الله يهديه خونا ك.م.ر ملّي كنت ماشية نرقد على روحي ونقوم نهار سبت فرحانة شبعانة نوم نمشي نعمل ضربات ف قرايتي اللي هملتها، رصاتلي حاسة بتانيب الضمير و بطلت برنامج الشخير و هاني عنقت الارديناتور رفيق الدرب. هاو قهوة ثانية و هاو الموزيكا تشرقع، لازم الطقوس المهدئة للاعصاب هاذي على خاطرني -و العبارة للشيخ تيتوف- "نشنع" كي نجي بش نكتب.

اساعة لازمني احقاقا للحق، نقلكم اللي انا بش نجم نكتب البوست هاذا، عملت طلة علي المرجع الانترنيتي لكل الوطنيين، و هي مدونة الاخ المتخرج من الأكاديمية السياسية للتجمع الدستوري الديمقراطي (اللي لتوا ما لقيتهاش ف كتاب التوجيه الجامعي و الا راني نصحت خويا يتبع ها الشعبة الهايلة ع الاقل نضمنلو مستقبل باهر)، شهر اكثر تحت الاسم نوفل القزوردي .

ماو قبل ما نحلها واجهة و نبدا نذم و ننقد، اساعا نتاكد هل انو الشي اللي بش نحكي عليه م المفروض انو مكفول ف بيان م البيانات ولاّ لا؟ ماو يا حسرة الواحد كان يقول حاجة مكفولة ف القانون ولا ف الدستور، توا لا! يا جات ف خطاب ولا بيان ولا فك عليك. المهم، ارتحت و اغرورقت عيناي بالدموع وقت اللي لقيت مش خطاب واحد برك، وانا زوز على التنمية المستديمة. يعني توا عداني العيب. بش نبدا نندب ونشرق ف حوايجي على حق عطاهولنا فخامته و موثق ف البيان و سي نوفل مستشهد بيه!

ايا سيدي، البارح كي العادة و العوايد، نعمل في دورتي ع الكلينيكات، مش على حاجة تقولوش اللي هوما معطلينلي مصالحي و مارجينلي عيشيتي على ورقة ولا فاتورة؟ لا وه، تي نتوحشهم وبرا، نتعدا نتصمت سويعة ع الجو، ماو نفد من روحي كي نبدا شايخة و زاهية، نتعدا نطلّع لروحي تلاثة قرامات سكر و نروّح. المهم عاد، متعدية ماشية للكلينيك اللي شهدت واقعة البرتابل و هيا كلينيك مونبليزير.

اساعا فماش اش كون يعرف ادريسة وزير التجهيز بش نبعثلو فاتورة تصليح الكرهبة اللي تهتكت م الحفر و الابار الارتوازية الموجودة ف الكياسات؟ يا رسول الله، بلاصة فيها مراكز المال والاعمال كيما مونبليزير، فيها البورصة متاعنا و اللي يقلك، و فيها مركز المونيتيك و يا من ادراك، ما نجموش يجيبو كميونة يزفتو بيها الكياسات؟ العباد داخلة مكستمة و معنقة برتاتيف و الساقين للركبة ف الطبعة و ماء القلت؟ حتي هوا هذاكا علاه اقتصادنا غارق في حفرة.

اخطانا من حكاية الكياسات، ياخي مطلوبين بينا هوما؟ علاه من بقية اهلهم بش يخافو على كراهبنا ولا بش يوفرولنا كيفاش نتنقلو ف ربوع بلادنا الخضراء؟؟ اللي خايف على كرهبتو ما عليه كان بالكريطة، اهوكا منو يوفر حق الايسونس و منو يساعد على الحد من الانحباس الحراري. ماو قالك ف سويسرا اللي ساكنين فيها احنا، وفات مشاكلنا الكل، حلينا البطالة و الجريمة و الديمقراطية و الحرية و القمع و قعدنا محموصين اكا حدنا عل الانحباس الحراري...

قلنا اخطاونا م الحالة المكربة متع الكياسات، اما ف مونبليزير بالذات، فما ظاهرة غريبة ما فهمتهاش. يظهرلي البلدية كمندات بزايد بلايك ممنوع sens interdit و ما لقاو ما يعملو بيهم، جاو لكل نهج من الجيهتين و حطو علامة ممنوع! يعني كان حصلت دخلت من محمد الخامس، تلقا روحك وصلت لمفترق طرق، يمين ممنوع، يسار ممنوع لقدام ممنوع و الاريال ممنوع! بالمنطق ما قعدلك كان يا تحفر تتعدا تحت القاعة ولا تطير تجنح ف سما ربي بش ما يشدكش بوليس ف الدورة ويعملك محضر و مخالفة. و بالطبيعة، كنتيجة حتمية العباد الكل حارقة الممنوع. و للوسع المعروفة بيه كياساتنا، هاذا يتسبب ف مواقف انسانية حساسة بين السائقين يترتب عليها تبادل حوارات رقيقة و لكمات رشيقة.

ايا اخطاونا من مونبليزير، خ نتلهاو بحاجة ف نطاقنا الجغرافي... برشا منكم يعرفو القنطرة الجديدة متع رادس، و للي ما يعرفهاش، هاو بش نوصفلكم و انتوما احكمو.

قبل اللي ماشي لمقرين من رادس، اش يعمل؟ يدور ع اليسار. فقط!
توا، بالقنطرة الجديدة؟ تطلع فوق القنطرة، تمشي شوية، تدور على رونبوان، تعاود ترجع ف نفس الكياس بش تعاود تطلع فوق القنطرة نفسها و تدور نفس الدورة القديمة!

يعني قنطرة زايدة، خلقت مشكل ماكانش موجود ه
دو عليها ديار و انتزاع و تعويض و ربحو برشا دعا شر ف الفارغ، على خاطر العباد الكل ولات تسرق للدورة القديمة و بالطبيعة سيناويو الحوار الراقي بين السائقين يتكرر هنا ايضا...

بربي اخطاونا من ها التشكيات البورجوازية شوية، متع انسان باهت ف فلوس الضرايب وين ماشية و خايف على كرهبتو م الحفر ولا من كيلومتر زايد... اللي غلب عليا بالحق اليوم، و خلاني حزينة رزينة تعزيني نقبل العزا، انو المرا اللي تنظف ف الخدمة ، زوالية على قد حالها و م الفوق ف اول شهور الحبالة. ايا سيدي، انا نعزها معزة خاصة خاطر عندها تاي بالنعناع لا يعلا عليه و انا قدام التاي الاخضر بالنعناع ما نفهم شي!

المهم، قاتلي تعملشي مزية قربني لمحطة الكار. انا كي نتحل ف الهدرة و هاكم تشوفو، ننسى روحي. كملت وصلتها للبلاصة اللي تسكن فيها. و ماغير مانقلكم وين بالظبط، اما ناكدلكم اللي هيا بلاصة كان طارت طارت ما تبعدش على تونس العاصمة اكثر من خمسة كيلومتر. اساعا بين محطة الكار اللي عل الكياس و دارها فما قرابة الكيلومتر ف صعدة يجفل منها البهيم. و كياس اللي يطلع قول من عهد فرانسا، بكلو حفر و حرادب و بقر تقص عليك... اخطانا من هاذا، هاذيكا بصمة الثقافة متاعنا. اما اللي بالحق حزنلي قلبي، انو ها الحي اللي ف قلب تونس العاصمة ف الفين و تسعة و فيه عايلات عايلات تسكن و تعيش، ما عندهمش ربط بالماء الصالح للشراب!!!!

حي في قلب تونس العاصمة بعد واش و اربعين سنة م الاستقلال، جمهروش متع عباد عايشة على سبالة عمومية تحل م الاربعة للسبعة متع العشية، و العباد بالصف تعبي ف الما!!! ويني البلدية، ويني الصوناد؟ وينو العمدة؟ ويني وزارة التجهيز؟ ويني الاكاديمية السياسية للتجمع؟ وينو سي نوفل خ نعمل بيه دورة غادي؟؟؟؟

خ نمشي نبرد وجهي خير ما نحل شوارع ف وجه عبد توا (و اللي هوا اول واحد بش يقرا البوست توا يعرف روحو!)



كتبتها:bent 3ayla على الساعة: 1:18 ص

تعليق kmr ...

l3abetheli???? barra sa7a 3lik!!! ;)


bon, les cités hehdouma mawjoudin, w le pire, bkathra!!!

thamma 7ay nsit chnowa esmou il7a9ani, ama y3aytoulou "7ay lenheyem", 5ater illi yosknou ghadi ma 3andhom ken il bheyem, yatl3ou behom lijjbel bech y9ossou il 7tab, w hek il bheyem (7acha min ya9ra ;) ) houma illi ont servi à batir la cité haut standing juste à coté et qui s'apelle maintenant: 7AY NASR!!!! ehhh oui, iltawa une cité bejnab 7ay ennaser mafihech meme pas kayess illi ytalla3 karhba!! n'en parlons pas de l'eau courante et de l'électricité...


ama dhaherli 3andhom adsl, vu les chiffres illi na9rawhom marrat!!




l9itchi telifounek???

7 فبراير 2009 في 3:46 ص

تعليق ETC...ثم ...

باهي ، يا بنت عايلة كي فرّغت قلبك ، توه تحس روحك خير و ينقص عليك الضغط.
حكاية جهة مونبليزير غريبة برشة ، كيفاش أنهج ما بين الوزارات و البورصة و البنوك و هوما في حالة رثة هذا شيء أصبح مسلم بيه و انظن الحكاية تابعة البلدية . أنا نسكن في حي الغزالة ، تسمع بيه ؟ و مقابل مدينة التكنولوجيا ، لكن النهج أو الأنهج بلاش كياس يعني ، ناتورال ، بيو bio ، و التنوير العمومي ما عندناش ، عندي معرفة في المجلس البلدي طلبت منو باش يعاون الحي على الأقل في التنوير العمومي و احنا السكان نساهمو بالفلوس ، يخّي قالي : كان قضية خاصة انعاونك أما للحي أخطاني ، هذا عضو منتخب و جاء ترشح للبلدية ، آشنوه رايك.
و على حكاية سونس أنتاردي sens interdit نهار الخميس ، بنتي طلبت ياش نشريلها لعبة الكترونيك من سوق المنصف باي ، دخلت بالكرهبة من شيرة محطلة اللواج و تبعت الكراهب باش نوصل للسوق ، يخي خرجلي عون أمن و طلب منّي أوراقي ، قتلو ماو لاباس يخّي عملت مخالفة ؟ قالي إنعم دخلت في سونس أنتاردي ، قتلو والله ماريتها في ها الخوماضة متاع قصاعي البارابول و السلع المحطوطة فوق الرصيف ...قالي أكاهو يلزمك محضر و احنا موجودين باش نطبقو القانون و نحميو الناس ، قتلو : عند الحق و القانون فوق الناس الكل و أنا ضد الناس اللي ما تحترمش القانون ، لكن ماريتش العلامه ، قالي : باهي مادامك عن حسن نية نعملولك مخالفة ب 20 دينار ، ناقشت شويه و بعد قتلو إلي تعملو مبروك ، مشيت معاه للمركز ، قريب لمحطة اللواج ، قيدولي اسمي في كراس و صححت على 20 د ، مشاء و رجع و مدلي 8 يوميات متاع 2009 يمولو بيهم التعاونية .
وقتها فهمت علاش عاملين مجهود و يشدو في المخالفين موش باش يصبوهم في خزينة الدولة اما للتعاونية الخاصه بيهم فقط. هاي التنمية المستديمة و إلا بلاش

7 فبراير 2009 في 9:16 ص

تعليق Free Eagle ...

إيـــــــــــه يا بنت عايلة علاش حيرتلنا مواجعنا بخصوص هالكياسات إلي ما يفوتوش عام خدمة و من بعد يرحم ربي و أي كياس يفوت العام لازم تحي البلدية و تعاود تحل فيه شانطي كبير. في الصيف أكثر من شطر سوسة حلوا فيه مرمة و كسروا كياسات على خاطر فاقوا بالمهندس و المقاول سراق و كي وفات المرمة ما خسروا علينا كان شوية ترقيع يزيد يكسر كرايم الكرهبة لين المسكينة تقول ( يزي ما عادش ننجم نكمل في شوارعكم ). زيد كي رجعت نقرا في جانفي و من يعد هاك المطر نلقى شوارع حي الرياض مكسرة و تقول متضامنة مع القصف الإسرائيلي على غزة. بخصوص السونس أنتردي حدث و لا حرج و باب بحر و الترو كاديرو و الكرنيش ولاو كلهم سونس أنتردي و لازمك تعمل دورة كبيرة و تجي على رونبوان الكبير متاع باب البحر و يشوفك الحاكم و كان لزم يفكلك هالوريقات من سبب و من غير سبب. فكرتني يا بنتي بمرة مشيت فيها لتونس و ضعنا و دخلت في نهج ملغم بالبلايك متاع سونس أنتردي و أول محاولة فصعة هربنا بجلودنا.

7 فبراير 2009 في 10:36 ص

تعليق bent 3ayla ...

اااااه منكم يا جماعة... تو االواحد ما يصدق لربي ينحي خمجة م على قلبو، تزيدو تحمموهولو؟ انا يا اخي نحب القزورديين يتعداو يقولولي لا ما عندكش الحق، راك تكذب عايشة ف الزمبابواي و تقول تونس.

علاه تجبدو ع التنوير؟ هانا ليوم الناس هذا لا عنا انبوبة ف كياس دارنا! حدهم حد دار المهندس متع البلدية اللي ف النهج المقابل، غادي تقولش يعسو على حبس ولا حاجة عينيك تعمي م الاضواء الشاعلة.

علاه تجبدولي ع الخطايا متع البوليسية؟ هاذوكم لازمهم تدوينة خاصة ، مش خطايا برك، لا لا لازمهم تدوينة و الله الا ما نشدهم اليوم نغسل صابوني معاهم و ننشرو.

قالك السيد خدمة شخصية يقدر عليها و خدمة للمصلحة العمومية ما ينجمش؟؟؟ ايا باهي، و الله انسان بار و يومن بالعشرة هاذا.

ايا ف وديعة ربي، هابطة للمرشي سنترال، توصيوش حاجة؟ لا لا مانيش هازة سطوش..

7 فبراير 2009 في 11:36 ص

تعليق kmr ...

surtout mathezzech il portable!!! ;)

7 فبراير 2009 في 12:06 م

تعليق غير معرف ...

كياس اللي يطلع قول من عهد فرانسا، بكلو حفر و حرادب...

لا يا للاّ، الكياسات متاع عهد فرنسا مازالوا صحاح، أسألي علي الكياسات متاع العهود الأخرى تعرف الفرق

7 فبراير 2009 في 5:17 م

تعليق غير معرف ...

heyyy !! jaime trop ton blog

12 فبراير 2009 في 11:58 م