يحرزلكم مشدودة في كولوار م الكولوارات نستنى في رحمة رئيس ادارة م الادارات، ماكانش ما تفرحوش بتدوينة.. بعد اللي وليت منعوتة بالصبع و جماعة تحب تنتزعلي المدونة و تنسبها لناس اخرين. يا نهارت اللي نحل الباب نلقى عدل منفذ يحجز عليها و نخرج انا بيدي على راسي. و بالله مدام صرفت صرفت و حليت ها القوسين، تعملو مزية اللي يسمع باشاعة عليا -مهما كانت غريبة و مهولة- اهوكا يصدّقها من غادي لغادي و مش لازم يجيني يجري بش يعلمني و يتناقش معايا و يكمل يهبطني نطسكك بالغزول، الميت و خسارة الكفن ياسر ع الجحيّش.

كيما كل جمعة كلات بعضها و خذيت نصيبي م التسخسيخ. هوا كي تجي تشوف، كل نهار جمعة نعرف بالمسبق اللّي عندي طاروح يستنى فيا في الدار. و قداه من مرة نخرج شانعة بفاليجتي طالبة اللجوء السياسي عند الاقارب. الحكاية و مافيها انو نجاوب الجواب الخطأ على اكا السؤال المحنون متع "ياخي هذا قانوني؟"... و نجي بطولي النعناعي و ناقف في وجه امي و نتجرأ و نقلّها اللي هي غالطة و اللي "اعدائها" على صواب!
ملاّ فصاصة في جيل توا و اكاهو!
واحد يقول شنوة ها السر انو ما تهبط ريش انت و امك كان نهار جمعة؟ حتى م البركة تطير. اي اما المشكلة انو العركة تصير بسبة صلاة الجمعة! امي ياسيدي تفد و تطير و تطيّر م العباد و خاصة الجيران، اللي تجي توقف كراهبها قدام الدار و على شعرة بش تكمل تغرقني في البحر كي نقلها اللي هوما عندهم الحق.
اما يمشيش في مخكم اللي امي مرا ما تقدرش الجورة و ما تتعاشرش واللي كان ناوي يجي يخطب يبطل و يقلك السماح من حماة كيف مانهكا. و الله لا، امي خيار الناس، انا وحدة م الناس نغير منها كي صحابي يجيو بالذمة بش يعشيو بحذاها و يطفيوني انا. تي شد تبع الجُرّة م اللول...

امي ماكا الناس المغرومين ياسر بالشجر و الخضار ومانعة علينا نقصو عرف ولا نحيو ورقة. دارنا في الصيف تولي ادغال افريقيا على حالها و قداه من مرّة نرجع مشلطة من وردة ولا عيني تتعور من عود شجرة. وحتى كان الشجر سرح على باب الدار و غطاه، ما يتمدش عليه مقص ولا يتمس. اللي عينو بدخول الدار اهوكا ينقز م السور، يحفر تحت القاعة، امورو. الشجر لا!
في نهج دارنا مافما كان نحن قدام دارنا اربعة شجرات كبار يعملو الكيف، يضللو في الصيف و يمرمدولك الدنيا في الشتاء. حومة كاملة، يا رسول الله مافيها كان اكا الاربعة شجرات، الباقي لا حجرة لا حتى قصدرية زبلة وفي الصيف الواحد مايوصل م المرشي للدار كان بقناع الاكسيجين.

امي، مرا على نياتها برشا، و تؤمن بفكرة نحن في خندق واحد و بالتالي مصلحتنا وحدة و تحب الصالح العام و الخير للجميع. توخر، تقدم، اش يظهرلها بش تعمل؟؟؟ تمشي للحيط اللي مقابلنا و تعمل عملة كي البصل! تزرع شجرات بفلوسها في ملك الحاكم! هكاكا لله في سبيل الله! باللي حاولت نقنعها شي، و لزّمت عليا نهار بعد نهار نخرج كاوتشو و نمشي نسقيهم زادة! يا بنتي اخطاك، تحبنا نتطردو م الحومة ولاّ ينحيولنا الجنسية و نقعدو نطلفحو؟ شي النافع ربي كيكست و حطت اليك في اليك.

رصاتليشي في اعقاب الليالي نبدا نتسلوس م الحيط للحيط و نبدى خايفة لا نتشد نسقي في شجر الكياس و نوليو منعوتين بالصبع! هيا هيا و فاحت الحكاية اش قالك و اش قال عليك، دار بنت عايلة يحبو يحوزو ملك الحاكم باربعة شجرات كلاتوس. و اش يفضها عاد! الجيران يتشكاو و تقارير مجهولة المصدر للبلدية و انقذونا من الاستيطان اللاشرعي. ما تفضت الحكاية كان ما جار ناس ملاح سيب على الشجرات كبش و ثلاثة معيز جابوهم هباء منثورا.

لحد هنا واحد يقول دفع الله ماكان اعظم و نرجعو للحالة الى ماكنت عليه و ياناس ماكان باس! اما للاسف الجيران ولّى عندهم حذر مبالغ فيه من العمليات التوسعية متاعنا. كل ما شجرة تكبر شوية و تِسْتاسِعْ على حساب دار الجيران يجيو يتجاراو و قص عليا شجرتك تهبطلي في الاوراق. اماقصها ماغير ما تهبط حتى عرف في داري ولا قدامها. و امي كي الناس الملاح سامحوني سامحوني و تبعث شكون يقوم بالعاب بهلوانية فوق الصرافة شعرة لا كلا راسو بش قص الزايد ماغير ما تعدى الحدود الدولية اللي فرضوها علينا الجيران.

باقي الواحد يقول يا اخي عندهم الحق، ماهم الا في ديارهم و انت سيادتك مسيب الاشجار الغاشمة متاعك تعيث في الارض فسادا. و من حقو بش شجرة الياسمين ما تفسدلوش منظر السيمان و قصدرية الزبلة اللي تحل عليه كوجينتو.
اما صارتلنا غريبة لا كانت لا عل البال ولا عل الخاطر! مرّة قاعدين نقطعو و نريشو في امان ربي، ينوقز الباب، تطلع جارتنا المقابلة جاية ووجها مقلوب و سحنتها زرقاء تبشر بمشكل و عركة. ايا سيدي زارنا النبي، زارتنا البركة، ضيفناها، فرحنا بيها، استنيناها حتى ضربت شطر باكو بقلاوة بش حلّت فمها و نوّرتنا بالاطلاع على سبب الزيارة. قالك يا سيدي، هي دارها اللي على ثالث طاق، عيني ما تضر، ما تراش منها البحر خاطرها ورا دارنا (اللي طاق واحد في نطاق احترام الملك العمومي البحري)، و هذايا الكل علاه؟ خاطر الشجر ياسر عالي، و لذلك، لطفا، رجاء نقصو منو!

الوالدة في نطاق حب الجورة و النبي وصى على سابع جار، تجيب راجل و قاتلو بالله نقص شوية، هوا يقص و هي تهبط فيهم حيار. نقصت يجي زوز ميترو ولا ميترو و نص قبل لا نهزها اسعاف بانهيار عصبي. كمّل الراجل، امي مسحت اكا الدميعات و هزت رويحتها للجارة تبشّر فيها ايا لِلّا اهوكا خذيت بخاطرك و نقصت و انشاء الله توا تنجم تشوف البحر م السطحة متاعك و تعمل قهوتك بكيف.

-المرا طلّت م السطحة قالتها : اه، يعني. انت صرفت صرفت بالله كمل قلع اكا الشجرتين ثلاثة ويعطيك الصحة.
-امي قالتها سامحني ما نجمش! الشجر حبتلو عشرين عام بش يطلع نجي نحيه؟ علاه؟؟ حتى م الحرام حرام.
-الجارة تتفرعن و تقلّها بش نشكي بيك للمحكمة و بش و بش !! نحيه بالرضا خير ما تنحيه بالغصب.
فجاة اكا النور على وجه امي طار و الحِلْم متاعها ضاع ، كشرت عن انيابها و تسيّب الغنضفر اللّي كامن فيها. و صبحت من غدوة تَرّستها بالشجر و النباتات المتسلقة و تجندت صيفية كاملة تغذي فيهم بجميع الاسمدة حتى الدار ماعادش تترى و كان لقات راهي عاودت لصّقت اكا المقصوص.

توا بها اللي صار من مشاكل الكل، بصراحة عندها الحق امي كي تهبل و تخرج من عقلها كي يصيّف الصيف ولا كي في صلاة الجمعة تسخن القايلة يجيو يحطو كراهبهم في ظل الشجرات اللي قدام الدار و يكملو يسكرو علينا باب القراج، يخليونا نتغصورو في الشموس و البقالي. لا و الغلبة وين؟ نزيد نطلعلها انا و نقلها قانوني!

كتبتها:bent 3ayla على الساعة: 12:16 ص

تعليق لخضر الخضار ...

قالوا قانوني!!!!اوقف مع امك يا طفلة بلا ترهدين هههههه
احنا الي يقولك سوق كراهب قدم دارنا هوكا ساديبون انتي والكرهبة كان نظيفة
وعربية اخر موديل نورمال نخليها زينة ونفرح بمولاها كان لقيت كركاسة متاع 500
دينار نفد ونلعبها محلي وتشويه منظر المدينة
اما بيني وبينك ربي يوفق الي بش يناسبك امك دونجري واون بليس طلعت كادرا في
حزب الخضر

6 يونيو، 2009 6:25 ص

تعليق bent 3ayla ...

اي شبيه حتى انا خممت نشد دبوس و نفرش كرضونة قدام الدار، و نكمل نستقات بها الشجرتين، البلاصة بدينار

6 يونيو، 2009 10:04 ص

تعليق غير معرف ...

apparement 3rafet darkom feen
ba7tha jame3
ta9 we7ed
fi ezzahra
ba7theha 4 sajrat
ba7tha leb7ar

haya hani jeykom
(((((:

6 يونيو، 2009 12:06 م

تعليق anonyme17 ...

عندها ألف حق الشجر ما يتمسش ...نموت على العباد الي كيف أمك ...أنا نهار شعرة لا قتلت جارنا اللي تعداولو عريفات من شجرة في دارنا يقوم يكسسرهم تكسير مش حتى يقصهم كيما يلزم و الي قالتلهم اسكتوا يلوحهم في دارنا ....
تعرفوا ايديفيكس ideefixe كلب أوبليكس Obelix ... أنا هكاكة .. الي يمس شجرة نقدموا ....

6 يونيو، 2009 12:16 م

تعليق غير معرف ...

ti yezzi ya tofla daher fik wellit berrasmi tlawej 3la weld la7lel elli ye9blek bkollek kima enti ba7chichek w richek w ommek zade w zid 3lihom el 3achira mta3 7oumetkom et surtout jaretkom ennesnasa. rabbi ya3tik essabr, w ytawel bal elli bech tjih echaja3a wi nou9ez 3la beb darkom bech yetebla b bent el 3ayla.
je ne suis qu'une nouvelle lectrice de ton blog que j'adore parfois mais parfois encore je dit fech t5alwed hattofla

8 يونيو، 2009 11:17 م