نحب اول حاجة نهني اللّي بعث يسأل ع الوالد، نقلّو الحمد لله. صحيح الراجل صحتو تسلّت و نهار نهارين ماشي لا فطور لا قهوة و هوا يترهوج، و نزيد نهار على ثنين ننسى مانشريش الخبز، اما باقي لاباس، مزال فيه النفس.
ثاني حاجة، بالله، بجاه اللي يعز عليكم، برحمة المتوفي و بحياة راس اللّي عايشين، توا و انتي تقرا ف البوست اعمل اللّي نقلّك عليه. تلحلح في قعدتك، سيب الـ souris و كان لابس كسكات ولاّ فولارة ولاّ اللّي هوا، نحيها و هز يديك لراسك و شبشب شعرك و ادعي معايا، لا تباركلهم، لا تختملهم، لا يثمر فيهم، لا يربحهم، يوريني فيهم نهار بجاه النبي المختار، يعطيهم مكّانة قوية بجاه خير البرية. بالطبيعة عرفتوهم و ماغير ما نزيد نسميهم. و ما تقولوش اللّي انا انسانة حقودة و ما نصفاش و لتوا لا طويت صفحة بلانات.

و الله العظيم لا. البارح سِخْفو عليا، رجعو الكونكسيون شطر نهار بعد شهر قصان، شبعتهم بدعا الخير. صبحت اليوم مالقيت شي. بعولت بعولت، و مبعد عاودت كلمتهم،قالولي وينك يا لّلا، عندك فاتورة مش خالصة. صحيح مابعثوهاش، و صحيح للاشهر اللي جاية -ماو يخلصو بالمسبق- اما قصينا عليك. ماكم تعرفوني الحق حق، هزيت روحي كي الناس الملاح مشيت قرقشت الفليسات من لحمي و دفعتهم. روحت فرحة مسرورة، و انا نمني في روحي بغطسة ف بحر الانترنات ودولاشة ف المدونات. يا دوب نصيّف ساعة و انا نبقبق في الانترنات و نبتبت، طلعتلي اكا الصفحة متع وينك، جبدنا بيك. كي كلمت الجماعة، كايني هكا سمعت ضحكة شماتة، و قالك ايا سيدي، مادامك تعرف الاجراءات، ايا هاو بش نعاودو نبداو م اللّول بالكل.
ايا سيدي معليناش، اخطاونا منهم، ولو من توا نتوجه للقراء اللّى مشتركين عند بلانات، برا بدلوها خيرلكم، راهو من هنا لشهر لقدام، المقر الاجتماعي و المركز التقني متاعهم بش تتعرض لمجموعة عمليات فدائية.

البارح العشية جاو صحابي نوروني بزيارة هايلة. كانت متع نصيف ساعة، ما روحو كان نص الليل. و صنفتلهم عاد و ذوقتهم من يدياتي شي ماكانوش يحلمو بيه. ولو لتوا ماتحصلت على حد منهم و ربي يستر لا صارت فيهم بعض العملة. المهم، جبدنا خنار و شي، عمرنا لا حكينا عليه مصارناالكل خرجناها. تي بالعمل جبدت حكيتلهم على اول قصة حب ف حياتي. وقتها كنت نقرا ف المكتب، يمكن عمري سبعة سنين، و قعدت نعشق ف طفل مْسَهوِكْ معايا ف القسم قرابة الثلاثة سنين. اما وينك، بالساكت، العين ترا و القلب يوجع. صحيح ف صلاعة الصيف كل عام ننوي انّي نبطل و نستقوى على روحي و نتوب، الاّ انو للاسف، كل ما نرجعو م الصلاعة تلقاني نغزرلو و ريقتي سايلة. و لتوا باهتة كيفاه حتى حد لا فطن لا المعني بالامر لا صحابي. خاطر وقت اللّي كنت صغيرة كنت عيرود (هوا لتوا اما ما تقولو لحد) و كنت محسوبة ع الولاد مش ع البنات، نضرب و نشفر و نهجم على الخصوم بكرسي و نقز م السور بش نفصع م المكتب. اما نجي قدام سي المْسَهوِكْ و نبدا خانسة ساكتة، عاقلة و طيبة القلب و كان عندي طرف شكلاطة ولا ستيلو مزيان ولا مسطرة تشعل بالضو، نعفس على قلبي و نمدهالو.

المحبة العظيمة هاذي اللي قعدت ثلاثة سنين تكوي فيا ولا قلت وَكْ، كيفاش وفات و انقلبت الي حقد اعمى؟ ماو ديما كانو يعملولنا مسابقات، هاو المبياد متع حساب، هاو متع مسرح، هاو مسابقة ثقافة عامة بينا و بين مكاتب اخرى، اختكم رغم تكركيرها و بخلها، كانت م المتفوقين ف القراية و م المغرومين بالثقافة، كي تفد تجبد القاموس وتبدا تقرا فيه. المهم، ولّى عندي سمعة متع بو العرّيف ف اكا المكتب. و ديما يكركروني يشاركو بيا ف المسابقات، حتى لو كان متع اقسام اكبر مني. منهم نهار عملولنا مسابقة متع شطرنج. برشا مكاتب و تصفيات و هيلمان. ايا سيدي مكتبنا عندو ثلاثة يمثلوه، المسهوك و انا و طفلة صفاقسية صاحبتي برشا كنا بالطرح انا وياها، مرة هيا لولا و مرة انا. ايا توزعنا كل واحد ف مجموعة و تعدينا الدور الاول، ثمن النهائي، الطفلة طاحت ف ربع النهائي و انا و المسهوك تعدينا. المهم، الدور النهائي، نطيح انا و المسهوك وجها لوجه!

بطبيعة الحال، الطرح م اللّول كان غير متكافي. خاطر انا و الحمدو لله كي نشد الصف معاه نفقد حبالي الصوتية، فمابالك كي تجي العين ف العين و الفطشاطة ف الفطشاطة؟ كان تلقاو فيا ربع مخ، صحة ليكم، هزوه اعملو بيه عجة، السماح دنيا و اخرة. اما كي بدينا نلعبو، حسيت اللّى لعبو مش متع صحاح، يعني اهوكا، يعرف القواعد و شوية تفركيح و برا. مش كيفي، ماو كنت ف اكا الفترة مغرومة بالادب الروسي و نحب نتقمص الدور كما يجب، اعاد ف الفترة هاذيكا
، تغرمت بالشطرنج و وليت نمشي مع خالي كل نهار احد للقهوة يشربني حليب بالشكلاطة و كايك و نقعد نتفرج فيهم كيفاه يلعبو. تعلمت برشا خطط و تحركات ع الرقعة.

في عوض نستغل اكا الشي ف المسابقة و نربحها عن جدارة كيما نستحقها بالفعل، جيت قدام سي المسهوك و تْسَهْوَكْت اكثر منو. كل تحريكة نعملها بش نربحو هوا. نسلّملو ف البيدق و نبتسم، نعطيه الرخ و نضحكلو، نكرفتلو الفيل و وجهي يحمار وقلبي يدق، الطرح كمل ف درج يمكن. الطفل اول واحد متفاجئ و باهت، و انا وين تلقاني بالسعادة؟ قلت سايي، اليوم حس و فهم التضحية و من غدوة توا يجي يقعد بحذايا ف القسم (شوف ف اكا العمر الواحد شنوة كانت اقصى طموحاتو).

ايا سيدي صبحت غدوة مِتْهَمّمَة ولا بسة سبادريا الاحمر و السروال الجديد و ربطت شعري زوز قرون -الله اعلم علاه كنت نحس اللّى المشطة هاذيكا اكثر وحدة تواتيني، alors que تعطيني وجه متخلفة ذهنيا- و هزيت معايا بزايد شكلاطة و حلوى معملة بش نقسمهم معاه. وصلت للمكتب، لقيت السيد واقف فوق طاولة يتبجح و يتفخر بالانجاز اللّي عملو البارح تقولش عليه عاود حل الاندلس، و كيفاه غلب بنت عايلة ويامن ادراك و وراها الزنباع وين يتباع. و هوا واقف فوق اكا الطاولة و العباد دايرة بيه وافامهم محلولة طاقة و اللّي مش مصدق و اللّي شادة تركينة و تمخط و اللي مشا حفر بالكُمبا فوق الطاولة التاريخ متع الهزيمة النكراء متاعي. الطفل في عوض يحس بالامتنان ليا، ولّى بطل قومي. قول جات بالصلاح خاطر عرفت شكون يحبني و شكون يغزل عليا.

اما ما تخافوش، ثارت لكرامتي بالوقت. اول حاجة قتلو صحة ليك البارح كنت مريضة و اليوم نوريك شكون يغلب. بالطبيعة عملنا طرح بدّعت بيه، لا فهم كيفاه خسر لا وقتاه، و زدت مبعد تلفتت للشلة اللّي كانت مساندتو، زدمت عليهم بكرسي المعلمة، مهدتهم بطريحة، و عفست في كرش المسهوك شعرة لا طلعتلو روحو و كملت صبيت سطل الشيفونة -اكا اللّي يبدا ماء مسود مفحم- في كرتابتو، فوق كرارسو و كتبتو الكل، و ختاما طلّعت فيهم القاب نكراء لصقت فيهم ليومنا هاذا.

باهي الواحد يقول علاه حكيتهالكم ها الحكاية الكل؟ البوست الجاي تعرفو!

كتبتها:bent 3ayla على الساعة: 2:56 م

تعليق غير معرف ...

the first

17 مارس 2009 5:43 م

تعليق غير معرف ...

et oui l amour

17 مارس 2009 5:50 م

تعليق Free Eagle ...

حب صـــــــــــــــامت

17 مارس 2009 6:05 م

تعليق anonyme17 ...

يعطيك الصحة و ربي يقويك على بلانت ...في جرتها محرومين من برشة ضحك أما أكثر حاجة ضحكتني هي ....باهي الواحد يقول علاه حكيتهالكم ها الحكاية الكل؟ البوست الجاي تعرفو! هههههههههههه

17 مارس 2009 6:54 م

تعليق kmr ...

mat9ollich tla3 bloggueur w 3awedt t3arreft 3lih dernièrement???? :))))))))))



dhaher fazet kima hakka man5ammem fehom ken éna!!!




ps: w mezelt tal3eb mli7??? wela naf7et soghr???


ps2: 9addech 3andha la7keya??? yjichi hakkeka 12, wéla 13 snè??? 9otlikchi!!! :))))

17 مارس 2009 7:41 م

تعليق tuniziad ...
أزال المؤلف هذا التعليق.
17 مارس 2009 7:48 م

تعليق غير معرف ...

ya kmr rahou 3morha 99 ans
donc la7keya liha aumoins 92 ans


ps: j ai efface le commentaire pour cacher mon nom donc je reviens en tant qu anonyme

17 مارس 2009 7:50 م

تعليق pfffff ...

merci
lezem tafdha7ni 9oddem la3bed lkol
mnin na3ref 3lik ena elli enti tai7a love wa9tha w 5allitni nerbe7

17 مارس 2009 8:06 م

تعليق Nomade ...

@ .K.M.R
ماهو ما تشلّقش عاد! خلّينا نتبّعو زعمة زعمة ما في بالنا بشيء

D:

@ بنت عائلة
كيف العادة شخت و ضحكت و العباد تتفرّج عليّا و تقول ربيّ يكمّل :)
أمّا على حكاية بلانات يعطيك الصّحّة : أعصابك إسمنت مسلّح!!

17 مارس 2009 9:58 م

تعليق غير معرف ...

c'est toujours un plaisir de lire tes posts, vraiment quel talent !
ana l'anonyme illi yokhtob fik nhar elkol quoi que ma3adch anonyme ana taoua pour toi du moins pour toi :)

18 مارس 2009 8:38 ص

تعليق Happyness ...

3assléma,
eni ned3i m3ak nhar w lil w sbé7 w 9ayla w 3chiya 3ala planet
9oul aaaaaaaaaaaaaaaamine
eni el facture 5alsa bel msaba9 w planet ma3jébhéch mchét 9assét ligne, 9allek nthabtou fi chkoun 5alles w chkoun ma5allasch !!!!!!!!!!!!!
mana3rafch est ce que 3andehom des informaticien wela lé la79i9a, ama a9la 7aja tabda 3andhom base de donnée wela un fichier excel w ya3mlou tri
a9reb 7aja ennhom ma 3andhom service informatique 5ater houma 9assou 3a nnes el kol w elli ya3ref rou7ou 5ales yb3ath el facture bech yét2akdou w ken 3éjbek rahou, mech rana ghaltin w sama7na ...............

18 مارس 2009 11:11 ص

تعليق غير معرف ...

ايييييييه محلاهم هكا ليّمات ...

18 مارس 2009 1:56 م

تعليق غير معرف ...

:bourne
bent 3eyla @
iiiiiih 3lech thaw9ou chew9ou ??
ti 3ena jom3a nestenew t5alina m3al9ine !
rabi yehdik !
7a9a ech bik me9beltnich fil facebook ?

18 مارس 2009 2:31 م