عسلامة ويامرحبا و زارتنا البركة وسيدي النبي.. ايا سيدي، هاو بش نرجعو لنشاطنا المعهود بعد ها الفترة متع تدوين تاطير ملام و كعور و دز للاعور حاشاكم الكل. الله غالب، تهردت عليا من كل شيرة و اختكم قريب بش تستنسخ روحها سبعة نسخ مطابقة للاصل و شوف تخلط ولاّ باقي تجري قدين و ما تحلى في عين. نهار كامل و انا هَيْ هَيْ وَرَرَيْ وباقي اللي هاذا هازز خشمو و مقصرة في حقو، لا ما حقوش!

اساعة قبل ما نبدا التدوينة لازم كي العادة نوجه التحية لمزود الانترنات العزيز على قلبي، يوريني فيهم نهار الا وهو بلانات. غدوة كان حليتو الجرايد بودورو و لقيتو خبيّر في صفحة صدى المحاكم على فتاة في ربيع العمر تهجم على مقر بلانات بالسواطر و تحتجز كمبيوتر و عشرة كابلوات راني انا! جيبو القفة و ايجاو. نهار كامل و انا شد الحيط هاني جاي. ماو بعد شهر مرج لقاولي الحل و هو انهم بش يبعثو رويجل على عين المكان بش يفهم الداقزة اشنية. و كل نهار و انا شادة الحيط و كان نخرج نوصي الجيران بش يعسو و نشري في كعك الورقة و الروزاطة بش نستنى السيد. قلت وه، بعد ما تعرفت عل السرفيس تكنيك بكلو عن طريق التلفون و فحت في شطرهم و زرّقت للشطر الباقي، لازم الواحد يبيّض الوجه ع المباشر. اما مادام قريب الجمعة بش توفى ولا حد منهم طل، انا قلت لازم واحلين كل واحد يقول للاخر هاذيكا مشومة ولسانها موذي امشيلها انتي. عاد هاو على رؤوس الملأ نعلن الهدنة معاهم و اللي السيد اللي بش يجي ماني بش نعملو شي، عليه امان الله!

ايا توا بعد ماكملنا الشكوى و السلام و الاعتذار، توا نشدو نخدمو على رواحنا.

عندي فترة تجيني هكا ايميلات لطيفة جدا و مسالمة برشا، اماليها يتهمو فيّا اللّي انا حكاياتي الكل كذب. و كان طارت طارت اهوكا فيها حويجة صحيحة. انا نعاود نسلّم على ها العباد و نقلّهم يا جماعة راهي الحكايات صحيحة و كان طارت طارت نبدل فيها شوية للضرورة الشعرية ولاّ بش نخفى شخصية المقصود بالكلام. مش حلو، خاصة توا كي الامور الكل تكشفت، نبدا عيني عينيك نغسللهم في صابونهم بالكاشف و ايجا منّا شوف اش عنّا.

و من جيهة اخرى قالك اشكون تسخايب روحك نهار كامل و انتي تعمل ف المواعظ و تعطي ف الدروس؟ فيق على وضعك عاد! العباد باقية ليك ياخي؟ ايا امالا سيدي، في اطار ما يطلبه المشاهدون بش نقص شوية من صنعة قصة و عبرة اكا اللي كانو يعديوها مع الاصدقاء الصغار و اللي جا اليوم دمعو على خدو بش يقرا درسو، نقلو الله غالب الكتّاب سكّر ، ارجع بعد الصلاعة. توا الحكايات و الحكايات الفارغة و يامن ادراك. و ماغير ما يجيني فريق اخر يقلّي بالله ها الحكاية اش محلها م الاعراب و علاه تحكي فيها، من توا، لا غائية ولا منفعة. هرّان و برّا.. ايا سيدي شد عندك، هاو دوسي محمم، مسود، مفحم. ولو جات الدنيا دنيا بنات العايلات ما يصيرش عليها، و حتى لو صار، ما تحكيهاش! اما اش تحب تعمل؟ المخ طاسة و الفم كسكاس.

يا سيدي بن سيدي، ف احد السفرات السعيدة متاعي، اتلم شملي مع صحيبات توانسة لبرّة و بنيات من دول شقيقة و صديقة عندي مدة عليهم. البوس و التعنيق و الوحش الكل هبط. و بالطبيعة بدات التخطيطات : نمشيو لهنا، نحوسو غادي و نحنا شلّة و صحيبات ووين يطيح الليل نبات. وحدة منهم، على قد ما تحكي علينا لعرفتها، العرفة اشتهات تتعرف علينا، قالت هاذم النسا اللي بش يبدلو وجه الارض -تي مرا كبيرة و خرفت، ماغير ما تاخذو عليها عاد- و بش "يقودو حركات التغيير" ف الدول العربية! مسيكنة مافيبالهاش اللي ها العبارة هاذي برك تهمة تمحيني انا بكلي من على وجه الارض!

ايه عاد ها المرا الفاضلة، قالت لصاحبتنا، هاو عندي دار محسوب ع البحر في منطقة سياحية حلوة برشا. جيبهم و عديو ويكاند و خ نفرح بيهم. الطفلة ماكانتش م العاكسين. لمّينا زادنا و زوادنا، تشاركنا في كادو للمرا و شدينا الثنية. نلقاو كورتاج متع كراهب يستنى قريب بش يهزو درابوات و يعملو بينا دورة شرفية. ضيفونا الجماعة، فرحو بينا هزّونا للدويرة، دار شط صغيرة مْنَمْنْمَة، متحفنة، تعمل الكيف و حتى الشط مش بعيد، تجي ف الصفة الثانية ع البحر. ايه عاد لقينا شعب اخر يستنا، احبابها و امّاليها و نخبة من علية القوم ف اكا المدينة و صحافة تصور و تخلد ف اللحظة التاريخية اللّي بنت عايلة حالّة فمها طاقة تجرش في الـ canape بالسومون.

وفاتشي الحفلة و اتمسحتشي العشا؟ الجماعة قامو بعملية انسحاب شامل و زودونا بالدعوات الصالحة بش ربي يكثر من امثالنا (تي مانا زعام ف التمثيل عاد). و زادت المرا قبل ما تخرج وصاتنا على رواحنا و قالتلنا ماعندكم ما تخافو، البلاصة هاي برشا و اعمل تَلْ للشرطة تجيك في اقل من دقيقة. اكا البنيات الحاذقين لمّو الدنيا فيسع فيسع و الموزيكا تشرقع و نحنا ركبنا جن الشطيح. بش نهبطو لقشة م السما. عملنا قهوة، عصير، قطانية، لعبنا، ضحكنا، حكينا و باقي فينا النفس. تلفتنا يمين يسار، قلنا ايا حلّها سهرية ع الشط للصباح و عنبو اللي يفسدها.

مادام متهنين بالمنطقة الآمنة و البوليسية اللي ف الدورة، هبطنا تسعة بنيات حاشا ها العينين نتراقصو للشط. هازيين معانا ثلاثة ارديناتورات بوتاتيف و طنجرة قلبناها و عملناها دربوكة. البحر جاي في هبطة شوية. توصل تلقى كي طرف الصقالة ف الوسط، و دروج يهبط ع اليمين و دروج يهبط ع اليسار. الدنيا ظلام و الشط خلا و قفار، تقينا ع اليمين ماغير ما ثبتنا في شي. اكاهو، حلقة بنات وقُفّة بالماكلة ، الموزيكا تشرقع و الدربوكة تضرب. حتى اللي متحجبة م البنات، نحات الخمار و تحزمت فيه. الشط مافيهش ريحة الكائن البشري، نحنا و الرمل و القمرة.

نحنا مندمجين و بين الشطحة و الشطحة نعملو ترتيحة ناخذو النفس، نراو في جردة الدار اللي ع الشط، ضو صغير يتحرك، هاو طلع هاو هبط (ماو قلنا صعدة شوية)، تقولش عليه واحد ببيلة يلوج على حاجة ف الجردة. و ساعة ساعة نراو خيال وقف ورا الـbaie vitree و راجل يحكي ف البرتابل و هايض و كشاكشو طالعة. و منبعد يهبط بالشوية يتسرسب للجردة هوا و اكا البيلة.

ماو الكلوف ما عناش؟ طحنا نكتو و نتخيلو في سيناريوات متع افلام رعب، هاو لقا جثة ف الجردة، هاو درا شكون يهدد فيه و هات ماكا اللاوي. نحنا لاهين ف الحديث و الضحك و داخلين في جو الرعب، ما سمعنا كان ورانا حثلة كي حثلة الكلب حاشاكم ع اللفتة نراو زوز بروجكتورات في عينينا و يجي خمسة قدعان درا مينين خرجو، مسركلينّا في حلقة. و ما تسمع كان الوااااااك! اللي داخت و اللي تشلّت و اللي عطات على ساقيها و اكا الكمشة عزلّكة شدو جرّتها، طاحو فوقها كي جماعة الرقبي، شعرة لا تخنقت و الراس مدفون ف الرمل.

وقبل ما تقولو اشبيكم ما تلفنتوش للبوليسية اللي يجيو في اقل من دقيقة، نعلملكم اللي ها المعتدين هوما بيدهم البوليسية! شدونا غادي الوجوه مسكرة و اليدين ع الفرودة وقالك
- اش مدخلكم لديار الناس؟
- وه!! تي المرا مستدعيتنا راهي!
- بالله؟ تستغفل فيا؟ تستدعاكم و تمشي تشكي بيكم للشرطة؟ علاه، فاقت م السكرة؟
اكا البنيات طاحو يتباكاو و شعرة لا طاحو علينا. قاللك هاذي ما تكون كان مؤامرة صهيونية علينا. البوليس مشى دق على دار اكا الراجل اللّي لقى الجثة في جردتو و قالو بالحق ضيوفك؟ الراجل نكر و قريب لا نحى الشلاكة وضربنا بيها.
قتلو يا ولدي مش هوا اللي استدعانا، تي المرا متع دار اخرى!
- اااه، باهي، و كي انتوما مستدعين في دار، فاش قام مقتحمين دار الراجل؟
- ياولدي انا دار و انا مقتحمين؟ و الجاه لا قربنالها! هانا ع الشط نغنيو و نقشو ف القلوب!
- تي ايه، ماو الشط هاذا تابع دارو! ياخي ما قريتش البلاكة؟
السيد شدني من رقبتي و طلعنا الدروج حتى وصلنا لبلاكة تسد عين الشمس، مكتوب عليها بالكبير، "ملكية خاصة، الرجاء عدم الدخول". و الجهة الاخرى اللي ع اليسار شط عمومي. اش بش نقولو عاد؟ شاددنا بالكمشة!
- تعرفو تقراو ماو؟
- ايه اما....
- اما شنية ؟
الحق الحق حشمت بش نقلّو اللي لا قريتها لا تلفتلها، سخايبتها اكا البلايك اللّي مستانسين بيهم في بلادنا من نوع "الرجاء عدم القاء الفضلات". اش بش نعملو اش بش نعملو، قلبناهالو اللي احنا مش مستانسين، و اللي القانون متاعنا يمنع امتلاك الشط من قبل خواص هذاكا علاه مافكرناش مجرد التفكير الّي نحنا متسللين لدار الراجل و محيرينو في غطايط نومو.
- ايه توا اش عملنا؟ الراجل شاكي بيكم ولازم نحلو محضر! اش اساميكم؟
م الفجعة لا وحدة تذكرت اسمها كامل. وحدة منا عطاتو نومرو الباسبور كامل مع تاريخ الاصدار، اما اسمها تمحى من مخها!
-باهي وين مستدعين؟
- و الله العنوان مش حافظينو.. تي اهيا الدار قريبة..
- باهي اسم المرا مولاة الدار؟؟
- و الله على طرف لساني اما...

يعني عصابة متسكعين مجهولي الهوية يحوسو في ملك الناس... قالك لازم الليلة تباتو ف المركز و من غدوة ربي يعمل دليل! م الغبينة، طحنا نضحكو ف القاعة و باقي مش مصدقين. غدوة الجراية ماعندهاش خبر غيرنا. من جيهة تصاورنا ف العشا و الحفلة و الهيلمان و من جيهة تصاورنا في صدى المحاكم! الجماعة كي اللّي سخفناهم ولاّ حاجة، سخايبونا دخلنا و خرجنا ف الحلّة. تحركت فيهم النزعة الابوية. يعملو هكا يلمونا ف الباقة و يركبوني بحذاهم بش ننعتهم على ثنية الدار. ايا سيدي، وصلو، قيدو الادريسة، كلمو مولاة الدار و خذاو علينا تعهد بش ماعادش نقربو لدار السيد.
ايا مدام الحكاية قعدت بسترة ربي، م اللي كانت مصيبة ولات نكتة. و الله لا يعاود اكا الليلة!

كتبتها:bent 3ayla على الساعة: 9:41 م

تعليق kmr ...

!!! ;)

5allini narja3 na9ra il post 3ad ;)

11 مارس، 2009 9:57 م

تعليق kmr ...

hahahhahahaha

bon 7aja wa7da, inti ech 3malt ki hadd il 7akem?? inti milli de5ou, wela mellio behtou... wela melli harbou?????


netsawrek t7ott 3la sa9ik... kamikaz!!! ;)

11 مارس، 2009 10:12 م

تعليق غير معرف ...

ya kmr ech biik dima mkabbech houni?
kol marra nji nal9ak lahnai

11 مارس، 2009 10:45 م

تعليق kmr ...

@ anonyme: ya 5ouya le monde appartient à ceux qui se lèvent tot.... et l'univers appartient à celui qui lit le blog de bent le premier!!! :)

eyh, w enti ech 7ra9 ch3irek la3ziz??? (en mode cheryen chbouk!! :))

11 مارس، 2009 10:52 م

تعليق Nomade ...

يا و اللّه عمايل يا بنت عائلة
أمّا شنيّا فازة الملكيّة الخاصّة في الشّط؟ قدّاش من ميترو قبل الموجة يلزمك تخلّي للملك العام، نقصد لملك الدولة؟
:)

11 مارس، 2009 11:25 م

تعليق bent 3ayla ...

ك.م.ر مش خاطر وليتلنا رئيس، بش تعطينا الحس سيدي (اش قولك ف الصيد ف الماء العكر؟)
سي غير معرف، الله غالب ماو عملت عملة حياتي و مصيبتي في دنيتي و كليت معاه ما و ملح

نوماد، لا يا للآ، قالك غادي عندهم السيد يولي يملك الشط اللي قدام دارو و لقشة من ما البحر زادة.

11 مارس، 2009 11:56 م

تعليق kmr ...

@ bent: shuuuuuuuuuuuuuuuttt!!! confidentiel!! ;)

12 مارس، 2009 12:02 ص

تعليق om youssef ...

يا والله حكايه :) كيف العادة تدوينة تفتق

12 مارس، 2009 12:11 ص

تعليق Nomade ...

لقشة مالبحر. إييييييييييييه. يهبّط إن شاء اللّه لقشة مالسّماء على راسو هو و أمثالو
D:

12 مارس، 2009 2:35 ص

تعليق Stupeur ...

يا بنت عايلة
توة بركة تحكيها الحكاية؟
كان جا في بالي بيك معاهم, راني ما شكيتش بيكم
الله غالب

12 مارس، 2009 6:59 ص

تعليق Exquiza ...

azizti,andék cha3bia mouch normal :)haw yet3arkou alik, haw y7ébou yékdouk !!!
sa77777777777a :))
good post :) mais bon kalouha kabli:)

12 مارس، 2009 12:01 م

تعليق غير معرف ...

@ exquiza
C'est pas si surprenant qu'on fight for bent 3ayla's heart :)))
après tout c'est la nouvelle Miss Blogsphere :)) (on a meme besoin de la voir en personne) ..
la preuve : 80% des cometaires
hhhhhh
Good luck guys :) c'est pas facile a ce qu'il parait de séduire la plus belle des bloggers lool

très anonyme xD

12 مارس، 2009 7:13 م

تعليق bent 3ayla ...

سي امين، و الله لو كان تطلع انتي عندك يد ف الموضوع... غغغغغغغ

نادية يا مرحبا، زارتنا البركة للّا. ربي يكثر المحبة.

غير معرف اللي مش معرف برشا، قالك اللي ما يدري يقول سبول. اولا، اشكوني الميس السابقة؟ ثانيا علاه تعمللي ف الدوانة مع المدونات؟ ثالثا، و الله العظيم نشبه للتصويرة اللي حاطتها ف البروفيف، مربعة و الشعر اكحل و الطول نعناعي و نهار كامل عينيا زاعزة م البهتة. باختصار، خليها في عالم الخيال خير ما تتصدم!
و اخر حاجة، يعطك الصحة ع المرور و المجاملة الرقيقة و العبارات اللطيفة و النوايا الشريفة.

13 مارس، 2009 12:29 ص

تعليق غير معرف ...

lool au fait il y'avait pas d'autres miss avant vous et puis avec dammek elli a5af mel hydrogen :)) impossible not to like you 7atta ken moustatila mouch mrabb3a xD
wa a5ira je tai vu marra et vs n'etes pas si mrab3a ke ça ;)

très très anonyme :D

PS: hydrogen obtenu après google--> lightest thing :D

13 مارس، 2009 11:44 ص

تعليق bent 3ayla ...

شوف يا سيدي الرواية البوليسية اللي تحلتلي...
امالا تعرفني و "غير معرف جدا" استنا خ نحسب. فمة ثمنية م الناس برك راو وجهي و يعرفو اللّى انا بنت عايلة. نحي منهم زوز صحابي يقعد ستة مدونين برك. وانا نستبعد انو تكون واحد منهم. و بالتالي ما تنجمش تكون ريتني. و اسلوبك ف مزج العربي بالفرنسي بالنقليز، يعطي على واحد برك يبعث ايميلات و اسمو سي عصام.
اللهم كانش انتي من ضحايا الشكلاطة بالثوم و بالطبيعة وقتها تعرف شكون.

و في كل الحالات ربي يخليلنا قوقل، هاو التثقيف ولاّ لوح.

13 مارس، 2009 11:58 ص