رغم اللي دايخة بالتعب و النوم و السخانة تقلي، قلت لازمني ندون. الى متى و انا كل يوم غدوة و عاملة روحي مولى الدار مش هوني؟ هاو كل مرة سِبَّة، هاو مرة تهديد بالعنف من عند صحابي، هاو مرة ما فماش كونكسيون، هاو مرة مريضة... كثرت على ماوصاوني. فاضين شغل انتوما تقعدو كل يوم تطلو و تلقاوني مقيلة؟ ايا سيدي، التدوين بلا تمسكين.

المهم، اليوم زادة اهوكا استشارة قانونية على رحمة الوالدين. و الموضوع موجه للجماعة اللي تحب تعمل ثورة جنسية و لامّة بعضها ف الفايسبوك و فاضحينا عند الخلق اش قالك و اش قال عليك نحنا دولة ما تحترمش حقوق الانسان و قامعين اهم حرية من حريات الانسان، الحرية الجنسية و يامن ادراك. فك عليك قالو حرية التعبير و المعتقد و التنقل و الحرمة الجسدية و الحق ف محاكمة عادلة. هاو الرسمي، اعطيونا الحرية الجنسية و الباقي خوذوه.

اساعة يا سيدي هاو م اللول نحذر ونعاود. البوست هذا تقراوه للاخر. ما تقصش ف الشطر. اللي يسكّر قبل ما يكمل، مانيش مسؤولة عللّي ح يحصل. تبعوني للاخر و من بعد اعمل ما تريد. مش تاقفلي في ويل للمصلين و كي تونّس الجماعة ف المركز تقول بنت عايلة كرّت عليا لا تربحها ولا تختملها. ايا سيدي نعرف برشا بش يفرحو و عينيهم بش تزغلل بالدموع و برشا اخرين بش يقولولي يعطك الصحة للّا الشّابة ناقصين حلاّن عينين احنا؟؟ اما ماكم تعرفو، العدالة عمياء! عجبكم ولاّ ما عجبكمش، ما سياتي ذكره قانوني لا غبار عليه.

ايا سيدي نحب نعلمكم (و ها الشي مش جديد على جماعة القانون، يعني مانيش جايبة الصيد من وذنو) انو ف القانون التونسي، المُخَادَنَة ماهيش جريمة! قبل ما تقلي و انا اش يهمني فيها ها اللّي تحكي عليها، نقلك اللّي المخادنة هيا بالعربي concubinage ، اه عينيكم تحلت توا مش هكا؟ ايه يا سيدي من حق اي تراس و شنتية يشدو عشة يسكنو فيها لا زداق لا زازة و لا من يسالهم حاجة. شفتو دولة القانون و المؤسسات؟ اشكون زاد علينا؟ اما قبل ما تقوم ترقص فرائصك من السعادة، شد كمل البوست يهديك.

المجلة الجنائية التونسية ما جرمتش المخادنة. جرمت الاغتصاب ايه، جرمت مواقعة قاصر حتى برضاها، ايه، جرمت الشذوذ الجنسي ايه، اما الـ concubinage لا. يعني مافماش نص صريح يجي يقلك اللي كي ثنين يشدو يسكنو مع بعضهم خارج اطار الزواج يعتبر جريمة. و ف القانون الجنائي لا جريمة بدون نص. ماو الجنائي يشدو فيه الحبس و يدفعو الخطايا، يعني حاجة صندي ف العظم، و لذلك ماتنجم تمس م حرية الانسان و تحدها بالحبس الّا كي يبدا فما نص يحدد اركان الجريمة و يحدد العقاب الخ الخ الخ. و بربي التعليقات من نوع تونس دولة عربية الاسلام دينها، ما غير ما تضيع وقتك و تحطها. خاطرها out وماهيش حجة قانونية بالكل.

ايا سيدي، قبل ما تحل LaPresse و تبدا تلوج على دار للكراء انتي و فزغولتك، كمل البوست يهديك. خاطر برشا بش يتعجبو ويقولو امالا ها اللي نهار كامل هادين عليهم ف الديار و ناشرين صابونهم ف صفحة صدى المحاكم شنوة؟ و قانون اخلاق حميدة و افلام رعب ف البلفيدير حتى الواحد ولّى يخاف يشد يد صاحبتو ف الكياس.... اااه هنا حل عينيك و تبعني يهديك.

قبل كل شي، اي حاجة هكا ولا هكا ف مكان عمومي، راك تباصي. ف الشارع في كرهبة ف الشارع، تحت سجرة، بحذا فسقية اللاّك، الكلو مكان عمومي. تي حتى في دارك بحذا الشباك اللي يعطي ع الشارع، راهو مكان عمومي. يعني بلاصة خلق ربي يقصو تساكر و يجيو ينقشو القلوب و يتفرجو فيك، يعتبر مكان عمومي و اعتداء ع الاخلاق الحميدة كل شي بسترة ربي يعيشك.

اول حاجة بالنسبة للمخادنة، مالازمهاش تكون بالفلوس. وقتها تولّي بغاء سري. تشد الحبس انت و الحبيبة اما كل واحد في جيهة حبس للنساء و حبس للرجال. و ثانيا مالازمش تكون فيها جريمة زنا. وقبل ما تقلّى كيفاه جات هذي، نقلك الّي الزنا هنا مش بالمعنى الديني للكلمة، لا بالمعنى القانوني. الزنا في القانون متاعنا -ربي يخليهولنا خ نسترزقو- هو اقامة علاقة جنسية و انتي تبدا معرس، يعني تخون زوزك. و بالتالي ما يجيش تبدا كي الطبل تضرب ع الشيرتين، من جهة معرس و من جهة عندك عشيقة، خلّي شوية لخواتك المواطنين.

ثالثا،
لازم تبدا واضح في مخك و معاها ومع الناس. راكم عشاق برك! وقبل ما تقول اشبيها طلعتلها السخانة بش نمشي قدام الجيران نبرح راهي مش مرتي و عايشين ف الحرام؟؟ هاني نأكد و نعاود. رد بالك يطغى عليك الحب وتعيط لعزيزتك مرتي! اه مشات فيك و ف الحشّاشة وقتها! خلات عليك. خلّي عاد كان تكب سعدك بيدك و تقراو فاتحة بينك و بينها ولاّ تكتبو وريقة و تخبيوها فوقكم... تدبرو عويّم اقامة خمس نجوم ف بوفردة. وقتها يولّى زواج على غير الصيغ القانونية و اش بش يفضها.

حاسّتكم اللي بديتو تفدو. من جيهة جبتلكم خبيّر ما كنتوش تحلمو بيه و طحت نقلك ايه و لكن ولكن ولكن و لكن.. اما اش تحبو تعملو؟ نحللكم عينيكم ولا تقعدو على عماكم؟ و نزيد نقلكم، الّى للاسف، ف الواقع ماو رجال الشرطة يسمعو بالقانون سمعان، خللي عاد بش يفهموه و يفهمو الفرق بين المخادنة و الزواج العرفي و البغاء السري. كان يشدوكم تمشيو تبحثو حتى يتبين الخيط الابيض من الاسود. يعني كي يسمعو بيكم ساكنين بلا زداق، يشدوكم حتى تتعداو قدام المحكمة و تحلفو اللي انتوما ما عندكمش نية الزواج و اللي انتوما عايشين ف الحرام و فرحانين ببعضكم.

خلاصة القول، برا فك عليك و تقولش عليا ما قلت شي، فاش قام التمرميد؟ صحيح حرية و ممارستها قانونية، لكن كيفها كيما بقية الحريات متاعنا، ع الورق برك.

كتبتها:bent 3ayla على الساعة: 10:33 م

تعليق titof ...

الحاجة الوحيدة الي باش نعلق عليها هيا حكاية القروب في الفايس بوك
الي خلاني باهت هو خمسة مسيرين من القروب من اسرائيل
ياخي شمدخل اسرائيل طالب بالحرية الجنسية في تونس
؟؟؟؟؟

5 مارس 2009 في 11:16 م

تعليق من بلد القيظ ...

هاهي بلد الحرّيات يا كبدي

5 مارس 2009 في 11:16 م

تعليق غير معرف ...

زعمة ثماش ثغرة في القانون للمتزوجين اللي يحبو ساعة ساعة تبديل سروجهم ماهم يقولو تبديل السروج فيه راحة..والا هنا الراحة لا ؟؟هههههه
وزواج المسيار هذا فيهش نص قانوني والا يعتبر مخاذنة ؟

6 مارس 2009 في 12:24 ص

تعليق عياش مالمرسى ...

برّا عاد تيتوف، غريبة فيهم وين يسمعوا كلمة حرية يهبطوا يلوجوا عالصهيوني..
بنت عايلة، كيف ما قلت انتي القانون عالورق و البوليس جاهل، و مفهوم الحرية لا يتجزأ، حرية التنقل ما تسواش أكثر من حرية الجنس و العكس صحيح..
و المشكل أكثرو اجتماعي من قانوني ولو في القانون ثمة تعديلات، مثلا العلاقة الجنسية في الأماكن العمومية ممنوعة نفهمك، أما نعرفوا شمعناها علاقة جنسية؟ خاتر كي نشوف بولسية يرفلوا في كوبلوات على بوسة نقول ما يجيش منو... كيف كيف حكاية المثلية الجنسية، شيهمك في أمو راقد معا راجل ولاّ مرا ماو الفايدة في الهنا ههه....

6 مارس 2009 في 12:28 ص

تعليق Ashistic ...

الزّح كل امارات السعادة اللي هبطت عليا من جرة هالتدوينة اللي باش نطبعها و ننشرها (حقوق التأليف محفوظة بالطبع) تبدّدت كي فكرتني بالواقع المر عبر الجملة هاذي :
" لكن كيفها كيما بقية الحريات متاعنا، ع الورق برك".

6 مارس 2009 في 4:38 ص

تعليق Zizou From Djerba ...

:-)

6 مارس 2009 في 5:40 ص

تعليق kmr ...

lèè 7low!!

jeune homme 25ans, cherche a louer un appartement avec une seule chambre (w sala 3la nharet illi thamma 3arka, nal9a win nbet) avec une fille MAJEURE, CONSENTANTE et idéalement belle, pour relation amoureuse de concubinage, rien de plus si affinité: arni manich bech n3arress!! rodd belek ya bent ennes!!!

aywah?? des volentaires???

6 مارس 2009 في 7:25 ص

تعليق غير معرف ...

مداخلة قانونية حلوة آما نسيت اللي ثمة التجاهر بما ينافي الحياء والمس من الأخلاق الحميدة واللي هوما زويّز قواعد عامة (جوكير) يهزو الزويّز اللي حكيت عليهم ويمكن حتى يهزوك انت لدار خالتك؟

6 مارس 2009 في 8:36 ص

تعليق titof ...

عياش
Wassim Wiss (Institut National Agronomique de Tunisie (INAT))
tunisie
Mouna Ben Fadhl (Tunisia)
vip
Hisham Balat (Kuwait)
Kw
Nightman Amz (Egypt)
eg
Abo Waleed (Saudi Arabia)
KSA
Aboali Abo Ali (Lebanon)
lb
سهيل عمامي (South Korea)
korea
Sathya Prasad .K (India)
ind
Bader Alsleety (Iraq)
irq
Abdul Majeed Shhadeh (Jordan)
jrd
Alan Vargas Sanchez (Chile)
ch
Misa Barghouthy (Palestine)
pl
Hagay Hacohen (Israel)
ISR
Metallistic Ashref
VIP
Red Badawe
Jord
Mounir Nabil (Egypt)
VIP
Gil Liebersohn (Israel)
VIP
Moro Gigi
VIP
Niz Chrif
tn
Loundja Nouri
Freedom defender
Mabrouk Boudaga (Dallas / Fort Worth, TX)
VIP
Samar Hayek (Lebanon)
Liban
Mohamed Turki
Khabire
Ayech Mel Marsa
VIP
Ali Lafine (Tunisia)
wazir technoligia
Maissa Ftiti
Miss Facebook
Simone Yasmiha
:)
Neo Ensan (Egypt)
VIP

6 مارس 2009 في 8:56 ص

تعليق غير معرف ...

عياش شاخ بيها لحكاية...الركشة والشراب ...يموت عليهم الزوز..وبخصوصى فى باريز

6 مارس 2009 في 9:28 ص

تعليق taxe ...

Je vous raconte mon expérience réelle à vous de juger, c'etait vers 1993 j'avais 23 ans et mon copain dans le temps, rabbi yesamhou qualli viens on passe pas le jardin du passage, wallah on n'avait même pas la main dans la main, et soudain le bouliss il vient vers papiers et tout ca et hop el merkiz accusation, el akhlaq el hamida et moi dans le temps j'étais étudiante en Droit, raîss el markiz tela3 rajel hassilou je lui ai dit le filc nous embarqué comme ca sans raison et j'ai pu hassilou me défondre car mon copain etait furieux kharrjouh mel birou, jé el bouliss el ko3liff, il a dit je les ai pas vu mais une vielle dame et venue me voir et m'a dit " Hakka fi 3ahd notre président et houma sibbou fil jélala wi yetbewssou" ya3ni khélq hékaya wi lassiq le nom du président. Bon Raiss el markiz yerhim waldih quallna barraw raouhou, bon j'ai rompu avec mon copain, j'etais malade pendant 1 semaine. Pour vous dire comment un flic pervers et obsédé va t il laisser les couples tranquilles jamais.hani tawa né3ich el barra wi béqui fia essan3a je n'embrasse pas mon mari dans la rue yelzimin thérapie :)

6 مارس 2009 في 10:58 ص

تعليق غير معرف ...

Non, pas du tout, le concubinage est puni de prison en Tunisie.
La preuve ?

http://www.sada-el-ma7akem.com/tunisie/fait/divers/3543/date/2007-09-27/titre/concubinage-en-tunisie/

Assabah - 2007-09-27
Lu 19 fois

انطلقت الأبحاث في قضية الحال على اثر توفر معلومات عن وجود فتاة رفقة شاب بمنطقة بني خيار يعيشان في منزل واحد ويتعاشران معاشرة الأزواج على خلاف الصيغ القانونية
وللغرض تنقلت دورية شرطة النجدة بنابل وبوصول الأعوان أمام المنزل وبطرق الباب فتح لهم الشاب وبدخولهم عثروا على فتاة هناك وأفادهما الطرفان أنهما يعيشان تحت سقف منزل واحد ويتعاشران معاشرة الأزواج دون وجود عقد قران الزواج بينهما.
وباحالة ملف القضية على أنظار محكمة الناحية بنابل لمقاضاتهما من أجل تهمة الزواج على خلاف الصيغ القانونية تم امهال المتهمين فترة زمنية الى أن أبرما عقد زواجهما داخل السجن ثم قضيا بخطية مالية قدرها مائتي دينار. فاطمة الجلاصي

6 مارس 2009 في 11:16 ص

تعليق غير معرف ...

Bourne
: bent 3eyla @
iiiiiih farhadtli ala 9albi, yfarhed 9albek,
weni 7eses rou7i ghalet w thed al 9anoun,
wkol menji de5el lidar nebda 5ayef mijiren kifech bech yoghzrouli ! tawa nebda de5el windez fiktefi :-p
tawa elwe7ed y3ich merte7 :-)

6 مارس 2009 في 11:40 ص

تعليق BLABZI ...

Le concubinage est interdit en Tunisie, ce qui n'est pas interdit c'est les relations sexuelles entre personnes majeures consentantes et non mariées.
L'interdiction du concubinage a été instaurée par Bourguiba, non pour faire plaisir aux imams mais pour prévenir les dérapages liés à l'interdiction de la polygamie, qu'il était en train de l'abroger à l'époque, car si le concubinage et maintenu, les polygames pourraient très bien ne pas se marier légalement, mais vivre avec 4 femmes en concubinage.
D'ailleurs, les juges doivent saisir l'esprit de la loi et non l'appliquer à la lettre, par exemple, on peut légaliser le concubinage ( ce qui me parait impossible actuellement) si ce n'est pas une forme déguisée de polygamie. d'ailleurs la France est confrontée à ce genre de problème.
Mais bon, dans la pratique, mais si on est est dans la légalité complète (il n'est pas interdit de s'embrasser en Tunisie), la réalité est toute différente et on évite la tmarmida qui s'en suit à ça, bien que l'on sait qu'à la fin, on va s'en sortir!

6 مارس 2009 في 12:42 م

تعليق غير معرف ...

welcome bacccck

6 مارس 2009 في 2:42 م

تعليق غير معرف ...

allleh ma tsalla7ch rou7ik ki 3raft annou le concubinage é interdi !!!! tghallit finness !! hakka tawa !!! ziid thabbit rou7ik lelle

11 مارس 2009 في 11:39 م

تعليق bent 3ayla ...

مثبتة و متاكدة و متيقنة و متحققة...

11 مارس 2009 في 11:51 م

تعليق kmr ...

àghayr mou3arref le5reni: ti brass weldik inti mezelt makech mthabbet rou7ik chkoun, nharet illi ta3mel ism w ta3ref t9abel la3beed b wejh w b'esm, mouch "anonyme", nharetha tnajjem tetballa 3al 3bed w t9ollhem thabbet rou7ik!

12 مارس 2009 في 12:01 ص

تعليق دكتور عامر المهذبي ...

الشنتيه معناها مجموعة من الافراد يعني أي بين ثلاثة وتسهة أفراد.

31 يوليو 2010 في 4:49 م