلعب في الغميضة مع السيد. الله غالب، في مستقبل قريب انشاء الله نرجع نشد في حيوط دارنا لا تطيح. ماي تطوال، تقصار، صامدون صامدون على درب البطالة...

المهم ، ها النهارين عندي بااارشا حكايات شاهية نحكي فيها، لكن كيما قال الفيلسوف الكبير و الحكيم الخطير رامي عياش "انا عتبي عليك ع قسوة عينيك" يا نهار، خاطر ما فيك كان اربعة و عشرين ساعة.. الا ما يجي نهار و نتفاضى (اهوكا bande d'annonce ع الموسم القادم من التدوينات، حصريا على بنت عايلة بلوغر فانتظرونا و اللّي يحب يستغل الفرصة يبعثلنا نحطولو اشهار، مدام رمضان جاي، و سومك سومي يا خويا ماناش بش نتخالفو على وسخ دار الدنيا).

هدرة اليوم لايت، كلمتين خفاف نظاف، اما و الله العظيم عندهم مدّة يحفرو في قلبي و انا نبدى شادّة روحي بالسيف لا تصير فيا سبّة في جرّة هدرة فارغة و بابا و امي يقعدو يبكيو عليا في ها الصيفية.
يا سيدي الحكاية و مافيها، مرّة شادة ثنية الاوتوروت مروّحة للدار و ما نعرفش كيفاه ولاّ بالاحرى شكون دوّر حط اذاعة التفاهة و التمجديق شُهرت موزاييك. و هاني لتوا نفكّر نشكي بيهم بتهمة الارهاب الفكرى و الثقافي على مواطنة عزلاء!

يا سيدي تطلع غناية راي ولا حاجة تشبّه للراي، المهم لهجة مغاربية، الحق ما نفهمش فيهم اما يا اخي ها التحفة الفنية كان عندها عليّا تأثير عظيم غريب، عمّال نسمع و عمّال حواجبي تطلع لفوق و جداقي يطيح و علامات الدهشة و الانشكاح و الاستغراب و الازبهلال تزيد. شعرة لا فلّت الدورة و كمّلت للحمامات ولاّ دخلت في جرار فلاحي (الي بالمناسبة ما نعرفش اش يعمل في الاتوروت) و كليت راسي...

ها العمل الفني الّي زعزعلي كياني، كيما غناياتنا الكل يحكي ع الحب! ماو فضينا كل المشاكل و كل مؤرقات العيش و ما قعدلنا كان التمعشيق... هوا كي تجي تشوف، باقي مش عيب، الحب احساس سامي و سبب تخلفنا مش كوننا سيبّنا الرسمي و شدينا في سفاسف الامور، اهوكا حتى م المسيح قالك "ليس بالخبز وحده يحيا ابن الانسان".
(و ها النوع م القصّات العربي اللي لا علاقة، حسب رايي الشخصي، احسن رد للتهم الّي ما عندها لا ساس لا راس، من نوع نحن متخلفين خاطر مسلمين و اهوكا شوف المسيحيين محلاهم و ما انظفهم... اما ظاهرلي ما حاسبين ع المسيحية كان اوروبا و امريكيا، اما افريقيا السوداء خلطوا في زمن الغفلة، هاو خرجت ع الموضوع، نخليوه للموسم القادم زادة)

نرجع للغناية المعجزة، هاو لبّ موضوعها -بتصرّف طبعا- قالك السيّد يتبلحط في القاعة و يحلف للمدموازيل بنت بلادو اللّي يحبها، انو راجعلها م الغربة راجعلها، و اللي لا يفرقو عنها لا بحور و لا برور و لا حتى الشعر الذهبي للرومية و اللي مستحيل ياخذ شختورة غيرها. ايا تره طلّع علاه؟

لا مش خاطر زينها مافماش ولا رمشها سيف ذبّاح و لا حتى بش يشّم عليها ريحة البلاد و مش حتى بش تربيلو ولادو تربية صالحة سويّة في مجتمع الكفر و الزندقة و انعدام الهوية...
يا سيدي راجعلها راجعلها خاطر القاورية ما تعرفش تعمل طاجين! اش كون بيه كي يحب الطاجين؟؟ ايا اش قولك؟؟
#❊#$$^٪$^ !!!!!! (انا كان هذا تعليقي، اما مشفّر بصراحة!)

توا بجاه اللّي يعز عليكم، لنفرض جدلا انو الشاعر كتب كلمات الغناية في حالة سكرة انجليزية و معدتو لوات عليه تذكّر الطاجين، زرّف الكلمة، و المغني جاهل جهلا مدقعا ولاّ بسيط حد السذاجة، الّي مدولو غنّاه و زيد قول المنتج الّي موّل ها الموشّح ما يعرفش طرف خلاه وين و يحب يربح في المغني ثواب. اما الّي ما فهمتوش و قوى على طاسة مخي، هوا ها الاذاعة العريقة الّي تبث في الغناية و تعاود!
يا جماعة موزاييك، باااااع... راكم طيّحتو على رواحكم في الروكور العالمي للاسفاف و الابتذال. ربي يبعثلكم بنت بلاد حرّة تعرف تطيب طاجين، و تضرب بين العينين، لعل توليو تدلّو! قول آمين..

الى الانونيم طيب الاصل....هذا ردي الوحيد

2009-07-14T09:52:00.002+01:00

صحيح الدبوزة منو غالية، اما في نطاق الحفاظ على نظافة المكان من الصراصير

و توا، لو تفضّلت، لطفا، ذوقا، رُولْ من قدامي....
اهوكا ما استعملتش كلمة "شِرْ" ...حرصا مني على مشاعر الكلاب، ففيك عن قدرها سفول كيما قال الشاعر

اصغى الى الوحي الالاهي للنجاح في الشفاهي

2009-07-13T11:37:00.001+01:00

"رجل القانون لا يمكن ان يكون ابدا في صف المتفائلين"

العبارة هاذي جبدتها اكا النهار كتفدليكة في اطار لقاء ودي جدا جدا جدا جمعني باحد جهابذة القانون و احد القضاة اللي مزالو جدد ع الساحة الفنية، نيو نيو م القرطاس. و لو لتوا شاكة كيفاش وصل لها المنصب. خاطر ما لقيت كان زوز نظريات... لولانية انو لقى الماتيريز في كعبة كيندر سوربريز و الثانية انو البرلمان بيدو ، في اطار مناقشة ميزانية الدولة، بعث مكتوب للجامعة طلب منها تنجيحو بصفة استثنائية للتخفيف من تكاليف دراستو ع المجموعة الوطنية. بعد اللّي الراجل اندادو بداو يخممو على شهرية التقاعد و هوا مزال يعاود فيهم عام بعد عام...

المهم، للامانة العلمية بالطبيعة، قتلو اللّي العبارة هاذي راهي مش متاعي و انما وردت في كتاب جديد -تابع التخصص متاعي- شريتو ها النهارين و عملت عليه كيف. اخطاونا م نظرة الازدراء المقنعة متع انسان يعتبر لمجرد كونك شريت كتاب بخمسة و عشرين دينار في عوض تطبعو مشولق بخمسطاش الف، انت م "البورجوازية العفنة". خاطر حسب نظرتو للامور (ولو كي تجي تشوف نظرة برشا عباد بش ما نقولش السواد الاعظم من ها الشعب العظيم)، ها المبلغ بلاصتو انو يتصرف في قهوة من القهاوي البَمْ بَمْ، ثَمّ ثَمْ بش توري وجهك مع الجماعة الواصلة و اسهمك تطلع في سوق التقطيع و الترييش. اما بالنسبة للمؤلف و دار النشر اللي تتسمى تقمر كي تطبع ها النوع م الكتب الاكاديمية خاطر سوقها ضيق جدا، ف الله لا ثمر فيهم ولا تختملهم و انشاء الله يقيدو فلسة في القريب العاجل...

من كلمة لكمة، اتقالت ها العبارة... و ربي دقني، كمّلت قتلو على اسم الكتاب و المؤلف متاعو ( و الّي مانيش بش نذكرو، خاطر انسان بسمعتو في اكا البر اللّي اسمو باب بنات مانراش علاه بش يتجبد في ها المحل اللي مانيش عاملة منو راس مال، على عكس ما يسخايبو بعض الناس). المهم سيدي، اساعة نحب نأكد منذ البداية اللي جناب القاضي مولى الكتاب، لا يقربلي لا بنسب لا بمصاهرة لا ماخو بنت عم بابا ولا نهار ريتو منّي ليه ، لا حضرتلو محاضرة لا عملنا كونستا متع تأمين لا صرّفلي دينار بش نخلص باركينغ. مجرد اسم قاعد يلمع لقاضي شاب -نسبيا- و عيني ما تضر كل عام بالقليلة يخرج كتاب في فروع متعددة م القانون ـوعدة مقالات بعدة لغات- و اغلبها بش ما نقولش كلها كتب تستحق الاحترام لا يكون غير للامانة العلمية متاعو و الجدية اللي تتسم بيها كتاباتو مقارنة بعمليات النسخ و اللصق اللّي نراو فيها من ارفع الهيئات الاكاديمية.

يا سيدي انا قلت اسم المؤلف، و القاضي اللّى قاعد يهرّ معايا، سبحان الله النور اللى في عينيه طفى، النفس اتقطع عليه و وجهو بدا يزراق يزراق حتى قلت استنقط العزا، اش بش نعمل فيه؟ حتى بش نكركرو للاستعجالي ظهرلي يكسّرهولي. خلّي التركة غادي، المجتمع يرتاح منو.. مبعد تذكرت اللّي هي جنحة و ترصيلي مسلسلة في جرتو.
الحمدو الله في يدي دبوزة ماء مديتهالو بلّ بيها ريقو بش ردّت فيه الروح. و بدا الطاروح عاد...
في اكا المؤلف بيه و عليه و صفتو و نعتو و عمل و ساوا و قد الخ الخ الخ... تقولش عليه كلالو ربعة بوه! الشي الوحيد اللّي نقدو بطبيعة الحال (ولو اللي صار قذف و ثلب) هوا شخصو. لا جبد بكلمة على كتاباتو ولا على تحليلو و اغلب الظن اللي هوا ماقراهاش من اصلو. لا يخسر مومن. الحاسيلو ماناقص كان بش يكمل يجبدلو عرضو. هكّاكة، لله في سبيل الله!

يا ولدي ياخي تعرفو منك ليه و عمّلك ولا شنوة الحكاية. نوّرني ينوّر عليك. و كي العادة، الاخ المحترم استشهد باذاعة قالو و فما شكون راه و فما شكون كان ضحيتو... ولا حكاية عندها سند موثوق بيه.
الّي نرفزني في الحكاية الكل، انو للاسف الشديد عنا ها العقلية الكلبة. متع نجاح الاخرين يعتبر فشل ليك انت. و كي تمدح زيد تقولش عليك انتقصت من قدر عمر. و في عوض العباد الّي هذا ينصرف لتحسين مهاراتو و تهذيب اخلاقو و الرقي شوية بتطلعاتو، يستثمر شوية صحة الابدان اللي عطاهالو ربي بش يقوّض اللي بناوه الاخرين. و يكسرلك راسك ببيه و عليه... ما ينجمش ينقد اعمالو، خاطر بالطبيعة تكون نجاحات، و انما ينجم يقدح في شخصو، يوهمك انو اكا العبد سارق اكا النجاح و انو بانيه بعرق ناس اخرين كانو ضحايا ليه.

و عمري لا ننسى نهار كنا نعديو فيه في امتحان م الامتحانات، خرجنا م القاعة لقينا الدنيا خايضة و عباد تتهجم على طفلة و شادتها بالسيف بش ما تدخلش لبيرو العميد ماكانش بش يعرضولها و بش يعتديو عليها في مالها و ذاتها... علاه؟
خاطر في القاعة الي عدات فيها، الاستاذ المراقب سكّر الباب و قاللهم خرّجو اللي عندكم و كان تحبو المحاضرات بيدها و ما يشدكم ع الفوسكة كان نفسك... الطفلة اللي ساهر تحضر في المادة للفجر ما حملتهاش الحكاية، كمّلت عدات باللي في راسها و هزت روحها ماشية بش تعلم الادارة بالتجاوز اللي وقع...
امة لا الاه الا الله الكل شادتها، الجماعة اللي نقلو معاها و الجماعة اللي في قاعات اخرى، سبحانو ربي لا نهار اتحدو في كلمة غير نهارتها... قالك هاذي اسمها خيانة و الطفلة ناوية تغلّي علينا الخبزة! كي منعت من طريحة، بوها باي.

اللي يضحك انو العباد الكل فايقة بالعباد الكل. و الناس الكل تنافق في بعضها. ياخي لشكون جاي تحكي في حكاية انو انت انسان خارق الذكاء و نابغة عصرك و اللي الله غالب ما واتاتكش الفرصة بش تفرض روحك. و اللي انت نفسك عزيزة ما تنجمش تعلق احذية الناس الواصلة بش يكونلك بلاصة تحت الشمس؟
اش شدّك ع الابداع؟ الناس تبدى تاكل في روحها ماكلة و تحاول تطلع للسماء السابعة بش توصل يكتب حاجة فارقة و تنشرها ولاّ بش تِنْظَم لوحدات بحث و ساقيها تحفى ع التمويل و التنظيم...

تحب انت يجيوك لقهوة راس النهج اللي تقعد فيها تشيّش و تلعب البلوت يلحلحو بيك بالجاه بالبخاري، افتح علينا بنورك و علمك و انشر فينا وحيك؟؟ خاطر بش انسان في اربعة سنين ما عفسش مكتبة و لا نهار دخل لمحاضرة و سنوات الجامعة عداها مرمي ع القازون ولا يدور من شركة لشركة يدبر في التبرعات بش يسافر يتشخلع في ايبيزا، ماظاهرلي كان عندو مصدر اخر للعلم العظيم غير الوحي الالاهي...

خطير... ما سرّ الجسر الجوي في الضاحية الجنوبية؟؟

2009-07-09T11:28:00.000+01:00

كتبت لكم بنت عايلة من المعهد الاعلى للقضاء...

ههه اش قولكم في ها العنوان متع جرايد بودورو؟ لا في تطور و الحمد لله.

على ترانيم انغام صوت قطار الضاحية الجنوبية و وسط عبق ريحة بسكويت سيّدة بالشكلاطة، حلّ ركبي بمكتبة هذه المؤسسة العريقة. الغاية بالطبيعة مش لبيع دبابز الماء البارد للطلبة و الاساتذة الّي لعبت عليهم الدوخة بش وصلو لحرم ها الصرح القضائي الاكاديمي و انما لتسوّل حق الاطلاع على بعض المراجع. م الصباح و انا ريقي لايث بالجاه، يكون منكم، يجعللكم و تلقاوه في صحتكم و صغاركم وسّعوا بالكم و هز راسك لفوق تلقاشي ها الكتاب اللي حاشتي بيه ولاّ مد يدك بش تعطيني اكا الكاتالوج، يراك ممدود في الجنة...

بالطبيعة بعد تلحليح و تزقديح و تذوبين عند المسؤول ع المكتبة، الحق متع ربي وسّع بالو و جاء يزعق ع الراجل اللي لاهي يمد بش وسّع بالو (مكره اخاك لا بطل) و الكتاب اللي م الصباح لا سمع بيه، لا وْصِلْهم لا راه في حلم لا علم، طلع مطيش فوق راسو توا قرابة العام، غير مالقاش الوقت بش يقيدو في الكاتالوج.. قداه ظالمينها ها الدولة يا خويا... هاو يصرفو، هاو يعملو في الندوات و ينشرو و يجبهيو ايجاو اقراو و حلو طاسة مخكم، زايد مدام ماعناش الضمير المهني على مستوى هياكل التنفيذ، عملنا نقبة في الماء.
باهي، توا كي فرغت ها القلب شوية، انجّم نبدى ندوّن على روحي...

اي سيدي اساعة اختفائي المباغت من الساحة (ناري على تدوينات الحملة اللي ما كملتش) راجع لحلول ركب اخت كلوفية شهرت "كلوشوهاجية" بالبلاد التونسية. مش للاحتفال بمقدم طلعتها البهية ولا لتطير الوحش منها و انما بكل بساطة مشيت نهارة وصولها بش نسلّم و ناخو بخاطر كلوفية و نكمّل نعاونها في تهبيط القش اللي جايبتو تتمزّى بيه على اختها، زعمة زعمة دبش فرانسا. و لولا الحشمة راني هزّيتها لسوق الخميس في الزهراء توا تلقاه مطيش في النصب على خمسيماة فرنك و تتسمى حْصُلت زادة.
المهم سيدي، طبّست نعاون فيها و انا نقرى في المعوذتين و الحصن الحصين و دعاء السفر و دعاء الشفاء و صلاة الاستسقاء و هازة سبورة فيها آية الكرسي معلقتها كي البادج في رقبتي و مريول مكتوب عليه "ان ينصركم اللّه فلا غالب لكم" و بندانا مصوّر عليها نصر اللّه و ساك آ دو فيه صحيحي مسلم و البخاري و باقي قلبي ما قايلّي خير و ركايبي ترعش...

ايا سيدي طبست نعاون فيها و هي ترحّم على والديا، يعطيك الصحة، استحفظ على شبابك و صحة بدنك، الخ الخ الخ...ما كملتش العشية، اختكم صياحي قْبُبْ و نتلوّى بالوجايع متع ظهري. عديتهم ثلاثة ايام في الفرش نتحرك كي ماجد لعبة خشبية. قول انا جاتني خفافي ثلاثة ايام و رجعت نبرطع كي الحصان، اما قايمة الضحايا لحد الآن تشمل زوز تسمم غذائي، يد مكسّرة، كرهبة مفشّخة و كوبل على وجه طلاق قبل العرس. اي كتبو الصداق و م المفروض عرسهم الجمعة هاذي، هاو كل شي بطل كيما نرى عندكم.

و بمناسبة اقامتي الجبرية في الفرش، نجّمت نرى عن كثب الجهود الحثيثة اللّي قايمة بيها الحكومة متاعنا. بصراحة ماكنتش نتخيل عندهم ها الضمير المهني و ها التفاني في خدمة الصالح العام. و ها الشي راهو ريتو منّي ليهم، ما تقولوش لا تلفزة لا بروباقندا لا تهلويس سخانة لا شي.

هوا كي تجي تشوف، اول نهار، دايخة بالدواء و قلّة النوم بفضل العروسات و الربوخات اللي عند راسي تضرب للصباح، مشى في بالي اللي البلدية استجابة لاحتياجات المواطنين و قاعدة تداوي في الناموس بالطيارات. نسمع في الفننننن عننننن و الهيليكوبتر و الـآف ثلطاش كي البطاطا و نصلّي ع النبي. يجي اربعة سوايع و الطيارات تزفّ عند راسي، من قرابة الستة للعشرة متع الصباح. لين دخلّي الشك و قلت ياخي هذا الكل عنّا ناموس؟ تي ها الكمية تقضى ع الناموس و تبيد المتساكنين فرد مرّة.
لا لا في الحكاية انّ... زعمة اعلنّو الحرب على تونس الجنوبية؟ زعمة جماعة سليمان عاودو طلعو كي الحُّرِيقَة؟ حتى لين بشوية تبتبيت و تنسنيس، جاني الخبر اليقين اللّي ها الجسر الجوي اللي يتعدى يمرًّرلي الصبحية ماهي الا الحكومة و الوزراء ماشية اتدب، تِكْلِت على سعدها ع الفجاري بش تهبط للحمّامات تعمل الاجتماعات اليومية.
اش قولكم في الضمير؟ اش قولكم في التفاني؟ اش قولكم في الاستجابة لتطلعات المواطن؟

ماو قبل كانو يجيو للاوتوروت يسّكرو بوها م الفجر لقرابة التسعة متع الصباح. و الّي غلط شد الثنية متع الاتوروت يلقى روحو متبلوكي في امبوتياج متع يوم الحشر. للحداش متع الصباح و العباد تزحف، ما نحكيلكمش ع الحوادث المريعة اللي تصير بالتنرفيز و الجري ، و اللي مزروب يعمل قصة في الزيتونات متع ستاد رادس ترصيلو يعمل في آبار ارتوازية بش يخرج عجالي الكرهبة م الرمل و التًّفِزًّة.
و لذلك لا يسعني الا ان اشكر حكومتنا الجليلة على الاصغاء لمشاكل المواطنين و تحمّلهم مشاق التنقل بالطيارات العمودية، خاصة و انو حسب عدد الطيارات اللّي تتعدي، يظهرلي يجيو ع الصباح يقصو بونوات و يقعدو مقعفرين على كرسي سيمان يستناو في طرحهم. بالعمل ضربني الشك و مشيت نتأكد قداه عنّا من وزير و من كاتب دولة، كي جيت نحسب فيها، قلت لازم يعملو طيارة لكل وزير و طيارة يهزو فيها لكل وزير كُرسيه يخلطوه عليه، تجي الحسبة قد قد.
اش بيه؟ ما يصُحّلهمش يتدللو عل المجموعة الوطنية؟ مش شاقين و تاعبين في جرتكم؟ اما خير ولاّ يلموهم في كار متع رحلات ولاّ يحجزولهم تران كامل ليهم ع الفجر؟ و تقعدو انتوما مْعَوّقِين؟؟ ياخي بفلوس ناس اغراب؟ ماو منّا ليهم، ربي يخليهم...

تحب حرية التعبير؟ اش قولك تبدى بحرية التفكير؟؟ (2)

2009-07-04T02:41:00.000+01:00

وين وصلنا البارح؟ ايه، السؤال الوجودي، اش عنا بش يتحجب اصلا في تونس... منطقيا، الدولة و يامن ادراك ما الدولة بش توصل ترتعد مفاصلها و تتخلل ركايبها من طرف كتيبة ولاّ دقيقتين مصورين ببرتابل ملصق بالسكوتش، الواحد يقول لازم شي كايد. لازم خرّجو سر من اسرار امن الدولة و ما تعرفش ع البلا، تمشيش دولة عدوة بش تستغل المعلومات الثمينة بش تعاود تحتلنا ولا تسرقلنا ثرواتنا و نحن عينينا تغزر...

اما اللّي يجي يشوف اكا الكنز المكنوز اللي حاطين عليه وْكالة تعس و مهندسين مختصين حارقين اعصابهم يقانصو في اقل كلمة هكّا ولاّ هكّا، يقول حلّها نلطخ راسي على حيط.
ايا سيدي نبداو

الباب الاول - "فضايح" الناس الواصلة:

ها المواقع المحجوبة (من بقشيش و انتوما هابطين) بسبب ها التهمة الخطيرة، تجيب في حكايات و الاصح اشاعات على ناس واصلة في النظام و الا واصلة بفضل النظام. و في الظروف العادية، اغلب ها الاشاعات من نوع حديث سقيفة حمام ولا توشويش عند الحجامة. اي ماعندهاش مصدر واضح و لا سند صحيح غير اذاعة قالو و بزايد كلام و تفشفيش متع واحد يغزل و يفرك و حتى اكا الصور متع المبالغة تولى العباد تاخذها بمعناها الحرفي. المواطن الواعي كان من المفروض انو وحدو وحدو يتعامل مع ها الحكايات بكثير من الحذر بش يصدقها، خلّي عاد بش ينشرها و العهدة على الراوي..

لكن كي تجي انت، ابوك كلمة تتقال هكا ولا هكا، تمشي تسكر الحانوت باللّى فيه، شي طبيعي بش العباد تولى تقلك ما تسكّر كان ما الحكاية صحيحة و مافماش دخان من غير نار و هات من هاك الكلامات و السلامات... من فرطاس لفرطاس الحكاية تتهول و تكبر، زيد الماء زيد الدقيق، ملّي يكون واحد م الاعيان خذا قرض (فرضا بدون ضمان) من بانكة، تولى الحكاية دز الباب بساقو ع الرئيس المدير العام و عطاه زوز شلابق و هبطو من رقبة السورية بش يحلّو الخزنة و طاح يغرف!

و نزيدك زيادة، نأكدلك يا سي عمار اللي يدور في تونس بين العباد اعظم من حكايات الانترنات ببرشا. اش بش تعمل وقتها؟ تقص اللّسانات ولا تسكر الوذنين؟ و الحكايات هاذي راهو مش من الخيال الخصب متع الشعب برك، و انما تخرج م الناس المقربين للناس الواصلة. اكا اللي يجيبوهم بش يتفرجو في الشي و الهيلمان و يلقاو على شكون يتفشخرو. هاذوكم بيدهم يخرجو فمّهم محلول طاقة باهتين ملخلخين و اول ما يفيقو م الدوخة يعملو هكا يهزو التاليفون بش هوما بيدهم يكملو يتفشخرو ع الخلق العادييين بالشرف العظيم اللي حصللهم. و كما يقول المثل... قطوس الباي عمل عملة فوق سطحنا...

و بالتالي في بالك انت عملة حاجة باهية و ارضيت الاسياد و العباد كي سكرّت باب البلاء، لكن انت في الحقيقة في عوض تطبّها عميتها. خاطر بالتجربة، نفس الحكايات اللي كانت تحكي فيهم audace قبل، برشا ناس كي يقراوها يضحكو و يقلك ياخويا يخلي دارهم قداه يهولو. توا، كي تمنعت الاوداس و تسكرت المواقع، نفس الاحداث مع تغيير للشخصيات و الاسماء بحكم التعديلات الوزارية و الخطط الجديدة، نفس الهداري متع الكذب المفلق يطيح الكوز و يقعد الزيت معلّق، العباد تضرب كف بكف و تصدقها و تعرّي راسها عليهم...
وحدة م الناس ما نلومش عليهم، الناس مادامها تتخبط في ظلام و تعتيم اعلامي تام ،ماي ما قراتش الخبر منها ليه و انما تعدى على مخيلات القراء، فتوصل الحكاية مهولة، رهيبة متع الواحد يقول اشبيها ها البلاد لتوا لا قامت فيها ثورة تحرق الاخضر و اليابس؟
و اللّى هذا يهز عينيه للسماء و يوكل ربي... و هنا نوصلو للباب الثاني.. غدوة انشاء الله.

تحب حرية التعبير؟ اش قولك تبدى بحرية التفكير؟؟

2009-07-01T22:29:00.002+01:00

بالرغم م المرض و التعب و الحالة المكربة قلت الواحد لازم يرمي كليمة مع الجماعة، صحيح الحملة بش تدوم جمعة اما ماذابينا ع الاقل النهار الاول الكل نمدو وجوهنا. المهم، شوف حكمة ربنا يا مؤمن، تزامن وقت رجوعي لتونس مع ها النهار العظيم الا و هو الفاتح من جويلية اعاده علينا الله باليمن و البركة. بش كي نكتب حاجة ع الحجب نبدى حاسّة بيه منّي ليه. و نحب فرد مرّة نستغل الفرصة بش نحيي الوكالة التونسية للانترنات و دورها العظيم في الحفاظ على الامن العام الافتراضي. ع االاقل ضمنا حويجة آمنة ميا في الميا في ها البلاد.

لايزي الواحد في النهار و القايلة ماعادش متهني على روحو و يبدى يمشي عينيه على كتافو يا ويلو من البراكاجات و الجرايم يا ويلو من رجال الامن اللي على اقل تقدير بش يشريوه في ورقة ياناصيب بعشرة لاف كان ما دبرولوش اقامة عام في ثكنة م الثكنات، بصراحة المواطن التونسي لازم كي يدخل للانترنات يبدى متهني اللي مافماش فوضى و الماء مسيّب ع البطيخ. تخيل لو كان نلقاو مواقع سلفية و لا خير م الكل اباحية فرد مرّة! نحن شعب منفتح صحيح، اهوكا بامارة البواتات ع الشطوط بالبيكيني لكن في نفس الوقت ماعناش التفسخ و الانحلال الاخلاقي. كل حاجة في بلاصتها، الطفلة تلبس البيكيني و تصلي الفجر حاضر، الطفل يمارس علاقة جنسية خارج اطار الزواج و من اشد مناصري الحرية الجنسية اما يشد اختو يفشخها كي يلقاها تحكي في التلفون مع واحد.. امالا كيفاه الانفتاح على التطور في اطار التمسك بالجذور؟

و لذلك من منبري هذا اطالب باسناد جائزة الدولة التقديرية و التشجيعية لها الوكالة و القايمين عليها خاطر ماقصروش حتى طرف. الحمد لله وين تقبل ما تلقى كان الـ 404 حتى لين ساعات تلعب عليهم الدوخة ما عادش يعرفو اش يعملو قداه منهم مسيكنات؟ ربي يشدلهم في صحيحتهم و في نظرهم و برا. لا و اللّى يعجبك في الحكاية انو تحسّ كونو ليهم دور كبير في اعطاء شحنة ابداعية و مثابرة للشبيبة التونسية اللي ولاّت تتشعبط و تتكربص بش تلقى ثنية لتجاوز الفليتر و الدخول الى المواقع المحظورة. حتى لين الواحد يفيق كل صباح و يهز يديه للي ما يخيب الرجاء و يقلو يا رب بجاه النبي المختار خلّى عمّار يهبط على المدونة متاعي بالجلم خلي زوارها يكثرو و مقالاتي تنتشر، و اللي البارح يكون يغني وحدو و جناحو يعطيه الايقاع، يولى بقدرة قادر رمز من رموز المقاومة الافتراضية.

انهاشي؟ انا وحدة م الناس حتى كي نكونكتي م الخارج، و تبدى الانترنات خلقت طليقا كطيف النسيم، ساعة ساعة نستعمل البروكسي... هكاكة، ع الجو، حنين للوطن، بش نحس بشوية ادرينالين، للمتعة و الاثارة متع ياااا بش تخطف ولا لا...
لا و نزيدك زيادة، فما مواقع تلقائيا ماعادش تدخللهم، خاطر تنساهم فرد مرّة. اقواشي من ها السنسرة الذاتية؟ و هذا راهو في علم الاجتماع السياسي حاجة عظيمة برشا. خاطر بش توصل انت تخلي اكا الهيجوج و الميجوج اللي اسمهم مواطنين وحدهم وحدهم يحفظو درسهم و يقيلوك و بانقص وجايع راس و مصاريف و ينتريوريزيو interioriser اكا الحدود اللي سيادتك رسمتهملهم، ما يتخطاهمش و كان تحب يزيدك عليهم راهي خدمة ناس جماجم و دولاب كبير! شاي لله يا آ.ت.اي و برا.

اما ساعات كي يرجعلي شاهد العقل هكّا بيني و بين روحي، نقول توا بجاه اللي يعز عليكم، احنا اصلا اش عنا بش يتحجب في تونس؟؟ شوف على اكا الفكر الثوري العظيم عاد!
اساعة اليوتيوب و الديلي موشين شدو بناولهم حيط على حكاية اكا التفدليكة متع الجمهورية الثانية و لا اش من هدرة. اللي حسب راي الشخصي فيديوات ما تشبه لشي و فيها ضمار يكوع، لكن سبحان ربي، كي جبدو اكا الجلم و سكروا زوز من اكثر المواقع استعمالا في العالم، اكا حكايات "الليل يا ليلى" اش ولّى عندهم نجاح و العباد تتخاطف فيهم تقولش بش نستردو بيهم كرامتنا كمواطنين...

ولاّ احلى منهم معايير حجب المدونات، خاصة مدونة سي زياد الهاني اللي وصلت نسختها السبعطاش ... عندي مدّة ما ضحكتش باكا الصفة كي سمعت بسبب الحجب. تي مشاو حجبو الرائد الرسمي و هوما على دينهم! و برا عاد اتخيل هادين ع المحامين و يشلبقو في القضاة في المحاكم المحاكم بش يخرجو النسخ المحظورة!! يكملو يسكرو المطبعة الرسمية بالشمع الاحمر و اكاهو! تي هوا الرائد الرسمي عاملينو لاعلام العموووووووم، يعني حاجة يحبو امة لا الاه الا الله تسمع بيها بش يبدا في بالهم و مايرميوش القاتلة و يبداو يتظلمو و يتشكاو ما فيبالناش ، ما سمعناش و لا يعذر الجاهل بجهله للقانون.
يبدا بعد ما تعلن الحكاية و تخسر عليها الدولة فلوس و طبعان و وزير سارق من وقتو اكا الدقيقتين بش يصحح، تجي انت تبهت و تدوخ كيفاه سي الهاني يبربش وراك و يشير للحكاية في المدونة! اش لزّك؟ هذا الكل حرص على الشكليات القانونية؟ و هاه نندبهم قالو قانون...

ايا سيدي يزي، نكملو غدوة وندخلو في الموضوع، الجمعة مزالت طويلة...

الماء في دار عثمان له ثمن...

2009-06-28T04:08:00.000+01:00

زايد، قداه الواحد يتوحش بلادو و تظهرلو احسن البلدان كل ما يخرج منها. الي كنت قبل تراه عيوب، تولّى تتحكحك عليه ، تي التوانسة اللي هوما التوانسة، اكا المواطنين الزنوس اللي نهار كامل و انت تذم فيهم و تنقد، في هاو بيهم، هاو عليهم، يراهم، يعطيهم و يجيهم... كل ما تشوف واحد على ريحة الريحة، قريب تترمى تبوسو من رقبتو لولا منظر رقبة السورية كحلا فحم اللي قريب بش تخزز و تخضار.

وهاو بش نحل قوس فيما يخص ها البصمة متع الهوية... وحدة م الناس كل ما يصيّف الصيف و تواتيني هبطة لوسط تونس تكثر عندي النزعات الوطنية و قداه من مرة يدي تاكلني بش نبعث مكتوب لوزارة الصحة نطلب منهم تنظيم يوم وطني للتعريف بتوفر اختراع فائق الجودة و التطور في اسواقنا و هو المتمثل في قالب صابون اخضر ضربة ضربة للحوايج المسخة و لريحة العرق للي ما خلطش على الـ gadget ultra sophistique اللي اسمو ديودوران على خاطر على حسب آخر احصائيات حالات الاغماء من ريحة الصنان و الشياط في شوارعنا، ماظاهرلي كان في علمهم بيه.
معليناش، اخطانا من ها الحكايات اللي تقلب المعدة خاطر اليوم يا سيدي بش نجبدو نحكيو ع الماكلة و الحق الحق الشي ما يواتيش بعدو.

عندي نهارين انا و سيدي خويا واحلين في سؤال وجودي مهم، نغص علينا عيشتنا، الا و هو كيفاش تقول "ايا بسم الله" باللغات الاجنبية كي انت تبدى تستقات بالزربة، يا بالواقف، يا في كولوار و يهبط عليك قاوري كي القضاء المستعجل. ايا تره كيفاه بش ترجمها هاذي؟ اهوكا حاول بينك و بين روحك توا تشوفها ما تجيش... مافماش عبارة تؤدي المعنى متع استدعاء تاطير ملام مش متع بش تمدلو بالحق... اما من جهة اخرى يا اخي مش حلو تبدى انت تجرش و الاخ جان يتفرج فيك، يمشيشي يصطك بعين لا تقرى لا تكتب؟

يا اخى بصراحة نحن عنا اكا كرم الضيافة و الاريحية بالزايد، خمسة و خميس علينا. ما تهبطلنا لقمة كان ما نحلفو على شطر الحومة و ناخذو في خاطرنا كي ما يقبلوش ها الدعوة الفالصو. ايه اما باقي خير من واحد يبدى يرحي في الماكلة و انت مصموط بحذاه تتفرج و قلبك يلوي عليك بالشر وحتى ريحة الريحة ما تخلطش عليها...

و قبل ما تشنع بينك و بين روحك و تقول اللطف يا صاحب اللطف حتى كلمة باسم الله تقول فيها بالكذب، ماهانتش عليها ها القدمة، نقلّك استنى يهديك اصبر عليا خ نحكيلك م الاول...

يا سيدي مرّة م المرّات، ايام شبابي يا حسرة، مانعرفش شكون الطفلة من دولة عربية شقيقة دارتلي و بكل وقاحة قاتلي انتوما التوانسة مشحاحين منتنين، الضيف يجوع في دياركم! اكا الكلمتين قعدو يحزو في فؤادي و يحرقولي في كنيني. ولاّت عندي حالة كرم مرضية! و كي نقول مرضية راهو مش متع نفرح بعبد نمدلو حويجة اثنين و بالسلامة... الحكاية بدات خفافي، اللي يستاحش يجي يطل نبدى نشهي فيه هاو مالح هاو حلو هاو بارد هاو سخون، و مبعد تعكرت الحالة وولاّت اللي يحط ساقو في الدار، ولاّ حتى متعدي بحذاها، كيف البوسطاجي ولا الزبال ولاّ اللي هوا، لازم ياكل ولا يشرب حويجة. حتى لين ما نعرفش كيفاه ولّى اللي ربي يدقو و يغلط يدخل للدار، نحتجزو غادي حتى لين نزقّقو! ما يخرج كان ما يمسح الفرجيدار و بيت المونة...

حتى وقت اللي عشت لبرا و كنت ساكنة وحدي، اكا شلة الاصدقاء اللّى كوّنتها عيّفتهم في رواحهم. نهار اثنين و انا عاملتها دار فرح و ايجاو تلمو بحذايا، اللي تغلط و تدخل، مايهمش انشاء الله مزالت كي كلات علوش محشي، لازم تشرب ولا تاكل حاجة ماكانش ناخو في خاطري منها. منهم ليلة مشهودة نتذكرها، طفلة شدّت الصحيح لا تحب لا ماكلة لا شراب لا انترنات لا ترقد لا تدوش لا تتسلف قطعة لا نحددلها سورية لا شي... هكاكة جاية متوحشتني و تحب تقعد بحذايا برك... تقهرت! ماهضمتهاش الحكاية و طلعلي القاز لراسي، مشيت سكرت باب الدار بالمفتاح و قلتلها مافماش مرواح حتى لين تاخو حاجة، هيا تجبد و انا نجبد حتى لين لوّحت المفتاح م الطابق درا قداه و رصاتلنا الكل محبوسين غادي!

اما بعد اكا التمرميدة و الجيران فازعين و الحشمة، تقولشي تبت و بطّلت؟ لا اما لقيت اسلوب سوفت اكثر... اللي تدخل للدار، وحدها وحدها تقلي اش تحب ماكانش ناخو في خاطري منها...
و اللي ناخو في خاطري منها بالطبيعة بش نتغشش عليها و مانقرالهاش الفنجان المحنون و ماكم تعرفو سيدي عربي عاد! كل شي الا اللعب بالطالع و الفنجان!
ايا سيدي كثرت الحركة عليا في اكا الدار و تعبت انا وحدة وراء الاخرة مكركرة شلاكتها و جاية و انا نعاود نسرسطلها اشنوة المونو. حتى لين وحدة منهم بنت حلال جابتلي سبورة وصبع تباشير كتبت عليه المونو القارّ اللي عندي، و كل نهار نزيد عليه حويجة، كل يوم و يومو... كيما المطاعم و القهاوي بالضبط، حتى لين بالعمل داري ولّى اسمها الرسمي fattoun's café و ولّاو الجماعة من غادي لغادي يعطيو لبعضهم رنديفوات عندي بش يتقابلو و مرّة على مرّة نبدى مروحة م الخدمة نلقى صف بنات مرميين في الكولوار يتسناو في القهوة تحل... و تقولش اتقلّقت ولا فدّيت؟ احلى على قلبي م العسل...

اما توا اللي قرى البوست و فرك يديه و قال هاو خبزتنا خ نهد عليها، نحب نعلمو اللي و لله الحمد، ربي بعثلي شلّة اصحاب مكونين "الجمعية التونسية للتحليب" و اللي نحاتلي ها الصنايع الفاسدة ووليت تونسية حرّة، كي نعديها عليك في دورو نبات ما نرقدش م الفرحة..

لوين ماشين... على ها الدزة داخلين في حيط

2009-06-20T20:39:00.001+01:00

لوين ماشين...
هذا السؤال اللي نطرحو على روحي كل ما يغضب عليا ربي و نحتك بالشبيبة النيرة متاعنا. كل مرّة نقول اتعس من هكا ماعادش و كل مرّة هي هي و يتفوقو على رواحهم و يخليوني نتضرب نجي ندور. ماينة...
نهارين لتالي ينوقز التاليفون في الليل اللايل، بكاء و غراد ايجا اجري يا بنت عايلة. ماو لباس؟ وين نجيك بالبيقودي و الفقوس في وجهي؟ اساعة شكون معايا؟

تطلع وحدة حبيّبتنا، مرا موقرة مذخمة، ناس مقدودين يعملو الكيف. عندها وليّد و طفلة تبارك الله و عيني ما تضر ما ناقصهم شي. اللي يبكيو عليه العباد متوفر. الزين و القراية و الفلوس و الكرهبة و السفرات و الحرية و الـ و الـ ... معيشتهم بيّات زمانهم و ما تنقص عليهم شي. هوما مزالو ما قالوش كلمة نحب ولاّ ماذابيا و الشي تقلّو كن فيكون.
يجيشي لمخك انت انو الطفل هذا مشدود في مركز م المراكز؟ لا رافل لا شي، يا ريتو... و انما تشد يتاجر في المخدرات تحت حسّ مسّ! و كي قامت امو تندب و تنوح و تقلّو علاه، اش نقصّت عليك، يجاوبها، لا مش ع الفلوس اما بش نبدا راجل بين صحابي!
امالا وينك! قالك يا سيدي طلعت فيه سمعة طفل نظيف و قننو و بالتالي بوهالي، ظلامت الدنيا في عينيه و حس روحو مضطهد، قرّر انو يوريهم اللي هوا وليدها و ولد بلاد و خليقة!

الواحد يقول باقي، الشاذ يحفظ و لا يقاس عليه. ايه اما كي تكثر الشواذ، يظهرلي القاعدة تتقلب. كل نهار تسمع بولد فلان و ولد فلتان مشدود في حكاية ما يعملهاش زبرطعي، هاو ولد درا شكون شدوه يسرق في كرهبة، الاخر يبراكي في الخلق، اللي من غادي يتاجر في الشراب في المارشي نوار... كان هاذم اللي لباس عليهم و مش محتاجين و عملو هكا، ايه عاد علاه نلومو علّي على قد حالو؟ لازم نعلقولهم نياشين!

تي علاه نمشيو لبعيد؟ ياخي مش ولّى الكلام البُضعْ و المرزي فخرة؟ و التشبه بالخلايق "ستايل"؟ توا اللي تحكي معاه ما تسمع كان " و نورمال"، "سي بون في الماكسيمو" "سوف لن يسكتو" الخ الخ الخ م العبارات الممجوجة اللي تدرع الخواطر... و الله الحكاية بدات تفدليكة (ولو لتوا لا نجمت نفهم ها الضمار الماسط) ووفات لاموضة. ماعندي حتى شي ضد الاخ متع خليقة تي في ولا غيرو ملّي عملو لوغة الباربوات فون دو كومارس، لكن توصل انو عباد تمجد و اذاعات و برامج تلفزية تعمل في الانترفيوات و ايجاو شوفو ها الابداع، سامحني قوي على مخي! المنظومة الاجتماعية و الاخلاقية متاعها بكلها تشيط../

كي تجيب انت السيد و تعدي سكاتش "نظيف" (يعني مجرد تقليد للوجوه المعروفة) في وسائل الاعلام و تحكي باعجاب و حماس على ها القناة التلفزية خليقة تي في، ياخي العباد -و الصغار و المراهقين من جملتهم بش ما نقولش و خاصة- ماي بش تمشي تطل و تشوف و تحفظ و تبدى تبمبي ع الخلق بازيد تعضريطة و تهويرة!
تلقاه فرخ ما يوصلكش لحزامك و هوا ماشي باكتافو و يتفيصع بكلو و كي يحل اكا الجلغة العزيزة ، ينطقك من جنابك و تقول يا ليتني كنت ترابا!

و بربي ماغير ما يتعدى واحد يقلي هكاكة نحكيو في المجتمع التونسي، خاطر على حد علمي كي جابوك والديك لها الدنيا كليت المسبط على كلمتين القباحة اللي تعلمتهم في المكتب و حطولك الفلفل الحار في فمك بش ماعادش تعاودها، يعني في داركم و في معاملاتك مع الناس و الادارة و في المعاهد و الجامعات، ما ظاهرلي كان تحكيو هكاكة. اما الشي الاكيد انو اذا بش تتواصل ها الموجة، بش يولي هذاكا هوا الموديل "العادي" و العباد تتأقلم مع التبوريب و الفصاصة.
ياخي طفل فرخ عمرو عشرة سنين يحل يتفرج على ها الفيديوات اللي قاعدة العباد تبعث فيها لبعضها و فرحانة و شايخة، زعمة ماهوش بش يتأثر و بش يولي يعتبر اكا الشي موديل يقلد فيه بش يضحك و بش يدخل في الجو؟

اهوكا نصيحة لله ، من حينك هز فروخك للبودرية ولا لحي بو شلّوط خلّي يعملو معسكرات صيفية ستاج براكاجات و نطرة و تأهيل في مهارات التخاطب م الحزام للوطى بش توفرلو احسن ظروف النجاح في تونس الغد...

بيان تأبيني

2009-06-08T23:21:00.002+01:00

يا جماعة توا قرابة الستة شهر تدوين. الحكاية بدات هكاكة، فاضية شغل، حليت بلوغ في عوض نحل كلوب و نكمل نخسر الزرسة اللي قعدتلي صحيحة في باكو شكلاطة.
في بالي بش ندخل نخنتب و نخرج فيسع ولا ندور بحد ولا حد يدور بساحتي. اذهلني و اسعدني التفاعل مع "بنت عايلة". تعرفت على برشا عباد، صادقت البعض و تدككت على برشا و دخلت فركة و عود حطب في الاخرين. يعطيكم الصحة على ها الستة شهر سعادة و متعة و ادرينالين متع غزول، باقي خير من بلاش.
مابقالي كان بش نقلكم اهوكا المدونة قدامكم للي يحب يدخل ياقف ع الاطلال.

و السلام.
فاتن

متع الله يا بني الـ....

2009-06-06T00:16:00.000+01:00

يحرزلكم مشدودة في كولوار م الكولوارات نستنى في رحمة رئيس ادارة م الادارات، ماكانش ما تفرحوش بتدوينة.. بعد اللي وليت منعوتة بالصبع و جماعة تحب تنتزعلي المدونة و تنسبها لناس اخرين. يا نهارت اللي نحل الباب نلقى عدل منفذ يحجز عليها و نخرج انا بيدي على راسي. و بالله مدام صرفت صرفت و حليت ها القوسين، تعملو مزية اللي يسمع باشاعة عليا -مهما كانت غريبة و مهولة- اهوكا يصدّقها من غادي لغادي و مش لازم يجيني يجري بش يعلمني و يتناقش معايا و يكمل يهبطني نطسكك بالغزول، الميت و خسارة الكفن ياسر ع الجحيّش.

كيما كل جمعة كلات بعضها و خذيت نصيبي م التسخسيخ. هوا كي تجي تشوف، كل نهار جمعة نعرف بالمسبق اللّي عندي طاروح يستنى فيا في الدار. و قداه من مرة نخرج شانعة بفاليجتي طالبة اللجوء السياسي عند الاقارب. الحكاية و مافيها انو نجاوب الجواب الخطأ على اكا السؤال المحنون متع "ياخي هذا قانوني؟"... و نجي بطولي النعناعي و ناقف في وجه امي و نتجرأ و نقلّها اللي هي غالطة و اللي "اعدائها" على صواب!
ملاّ فصاصة في جيل توا و اكاهو!
واحد يقول شنوة ها السر انو ما تهبط ريش انت و امك كان نهار جمعة؟ حتى م البركة تطير. اي اما المشكلة انو العركة تصير بسبة صلاة الجمعة! امي ياسيدي تفد و تطير و تطيّر م العباد و خاصة الجيران، اللي تجي توقف كراهبها قدام الدار و على شعرة بش تكمل تغرقني في البحر كي نقلها اللي هوما عندهم الحق.
اما يمشيش في مخكم اللي امي مرا ما تقدرش الجورة و ما تتعاشرش واللي كان ناوي يجي يخطب يبطل و يقلك السماح من حماة كيف مانهكا. و الله لا، امي خيار الناس، انا وحدة م الناس نغير منها كي صحابي يجيو بالذمة بش يعشيو بحذاها و يطفيوني انا. تي شد تبع الجُرّة م اللول...

امي ماكا الناس المغرومين ياسر بالشجر و الخضار ومانعة علينا نقصو عرف ولا نحيو ورقة. دارنا في الصيف تولي ادغال افريقيا على حالها و قداه من مرّة نرجع مشلطة من وردة ولا عيني تتعور من عود شجرة. وحتى كان الشجر سرح على باب الدار و غطاه، ما يتمدش عليه مقص ولا يتمس. اللي عينو بدخول الدار اهوكا ينقز م السور، يحفر تحت القاعة، امورو. الشجر لا!
في نهج دارنا مافما كان نحن قدام دارنا اربعة شجرات كبار يعملو الكيف، يضللو في الصيف و يمرمدولك الدنيا في الشتاء. حومة كاملة، يا رسول الله مافيها كان اكا الاربعة شجرات، الباقي لا حجرة لا حتى قصدرية زبلة وفي الصيف الواحد مايوصل م المرشي للدار كان بقناع الاكسيجين.

امي، مرا على نياتها برشا، و تؤمن بفكرة نحن في خندق واحد و بالتالي مصلحتنا وحدة و تحب الصالح العام و الخير للجميع. توخر، تقدم، اش يظهرلها بش تعمل؟؟؟ تمشي للحيط اللي مقابلنا و تعمل عملة كي البصل! تزرع شجرات بفلوسها في ملك الحاكم! هكاكا لله في سبيل الله! باللي حاولت نقنعها شي، و لزّمت عليا نهار بعد نهار نخرج كاوتشو و نمشي نسقيهم زادة! يا بنتي اخطاك، تحبنا نتطردو م الحومة ولاّ ينحيولنا الجنسية و نقعدو نطلفحو؟ شي النافع ربي كيكست و حطت اليك في اليك.

رصاتليشي في اعقاب الليالي نبدا نتسلوس م الحيط للحيط و نبدى خايفة لا نتشد نسقي في شجر الكياس و نوليو منعوتين بالصبع! هيا هيا و فاحت الحكاية اش قالك و اش قال عليك، دار بنت عايلة يحبو يحوزو ملك الحاكم باربعة شجرات كلاتوس. و اش يفضها عاد! الجيران يتشكاو و تقارير مجهولة المصدر للبلدية و انقذونا من الاستيطان اللاشرعي. ما تفضت الحكاية كان ما جار ناس ملاح سيب على الشجرات كبش و ثلاثة معيز جابوهم هباء منثورا.

لحد هنا واحد يقول دفع الله ماكان اعظم و نرجعو للحالة الى ماكنت عليه و ياناس ماكان باس! اما للاسف الجيران ولّى عندهم حذر مبالغ فيه من العمليات التوسعية متاعنا. كل ما شجرة تكبر شوية و تِسْتاسِعْ على حساب دار الجيران يجيو يتجاراو و قص عليا شجرتك تهبطلي في الاوراق. اماقصها ماغير ما تهبط حتى عرف في داري ولا قدامها. و امي كي الناس الملاح سامحوني سامحوني و تبعث شكون يقوم بالعاب بهلوانية فوق الصرافة شعرة لا كلا راسو بش قص الزايد ماغير ما تعدى الحدود الدولية اللي فرضوها علينا الجيران.

باقي الواحد يقول يا اخي عندهم الحق، ماهم الا في ديارهم و انت سيادتك مسيب الاشجار الغاشمة متاعك تعيث في الارض فسادا. و من حقو بش شجرة الياسمين ما تفسدلوش منظر السيمان و قصدرية الزبلة اللي تحل عليه كوجينتو.
اما صارتلنا غريبة لا كانت لا عل البال ولا عل الخاطر! مرّة قاعدين نقطعو و نريشو في امان ربي، ينوقز الباب، تطلع جارتنا المقابلة جاية ووجها مقلوب و سحنتها زرقاء تبشر بمشكل و عركة. ايا سيدي زارنا النبي، زارتنا البركة، ضيفناها، فرحنا بيها، استنيناها حتى ضربت شطر باكو بقلاوة بش حلّت فمها و نوّرتنا بالاطلاع على سبب الزيارة. قالك يا سيدي، هي دارها اللي على ثالث طاق، عيني ما تضر، ما تراش منها البحر خاطرها ورا دارنا (اللي طاق واحد في نطاق احترام الملك العمومي البحري)، و هذايا الكل علاه؟ خاطر الشجر ياسر عالي، و لذلك، لطفا، رجاء نقصو منو!

الوالدة في نطاق حب الجورة و النبي وصى على سابع جار، تجيب راجل و قاتلو بالله نقص شوية، هوا يقص و هي تهبط فيهم حيار. نقصت يجي زوز ميترو ولا ميترو و نص قبل لا نهزها اسعاف بانهيار عصبي. كمّل الراجل، امي مسحت اكا الدميعات و هزت رويحتها للجارة تبشّر فيها ايا لِلّا اهوكا خذيت بخاطرك و نقصت و انشاء الله توا تنجم تشوف البحر م السطحة متاعك و تعمل قهوتك بكيف.

-المرا طلّت م السطحة قالتها : اه، يعني. انت صرفت صرفت بالله كمل قلع اكا الشجرتين ثلاثة ويعطيك الصحة.
-امي قالتها سامحني ما نجمش! الشجر حبتلو عشرين عام بش يطلع نجي نحيه؟ علاه؟؟ حتى م الحرام حرام.
-الجارة تتفرعن و تقلّها بش نشكي بيك للمحكمة و بش و بش !! نحيه بالرضا خير ما تنحيه بالغصب.
فجاة اكا النور على وجه امي طار و الحِلْم متاعها ضاع ، كشرت عن انيابها و تسيّب الغنضفر اللّي كامن فيها. و صبحت من غدوة تَرّستها بالشجر و النباتات المتسلقة و تجندت صيفية كاملة تغذي فيهم بجميع الاسمدة حتى الدار ماعادش تترى و كان لقات راهي عاودت لصّقت اكا المقصوص.

توا بها اللي صار من مشاكل الكل، بصراحة عندها الحق امي كي تهبل و تخرج من عقلها كي يصيّف الصيف ولا كي في صلاة الجمعة تسخن القايلة يجيو يحطو كراهبهم في ظل الشجرات اللي قدام الدار و يكملو يسكرو علينا باب القراج، يخليونا نتغصورو في الشموس و البقالي. لا و الغلبة وين؟ نزيد نطلعلها انا و نقلها قانوني!

تأملات فكرية لاغراق السوق بالبنادرية

2009-05-27T06:21:00.000+01:00

ساعات نشك في روحي عندي نزعات مازوشية، خاطر بش واحد يكون قاعد في امان ربي يستمتع بنسمات الشهيلي، يقوم وحدو وحدو يطلع لروحو ثلاثة قرامات سكر ماعندهاش تفسير اخر. ايا سيدي دقني ربي و مشيت نشري في طرف جرايد و مجلات بش الواحد يقوم بالواجب الوطني و يدعم مكاتب اكا القْلَالِّة إمالي الجرايد المحايدة، المستقلة، الملتزمة،المنحرفة، عفوا المحترفة ادامها الله ذخرا للسطو الفكري و غطاء اعلاميا للبلاوي اللي صايرة في ها البر. بالله مش كان هوما حازّين عليكم، راهو كلات بعضها. انا وحدة م الناس لو مش كان دوزة الضحك اللي نعملها كل ما نحل جريدة راهو ضربني الاكتئاب ماكا العام ولاّ اتعس من هكا راهو ولّى عندي اهتمام بالشان العام.

برا ينور عليهم كيما نوّرو علينا. منين ليكم انتوما بش تعرفو اللي صدام مزال عايش في حفرة تحت القاعة يستنى في عصر الهيمنة الامريكية يْوَلِّي بش يخرجلهم ويقلهم يضحك كثيرا من يضحك اخيرا؟ ولا منين ليكم بش تدريو انو تونس ويامن ادراك سبقت عمالقة المخابر الصيدلية ووحدات البحث و لقات دواء للسيدا و السرطان و جميع الامراض المستعصية على يد العراف الكبير محتال بن بروال؟

المهم سيدي، تاثرت بالصدى الطيب اللي لقاتو المجلة اللّي بش تعمل الثورة الفكرية و القفزة النوعية في الصحافة المكتوبة في بلادنا، الا و هي مجلة رؤى لصاحبها السيد رضا الملولي. اول حاجة استوقفتني (بعد ما فقت م الكوما اللي طحت فيه كي دفعت اكا الخمسة لاف خاصة و انو حسب ما سمعت المجلة مدعومة) هيا اكا الجملة الفلسفية المحطوطة ع الغلاف. شوف يا سيدي التنوير و الفكر بداو يبربشولي فيه م الغلاف.
مجلة رؤى يا سيدي بن سيدي، هي مجلة الرأي الاولى في تونس. يا هل ترى يقصدو انو عندهم دور الريادة و الزعامة في الرأي و التفكير و غطاو ع البقية، ولا يقصدو انو قبل ها الجوهرة المكنونة ماكانش عنا مجلات رأي في البلاد؟ هل الرأي لهنا بمعناه العمودي ولا الافقي المتموضع في سياقه الجغرا-سياسي و المتقوقع على الابعاد التاريخو-سياسية؟

اعذرو قاموسي اللغوي الجديد، خاطر بعد تصفح سريع للمجلة، تشبعت بها اللغة متع المتثقفين برشا، مش متثقفين فالصو اكا اللي يتنوش م الانترنات ولا كلام وحل في طاسة مخي م الجامعة، لا وينك، الصلاة ع النبي و عيني ما تضر، ما ترى كان العناوين اطول من شريطة عصبان مقدد و كل كلمة وحدها تنجم تفهمها ، كل حاجة سليمة بس لوحديها. و رغم اللي فما برشا عناوين الحق مغرية و تبشر بمقالات حلوة، لكن الله غالب، فما تفعيلات عندي منهم حساسية، وين نلقى المشتقتات متاعها تجيني حالة اميّة مؤقتة. خاصة اكاالكلمات على وزن فعلولة من نوع السيرورة ، الصيرورة، شخطورة بكلو باهي..

اللي زاد شد انتباهي في ها المجلة الرايدة، بخلاف الموف اللي وين تقبل تلقاه، و الانترفيو اكسكلوزيف و حصريا على شاشة رؤى مع السيدة الاولى و رسالة الشكر و التقدير اللي جات من بونا الكل، و نحن نشكروك و انت تشكرنا ، خاطر في نهاية الامر المجلة متبنية فكر معين و مقالاتها تتبنى مواقف، ماهيش مجلة اخبارية. يعني من حقها تكون مش مستقلة و تدافع على توجهات سياسية معنية خاصة انو منصب المستشار اللي يحضى بيه السيد رئيس التحرير منصب سياسي بحت (بغض النظر ع النقاش حول الجدوى من ثنائية المجالس النيابية في تونس). المهم عاد اللي شد انتباهي اللي ها المجلة ماقامتش بالدور كما ينبغي. يعني بصراحة البروباقندا متاعها باهتة جدا، سواء من ناحية المواضيع المتناولة اللي اغلبها ما تمسش الشأن السياسي ولا حتى الاجتماعي الصرف. شوية تفلسيف و اغماق في الديماغوجيا، قصدرية موف و هز يدك م الطبق. يعني اللي كيفي من عامة الشعب غلط و شراها مرة، ماظاهرلي كان مزال يعاود يتلدغ.

تي هيا الحفلة متع الاحتفال باصدار المجلة و اللي حاطينلها تصاورها في الاخر، على درا قداه من تصويرة، وين تقبّل في عوض ترى جانب م الحضور (وزراء و سفراء و هيلمان، عيني ما تضر)، اغلبية التصاور ما ترى فيها كان الكرافات الحمراء متع سي الملولي، كي الفو روج و تعليقات من نوع سي رئيس التحرير مع فلان، سي رئيس التحرير مع فلتان. الحق متع ربي ما فرحوش بالضيوف و ماحطوهمش في الصدارة.

المهم يا سيدي بن سيدي، توا خرفت خرفت وباقي ماوصلتش للفكرة الي حاشتي بيها. الا وهي انو في عوض ها المصاريف الزايدة و الدعم و الحفلات و التبندير و البروباغندا و ماصاب حتى لو جاب نتيجة. و اللوم كل اللوم ما يقعش على صاحب المجلة ولا على غيرو من ابواق دعاية النظام، انطلاقا من ناس تعتبر ضاوية وتنجم تعمل على صحة اللسان كيما سي برهان ووصولا الى اسفل السلم من صحافيي بودورو. اللوم الحقيقي هوا ع الشعب التونسي! هاو كيفاه...

توا نهار كامل توشحلو تحبو حرية التعبير حرية التعبير حتى خضيتولنا جواجينا بيها. باهي سيدي، فرضا عطيناهالكم... هاو التركة. اش بش تحكيو؟ جريمة في المجتمع؟ اهوكا صدى المحاكم قايمة بالواجب و اكثر، و على الميدان يظهرلي البوليسية مش مقصرة، حتى لين ولى عنا احتياطي متع مجرّمة ع البنك يستناو بش تصير جريمة بش يلقاو كيفاه يسقّدوهم.
بْطالة و تداين خارجي و خوصصة مؤسسات حكومية؟ اشبيه، مولى التاج يحتاج، لانا اول دولة تتداين لا اخر دولة، لا محسوب جبتو الصيد من وذنو!
اش مزال عندك اخر؟ رجال اعمال م الوزن الثقيل تكونت ثرواتهم بين عشية و ضحاها؟ ياسيدي احمد ربي اللي هوما ناس وطنيين و يستثمرو في فلوسهم حرّ مالهم بش يحلّو ديار و يوكلو عايلات. زايد خرشيين ما يثمرش فيكم. لوجاو ناس اخرين راهو غرمو زمانهم البرة و فِكْرت ولاّ الله لا فِكْرِت!

اش مزال؟ ميسالش فرغ قلبك يجعلو لله... بيروقراطية و محسوبية و رشوة و فساد؟ يزي اتقي مولاك! وين ترى فيه ها الشي؟ اساعة انا كل ما ندخل لادارة نرى بلاكة صفراء قد الماهي راشمين فيها حقوق المواطن ع الادارة و هوما هكاّ هكّا بيّا وين نحطك يا طبق الورد. الكذب على الخلق حرام راهو، يطيح فيك.
الحاسيلو، الصابون نظيف، و كيما تراو تبارك الله ماعنا حتى مشكلة في بلادنا امورنا الكل في العنبر، اللي يحب يصلي يصلي و اللي يحب يسكر يسكر و اللي يحب يخدم اهوكا يثني الركبة و يخدم و حتى م اللي يحب يستفعل في الناس، اهوكا منو ليهم! و ياناس حبو الناس الله موصي بالحب.

انا الشي الوحيد اللّي مقلقني فيها البلاد، و ما نجمت نرتاح كان ما لقيت حل، هوا كونو ابواق الدعاية متع النظام حالتهم تاعبة ياسر. بصراحة لغة بلنز و جمل مجترّة و ثقافة مهزوزة و خيال محدود جدا. يعني اللي يسمعهم ما يحسش بالنعيم اللي عايشين فيه التوانسة و ينجم -لا قدّر الله- يفهم الحكاية بطريقة عكسية و يقلك هاذوما ناس مأجورين بش يكذبو! تخيل بالله لو كان تخرج فينا ها الاشاعة! اش عملنا و جاء مليح؟

الحل اللي لقيتو، جاني كي الوحي بعد ما قريت خبر مثير للجدل. ما نكذبش عليكم استهجنت الفكرة م اللّول، لكن مْبَعد بتداعى الافكار، لقيت اللي نْجّمو نطوّعو ها الحل الاوريجينال بش نحلو مشكلنا.
و لذلك من منبري هذا، نطالب التوانسة الكل بانهم يحكيو ضميرهم، كل واحد يشد بندير باهي يسخنو على كانون ولا حتى ع الشوفاج ميسالش. مانا طالبين منكم شي، غير احكيو و عبّرو و اشكرو ع الجنة اللي عايشين فيها، على البونيسات متع التيليكوم، على الياغرتة السادسة اللي تاخوها بلاش، على 25% هدية في دبوزة الفليتوكس، هكاكة نغليو الخبزة ع المبندرين المحترفين و يوليو مضطرين انهم يخدمو بضمير، مش كعور و دز للاعور و سمعتنا تتدهور بين الامم.

بوست توضيحي للبطاطا

2009-05-22T18:06:00.002+01:00

ايا كلمتين بش ما تقراوش و تتبلاو عليا بالكذب و تتعداو. حكاية البطاطا و الطماطم هاو كيفاه صارت. خضار في حي باهي الحق، مش شعبي، حطيت الكرهبة و هبطت هازّة انّقز بالقفة شكلي شكلا، صباح الخير حاج، صباح الخير بنتي،
- ايا اعطيني كيلو بطاطا و كيلو طماطم. باهي بنتي، هاو زايد شوية و الحسبة تطلع عشرة لاف!
- آه؟ لا لا كيلو برك مش صندوق.
- اي اكاهو الكيلو بـ 4900 و الطماطم بـ 5200
- وه علاه اش فما؟
- اكاهو سيدي رمضان جاي!
- يا حاج وينا ووين رمضان، بانا حساب؟ امالا في رمضان نوليو نقضيو بالدوفيز؟؟؟ تي حتى الفلوس اللي فوقي ما يجيبوش
- انت قداه عندك
- عندي سبعة لاف و خمسيمات و في بالي بش نكمل نشري خبز و ياغرت و حليب زادة!
- باهي مش مشكل هات اللي عندك، توا نعطيك بيهم
- لا لا مش لازم، اليوم بطلنا، بش نصومو. بالسلامة.

حتى هوا متع ملوك!

2009-05-21T01:40:00.000+01:00

ايا باركولي يا جماعة، لقيت افار العمر. من غدوة بش نطيش عليا م القراية و الخدم و ندبر قشبية ولاّ برنوس و دبوس هايل ونشد العسّة على جردتنا، بعد اللي طلع فيها كنز و احنا راقدين على وذنينا. وقبل ما تهدو عليا غدوة بالبالة و البيوش، الكنز هاذا شجرة حب ملوك زرعتهالي امي ماكا العام خاطر تعرفني نحبو. اما توا قرابة الستة ولاّ سبعة سنين لا نهار ذقنا منها كعبة، لا هيا لا بقية الشجر.

باب الجردة ما يتسكرش، ديما محلول و اللي حاشتو بكعبة قارص، شوية نعناع، طرف رند، طرنجية، اللي هوا، يدز الباب و يدخل منو ليها، رزق البيليك. اللي بدى ود و محبة بين الجيران ولّى "في ركني و يعاركني" بعد الشي ولّى باستحقاق و قداه من مرة ندخل لدار الجيران نلقاهم يملّحو في زيتون جردتنا ولا يكسرو في الزوز متاعنا و ساعة ساعة يتعداولك يقولولك و الله كارك تزرعـ(لنا) شوية كذا ولاّ كذا.
الى تاريخ اليوم، الشي هذا كان عادي و نحن جيران و جردتنا جردتهم و مقفولهم مقفولنا و كلبهم يعس على دارنا و انت ماشي. اما بعد اليوم، انسى! بش نولي ندافع عليها بالرصاص الحي.

تعديتش قبيليكا بش نشري طرف غلة، الربيع ربّع و الشي ولّى مشتهي. اول حاجة عملتها تهنيتلكم على سوم العنب، اهوكا ولّى في متناول الزوالي، من ثمنية دينارات... الرطل، ولّى بستة دينارات و ميتين.... الرطل. الشي بوبلاش راهو! غير انت اعمل قليب و ازدم.
ايا سيدي، الصلاة ع النبي و عيني ما تضر، الخيرات الكل موجودة و مشعلين عليها اكا الانبوبات تقولش عليه دار فرح مش خضار، خاصة باكا المزود اللي يشرقع. بديت نشوف و نقلب، هاذا هايل، هاذا باهي، اي هاذا عندي مدة عليه، اما مبعد رجعلي شاهد العقل و تذكرت اش صارلي نهارة العنب، قلت قبل لا تزدم تختار و توزن و منبعد يجيك شلل الاطفال، اسئل ع الاسوام، ماو في اطار حماية المستهلك، حتى بلاكة ماهي محطوطة. ايا سيدي شد عندك ورقة و ستيلو وقيد.
التفاح 5800
الانجاص 4950
العوينة 6600
المشماش 4800
البطيخة 7000
الدلاعة 14.000
حب الملوك 17.00

هاذي اسوام حاطينها في تونس، للمواطن التونسي، في فصل الربيع اللي المفروض الغلة تهبط فيه. لا و نزيدكم زيادة، تسخايبونيش هبطت نقضي من كرتاج ولا م النصر؟ لا يا سيدي من حي شعبي متع فصايل. الواحد بش يشري طرف غلة يرهن دارو شوف تكفي شوف لا.

ايا سيدي، مش مشكلة خ نقولو الغلة ديما تتسمى غالية و مزالت فال و درا شنوة، باهي فهموني ما يلي، اختكم الشي قوي على مخي
بطاطا 4900
طماطم 5200
ليتو 2000

جيت نحاجج في الخضار على سوم البطاطا و نحب نفهم ها الحريقة اللي شاعلة فيها، قالي اكاهو عاد رمضان جاي! يا ولدي هااه، تسمع باختراع اسمو يومية؟ ويننا ووين رمضان!

اما ما نلوم كان عليكم. توا هكا السميق يولي مليون و ما تقولوليش؟

اقتراح بالكنيست لاعتبار الأردن دولة للفلسطينيين

2009-05-19T21:49:00.002+01:00

جْهِلت!
بصراحة خبر كيما هكا يخليك تبكّش.
توا حكاية الاردن كوطن بديل سمعناها عنّا برشا فما اللي خاف و فما اللي ضحك وفما اللي وسّع بالو وقعد يناقش فيهم. يا ولادي الاردنيين وين نهزوهم؟ ولا زعمة الفلسطينين بش نردوهم اردنيين؟ تي باقي ما اوجدناش دولة اسمها فلسطين. و فما اللي قالك باهي و قطاع غزة نعطيوه بونيس للمصاروة يدوّرو بيه الدولاب؟
اما اللي قاللهم اسكتوا انو الكنيست قاعد يخمم و يناقش ها النهارين ها الاقتراح. علاه؟ تركة بوه الاردن؟ باهي و يا سيدي ها الاقتراح عجب النواب و شاخو عليه، اش يعملولو القانون من بعد؟ يجيبو عدل منفذ لملك الاردن ويقولولو ابعد اتكّى بعيد خلّي الفلسطينين مساكن يولّي عندهم دولة ووطن؟

الحكاية منين ندورها ما فهمتهاش! لا من ناحية المبدأ لا من ناحية الآليات القانونية اللي قاعدين يتبعو فيها.
نزيد نعاود نقول جْهِلّت!

توا هاذا قانوني؟... هذا بالذات مش قانوني

2009-05-19T15:29:00.000+01:00

ياجماعة ما اخترتش نقرى قانون. ناري على روحي كنت نحب نقرى علم آثار و ندخل نخدم مع الامم المتحدة ساك آ دو فوق ظهري و ساقيا في الطبعة و نهار كامل في الحفر... يا حسرة. الحقوق فُرضت عليا بطريقة ديمقراطية جدا جدا خلاتني ننطق من اجنابي و نقول بععععع هات الصفا خ نقراه. امى عملتلي جمعة chantage affectif بكاء و دموع و دايخة في فرش حتى لين صححت الورقة، انا صبيتها من هنا و سبحانو معظم شانو امي رجعت لعنفوان شبابها. المهم، ملّى حطيت ساقي ف اكا الخربة فهمت علاه ها الاصرار و الالحاح، وين نتلفت وين نقبّل امي تعالجني باكا السؤال الوجودي "ياخي هذا قانوني؟؟؟؟" م اللول على نيتي نقعد نفسرلها كان اي علاه و كان لا كيفاه. تسمعني تسمعني وفي نص الحكاية تقلي اخطاني م التفلسيف جاوبني قانوني ولا لا؟ ابَيْ؟ امالا اش قاعدة نعمل؟
حتى لين فهمت اللي المقصود بالسؤال مش قانوني ولا لا، و انما هل هو شرعي و عادل legalite/ legitimite. و ليومنا هذا ما حبتش تقتنع اللي القانوني مش بالضرورة عادل و اللي العدالة تقرب للقانون من جهة مرت البو برك.

المهم يا جماعة وين فما مشكلة في المحيط الضيق ولا الموسع، لازم يدخلوني في العجة رغم اللي العايلة فيها برشا رجال قانون لكن ما يوسعوش بالهم، كلمتين اش يقول النص و اش نوة الحل و سيب صالح. شكون عندو وسع بال (وحتى كان ما عندوش زادة، كلب جيفة على رقبتو) بالطبيعة انا. يشدو يمعسولي قلبي بالاسئلة اللي ما تخطرش على بال الشيطان. و زيد ما نعرفش كان فيكم شكون من رجال القانون اما توا يقلكم اللي بعد فترة نوليو نحكيو لغة وحدنا و ما نفهمو كان بعضنا و البديهيات لينا فما شكون يقعد يندب في خديه على القانون اللي مسخنين ظهرهم بيه.

البارح جات بحذانا كلوفية حالتها حليلة و غاصة بالدمعة. يا بنتي اش فما اش صار، قعدت تحكيلنا على وحدة حبيبتها مافي حالهاش، تخدم بالنهار لا ضمان اجتماعي لا كارني لا هم يحزنون و زيد كان تبطل هي نهار خدمة، ولادها يحلو افامهم للريح. المشكلة مش غادي، للاسف الشي هذا كثر حتى لين العباد ماعادش يستهجنوه. اما اللي بالحق غلبة، انو المرا مرضت مرضة قوية شوية، دخلوها لسبيطار في حالة استعجالية و عملولها عملية و ضيفوها ثلاثة ايام بحذاهم. ايا سيدي صححلها الطبيب بش تخرج، حطت سفساريها على راسها و جات بش تخرج، قالّك وين للّا الشابة؟ وكالة هيا؟ خلّص قبل.
يا ولادي ماعنديش، مافي حاليش، استنى نمشي نتسلف و نرجع نخلصكم، شي قالك هاك محجوزة لهنا حتى لين يجيو يخلصو عليك. رصاتلهاشي بنتها تدور من دار لدار بالله بالجاه حتى لين خرّجت امها؟
كلوفية تحكي و انا القاز بدا يطلع لراسي، خاطر الحكاية هاذي منبهتهم عليها من قبل و حالفة يمين اللي مزال يعملوها فيه الا ما نكمل انا نعطيه براس نرجعو للسبيطار يغرّز.

ايا سيدي هات خ نفركوها الرمانة. الحكاية هاذي معروفة في الكلينكات عاد، ملّي تدخل يا تحط سبعميات دينار تسبقة يا شيك على بياض ضمان. و حتى بها الاحتياطات الكل ما عندك الحق تخرج من قبر الحياة اللي اسمو بيت الاما تجيبلهم ورقة باصمينلك فيها شطر الجمهورية اللي انت خالص معاهم دنيا و اخرة، غير بالطبيعة اكا الليبية مسيكنات هاذوكم يكملو يحجزو عليهم الباسبورات جملة. اما هاو حتى السبيطارات كمّلو خلطو عليهم في ها الخنار. نعرف قبل اللي ما في حالوش ما يسيبوه الا ما يصحح على كمبيالات، اما ريق شد البيت و يجيبلك السوجيقات بش يحتجزك غادي قالتلهم اسكتو!!

مرّة حبو يعملوهالي، جاية م الصباح بش نخرج مريض م الكلينيك، صباح كامل و انا ريقي شايح في جرتهم بش يهبطو الدوسي و نخلصهم. صباح كامل و هوما يماطلو فيا حتى لين قربت ماضي ساعة، قالك توا سايي، ارجع للكاسة الساعتين اما راهو بش نقيدو عليك ليلة اخرى خاطر كي تفوت ماضي ساعة تعتبر دخلت في الليلة الجديدة! بالله؟
ايا تعرفشي كيفاه، هاني هابطة انا و المريض و اهوكا عندكم الادريسة ابعثولي الفاتورة و حلفت يمين اللي بش يتعرضلي الا ما نهبطلو الشرطة و الجيش وكان لزم عصابة م الحومة. ولاّوش يجبهيو و يبوسو في اليدين و الساقين؟

في الخارج يا جماعة، ع الاقل في البلدان اللي عندي تجربة في سبيطاراتهم، كي تدخل لمرفق عمومي اللي هوا سبيطار، و حتي كان انت اجنبي ولا عندك لا تغطية اجتماعية لا تأمين لا والو، ترميلهم تصويرة م الباسبور و ادريسة كان عندك في اكا البلاد، تدخل تداوي و تخرج على روحك. لا شيك ضمان لا هم يحزنون. تي حتى كي تجي خارج مافماش شكون يقلك خلص دورو، كان خلصت مرحبا، كان ما خلصتش توا يبعثولك الفاتورة مش مشكلة، انشاء الله لاباس و ما تشوف سَوْ.

المهم توا خرفت خرفت ونسيت بش نوضحلكم الصورة. ياجماعة الشيك ضمان راهو ممنوع لكن للاسف كي انت داخل و صبعك تحت الزرسة ما تنجمش تخرجلهم الرائد الرسمي مخطط بالفلوريسون و تقلهم هاو القانون. لكن وقت الخروج، سواء كنت حاطط شيك ولا فلوس ولا حتى فرنك راهو من حقك بش تخرج و ما يكلمك حد و ماينجمش يجبرك بش تصحح كمبيالات. راهم يسالوك فلوس ايه صحيح اما راهو مجرد دين. محلاه كل واحد يسال عبد فلوس يشدو رهينة عندو! اللي عندو بيك مصلحة و يسالك فلوس يمشي يبعثلك فاتورتو كان ماخلصتوش اهوكا باب بنات محلول و كلبو ينبح.

اخر حاجة قبل لا نمشي نعمل حاجة بالكشي ربي يجيب مني، يا جماعة اللي يجيك و يحط يديه في خواصرو و يقلك نجيبلك السوجيقات و الامن و الدرا شنوة، سيدي تهز روحك و تخرج و تقلو كان بوك بي جرب اعملها! السوجيقات ولّى بوليسية ولا شنوة؟ تي هوما البوليسية لازم يبدى عندهم عليك حجة قوية و ما ينجموش يشدوك في الوقف التحفظي اكثر من اربعة ايام الا باذن م النيابة. يجي واحد ملبسينو دنقري عليه شعار متع راس كلب يعمل هكا يشوط الدستور و القانون و يقلك ما تخرجش؟ تخرج و تمشي تشكي لاقرب مركز، هاو بش نعطيكم منطوق نص المجلة الجنائية و لا تعليق عليه بعد هذا:

Article 250
Est puni de dix ans d'emprisonnement et de vingt mille dinars d'amende, quiconque, sans ordre légal, aura capturé, arrêté, détenu ou séquestré une personne.

Article 251

La peine est de vingt ans d'emprisonnement et de vingt mille dinars d'amende

a) si la capture, arrestation, détention ou séquestration a été accompagnée de violences ou de menaces,
b) si cette opération a été exécutée à main armée ou par plusieurs auteurs,
(.....)
d) si l'un de ces faits a été accompagné de menaces de tuer l'otage, de porter atteinte à son intégrité physique ou de continuer à le séquestrer, aux fins de contraindre une tierce partie, qu'elle soit un État, une organisation internationale gouvernementale, une personne physique ou morale ou un groupe de personnes, à faire un acte déterminé ou à s'y abstenir comme condition expresse ou tacite de remise en liberté de l'otage.
(...)

بنت عايلة بدون عائلة

2009-05-17T16:36:00.000+01:00

التدوين يا جماعة كي الشتا، ساعات يضربك الشياح و تبدا تتغصور على كلمة و ساعات اخرى ربي يعطي خيرو و ترصيلك تلهث بش تخلط تكتب اللي يتعدى في مخك. ها النهارين عندي برشا حاجات نحب نحكي عليها. الشي بالبرويطة لكن الله غالب مشغشبة و مالقيتش الوقت. من بين الاسباب المباشرة لها اللهوة الكبيرة انو ها النهارين الدار تبارك الله تملى و تفرغ بالضيوف و زيد فما شكون جايبة معاها ولدها الصغير، كعبورة عمرو قريب العام واش. الصلاة ع النبي عليه و عيني ما تضر اش يفرت و اش يشابط. ع الغفلة تلقاه يجري فرحان للدروج بش يعمل القفزة الكبرى و اختكم وراه نتبلنجى نمنّعو في الاشواط الاضافية، مرة نكسر سنة مرة نحل غرز في راسي، اما الحمد لله يظهرلي التامين يرجع في ها الحالات خاطر نسبة السقوط قريب الخمسين في الميا.

المهم، اللي خلاني نعمل وقفة وجودية هوا ها الميترو غير ربع و اش حلّ فتارية في الناس الكل، انطلاقا من امو! مسيكنة اللّى يعرفها قبل العرس و يشوفها توا ما يعقلهاش، الشعر قفة قطاطس و اكا الحطة و اللبسة ولات دبش مصخ بالبرودو و الياغرت و حتى م المخ تحسها امّمَهمشة على اعصابها اش من مصيبة بش يعملها ع الغفلة. كان هاذي ما تخدمش و عندها صغير برك و زيد م الفوق امة لا الاه الا الله تعاون فيها و هكا صاير فيها، امالا امّاتنا نحن اش كان صاير فيهم؟ و الله كي ما ذبحوناش و علقو ريوسنا على سور الدار يتسماو مجاهدين. امي ها النهارين باهتة فيا ندور ندور و نكب عليها نبوس الراس و الجبهة.

نتذكر مرة منهم و انا عمري قرابة الخمسة سنين عملت عملة كي البصل، قعدتلي عقدة نفسية ليومنا هذا. ايام الليسي و الجامعة ماو م المفروض انهم ايام تمرميد، يعني هاو استاذ غاب هاو صالة خذاوها حاشتهم بش يعملو فيها حفلة ولا درا شنوة. بالطبيعة المكتبة و قاعات المراجعة يعبيو ويفرغو اما باللي جاي يتدحنس على صاحبتو و اللي جاي بش يكمل النومة مش بش يقراو. عاد اغلبية الطلبة بالطبيعة يخرجو للجردة و يترماو تحت الحيوط ولا ع المادّات بش يعديو اكا الساعة. الكل على بكرة ابيهم الا وحدة برك تلقاها واقفة au piquet كي عبود البسيسة، مهما طالت المدة ساعة، اثنين وانا صامدون صامدون، الشهادة او النصر.
اي عاد خرجت فيا اشاعة اللي انا نفخة و الرقاد في السبخة و ما نتواضعش و نقعد ع القاعة كيف خلق ربي. انا حشمت بش نقلّهم اللي انا معقدة م القعدة ع المادات م الصغرة.

الحكاية و مافيها، انو في الطفولة السعيدة متاعي، اخر ايامات رمضان و الاستعدادات للعيد الصغير على قدم و ساق، امي و خالتي هزو الفيلق اللي ربي بلاهم بيه و هوما ستة صغيرات عاقلين لا يهشو لا ينشو، هبطوهم معاهم للسنترفيل بش يشريولهم سبابط. ماو وقت الصغرة دبش العيد يولي مسألة قومية خطيرة و ما يتشرى الصباط الا في الدقيقة تسعين و بعد ما ريقهم يشيح و يدورو تونس كاملة باحوازها. اي عاد، نثبت اللي عامتها فما حكاية سفاح من السفّاحة تدور، ممكن سفاح نابل ولا سفاح من اختراع امي لعلّ الخوف يهدني شوية. الشي الاكيد اللي بالعكس اكا السفاح ولّى اسطورة نحلمو بش نقابلوه و نشدوه و نوليو ابطال.

حطو الكرهبة في شارع م الشوارع قريب للحبيب بورقيبة، يظهرلي جمال عبد الناصر، هبطت امي حلّت المال و هبطتني انا و ولد خالتي، خاطر الله اعلم علاه ما كنا قابلين نركبو كان في المال و الا نعملوها شوهة للسماء. ايا سيدي هبطنا يدك في يد خوك و هوما مسيكنات كل وحدة شادة في يدها فريق. دخلو لشارل ديغول (تفاصيل الشوارع عرفتهم مبعد من كثرة ما امي حكاتها الحكاية) و بداو يدورو من حانوت لحانوت حتى في الاخر عجبهم واحد دخلولو. كانك عليا انا فيسع فيسع قمرّت صباط و اتكيت على جنب. الله غالب م الصغرة ما نحبش الشوبينغ. اما وينك، ليلة عيد و العباد زحفو على تونس اكا الحانوت تملا و تفرغ و زيد احنا داخلين في ستة صغار يعني الحكاية بش تطول. فديت!

عملت هكا خرجت لبرا نشم في شوية نسمة و نتفرج اش فما و اش ما فماش. نتلفت على يدي اليسار نرى رؤيا الاهية! مكتبة! (يا حسرة وقت اللي تونس كان فيها مكتبات، توا يا قهاوي يا حوانت شاباتي). مشيت نتفرج في الفترينة و ما نجمتش نتزحزح من غادي، امّمسرة في بلاصتي تقولش سرتي مخيطة قدام اكا المكتبة و نتفرج في العجب، هاو اقلام ملونة هاو ستيلوات، هاو كرة ارضية هاو كتب بالتصاور و كتب متع كبار بلاش تصاور... بنت عايلة في بلاد العجايب!
و ساعة ساعة يطلعلي اكا الملايكة اللي لابس بالابيض و يقلي ازرب ارجع لحانوت الصبابط خير ما ترصيلك في فلقة الليلة، اما زادة يطلعلي خوه اللي لابس بالاحمر و يقلي نزيد دقيقة ياخي هاو الحانوت قريبة كي يخرجو توا نفطن بيهم.

من دقيقة لدقيقة ضربتها يجي ساعتين قدام الفترينة ملصقة يديا الزوز عليها و انا كشختي محلولة و ريقتي سايلة. ما نفطن كان باكا العالم السحري اللي اسمو فترينة فجأة ظْلَامْ و الراجل مولى المكتبة خرج و عمل هكا دور المفتاح وهبّط اكا الريدو الحديد! تلفتلي وقعد باهت قالي اش تعمل لهنا؟ مع شكون؟ على نيتي قتلو مع امي هاني ماشية بش نخلط عليها. حك راسو و هز روحو و مشى. تلفتت للحانوت متع الصبابط، نلقاه مسكر! زدت قربت باقي مش مصدقة نلقاه ظلام دحيس و لا امى لا خالتي لا ريحة مخلوق بشري..
يمين يسار، شي النهج كامل ظلام و الحوانت سكرت لا فما حتى قطوس متعدي.

اش بش نعمل اش بش نعمل؟ زعمة نمشي يمين؟ زعمة نمشي يسار؟ ياخي منين جينا احنا؟ ولّا تعرف كيفاه خ نقعد هنا، اكيد اول بلاصة يرجعولها هوا الحانوت. الحمد لله اللي جاتني بارقة الذكاء هاذي و شديت بلاصتي على اكا المادة نبكي و نمخط و نتذكر في حكاية ريمي بدون عائلة و نوعد في ربي كان رجعت لدارنا نولي عاقلة و نتوب ع الهيجة و الدبر توبة نصوح.
كُل ما يتعدى خيال في راس النهج نمشي نجري نقول هاو رجعولي، يطلعلو خاطي، ناس متعدية في امان ربي. طوالت عليا القعدة فوق المادّة حتى دخلني الشك و قلت لازم امي مزالت متغششة على الكرهبة اللي دخلتها في شجرة وت البارح ياخي قالت هاي غبرت وحدها، ملا راحة منها. وانا هكاكة الوساوس تهز فيا و تجيب ما نسمع كان صوت امي تبكي و تعيط يا فاتن وينك؟

للامانة التاريخية نسيت اذا كليت طريحة ولاّ لا ليلتها، ع الاغلب اي، اما الشي الاكيد انو ما بْرِدْت الا ما شراولي قاتو. ماو بعد الصبابطي وقفو في باتيسري وولد خالتي كلا بايو و الباي متاعي ياخي ما فطنوش بالقرد الناقص، ما فطنو بيه كان وقت اللي جاو بش يركبو في الكرهبة امي حلّت المال طلع شيطان برك.
الحاسيلو توا فهمت علاه يقلك الجنة تحت اقدام الامهات، مساكن اش قاساو و انتوما يا اللي نافحين ع الصغار خمّمو وقيسو قبل، اهوكا تعرفو اش يستنى فيكم.

الجنوب...جنة عهد الامن و الامان

2009-05-15T04:58:00.000+01:00

كنت رايضة في تركينتي نسنس ع الفايسبوك و المدونات، ما نفطن كان نوقز الباب. حليت لقيت مرا حْبَيْبِتْنا -بش نسميها فيّاسة- جاية تطل ولو ع الاغلب جاية تقيد الاحوال. ايا سيدي معليناش مرحبا مرحبا، اربعة بوسات نقبتلي بيهم الحناك و ترمات في الصالة. ايا عاد من كلمة لكلمة و اش فما جديد، قالتلي اللي هي كانت في الجنوب الجمعة اللي فاتت، استدعاوها لعرس. الحق استغربت منها ها المغامرة الكبيرة. خاطر على حد معرفتي بيها مرا نقنوقة متكلفة تتنفس الفيس. خرّجها من حدود المناطق الهاي ما تعرف شي، بعد اللي كان ماشي في بالها الجنوب التونسي هوا الحمامات.

في بالي بش نعمل ضحكة قلتلها ايا احكيلي على مغامراتك كي لقيت روحك بلا قهاوي النصر لا كاغي دو لاك، اش صار فيك؟ طحت مونك؟ ماراعني الا المرا تقلبت على ظهرها م الضحك و قاتلي وينك يا مهبولة؟ تي هاو طلع الجنوب بلاد الخيرات السبعة و نحن مافيبالناش! و بالامارة وصيت حبيبتي تحرصلي بش تلقالي راجل لبنتي كيما نرى عندك.
باقي في بالي تتمقصص، صحيح عندي برشا ما مشيتش اما بعد اللي الدنيا شعرة لا تقلبت في الرديف عمناول و ليومنا هذا فيديوات الميزيريا تلعلع في الفايسبوك، بش نكذب هذوكم و نصدقها هيا؟ قلت ايا برك تبع الغرزة.

الفياسة شدت باكو الشكلاطة في حجرها و بدات تخرفلي. قالك اساعة صاحبتها هاذي اللي استدعاتها للعرس، كانت تْسخَّفها خاطرها "مدفونة" في مجاهل افريقيا محرومة من جيان وكارفور و القهاوي متع البم بم، اما كي هبطت في زيارة ميدانية على عين المكان رجعت تضرب في روحها بالكف على راجلها ولد المرسى اللي تتسمى تطشفرت في جرتو. يا سيدي شد عندك.
اولا المرا ساكنة في قصر الدهشة، فيلا على ثالث طاق و جردة قد هنشير يرتع فيها الخيل و نزيدك زيادة مش متكلفة عليها بالكل. بعد اللي الارض خذاها الرويجل في اطار الاستصلاح الزراعي، عمل هكا قلبها مشروع سكني بشوية تمرشينات تحت الطاولة. و نزيدك زيادة، المرا مغطية بالذهب لعينيها قاتلك اي لا يزي هوا لاباس عليهم، زيد اعوام الشياح ، الفلاحة اللي على قدهم يتسلفو الفلوس من عندو باكا الحسبة -هاو فما شكون حسودي بش يقول ربا- و بالطبيعة كي يوحلو بش يرجعولو، حاجة م الثنين يا يعطيوه طبة ارض يا اما صياغة نساهم. تهزهم صاحبة حبيّبتنا الفياسة للصايغي يصوغهملها اشكال الوان. الدار اللهم لا حسد مزهزة م الذْبَابة للقايمة باحسن فرش و اجد ماكينات، بعد اللي يتباعو باخ تف م الجماعة اللي تهرب فيهم من ليبيا و رد بالك، تهريب محمي م الديوانة بيدها، تهريب قانوني و اللي يقلك! بعد اللي رْوب زهير مراد و ذهب شومي و حتى من مناشف بيت البانو دولورم و اللي يقلك يتلاوحو!

لحد لهنا الواحد يقول صحة ليهم يا سيدي كي عطاتهم الظروف و جاو في زمن الغفلة، لا حسيب لا رقيب. اما اللي حمملي قلبي انو الفياسة زادتني من الشعر بيتا. قاتلك و اخطى هذا الكل، اهم لوكس في الجنوب الساحر متاعنا، هوا انو صاحبتها ما تهزش يدها لراسها! عندها في عوض المرا خمسة في عين الحاسود. و قبل ما تسكرو الصفحة و تقولو هاذي تكذب و طارت عينها ، تبعوني للاخر.
صحيح عندها خمسة نساء يخدمو فيها، اما تعرفوشي قداه يتكلفو عليها؟ بالطبيعة المصاريف الزايدة كيما الضمان الاجتماعي ما عندهمش، اما حتى المصاريف الضرورية كيما الشهرية ما عندهمش! النساء يخدمو بكروشهم! و تسخايبوشي تحطلهم من طنجرتها؟ لا تصمتلهم كعبة كعبة عظم، طرف زيت زيتونة و قدمة خبز. يزي! باهيلهم الريجيم.

على شكون بش تلوم بالله؟ على المرا صاحبة الفياسة وهوما النساء اللي جاو لحلحو بيها بش تخدمهم بالكسرة؟ع النساء و ما يلزك ع المر كان اللي امر منو؟ كان ماشي في بالي اللي العبودية تنحات من تونس من عهد الامان متع الباي... هانا رجعنالها في عهد الامن و الامان متع .... حتى شي! و الله لا قلت شي!

زايد معانا محلانا

2009-05-07T12:56:00.000+01:00

كلمتين قبل لا ندخلو في خرافة اليوم، حبيت نعلق حتى انا على البوست اللي فات. م اللول فرحت كي مالقيتش برشا تعاليق قلت زايد خمسة و خميس الله احد على ولاد و بنات ولادي كي طلعو بلكهم مِتْفَهْمين و للمظاهر مْتَلْفين. و لازم الثلب اللي وصلني من قنوات غير رسمية مجرد استثناءات لا غير. اما بعد ما غبت نهيرين على الانترنات و حليت الايميل، ماغير ما نشعر تِرْمِيت تحت الطاولة م الكرتوش اللي يزف زفان.
الحق تفاجأت، ياخي اللي قلبو مغلل لها الدرجة ولا عندو راي مخالف، علاه ما حطوش في التعاليق و نتلمو حضبة و قول و نفركو ها الرمانة فرد مرة؟ اما كي زدت ثبتت، عذرت اكا البنيات، نحسبهم كيما بناتي، خاطر اغلب الظن مزالو في سن المراهقة ومايصحش عليهم حتى الصيام. صعيب ياسر كان طفلة وصلت عندها بطاقة تعريف و بش يحطوها تنتخب و تقرر مصير بلاد، تتعدى ترمي تعليق من نوع "خاطرك ما لقيتش شكون يزفر عليك و يلنسيك" ولا من نوع "مدام ميتة بالشر في دار بوك، ما تعرفش شنوة اللوكس و ما تفهموش". و لذلك بش نعتقهم من تعقيبي و من لساني من منطلق ارحمو هذه الطفولة.

ايا سيدي، ندخلو في صلب الموضوع. اليوم حبيت نثمّن و اشد على ايدي الشعب العظيم متاعنا. بصراحة ما تحس بالنعمة كان كي تفقدها. و في الغربة كل شي تونسي تراه بعيون جديدة. ما تتخيلوش قداه قلبي تحمم اكا النهار و انا متعدية نزفّ في شوارع باريز، اللي لتوا لافهمت علاه ها الحب الاسطوري والهالة من الازبهلال بيها، رغم اللي حسب رايي المتواضع مدينة معقولة تتوفر فيها مرافق عيش ملائمة لكن ماهيش بدعة ولا شي خيالي تستحق اكا العروقات الشرتلة قدام السفارة و لا انو كي يجيو يحكيو عليها يشيح الريق في فمهم. المهم، اخطانا من باريز و خ نتلهاو باهلها. اي عاد كنت نقول اللي متعدية قدام سبيطار م السبيطارات، نرى في مرا عزوزة قرومة، مسيكنة ساق في الدنيا و ساق في الاخرة، تتركّز على قصبة، هازة كابا متع حمام و قاصدة ربي للسبيطار. يعني بصراحة منظر يحمم القلب و يخليك تشعل في روحك فتيلة. توا معقول مرا في عمرها لا عندها لا والي لا تالي يجي يهز عليها الساك و يشلوش بيها وين نحطك يا طبق الورد؟

اي هاو نتسماو نعمة في بلاد العربان! جرب نهار اغلط و ادخل لسبيطار وقت الزيارة، توا ترى قافلة تسير جاية تستلطف لولد عم بو جد بوه من طرف برودة. و تلقاهم تبارك الله جايبين الخيرات السبعة تقولش عليهم بش يمونو جيش وطني زادم على حرب هاو جردة تفاح و موز، فرجيدار ياغرت و كان يلقاو يكملو يجيبو البقرة بيدها غير بالطبيعة ما لذ و طاب م الماكل المشتهية الخفيفة علي معدة المريض من نوع كسكسي بالعصبان.
صحيح يثقلو شوية بالزيارة ع المريض و يفلقولو راسو بالحديث الفارغ و التْوَتْويت، تقولش عليه راديو في دار الطرش، اما باقي باهي! اما خير يا ديني؟ اكا الحركة و الهيلمان ولا مسيكن وحدو وجهو وجه الحيط و الهلواس يهز فيه و يجيب؟

و صحيح قداه من مرة المريض يكملو يتلاقاو عندو زوز فرق متناحرة م العايلة جايين بش يطلو عليه يكلمو يطلعولو اربعة قرامات سكر ولا ذبحة صدرية بش يتوكّل فرد مرة و هوا تلقاه ناسي هَمُّو و يِحِزْ بيناتهم بمعلاق السيروم، اي اما هكاكة يحس بمعزتو عندهم! ياخي لولاه هوا و غلاوتو كانت تجمعهم بيت وحدة؟ و بربي خ نفقعوها فرد مرة ها الدمالة، ياخي كي زوز يبداو يتساببو ولا متغششين على بعضهم يعني يكرهو بعضهم؟ لا يهديك هذيكا خاصية ثقافية عندنا و اكاهو. تي واحد داخل يهني واحد، م الباب يقلو "كل شي بالبركة اما و الله متغشش عليك!" كان هذا جاي يهني و متغشش، نلومو على طريّف سبان و تسميع كلام؟ ملام فم برك اما القلب مش محشرد.

و زيد اهم حاجة اللي ها اللُحمة العائلية تنجم تقول هي الحاجة الوحيدة الباهية اللي قعدت راسخة حتى في الجيل الجديد. صحيح مسيكنات مَنْعوتين بالصبع و نهار كامل ياكل على راسو في هاو جيل تافه سطحي، فارغ، بخلي، كارك، منسلخ، كي العلقة عايش على دم غيرو، اما الحق يتقال، وقت الشدة هاذي تلقاهم!
تي هوا مريض ماشي يش يعمل تصويرة يعني هدرة ساعة م الزمان و يشد المزفت و يتم مروح، تلقى فريق وطني للتشجيع متطوع بش يمشي معاه. اللي بش يهز دبوزة ماء و اللي ماشي ع الونس، و اللي عندو الكارني ولا الفلوس بش يخلص. و اللي عندها جنون زرق تكمل تجيبهم و تجي و يعملو حركية و جو في السبيطار.

ممكن تسخايبوني نتمقصص اما و الله هاذي تدوينة جدية و ماشية في حقها. ماني ما نجمتش نشد روحي مشيت نجري للمرا نخطف الساك من يدها بش نهزو عليها، صحيح سخايبتني بش نسرقها و طاحت تصيح، اما الحمد الله قبل لا تحضّب علينا و ترصيلي اختكم ندون م السجون الفرنسية، فهمتها الحكاية و دخلت ونّستها شوية حتى جا دورها و هي ترحم على التوانسة رغم اللي زفرو على النشيد الوطني متاعهم. الحاسيلو زايد معانا محلانا.

العروس لازمو تقليع زروس

2009-05-01T17:08:00.000+01:00

كنت بش نحكي حكاية جدية شوية (اي تجيني حالات جدية ساعات اما مش ساكتة ع الموضوع هاني نداوي) ياخي بربشوني على حكاية العرس. توا بالحق اللي كان عندو شك في الحكاية بش يتيقن و يقلك الطفلة هاذي obsedee بحكاية الماخذة. اما نأكدلكم اللّي بالعكس، صحيح كانت عندي عقدة م الحكاية اما بطريقة عكسية. كنت رافضة الحكاية جملة و تفصيلا، و اهم سبب انو كي تجي تخمم فيها تحس روحك قادم على جبل بقادومة. الواحد يقول برا خ نعرس و نلم ساقيا و نعتق امي وبابا شوية خلّى يتنفسو، يجي يحسبها يلقى روحو داخل على مشروع تنموى كبير و ما يفضها كان قرض من البنك العالمي.

ايا سيدي على فرض انو ربي سهمك بشكون : ولد/بنت ناس، مقدود(ة)، نظيف(ة)، متربي(ة) و عامل(ة) منك راس مال. و على فرض انو بمعجزة م المعجزات انتوما الزوز تخدمو و نزيدك زيادة اهلك و اهلها قابلين الحكاية و ربي نزّل عليهم بنورو، لا فما مشكل جهوية لا طبقية لا لهجة (اي التوافق في اللهجة ولّى شرط من شروط صحة عقد الزواج) و حتى اجتماعيا عندهم نفس العقلية. باختصار، اكا الشمعة اللّى شعّلتها في السيدة المنوبية جابت أُكْلها. امورك الكل هانية و الضغوط النفسية الكل مافماش. توا قعدلك الصعيب...التمويل!

اساعة اخطانا من فترة الخروج و الدخول و هاو مرة سهرتو في البلاصة الفلانية هاو مرة لازم تهزها لدرا وين و كادو السان فلنتان و عيد ميلادها و عيد ميلاد تعارفكم و عيد ميلاد اول مرة صارحتو بعضكم و اكا الاستثمارات الصغيرة. توا عاد بش تبسمل و تحط ساقك اليمين في عتبة دارهم. و كيف كيف اخطانا من اللبسة و حجامة امك و جبة بوك و القاتو و الورد و القطعة صياغة متع نهارتها. هذاكا الكل مقدور عليه. اما المشكلة اللّى برشا ينساو انو ضربة يدك... ماتوجعكش. كي عملت ها العملة بيدك و استعجلت تحت تهديد المرج المستمر من حبيبة العمر. اي ماو الطفلة بعد ما تخرج معاها -كان خلات بستة شهور-، سواء كانت بدر البدور و لا عبيثة قبور، بقدرة قادر احد، بش يوليو خطابها قاصين تساكر وواقفين يستناو ع الباب و دارهم مرجوها و هي متمسكة بيك اما ما تنجمش تماطل برشا...

بطبيعة الحال، انت كي الناس الملاح توخر تقدم و تضرب الطاولة بكل رجولية و تقلّها هاني داخل لعرين الاسد بساقيا، اما اهوكا نعملو خطبة ولا فاتحة، و العرس يجي بالشوية. اما وينك، يا مسكين، ياخي ناسي اللّي اكا الفترة اللّى بش تتخطبو فيها و انت سيار ميار على دارهم كل خطوة بحسنتها؟ و كان نهار دخلت بيدين تصفق فارغة، الا ما يتذكروهالك على رابع ولد تجيبو بعد عمر طويل. هذا متع كل يوم، اما الموسم و العواشر حاجة اخرى. و بالطبيعة القايمة متع اعياد الميلاد آنفة الذكر بش يتزادلها عيد ميلاد امها و بوها و ولاد اخوتها و جرّب نهار جيب حاجة رمزية، توا يقلك خلّي متاعك عندك علاه المحقرانية؟ و اكا الطفلة الا ما تموت في جلدها، خاصة مع تعاليق دارهم و صحابها اللي يقلّك مسيكنة زهرها جاء سحاق، و الطفل خذاها بالرخيص!

باهي اخطاونا من مصاريف العرس و العرك و الشباط ع الثريات و الكرسي لوحو غامق ولا فاتح و السؤال الوجودي هل بيت الصالة خارجة على سرفيس القاتو اللّي شراتو ولا لا. و برا عاد تفتقت الجروح ع الصالة و الروبة و الصياغة، ديجا من تعدادهم برك هاني حلفت يمين قاعدة في دار بابا. اما المشكلة الحقيقية مش في هذا الكل.
السؤال بالحق، علاه هذا الكل؟ ياخي ما يصح العرس كان بها المصاريف و ها القاوق الكبير؟ ولاّ الطفلة ما تعرف معزّتها عند الراجل كان ما "تقلعلو زروسو"؟

عويم لتالي، عندي صاحبتي تحضر لخطبتها. الحق الطفلة عز الناس و تشرّهك في البنات و تخليك تآمن اللي الدنيا مزال فيها الخير. هزتني انا و صاحبة اخرى بش نمشيو نختارو الخاتم معاها. بالطبيعة اقل خاتم فيهم عجبها ما يطيحش تحت السبعة ملاين. و نحن هكاكا نتناقشو و نتحاربو تقولش علينا نحن اللي بش نتخطبو، دخلت مرا، وسط عمر، جات بش تاخو خاتم "خطبتها" اللّي هداهولها راجلها! ماو التنسنيس مافماش، طحنا نبربشو فيها. طلعت الحكاية انو المرا كي عرّست خذات واحد مزال كي حط ساقو في الدنيا و رضات بالقليل، حتى م الخاتم حلقة ذهب لا فص لا شي. ايا سيدي وقفت معاه و طلعو درجة درجة حتى امورو الكل ولات لاباس. عاد في كل عام، في عيد عرسهم، تهز نفس الخاتم، يعني الـ anneau و يشريلها فص ديامنت اكبر ملّي قبلو و القديم تعملو بلالط ولا شركة. عيني ما تضر، الفص اللّي خلطنا عليه نهارتها يعمل عشرين مليون م الباب الواطي.

في اطار تبادل الخبرات بين الجيل السابق و اللاحق، اكا المرا، على نيّتها قالت لصاحبتي كل شي بالبركة اما نصيحة فك عليك م الخاتم هذا، و اكا العشرة ملايين برا زيدوهم على حالكم ولا حتى خبيوهم، تلقاوهم نهار اخر. و في عوض يتغصر اليوم بش يجيبلك خاتم بعشرة بعد خمسة سنين يجيبلك اللّى تشتهاه الكل و العرس مش بهرج برك. صاحبتي ضحكتلها ضحكة صفراء و قالتلها انشاء الله. كي خرجت المرا، صاحبتي طاحت تقرا على روحها في المعوذتين، قاتلك قالتلي هكاكة خاطرها غايرة منّى كيفاه انا خطيبي يحبني اكثر منها و بش يجيبلي خاتم اغلى من خاتمها. الحق بش ما نخسرش الطفلة سكتت. و الخاتم تشرى يعنى تشرى. اما اهوكا لليوم واحلين في دار بش يسكنو فيها.

اي عاد ولاّو برشا عباد يقلك السماح و زيد العرس ولّي كي القمار توا. هاني قاعد عازب و مرتاح. فاش قام نشرى في البلاء و الحبس بالفلوس؟ الكلام هذا معقول، مدامك مزلت صغير و صحتك شايلتك. و نهار اخر؟ تلقى روحك طبطبت لا مرا لا ولاد و حتى م الصحاب كل واحد شد ثنيتو. حياتك تولى محصورة في الطبة و الدوايات و شادد فرش قدام التلفزة تستنى... تستنى فاش؟ ماعاد عندك ما تستنى...

عريت عليك راسي يا ولد زوكربيرغ

2009-04-29T18:39:00.000+01:00

مدام المسألة ولّى فيها رشوة و تهديد بش نكتب، هاني شديت ندون بالسيف و عريت عليكم راسي. نجري قدين ما نحلى في عين. كان كتبت لواه ها الحديث الكل ياسر تحكي، كان قصّرت نولّى نبلفط و مش لازم منو. كان سكتت و رتّحت فخار ربي، ايا وينك توحشناك. يرحم فمو في السماء و الارض اكا اللّى قال ارضاء الناس غاية لا تدرك. ظاهر فيه مليّع. المهم سيدي، خ ندخلو في الموضوع و يزي م الهزان و النفضان.

اكا البروفيل الحقيقي متاعي ع الفايسبوك عندي عليه مديدة. الحق كل مرة ندخل خفافي كان حاشتي بعبد في قضية، نلقى الحلقوم تكسر و الشي فايض. فوق الالف ميساج و الله اعلم قدام من notification و جماعة عاملين قروب يلوجو عليا مزلت حية ولا توكلت خلّى يرميو ورايا سبعة حجرات. البارح وسّعت بالي و قلت ايا ابدا صفّى و شوف لعل فما شكون حاشتو بيك و خلاّلك مساج، ما يجيش تبخّ بالناس، و افرش تلقى ما تتغطى و زيد ماغير تفشليم، انا من نوع العباد اللي سعادتي في سعادة الناس (بفففف باهي مشلّقة، هاني سحبتها).

اي عاد فما منهم ميساج قديم شوية عندو توا شهر م الزمان ما فطنتش بيه. جماعة صحابي، صحاب متع صحّة صحّة، مش م النوع اللي ناخو راحتي معاهم، ياسر قواندوات و ناس comme il faut اما و الحق يقال هوما هكّا هكّا بيّا و كل ماعندهم حفلة ولا لمّة لا بد يستدعاوني. اي عاد الصحيبات هاذوما لقيتهم مستدعيني لحفلة متع بيجاما بارتي. اول ردة فعل حمدت ربي اللي الحكاية تعدات ووفات، خاطر اكره ما نكره اكا اختلاق الاعذار و سامحني مانجمش نجي خاطر جارة بنت خالة كواش حومتنا ولدت و ماشية بش نهني. ايا سيدي، شديت حرقست ميساج متع حُرْقَة و تلوّع كيفاش ربي حرمني من ها اللّمة اللي ما تتفلتش، بالعمل على قد ما سخفتني روحي هبّطت دمعتين.

بعد اداء الواجب، ضربت في مخي قلت مدام عملوها ووفاو، و انا و الحمد لله ما حضرتهاش، خاطر كي تبدى قعدة رسمية نجّم نشد روحي اما كي تبدا بالبيجاما و نتشلقح على طولي، اكا اللّسيّن ما يهنيش و بش نشنّها حملة تلقيح ضد داء التمعجين ، زرارق يمين يسار. اما مدام تلمّو و تعدات على خير، خ ندخل نشوف التصيورات. ماو ولات لموضة، اللي هذا حاطط تصاورو، كان شرب قهوة يحطهالك، كان كلا كسكروت يصورهولك و حتى كي يِتِلْطَخْ يستنى في الكار، يأبى الا ان يخلد كشختو المحلولة بحذا اكا البوتو الاصفر، تقولش عليه متصور بحذا التور ايفيل. و بعد لعنت الشيطان قلت لا يستحيل يحطو تصاورهم في بيجاما، هذاكا اللي مزال و هذاكا اش بقى.اما التنسنيس دودة تاكل مولاها حتى يقف على الخبر اليقين.

مشيت بديت ننّقب ف اكا التصاور، هاو فلانة تخطبت، نبعث نهنيها، تجاوبني بالوقت لا وينك سايي فسّخت! اي وعلاه مخلية التصاور؟؟ تحصّل في العباد؟ لا خاطرني طلعت مزيانة نهارتها!
اي اكاهو، و انا نقز من البوم لالبوم و نضحك عل المخاخ مصغرها، ماراعني و ما هالني الا اني ريت ثلاثة البومات عنوانهم "بيجاما بارتي في دار فعلولة". اي ماو بنيّاتنا يحبو يتربجو برواحهم، هلوّلة، امولة، مهبولة، بكلو يمشي.
ما نكذبش عليكم جاتني البهتة. نعرفهم خاطر من نوع يا شماتة ابله طازا فيا، كل شي يعطيوه كارو، كل حركة بحساب و تنقنيق. التلقائية و الاريحية متع لمّات كيف مانهكا ما يعرفوهاش. معليناش، نزلت ع التصاور وقلت خ نشوف لازم صارت فازات تضحك ولا اش من غلبة.

ما نجم نقلّكم الا انو صارلتي اقوى صدمة سوسيو-ثقافو-اخلاقو-نفسية.نتفرج و ساعة ساعة نثبت هل اني غلطت دخلت للسيت متع ملابس داخلية. لا و الله لا، الوجوه هاذي نعرفها! اما ماترى كان النويزات و الدانتال و حاجات مكشكشة. ديجا التصاور في حد ذاتهم صدمة اما اللي زاد بهتني اللي ااكا البيجاما بارتي ولات بارتي tout court! مخلطة حمص و زبيب و عباد لابسة ماسكوات و هابطين يشطحو جايبين ما عندهم هدّو الهدود.

بعد موجة تسونامي الذهول لولا قلت بالله ما نقيسش بمخي، كان بش نحكم عليهم بمقاييسي، الا ما نقيم عليهم الحد، انا نتسمى جماعة طالبان. و زيد بربي اش نوة الفرق بين اللي لابسة ملابس داخلية ولا وليدّ لابس بوكسر بالقلوب و بين تصاور بالبيكني و المايوه، بكلو ماغير هدوم. اما باقي منين نقلبها ما هضمتهاش. اخطاونا من حكاية الحشمة و الحياء خاطر بين شبيبتنا خاطر هاذم ماكا العام دفنوهم بحذا نصب الشهداء في السيجومي، اما انو واحد ولا وحدة لا بالك لا وسّع تقدم توخر تحط تصاورها في لباس داخلي و هيا تشطح و خطيبها ولا خوها هابط على ركبة و نص يصفقلها، في بلاصة عمومية وقفتلي مخي. اخطانا من دارها و صحابها، المخبي ع الاحباب عذاب، اما زملاءها في الخدمة؟ عرفها؟ جيرانهم؟ عطار الحومة؟ زعمة بش يغزرولها/ يغزرولو بنفس النظرة؟؟
يكشف حالك يا مارك يا ولد زوكربيرغ!

براءة الطفولة

2009-04-22T15:39:00.000+01:00

و الله ما بش تضيعوني كان انتوما. غدوة عندي خط موت dead-line بش نرجع خدمة وانا توا هبت عليا قريحتي بش نبلوغي. معليناش، هاو تدوينة خفافي بش ما تقولوش نكسرلكم ف كرايمكم بالحديث الفارغ.

توا جيت نبربش في سطوشي، لقيت حاجة مرمية ف القاع. و شفت انو م المفيد جدا نعلم اللي ناوي يتعرف عليا ف الدنيا و يخلص او تخلص هي القهوة خاطر اختك بطالة و حالّة فمها للريح، انو انا ديما نحوس بـcutter فوقي. مش خاطرني خليقة لا سمح الله ولا عندي نية بش نبراكي العباد بش نكمل لراس الشهر (ولو انو في الظروف الاقتصادية الحالية متاعي الفكرة مغرية جدا) و لكن لاسباب اعمق ببرشا. السبب الحقيقي هوا انو بنت عايلة مالازمش يطيح في يدها مقص! اكبر مقص مسموحلي بيه هوا اكا اللي يقصو بيه ظوافر الصغيرات، يعني تجي بش تقص بيه ورقة يتعوج. مقص الكوجينة اللي انتوما حاقرينو، امي مخبيتو ف الكاناويطة متاعها و المفتاح في رقبتها وين هي وين هو...
الواحد حد هنا يقول زعمة شنوة السبب؟ زعمة حبت تحل شانطي في عروقها كي دخلت في سن اليأس و باقي متضيفة في دار بوها؟ لا لا مزال عندي امل، الاقتراح هاذا نعاودو ندرسوه بعد عويم من الان.

المهم، الحكاية و مافيها، انو عندي مشكلة بسيطة ف التكوين الذهني متاعي. كل ما تتحقق المعادلة مقص + مراية = نقص شعري.
توا وين المشكلة؟ الشعر شعرك و منك توفر حق حجامة و تحط اكا الفليسات في سرفيس كريستال تهديه لوحدة بش ترضى تولى حماتك وتعطيك ولدها تمقتو بقية عمرو. المشكلة انو ماعندي حتى شي من ابجديات فن الحجامة، و زيد الحكاية مش مجرد رغبة في قصان شعر، و انما obsession بالحق.

الحكاية بدات من زمان، م الصغرة. في الجمعة اللي توفى فيها جدي، امي بالطبيعة جمعة بايتة في دارهم. بابا يخدم على روحو م الصباح لليل و ما معايا ف الدار كان المرا. عمري خمسة سنين و الحبل ع الغارب. العمايل اللي تنجمو تتخيلوهم الكل عملتهم. ماغير ما ندخل في تفاصيل، جمعة كاملة بعد ماروحت امي، سبعة ايام و كل يوم تفطن بعملة و ما نمنع م الطريحة كان بتشحيت المرا و تلحليحها بعد ما تعرضلها الوليا و الصلاح الكل بش تتشفعلي عندها. اما النهار السابع هي هي و كْلِيت داودي باهي و هزّتني للحجاّمة جزّتلي شعري تقريبا ع الصفر. هاو اش صار...

كي البنات الصغار الكل، كنت نْحِل قلص امي و نْجبد اكا الرّوِبْ، و الصبابط العالين، نلبس، نبلحط وجهي بالمكياج و نبدى نطقطق بالطالون. اما مهما نلوّط، نحس اللي فما حاجة مهمة ناقصة. شعري شادتو زوز قرون و مش متوالم مع الحطايط و الذخامات. نعمل هكا نسيب قفة القطاطس و نبدا نريقل فيها. شي! ناقص حركيّة، ناقص mouvement، خسارة لو عندي قُصّة كيما صاحبتي مريم. راهو يولي شعري مزيان كيفها. نبربش فاكا القجرات، نلقى صندوق الخياطة، نجبد مقص كبير و نلم شطر شعري، اللي م القدام و الفوق الكل و ضربة وحدة بالمقص نجدرو. فرحانة، نطلع فوق الكرسي متع الكوافوز بش نشوف النتيجة. و يا ريتني ما طلعت! جاتني البهتة قدام المنظر اللي ريتو. ع الاجناب قعد طويل و قباعتي الكل ولات كي حجامة الطاسة متع الولاد، اقل من صانتي. الحاسيلو كيما واحد اصلع و مطول ع الاجناب ولا العلوش اللي بداو يجزو فيه و ما كملوش.
لا بكيت لا غردت. الشي الوحيد اللي جا بين عينيا، اش بش تعمل فيا امي!

نهز اكا المقص نمسحو و نخبيه، نلم الشعر الطايح نربطو في فولارة و نحطها تحت حوايجي. نخبي القرعة تحت bonet و نخرج نتسحّب م البيت لا تشلق بيا المرا. و قعدت ندور كي الزربوط نخمم كيفاه بش نمحى اثار الجريمة. شوف رغم اللي كان عمري خمسة سنين كان عندي تفكير منطقي جدا. اخفاء الجريمة لازمو يكون اولا عن طريق التخلص م الشعر المقصوص و ثانيا و الاهم عن طريق استرجاع شعري. مشيت للقراج جبدت حكة الغيرة و بديت نحاول نلصق، شي! النافع ربي، الشي يتلصق فوق بعضو و ظاهرة العملية (مقواني كي فطنت!). بش نقعد نرجع فيهم شعرة شعرة بالسكوتش؟ مش حل!

فجأة شعلت انبوبة فوق راسي! لقيت الحل السحري اللي بش يرجع الحالة الى ماكانت عليها. بش نحير انا؟ ياخي مش كي تطيح سنتك، تمشي تدفنها في الجردة و تقول درا شنوة، عطيتك سنة البهيم ورجعلي سنة الغزال؟ اكاهو، خرجت نتسلوس للجردة، في تركينة بحذا القمة، حفرت حفرت، رميت اكا الشعرات و قلت للشمس، عطيتك الشعر الحكاكة ، رجعلي شعر ارتب. غميت الكل بالتراب و روحت فرحة مسرورة و قلت كان نجحت العملية، نكمل نقص البقية بش يولي شعري الكل ارتب. امالا بش نقعد شطر تل و شطر حرير؟ ما يقابلش بعضو!

بابا قعد اربعة ايام ماراش وجهي. اول مرة في حياتي نمشي نرقد قبل ما يجي. هوا نعمل روحي راقدة، يجي يشوفني ف الفرش لابسة البوني، يحب ينحيهولي، نقلو قرسانة. يقيس السخانة لاباس! يهز روحو و يمشي.
اربعة ايام و انا نتفقد في راسي، شي، ظاهر فيه الشعر مزال ماوصلش للشمس. النهار الرابع عاد، امي جات!! اتدحنست عليها كيما حبيت و منعت من برشا طرايح بسترة ربي و شفاعة المرا متاعنا.
امي تدور تدور و تقلي نحي اكا الطربوشة من فوق راسك. كل يوم حجة... الدنيا سخونة. و انا نقلها قرسانة، ما نحبش. ايجا نهزك للطبيب، لا توا نحس في روحي خير. ايجا نمشطلك شعرك، لا سايي مشطتو..

ايا النهار السابع لحلحت بيها و زقدحت بش تهزني للبلفيدار. سخفت عليا. طفلة براسي و محبوسة ف الدار عندي درا قداه، هزتني. و انا نقز من قفص لقفص، و نجري فاكا الممشات، نتعدى تحت شجرة، البوني يوحل في عرفها. و انا باقي مافيباليش نقز و فرحانة. اما نحس بهوا بارد في راسي. عملت هكا حطيت يدي، انا مزلت ما استوعبتش اش صار و ما نسمع كان شهقة امي! اوه على ايامك اوه على سعدك، اش عملت في روحك؟ يراني و يجيني بش تقلتني انت! توخر تقدم و تعطيني كفيّف باهي، ادات فيه الزكاة و العشر.
طول م البلفيدار، لروز ماري (هاذي حجامة الزهراء عاد)، كملت قرقعتهولي على قاعدة الشي مافيه ما يتصلح.

الواحد يقول يا حسرة على ذكريات الطفولة. اما المشكلة اللي قعدتلي لتوا السناسة. كل ما نرى مقص عينيا تحوال و ماعاد نرى شي...تبياض الدنيا و ما نفطن كان بلكموتة شعر في يدي، منين تقصت تقصت، م القدام، م اليسار برك، م اليمين برك، انت و زهرك. امي وين نصبح عليها لابسة bonet تهز عينيها للسقف، تستخلف مولاها ف البلوى اللي جاتها و ترميلي حق كوب عند الحجامة.

هيا بنا نلعب...

2009-04-20T00:57:00.002+01:00

نشكر ماي ماذر ان لو، السيدة ولادة على اللعبة اللي تاقاتني فيها. ورغم اللي ديجا لعبناها قبل ع الفايسبوك الا ان كل مرة نعاود نقرا الاسئلة نزيد نحير.

خمس هدايا نتمنّى يهديوهالي
١. شكارة شهايد ف القانون حاضرين مقربطين، خللي الواحد يتلهى يعيش عمرو. و ما تقولوش كيفاه، و شنوة ها الجيل الحتحت اللي طالع. فكما يولّى عليكم تكونون.
٢. سيارة الاحلام، كرهبة ديكابوتابل. اي نوع المهم ديكابوتابل، انشاء الله حتى موتور 103. انا نسوق و القمل الغجري المجنون يتطاير في كل الدنيا.
٣. مسودات الكتب اللي نحبهم مع اهداء كتابهم، و الكلو بالحبر الازرق يعيشك.
٤. . قراموفون قدييييييم اكا اللي بالبوق النحاس و لازمو يبدا يخشخش ماكانش خلي عندك
٥. رحلة حول العالم اما مش للمناطق السياحية، وين يعيشو العباد بالحق و نجم ندخل لديارهم حاجة كيما j'irai dormir chez vous
اما ماغير كاميرا بش كان كليت بونو بسترة ربي.
٦. انت صرفت صرفت خوذ بخاطري و زيدني السادسة: بطاقة اشتراك غير محدودة القيمة عند الحاج Laduree

خمس عباد ماذا بيّ نضربهم
ما نحب نضرب حد. نحب الناس الكل ونموت ع الناس الكل و خاصة خاصة بعض المدونين سليطي اللسان. شكون قال قلبي مغلل عليهم ولا نحب نعلقلهم مصارنهم قديد شايح على خيوط الضو اللي قدام شباك بيتي؟

خمسة إجراءات نتّخذها كان جيت رئيس
١. م اللول بالغباء المدقع متاعي قلت نسرح الجيش و البوليسية. اما مبعد كي جيت نحسب فيها، خمسة دقايق و نطير كي الجرانة اللي يحطوها فاكا الطاسة و يشعلو النار. ومانجم نحقق حتى شي من "الاصلاحات" الثورية اللي ناوية عليها. و لذلك قررت اني بالعكس، نزيد فيهم وكان لزم نستوردو كفاءات من دول شقيقة و صديقة تحت عنوان "بوليس لكل مواطن في بلد الشواطن".

٢. بعد ما ضمنا الامن و الامان (شوف يا سيدي من درج خيال بديت نحكي بنحن)، نستهلو فترة حكمنا الرشيدة اللي بش تطول فترة من الزمان، بفتح باب الحرقة لمن استطاع اليها سبيلا وماصاب حتى كان نكملو نأممو ها القطاع و نربحو منو شوية عملة صعبة في مكتوبي، نقصد مكتوب الدولة بالطبيعة. اهوكا نصدرو المجرمة و المحتحتين و المعارضين اللّي عنّا و ما يقعد كان اللي امورو هانية وكمشة نبارة. هاذوكم نحافظو عليهم و نعشعشوهم بش كل ما جماعة حقوق الانسان يحلّو افاهمهم، نخرجوهملهم و اللي ما عندو شاهد كذاب.

٣. حاجة من اثنين، يا نعمل سيري متع عمليات تجميل و الا الحل الاسهل، فوتوشوب و ديما يمشي. و نحط تصاوري في كل بلاصة. في الديار، ف التلفزة، فوق بطاقات التعريف، فوق مراول الملاعبية، فوق حكك الجبن، دبابز الجافال، اللي هوا. لازم وين تقبّل الرعية متاعي تصطبح بوجهي، ما نحبش نحرمهم من شخصي الرحيم بش يرحمو على والديا.

٤. توا بعد ما ضمنا الامن و الرخاء و الاستقرار لشخصنا الكريم، نبداو نتلهاو بامور الشعب. فيلا ترعب و خمسة كراهب بشوفور و عشرة ملاين شهرية كل يوم و صلاحيات غير مقيدة و حراسة شخصية و مقربة لافراد عايلتي و اصدقائي و العباد اللي نحبهم. ماهمش شعب هوما زادة؟ ما نحبش التعقيد يا اخي، تسالني؟ رئيس يحكي معاك. في دولة المؤسسات متاعي ما فما كان زوز مؤسسات. من جهة "انا وحاشيتي" و من جهة اخرى اللي ما يدخلوش في ها المؤسسة.

٥. م النهار لول، نعملو سيري متع فيديوات كل واحد بتبديلة. في كل واحد نعمل بلاي باك متع خطبة عصماء. نحرك فمي و يديا و كشاكشي خارجة و هايضة. و اهوكا جماعة التلفزة كل مرة يلصقو كلام يتماشى مع المناسبة، زعمة زعمة انا قلتو. علاه فاضية شغل بش نقعد نهار نهارين مادة وجهي طالعة عليكم بخطبة و زيد م الفوق نعرفكم خرشيين، ما يثمرش فيكم، انا نحكي و ننظر و انتوما يا تسكرو الراديو يا تبدلو تحطو روتانا بش تتفرجو في انا دانة انا دندن.

خمسة أشخاص نحبّ نعيش معاهم
١. دارنا ربي يفضلهم ولا يحرمهم مني.
٢. صحابي اللي عابدين خلقتي هنا المتنبية و الضايع و اللي مْنَشّرين في ارض الله الواسعة كي ولاد الحجلة، كعبول وظلام و شيروتيم.
٣. هاو بلاصة فارغة للراجل مكبوب السعد اللي والديه سحسحوه بدعاء الشر اللي بش يتبلى بيا.
٤. طبيب احتياط بش ما نقعدش نجري نهار نهارين في حالة طوارئ و مصارني في يدي.
٥. الكلب اللّي مات و تقهرت عليه

خمسة أشياء أفعلها لو علمت أنّي سأموت غدا
هي حويجة برك، الواحد ميت ميت و لا يضير الشاة سلخها بعد ذبحها. شاهية.... نعبّر!
ليلة كاملة و انا نعبر و نسمي و نقول. اما البلوى لو كان ما نموتش!

ايا سيدي نتاقي ف اللعبة هاذي الشيخان حفظهما الله و رعاهما عمروش و تيتوف، المدون المتواضع الزبراط، سي شهاب من دوز و صديق طفولتي سي الدكتور.

سرقة تفرق عن سرقة

2009-04-16T12:07:00.000+01:00

une fois n'est pas coutume، البارح تزرعت قدام التلفزة. ماغير ما تترعبو ما حطيتش القنوات الطينية نقصد الوطنية متاعنا. اما حليت M6. لقيت اك البرنامج الهايل متع enquete exclusive يحكي على اجرام الاحياء الراقية في باريس، مخدرات، تحيل، سرقة الخ الخ. ماو الفرنسيس يبدعو في الـ sensationnel بعد ما تكمل تتفرج تجيك حالة احباط و تقول حتي كان ناب عليا ربي ما نسكنش غادي، الواحد يسخف علي اكا الملياردرات المساكن كيفاش ممروجين في قصوراتهم و مهددين في سلامتهم.

و خاصة عاد كي زادو عداو مرا عزوزة لاباسن عليها لاباسن عليها للي تقول يزي. مسيكنة تبكي و دمعتها علي خدها، ضربت دبريسيون و حياتها تحطمت. ماو دخلولها زنوس سرقوها ف النهار و القايلة، نحّاولها في نصيف ساعة ما يقارب سبعميات مليون بفلوسنا. اما تسخايبوش ذهب ولاصياغة؟ يا ريتو! سرقولها كولكسيون متع عرايس وسرفيس ماكلة، يظهرلي هوا بيدو اللي قال عليه عادل امام سيني نابليون بونابرت.

توا الواحد حد هنا يقول ايه ماهي الا سرقة و المرا مليعة. اما اللي غلب عليا بالحق، كونها شدت يجي درجين تبكي قدام الكاميرا تتغبن و تنوح
''plus rien ne serait jamais comme avant, j'en suis encore traumatisee, boulversee, comme aneantie. mais que voulez-vous ...on doit faire avec. c'est la vie. non rien ne sera comme avant

بالله كان هاذي سرقولها طرف قشاقش مغبرة و تحلت فيها ها الفتارية و طبّة و دوايات و كاميرا تصور...امالا اللّى سرقولو ارضو و شردوه من بلادو، قتلولو اماليه و صادرولو مستقبلو و احلامو؟ اش يعمل؟

عشاء راقي في مدينة النور

2009-04-15T15:21:00.001+01:00

بادئ ذي بدء، نقول كل هابي بريثداي للمتنبية، صديقة الكفاح المسلح اللي تبلينا بصحبة بعضنا. كل عام و هي صديقتي . هي تمرجني و انا نخرّجها من حوايجها و في الاخر تهبطني من كرهبتها في الخلا المخلي بحذا قنطرة الشّنوة و نتسامحو على كعبة ماكارون... ايييه انتم السابقون ونحن اللاحقون.

هاو البوست المحنون كيما تكتب م اللول :

يكب كبوبو اكا الفايسبوك، الواحد ماغير ما يشعر كل شي يحطو ويقولو، ماناقص كان بش نحطلكم تصاور زداق بابا و امي. المهم (للي عملي الملاحظة على ها الكلمة، ايه نستعملها بكثرة و نلقاها معبرة، يعني م الاخر و ماغير تلغبيب سرّاح)، المهم، كيما في بالكم، غدوة يحل ركبي بالبلاد التونسية (اهوكا نحب صناجق و بلايك و جمهور يعيط بنت عايلة شمس القايلة).
حكاية اليوم بش تمس م الـبرستيج متاعي و سي الضايع و المتنبية بش يشدوهالي للممات و مع هذا على قد ما ضحكت ما حبيتش نحرمكم.

اي عاد سيدي في الماكلة انا م الناس اللي تحب تجرب الطلالع. كل حاجة غريبة و توقفلك شعر راسك، هاذيكا هي اللي نقز عليها و نتفرش و نكيكس. بالطبيعة كل مرة نتزنبك في مصيبة لا تقرا لا تكتب. حاشا نعمة ربي قَيْ قطاطس و مع هذا ربي الفوق و انا تحتو لا نشعف لا نتوب. هاو مرة اومليت بالبطاطا و معجون التفاح، هاو مرة شربة دلاع هاو روز مالح بالقهوة و الهيل، لا نودكم لا نشهيكم.
اخر مرة كنت في باريز، اشتهيت نجرب مطعم لكن ما سنحتش الفرصة. المرة هاذي ملّي حطت ساقها ف المطار و اختكم تحربط و تخطط بش تمشيلو قبل لا تروح. المطعم اللي عملي حرقة في قلبي حكايتو بسيطة برشا... تاكل ف الظلام... التام. اما المشية هاذي ما تْصُحْ كان مع جماعة شمايتية ما يرحموش. مشيت نتدحنس عند خويا و نشعلو صوابعي العشرة شمع بش رضى يمشي. هوا م اللول كلمة ماكلة فرنسيس تقلبلو معدتو و كي زدت قتلو اسم المطعم و الكونسابت متاعو، حواجبو ولاو في جبهتو م البهتة. اما الحق بعد ما عمل في عذابي صنعة لمدة نهارين وافق. زدنا كملنا هزينا زوز بنات خالات مقربعين و التم الشمل.

النهار الموعود، كانك ع البنات ساعة قدام المراية هاو حُمير هاو غُبير هاو لبسة هاو قدة و نحنا نشحطو و نرخفو تقولش علينا بش نتعشاو في قصر الدهشة. و كانك على سيدي خويا مشى عمل محواسة في الكوجينة ضربها قد قد بالطاجين مرقاز على ما ياتي، قلب المومن خبيرو.
وصلنا للمطعم، فرحو بينا و م الباب عطاونا مْفِيتيح متع خزيّنة ف الحيط كيما اللي تلقاوها ف الحمام و قالك كل حاجة تشعل بالضو برتابل، مصورة، منقالة، اللي هوا... حطها غادي تربس عليها و حضر روحك. فركنا يدينا و قلنالهم تره خ نختارو اش بش ناكلو، ماو م الباب تختار، الداخل ظلام دحيس. المرا ضحكتها وساعت للوذنين وقاتلك لاااا، اليوم زهر يكسر الحجر! اليوم menu surprise تاكل اللي كتب من ربي و تحاول تطلع. خويا يقحرلي على جنب قحرة خلاتني نبلع ف الريق بالسيف ولو كان مش عيب و الجمهور بش يقوم يصفق، راهو كمّل عطاني براس ع الجراير الحرفة.

وقفونا قدام الباب واحد ورا لاخر نستناو ف السرفور بش يجي يدخلنا. حطوني انا في وجه المدفع، م اللّول. تلهيت نحكي و نسيت اللي السرفور كفيف، ما يراش. عاطية الباب بالظهر ولازّتلو ياسر. ما نفطن كان بجنش دخل فيا طحت نتكربس انا وياه. من الطاف الله ما كلاش راسو ماكانش راكم توا تتفرجو فيا في نشرة الاخبار بالتبديلة الحمرا و اللحية مسيبة. عربية و اعتدات بالعنف الشديد على كفيف فرانساوي، جاك فرجاس نفسو ما يخرجنيش منها. المهم طلبت السماح و قريب لا كبيت عليه بستلو راسو.
ايا سيدي دخلونا ف اكا السراط اللي اسمو كولوار. انا دخلت و شعرة لا لعبت عليا الدوخة. في بالي ظلام، ايه. اما ظلام من نوع تهبط لقراجكم ف الليل بش تسرق الكرهبة، من نوع تتسرسب عند راس بوك تحوف البرتابل، مش ظلام دحيس حتى يدك كي تمدها قدامك ما تراهاش. (مش خوف ولا حاجة اما ذكرتني في نهارة اللي حبسوني في بيت الفيران ف الروضة، نهار اخر نحكيهالكم). قعدنا الراجل بالواحد بالواحد و احنا مانا ندلّو في شي. بالمسان عرفت اللي هوا كرسي جبدتو قعدت عليه، و بالشوية بالشوية بداو يجيو الاخرين. نحنا اربعة و زاد كمل خلّط علينا كوبل فرنسيس خاطر الطاولة تهز ستة. بصراحة سخفوني. لا يزي مالقاو يقعدوهم كان معانا، لا يزي الراجل جا بحذايا و المرا بحذا خويا. اكا العشا هبطّلهم مرّار.

بدا السرفور يشجع فينا بش نمدو يدينا و يحلف علينا تقولش عليها دار بوه، مديت يدي بالشوية هاو فرقيتة، هاو سكينة، اي هذا مايكون كان كاس، جبففففف طيحت دبوزة الماء الحمدولله ما بلّت حد اما تبزعت في صحن الخبز، ولّى لبلابي ناقص كمون. اما بسترة ربي ظلام، تلفتت لبنت خالتي قلتلها تي دِلّ ياخي، شعرة لا مرمدتنا الكل. مسيكنة جدت عليها، قاتلي سامحني و سكتت.
بدينا نستانسو بالظلام، مش نروا خاطر ما ترى شي، اما ماعادش خايف لا تمد يدك تعمل مصيبة. تحلينا و بدا الضحك و التنكيت و نحس باكا الكوبل يتغصور بحذانا. خويا عمل سكتة متع دقيقتين وبعد خرج كعبة "الله اكبر". الحق المرا اللي بحذاه ماقالت شي اما حسينا بالطاولة تهزت و تحطت و نحنا وين تلقانا بالضحك؟

بدات الماكلة تجي، كل واحد غطس في صحنو. م اللول شادة اكا الفرقيتة و نبعول ف الصحن، نحاول نهز منو، شي هاو مرة الفرقيتة مقلوبة، هاو مرة تهز و يطيح حتى خفت لا تطلع شربة ولا شنوة من عزا. شديت نسبّط لقيت حاجات يابسة و حاجات مكعبرة الحاسيلو مافهمت شي. بعد عدة محاولات مستميتة نجمت ناكل شوية، هاو حشيش، هاو حوت، هاو درا شنوة.
انا مزلت كي عملت قدمتين و شدتني الحكة في ركبتي بكل رقة بديت نحك، نحك. شي! باقي تاكل فيا و مانيش حاسة بالحكان. قويت ف الدوزة و ليت نخربش في روحي. شي! ناري على روحي درا اش من عزا وكلوني ماعادش حاسة بساقيا. شديت بيديا الزوز عاد نحرث فيها اكا الركبة المحنونة. انا نحرث و الراجل اللي بحذايا يكح. انا نحرث و هوا يكح! بعد يجي دقيقتين مسيكن بصوت كلو الم قالّي سامحني علاه تحكلي في ركبتي؟ طلبت السماح و حمدت ربي الدنيا ظلام. مديت يدي على ساقي نلقى ديجا شطر الصحن طايح في حجري.

تمرجت باكا الماكلة، انا نهز و هيا تطيح، هزيت راسي وسالت خويا قتلو ياخي هاك تاكل وساكت نجمت تهز حاجة؟ قالي يزي بلا ريق ما راك حد كول بيديك! ماكنتش م العاكسين، رميت اكا الفريقيتة الله اعلم في حجر شكون جات و بديت نمس. هاذي سلاطة، هذا شامبينيون، هاذي puree ... انا ناكل و فجاة نشد يد تحوس في صحني! ردة فعل لا شعورية اما غريبة، نقز عليها نقدمها! بنت خالتي تتنفض بكلها و تقلي اش بيك هبلت؟
طلعت مسيكنة تلوج ع الخبز ياخي ربي دقها وجات عندي. سكتت وقتها اما باقي ما صدقتهاش حكاية الخبز. قارين بعضنا رانا. نعمل هكا بالشوية بالشوية، نلقى الكاس متاعها، ندخل نغسل فيه صوابعي بالسرقة :))
هيا مدت يدها بش تشرب، و خويا يفجع اختها اللي بحذاها، تقوم تصيح، بنت خالتي اللي بحذايا و بش تشرب، تكمل تتفجع تعملّي دوش باكا الكاس! ترصيلي كي الفلوس اللي طاح في صحنو.

ايا بلعنا اللي يتبلع ماكا العشاء السحاق -حاشى نعمة ربي-و قعدنا نمنيو في رواحنا بالديسار. ما نعرفش علاه ف اكا الظلام، لعب عليا الحول. بالحق مش تفدليكة، نحس في عينيا ولات كل وحدة تصب في عين و زيد م الفوق مرشوقة ف السماء. ثرنتها حاجة لا ارادية اكا المسيكنات اللي ما يراوش يرشقو عينيهم ف السقف. الحاسيلو قعدت نحاول نتخيل في منظري، قاعدة لابدة مكمشة، منفّخة، عينيا زاعزة الفوق و مبلحطة باكا الماكلة.
ايا شرّف سي الديسار، و اكا السرفور يشكر و يمجد قالك روسات اوريجينال لاعمركم ذقتو كيفها في حتى برّ. خويا من اكا الكلمتين تبرعلي بصحنو، قالي شميتها قارصة. ماكنتش م العاكسين قتلو هات. اما في عوض يمدهولي بالشوية عمل هكا دمغني بيه، هاو لتوا راسي مكنفر. اما مادام الحكاية فيها حلو، نسكت و نزيد نسكت.

شديت اكا المغرفة و بديت نلوج. ما فهمت شي كي العادة. سيدي النبي عربي، شمرت يديا و غطست. الديسار اللي لا قبلو لا بعدو طلع bavarois بالكلافز والشكلاطة، profiteroles لتوا لا عرفتها باش و قلاس بالقرفة. من اكا الخلوط بوجلوط مافما كان القلاس تتاكل. اما برا جرب كول قلاس بيديك، و هاه ايجا ابزق على قبري كان نجمت. ايا ماعادش فيها. ماكلة حموم ولموم، ظلام ادحس و الحوايج بدات تتلسق بالي طاح عليها. عيطنا للراجل بش يخرجنا.
بدا يشلوش و عجبتكمشي الماكلة؟ انا عجبتناشي؟ هايلة!
طلّعتوشي اش كليتو؟ الحق متع ربي لا اما انا شاكة في ماكلة كلاب...
ضحك وقالّي على كل هاو بش تخرجو تلقاو التصاور...

هوا قال تصاور و انا عينيا زغللت، الدمعة قد الفولة، قلت سايي، كان ما خذاو تصاور و احنا ف اكا الحالة المكربة و غدوة نلقاهم ع الفايسبوك. جيت بش نترمى عند ساقيه و نتشفع عندو، اما الحمدولله كمّل الجملة، طلعو تصاور متع اش كلينا مش تصاورنا نحنا... كل شي بسترة ربي و ماء الوجه محفوظ. اما ما يمنعش اللي خويا قالك الف و اعوذ بالله كان يخلص ووحل الفاتورة في راسي. و زاد شد الصحيح بش نعملو دورة في الشارع. نحنا نمشيو و العباد تتبسم. كي وصلت للدار فهمت علاه. وجهي بكلو مبلحط بالشكلاطة. زايد، لقيت شكون اشمت منّي.

و اخيرا و بعد طول انتظار....البوست الفلسفي الكبير

2009-04-04T11:09:00.001+01:00

الله غالب، نعرف اللي نهار الاحد وعدتكم ببوست فلسفي كبير، لكن لظروف خارجة عن ارادتي، انقطع البث. هاني بين هوا و فضاء، معلقة في سما ربي و في عوض نتلهى بحاجة تصلح ولا نرتّح فخار ربي، ندوّن و نكتب لعل يثمر فيكم ونربح من جرتكم حاجة. انشالله حتى دعيوة خير خاصة بعد فشل عمليتي الاحتيال و النصب اللي حبيت نعملهم لوّلا كان تتذكرو متمثلة في فتح راسمال البلوغ للاكتتاب العام و الثانية وقتها نكشف عن هويتي مقابل قازوزة بوات ولا حتى قهوة. المهم، هاو البوست كيما كان تكتب م اللول:

"الواحد وصل لعمر بدا يخمم ع الاخرة. قلت انا ديجا متاكدة طحت ف الروج من ذنوب التقطييع و الترييش برك، خلّي اش فما بونيسات. و لذلك لابد انو نلم اكبر عدد ممكن من دعاء الخير لعل ربي يغفر ؟ و بناء عليه قررت انّي حصريا و ع الهواء مباشرة، بش نكشفلكم كوارت النساء! بش نبدى نسمى و نصنف و الرجال تهز يديها للسماء و تدعيلي. اما الله غالب مش بش يثمر خاطر انا و بكل انانية عندي شوية زرارق نحب نبعثهم لاماليهم مقربطين بذخامة. ايا سيدي، شد ورقة و ستيلو و ابدا قيد عندك.

النوع الاول - المرا العادية:
بكل بساطة مرا وجها كيما قفاها، شفافة و صادقة و دنيتها بسيطة، حشامة. نقطة للسطر.
بديت بيها خاطرها نوع آخذ ف الانقراض هاذا اذا توجد اصلا! انا وحدة م الناس، عمري ف العمرلا ريت منهم. سمعت بيهم سمع من ناس بكري و اغلب الظن اللّي هيا من وحي الخيال، حاجة كيما الغول و العبيثة، يخوفو بيها البنات، بالله طفلة كيفما نهكا، مش تدمر سمعة النساء؟

النوع الثاني-الغكيكة (تقرأ الرقيقة):
النوع هذا عنا بزايد تبارك الله، صابة و الشي يتلاوح تحت الشجر حتى خمر. في كلمتين التبهنيس و النفاق.
البنية من هذوما، تلقاها مكهبة ع الثلاثين ولاّ حتى الاربعين و هيا تحب تقنعك اللي هيا مزالت طفلة بريئة و كل شي يسحرها و يأسرها، طيبة القلب بزايد و حنيّنة و دقة الشوكة تجرحها. ما تسمع كان "ياااااا"، "محلااااااها"، "بالحااااااق؟؟!!"، "سي با فرييييي". ديما تلقاها تحب الناس الكل و البوس و التلبيق و الـ gros bisous و الـ xo عامل مسدّ. لكن هي ف الواقع عقرب عمياء تسيب في سمّها من تحت لتحت تغير مش من اختها برك، من روحها كان تلقى. في كل تركينة تشد واحد تحكيلو كيفاه هيا مسيكنة الناس تستغل فيها و كيفاه اكا الاخرى بيها و عليها و صفتها و نعتها، اما ربي يهديها!
بالطبيعة رقة و انوثة تقطر، اما من نوع كثر م العسل.... خاطر تحسو مصطنع، قشرة، مش متاعها ولو تحل بطاقة التعريف توا تلقى اسمها البرنية مولودة في قرعة العطش (مع الاعتذار لاهل ها البلاد كاني اصلا موجودة). اللي يبهتني في ها النوع م الزواحف، مش الافعى في حد ذاتها، يا اخي كل واحد و عقارو كيفاه. اما اللي بالحق كان نلقى نشنقو من شوافر عينيه هوا الراجل اللي يحصللها و يتحملّها، خاصة و انو بالتجربة ها النوع ما يتلهوث كان ع الّي حنيّن و قلبو طيب، لعلا فيها حكمة و ربي يمقتو بيها بش يعوضو ف الآخرة؟

النوع الثالث- الطماعة بذخامة (وفي رواية اخرى الهنّادة)
هاذيا عاد الولاد يحكيولي عليها، مش انا بش نوريهم!
تلقاها لاباس عليها -ظاهريا ع الاقل- و هيا تطمع حتى في خنانة الكلب! كي الموس يلمع اما يقطع، تجزّ جزّان، الرحمة لا. و ف الدنيا هاذي، رغم اللّي انا دغفة في حكاية الفلوس و اللي يضحكلي نعطيه الحوايج اللي فوقي لكن ما نحبش التمسخير (اهوكا كنت بش نستعمل كلمة اخرى بعد قلت ناسنا ف الجنوب الاّ ما يبيحو دمّى)، نعطيك بكيفي ايه، لكن بش تخدم مخك عليا نحرقهولك. و بالرغم من هذا فما وحدة برك -لتوا نحس ف المرارة بش نقولها- غلّبت عليا و تفيسخت عليا مش مرة مش ثنين.
اساعة الطفلة هاذي سعودية و الواحد كي يرا اللبسة و القدة و الذخامة يقول هاذي تقرب لاليزابيت ملكة انقلتيرا مش حتى آل سعود. الشَّهّ الشَّهْ ع الثلاثة برتابلوات و الزوز برتاتيف و ستة فاليجات دبش متع شتاء وستة فاليجات دبش متع صيف. مرة كركرتني معاها بش تعمل شوبينغ، انا نسخايب شوبينغ بين بنات، لبست الدجين المجرتل و مريول الافريقي، ايبود و شلاكة بوصبع و هابطة. الطفلة تقولش عليها ماشية لحفلة توزيع الاوسكار. السطوش kelly من عند الحاج Hermes، المرايات شانيل و الروبة دولا رنتا. م الاخر انا بحذاها نظهر الخديمة متاعها بش نهزلها الشكاير و برا.

اساعة التاكسي طلع قرابة الثلاثين اورو، تلفتلي قاتلي نسيت ما جبدتش بالكارطة، اهوكا خلص توا مبعد نقسمو. هاو ليومنا هذا ها المبعد ماجاش. وصلنا للسنتر، من بين البوتيكات الكل، مامشات كان للـ haute couture. تدور و تختار و تقيس و تاخو في رايي. منهم سطوش شانيل منظرو كيما اكا اللي تشري دبوزة بميات يهديولك ساك بودينارين. قاتلي اش قولك فيه؟ قلتلها بف، عادي، خوذ و قيلني! (في قلبي ياخي انا اللي بش نتهرد فيه؟). وصلت للكاسة، درا شنوة بعولت مع المرا، بعدابتسمتلي ابتسامة عريضة و قاتلي امان مزال بابا ما بعثليش بقية الفلوس، هاو توا نخلص انا الشطر و انتي الشطر حتى لغدوة.

قلت في مخي قعدت على ها العشرين اورو، برا يجعلو لربي. قدمت للكاسة، خرجت الكارطة متاعي وكي ريت الـmontant ما نعرفش علاه جاتني التصويرة هاذي في مخي..حاجة كيما تبدا تعوم في بيسين، يحطولك كابل طول م الستاغ تتنطر تخرج تجري تتعدى عليك سومي رومورك تعفسك. الساك اللي حاقرتو و سخايبتو يهديوه كادو طلع سومو الف اورو! ماغير ما تنبرو، ماعنديش المبلغ هاذاكا وقتها و حتى كان عندي، مزلت ما هبلتش في مخي! اما هيا هيا و رصاتلي نخلص ف الفطور.

النوع الرابع- الفصيصة
النوع هاذا عنا منو بزايد زادة. زبرطعي مسيب. حتى م الخلايق الرجال يخافو منو. ما يكبر شي في عينها ولا في فمها. منهم مرة متعدية في حمام لنف، ريت حضبة ملمومة في كياس م الكياسات، بالطبيعة كيما اي تونسي وطني مديت وجهي. تطلع مرا كانت راكبة مع تاكسيست جنش، زقلعي، كي تراه نهار الاثنين الصباح، لنهار الجمعة مزلت تجري. المهم، المرا اللي قد الطابو و التاكسيست تعاركو خاطر كي راها تتكيف قالها مد معاك سيقارو، كانت تعقل. سمعتو ما يكره. اقلّ كلمة قالتهالو، لواه يصلحو الشلاغم كان النساء بش تولي تصرف ع الرجال؟ و بالطبيعة الصرصوط مزين بعطر الحديث. الراجل فد عليها، وقف الكرهبة و قالها اهبط. ما تكونش م العاكسين، تهبط، تدورلو، تحل عليه الباب تخرجو و تحطو عل الكبوط، هاذي تنفع هاذي تضر. الراجل خرجوه حكك طماطم معجونة من تحت يديها.

النوع الخامس-اللغدة
هذا اكثر نوع يفددني و يخرجني من حوايجي. خاطر الاخرين الكل، بالخايب اللي فيهم، و الله ع الاقل تحس اللي فما تواصل بشري، فما تكمبيس و زرارق عظم-عظم، فما ادرينالين تدور في بدنك، اما هاذي... السماح! غلّبت عليا!
لكزة بحذاك، تغزلها، تغزلك كي تستقوى على بدنها تكمل تضحكلك. اما الكلام، ما تخرجو منها كان بالقطارة. و نصيحة ماغير ما تحاول تحكي معاها، خاطرها عادة من نوع "اش بش نتلّم اش بش نتول... xxx؟؟"

النوع السادس- المتكلمانية المتواضعة
هاذي الطفلة اللي تنجم تقتلها ماغير ما تشعر. هِرْ ِهرْ هِرْ حتى مخك يتفولج، تروبهولك، و هيا الصلا ع النبي منين تدورها تدورلك. كورة تحكي، تنسيس تحكي، سياسة تحكي، دين تحكي، طب نووري تحكي... و النفس يادوب تاخذو.
هوا ديجا الهذرة بزايد صنعة خايبة، اما كي تولي معاها طرناطة تواضع، يولي ياسر ع الجحيش. و خاصة نحنا التوانسة عنا اسلوب متع زعمة زعمة ما تشلقش، اكا الحديث بالغمزان. تجي تقلك و الله البارح في دار سي عبد الله، سي عبد الله، تي سيييي عبدالله ، تي سي عبد الله وه! فما غيرو؟ كي تقلها بكلنا عباد الله، تضرب كف بكف و تشيخ عليك ضحك. ياخي ما تعرفش سي عبد الله درا شكونو؟ و الله لا سمعت بيه، اش يعمل؟ ف الاخر يطلع انسان عادي، لا فتح افريقية ولا استرجع الاندلس، يا اما رئيس شعبة، يا اما ولد بنت عم ولد خالة شخصية م البلاد.
المهم، البارح تطلع تعدات من قدام دار سي عبد الله و الكلب متع سي عبد الله نبح عليها رعبها. ياخي سي عبد الله ابقاه الله ذخرا للوطن، كش على كلبو وصار حوار بينها و بين سي عبد الله، و حسّتو كي اللي يحب ياخوها لولدو!

النوع السابع- عسل الدنيا
و اخيرا الشريحة الوحيدة اللي تنجم تحكي معاها. انسانة خبيثة بقدر، انثى بقدر، ضحاكة باقدار. الطفلة هاذي اخطر نوع خاطر طول تجيبك على قلاقمك، لا تفهم كيفاه لا وقتاه. هاني انا طفلة كيفي كيفهم و نبدا نتمعشق و ريقتي سايلة.
طفلة جويست و ف نفس الوقت مش تافهة. تدافع على روحها بلسيّنها زرارق تحت الحزام. عندها توش متع هبلة و تقربيع تخليك كل نهار تستنى اش من مغامرة بش تدخل فيها جرتها. ومع هبلتها، مسحة الانوثة و الرقيّ تحسها في غزرتها، تلفيتتها، ضحكتها، مشيتها..
مش بش نزيد نطول ف الوصف خاطر ماعادش بكري وزيد مثلي الاعلى ف النساء لازمني نعمللها سيري متع تدوينات بالذمة ليها.

ايا النهار راح و نعرف بلفتطكم اليوم، اما البوست كان قاعد على قلبي، يا من عاش للجاي. وبالطبيعة ماغير مانقول، تنجم تلقى طفلة وحدة تكور في برشا كاتيقوريات و اللي يجمع بيناتهم الكل، بما فيهم نوع عسل الدنيا، اللي لازمك في الـ toile de fond حاطط الخبث ف الدم كقاسم مشترك بيناتهم.

من ذكريات الطفولة

2009-03-28T16:07:00.000+01:00

و الله ما غير كذب و تفشليم، م اللول كنت ياسر نافحة علي حكاية الانونيما و الحكايات الهادفة. كنت نستخايب اللي مافماش علاه بش نكسرلكم ريوسكم بالهداري الفارغة. لكن بعد ها الثلاثة شهر تدوين، شفت اللي كيما عجبتكم الحكايات الهادفة، عملتو جو ع التخنتيب متع كل يوم. م اللول بهتت و من بعد عذرتكم. الواحد يبدى يعلم ربي بحالو و نهار كامل يشابط بش يهبط لقشة م السماء، مايصدق لربي يلقى حكاية فارغة يسرح فيها. كيف ما انا الحل الجذري لكل مشاكلي النفسية و الوجودية، هيا فيلم مصري بالابيض و الاكحل، ساعة و نصف فيهم اربعة غنايات و خمسة شطحات و ديما "بتحبني يا احمد؟" "بموت فيكي يا منى"... و الدنيا تولى بكلها فراشات و سعادة.

البارح اللي من اصدقائي ع الفايسبوك، تبعو النشرة الجوية متاعي البارح و اللي كانت مغيمة جدا وشعرة لا كملت بنزول بعض الدمعات. و في اخرة المطاف رصاتلي ملسقة بالكابسكوم. و قبل ما تبهتو اشنوة ها الاختراع، م اللول نقلكم اللّي هيا دبارة طبية من عند كلوفية. هاو اشنية الداقزة. عندي توا عامين تقريبا، كتفي اليمين ما عادش نجم نحركو و ساعات تكبس عليا وجيعة تحطني جمعة ف الفرش. وكي نبدا لاباس لاباس، تلقاني نتحرك بزوز ساقين و كتف برك. مشيت للطبيب، بعول بعول، عملّى تصاور و تحاليل و دنيا، لقى السبب المنطقي للوجيعة و اللي هوا تكسيرة قديمة اما ما لقاليش حل جذري. رصاتلي مسلمة امري لله، هاو مرة نسخنو بالسيشوار، هاو مرة مساج طبي، هاو مرسكية مع نساء كبار مطبطبين ف البيسين نعمل ف الـ gym medicale .

ايه عاد توا قداه من مرة كلوفية تجيني و تبدا تتفلسف عليا، هاو مرة جايبة مرا بش تقرالي عليها، هاو مرة بش تمسدني بلبخة الله اعلم اشنية هيا و انا نهار كامل نتهورب. اما البارح الحق، قاتلي ايا تبعني للفارماسي. مادام فيها فارماسي و كلام مبدئيا علمي، قلت ايا نتبعها. اساعة فلّتت الفارماسيات اللي عنا الكل و كركرتني لوحدة ملوحة ف طرف الخلا في حي شعبي و الفارماسيان لابس شاشية منسّلة و المنديلة كحلا فحم، و كمل لامم بحذاه شلة م القهوة يلعبو في طرح شيش بيش عندو ف الحانوت. معليناش، مادام الاختراع مقرطس، باقي عندي نية بش نحطو على لحمي. شراتلي نوع متع pansement كبير، مصور عليه اسد تقولش عليه اكا الدوايات المضروبة اللي جايبينها م الشنوة. و مكتوب عليه "لصقة الاسد بالكابسكوم"! هذاكا اش ريت م الباكو، خاطر طول دخلتني وين يزرقو، هبطت الريدو و طول لا بالك لا وسع دمغتني باكا اللصقة اللي مطلية بحاجة حمرا تقولش عليها هريسة. م اللول ماحسيت بشي، روحت للدار، عملت قهوة و جيت بش نقرا لعلا ربي يثمر فيا. بعد نحس ف سخانة بدات تنتشر فاكا البلاصة و عاملة عليها جو. بالشوية بالشوية، وليت تقولش عليا مكبشة فيا كعبة حرّيقة ف عز اوسّو. نار موقدة تشوي فيا و الشي عمال يزيد. حبيت نحيها ما حبتش، لصقت غادي كي الجلد انا نجبد و الحرّيقة تزيد تكبش. ماني م النوع الـ altruiste و مانحبش نستمتع وحدي، درت على دارنا الكل، اللي هذا نقنع فيه اللي عندو برد ولا وجيعة في ركبتو، في مرفقو و نلصق فيه بالسيف، ههههه.

عمال الشي يقوى ، مشيت نجري لشكارة الفارماسي، ماو جايبتلي بالزايد، جبدت باكو اخر و قعدت نقرا. اساعة قالك اللبخة هاذي يحبلها نهارين بش تنحيها. و استنا عاد، باش تنحيها؟ ايا طلع تربح؟ لا مش بالماء السخون، لا مش بالبخار، لا مش تقلّعها هيا و الجلدة...... بالقااااااااااااز!!!
مش بش نكذب عليكم و نقلكم وع و بع و خيت، و انا انسانة قننو برشا ولا عمري جا عليا طرف قاز. اما تذكرت حكاية النهار اللي رصاتلي مدوشة بكلي بالقاز، وهوا شوف الصدف، نهارت اللي كسّرت كتفي. و مادام ها النهارين متحيرة عليا ذكريات الطفولة، قلت ايا سيدي خ نوسعلكم بالكم و نحكيلكم الحكاية م اولها. خاطر توا كي كبرت استوعبت المآسي اللّي صارت نهارتها.

عامتها صيفية اللي بش ندخل للمكتب، مزلت كي عملت ستة سنين (واهوكا من توا عيد ميلادي ف جويلية، لا تقولولي نسينا لا ماعملناش حسابنا لا شي، من توا خبي للكادو)، و كنت عفريت مسيب. مانعرفش علاه، اما يمكن خاطر خويا الوحيد ربي يفضلهولي مزال كي تولد، و ولاد الحومة اللي في عمري بكلهم ولاد، و حتى م العايلة ماعندي كان ولد خالتي انا و ياه فرد عمر. المهم، المحيط متاعي بكلو ولاد و كانو يغزرولي بمحقرانية شوية خاطر طفلة، ياخي وليت الباربو فيهم بش نثبت وجودي. انا الراس المدبر متع العمليات الشريرة، كان فما عركة انا نمد وجهي و نحامي عليهم، كان فما غارة على حومة اخرى، انا راس الحربة، مشية للخربة القديمة حتى في نصف الليل، مانمشي كان انا.
ايه عاد صيفيتها، استنفذنا الالعاب الكل، تلفتت يمين يسار، اش خطرلي؟ نعملو زعمة زعمة قبيلة الهنود الحمر، و نبنيو des tipis كيما اللي يعديوهم ف الكوميك. الولاد الكل فرحو و هيييي اما باش بش نبنيوهم؟ غزرت هكا، في جردة دار جدي عنا ثلاثة ولا اربعة نخلات. اما النخل وينك، طويل و احنا السلّوم فينا ميترو غير ربع. فما نخلة منهم، قريبة برشا لفيراندا متع دار خالي، اللي ف الطابق لوّل. بالطبيعة مخ الولاد الصغار مهما تتخيلو، و مهما تحطاطو، راهو ديما يصدموكم بالخيال متاعهم، خاطر ما يقيسوش المخاطر.

ايا سيدي، اش خطرلي وقتها؟ انو نطلع لدار خالي، متهنية عليه مقيل عاد و الدنيا صيف، نمشيو للفيراندا، نمدو يدينا، نشد طرف السعفة بالقدا و نرمي روحي م الطابق لوّل، نجي ف القاعة انا و السعفة و الطيحة اهيكا amortie من جيهة بالسعفة و من جيهة نجي ف التراب. و كذلك كان! عملتها خمسة ستة مرات بش تشجعو الولاد بعدي، ولينا طرزانات غادي، نشدو السعف، نصيحو و نرميو رواحنا. السعف القريب للفيراندا وفا، بكلو ولّى ف القاعة، عملت هكا تشعبطت فوق دربوز الفيراندا، مديت يدي للسعفة البعيدة شوية، على دخلة خالي قام م الصياح و شاف الجمهروش اللي دخلتهولو م الحومة، من ولد جارنا لولد الصنهاجي. يعزق فينا صيحة تقيم الميت م القبر و زاد شعرة لا طاح داخ كي راني بين هوا و فضا على حرف الدربوز. انا في مخي بين نرمي روحي و بين نجي بين يدين خالي، الاختيار ماكانش صعيب برشا، واحد ثنين، و شادة السعفة بيد برك و نترمى. نهبط انا و اياها مزروعين كي راس اللفت. بحرارة الموقف، ما حسيت بشي، ريت الجماعة ياكلو ف طريحة الفوق، عطيت على ساقيا و هربت للبحر، تي زوز انهجة. نحس في يدي ثقيلة و مانجمش نحركها (وقتها الكتف بكلو تخلع، خرج من بلاصتو اما باقي مش حاسة بشي) اما نجري و نتكربص، قعدت ع السور اللي على حرف الكرنيش نستنا ف البقية بش ياكلو ما كتبلهم و يخلطو.

انا هكاكة قاعدة، نرا في كلب صغير اكحل يجري ع الرمل. عينيا حوالت، وقتها بال و سيباستيان عامل مسد ف البلاد و يا سعد من حاز حتي كلب عربي مجراب. عطيت على ساقيا نجري خالطة ع الكلب، هوا يجري و انا نجري، ماعاد نرا في شي كان اكا الكلب. ماغير مانفطن، دخلت في ماتش متع كورة ع الشط و ماكم تعرفو قداه ولاد البونليو حنينين و فينو، مانفطن بروحي كان دخلت بين برشا ساقين و طاحت عليا جهامة، بلانكو على حالو. كي ما تدفنتش نهارتها ف الرمل و تقطع عليا النفس، باقي باهي. المهم، جاو الرجال قيمو الراجل و طبسو عليا بش يشوفو النفس مزال ولا لا. عنينيا و فمي مسكرين بالرمل و انا الكلمة الوحيدة "الكلب الكلب". الراجل سخايبني نسبّ فيه، عمل هكا خضني خضة باهية من كتفي. ما تسمع كان الصيحة واااك. (بعد عرفت اللي الـ clavicule تكسرت ف اكا الطيحة).
ولاوش يرضيو فيا؟ و كي فهمو الحكاية، ما ترى كان فيلق متع جنشات يجري ورا كلب ما يعملش عشرين صانتي، جابوهولي مقربط، حتى م الحبل لقطوه م الشط و حطوهولي في يدي بش نسيت الوجيعة و سكتت.

ايا سيدي، مروحة للدار نتقزدر انا و اكا الكلب شادتو بطرف سباولو، قول عندي ما عند حد، ماشية بش نحمص الولاد. عشية كاملة ما سيبتوش من يدي. وليتش اليد اليمين مانحركهاش و اليد اليسار شادة الكلب؟ الولاد يجبدو وانا نجبد شعرة لا خنقناه. درا كيفاه، فما اسطلة متع دهن حاطنيهم في تركينة م الجردة خاطر قاعدين يبيضو عامتها، عثرنا فيهم، تبزع الدهن ونسينا كل شي تلهينا نصورو بيه ع الحيوط و الشجر و على ظهورات بعضنا. على خلطة خالي اللي كان يلوج عليا متحلف فيا. كركرونا بكلنا بحذا الكاوتشو، غسلو غسلو، شي، الدهن ماحبش يتنحى. شدونا فرطاس فرطاس يفركو فينا بالقاز و نحنا نتشوشطو و هوما مستحلين فينا. ايه كي جا دوري انا و الكلب خاطر لوقتها ما سيبتوش، وهوما يغسلولي، مانجمش نحرك يدي و خايفة لا نقول وك لا ترصيلي في بحث و كيفاه ووقتاه و توفى بطريحة.
نانا الله يرحمها كانت فرملية، طول عرفتها، قالت لامي تي هاي كتفها مخلوع هاذي، اجريو بيها للسبيطار.

انا كي اللي حسيت اللي الوضعية غير عادية، و كتفي يشوي فيا، اما مخي و همي الوحيد اني ما نخليش الكلب ف الدار خاطر بش ياخذوهولي الولاد. امي تجبد و انا نجبد و نصيح. مكبشة فيه لا حبيت نسيبو. و زيد حسيت الوضعية غير عادية و الجماعة خايفة عليا، استغليت الموقف. ما مشيت للسبيطار كان مشنقلة اكا الكلب، ما سيبتو كان كي دخلت للطبيب، بعد ما ربطو ف الكرسي و حلّفتهم عليه بش ما يسيبوهش. الطبيب بدا يبعول وعملّي تصاور. طلع عندي كسر ف الـ clavicule و كتف مخلوع. م القايلة شادة روحي لا بكيت لا شي خايفة لا الولاد يقولو عليا طفلة وضعيفة. اما غادي لا جمهور لا شي، و تلم عليا الكسر و الوجيعة و ريحة القاز. نجي في حجر الطبيب و نعمل بععععع. رديت عليه هههههه. هاني لتوا شايخة عليه.

اي اكاهو عاد، عملولي ربطة كبسوني بيها، حرابش و جو، منعو عليا اللعب و البحر. عديت بقية الصيف قريد العش المدلل، انا و اكا الكلب في حجري، نشربو التاي و نوكل فيه ف البندق. يا فرحة ما تمت، اكا الكلب مات ، من نهارتها لتوا ما نتذكرش بكيت بكية كيما هكاكة. اما من وقتها حلفت ع الكلاب.

باڤات... قعدة حبيبات

2009-03-27T10:00:00.001+01:00

الميترو مزال ما وقفش ف المحطة و الضايع هبط مارش و عطى على ساقيه، يجري و يتدعثر ف الحصحاص متع السكة شعرة لا بلع سنيه في طيحة م الطيحات. شد ثنية دارو و هوا يتسرسب كي وزغة الحيوط ، خايف لا يراه حد من ولاد الحومة و يكبش فيه و هوا ربي يعلم بحالو ع الغبينة اللّى صارت فيه. وصل للدار، دخل كي السارق بش ما يفطن بيه حد م الوليدات اللي كارين معاه، حتى الضو ما شعلوش خاف لا تفطن بيه العطراء، الطفلة اللّي شباكها في مبيت الطالبات يحل على شباكو و هوا عندو عام توا يتراسل معاها بالاشارات الضوئية، م التشعيل و التسكير حرق درا قداه من امبوبة لاممهم تحت فرشو، و ناوي يهديهملها نهارت اللّي يعرسو بش يتذكرو مغامراتهم العشقية هاذي.

حط راسو بين يديه و بدا يدوّح في راسو و الغصة خانقتو، قالولو صحابو فك عليك، نبهوه، اما شي، الشيطان يلعنو و يخزيه. اهوكا رصاتلو توا في حل و اربط. مش كان لاباس عليه ، متخرج و بطال قاعد ف امان ربي، يستنا في التاليفون ينوقز بش يقولو ايجا نقلبوك و نعاينوك لعلا نرضاو عليك و نخدموك عنّا باخ تف؟ و سرح بمخو ف النهار الّي كلّم صديقتو بنت عايلة زعمة زعمة بش يستشيرها في موضوع هام، اما ف الواقع هوا خمم و قاس، و نوى. اما قال نكلمها لعلا نهنّد عليها في فطور و قازوزة بوقا سيدر، ماو يعرفها دغفة و ع الحس تقسم الباي، وين تسمع فما حكاية و تنسنيسة تبيع جرودها و تجي تجري.

نهارتها هزو بعضهم و مشاو للحطاب اللي ف البساج، شدو ربع طاولة مسخة، زوز صحافي ملقشة و الفرازط تجري بين ساقيهم، وهوما ياكلو و يتبننو ف اللبلابي. بعد ما كلاو و تهناو، تلفتلها و قاللها:
- نويت بش نعمل نشاط هادف، قررت مادام جات ها الخدمة المحنونة، يا ندخل ف الجمعية التونسية لحقوق الانسان، LTDH بالعربي، ولا ننظم لحزب معارض!
- اسكت يعطك مسكت، هبلت ولاّ بعقلك؟ اشبيك عمال تكبر عمال تخرف؟ لعب النوفي ف داموس السيدة اثرلك على مخك. فك عليك، كان تحب تخدم و تلم ساقيك تاخو العطراء، برا دخّل روحك في شعبة ولا تطوع تخدم مشّاشو للعمدة، لعلا يتوسطلك عند شريكة م الشركات ف المنطقة الصناعية، ما تحقروش اكا الطابو.
- اش من عمدة و اش من خدمة، انا فديت، الى متى كي الزير المتكي؟ و شوف اكا الشهرية الهايلة اللي بش يعطيوهالي! كان بش نعمل عليهم، ما ناخوها كان ع الكروسة المغبونة. تي اكا النهار حرت في كيلو برقدان صاقسلي اشتهاتو و نحنا نحوسو في باب الفلّة. خلّي عاد بش نزهز دار.
- معناها زايد الكلام؟
- زايد الكلام!
-ربي يهديك و يرحم ايام صحبتنا.

وقت اللي وصل بذكرياتو لها النقطة، ماعادش ينجم، حط مخ راسو بالبكا. ما فاق علي روحو كان وجوه الفجر و الامام يأذن ف الصمعة. غزر لمنقالتو، لقاها الخمسة متع الصباح. زعمة لقاو الجثة؟ ايه وه، حتى كان مزالو، ماعادش يبطاو، نهج محمد علي عليه الحركة م الفجر. ربي يستر ما طاح منّو شي يشلق بيه. الدنيا كان ما تقوم و تقعد. اش لزو يشد ف الباس مع البوليس بش يتعدى بالسيف؟ قالك حق الانخراط ف الاحزاب السياسية مكفول ف الدستور، يحرق النهار اللّي قالولو فيه عندك حق لا يحقلو حق.
هوا لتوا لا فاهم اش صار بالقدا. متعدي ف الليل من باب بحر قال يخطف ساقو يعمل طلة على مقر الحزب اللي داغرينو ف اكا الخنسولة يلقاش وريقة ع الباب يقولو فيها وقتاه يحلو و اشنوة يجيب معاه وريقات بش يسجل عندهم. ماهوش مستانس بها الشي، حدو حد نادي المسرح وقت اللّى كان يقرا ف الليسي.

مزال كي حط ساقو ف النهج، طلعلو راجل طول بعرض، لابس دنقري ازرق فوقو جاكيت جلد مذرح، درا شنوة يخشخش تحتو. جاه، السلام السلام، عندكشي بريكية خويا لعزيز؟ شتعمل لهنا؟ ما تعرفش النهج هاذا متع عباد تعمل ف المشاكل و ما تحبش تعيش بقدرها ف ها البلاد؟ برا خويا، انتي ظاهر وجهك ضاوي و مش متع تمرميد، ارجع منين جيت و تعدا ع الحبيب بورقيبة .
بكل تربية و تهذيب، الضايع قالو،
-لا راهو حبيت ننخرط ف الحزب وجيت بش نشوف اشنوة الاوراق المطلوبة.
-تنخرط؟ برا خير ما نخرطك ها الليلة الزقحا، ايا تجبّد من قدامي..
- اه صارة انتي حنش م الحنوشة؟ (مزال كي قال الكلمة وفطن اللي هوا زلقت منو، عمل هكا غطا فمو و بدا يلوج على ثنية للفصعة)
-حنش اللي يبلعك، ايا هاي خبزتنا جات، الا ما نعديو بيك الليلة.

الضايع تبهذل، عمل هكا غدرو و ضربو ضربة خاطية و هرب مابين يديه، الراجل باقي شادد جرتو و ما يفطن بيه كان خرطفو من كبوتو. ماغير ما يشعر الضايع، البريكية مازالت في يدو، يدور و يشعلها في وجه الحنش، تخطف النار في حاجبو، الراجل يسيبو و يتدهشر، يتدعثر في حفرة ف الكياس و يجي راسو على حرف المادّة، يتزرع كي راس البصل.
الضايع يقربلو بالشوية، باقي مش عاطي الامان، يعيطلو، ياسي الحنش، يا خويا، تسمع فيا؟ لا حياة لمن تنادي. يحركلو راسو، يلقى خيط دم هابط م الجبهة. هبل، ما را روحو كان يعطي على ساقيه و هارب ف النهج. وصل لنهج روما، لصق الحيط و بيّت الحس، تقولش عليه واحد عادي مروح. اول ميترو لقاه، ركب فيه و هوا بكلو يرعش و العرق هابط يسلت. حتى وصل للدار.

النهار طلع و الضايع مزال ماغمضش. زعمة مات؟ زعمة لا؟ زعمة يعرفو مولي العملة و ينجمو يوصلولو؟ هاذي مش سرقة ولا جريمة عادية بش يتمرخاو فيها البوليسية. الضحية مش مواطن عادي م الشعب، الضحية زميل و ظاهر م الصحاح مدام خصصوه بش يعس علّى يتعدا من بحذا الحزب. هوا ليلة برك ف ها الشك شعرة لا هبلتو، مزال بش يزيد يقعد؟ حلهّا يهج! اش مزال عندو يعمل ف ها البلاد؟ القراية و كملها، الخدمة و عارفها مسكرة مسكرة، هاو حتى طرف العمل السياسي اللّى حب يدخل فيه طلعت جرايرو نحسة وكان ما يعدي بقية عمرو يحسب ف الفيران ف برج الرومي. اما كيفاه يهج؟ كان تحلّو باب العرش و خذا الفيزا، كان ما يشدوه ف المطار!

هوا هكاكة يضرب اخماسو ف اسداسو، قال ما يحلوهالي كان صحابي. نعرفهم كل شي ممنوع و خارج ع القانون يدخلو فيه خشوماتهم. ع الصباح قبل الطالب و خوه، صبح تلفن للمتنبيّة، نسبة للمتنبي، طفلة هايلة خدومة و متواضعة جدا. و الكنية متع المتنبية جاية من كونها تحب المتنبي برشا، و زيد هيا بيديها عندها ما تقول بروحها ف الشعر، اما ما تكتب كان الشعر الفخري، الكعك اللي ما يطير جوع كيما الغزل و درا شنوة ماتدورش بيه. كلمها، من حينها تعدات هزتو وهو متلثم لابس مرايات شمس، و يرعش بكلو. ما حب يقوللها شي، حتي يوصلو يهدو على بنت عايلة ف الدار. ماكا العام عرفوها التلفون عاملتو بش تعرف شكون تذكرها و طلبها م اللّول كانو يعذروها يقولو لازم مشغوبة، لازم عندها ما تعمل، اما زايد، كثرت م العسّول حتى مساط. هدو عليها، من راس النهج تسمع الشخير متاعها، نص ساعة و هوما يفارعو فيها حتي قامت. كل عين طايرة في جيهة و الشعر قفة قطاطس.

كي العادة فرحت بيهم وطول فاحت فيهم، ماو لباس اش فما، علاه جايين، وقتاه ربي يتوب عليا منكم؟ ماو المتنبية مستانسة بيها، رماتلها حويجة في فمها تاكلها بش تسكت و تلفتت للضايع و قاتلو :
- ايا عاد ها الصباح الواحد مضيع مصالحو و مشاغلو و جاي يجري، اش من مصيبة عملت زادة؟
- قتلت بوليس!
- ناري على وخي! نعرفك اساعة طفل عاقل خاطيك الحرابش و الشراب، تطلعشي هاذي سكرة الحب اللي غنى عليها نور مهنى؟
- يا بنتي نحكي بالرسمي، هاو اش صار...
حكالهم الحكاية م اولها. كانك على المتنبية ، كي عادتها ف المواقف الحرجة، بهّمت، و كانك على بنت عايلة قامت تندب. و هاه كان عرّست مادامني مصوحبتكم، و هاه كان زغرتو عليا نهار ف جرتكم. اش كون بش ياخو وحدة تدور مع فار حبوسات؟
- تي هاذاكا علاه لمّيتكم اليوم، نحب نهج م البلاد. اما بطريقة غير شرعية... نحب نحرق!

بنت عايلة انبوبة شعلت ف دهاليز مخها، تذكرت اللّي ملّي دخلت ف مجتمع البلوقوسفار، تعرفت على برشا ناس و تكشّفت على برشا حاجات. هنات الضايع و قاتلو ماعندك كان الرجال. نعرف واحد بنزرتي ولد حلال اختصاصو الحرقة، اما مش اللي يجي، حرقة متع انسان تقي و يخاف ربي. مكون جمعية احباء لمبادوزا الفاضلة، نهار نهارين و هوا يلم فيهم م الفايسبوك ويقلهم ايجا نحللكم باب الجنة و يجعلو لله.
الجماعة ماكانوش م العاكسين، رماو الضايع في مال الكرهبة و عملو عولة سندويتشات باسكالوب القطا و المايونيز، حكة بسيسة بالزيت و شدو الثنية. دوب ما وصلو لبنزرت مشاو يلوجو على بوبلينات. اتصلو بالشيخ تيتوف رئيس جمعية احباء لمبادوزا الفاضلة اللي عطاهم موعد بحذا البصيري. مادام جا، كمّلو عملو كسكروتات لبلابي من عند زرقا، الضايع قادم على رحلة و لازم يعشعشوه.

جا سي تيتوف ع الموعد، الراجل مُحَرِّقْ محترف و عندو كلمة ف الميدان. كي العادة لابس كلسيتة ولا كولون اكحل على وجهو بش ما يعرفو حد. كي حكاولو الحكاية من اولها، سكت، خمّم خمم، و مبعد قاللهم الحكاية هاذي تجاوزت اختصاصي، هاذي لازمها مُحَرِّق مختص. انا حدّي حد البطالة، الباربوات، الهجالة، العانس. اما المجرمة ولاّ جماعة الرأي هاذوكم لازمهم الراس الكبير. تسخايبوهاش الدنيا سايبة؟ رانا ناس منظمين. و سي الضايع ما تمنعو م المشنقة كان ولاّدة!
المتنبية ماطاقت صبر، قاتلو:
- ولاّدة؟ اش من ولاّدة ياخي جبنالك مرا حبلى نحنا؟
- لا لا، الراس الكبيرة ف الحرقة، مرا فاضلة مسمينها ولاّدة. ماو الّي يحرق على يديها يتولد من جديد و يتكبلو عمر سعيد. تي قداه من حاكم و بوليس يفدو م البلاد، يجيوها هيا بالذمة بش تحرقهم. ايجاو معايا نوصلو لاكا السربوحة الّي على شط الناظور، مقرها الرسمي غادي.
- وعندها مقر رسمي زادة؟ شوف آ سيدي!
- امالا، مرا عندها مبدأ، قبل ما تحرّق العباد لازم تعمللهم فورماسيون، تنوش، شوية قانون على عومان على طليان. ياخي حرّق وارمي ف البحر؟ مع ولاّدة الحرقة جودة و ضمان!

سلّمنا امرنا لله و شدينا جرتو، نتشعبطو ف الحجر و الحشيش مرة على مرة يزلقو شعرة لا يتكركبو ف الحنديرة يجيو طرف ما يرى خوه، خاصة اكا بنت عايلة، قاتلك ما تتخلاش ع الـ class attitude و جاية تتقزدر بصباط طالون، و الرسمي معقدة من طولها النعناعي ولو تلقى الا ما ترقد بيه اكا الصباط. المهم وصلو للخنسولة اللي ف الجبل، على مرتين بش يهزو التاليفون يبلغو على مقر بن لادن، المغارة فيها ارديناتور و خرايط و GPS و ناس تشاتي وناس تسكايبي. سألو ع الحاجة ولادة، قالولهم للاسف، ما خلتطوش عليها راهي مزالت كي شدت البحر عندها deplacement ف المغرب بش تحل فرع غادي، بين المغرب و اسبانيا في اطار وحدة حرّاقة المغرب العربي.

الضايع باقي شادد الصحيح بش يحرق، قالك لو لزم نمشي لاي منظم اخر. الكل لهبو فيه قالولو بايع عمرك؟ البارح برك جماعة شدوهم بالكمشة، و غرق بيهم الباتو. الدنيا تقلبت، بوليسة و حماية مدنية شعرة لا كملو هبطولهم قوات حفظ السلام الاممية. شد ارديناتور م الارديناتورات و هاك ساكن معانا، ولادة مغارتها محلولة للناس الكل. و اهوكا كان فديت و فديت و بطات عليك، حل بلوغ!