هاو نصيحة للي ناوي يدخّل الـ ADSL (كان قعد شكون مازال ما دخلوش) قبل ما يشوف السوم متع كل سرعة و الفلوس اللي تسقط عليهم فيها التليكوم كل ثلاثة شهر، لازمهم اولا و قبل كل شي يعملو حساب الكوارت متع التاليفون ولا الفاتورة اللي بش يتصلو بيها بالسرفيس تكنيك. خاطر توا عندي جمعتين و ميزانية التاليفون قسمتلي ظهري. و قريب بش نوصل للنقطة اللي الاتصال بيهم بش يرجعو الانترنات بش يتكلفلي اكثر م الاشتراك بيدو. يعني بش نوصل نسلّم و ندفع فلوس البلانات و التيليكوم من غير ما تجيني الكونكسيون و انا فرحانة خير مللي ندفع و نطلب و يطلعولي الدم م الفوق.
الواحد قبل كي كان يشكي و يبكي ع الخدمات و البيروقراطية و التعاسة كان كل شي ساهل، في راس الدولة و الادارة بيهم و عليهم. اهوكا طاحو فيكم! هاو الراسمالية، هاو الخوصصة، فرحتو بيها؟ شبعتو؟ ماجانا منها كان السوم. اما نوعية الخدمات قعدت كيما هيا ولا اتعس. و قبل ما تقولو هاي طلعتلها السخانة وقتاه الانترنات كانت عمومية، نقلكم لا، نحكي ع الخدمات بصفة عامة. الله غالب، جودة الحياة مش كار قراجمنا، نحنا جماعة نرضاو بالنصب عيني عينك و نفرحو نحبو اللي يتمنيك علينا. اللي يسمع بالارقام و الاحصائيات متع "تفشي" جودة الحياة بين المواطنين التوانسة يفزع.
يبداو يسرقو فينا و عينينا تغزر و نحنا ساكتين فرحانين، اه امالا البرستيج و القشرة الموهرة ما تسمحش بش تعارك و تدافع على حقك. انهاشي من فازة صارت البارح ف كارفور؟ وقفت بش نشري شوية جبن و قوتة و نروح فرحة مسرورة لدارنا. اساعة اكا التساكر اللي كانو عاملينهم، وينك، هذاكا م الاول علي عينين العباد اللي جات بش تشوف ها البدعة اللي اسمها كارفور. توا سايي، انا الوحيدة اللي كي الدغفة مشيت قصيت وقعدت نتلفت يمين يسار نلوج ع اكا السبورة اللي تشعل. بالطبيعة بيلاتها وفات ولاّ درا شنوة من عزا، و العباد محضبة فوق بعضها لا صف لاهم يحزنون.
فما زوز بنيات تبارك الله عليهم يسربيو ف العباد، من فرطاس لفرطاس، مسيكنات ضيعو الحساب و اشكون قبل الآخر. ياخي وحدة منهم تلفّتت للاخرى وقالتلها، بالحرف اشكون قبل، الشيبة ولا ام مرايات؟ انا بردت دمي، و قدمت لساني و قعدت نستنا ف ردة فعل المعنيين بالامر، وهوما راجل يولدها و مرا مقدودة تحزق و ترخف. يعني لا واحد فيهم خصيص ولا ريقتو سايلة على وجهو.
واحد، اثنين، ثلاثة... المرا ابتسمت ابتسامة بلهاء وقالتلها انا قبل. زدت حسبت حتى لعشرة. ومنبعد ماعادش نجم، اتطرشقت. شديت الطفلة اللي تسربي مسحت بيها القاعة، فرجت عليها العباد ع المنطق الهايل متاعها. الغريب ف الحكاية، مش اللي المعنيين بالاهانة سكتو و برك. المرا تلفتلي و قاتلي يعيش بنتي ما يجيش هكا، وسع بالك، اشكان عليك؟ مش متاعنا العرك!
توا الواحد كان يشوف ف العوج ف الادارات و يبدا يتغصور و شادد روحو لا يتطرشق عليهم و يزيد يعطل مصالحو كان يتشمتو فيه. توا العباد ولات تقبل الاهانة و تبلعها بابتسامة عريضة و تلوم عللى يتكلم مقابل شنوة؟ طرف جبن! هاذم عباد تحبوهم يفيقو على وضعهم؟هاذم مواطنين تحبوهم يثورو ولا يطالبو بحقوقهم و حرياتهم؟ و هاه نندبهم، مش عليهم، عليكم ياللي تاكلو ف رواحكم...
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
نفرحو نحبو اللي يتمنيك علينا. عفوا هذه الجملة تحتوي كلمة تعتبر بذيئة فى بعض مناطق البلاد وانت مدونة تكتب للجميع ويقرأ لها كل الناس ارجوك اخذ الملاحظة بعين الاعتبار وشكرا
سبقني غير معرف. ههههههههههه. بصراحة عندها ألف حق بنت عايلة. توة بخصوص الإنترنت برشة والدين لتو ماهمش مقتنعين بيها و زيد هوما جافلين من فاتورة تليكوم متاع كل تلاثة شهور و آني واحد من الناس مصحح معاهدة مع دارنا باش الفاتورة متاع التليكوم على حساب مصروفي و في عوض ما يفرحوا بينا قاعدين يسلبوا فينا و مش ناوين يشبعوا أو يحسنوا سوء خدماتهم بابتسامة و وسع البال. أما تبقى كلمة حق توبنات خير برشة مرات من البقية و زيد المكالمة متاع خدمة الحرفاء بلاش ع الرقم الأخضر
بخصوص التهنتيل هاو شابعين بيه من الكار للتاكسي للكلية للدار للشارع للي ما نعرفش شنوة و نهارة الواحد باش يطرشق يقول ربي يستر و اكهاو و ثمة مثل يقول ( السكوت يخلي لبيوت ) و قداش من ساكت تلقاه يضحك و يعدي اما هو في الحقيقة قنبلة موقوتة تستنى في شكون يحيرها.
سامحني يا سي غير المعرف، مافيباليش اللي الكلمة فيها معاني بذيئة. الحق معرفتي باللهجات التونسية محدودة، اما ف نطاق الحديث اليومي، كلمة عادية تتقال، بمعني يتمسخر، يعديها، يتفيسخ.. و الله بهتني و دخلتلي الشك
سي النسر، انا من حزب انطق و قول، مرة منهم موظفة ف بلدية زادمة عليا بكرسي بش تكسرلي كرايمي بيه. وقولش فكيت؟ و الله لا، و كملت شعرة لا تبعتها عدليا غير رئيس الادارة متاعها لحلح بيا و حلفني براس الوالدة.
حتى احنا ما تشكرناش برشه...اورديناتور مركب فى الصين...كارت مار من تايوان...الميموار من اندونيسيا...هارد ديسك من تايلندا والبروسيسير من انتال...ويندوز بدينار ...انتيفيريس بدينار..زيدهم اشتراك 128 وخنفس دنفس بات متعششى...ونحبوها انترنات ما تقصشى وسريعة...
ya m7ahderni 3lik nhar w enti ta3mil fi 3arka!!! apparament dho7ka massaretch!!! aya wa9tech ta3mlelna "vcast" (ma3neha un post video) tsawer fih rou7ik w inti ta3mil fi 3arka!???? :p
bon, éna honnetement je suis min jme3et 3inik fik , chehed allah 3lik(w lsenek zeda fik, a7sen avoukatou 3lik)donc ma3andi mamde5elni ken "almoutadharer" ma9al9ouch adharar...
wenti hal klouf ezzeyed??? machabtech 9ahwtek nharetha???? wela choklata 7arra 5alletek 3la 3sabek??? :p
éna koll manrawwah el touness kif nokhrojj lel 9Awha mixte... walla necmhi commerces kima carrefour... nehbelll mel3wajj et dima na3mel 3arka wallit hachemm menn shabi houma y9ollek ti 3addi,wassa3 balek,ena n9ollohom mech 3ala faza,3ala ettbahlil nta3 la3bedd,el moufid wallit kif nrawwah el touness nerkech feddar ba9alla machakell !
ex bloggeur ! ya hasra !
bravo pour ton blog :) c le meilleur blog féminin depuis l'existence de la blogosphére tunisienne (avis subjectif ;) )
ah hah le dernier commentaire fih kelma zayda
haha winek ya bent 3ayla haya fasse5ou
thama mara sarkozy ja lrayis ghana 9allou fasarli chbia ena ouin man7ib na3mil 7aja filbled yokhrjouli li3bed ilkol fi moudhahrat ou inti koll ma ta3mil 7ad ma yitchaka 9alou normal ija nouarik hani bech nkharij 9anoun elli yit3ada mil peage yekhou zouz chleba9, ou 9a3dou yoghzrou elli hetha yahbit min karhabtou yekhou zouz chleba9 ou yit3ada ouala 7ad tkalam, sarko 9alou lezim chwaya zouz chleba9 trah zidhom 4 chleba9, kifkif 7ad matkallam hakeka ouychoufou fi oue7id y3ayit milb3id yekhi mcheou ychoufou chbih 9alilhom izza7 ti 7otou au moins zouz 3bed ta3ti ichleba9 hakeka assra3
توا يجي منو هكا كلام خايب ف المدونة؟؟؟ على فرض انو انا غبت ايامات و رجعت، نلقاها كليب راب امريكاني هنا؟؟يهديكم، يصلح رايكم، حافظو على نظافة المدونة.
حلوة نكتة الشلابق، شكرا سي غير المعرف. قالك كثر الهم يضحك.
سي غير العرف الاول، نكرر اعتذاري ع الكلمة و ناكدلك جهلي بمعناها ف بعض الجهات، و سنسعى جاهدين الى حذفها و تعويضها بما تستسيغه الاذن و لا تمتعض له النفوس
عندي مدّة واناانتبّع في ماتكتب واليوم قرّرت باش انعلّق عندك ألف حقّ باش توقف ضدّ الرّداءة واتحارب المنطق الهابط أنازادة كيفك مانسمحش لأىّ واحد باش يخرج على المعقول اتصوّر مرّة الخمسة امتاع الصّباح امشيت للمحطّة ناخذ تاكسي نلقى 15 واقفين ألّول عندواشكون يستنى الثاني كيف كيف الثالث الرّابع افهمت الّي يستناو في التّورسك ما نيش غالط التّورسك ايه هاكهو نمشي ناخذ انوامرهم و انقدّم اشكايةالكلّ فوريار 15 تاكسي مدّة 3 أيّام