و الله ما غير كذب و تفشليم، م اللول كنت ياسر نافحة علي حكاية الانونيما و الحكايات الهادفة. كنت نستخايب اللي مافماش علاه بش نكسرلكم ريوسكم بالهداري الفارغة. لكن بعد ها الثلاثة شهر تدوين، شفت اللي كيما عجبتكم الحكايات الهادفة، عملتو جو ع التخنتيب متع كل يوم. م اللول بهتت و من بعد عذرتكم. الواحد يبدى يعلم ربي بحالو و نهار كامل يشابط بش يهبط لقشة م السماء، مايصدق لربي يلقى حكاية فارغة يسرح فيها. كيف ما انا الحل الجذري لكل مشاكلي النفسية و الوجودية، هيا فيلم مصري بالابيض و الاكحل، ساعة و نصف فيهم اربعة غنايات و خمسة شطحات و ديما "بتحبني يا احمد؟" "بموت فيكي يا منى"... و الدنيا تولى بكلها فراشات و سعادة.

البارح اللي من اصدقائي ع الفايسبوك، تبعو النشرة الجوية متاعي البارح و اللي كانت مغيمة جدا وشعرة لا كملت بنزول بعض الدمعات. و في اخرة المطاف رصاتلي ملسقة بالكابسكوم. و قبل ما تبهتو اشنوة ها الاختراع، م اللول نقلكم اللّي هيا دبارة طبية من عند كلوفية. هاو اشنية الداقزة. عندي توا عامين تقريبا، كتفي اليمين ما عادش نجم نحركو و ساعات تكبس عليا وجيعة تحطني جمعة ف الفرش. وكي نبدا لاباس لاباس، تلقاني نتحرك بزوز ساقين و كتف برك. مشيت للطبيب، بعول بعول، عملّى تصاور و تحاليل و دنيا، لقى السبب المنطقي للوجيعة و اللي هوا تكسيرة قديمة اما ما لقاليش حل جذري. رصاتلي مسلمة امري لله، هاو مرة نسخنو بالسيشوار، هاو مرة مساج طبي، هاو مرسكية مع نساء كبار مطبطبين ف البيسين نعمل ف الـ gym medicale .

ايه عاد توا قداه من مرة كلوفية تجيني و تبدا تتفلسف عليا، هاو مرة جايبة مرا بش تقرالي عليها، هاو مرة بش تمسدني بلبخة الله اعلم اشنية هيا و انا نهار كامل نتهورب. اما البارح الحق، قاتلي ايا تبعني للفارماسي. مادام فيها فارماسي و كلام مبدئيا علمي، قلت ايا نتبعها. اساعة فلّتت الفارماسيات اللي عنا الكل و كركرتني لوحدة ملوحة ف طرف الخلا في حي شعبي و الفارماسيان لابس شاشية منسّلة و المنديلة كحلا فحم، و كمل لامم بحذاه شلة م القهوة يلعبو في طرح شيش بيش عندو ف الحانوت. معليناش، مادام الاختراع مقرطس، باقي عندي نية بش نحطو على لحمي. شراتلي نوع متع pansement كبير، مصور عليه اسد تقولش عليه اكا الدوايات المضروبة اللي جايبينها م الشنوة. و مكتوب عليه "لصقة الاسد بالكابسكوم"! هذاكا اش ريت م الباكو، خاطر طول دخلتني وين يزرقو، هبطت الريدو و طول لا بالك لا وسع دمغتني باكا اللصقة اللي مطلية بحاجة حمرا تقولش عليها هريسة. م اللول ماحسيت بشي، روحت للدار، عملت قهوة و جيت بش نقرا لعلا ربي يثمر فيا. بعد نحس ف سخانة بدات تنتشر فاكا البلاصة و عاملة عليها جو. بالشوية بالشوية، وليت تقولش عليا مكبشة فيا كعبة حرّيقة ف عز اوسّو. نار موقدة تشوي فيا و الشي عمال يزيد. حبيت نحيها ما حبتش، لصقت غادي كي الجلد انا نجبد و الحرّيقة تزيد تكبش. ماني م النوع الـ altruiste و مانحبش نستمتع وحدي، درت على دارنا الكل، اللي هذا نقنع فيه اللي عندو برد ولا وجيعة في ركبتو، في مرفقو و نلصق فيه بالسيف، ههههه.

عمال الشي يقوى ، مشيت نجري لشكارة الفارماسي، ماو جايبتلي بالزايد، جبدت باكو اخر و قعدت نقرا. اساعة قالك اللبخة هاذي يحبلها نهارين بش تنحيها. و استنا عاد، باش تنحيها؟ ايا طلع تربح؟ لا مش بالماء السخون، لا مش بالبخار، لا مش تقلّعها هيا و الجلدة...... بالقااااااااااااز!!!
مش بش نكذب عليكم و نقلكم وع و بع و خيت، و انا انسانة قننو برشا ولا عمري جا عليا طرف قاز. اما تذكرت حكاية النهار اللي رصاتلي مدوشة بكلي بالقاز، وهوا شوف الصدف، نهارت اللي كسّرت كتفي. و مادام ها النهارين متحيرة عليا ذكريات الطفولة، قلت ايا سيدي خ نوسعلكم بالكم و نحكيلكم الحكاية م اولها. خاطر توا كي كبرت استوعبت المآسي اللّي صارت نهارتها.

عامتها صيفية اللي بش ندخل للمكتب، مزلت كي عملت ستة سنين (واهوكا من توا عيد ميلادي ف جويلية، لا تقولولي نسينا لا ماعملناش حسابنا لا شي، من توا خبي للكادو)، و كنت عفريت مسيب. مانعرفش علاه، اما يمكن خاطر خويا الوحيد ربي يفضلهولي مزال كي تولد، و ولاد الحومة اللي في عمري بكلهم ولاد، و حتى م العايلة ماعندي كان ولد خالتي انا و ياه فرد عمر. المهم، المحيط متاعي بكلو ولاد و كانو يغزرولي بمحقرانية شوية خاطر طفلة، ياخي وليت الباربو فيهم بش نثبت وجودي. انا الراس المدبر متع العمليات الشريرة، كان فما عركة انا نمد وجهي و نحامي عليهم، كان فما غارة على حومة اخرى، انا راس الحربة، مشية للخربة القديمة حتى في نصف الليل، مانمشي كان انا.
ايه عاد صيفيتها، استنفذنا الالعاب الكل، تلفتت يمين يسار، اش خطرلي؟ نعملو زعمة زعمة قبيلة الهنود الحمر، و نبنيو des tipis كيما اللي يعديوهم ف الكوميك. الولاد الكل فرحو و هيييي اما باش بش نبنيوهم؟ غزرت هكا، في جردة دار جدي عنا ثلاثة ولا اربعة نخلات. اما النخل وينك، طويل و احنا السلّوم فينا ميترو غير ربع. فما نخلة منهم، قريبة برشا لفيراندا متع دار خالي، اللي ف الطابق لوّل. بالطبيعة مخ الولاد الصغار مهما تتخيلو، و مهما تحطاطو، راهو ديما يصدموكم بالخيال متاعهم، خاطر ما يقيسوش المخاطر.

ايا سيدي، اش خطرلي وقتها؟ انو نطلع لدار خالي، متهنية عليه مقيل عاد و الدنيا صيف، نمشيو للفيراندا، نمدو يدينا، نشد طرف السعفة بالقدا و نرمي روحي م الطابق لوّل، نجي ف القاعة انا و السعفة و الطيحة اهيكا amortie من جيهة بالسعفة و من جيهة نجي ف التراب. و كذلك كان! عملتها خمسة ستة مرات بش تشجعو الولاد بعدي، ولينا طرزانات غادي، نشدو السعف، نصيحو و نرميو رواحنا. السعف القريب للفيراندا وفا، بكلو ولّى ف القاعة، عملت هكا تشعبطت فوق دربوز الفيراندا، مديت يدي للسعفة البعيدة شوية، على دخلة خالي قام م الصياح و شاف الجمهروش اللي دخلتهولو م الحومة، من ولد جارنا لولد الصنهاجي. يعزق فينا صيحة تقيم الميت م القبر و زاد شعرة لا طاح داخ كي راني بين هوا و فضا على حرف الدربوز. انا في مخي بين نرمي روحي و بين نجي بين يدين خالي، الاختيار ماكانش صعيب برشا، واحد ثنين، و شادة السعفة بيد برك و نترمى. نهبط انا و اياها مزروعين كي راس اللفت. بحرارة الموقف، ما حسيت بشي، ريت الجماعة ياكلو ف طريحة الفوق، عطيت على ساقيا و هربت للبحر، تي زوز انهجة. نحس في يدي ثقيلة و مانجمش نحركها (وقتها الكتف بكلو تخلع، خرج من بلاصتو اما باقي مش حاسة بشي) اما نجري و نتكربص، قعدت ع السور اللي على حرف الكرنيش نستنا ف البقية بش ياكلو ما كتبلهم و يخلطو.

انا هكاكة قاعدة، نرا في كلب صغير اكحل يجري ع الرمل. عينيا حوالت، وقتها بال و سيباستيان عامل مسد ف البلاد و يا سعد من حاز حتي كلب عربي مجراب. عطيت على ساقيا نجري خالطة ع الكلب، هوا يجري و انا نجري، ماعاد نرا في شي كان اكا الكلب. ماغير مانفطن، دخلت في ماتش متع كورة ع الشط و ماكم تعرفو قداه ولاد البونليو حنينين و فينو، مانفطن بروحي كان دخلت بين برشا ساقين و طاحت عليا جهامة، بلانكو على حالو. كي ما تدفنتش نهارتها ف الرمل و تقطع عليا النفس، باقي باهي. المهم، جاو الرجال قيمو الراجل و طبسو عليا بش يشوفو النفس مزال ولا لا. عنينيا و فمي مسكرين بالرمل و انا الكلمة الوحيدة "الكلب الكلب". الراجل سخايبني نسبّ فيه، عمل هكا خضني خضة باهية من كتفي. ما تسمع كان الصيحة واااك. (بعد عرفت اللي الـ clavicule تكسرت ف اكا الطيحة).
ولاوش يرضيو فيا؟ و كي فهمو الحكاية، ما ترى كان فيلق متع جنشات يجري ورا كلب ما يعملش عشرين صانتي، جابوهولي مقربط، حتى م الحبل لقطوه م الشط و حطوهولي في يدي بش نسيت الوجيعة و سكتت.

ايا سيدي، مروحة للدار نتقزدر انا و اكا الكلب شادتو بطرف سباولو، قول عندي ما عند حد، ماشية بش نحمص الولاد. عشية كاملة ما سيبتوش من يدي. وليتش اليد اليمين مانحركهاش و اليد اليسار شادة الكلب؟ الولاد يجبدو وانا نجبد شعرة لا خنقناه. درا كيفاه، فما اسطلة متع دهن حاطنيهم في تركينة م الجردة خاطر قاعدين يبيضو عامتها، عثرنا فيهم، تبزع الدهن ونسينا كل شي تلهينا نصورو بيه ع الحيوط و الشجر و على ظهورات بعضنا. على خلطة خالي اللي كان يلوج عليا متحلف فيا. كركرونا بكلنا بحذا الكاوتشو، غسلو غسلو، شي، الدهن ماحبش يتنحى. شدونا فرطاس فرطاس يفركو فينا بالقاز و نحنا نتشوشطو و هوما مستحلين فينا. ايه كي جا دوري انا و الكلب خاطر لوقتها ما سيبتوش، وهوما يغسلولي، مانجمش نحرك يدي و خايفة لا نقول وك لا ترصيلي في بحث و كيفاه ووقتاه و توفى بطريحة.
نانا الله يرحمها كانت فرملية، طول عرفتها، قالت لامي تي هاي كتفها مخلوع هاذي، اجريو بيها للسبيطار.

انا كي اللي حسيت اللي الوضعية غير عادية، و كتفي يشوي فيا، اما مخي و همي الوحيد اني ما نخليش الكلب ف الدار خاطر بش ياخذوهولي الولاد. امي تجبد و انا نجبد و نصيح. مكبشة فيه لا حبيت نسيبو. و زيد حسيت الوضعية غير عادية و الجماعة خايفة عليا، استغليت الموقف. ما مشيت للسبيطار كان مشنقلة اكا الكلب، ما سيبتو كان كي دخلت للطبيب، بعد ما ربطو ف الكرسي و حلّفتهم عليه بش ما يسيبوهش. الطبيب بدا يبعول وعملّي تصاور. طلع عندي كسر ف الـ clavicule و كتف مخلوع. م القايلة شادة روحي لا بكيت لا شي خايفة لا الولاد يقولو عليا طفلة وضعيفة. اما غادي لا جمهور لا شي، و تلم عليا الكسر و الوجيعة و ريحة القاز. نجي في حجر الطبيب و نعمل بععععع. رديت عليه هههههه. هاني لتوا شايخة عليه.

اي اكاهو عاد، عملولي ربطة كبسوني بيها، حرابش و جو، منعو عليا اللعب و البحر. عديت بقية الصيف قريد العش المدلل، انا و اكا الكلب في حجري، نشربو التاي و نوكل فيه ف البندق. يا فرحة ما تمت، اكا الكلب مات ، من نهارتها لتوا ما نتذكرش بكيت بكية كيما هكاكة. اما من وقتها حلفت ع الكلاب.

كتبتها:bent 3ayla على الساعة: 4:07 م | عدد التعليقات:10


الميترو مزال ما وقفش ف المحطة و الضايع هبط مارش و عطى على ساقيه، يجري و يتدعثر ف الحصحاص متع السكة شعرة لا بلع سنيه في طيحة م الطيحات. شد ثنية دارو و هوا يتسرسب كي وزغة الحيوط ، خايف لا يراه حد من ولاد الحومة و يكبش فيه و هوا ربي يعلم بحالو ع الغبينة اللّى صارت فيه. وصل للدار، دخل كي السارق بش ما يفطن بيه حد م الوليدات اللي كارين معاه، حتى الضو ما شعلوش خاف لا تفطن بيه العطراء، الطفلة اللّي شباكها في مبيت الطالبات يحل على شباكو و هوا عندو عام توا يتراسل معاها بالاشارات الضوئية، م التشعيل و التسكير حرق درا قداه من امبوبة لاممهم تحت فرشو، و ناوي يهديهملها نهارت اللّي يعرسو بش يتذكرو مغامراتهم العشقية هاذي.

حط راسو بين يديه و بدا يدوّح في راسو و الغصة خانقتو، قالولو صحابو فك عليك، نبهوه، اما شي، الشيطان يلعنو و يخزيه. اهوكا رصاتلو توا في حل و اربط. مش كان لاباس عليه ، متخرج و بطال قاعد ف امان ربي، يستنا في التاليفون ينوقز بش يقولو ايجا نقلبوك و نعاينوك لعلا نرضاو عليك و نخدموك عنّا باخ تف؟ و سرح بمخو ف النهار الّي كلّم صديقتو بنت عايلة زعمة زعمة بش يستشيرها في موضوع هام، اما ف الواقع هوا خمم و قاس، و نوى. اما قال نكلمها لعلا نهنّد عليها في فطور و قازوزة بوقا سيدر، ماو يعرفها دغفة و ع الحس تقسم الباي، وين تسمع فما حكاية و تنسنيسة تبيع جرودها و تجي تجري.

نهارتها هزو بعضهم و مشاو للحطاب اللي ف البساج، شدو ربع طاولة مسخة، زوز صحافي ملقشة و الفرازط تجري بين ساقيهم، وهوما ياكلو و يتبننو ف اللبلابي. بعد ما كلاو و تهناو، تلفتلها و قاللها:
- نويت بش نعمل نشاط هادف، قررت مادام جات ها الخدمة المحنونة، يا ندخل ف الجمعية التونسية لحقوق الانسان، LTDH بالعربي، ولا ننظم لحزب معارض!
- اسكت يعطك مسكت، هبلت ولاّ بعقلك؟ اشبيك عمال تكبر عمال تخرف؟ لعب النوفي ف داموس السيدة اثرلك على مخك. فك عليك، كان تحب تخدم و تلم ساقيك تاخو العطراء، برا دخّل روحك في شعبة ولا تطوع تخدم مشّاشو للعمدة، لعلا يتوسطلك عند شريكة م الشركات ف المنطقة الصناعية، ما تحقروش اكا الطابو.
- اش من عمدة و اش من خدمة، انا فديت، الى متى كي الزير المتكي؟ و شوف اكا الشهرية الهايلة اللي بش يعطيوهالي! كان بش نعمل عليهم، ما ناخوها كان ع الكروسة المغبونة. تي اكا النهار حرت في كيلو برقدان صاقسلي اشتهاتو و نحنا نحوسو في باب الفلّة. خلّي عاد بش نزهز دار.
- معناها زايد الكلام؟
- زايد الكلام!
-ربي يهديك و يرحم ايام صحبتنا.

وقت اللي وصل بذكرياتو لها النقطة، ماعادش ينجم، حط مخ راسو بالبكا. ما فاق علي روحو كان وجوه الفجر و الامام يأذن ف الصمعة. غزر لمنقالتو، لقاها الخمسة متع الصباح. زعمة لقاو الجثة؟ ايه وه، حتى كان مزالو، ماعادش يبطاو، نهج محمد علي عليه الحركة م الفجر. ربي يستر ما طاح منّو شي يشلق بيه. الدنيا كان ما تقوم و تقعد. اش لزو يشد ف الباس مع البوليس بش يتعدى بالسيف؟ قالك حق الانخراط ف الاحزاب السياسية مكفول ف الدستور، يحرق النهار اللّي قالولو فيه عندك حق لا يحقلو حق.
هوا لتوا لا فاهم اش صار بالقدا. متعدي ف الليل من باب بحر قال يخطف ساقو يعمل طلة على مقر الحزب اللي داغرينو ف اكا الخنسولة يلقاش وريقة ع الباب يقولو فيها وقتاه يحلو و اشنوة يجيب معاه وريقات بش يسجل عندهم. ماهوش مستانس بها الشي، حدو حد نادي المسرح وقت اللّى كان يقرا ف الليسي.

مزال كي حط ساقو ف النهج، طلعلو راجل طول بعرض، لابس دنقري ازرق فوقو جاكيت جلد مذرح، درا شنوة يخشخش تحتو. جاه، السلام السلام، عندكشي بريكية خويا لعزيز؟ شتعمل لهنا؟ ما تعرفش النهج هاذا متع عباد تعمل ف المشاكل و ما تحبش تعيش بقدرها ف ها البلاد؟ برا خويا، انتي ظاهر وجهك ضاوي و مش متع تمرميد، ارجع منين جيت و تعدا ع الحبيب بورقيبة .
بكل تربية و تهذيب، الضايع قالو،
-لا راهو حبيت ننخرط ف الحزب وجيت بش نشوف اشنوة الاوراق المطلوبة.
-تنخرط؟ برا خير ما نخرطك ها الليلة الزقحا، ايا تجبّد من قدامي..
- اه صارة انتي حنش م الحنوشة؟ (مزال كي قال الكلمة وفطن اللي هوا زلقت منو، عمل هكا غطا فمو و بدا يلوج على ثنية للفصعة)
-حنش اللي يبلعك، ايا هاي خبزتنا جات، الا ما نعديو بيك الليلة.

الضايع تبهذل، عمل هكا غدرو و ضربو ضربة خاطية و هرب مابين يديه، الراجل باقي شادد جرتو و ما يفطن بيه كان خرطفو من كبوتو. ماغير ما يشعر الضايع، البريكية مازالت في يدو، يدور و يشعلها في وجه الحنش، تخطف النار في حاجبو، الراجل يسيبو و يتدهشر، يتدعثر في حفرة ف الكياس و يجي راسو على حرف المادّة، يتزرع كي راس البصل.
الضايع يقربلو بالشوية، باقي مش عاطي الامان، يعيطلو، ياسي الحنش، يا خويا، تسمع فيا؟ لا حياة لمن تنادي. يحركلو راسو، يلقى خيط دم هابط م الجبهة. هبل، ما را روحو كان يعطي على ساقيه و هارب ف النهج. وصل لنهج روما، لصق الحيط و بيّت الحس، تقولش عليه واحد عادي مروح. اول ميترو لقاه، ركب فيه و هوا بكلو يرعش و العرق هابط يسلت. حتى وصل للدار.

النهار طلع و الضايع مزال ماغمضش. زعمة مات؟ زعمة لا؟ زعمة يعرفو مولي العملة و ينجمو يوصلولو؟ هاذي مش سرقة ولا جريمة عادية بش يتمرخاو فيها البوليسية. الضحية مش مواطن عادي م الشعب، الضحية زميل و ظاهر م الصحاح مدام خصصوه بش يعس علّى يتعدا من بحذا الحزب. هوا ليلة برك ف ها الشك شعرة لا هبلتو، مزال بش يزيد يقعد؟ حلهّا يهج! اش مزال عندو يعمل ف ها البلاد؟ القراية و كملها، الخدمة و عارفها مسكرة مسكرة، هاو حتى طرف العمل السياسي اللّى حب يدخل فيه طلعت جرايرو نحسة وكان ما يعدي بقية عمرو يحسب ف الفيران ف برج الرومي. اما كيفاه يهج؟ كان تحلّو باب العرش و خذا الفيزا، كان ما يشدوه ف المطار!

هوا هكاكة يضرب اخماسو ف اسداسو، قال ما يحلوهالي كان صحابي. نعرفهم كل شي ممنوع و خارج ع القانون يدخلو فيه خشوماتهم. ع الصباح قبل الطالب و خوه، صبح تلفن للمتنبيّة، نسبة للمتنبي، طفلة هايلة خدومة و متواضعة جدا. و الكنية متع المتنبية جاية من كونها تحب المتنبي برشا، و زيد هيا بيديها عندها ما تقول بروحها ف الشعر، اما ما تكتب كان الشعر الفخري، الكعك اللي ما يطير جوع كيما الغزل و درا شنوة ماتدورش بيه. كلمها، من حينها تعدات هزتو وهو متلثم لابس مرايات شمس، و يرعش بكلو. ما حب يقوللها شي، حتي يوصلو يهدو على بنت عايلة ف الدار. ماكا العام عرفوها التلفون عاملتو بش تعرف شكون تذكرها و طلبها م اللّول كانو يعذروها يقولو لازم مشغوبة، لازم عندها ما تعمل، اما زايد، كثرت م العسّول حتى مساط. هدو عليها، من راس النهج تسمع الشخير متاعها، نص ساعة و هوما يفارعو فيها حتي قامت. كل عين طايرة في جيهة و الشعر قفة قطاطس.

كي العادة فرحت بيهم وطول فاحت فيهم، ماو لباس اش فما، علاه جايين، وقتاه ربي يتوب عليا منكم؟ ماو المتنبية مستانسة بيها، رماتلها حويجة في فمها تاكلها بش تسكت و تلفتت للضايع و قاتلو :
- ايا عاد ها الصباح الواحد مضيع مصالحو و مشاغلو و جاي يجري، اش من مصيبة عملت زادة؟
- قتلت بوليس!
- ناري على وخي! نعرفك اساعة طفل عاقل خاطيك الحرابش و الشراب، تطلعشي هاذي سكرة الحب اللي غنى عليها نور مهنى؟
- يا بنتي نحكي بالرسمي، هاو اش صار...
حكالهم الحكاية م اولها. كانك على المتنبية ، كي عادتها ف المواقف الحرجة، بهّمت، و كانك على بنت عايلة قامت تندب. و هاه كان عرّست مادامني مصوحبتكم، و هاه كان زغرتو عليا نهار ف جرتكم. اش كون بش ياخو وحدة تدور مع فار حبوسات؟
- تي هاذاكا علاه لمّيتكم اليوم، نحب نهج م البلاد. اما بطريقة غير شرعية... نحب نحرق!

بنت عايلة انبوبة شعلت ف دهاليز مخها، تذكرت اللّي ملّي دخلت ف مجتمع البلوقوسفار، تعرفت على برشا ناس و تكشّفت على برشا حاجات. هنات الضايع و قاتلو ماعندك كان الرجال. نعرف واحد بنزرتي ولد حلال اختصاصو الحرقة، اما مش اللي يجي، حرقة متع انسان تقي و يخاف ربي. مكون جمعية احباء لمبادوزا الفاضلة، نهار نهارين و هوا يلم فيهم م الفايسبوك ويقلهم ايجا نحللكم باب الجنة و يجعلو لله.
الجماعة ماكانوش م العاكسين، رماو الضايع في مال الكرهبة و عملو عولة سندويتشات باسكالوب القطا و المايونيز، حكة بسيسة بالزيت و شدو الثنية. دوب ما وصلو لبنزرت مشاو يلوجو على بوبلينات. اتصلو بالشيخ تيتوف رئيس جمعية احباء لمبادوزا الفاضلة اللي عطاهم موعد بحذا البصيري. مادام جا، كمّلو عملو كسكروتات لبلابي من عند زرقا، الضايع قادم على رحلة و لازم يعشعشوه.

جا سي تيتوف ع الموعد، الراجل مُحَرِّقْ محترف و عندو كلمة ف الميدان. كي العادة لابس كلسيتة ولا كولون اكحل على وجهو بش ما يعرفو حد. كي حكاولو الحكاية من اولها، سكت، خمّم خمم، و مبعد قاللهم الحكاية هاذي تجاوزت اختصاصي، هاذي لازمها مُحَرِّق مختص. انا حدّي حد البطالة، الباربوات، الهجالة، العانس. اما المجرمة ولاّ جماعة الرأي هاذوكم لازمهم الراس الكبير. تسخايبوهاش الدنيا سايبة؟ رانا ناس منظمين. و سي الضايع ما تمنعو م المشنقة كان ولاّدة!
المتنبية ماطاقت صبر، قاتلو:
- ولاّدة؟ اش من ولاّدة ياخي جبنالك مرا حبلى نحنا؟
- لا لا، الراس الكبيرة ف الحرقة، مرا فاضلة مسمينها ولاّدة. ماو الّي يحرق على يديها يتولد من جديد و يتكبلو عمر سعيد. تي قداه من حاكم و بوليس يفدو م البلاد، يجيوها هيا بالذمة بش تحرقهم. ايجاو معايا نوصلو لاكا السربوحة الّي على شط الناظور، مقرها الرسمي غادي.
- وعندها مقر رسمي زادة؟ شوف آ سيدي!
- امالا، مرا عندها مبدأ، قبل ما تحرّق العباد لازم تعمللهم فورماسيون، تنوش، شوية قانون على عومان على طليان. ياخي حرّق وارمي ف البحر؟ مع ولاّدة الحرقة جودة و ضمان!

سلّمنا امرنا لله و شدينا جرتو، نتشعبطو ف الحجر و الحشيش مرة على مرة يزلقو شعرة لا يتكركبو ف الحنديرة يجيو طرف ما يرى خوه، خاصة اكا بنت عايلة، قاتلك ما تتخلاش ع الـ class attitude و جاية تتقزدر بصباط طالون، و الرسمي معقدة من طولها النعناعي ولو تلقى الا ما ترقد بيه اكا الصباط. المهم وصلو للخنسولة اللي ف الجبل، على مرتين بش يهزو التاليفون يبلغو على مقر بن لادن، المغارة فيها ارديناتور و خرايط و GPS و ناس تشاتي وناس تسكايبي. سألو ع الحاجة ولادة، قالولهم للاسف، ما خلتطوش عليها راهي مزالت كي شدت البحر عندها deplacement ف المغرب بش تحل فرع غادي، بين المغرب و اسبانيا في اطار وحدة حرّاقة المغرب العربي.

الضايع باقي شادد الصحيح بش يحرق، قالك لو لزم نمشي لاي منظم اخر. الكل لهبو فيه قالولو بايع عمرك؟ البارح برك جماعة شدوهم بالكمشة، و غرق بيهم الباتو. الدنيا تقلبت، بوليسة و حماية مدنية شعرة لا كملو هبطولهم قوات حفظ السلام الاممية. شد ارديناتور م الارديناتورات و هاك ساكن معانا، ولادة مغارتها محلولة للناس الكل. و اهوكا كان فديت و فديت و بطات عليك، حل بلوغ!

كتبتها:bent 3ayla على الساعة: 10:00 ص | عدد التعليقات:13

عندي امي م ناس بكري، اكا اللي مستانسة تقضي من عند فلان ما تمشيلو كان هوا، تعمل التامين متع الكرهبة عند فلانة حبيبتها ما تربّحها كان هيا. انسانة ترى بالعشرة و الدنيا معاملات، تكلف الامر ما تكلف. الواحد يقول و انتي اش مقلقك؟ الناس للناس و الناس لله. ايه اما تولي مشكلة وقت اللي يحبلي نضيع شطر نهار بش نقضي قضية متع درجين، خاطر هيا تود ف الناس، اما التعب ما يوحل كان في راسي انا.

القصة و مافيها، ماو في بالكم امي كانت مسافرة و مزالت كي رجعت، فضل عليها طرف دوفيز، و مادام هيا مرا منظمة و تحب تحترم القانون، قاتلك اهبط رجعهملي ف البانكة. الواحد حد لهنا يقول يكثر منهم ربي ها العباد. انا على نيتي قلتلها، ايه اش بيه، هاو فما بانكة ف راس النهج، مايجيش حتي ميتين ميترو، درج مشي ع الساقين. قاتلك الف واعوذ بالله! ما تبدلهم كان ف البانكة متع "صحابك". وقبل ما تفزعو تسخايبو اللي انا م النوع اللي يعرفو عباد عندهم بانكات، هاو اشنية خرافة بانكة صحابي.

توا ثلاثة سنين لتالي، جاتني سفرة على غفلة، تغصرت ف طرف دوفيز، مشات امي تدور من بانكة لبانكة للبوسطة كل واحد يرشق عليها بتفتوفة. كلمتني قاتلي تصرّف. انا وقتها نتسكع في تونس، اول بانكة عرضتني دخلت، طول ضربت صحبة معاهم في محلا قصة شعرك و الصبغة هاذي مواتيتك، تقربلكشي فلانة تعرفشي علانة، و الضحك كيكيكي كاكاكاكا. الجماعة كملو هبطولي كابوسان ولا نودكم لا نشهيكم عل الحلقة اللي تحلت نهارتها. بالطبيعة قضيتي نهارتها و متع كل مرة نمشيلهم تقضات فيسع. في قاموس امّي ولّي اسمها بانكة صحابي.

توا الواحد يقول اشبيه، كي انتي شريت من عندهم و تحب ترجع، ماو ربحهم اكا التفتوفة مافيها باس! اما المشكلة اللّي هيا مجرد ترجيع فلوس، يعني اي بانكة تقضيهالك و زيد بانكة صحابي مدغورة في قلب تونس العاصمة، يعني يحبلك ع الاقل ساعتين، اذا مش ثلاثة بش توصل، تدخل، تبركي، تقضي و تعاود تخرج م الامبوتياج. بش نربحهم دينارين نطلع لروحي غرامين سكر، حتى ربي ماقالش بيه. اما امي م النوع اللّى كان تعارضها، تمرجلك العيشة متاعك بكرّت عاود، استاذة و مستانسة بالمعاودة و المرج، حتي تخرج من جرودك و تبدا تندب.
صبحت اليوم، استخلفت ربي ف النهار الّي بش يضيع حرام، هزيت معايا دبوزة ماء و باكو حرابش ايفرالقون و شديت الثنية. بالطبيعة بش وصلت للبانكة و صرّفت و خرجت حبّتلي ساعتين و ربع. حد لهنا الواحد يقول توا هاذي هدرة و كاتبة عليها بوست؟ تي استنا عاد، اش بيك تدز؟

كملت قضيتي و جيت بش نروح. بعد قلت بالله توا انا هبطت هبطت و الباركينغ خالص خالص و كمّلت تعاركت مع امي ع الصباح، خ نتعدى نقضيلها شوية حاجات خ نرضيها و تفرح ببنتها الشهلا. شديت ثنية الصباغين، قلت اهوكا من مدخل السوق، كان لقيت حويجة باهية و زايد ما غير ما ندخل، اكا البلاصة معقدة منها لابد الآبدين. مرّة على اول ما عملت برمي و كرهبة، هبطت نحوس غادي (العباد تعمل البرمي بش تهبط للحمامات، لسوسة و انا جاني الوحم ع الصباغين! مش وجه عز زايد). دخلت ندور ف النصب و الزناقي و فجأة مانرا كان الدنيا خاضت ، جزار و راجل تعاركو علي طرف ميزان متع لحم، يجي ميات غرام، الراجل سمعو الكلام في يا سارق يا الّي مآلك جهنم وبئس المصير، الجزار قالو توا نبعثك ليها توا جهنم، يعمل هكا ينزل عليه بسكينة جابو مفروش و الدم يشرّ. و العباد فرحانة جاية تجري، عركة عركة، دم دم هييييي! انا وين تلقاني؟ عطيت على ساقيا و ف الحما يا ستّار. وصلت بحذا الكرهبة اللي فرحانة بيها، لقيت شباكها مكسّر و العباد ملمومة تتفرج عليها. طلعت طيحت البرتابل ف الكرهبة و البرتابل وقتها فال و ما ريتك يا غالي كان ما حار دلالي. المهم، رصاتلي ف فجعة و اكتئاب نفسي و برتابل مسروق و شباك كرهبة مكسر في جرة ربطة معدنوس و خبزة مبسسة.

المرة هاذي مش كيف، كبرت و دلّيت و تنحات اكا التبهليلة متع الصغرة ومشاعر الاطمئنان للجنس البشري. م اللوّل ماشية عرقبان. عينيا على كتافي و السطوش لابستو تحت الكبوط و متسلّحة. المهم، نقزت كي الفرططو من نصبة لنصبة، ما عجبني شي. طاحت عيني على واحد يبيع ف الغلّة. و زيد غلّة فال. لا نودكم لا نشهيكم، هاو فراز، هاو انجاص، هاو عوينة خضراء و كحلا و حتى م العنب الاحمر موجود!
ان العنب ف العادة ماناكلو كان مرة ف العام و بالتلحليح. مش مغرومة بالغلة اللي فيها القلوب، ما نحبش المرج. اما اش تعرفو؟ مادام الحاجة فال، تحلى ف العين.
- السّلام يا حاج
- السّلام بنتي
- تعطيني شوية عوينة و عنب؟
- ايه نعطي لبنتي. قداه تحب؟
- هات كيلو كيلو.
اختاري، لفلي، وزنلي، لفلي، و وخر قدّم و بكل روح رياضية و هدوء :
- اربعة و عشرين دينار بنتي.
- هههه، الفين و اربعميات؟
- لا لا اربعة و عشرين دينار.
- يا حاج قتلك كيلو مش صندوق راهو!
- ايه العوينة بثمنية لاف! و العنب بثمينة..
انا م الكلمتين هاذم برك، حسيت الدنيا لعبت بيا و ركايبي لخلخت. اما الحاج حالف الاّ ما يجيبني نسفّ التراب، كمّل عليا بالضربة القاضية،
العنب بثمنية لاف...... الرطل! يعني الكيلو بسطاش الف!!!
اول ريفلاكس، انّي تلفتت للمرا اللي بحذايا قلتلها
- اختي احنا وين؟ ف الصباغين ماو؟ نطلعوشي ف rodeo drive و مافي باليش؟
- وين ها اللي تقول عليها؟ ف حي النصر؟
-لا لا ف امريكيا!
الراجل نقز قالّي وراس بنتي العنب هاذا جاي من امريكيا!
-واذاكان جاي من امريكيا، بش تبيعلي الفيزا ولا القرين كارد معاه؟ اسمع يا حاج نصيحة، جيب كرذونة كبيرة اكتب عليها، نبيع للمرا اللي تتوحم، خاطر على ها الاسوام حد ماهو بش يدور بيك!
الراجل كي اللي سخفتو كي را الدمعة في عيني، عمل هكا قص اربعة عنبات و قالي خوذهم، انا نحلف و هوا يحلف، شهوة صبية اللي يقلك. الله غالب، حشمت هزيتهم، و كملت شريت من عندو رطل عوينة ماخذت خاطر. هاني حاطة اكا الاربعة عنبات و نغزرلهم و نصلي ع النبي. مخبيتهم لزهازي.

كتبتها:bent 3ayla على الساعة: 10:08 م | عدد التعليقات:5

البارح القايلة هبطت لتونس على قضية خفافي اما مستعجلة، نزرب و ريقي شايح. و زيد م الفوق مش شاربة قهوة. بعبارة اخرى دايخة نتدهشر. المهم، في وسط السركولاسيون اللي ما فهمتش مناش تكونت و الدنيا صلاعة و ربيع. لو جات الدنيا دنيا و تونس كيما نعرفها، راهم الكل فاصعين م الخدمة و يحوسو ف سيدي بوسعيد ولاّ فرد مرة قربص للتونسي الحر الاصيل اللّي متملح م الخدمة على اصولو.

المهم بش ما نطولش، تحصرت ف اكا الامبوتياج ورا كار صفراء اما هيا بيضا، يعني العلامة المسجلة كار صفرا اما داهنينها بالابيض و مكتوب عليها من تالي بالاكحل بالكبييييير "صبّح"!
م اللّول بهتت. و مبعد قلت زايد، هاو الاشهار الخلاّق الهادف، لازم جماعة الكيران تشكاو م التزمير و الاخلاق الفاسدة متع الناس اللي تحصرهم الاقدار وراهم، ياخي جماعة شركة النقل قالك نكتبولهم "صبّح" ها الصباح بش يفهمو رواحهم و اهوكا فيها نبرة تهديد شوية، متع كان ما تسكرش فمك نهبط نهدهولك.

ف الضو اللي مبعد، و انا باقي شادة جرة الكار و نصلّي ع النبي، زدت قربت ياخي الرؤية وضاحت اكثر. طلعت الكلمة المكتوبة بالكبييير مش "صبّح" و انّما "صيح"! و الجاه كيما نقوللكم!
كان الكلمة لولة بهتت فيها، هاذي حبتلّي الكراهب تزمر بش فقت و دمرجت. وقعدت نتبع ف الكار من محطة لمحطة و نحب نفهمها ها الصيح هاذي. علاه لقاونا ناقصين تهويرة و تعظريط بش يزيدو يقولونا صيحو؟
باقي شادة جرة الكار ونخمم. قلت هاذي ما تطلع كان نوع متع therapie de groupe لازم حسّو بحالة الاختناق متع التوانسة، قالك ندورو ف البلاد و نقولولهم صيحو، عبرو، نحيو خمجة على قلوبكم...

فرحت! بديت نتذكر و نستجمع ف الشي نحضر روحي بش نصيح، لازمني نسخن عاد! نتذكر البيروقراطية و نحس كعبورة تخنق فيا. نتذكر الرشوة و المعاملات من تحت الطاولة و نزيد نتخنق، نتذكر الاكتاف و المحسوبية و النفس ضاق عليا.. نتذكر البوليس اللي تجاوز سلطتو و بهذل بالشعب، نتذكر القمع و العباد اللي تعس على لساناتها ، نتذكر البطالة و الجريمة و المتشردين اللي قاعدين يكثرو، العباد اللي ايست و رمات روحها للبحر لعلا تلقى ف الموج و الحوت رحمة ما لقاتهاش ف بلادها..

كي صحت، الله غالب، ما خرجتش صيحة، ما فطنت بروحي كان نعوي!

كتبتها:bent 3ayla على الساعة: 1:13 م | عدد التعليقات:6

عندي مدة نتبعلكم ف حكاية من صميم الواقع و ما حبيتش نجبد عليها ولا نستبق الاحداث، خليتها حتى كملت بش نجيبهالكم سخونة تفور. بالطبيعة حكاية فيها ها التشويق و الاثارة هاذي بكل، ما تكون فيها كان شكون؟؟ طلّع تربح.... و هل يخفى القمر، خالتك كلوفية! و كي العادة اللّي مزال كي انضملنا و بهت اشكوني ها كلوفية و من وقتاه ولات خالتو، نقولولو خالتك كلوفية جارتي و اسمها يغنيني على تقديمها. و م الفوق اهوكا الارشيف موجود ماكثر ربي كان حكاياتها، و صحيح كل حومة عندها كلوفيتها، اما زايد، متاعنا الاصل و الباقي تقليد، و البرهان الساطع و الدليل القاطع هوا حكاية اليوم..

توا مدة شهرين لتالي، حومتنا جات سكنت فيها عايلة جديدة. مرا و راجلها و زوز صغيرات. كراو على رواحهم برتمان في عمارة. الواحد حتى لهنا يقلّي ياخي انتي من معهد الاحصاء ولا عمدة البلاد شادة العسة اشكون نقل و اشكون رحل؟! لا لا، اما المرا هاذي دقها ربي ، جاية على عماها ما سمعتش بخالتك كلوفية و زيد م الفوق عملت معاها الدوانة. قالك يا سيدك بن سيدك، كلوفية صبّحت مشات لعمك بلقاسم العطار بش تشري شوية فرت، بالطبيعة حلت معاه الهدرة حتى اذّن الظهر، على دخلة الكارية الجديدة بش تشري شربة ولا مقرونة و الله ما نعرف. بعد السلام و اللي منو تلفتت للراجل قاتلو :
- بربي اعطيني زوز باكوات مقرونة رندة و....
- (كلوفية) لا لا فك عليك، الوردة البيضا خير.
- لا مستانسة بيها.
- على كيفك، انا حبيت ننصحك و النصيحة م الدين، راهي تطيب فيسع و ما تلصقش و زيد قمحها هايل، ما تشريه كان من عند الفلاحة الكبار، عندي واحد قريبي (هوا ديما واحد يقربلها والاّ وحدة حبيبتها) عندو هنشير ف...

المرا لا بالك لا وسّع، تقص عليها و تقول للراجل :
- ازربني يعيشك، و زيدني معاهم حكة طماطم بوكيلو.
- ياخي انتي جديدة ف الحومة؟ ما تعرفناش عليك، وين تسكن؟ يا بنتي علاه حكة بو كيلو، خوذ زوز بورطل راهو الحكة كان تحلت تفسد. ياخي انتي غدوة ناوية تطيب بالطماطم المعجونة؟ هاو الربيع جا و الطماطم فرشكة مافماش ما خير منها. يزي عاد راهو راجلك معدتو تنقبت من تاطيب الحكك...
المرا تعمل هكا، تكحرلها و تهز روحها و تخرج!
كلوفية تصدمت! حسّت بدا مرّ. عمرو لا حد عملهالها ها العملة! اما بردت سخنت ومنبعد قالت لازم صايمة ولا حاجة الشيطان يعلنو و يخزيه.

ايا سيدي، جمعة م الزمان و نلمو رواحنا كي العادة نمشيو للحمام قافلة تسير. الحمام ما يحلى كان باللّمة بش الواحد حاجة وحويجة، يغسل و يلم اخبار جمعة كاملة فرد مرة، وبعد ما نقطعو و نريشو و نهبطو جلود الخلق ملح، الواحد يمسح وجهو بالرحمان و يقرا دعاء النميمة على طهارة و يتوب يا من عاش للجمعة الجاية!
نحنا قاعدين نفوّرو في بيت السخون و نغليو كي طنجرة البرغل ، تدخل علينا المرا متع المقرونة! قالت السلام مرخية في حالة، مدت فرتها، جبدت عبات الاسطلة و عملت هكا..... اتكات و غمضت عينيها!! قرابة العشرة نساء كأن على رؤوسهن الطير، ساكتين باهتين و ماترا كان الحواجب تهزت و الشفة اللوطانية تمدت. دقيقة صمت محاولة تحليل ها التصرف الانساني الغريب. انا وحدة م الناس اول مرة نرا مرا دخلت للحمام و عملت هكا اتكات و غمضت عينيها. ياخي وين تسخايب روحها؟ ف الـ spa ولاّ ف الـ hammam؟؟؟ راهي ف الحمّااااام ياناس!

كلوفية باقي قارية فيها الخير، قشرت برقدانة و عملت هكا مدتهالها. خذاتها، كلاتها بالساكت و كل مانحكيو معاها يا تهز براسها متع ايه هاني معاكم ولاّ تغزر للسقف متع ربي يصبرني. من حكاية لحكاية، قاتلتها كلوفية :
-سمعت بيك ساكنة جديدة ف العمارة اللّي في راس النهج. بربي اش عاملة فيك جارتك منّانة؟ نعرفها مرا لا توقّر لا شي، عادي عندها تدق المهراس مع الاربعة متع الصباح.
- بالله يا حاجّة، انا الحديث و التقلقيل و التقطيع و الترييش ما نحبوش. الهرّان ف الفارغ يكسرلي راسي. و كان على كعبة البردقان، توا نشريلك قازوزة و هاذي بهاذي.
عملت هكا و وهزت روحها و تمّت ماشية!

انا وحدة م الناس، عملت هكا، بزعت سطل و قلبتو لبستو على راسي، قلت كان دار فيها ضرب و قباقب، ع الاقل نحمى اكا السنتين القدامين. بيت السخون ارمي المسّاك تسمع حسّو، النفس داخل خارج و الكل يستناو ف اشارة من عند كلوفية.. المرا سكتت، سكتت، زادت سكتت و ف الاخر سكتت! وحدة م النسا طبست عليها بش تتأكد النفس مزال داخل خارج ولا لا. كملنا غسلنا و المرا مش معانا، عينيها تلمع كي قطعة بلاّر، ظاهرة تخمم و تقيس.

بعد نهارين، ريت كميونة وقفت قدام دار كلوفية و بدات تعبي ف الدبش! ترعبت! قلت لوين ماشية المرا؟ اشبيها ماقالتش؟ خرجت نجري، ساق بالشلاكة و ساق حافية و كملت تكربست ف حكة طماطم مصددة جيت نسفّ ف التراب و رصاتلي نزرق ف serum anti-tetanos ف العشية.
يا خالتي كلوفية وين ماشية؟ لشكون بش تخلينا من بعدك؟ هناتني، قاتلي، لا، انا مرا وحدانية و الدار كبرت عليا، سمعت ببرطمان ف عمارة قريب بش يفرغ، هاني ماشية نتضيف بحذا حبيّبتي منّانة (المرا متع المهراس) شهيّر م الزمان، منّي نتونّس و منّي نقيس سكنة البرتمانات تساعدني ولا لا! غمزتني و طلعت ف الكميونة!

كيما فهمتو و كيما فهمت انا و كيما فهمت حومة كاملة، كلوفية قررت بش تشنها حرب عشواء علي المرا متع المقرونة و في عقر دارها زادة! ما نطولش عليكم، النهار لوّل، كلوفية و منّانة عملو عولة العام متع السلاطة المشوية. يجي اربعة صنادق فلفل هرّسوهم بالمهراس لوجوه الصباح. من غدوة خرجو للسوق و خلاو ام كلثوم تشرقع، راديو في دار الطرش. اللّي هابط من محطة التران يسمعو. كي جاهم راجل المرا قالولو نحنا نساء كبار و السمع على قدو، لازمنا نعليو بش نسمعو ولازمنا نحطو الراديو بش نتونسو. و كمّلو دخلوه ضيّفوه و ناس قبل قاللك اطعم الفم تستحي العين. الراجل غلط و قاللهم توحش ماكلة امّو الله يرحمها و ينعمها في كل تشقليبة. شدّوه جمعة م الزمان، يستناوه بالذمة قدام باب الدار بش يعيطولو ، هوما يصنفو و هوا ياكل. و يكمل يشدوه بالهداري لليل. المرا ماعادش خالطة تراه. راجلها عمّال يغرمل و هي عمال تتسلت م الغزول.

هوما ضمنو الراجل في يدهم من هنا، و هوما انتقلو لمرحلة العدوان المسلّح. المرا تحل شبابك دارها بش تنسّمها، و ما ترا كان الماء هابط على صالتها و دبشها، اش قالك و اش قال عليك ربيع و ينظفو ف الشبابك. هيا تنشر صابونها، و هوما يرميو جرّ الماعون، قالك حرام يبزعوه ف اللافابو ع الاقل يرميوه ع الجردة يربحو دعوة من شجرة بكما. المرا م اللوّل باقي تبعث ف الراجل بش يتفاهم معاهم، حتى الراجل تمرج و ولّى يرمي عليها ف اللوم، و هوما زوز نساء كبار و اش كان عليك كان عاودت الفركة صابون وماكش بش تدوخ كان خليت الشباك مسكر حتى يكملو حوستهم.

الراجل ف المكتوب، نقزو ع الوليدات. شوية مدموجة و محكوكة، صحفة بلوزة الاّ هوما ولاو يحلفو بحياتهم. ولاوشي نهار كامل بحذاهم؟ و زيد م الفوق يخليوهم يبرطعو و يقلبو الدنيا، احلى على قلبهم م العسل، خاصة وقت القايلة متع امهم، الّلى ساكنة ف البرتمان اللّي تحتهم.
المرا حياتها مرارت،لا متهنية في قضية، لا في دار لا مع الراجل لا من مرج الولاد و هيا نهار كامل تلّم فيهم من عند "العزايز".

ثلاثة جمعات على ها المعدل، وين يتلاقاو؟ ف الحمّام! بيت السخون كي العادة، و حضبة نسا يسنّو في سنونهم، دخلت المرا، و ماتشوف كان الضحك قام فرد مرة. و بدات اللّي هاذي مطبسة على وذن الاخرى و تغزر للمرا و توشوش. و المرا المتلقية ف الحديث تعمل ووه! بالله؟ و تضرب على سدرها متع سمعت عجيبة! المرا متع المقرونة، شادة تركينتها و قادمة لسانها و مصبرة روحها. تسمع ف كلمات ع الطاير "راجلها... البيت ....شعرة لا ضربها... طنجرة.... ربي يصبرو... $٪#$^$٪.... يكب سعد العار..." و هات ماكا اللاوي!

ماكملتش لا سخنت لا غسلت، عملت هكا لبست حوايجها و خرجت. مشات تستنا ف كلوفية و منانة ف الدار. هوما دخلو و هيا اتطرشقت عليهم. بالطبيعة ما نجمتهمش. راجلها يشد فيها بالسيف ويدخل فيها ع الفضايح و كمل تعارك هوا و اياها. كي ماطاحتش استنقطت نهارتها، منعت عمرها كامل. مانطولش الحديث، شهر م الزمان المرا لمّت راجلها وولادها، و نقلو م المدينة بكلها خلاتها لكلوفية ترتع فيها.

الحاجة كلوفية رجعت لدارها في موكب متع كراهب و تزمير و تزغريد و عملت نهارين تستقبل ف المهنّين لابسة جبة بيضا و السبحة في يدها، و اللي يجيها تقلو "استغفر الله، سوء تفاهم و برا، اما هيا جارة فاضلة و النبي وصّى على سابع جار، ربي يهديها و برا!"

كتبتها:bent 3ayla على الساعة: 10:11 م | عدد التعليقات:11

و الله حبيت اساعة نمشي نخلي تعليق مع المعلقين، لكن للاسف، تعبت و انا نقانص ف الـكونكسيون، اهوكا ع الاقل خلطت قريتهم يزي، الحمد باهي راهو. ايه نشكركم على تفاعلكم مع المأساة العاطفية متاعي و نشفي غليل سي ك.م.ر و نقلو راهي عندها توا قرابة السبعطاش سنة ولا هيا عشرين (يزي ما تفضحش عمري عاد!). ايه عاد علاه جبدتلكم ها الهدرة المخبلة في خيط؟ مش عاودت لقيت اثارو الطفل؟ ولو الاحرى توا نقول راجل.

ماو ف الفايسبوك الاصلي، مش متع بنت عايلة، لقيت add من واحد سوداني حاطط تصويرة ليه مبتسم يكشف عن صف اسنان بيضاء لماعة. م اللول كيما اي حد ما نعرفوش جيت بش نسخطو بـ ignore ، اما لقيت جملة مصاحبة للطلب الراجل يهلل و يبارك ويقلّي عشت و شفت النهار اللّي طحت عليك و لقيتك يا فاتن، شوف الدنيا مصغرها! قعدت ندقق و نثبت و خرجت المرايات متاعي من شكارة المونربري اللّي مخبيتهم فيهم و مسحتلهم بلارهم الليّ ولّى منظرو كي بلار الكرهبة بعد الشتا على قد ما ناسيتهم و انا نقول اشبيني النظر ماشي و يزيد يعشش. المهم بش نختصر الحديث خير ما نزيد نتحل فيه، الراجل طلع طفل سوداني كان يقرا معانا ف الابتدائي، بوه كمل البعثة الديبلوماسية متاعو و هزو صرّهم و تِلْفو. الراجل عدّو بش يزغرط وهات يا hug و هات يا ورد يا غناية. ايه عاد من حديث لحديث، ذكرّني بنهارة اللّى عطيتهم طريحة بعد ما خسرت مسابقة الشطرنج و الطفل شايخ تقولش عليه يحكيلي ع النهار اللّي بحتلو فيه بالحب اللّي اضناني. و زيد قالي ياخي انتي لتوا تحقد عليه المسهوك؟ اشبيك مازدتوش ع الفايسبوك؟ اهوكا ف الليستة متع اصحابي و راهو يبعثلك السلام و ما حبش يبدا هوا بالخطوة لوّلا خايف من ردة فعلك. الحق حشمت، توا الراجل ولد حمام لنف، لازم الحكاية توصل للسودان و ترجع للزهراء بش ننسى حقد الماضي؟

و زيد بش نقلكم ما كلانيش الفضول بش نرا الفطشاطة متاعو بعد ها العمر، نكذب و طارت عيني. مشيت للـ search bar و تابيت "مسهوك". الصلاة ع النبي طلعلي لوّل ف الليستة ماعقلتوش لابس مرايات شمس ستيل ذبانة ماضاهر منو كان الدقنونة. اما تاكدت اللى هوا بما انو فما قرابة العشرين صاحب مشترك، يعني من تشكيلة القسم القديم ما قعدت كان انا. سخفني، قلت ياخي لتوا منبوز منها الحكاية؟ ايا سيدي زدتو. اساعة كي تحل البروفيل و ريت خليقتو ما تبدلتش، وحدي وحدي، سيّبت اللي في يدي و بديت نضرب في روحي بالكف، و نزيد نبحلق و نقول فما عينين تعشق الدعماش، توا هاذا منظر و يتحب؟ و زيد ما احلى م الخليقة كان الخلوق! تي غير طيش صغر وبرا. الحمدولله الحكاية قعدت دخلاني و بسترة ربي. ماو م الصغرة عندي الكرامة قبل الكرواسون (حقوق التاليف محفوظة لصاحب ها العبارة اللماحة).

ايه توا نهارين و انا نخرف و نحكي و لتوا لا وصلت للب الموضوع و الوالد عدّو روّح بش نحطلو يستقات... زعمة خلّى غدوة؟ ولا فك عليا، فما شكون يعرف دارنا، يمشيش يعرضولي يترّسو عليا بطريحة، ايا خ نبلفطكم.
الطفل و حكايتو و حكاية انو عاودت لقيتو، ما تعنينيش و ماكنتش بش نحكيها لو كان ما دقوش ربي و جاني حزين رزين يشكي و يبكي ويفرغ في قلبو. ماو بعد السلام و احوالك و احوال اختك و اش تعمل و اكا الصمت متع شنوة مزلت بش تحكي معاه، الطفل تنحنح، و قاللي ماك انتي امراة قانون، بالله القالي حل ف ها المشكلة اللّي عندي. و انا عاد ما نحبش المزايا الفارغة جملة! قلت في قلبي هات خ نعاونوه، زعمة اش بش يكون عامل؟ سارق سريقة، كمبيالة فات وقتها، عندو شيك بدون رصيف، شدوه بيشم صوابع رجليه، حويجة مقدور عليها.

الراجل ظاهر فيه عندو السّر الرباني بزايد. توا انا قبل نغزرو و نصلي ع النبي، طيش صغر، اما توا و ع الحالة المكربة اللّي هوا فيها، فما وحدة عابدتو و المعبود ربي. م اللّول فرحت و قلت شوف يا سيدي، هاي بنت امها، مش كيفي بهلولة و من عشق فعف فمات، مات شهيدا، وينك. هاو اللعب الصندي. اما مبعد، قلت السماح! بعععععععع
الطفل نهار م النهارات في اطار لقاء شلة، تعرف على فتاة رقيقة لطيفة، لاباس عليها. دبرت نومروه من عند طفلة صاحبتها و بتبتت عليه و عرفت وين يخدم و وقتاه وكيفاه. نهار نهارين و هيا هاي مكلمتو خاطر "بالصدفة" متعدية من بحذا خدمتو، ايا ايجا نعملو فطور. ايجا نعملو قهوة. تفد تعمل هكا تهز التاليفون تسمطو بنص ساعة تلغبيب سرّاح ف الفارغ هاذا ف النهار ووقت الخدمة، اما ف الليل تعملو شهرزاد اللي ما تسكت كان ف الصباح ع الكلام المباح. وين تسمع بيه خارج، انشالله حتى هوا و صحابو لقهوة الحومة، تمد وجهها معاه. الواحد ما يكذبش، الطفل بيه و عليه اما الحق ولد ناس، متربي و الفم ما يقول العيب. لمّحلها، رمالها المعنى، شي! اكا الحيط يفهمك و هيا لا. سلّم!

قولشي، حشمتشي ولاّ جعرتشي؟ اما نهارت اللّي تضرب جا يدور، نهارة اللّي دخل للدار لقاها محلّقة في دارهم، حاطة ساق على ساق و هيا تهر مع امو و اختو، اش قاللك و اش قال عليك، طفلة بنت حلال "بالصدفة" متعدية في الحومة ولقات مرا كبيرة (اللي ب"الصدفة " تطلع امو!) مروحة مرزنة بالقضية طلعتها معاها. دخلوها تشرب حاجة و الكلام هزهم! ولاتش الطفلة سيار ميار عليهم ف الدار، و كملت نهار نهارين هاي مقرطة راسها في فولارة و تعاون فيهم، و داخلتلو لبيتو زعمة زعمة تنظف فيها، و هاو نهار نهارين حاطتلو جواب، غناية، وردة.. جبد امو على جنب و قاللها الداقزة. المرا مللّي كانت ناوية تخطبهالو، بشوية حذاقة وبرشا صبر، نجمت تحرّم عليها عتبة باب الدار.

قولش سلّمتشي؟ فما عباد ريحة النخوة و الكرامة ما تكسبهاش. ولات الطفلة بنت الحلال، موقفة كرهبتها قدام الدار، تعس عليه كي يروح، و تشيعو للخدمة الصباح. و هيا عابدتو و المعبود ربي. و زيد دخلتلو للخدمة عاملة روحها حريفة و جايبة دوسيات. الطفل بش يهبل. وين يقبل يلقاها، انهاشي م الفايسبوك، عاملة برشا كونتات و كل مرة داخلتلو باسم و كل مرة تخليلو تعليق و تشوهلو في سمعتو عند الناس. في هاو وعدها و جبد، في هاو استفعل فيها و رماها. و هيا نهار كامل تهدد فيه بش تقتل روحها و بش تنتحر و بش توحلها في راسو و ترصيلو في حل و اربط.

الطفل يحكي و انا باقي مش مصدقة اللي فما ناس بايعة روحها بالرخيص لها الدرجة. و نقول يبالغ و درا شنوة. حتى نهار وراني نوع المساجات اللي تكتبهملو، و مشيت هزيت باكو قاتو و بوكي ورد، مش بش نخطب، هذاكا اللي مزال، بش نطل على امو ، مهما كان كانت توصلي معاها ساعات للمكتب و تبعثلي الشكلاطة. لقيتها في حالة مكربة، تعطيها اكثر من عمرها و هيا تتغصور في تركينة و تبكي بالشهقة ع الغلبة اللي صارت فيهم و في ولدها. لا خلات ولا بقات دعا شر على بنات ها الزمان الاحرف.

ايه توا حكيت برشا، و انا وحدة م الناس قمت ببعض الخطوات الفعلية بش نحل المشكل ماتقولوش بش تغلّب عليا طفلة مصعصة. اما تره خ نشوف انتوما ف ها الموقف اش تقترحو، لعلا نستفاد منكم و تجيبولي افكار شريرة اكثر و نزيد نشفي غليلي منها.

كتبتها:bent 3ayla على الساعة: 8:36 م | عدد التعليقات:22

نحب اول حاجة نهني اللّي بعث يسأل ع الوالد، نقلّو الحمد لله. صحيح الراجل صحتو تسلّت و نهار نهارين ماشي لا فطور لا قهوة و هوا يترهوج، و نزيد نهار على ثنين ننسى مانشريش الخبز، اما باقي لاباس، مزال فيه النفس.
ثاني حاجة، بالله، بجاه اللي يعز عليكم، برحمة المتوفي و بحياة راس اللّي عايشين، توا و انتي تقرا ف البوست اعمل اللّي نقلّك عليه. تلحلح في قعدتك، سيب الـ souris و كان لابس كسكات ولاّ فولارة ولاّ اللّي هوا، نحيها و هز يديك لراسك و شبشب شعرك و ادعي معايا، لا تباركلهم، لا تختملهم، لا يثمر فيهم، لا يربحهم، يوريني فيهم نهار بجاه النبي المختار، يعطيهم مكّانة قوية بجاه خير البرية. بالطبيعة عرفتوهم و ماغير ما نزيد نسميهم. و ما تقولوش اللّي انا انسانة حقودة و ما نصفاش و لتوا لا طويت صفحة بلانات.

و الله العظيم لا. البارح سِخْفو عليا، رجعو الكونكسيون شطر نهار بعد شهر قصان، شبعتهم بدعا الخير. صبحت اليوم مالقيت شي. بعولت بعولت، و مبعد عاودت كلمتهم،قالولي وينك يا لّلا، عندك فاتورة مش خالصة. صحيح مابعثوهاش، و صحيح للاشهر اللي جاية -ماو يخلصو بالمسبق- اما قصينا عليك. ماكم تعرفوني الحق حق، هزيت روحي كي الناس الملاح مشيت قرقشت الفليسات من لحمي و دفعتهم. روحت فرحة مسرورة، و انا نمني في روحي بغطسة ف بحر الانترنات ودولاشة ف المدونات. يا دوب نصيّف ساعة و انا نبقبق في الانترنات و نبتبت، طلعتلي اكا الصفحة متع وينك، جبدنا بيك. كي كلمت الجماعة، كايني هكا سمعت ضحكة شماتة، و قالك ايا سيدي، مادامك تعرف الاجراءات، ايا هاو بش نعاودو نبداو م اللّول بالكل.
ايا سيدي معليناش، اخطاونا منهم، ولو من توا نتوجه للقراء اللّى مشتركين عند بلانات، برا بدلوها خيرلكم، راهو من هنا لشهر لقدام، المقر الاجتماعي و المركز التقني متاعهم بش تتعرض لمجموعة عمليات فدائية.

البارح العشية جاو صحابي نوروني بزيارة هايلة. كانت متع نصيف ساعة، ما روحو كان نص الليل. و صنفتلهم عاد و ذوقتهم من يدياتي شي ماكانوش يحلمو بيه. ولو لتوا ماتحصلت على حد منهم و ربي يستر لا صارت فيهم بعض العملة. المهم، جبدنا خنار و شي، عمرنا لا حكينا عليه مصارناالكل خرجناها. تي بالعمل جبدت حكيتلهم على اول قصة حب ف حياتي. وقتها كنت نقرا ف المكتب، يمكن عمري سبعة سنين، و قعدت نعشق ف طفل مْسَهوِكْ معايا ف القسم قرابة الثلاثة سنين. اما وينك، بالساكت، العين ترا و القلب يوجع. صحيح ف صلاعة الصيف كل عام ننوي انّي نبطل و نستقوى على روحي و نتوب، الاّ انو للاسف، كل ما نرجعو م الصلاعة تلقاني نغزرلو و ريقتي سايلة. و لتوا باهتة كيفاه حتى حد لا فطن لا المعني بالامر لا صحابي. خاطر وقت اللّي كنت صغيرة كنت عيرود (هوا لتوا اما ما تقولو لحد) و كنت محسوبة ع الولاد مش ع البنات، نضرب و نشفر و نهجم على الخصوم بكرسي و نقز م السور بش نفصع م المكتب. اما نجي قدام سي المْسَهوِكْ و نبدا خانسة ساكتة، عاقلة و طيبة القلب و كان عندي طرف شكلاطة ولا ستيلو مزيان ولا مسطرة تشعل بالضو، نعفس على قلبي و نمدهالو.

المحبة العظيمة هاذي اللي قعدت ثلاثة سنين تكوي فيا ولا قلت وَكْ، كيفاش وفات و انقلبت الي حقد اعمى؟ ماو ديما كانو يعملولنا مسابقات، هاو المبياد متع حساب، هاو متع مسرح، هاو مسابقة ثقافة عامة بينا و بين مكاتب اخرى، اختكم رغم تكركيرها و بخلها، كانت م المتفوقين ف القراية و م المغرومين بالثقافة، كي تفد تجبد القاموس وتبدا تقرا فيه. المهم، ولّى عندي سمعة متع بو العرّيف ف اكا المكتب. و ديما يكركروني يشاركو بيا ف المسابقات، حتى لو كان متع اقسام اكبر مني. منهم نهار عملولنا مسابقة متع شطرنج. برشا مكاتب و تصفيات و هيلمان. ايا سيدي مكتبنا عندو ثلاثة يمثلوه، المسهوك و انا و طفلة صفاقسية صاحبتي برشا كنا بالطرح انا وياها، مرة هيا لولا و مرة انا. ايا توزعنا كل واحد ف مجموعة و تعدينا الدور الاول، ثمن النهائي، الطفلة طاحت ف ربع النهائي و انا و المسهوك تعدينا. المهم، الدور النهائي، نطيح انا و المسهوك وجها لوجه!

بطبيعة الحال، الطرح م اللّول كان غير متكافي. خاطر انا و الحمدو لله كي نشد الصف معاه نفقد حبالي الصوتية، فمابالك كي تجي العين ف العين و الفطشاطة ف الفطشاطة؟ كان تلقاو فيا ربع مخ، صحة ليكم، هزوه اعملو بيه عجة، السماح دنيا و اخرة. اما كي بدينا نلعبو، حسيت اللّى لعبو مش متع صحاح، يعني اهوكا، يعرف القواعد و شوية تفركيح و برا. مش كيفي، ماو كنت ف اكا الفترة مغرومة بالادب الروسي و نحب نتقمص الدور كما يجب، اعاد ف الفترة هاذيكا
، تغرمت بالشطرنج و وليت نمشي مع خالي كل نهار احد للقهوة يشربني حليب بالشكلاطة و كايك و نقعد نتفرج فيهم كيفاه يلعبو. تعلمت برشا خطط و تحركات ع الرقعة.

في عوض نستغل اكا الشي ف المسابقة و نربحها عن جدارة كيما نستحقها بالفعل، جيت قدام سي المسهوك و تْسَهْوَكْت اكثر منو. كل تحريكة نعملها بش نربحو هوا. نسلّملو ف البيدق و نبتسم، نعطيه الرخ و نضحكلو، نكرفتلو الفيل و وجهي يحمار وقلبي يدق، الطرح كمل ف درج يمكن. الطفل اول واحد متفاجئ و باهت، و انا وين تلقاني بالسعادة؟ قلت سايي، اليوم حس و فهم التضحية و من غدوة توا يجي يقعد بحذايا ف القسم (شوف ف اكا العمر الواحد شنوة كانت اقصى طموحاتو).

ايا سيدي صبحت غدوة مِتْهَمّمَة ولا بسة سبادريا الاحمر و السروال الجديد و ربطت شعري زوز قرون -الله اعلم علاه كنت نحس اللّى المشطة هاذيكا اكثر وحدة تواتيني، alors que تعطيني وجه متخلفة ذهنيا- و هزيت معايا بزايد شكلاطة و حلوى معملة بش نقسمهم معاه. وصلت للمكتب، لقيت السيد واقف فوق طاولة يتبجح و يتفخر بالانجاز اللّي عملو البارح تقولش عليه عاود حل الاندلس، و كيفاه غلب بنت عايلة ويامن ادراك و وراها الزنباع وين يتباع. و هوا واقف فوق اكا الطاولة و العباد دايرة بيه وافامهم محلولة طاقة و اللّي مش مصدق و اللّي شادة تركينة و تمخط و اللي مشا حفر بالكُمبا فوق الطاولة التاريخ متع الهزيمة النكراء متاعي. الطفل في عوض يحس بالامتنان ليا، ولّى بطل قومي. قول جات بالصلاح خاطر عرفت شكون يحبني و شكون يغزل عليا.

اما ما تخافوش، ثارت لكرامتي بالوقت. اول حاجة قتلو صحة ليك البارح كنت مريضة و اليوم نوريك شكون يغلب. بالطبيعة عملنا طرح بدّعت بيه، لا فهم كيفاه خسر لا وقتاه، و زدت مبعد تلفتت للشلة اللّي كانت مساندتو، زدمت عليهم بكرسي المعلمة، مهدتهم بطريحة، و عفست في كرش المسهوك شعرة لا طلعتلو روحو و كملت صبيت سطل الشيفونة -اكا اللّي يبدا ماء مسود مفحم- في كرتابتو، فوق كرارسو و كتبتو الكل، و ختاما طلّعت فيهم القاب نكراء لصقت فيهم ليومنا هاذا.

باهي الواحد يقول علاه حكيتهالكم ها الحكاية الكل؟ البوست الجاي تعرفو!

كتبتها:bent 3ayla على الساعة: 2:56 م | عدد التعليقات:13

مانعرفش كان وانتوما صغار كنتو تمرو بنفس التجربة المريرة متاعي و اللي اثرت فيا برشا.هاني لتوا بعد ها العمر بكلو نتذكر كيفاه كانو يجيو يقيموني ع الصباح بش نمشي للمكتب، و اكا الاحساس بالنقمة و العجز. كل صباح نبدا نتصارع معاهم بش ما نخرجش من تحت الغطاء و بعد ما نأيس و نسلّم، و نغامر بتخريج صبع ساقي الصغير من تحت الفرشية و نحس بالبرد، تجيني نوبة البكا و يهبط عليا مرض الدنيا، اما زايد. يلبسوني و يخرجوني يعني يلبسوني و يخرجوني. نتذكر منهم مرة على قد ما شديت الصحيح بش ما نحيش البيجاما في بالي بش نمنع، امي انتقاما منّي و بش تشعفني لبقية العمر، كركرتني بالبيجاما للمكتب. من الطاف الله انو الدنيا شتا و ما نحيتش الكبوط نهار كامل ولاّ راهي قعدتلي عقدة ابدية.

ف الواقع انا حلمي كان بسيط برشا. كنت نحب نقوم الصباح و ماعندي شي ورايا، نقعد معاهم ف الكوجينة -خاصة كي تبدا نانا عنّا- نسمع الحديث و الحكايات، يدلّلوني بطريّف hot chocolate بالعطرشية ولاّ حتى عصيدة بيضا. و بعد ما نتكّا ع الملمة و اللي فما، نهز روحي و نترمى ع الفرش بالعرض! يا حسرة وقت اللّي كانت الاحلام باكا البساطة.

اما حتى انا زادة ما تقولوش خاطر فرخة و عمري ستة ولاّ هيا سبعة سنين، بش تغلبني امي! رد بالك!ف اكا الفترة درا شكون قاللّى كان ما تقراش بالقدا و يطردوك م المكتب راك تشد الدار، زعمة زعمة يخوف فيّا! انا تقولش عليه شكون دلّني على طريق الجنة. شديت مدة نقوم بكل نشاط ع الصباح لا مرج لا شي بش نمشي للمكتب... و نبلبزها! وليت نتعارك انا و سنفور كسول على البلاصة الاخرة ف الترتيب. و المعلمة باهتة اكا الذكا و المستوى وين مشا. المهم بعد ثلاثية م المحاولات المستميتة بش ندوبل، فهمت اللّى زايد. ماهمش بش يعتقوني قبل ماندوبل برشا اعوام. و الحق انا صحيح شاهية نصبّح نعدي شطر النهار في قعدة الكوجينة اما مش لدرجة انو بش نحمل التمرميد و العرك و الشباط
كل يوم .سلّمت امري لله و قلت خ نقرى و ننجح اما الاّ ما يجي نهار و نصبّح ف الكوجينة!

معليناش، هاني مسامحة دنيا و اخرة فاكا الغلبة اللّي صارت فيا، خاصة انو الصبر ينوّل. هاو بعد ها السنين الكل الحلم تحقق و اليوم اول نهار في منصبي كـ PDG مش متع الكوجينة برك، متع الدار بكلها! الوالدة اضطرت بش تسافر جمعة م الزمان، و تخلات عليا على مضض بش نتلها بالدار في غيابها. انا مانقولش اللّي مرا قدعة و حرّة، اما عندي تجربة و خبرة ف ها الامور. سنين و انا متوظفة برتبة "مساعدة" في امور الدار. و عشت البرا و كنت مسؤولة علي روحي و هاني قدامكم حية (وساعات لفعى) ترزق. امّي لاخر دقيقة حارصة بش تكون مهمتي على اكمل وجه، كملت كلّلت تعليمي باخر حاجة ما نعرفش نعملها، و هيا ربطان الكرافات. جبدت يجي ميات كرافات و قعدتني بحذاها و اربط اربط. بعد نص ساعة م التكوين المستمر هاذا، شعرة لا خنقت روحي بوحدة منهم. اما الحمدو الله تعلمت و حتى فكرت نحل مشروع. العباد اللّى ما عندهاش شكون يربطلها، نجي انا نحل نصبة قدام برشلونة و نربط الكرافاتات.

ايه عاد ودعت الوالدة البارح في الليل و هيا لاخر دقيقة توصي فيا و تعاود على السيد الوالد، م الفرحة بتت ما رقدتش. و انا نتخيل ف قعدة فطور الصباح ف الكوجينة و الراديو اللي بش نحلو و اكا الهيلمان اللّي بش نعملو. ممكن توا تسخايبوني نتمسخر، اما و الله حسيت اللّي حلم الطفولة تحقق! ما جاني النوم كان وجه الصباح. بالطبيعة اكا البرتابل اللّي معمرتو ع الستة، لا سمعتو لا شي. قمت يجي الثمنية متع الصباح، نسمع ف الحركة ف الدار. لقيت الوالد مكستم، لابس، محضر روحو بش يخرج!

يا ولدي استنا نعملك الفطور كيفاش تخرج بلا حتى شي، اش بش تقول امّي؟ فشلت في اول صباح؟ شي، ماحبش يستنا. عملت هكا مسختلو السورية تقولش عليا مش بالعاني و قتلو برا بدّل مادام عمتلك الفطور! تطلعشي اكا السورية هذيكا اخر وحدة محددة؟ و رصاتليشي نجري بش نحددلو وحدة اخرى و هوا يستنا و العصب ياكل فيه، لا يزي خرج صايم و مخّر و زيد م الفوق يرحي دخلاني. من حمصتي، قلت مش مشكلة، نفديها اليوم ع العشا!

ايا سيدي، خرجت نقضي. و هاني نقلكم من توا. صحيح انا مستانسة نقضي للدار. اما مستانسة عبد مأمور، يقولولي جيب كذا و كذا و كذا نحطهم ف الشاريو و نرجع فرحة مسرورة. و نبدا م الفوق نلوم على امي، اشنوة ها التبذير، و هاذي زايدة و هاذي علاه و هاذي ما نحبهاش. اما ما حسيت بجسامة الموقف كان اليوم! شديت اكا الشاريو و بديت ندور. زعمة اش يحب ياكل؟ زعمة هذي يحبها ولا لا؟ و هذيكا تطيب بهاذي ولاّ بهاذي؟ و قداه من مرة نوصل للكاسة، نستنا نستنا و مبعد نتذكر حاجة ترصيلي نرجعلها. المهم، قضية ستين دينار قعدت فيها ساعتين. و زيد م الفوق، فيهم عشرين دينار شلاكة عجبتني! هاو مصروف الدار وين يمشي يا رجال!

معليناش، روحت و فرغت اكا الشكارة اليتيمة اللي جايبتها و انا تقولش عليا هاززة بوسطة الباي، وسّع وسّع، جبتلكم اللّي لا عين راتو ولا وذن سمعت بيه! ايا لبست الطبلية، قلبت سليخة الكوجينة لا حاجة قعدت ف بلاصتها. مع قرابة الستة متع العشية قلت توا وقت الجد عاد. حطيت طرف ماكلة ركبتها، قلّيتها، حطّيتها ع النار و قلت نمشي نعمل حاجة تصلح مدام حضرت. ماو مش مستانسة بحكاية امشي ارجع و اقف عل الطنجرة حتى تطيب، مشيت قلت نبربش شوية ع النات و نعمل تنقيزة كل درجين. ما نعرفش كيفاه، لقيت فيلم عندي مدة شريتو و ما تفرجتش فيه. عملت هكا حطيتو!

نتفرج و نبكي و نمخط و نحس الدنيا بدات تضبب شوية ماي الدنيا بدات تظلام، عملت هكا شعلت الضو. و زدت انغمست ف الفيلم نص ساعة اخرى. من بعد نشم في ريحة كيما ريحة الشويان نهارت العيد، ريحة فحم يعني. قلت شوف سيدي درا شكون م الجيران نافح و عاملل barbecue ف ها الجو الربيعي. نزيد شوية و عمال البيت تضبب. درا كيفاه شعلت انبوبة في مخي و صحت فرد صيحة "الماكلة"! مشيت نجري هازة الـ couette فوق ظهري، لقيت الدنيا كلات بعضها. الكوجينة ما تتراش م الدخان و ما وصلت حليت الشباك كان ما لعبت عليا الدوخة. نتدهشر و نكحكح و مزال عندي امل، لقيت الطنجرة ماعاد فيها ما تشوف، قطعة فحم على حالها، الماكلة اللي في وسطها تبخرت، ماعادش تترا من اصلو. هكاكة على دخلة بابا!

الحق سكت، ماقال شي، لا عارك لا شابط و قعد يدور معايا على شبابك الدار بش تتهوى و ما نكملوش الليلة ف الاستعجالي.
اما كي الّي شفت في عينيه نظرة التحسر على ايامات امي... مش هوا برك. حتي انا!

كتبتها:bent 3ayla على الساعة: 12:20 ص | عدد التعليقات:13

عسلامة ويامرحبا و زارتنا البركة وسيدي النبي.. ايا سيدي، هاو بش نرجعو لنشاطنا المعهود بعد ها الفترة متع تدوين تاطير ملام و كعور و دز للاعور حاشاكم الكل. الله غالب، تهردت عليا من كل شيرة و اختكم قريب بش تستنسخ روحها سبعة نسخ مطابقة للاصل و شوف تخلط ولاّ باقي تجري قدين و ما تحلى في عين. نهار كامل و انا هَيْ هَيْ وَرَرَيْ وباقي اللي هاذا هازز خشمو و مقصرة في حقو، لا ما حقوش!

اساعة قبل ما نبدا التدوينة لازم كي العادة نوجه التحية لمزود الانترنات العزيز على قلبي، يوريني فيهم نهار الا وهو بلانات. غدوة كان حليتو الجرايد بودورو و لقيتو خبيّر في صفحة صدى المحاكم على فتاة في ربيع العمر تهجم على مقر بلانات بالسواطر و تحتجز كمبيوتر و عشرة كابلوات راني انا! جيبو القفة و ايجاو. نهار كامل و انا شد الحيط هاني جاي. ماو بعد شهر مرج لقاولي الحل و هو انهم بش يبعثو رويجل على عين المكان بش يفهم الداقزة اشنية. و كل نهار و انا شادة الحيط و كان نخرج نوصي الجيران بش يعسو و نشري في كعك الورقة و الروزاطة بش نستنى السيد. قلت وه، بعد ما تعرفت عل السرفيس تكنيك بكلو عن طريق التلفون و فحت في شطرهم و زرّقت للشطر الباقي، لازم الواحد يبيّض الوجه ع المباشر. اما مادام قريب الجمعة بش توفى ولا حد منهم طل، انا قلت لازم واحلين كل واحد يقول للاخر هاذيكا مشومة ولسانها موذي امشيلها انتي. عاد هاو على رؤوس الملأ نعلن الهدنة معاهم و اللي السيد اللي بش يجي ماني بش نعملو شي، عليه امان الله!

ايا توا بعد ماكملنا الشكوى و السلام و الاعتذار، توا نشدو نخدمو على رواحنا.

عندي فترة تجيني هكا ايميلات لطيفة جدا و مسالمة برشا، اماليها يتهمو فيّا اللّي انا حكاياتي الكل كذب. و كان طارت طارت اهوكا فيها حويجة صحيحة. انا نعاود نسلّم على ها العباد و نقلّهم يا جماعة راهي الحكايات صحيحة و كان طارت طارت نبدل فيها شوية للضرورة الشعرية ولاّ بش نخفى شخصية المقصود بالكلام. مش حلو، خاصة توا كي الامور الكل تكشفت، نبدا عيني عينيك نغسللهم في صابونهم بالكاشف و ايجا منّا شوف اش عنّا.

و من جيهة اخرى قالك اشكون تسخايب روحك نهار كامل و انتي تعمل ف المواعظ و تعطي ف الدروس؟ فيق على وضعك عاد! العباد باقية ليك ياخي؟ ايا امالا سيدي، في اطار ما يطلبه المشاهدون بش نقص شوية من صنعة قصة و عبرة اكا اللي كانو يعديوها مع الاصدقاء الصغار و اللي جا اليوم دمعو على خدو بش يقرا درسو، نقلو الله غالب الكتّاب سكّر ، ارجع بعد الصلاعة. توا الحكايات و الحكايات الفارغة و يامن ادراك. و ماغير ما يجيني فريق اخر يقلّي بالله ها الحكاية اش محلها م الاعراب و علاه تحكي فيها، من توا، لا غائية ولا منفعة. هرّان و برّا.. ايا سيدي شد عندك، هاو دوسي محمم، مسود، مفحم. ولو جات الدنيا دنيا بنات العايلات ما يصيرش عليها، و حتى لو صار، ما تحكيهاش! اما اش تحب تعمل؟ المخ طاسة و الفم كسكاس.

يا سيدي بن سيدي، ف احد السفرات السعيدة متاعي، اتلم شملي مع صحيبات توانسة لبرّة و بنيات من دول شقيقة و صديقة عندي مدة عليهم. البوس و التعنيق و الوحش الكل هبط. و بالطبيعة بدات التخطيطات : نمشيو لهنا، نحوسو غادي و نحنا شلّة و صحيبات ووين يطيح الليل نبات. وحدة منهم، على قد ما تحكي علينا لعرفتها، العرفة اشتهات تتعرف علينا، قالت هاذم النسا اللي بش يبدلو وجه الارض -تي مرا كبيرة و خرفت، ماغير ما تاخذو عليها عاد- و بش "يقودو حركات التغيير" ف الدول العربية! مسيكنة مافيبالهاش اللي ها العبارة هاذي برك تهمة تمحيني انا بكلي من على وجه الارض!

ايه عاد ها المرا الفاضلة، قالت لصاحبتنا، هاو عندي دار محسوب ع البحر في منطقة سياحية حلوة برشا. جيبهم و عديو ويكاند و خ نفرح بيهم. الطفلة ماكانتش م العاكسين. لمّينا زادنا و زوادنا، تشاركنا في كادو للمرا و شدينا الثنية. نلقاو كورتاج متع كراهب يستنى قريب بش يهزو درابوات و يعملو بينا دورة شرفية. ضيفونا الجماعة، فرحو بينا هزّونا للدويرة، دار شط صغيرة مْنَمْنْمَة، متحفنة، تعمل الكيف و حتى الشط مش بعيد، تجي ف الصفة الثانية ع البحر. ايه عاد لقينا شعب اخر يستنا، احبابها و امّاليها و نخبة من علية القوم ف اكا المدينة و صحافة تصور و تخلد ف اللحظة التاريخية اللّي بنت عايلة حالّة فمها طاقة تجرش في الـ canape بالسومون.

وفاتشي الحفلة و اتمسحتشي العشا؟ الجماعة قامو بعملية انسحاب شامل و زودونا بالدعوات الصالحة بش ربي يكثر من امثالنا (تي مانا زعام ف التمثيل عاد). و زادت المرا قبل ما تخرج وصاتنا على رواحنا و قالتلنا ماعندكم ما تخافو، البلاصة هاي برشا و اعمل تَلْ للشرطة تجيك في اقل من دقيقة. اكا البنيات الحاذقين لمّو الدنيا فيسع فيسع و الموزيكا تشرقع و نحنا ركبنا جن الشطيح. بش نهبطو لقشة م السما. عملنا قهوة، عصير، قطانية، لعبنا، ضحكنا، حكينا و باقي فينا النفس. تلفتنا يمين يسار، قلنا ايا حلّها سهرية ع الشط للصباح و عنبو اللي يفسدها.

مادام متهنين بالمنطقة الآمنة و البوليسية اللي ف الدورة، هبطنا تسعة بنيات حاشا ها العينين نتراقصو للشط. هازيين معانا ثلاثة ارديناتورات بوتاتيف و طنجرة قلبناها و عملناها دربوكة. البحر جاي في هبطة شوية. توصل تلقى كي طرف الصقالة ف الوسط، و دروج يهبط ع اليمين و دروج يهبط ع اليسار. الدنيا ظلام و الشط خلا و قفار، تقينا ع اليمين ماغير ما ثبتنا في شي. اكاهو، حلقة بنات وقُفّة بالماكلة ، الموزيكا تشرقع و الدربوكة تضرب. حتى اللي متحجبة م البنات، نحات الخمار و تحزمت فيه. الشط مافيهش ريحة الكائن البشري، نحنا و الرمل و القمرة.

نحنا مندمجين و بين الشطحة و الشطحة نعملو ترتيحة ناخذو النفس، نراو في جردة الدار اللي ع الشط، ضو صغير يتحرك، هاو طلع هاو هبط (ماو قلنا صعدة شوية)، تقولش عليه واحد ببيلة يلوج على حاجة ف الجردة. و ساعة ساعة نراو خيال وقف ورا الـbaie vitree و راجل يحكي ف البرتابل و هايض و كشاكشو طالعة. و منبعد يهبط بالشوية يتسرسب للجردة هوا و اكا البيلة.

ماو الكلوف ما عناش؟ طحنا نكتو و نتخيلو في سيناريوات متع افلام رعب، هاو لقا جثة ف الجردة، هاو درا شكون يهدد فيه و هات ماكا اللاوي. نحنا لاهين ف الحديث و الضحك و داخلين في جو الرعب، ما سمعنا كان ورانا حثلة كي حثلة الكلب حاشاكم ع اللفتة نراو زوز بروجكتورات في عينينا و يجي خمسة قدعان درا مينين خرجو، مسركلينّا في حلقة. و ما تسمع كان الوااااااك! اللي داخت و اللي تشلّت و اللي عطات على ساقيها و اكا الكمشة عزلّكة شدو جرّتها، طاحو فوقها كي جماعة الرقبي، شعرة لا تخنقت و الراس مدفون ف الرمل.

وقبل ما تقولو اشبيكم ما تلفنتوش للبوليسية اللي يجيو في اقل من دقيقة، نعلملكم اللي ها المعتدين هوما بيدهم البوليسية! شدونا غادي الوجوه مسكرة و اليدين ع الفرودة وقالك
- اش مدخلكم لديار الناس؟
- وه!! تي المرا مستدعيتنا راهي!
- بالله؟ تستغفل فيا؟ تستدعاكم و تمشي تشكي بيكم للشرطة؟ علاه، فاقت م السكرة؟
اكا البنيات طاحو يتباكاو و شعرة لا طاحو علينا. قاللك هاذي ما تكون كان مؤامرة صهيونية علينا. البوليس مشى دق على دار اكا الراجل اللّي لقى الجثة في جردتو و قالو بالحق ضيوفك؟ الراجل نكر و قريب لا نحى الشلاكة وضربنا بيها.
قتلو يا ولدي مش هوا اللي استدعانا، تي المرا متع دار اخرى!
- اااه، باهي، و كي انتوما مستدعين في دار، فاش قام مقتحمين دار الراجل؟
- ياولدي انا دار و انا مقتحمين؟ و الجاه لا قربنالها! هانا ع الشط نغنيو و نقشو ف القلوب!
- تي ايه، ماو الشط هاذا تابع دارو! ياخي ما قريتش البلاكة؟
السيد شدني من رقبتي و طلعنا الدروج حتى وصلنا لبلاكة تسد عين الشمس، مكتوب عليها بالكبير، "ملكية خاصة، الرجاء عدم الدخول". و الجهة الاخرى اللي ع اليسار شط عمومي. اش بش نقولو عاد؟ شاددنا بالكمشة!
- تعرفو تقراو ماو؟
- ايه اما....
- اما شنية ؟
الحق الحق حشمت بش نقلّو اللي لا قريتها لا تلفتلها، سخايبتها اكا البلايك اللّي مستانسين بيهم في بلادنا من نوع "الرجاء عدم القاء الفضلات". اش بش نعملو اش بش نعملو، قلبناهالو اللي احنا مش مستانسين، و اللي القانون متاعنا يمنع امتلاك الشط من قبل خواص هذاكا علاه مافكرناش مجرد التفكير الّي نحنا متسللين لدار الراجل و محيرينو في غطايط نومو.
- ايه توا اش عملنا؟ الراجل شاكي بيكم ولازم نحلو محضر! اش اساميكم؟
م الفجعة لا وحدة تذكرت اسمها كامل. وحدة منا عطاتو نومرو الباسبور كامل مع تاريخ الاصدار، اما اسمها تمحى من مخها!
-باهي وين مستدعين؟
- و الله العنوان مش حافظينو.. تي اهيا الدار قريبة..
- باهي اسم المرا مولاة الدار؟؟
- و الله على طرف لساني اما...

يعني عصابة متسكعين مجهولي الهوية يحوسو في ملك الناس... قالك لازم الليلة تباتو ف المركز و من غدوة ربي يعمل دليل! م الغبينة، طحنا نضحكو ف القاعة و باقي مش مصدقين. غدوة الجراية ماعندهاش خبر غيرنا. من جيهة تصاورنا ف العشا و الحفلة و الهيلمان و من جيهة تصاورنا في صدى المحاكم! الجماعة كي اللّي سخفناهم ولاّ حاجة، سخايبونا دخلنا و خرجنا ف الحلّة. تحركت فيهم النزعة الابوية. يعملو هكا يلمونا ف الباقة و يركبوني بحذاهم بش ننعتهم على ثنية الدار. ايا سيدي، وصلو، قيدو الادريسة، كلمو مولاة الدار و خذاو علينا تعهد بش ماعادش نقربو لدار السيد.
ايا مدام الحكاية قعدت بسترة ربي، م اللي كانت مصيبة ولات نكتة. و الله لا يعاود اكا الليلة!

كتبتها:bent 3ayla على الساعة: 9:41 م | عدد التعليقات:15

مانعرفش كان قلتلكم قبل اللي الخطابات النسوية féministes و اكا الجمعيات اللي تدافع عل المرأة تقولش عليها جمعية الدفاع ع الحيوان وبرا عاد كان يزيدو يلمو بعضهم و يجيبو زوز ولاّ ثلاثة نساء يحكيو على تجربتهم و يبداو الدموع تجبد. اكا الحكايات تفددني، تيقرني، تكرهني ف النهار اللّي تولدت فيه مرا. خاطر اغلبيتها نقاشات من نوع يا امّا رانا خير منكم يا رجال و طيارة عليكم و لو جات الدنيا دنيا رانا نقودو فيكم بالكف، ولاّ العكس. تمسكين و تذوبين و قريب بش يساسيو بالجاه خفّو علينا شوية. ايه مافيها باس كي النسا تتلم في اطار انها نوع معين، كيما يتلمو اي جماعة تربط بيناتهم حويجة، اكا الخضر متع البيئة، جمعية لاعبي الشطرنج، تعاضدية احباء البيس، اما اكا الفزعة -و هاذي خاصة البرة- و الوجوه المسكرة و نساء تسيب في لحيها و حواجبها اش قالك و اش قال عليك انوثتها داخلية ليها و مش بش تعجب الرجال، حتى هذا شي ماقالش بيه ربي.

المهم، بالرغم من هذا قررت اني حتى انا نكتب حويجة في نهار المرأة خاصة انو السنة بالحق نهارها، اما نهار عليها مش ليها. ماو جا بالمولد و العصيدة عاد! و نحنا تبارك الله اعيادنا الكل بالماكلة و التمخميخ. يمكن ارحم واحد العيد الصغير للّي ما يحلش بالطبيعة من بعدو المولد اهوكا متع نهيرين ثلاثة تحضير و تمرميد برك و قمتّهم عاد، اكا حرب الداعس و الغبراء اللي هوا العيد الكبير.

ايه سيدي عاد، كيما التوانسة الكل، تلمت العايلة في الدار الكبيرة اي دار الجد - الله يرحمو- و اللي سكنوا فيها اغلبية خوالي و عينك ما تشوف الاّ النور. اساعة الصلاة ع النبي م الضيوف اللي تخرج تستقبلهم من باب الشارع، غلطت و كملت سلمت على مرا متعدية بالصدفة ف النهج، بوسة منا و بوسة من غادي. ولو انو اللي يضحك ف الحكاية انو كاري وحدي وحدي فهمت اللي النسا ما يجيوش بش يعيدو عليك. يبعثو رجالهم وولادهم برك!

ما ترا كان ولد ولد بنت خالة بوك داخل مع جمهروش صغار يرميهملك ف الدار قالك الصغيرات توحشوك و توحشو اندادهم و جاو بش يعيدو عليك، شفت ماو؟ الوحش ما جا كان ف المواسم و الحركة. بالطبيعة يرميهم للنسا متع الدار و يلمو الرجال بعضهم و يخرجو للقهوة. يعني تتحلك انتي روضة ف الدار و تتقلبلك المنطقة الخضراء و البيوت الكل مسكرة بالمفتاح و تدور ع البريزات تغطيهم و تبدى تجري كي الكلب المكلوب من بيت لبيت و خايف اش من مصيبة بش تصير و يتغلبو فيها ع المخيلة الخصبة متاعك. و من جيهة اخرى تاكل عركة من عند امك اللي انتي تتهورب م القضية و محشية في بيت بش ما تعاونش. ترصيلكشي هازز الصغار بالكل بحذاك في فم الكوجينة و الباقي تكرى ف النسا الكبار بالفلوس بش يعسو عليهم؟

خلّي عاد من جو اكا الناس الكل تتلم في دار وحدة بش تعمل حوسة وحدة و مسيكن اللي تتحل الحوسة في دارو، لجمعة مبعد و هوا ينظف ف السقف م العصيدة. و زيد م الفوق الضيافات متع الجايين و التاي و الغلة. و اللي داخل ضيف يكمل يلقى واحد ف القهوة حاير بصغارو يكمل يجيبهملك و يرجع للقهوة و الاخر يدعيلو بالخير و يدعي ع النسا و يجيهم ويعطيهم كيفاش اعقاب عمرو لزمتو مرتو بش يشد الصغار ولو نهار ف العام.

ايه عاد ف الجو الخرافي هاذا الكل، دخلت لقيت الدار تملا و تفرغ already. سلمت و بست حتي حناكي طابو و لبست الطبلية و التقريطة و استلمت موقعي في ساحة الوغى. نتدكك ع الجماعة قلتلهم ايا كل عام و انتوما حيين بخير اهوكا العيد بعيدين السنة! اللي هاذي هزت راسهم من فوق الطنجرة ولا الكروانة و قاتلي يسمعنا علم الخير، اش من عيد زادة؟ ياخي استقلينا من جديد ولاّ "تغيّرنا" مرة اخرى؟ بشرتهم الي هوا النهار العالمي للمرأة و يامن ادراك. اللي هذي طاحت تضحك حتى زرسة العقل ظهرت. الحق سالوني اسئلة محرجة.

قالك ايه و مبعد؟ بش يعملوه نهار عطلة عالمي للمرا؟ ولا بش يخرجو مرسوم نهارتها الرجال يرتّحو نساهم و اللي يشدوه يحوس ف القهوة و مسيب المرا تندب في سعدها بش يضيفوه ف المركز و لا يعديوه لاصلاحية تعليم التاطيب؟ ولاّ اللي تقوم تلقى صغارها قرّرو بش يعتقوها نهارتها لا شقاء لا نبيح لا اهفت ريض؟ ولا نهارتها النساء اللي تخدم الكل بش يجيو يقولولهم والله لا صارها، ارجع اتخمد ارقد ولا برا سرّح ساقيك و شم طرف نسمة؟ تي برا حتى لو جاو بش يزيدوهم عشرة لاف ف الشهرية زعمة زعمة مهبة.

انا وحدة م الناس (اهوكا بالنيابة عليكم يا رجال) قلتلهم اشبيكم ما تهتمو كان بسفاسف الامور؟ تي ماو حويجة معنوية بش تعرفو قدركم و معزتكم عند رجال العالم بكل، و زيد اهوكا نهار كامل يذكرو فيكم بالمكاسب و الحقوق اللي ما كنتوش تحلمو بيها، اش مزلتو تحبو؟ هاكم تخدمو بش تصرفو ع الدار ولا بش تاخذو قرض على شهاريكم بش تعاونو في شريان الدار ولا الكرهبة للسيد، هاكم تسوقو بش تمشيو تكركرو القضية م المرشي، هاكم تدخلو و تخرجو بكل حرية و م الفوق تشبعو بالغزل المجاني اللي يرضي غروركم وقداه من مرة يوفى بعركة و دور الكار للمركز... زايد ما تحمدوش ربي على نعمتو!

بالله عليكم يا رجال، احرمونا من عيد المرأة، ماناش وجه عز. اهوكا متبرعينلكم بيه، توا نعملولكم عيد الراجل و اعطيونا بقية العام نقاسيو فيه كيفكم، نروحو مسيكنات تاعبين من طرح البلوت ف القهوة و نتفرشو كي كدس العزا قدام التلفزة و انتوما تشلوشو بين يدينا..

كتبتها:bent 3ayla على الساعة: 6:45 م | عدد التعليقات:13

وحدة م الناس، الفلسفة المستقلة عل الواقع و الابحار في الفكر المجرد يكسرلي راسي. نحب فلسفة الناس البسطاء في دنيتهم. العبد اللي بكلمة منو ولا تصرف منو يحللك عينيك على برشا حاجات و يفيقك اللي الدنيا تنجم تكون عندها ابعاد اخرى مش بالضرورة منطقية ولاّ بالاحرى خاضعة لمنطق مش منطق الاغلبية. معليناش، ها الوقفة الوجودية هاذي صارتلي البارح ف الحجامة. و كيما تعرفو، اكا العشرين ميترو مربع اش يصير فيه و اش تنجم تشوفو فيه. ما احسن م الحمام ف اكتشاف المجتمع، كان الحجامة.

البارح شديت بلاصتي فوق الكرسي و جبدت الايبود و كتاب زلزلة بالانقليز على درا اش يحكي، و جيت بش ننتهز اكا النصف ساعة جبدان شعر في حاجة تصلح. انا حليت الصفحة و يد اتمدت م الفوق نحاتهولي هوا و الايبود. هزيت عينيا ف المراية باهتة، لقيت سي شكيب ورايا. سي شكيب هوا صانع ف الحجامة اللي نمشيلها. يعمل عمرو ثلاثين سنة، ماهوش gay للي يصنف الرجال اللي يحجمو للنسا. طفل عسل الدنيا، حليلتو، ديما ضحاك و دمو خفيف. يحب التقطيع و الترييش و يدخل خشمو في كل هدرة وعندو القبول بطريقة عجيبة. و زيد مالفوق صنايعي. المهم، سي شكيب قاللي كيفاش تجي للحجامة و تنعزل ع العالم؟ هذي سنايس خايبة ما نحيهالك كان انا... كان قعدت! بهتت قتلو علاه بش تبدل م الحانوت؟ قاللي، استنا هاني جيتك. مشا عمل قهوة ليا و ليه و جا قعد و بدا يخرفلي.

شكيب طلع عندو صالون متع حجامة، اما هوا مسيبها و يخدم ف حوانت الناس. علاه؟ هاو علاه.

سي شكيب الحجام دارهم لاباس عليهم برشا و الكرهبة الـ BM اللي البرا متاعو. هوا الوحيد فيهم اللي طلع المستوى العلمي تر. ما حبش يقرا، مهما حاولو فيه شي. مخو يجي عند الجبر و الهندسة و كل المواد و يتسكر. قراو الدروس الخصوصية عملو، شي، طلع سطل في جنبو نقبة. عاد قالولو ايجا اخدم ف واحد من معامل بوك، قاللهم الف و اعوذ بالله. و تغرم مللي صغير بالحجامة. دار الحوانت الكبار اللي في تونس الكل و زاد حتى م باريس تشعبط عمل ستاج عند الكسندر الزواري و يا من ادراك. و عجبتو الحياة البوهيمية اللي عاشها. فرخ حر و الفلوس موجودة ولا مسؤولية لا شي، العز!

توا هدرة اربعة سنين يتعرف على طفلة تقرا ف كلية الطب. علاقتهم كانت شي يشبه للكذب، من نوع قيس وليلي يعبدو بعضهم عبادة. اربعة سنين لا تعاركو لا صارت بيناتهم مشكلة لا شي. اللي العباد تبكي عليه هوما ما جاش بيناتهم. لا غيرة لا صراع قوة لا فلوس لا مصلحة لا تقلقيل لا شي. و زيد صحابها هوما صحابو و صحابو صحابها. تفهم و انسجام اكثر من هكا ماعادش. بعد الطفلة ما كملت و دخلت تخدم ف السبيطار، قالو اكاهو، بش يعرسو! و غادي وين بدات المشاكل.

دار الطفلة قالولها كيفاش انتي طبيبة و تاخو حجام. مش حتي متع رجال، متع نسا! و دار شكيب قالولو نحنا ناس بقدنا ومعنانا. و الطفلة بوها يخدم عامل تنظيف ف البلدية، زبال بالعربي و امها كانت تخدم ف الديار. صحيح قراو بنتهم ووصلوها ولات طبيبة، اما ما يمنعش. اللي خذا خذا اليد بكلها البنات اكثر م الهم ع القلب و انتي على شكون ترضى. صارت حرب و شكيب و الطفلة شدو الصحيح. الجماعة قبلو الخطبة بالكلمة على مضض اما كل واحد يمينو في سدرو. العشاق يحضرو ف رواحهم و يخططو ع الزهاز و الدار و الموبيليا و اماليهم كل واحد يخطط في جهة.

بو شكيب يستغل نفوذو و يدبر تهمة م الحيط لبو الطفلة، يضيفوه جمعة ف المركز متع الشرطة هكاكة بوبلاش. و زاد هددو اللي كان الطفلة ما تبعدش ع الطفل بش يكمل يخفيه على وجه الارض وماعادش يعرفولو ثنية. و كان سمع الكلام و جاب بنتو للثنية، يتكفلو بمصارف قراية بقية اولادو حتى البرا كان لزم. نتيجة التهديد بطات و الطفلة باقي شادة الصحيح. تمشي ام شكيب تشكي تقول اللي ام الطفلة تخدم عندها و سرقتلها خاتم ديامنت و عطات اوصاف الخاتم، اللي هوا الخاتم اللي هداه شكيب لخطيبتو. رصاتلهاش مرا كبيرة بقدرها بايتة ف المركز حتى هيا؟ بو الطفلة ماكانش م العاكسين، يلم جماعة م الحومة الشعبية اللي ساكنين فيها و يهبطو لدار شكيب يحجروها و يكسرولهم كرهبة و يكملو يقتلو كلبهم! ولاتش حرب اهلية و مرج؟ اكا الزوز فروخ عيفوهم في رواحهم. عملو هكا بطلو الخطبة و ربي يسمعنا على بعضنا الخير.

كان ع الطفلة ولات جهامة تمشي ع الارض و تْسِلتت، اللي يراها يخاف، ماعاد فيها كان العظام. وكان على شكيب، هج اشهرة غاب غاب و رجع مدمن شراب و يدو ملفوفة. بعد سكرة م السكرات، روح جبد لام متع حجامة و حل عروقو. خلطو عليه ف الاشواط الاضافية. بالرغم من هذا ديارهم قلوبهم ما حنتش. سي شكيب يسيب الحانوت اللي عملهولي بوه بش يرضيه و يسرح في حوانت الناس. بالصدفة تجي الطفلة للحانوت اللي يخدم فيها. ما قاوموش رواحهم و رجعت المياه لمجاريها حبني و نحبك و من بعدنا الطوفان.

العشاق الزوز قررو انهم يهربو. بش تتخلى هيا ع الخدمة و البرستيج و دارهم و تهج معاه، و هوا بش يتخلى على فلوس p'pa و يهج معاها. كملو اجراءات السفر و خذاو الفيزا لاخر الدنيا و هاو يستناو ف اللحظة المناسبة... شكيب مش مستانس بالتمرميد و عمرو ما تحمل مسؤولية، اما قالك على خاطرها مستعد يمشي لاخر الدنيا. و بش يعمل على روحو و الفلوس ماعندها ما تعنيه كان بش يعيشها بالقدا و يهنيها. اما بلاش باكا الطفلة شي ما يحلالو، و لو عطاوه ذهب الارض. وهاو كان بش ينتحر بيدو لولا لطف ربي.

اكا الوقفة قدام الموت خلاتو يفهم الي الدنيا حكاية فارغة. و الروح بسهولة تطلع و اللي يحب يعيش، ما يعرفش على عمرو وقتاه يوفى. فاش قام يحسب فيها برشا؟ و هاو يتشعبطو بش يهبطو لقشة م السما... ديما احسب روحك مازال عندك نهار اليوم برك بش تعيشو... لوج علي تحبهم، اعمل اللي تعرفو يسعدك وما تبجل شي على سعادتك. هيا كرتوشة يا صابت يا خابت..

الجمعة الجاية كان ريتو شعري كيما Jackson 5 اعرفو اللي شكيب سيب كل شي و هز بنت الزبال اللي ما شفعلهاش الطب و يحوس ف الكندا.

كتبتها:bent 3ayla على الساعة: 9:20 م | عدد التعليقات:10

يا روح لا تحزني ويا قلب ضلك هني
زوار جينا عالدني و العمر بحر و نهار

يا روح لا تحزني ويا قلب ضلك هني
زوار جينا عالدني و العمر بحر و نهار

زوار جينا عالديني يا هالفقير و هالغني
راس الشجاع ما بينحني لو صار مهما صار

الذل طعمو مر ما يديئو الحر
الذل طعمو مر ما يديئو الحر

و الحب هوي السر
و العمر تذكار
يلي غارق بالاوهام فِزْ اطلع لادام
عزك فيك و زلك فيك هالعمر كلو منام

عزك فيك و زلك فيك
هالعمر كلو منام هلعمر كلو منااااااااااااااام

كتبتها:bent 3ayla على الساعة: 3:20 م | عدد التعليقات:7

رغم اللي دايخة بالتعب و النوم و السخانة تقلي، قلت لازمني ندون. الى متى و انا كل يوم غدوة و عاملة روحي مولى الدار مش هوني؟ هاو كل مرة سِبَّة، هاو مرة تهديد بالعنف من عند صحابي، هاو مرة ما فماش كونكسيون، هاو مرة مريضة... كثرت على ماوصاوني. فاضين شغل انتوما تقعدو كل يوم تطلو و تلقاوني مقيلة؟ ايا سيدي، التدوين بلا تمسكين.

المهم، اليوم زادة اهوكا استشارة قانونية على رحمة الوالدين. و الموضوع موجه للجماعة اللي تحب تعمل ثورة جنسية و لامّة بعضها ف الفايسبوك و فاضحينا عند الخلق اش قالك و اش قال عليك نحنا دولة ما تحترمش حقوق الانسان و قامعين اهم حرية من حريات الانسان، الحرية الجنسية و يامن ادراك. فك عليك قالو حرية التعبير و المعتقد و التنقل و الحرمة الجسدية و الحق ف محاكمة عادلة. هاو الرسمي، اعطيونا الحرية الجنسية و الباقي خوذوه.

اساعة يا سيدي هاو م اللول نحذر ونعاود. البوست هذا تقراوه للاخر. ما تقصش ف الشطر. اللي يسكّر قبل ما يكمل، مانيش مسؤولة عللّي ح يحصل. تبعوني للاخر و من بعد اعمل ما تريد. مش تاقفلي في ويل للمصلين و كي تونّس الجماعة ف المركز تقول بنت عايلة كرّت عليا لا تربحها ولا تختملها. ايا سيدي نعرف برشا بش يفرحو و عينيهم بش تزغلل بالدموع و برشا اخرين بش يقولولي يعطك الصحة للّا الشّابة ناقصين حلاّن عينين احنا؟؟ اما ماكم تعرفو، العدالة عمياء! عجبكم ولاّ ما عجبكمش، ما سياتي ذكره قانوني لا غبار عليه.

ايا سيدي نحب نعلمكم (و ها الشي مش جديد على جماعة القانون، يعني مانيش جايبة الصيد من وذنو) انو ف القانون التونسي، المُخَادَنَة ماهيش جريمة! قبل ما تقلي و انا اش يهمني فيها ها اللّي تحكي عليها، نقلك اللّي المخادنة هيا بالعربي concubinage ، اه عينيكم تحلت توا مش هكا؟ ايه يا سيدي من حق اي تراس و شنتية يشدو عشة يسكنو فيها لا زداق لا زازة و لا من يسالهم حاجة. شفتو دولة القانون و المؤسسات؟ اشكون زاد علينا؟ اما قبل ما تقوم ترقص فرائصك من السعادة، شد كمل البوست يهديك.

المجلة الجنائية التونسية ما جرمتش المخادنة. جرمت الاغتصاب ايه، جرمت مواقعة قاصر حتى برضاها، ايه، جرمت الشذوذ الجنسي ايه، اما الـ concubinage لا. يعني مافماش نص صريح يجي يقلك اللي كي ثنين يشدو يسكنو مع بعضهم خارج اطار الزواج يعتبر جريمة. و ف القانون الجنائي لا جريمة بدون نص. ماو الجنائي يشدو فيه الحبس و يدفعو الخطايا، يعني حاجة صندي ف العظم، و لذلك ماتنجم تمس م حرية الانسان و تحدها بالحبس الّا كي يبدا فما نص يحدد اركان الجريمة و يحدد العقاب الخ الخ الخ. و بربي التعليقات من نوع تونس دولة عربية الاسلام دينها، ما غير ما تضيع وقتك و تحطها. خاطرها out وماهيش حجة قانونية بالكل.

ايا سيدي، قبل ما تحل LaPresse و تبدا تلوج على دار للكراء انتي و فزغولتك، كمل البوست يهديك. خاطر برشا بش يتعجبو ويقولو امالا ها اللي نهار كامل هادين عليهم ف الديار و ناشرين صابونهم ف صفحة صدى المحاكم شنوة؟ و قانون اخلاق حميدة و افلام رعب ف البلفيدير حتى الواحد ولّى يخاف يشد يد صاحبتو ف الكياس.... اااه هنا حل عينيك و تبعني يهديك.

قبل كل شي، اي حاجة هكا ولا هكا ف مكان عمومي، راك تباصي. ف الشارع في كرهبة ف الشارع، تحت سجرة، بحذا فسقية اللاّك، الكلو مكان عمومي. تي حتى في دارك بحذا الشباك اللي يعطي ع الشارع، راهو مكان عمومي. يعني بلاصة خلق ربي يقصو تساكر و يجيو ينقشو القلوب و يتفرجو فيك، يعتبر مكان عمومي و اعتداء ع الاخلاق الحميدة كل شي بسترة ربي يعيشك.

اول حاجة بالنسبة للمخادنة، مالازمهاش تكون بالفلوس. وقتها تولّي بغاء سري. تشد الحبس انت و الحبيبة اما كل واحد في جيهة حبس للنساء و حبس للرجال. و ثانيا مالازمش تكون فيها جريمة زنا. وقبل ما تقلّى كيفاه جات هذي، نقلك الّي الزنا هنا مش بالمعنى الديني للكلمة، لا بالمعنى القانوني. الزنا في القانون متاعنا -ربي يخليهولنا خ نسترزقو- هو اقامة علاقة جنسية و انتي تبدا معرس، يعني تخون زوزك. و بالتالي ما يجيش تبدا كي الطبل تضرب ع الشيرتين، من جهة معرس و من جهة عندك عشيقة، خلّي شوية لخواتك المواطنين.

ثالثا،
لازم تبدا واضح في مخك و معاها ومع الناس. راكم عشاق برك! وقبل ما تقول اشبيها طلعتلها السخانة بش نمشي قدام الجيران نبرح راهي مش مرتي و عايشين ف الحرام؟؟ هاني نأكد و نعاود. رد بالك يطغى عليك الحب وتعيط لعزيزتك مرتي! اه مشات فيك و ف الحشّاشة وقتها! خلات عليك. خلّي عاد كان تكب سعدك بيدك و تقراو فاتحة بينك و بينها ولاّ تكتبو وريقة و تخبيوها فوقكم... تدبرو عويّم اقامة خمس نجوم ف بوفردة. وقتها يولّى زواج على غير الصيغ القانونية و اش بش يفضها.

حاسّتكم اللي بديتو تفدو. من جيهة جبتلكم خبيّر ما كنتوش تحلمو بيه و طحت نقلك ايه و لكن ولكن ولكن و لكن.. اما اش تحبو تعملو؟ نحللكم عينيكم ولا تقعدو على عماكم؟ و نزيد نقلكم، الّى للاسف، ف الواقع ماو رجال الشرطة يسمعو بالقانون سمعان، خللي عاد بش يفهموه و يفهمو الفرق بين المخادنة و الزواج العرفي و البغاء السري. كان يشدوكم تمشيو تبحثو حتى يتبين الخيط الابيض من الاسود. يعني كي يسمعو بيكم ساكنين بلا زداق، يشدوكم حتى تتعداو قدام المحكمة و تحلفو اللي انتوما ما عندكمش نية الزواج و اللي انتوما عايشين ف الحرام و فرحانين ببعضكم.

خلاصة القول، برا فك عليك و تقولش عليا ما قلت شي، فاش قام التمرميد؟ صحيح حرية و ممارستها قانونية، لكن كيفها كيما بقية الحريات متاعنا، ع الورق برك.

كتبتها:bent 3ayla على الساعة: 10:33 م | عدد التعليقات:19

شفتو كيفاه؟ هاو صحابي طلعو ناس ملاح و قلوبهم رحيمة و نفوسهم ابية و مغروسة فيها مبادئ الرحمة و التسامح و الغفران. و طلعو اوفياء للمبادئ اللي تغرست فيهم منذ الصغر من الشفافية و الديمقراطية و اعتماد الحوار كوسيلة لفض النزاعات وديا. مش هزان قفة و تبندير اما هذيكا الحقيقة راهو!

اه حقا ماو فتكم بالحديث وفما منكم اللي ماهوش من اصدقائي عل الفايسبوك و بالتالي ما سمعش بالهدرة و ماعرفش سر تسكيرة البلوغ. الحكاية و مافيها يا سيداتي، اوانسي، سادتي، انو نهار السبت بمناسبة اللي عندي جمعتين حارمتهم من رفقتي و طلعتي البهية، و ولى عنا شكاير متع حديث، و زيد بصراحة غرت كي ولاو يطفيوني و يخرجو بلاش بيا، قررت اني نتواضع و نخرج معاهم.

اساعة صاحبتي اثبتت انو مهما الزمان يمر، القيم الثابتة ف علاقتنا لازم تقعد. بطبيعة الحال هدت عليا ف غطايط نومي (ولو انو و الحق يقال عنا موعد اما ماكم تعرفوني انا و المواعيد مش صحاب). المهم، جات الطامة و العامة بش يقيموني، وكل واحد يقترح طريقة يا ماء، يا حرقان شعر، يا اباري... ف الاخر فضتها امي، كلمتين قمت واقفة كي الجندرمي. حضرنا لوازم القعدة و بدينا هرهر هرهر ساعة، اثنين و نحنا نتساررو و انا نرعش في بلاصتها و هيا تبكي على حالتي. اه، صحبة و اللي يقلك.

المهم كملنا الشوط لوّل، قلنا توا نوسعو القعدة و نضمو بعض العناصر الذكورية للقعدة. هزينا رواحنا و كلمنا رفيق الدرب، تاج راسنا و نور عينينا سي "الضايع". لقيناه يتسكع ف الكياس يحوس بالشلاكة، بدينا من بعيد نزمرو تزميرة العرس و صاحبتي خرجت راسها م الشباك تصيح و تعيط. ردة فعلو ع اللقاء الاحتفالي، انو وقف في وسط الكياس، نحى الشلاكة من ساقيه و شعرة لا رماها علينا. معزة كبيرة راهو، قريب لا هرع الى مقابلتنا حافي القدمين.

لميناه م الكياسات و شدينا الثنية بش نتعشاو. من كليمة لكليمة، حاصروني بالاسئلة من نوع وينك مختفية و اشكون الجماعة اللي تعشيت معاهم البارح و منين تعرفهم و كيفاه. انا كي اللي عيني بش نحكي اما خايفة. ما نعرفش ردة الفعل متاعهم اش بش تكون. بالمرج و التبعكيك، قلتلهم انتوما تبعو البلوقوسفير؟ قالولي لا. قلتلهم انا نتبع. هاذوكم مدونين، تعرفت عليهم...

تلفتلي سي الضايع و قاللي، بمناسبة اش تعرفت عليهم؟؟ طبست راسي ف صحن المقرونة، بعولت بعولت، عملت رشفة ماء. تلفتت يمين يسار. و هزيت راسي و ابتسمتلو. قالي، ما تقليش انتي... انتي منهم! عينيا اختفاو ولاو نكتين و ابتسامتي اختفات و نكتة عرق هبطت على جنب.

صاحبتي غزرتلي بالقدا و شفت في عينيها استرجاع للماضي السحيق. قاتلي، برا برا... نعرفوك بنت عايلة! دخت. قلتلها كيفاه عرفت؟ ياخي قريت البوست متع الشكلاطة؟ قاتلي صارا انتي حاكية عليها؟؟ برا يكب سعدك و يفضحك كيما فضحتنا. نعري عليك راسي يا فاتن يا بنت عايلة، يكشفك كيما كشفتنا، يفرج عليك الخلق، يوريني فيك نهار!

انا م الحكاية الكل ما همني كان نعرف كيفاه عرفت، مدام ما قراتش المدونة. قاتلي، شوف حكمة ربنا يا مؤمن. مش جمعتين لتالي اُلهمت اني نفصع م الخدمة و هديت عليك كي العادة؟ ماو تسلفت الارديناتور الاحمر -يطلع منو اكا الفقسة- و حليت بش نشوف حويجة ع النات؟ اول صفحة تحلتلي compte gmail باسم بنت عايلة. وقتها ماني على نياتي، قلت لازم متع حد اخر و هيا تسديلو في خدمة. ماجاش لبالي اللي انتي عندك حياة دوبل.

بعد ما تكشف المستور، قلت ايا سيدي، تفضحنا و تفضحنا، طحنا نفدلكو و نحكيو انا و الضايع و الطفلة ساكتة. تتامل ف صحن المقرونة و عينيها زاعزة.
- يا بنتي اش بيك؟ يا بنتي جاوبني. شي! الطفلة مبهمة.
-باهي متغششة خاطر البلوغ ف حد ذاتو ولا خاطر خبيت و لا خايفة مللي حكيتو؟؟
-....... اه؟ شكون؟ كيفاه؟

نحنا هكاكة و يكلمني مدون صديق، مار بالصدفة من اكا البر. قتلو ايجا انظم و اتعرف. ايه الحق كي ولاّ فيها حكم اجنبي، الجماعة بردو الحكاية بضحكة و ولاّ جو ما نحكيلكمش. ساعة ساعة نهز راسي نلقى المطعم كامل ساكت يتبع ف طاولتنا اش قاعد يصير فيها. كملت رضيتهم بطرف ديسار و خلصت الفاتورة كي قدر عليا ربي. ودعنا الاخ الحكم الاجنبي و شدينا الثنية. وصلوني للدار تهناو عليا دخلت الكرهبة و شدوني ف الجردة، الدنيا ظلام و مافما كان القمرة طالعة. علي مرتين بش يتكاو عليا واحد ببالة و الاخرى بمسحة. و حاولو يسطنتقوني باساليب حضارية جدا حول مضمون المدونة.

قلتلهم برا روحو ارقدو و غدوة الصباح اعملو قهوة و اجبدو اقراوها في عقلكم. و اللي ما يساعدكمش نحيه. لعنو ابليس النزيس و شدو الثنية. انا مشيت نجري فيسع فيسع سكرت المدونة حتى يعمل الله دليل. و بتت ليلة نحلم بالكوابيس و بانتقامهم هوما و انتقام اللي بش يقولولهم. و انتوما هاكم شفتو. فرشت صابون برشا عباد. غير ربي يقدر الخير و برا. خللي الواحد ياخو عطلة مفتوحة م التدوين الى ان. توا صحيح عملت برشا صداقات من ورا ها البلوغ. اما كلو افتراضي. كي نوحل في عركة و حاشتي بشكون يحز تره؟؟ بش تساندوني بالتعاليق و الايميلات؟ ماو لازمني نحتفظ بصداقاتي الواقعية زادة!

الحق ايمايلاتكم و تشجيعاتكم اني نواجه الموقف بكل صلابة، خلاتني نعاود نفكر ف ها القرار.
المهم، سخفتهم و تيتمت عندهم حتى سامحوني و رضاو عليا و قاللك ميسالش، انتي نعرفوك ماكا العام المخ معدوم، و الفضايح هانا نعملو فيها live كل يوم، قعد على طرف ها البلوغ؟ دون و ربي معاك مع الاحتفاظ بطبيعة الحال بحق الرقابة المسبقة على اللي نكتبو، و هذا باقي في اطار التمسك بالثوابت الراسخة في بلادنا.

كتبتها:bent 3ayla على الساعة: 8:23 م | عدد التعليقات:13