skip to main |
skip to sidebar
|
الاثنين، مارس 02، 2009
|
|
شفتو كيفاه؟ هاو صحابي طلعو ناس ملاح و قلوبهم رحيمة و نفوسهم ابية و مغروسة فيها مبادئ الرحمة و التسامح و الغفران. و طلعو اوفياء للمبادئ اللي تغرست فيهم منذ الصغر من الشفافية و الديمقراطية و اعتماد الحوار كوسيلة لفض النزاعات وديا. مش هزان قفة و تبندير اما هذيكا الحقيقة راهو! اه حقا ماو فتكم بالحديث وفما منكم اللي ماهوش من اصدقائي عل الفايسبوك و بالتالي ما سمعش بالهدرة و ماعرفش سر تسكيرة البلوغ. الحكاية و مافيها يا سيداتي، اوانسي، سادتي، انو نهار السبت بمناسبة اللي عندي جمعتين حارمتهم من رفقتي و طلعتي البهية، و ولى عنا شكاير متع حديث، و زيد بصراحة غرت كي ولاو يطفيوني و يخرجو بلاش بيا، قررت اني نتواضع و نخرج معاهم. اساعة صاحبتي اثبتت انو مهما الزمان يمر، القيم الثابتة ف علاقتنا لازم تقعد. بطبيعة الحال هدت عليا ف غطايط نومي (ولو انو و الحق يقال عنا موعد اما ماكم تعرفوني انا و المواعيد مش صحاب). المهم، جات الطامة و العامة بش يقيموني، وكل واحد يقترح طريقة يا ماء، يا حرقان شعر، يا اباري... ف الاخر فضتها امي، كلمتين قمت واقفة كي الجندرمي. حضرنا لوازم القعدة و بدينا هرهر هرهر ساعة، اثنين و نحنا نتساررو و انا نرعش في بلاصتها و هيا تبكي على حالتي. اه، صحبة و اللي يقلك. المهم كملنا الشوط لوّل، قلنا توا نوسعو القعدة و نضمو بعض العناصر الذكورية للقعدة. هزينا رواحنا و كلمنا رفيق الدرب، تاج راسنا و نور عينينا سي "الضايع". لقيناه يتسكع ف الكياس يحوس بالشلاكة، بدينا من بعيد نزمرو تزميرة العرس و صاحبتي خرجت راسها م الشباك تصيح و تعيط. ردة فعلو ع اللقاء الاحتفالي، انو وقف في وسط الكياس، نحى الشلاكة من ساقيه و شعرة لا رماها علينا. معزة كبيرة راهو، قريب لا هرع الى مقابلتنا حافي القدمين. لميناه م الكياسات و شدينا الثنية بش نتعشاو. من كليمة لكليمة، حاصروني بالاسئلة من نوع وينك مختفية و اشكون الجماعة اللي تعشيت معاهم البارح و منين تعرفهم و كيفاه. انا كي اللي عيني بش نحكي اما خايفة. ما نعرفش ردة الفعل متاعهم اش بش تكون. بالمرج و التبعكيك، قلتلهم انتوما تبعو البلوقوسفير؟ قالولي لا. قلتلهم انا نتبع. هاذوكم مدونين، تعرفت عليهم... تلفتلي سي الضايع و قاللي، بمناسبة اش تعرفت عليهم؟؟ طبست راسي ف صحن المقرونة، بعولت بعولت، عملت رشفة ماء. تلفتت يمين يسار. و هزيت راسي و ابتسمتلو. قالي، ما تقليش انتي... انتي منهم! عينيا اختفاو ولاو نكتين و ابتسامتي اختفات و نكتة عرق هبطت على جنب. صاحبتي غزرتلي بالقدا و شفت في عينيها استرجاع للماضي السحيق. قاتلي، برا برا... نعرفوك بنت عايلة! دخت. قلتلها كيفاه عرفت؟ ياخي قريت البوست متع الشكلاطة؟ قاتلي صارا انتي حاكية عليها؟؟ برا يكب سعدك و يفضحك كيما فضحتنا. نعري عليك راسي يا فاتن يا بنت عايلة، يكشفك كيما كشفتنا، يفرج عليك الخلق، يوريني فيك نهار! انا م الحكاية الكل ما همني كان نعرف كيفاه عرفت، مدام ما قراتش المدونة. قاتلي، شوف حكمة ربنا يا مؤمن. مش جمعتين لتالي اُلهمت اني نفصع م الخدمة و هديت عليك كي العادة؟ ماو تسلفت الارديناتور الاحمر -يطلع منو اكا الفقسة- و حليت بش نشوف حويجة ع النات؟ اول صفحة تحلتلي compte gmail باسم بنت عايلة. وقتها ماني على نياتي، قلت لازم متع حد اخر و هيا تسديلو في خدمة. ماجاش لبالي اللي انتي عندك حياة دوبل. بعد ما تكشف المستور، قلت ايا سيدي، تفضحنا و تفضحنا، طحنا نفدلكو و نحكيو انا و الضايع و الطفلة ساكتة. تتامل ف صحن المقرونة و عينيها زاعزة. - يا بنتي اش بيك؟ يا بنتي جاوبني. شي! الطفلة مبهمة. -باهي متغششة خاطر البلوغ ف حد ذاتو ولا خاطر خبيت و لا خايفة مللي حكيتو؟؟ -....... اه؟ شكون؟ كيفاه؟ نحنا هكاكة و يكلمني مدون صديق، مار بالصدفة من اكا البر. قتلو ايجا انظم و اتعرف. ايه الحق كي ولاّ فيها حكم اجنبي، الجماعة بردو الحكاية بضحكة و ولاّ جو ما نحكيلكمش. ساعة ساعة نهز راسي نلقى المطعم كامل ساكت يتبع ف طاولتنا اش قاعد يصير فيها. كملت رضيتهم بطرف ديسار و خلصت الفاتورة كي قدر عليا ربي. ودعنا الاخ الحكم الاجنبي و شدينا الثنية. وصلوني للدار تهناو عليا دخلت الكرهبة و شدوني ف الجردة، الدنيا ظلام و مافما كان القمرة طالعة. علي مرتين بش يتكاو عليا واحد ببالة و الاخرى بمسحة. و حاولو يسطنتقوني باساليب حضارية جدا حول مضمون المدونة. قلتلهم برا روحو ارقدو و غدوة الصباح اعملو قهوة و اجبدو اقراوها في عقلكم. و اللي ما يساعدكمش نحيه. لعنو ابليس النزيس و شدو الثنية. انا مشيت نجري فيسع فيسع سكرت المدونة حتى يعمل الله دليل. و بتت ليلة نحلم بالكوابيس و بانتقامهم هوما و انتقام اللي بش يقولولهم. و انتوما هاكم شفتو. فرشت صابون برشا عباد. غير ربي يقدر الخير و برا. خللي الواحد ياخو عطلة مفتوحة م التدوين الى ان. توا صحيح عملت برشا صداقات من ورا ها البلوغ. اما كلو افتراضي. كي نوحل في عركة و حاشتي بشكون يحز تره؟؟ بش تساندوني بالتعاليق و الايميلات؟ ماو لازمني نحتفظ بصداقاتي الواقعية زادة! الحق ايمايلاتكم و تشجيعاتكم اني نواجه الموقف بكل صلابة، خلاتني نعاود نفكر ف ها القرار. المهم، سخفتهم و تيتمت عندهم حتى سامحوني و رضاو عليا و قاللك ميسالش، انتي نعرفوك ماكا العام المخ معدوم، و الفضايح هانا نعملو فيها live كل يوم، قعد على طرف ها البلوغ؟ دون و ربي معاك مع الاحتفاظ بطبيعة الحال بحق الرقابة المسبقة على اللي نكتبو، و هذا باقي في اطار التمسك بالثوابت الراسخة في بلادنا. |
|
كتبتها:bent 3ayla
على الساعة:
8:23 م
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
enti y5allihomlik, w y5allik inti lina!!! :)
aya mar7bè bik fi ma7lek, w bin ahlek w s7abek, w mar7bè b s7abek m3ak :)
PS: encore une fois le premier!!! :)
توا صحيح عملت برشا صداقات من ورا ها البلوغ. اما كلو افتراضي. كي نوحل في عركة و حاشتي بشكون يحز تره؟؟ بش تساندوني بالتعاليق و الايميلات؟
w hek il sadi9 ilmoudawen ech 9a3ed ya3mil??? wela ma fele7 ken yafdha7 la3youb w yetlahmeg 3ala3bed????
(@مدون صديق: sans rancune 3ad!!!! :))
ayya bon retour bneyti !inchallah m7al dima 3amir
hawka je t ai envoye un email il y a 2 jours, haya tala3tnich
مرحبا(:
ya bent 3ayla ti famma eddou3aji wama adrak 3al blogosphere wenti t5ammem fechkoun y7ezz 3lik??
5ABIR EL7AZA el3alami eddou3aji.blogspot.com
à moins un j'ai cru être privé de ma lecture de nuit pour toujours!!!
l'idée ne plus pouvoir te lire... c grave
يا و اللّه بنت عائلة
صار إنت من وراهم تدوّن
ركبك بو ذنّوب لين سكّرت الكتيّب و آني قلت راهي مندري فاش تبربش في options متاع المدوّنة باش تطلع ب lookجديد...
:)
slt bent 3ayla , kima kalek kmr rabi ykalilek ashabek wykhalik inti lina vraiment tayara blog mtak nchalah tabka dima tektbelna
hors sujet:
essma3, berjoulya mbayel yesser w bech nimchi nor9ed, w ma3adech najem nestanna il post mte3ik... donc hawka bech n7ott commentaire min tawa, w e7sbou 3al post ejjdid, ok????
voila le commentaire:
@ bent: ya3tik essa7a fi hal na9cha (encore une fois), un sujet très délicat et traité au meme temps avec un humour très sympathique!!!!
PS: encore une fois le premier, et meme avant!!! ;)
: bourne
@ kmr :
chnouwa etelef fi bent 3eyla?, dima nefs el commentaire? :-p
@ bent 3eyla :
ltawa metjewezt mar7alt enedem
ltawa 5ayfa min s7abek
we7na chnouwa thenbna :-(
?????????????????????????????????????
بنت عايلة من مقى مجهول
يا جماعة راني بش نهبل ما فماش كونكسيون ايا سيدي حلها اعملو مظاهرة في مقى بلانيت
ولا اعملو وعدة لسيدي بلحسن لعلا ترجع
البوست مكبتوب عندو نهارين