البارح ليلة زرقا، ما رقدتش بالقدا. نوم محير برشا. جاني كشمار العادة. لا لا، لا حنوشة لا ثعابين لا غولة لا حرب... عندي حلمة خايبة تتكرر برشا و تركبلي الستراس. ليلة على ليلة نحلم اللي انا بش نسافر و ناسية و يجي وقت الطيارة. عاد كل مرة نفس السيناريو، نبدا لابسة البيجاما و نجري للمطار بالشلاكة لا فاليجة لا حوايج لا شي. الباسبور و الفلوس فقط و نبدا نهدي في روحي و نقول مادام هاذم عندي، ميسالش. تجيني في شوية حمورية وجه و تغصويرة المهم نخلط ع الطيارة. الحق، ف الحلمة عاااادة نخلط عليها. اما ف الدنيا، الله غالب مش ديما!

اساعة لازم نقلكم معلومة مفيدة. انا ما نلبسش منقالة. اخر منقالة نثبت عليها ف النوفيام، خليتها علي الطاولة بعد امتحان العربي و من وقتها لا عاد شراولي منقالة لا انا بيدي تجرات و قلتلهم اشريولي. اصلا ما كنت نحتاجها كان كي يبدا عندي امتحان، نتسلف وحدة. بقية الوقت، عااااادي، صحابي ريقهم شاح من حكاية التوخير واستانسو. اللي نقلو نتلاقاو الخمسة ما يجي كان السبعة و شوف و شوف، اللي نقلو نفطرو مع بعضنا لازمو يفهم انو نتعشاو و انتي ماشي...

ايه اما هاذوكم صحابي، نتدلل عليهم، و كي يتغششو، نكمل نهز عليهم خشم و اش يرضيني عاد! وقت اللي بديت نخدم و اللعب لا، اهوكا ساعات نعمل ع البرتابل، و البقية نرمي اللوم ع السركولاسيون. يعني انا و الدقة ف المواعيد مش صحاب. ايه اما مهما كان الطيارة طيارة!

انا نحب السفر برشا، وين نلقا فرصة بش نرسكي في بلاد ما نعرفهاش ولا حتي نعرفها، ما نفلتش، صرّي و سفساريا. م اللول بالطبيعة وقت اللي كنت صغيرة كيما كل عبد اول مرة يركب طيارة و خاصة انو كنت نسافر وحدي، كنت على اعصابي، نقطع الماكلة قبل بنهار و يديا تعرق و نتبهذل الخ الخ الخ... اما توا استانست وليت نيفو 3 . يعني وليت دوب ما ندخل و نتحشر فاكا الصراط اللي يسميوه كرسي، نحط راسي و نبدا نشخر بضمير، حتي نوصلو و يهبطو و يبداو يجبهيو عليا بالله القا وين تقي راسك ف غير ها البلاصة.

ايه عاد تلمت الظروف المثالية، من جهة استانست و من جهة مفهوم الوقت نجهلو -كي سيدي عربي الكل، ياخي بش نخرج من قشرتي؟ اكاهو بالشوية بالشوية و الحالة متاعي عمال تتازم.

مللي كنت نجي للمطار قبل بساعتين، ولات ساعة و نص. و من بعد ساعة حتي وصلت لساعة غير ربع. و قالتلهم اسكتو نهارت اللي قبل بنص ساعة. نهارتها شعرة لا رصاتلي نبوس الـ chef d'escale من راسو بش طلعوني.

هوا الواحد يقول باقي كي خارجة من مطارنا الدلول، باقي ميسالش. ضيعت الطيارة تتشعبط ف اللي بعدها و تخلص خطية. و كان طارت طارت و اخر طيارة ماو تروح تبات في داركم و يعمل الله دليل. اما المشكلة اللي انا عملتها العملة و انا نلعب خارج قواعدي.

المرة لولا رحلة داخلية في فرانسا، استنيت الطيارة اللي مبعد و خلصت الخطية و تعدات سالامات... اما المصيبة هيا نهارة اللي اختكم تحوس في بلاد لاماريكان و بش تاخو الطيارة تروح لتونس من واشنطن. بالطبيعة اللي مشا لواشنطن توا يقلكم قداه السيستام متاعها معقد مقارنة ببقية المدن.
نفس الادريسة بنفس النومرو موجودة في اربعة بلايص. شادين مربع و هاو جنوب شرقي هاو شمال غربي، الحاسيلو تقولش عليها النشرة الجهوية في تونس سبعة. بالطبيعة انا م اللول مافيباليش، وحتي كي ولا في بالي ما فهمتوش.

نهارت المرواح قعدت ندور ف اكا المترو الارضي كي الفار، حتى ضو ربي ماريتوش. و مرة علي مرة بين المترو و المترو، نبدا نكركر فاكا الفاليجة و ناقف نسرح في واحد يغني ولا في مرا عزوزة تشطح و جايبة ما عندها، ماو الشي هاذا ماعناش، و اختكم جيعان وطاح في قصعة... و الاماريكان غير الفرنسيس والاوروبيين، ياسر سامباتيك، friendly و يكبشو ف العبد هاو طقس هاو انتخابات، هاو اختلاف الثقافات، يعني تكتشف نوعية اخرى م التعامل. ايه عاد نسيت روحي جملة. ف الدقيقة تسعين نتذكر اللي انا عندي طيارة و اللي سلمت في بيت لوتيل و ماعنديش استعداد نحط ميتين ولا تلاثة ميات دولار بش نلقا وين نكن راسي بخلاف خطية التسكرة الجديدة.

نتصرف نخلط قبل الطيارة بنص ساعة. اما ماو بعد 9.11 الاجراءات ولات مشددة خاصة كي يشد الباسبور و يلقاك من بلاصة عربية. عندك استقبال خاص، كولوار خاص و تفتيش خاص و تحقيق خاص. ولو انو صارتلي نكتة على ها الحكاية... ماو قالك السوائل الكل اللي يفوت حجمها 3Oz استنا خ نشوف قداه بالمل، تقريبا اقل شوية م الميا. لازمك تحطهم في شكارة بلاستيك و توريهالهم. نهار ناسية اللي عندي في ساكي رولو سكوتش اكا النوع الكبير وفيه اللام متاعو، يعمل عرضها تسعة صانتي، يعني تحل بيها وجه عبد بسهولة. انا ماشية نزرب وقت اللي وصلت للتفتيش و جيت بش نحط الساك تذكرتو....

الساك حصل دخل ف الماكينة، ابتسمت ابتسامة عريضة و بريئة جدا و قلت للمرا سامحني راهو... انا مزلت ما كملتش الجملة و يترماو اربعة قدعان علي اكا الساك.
قلت خلات عليا، كان ما ترصيلي في غوانتانمو مع الجماعة. و يا عالم نخرج من غادي قبل ما نبور ولا فما امل نخلط ع العرس و مازال عندي سنين نضحك بيهم في وجه المغبون...

الجماعة ما طلعوش نقزو ع الساك علي خاطر اللام اللي طولها تسعة صانتي.. طلعو نقزو عليه على خاطر فيه دبوزة ماء صغيرة نسيت ما لوحتهاش!!!! وحتي كي قلتلهم خ نلوح السكوتش باللام اللي فيه، اش كون يعرف ع البلا، لعلا ف الطيارة بين فضا وهوا يهبط عليا الوحي نولي اصولية و نتي الجماعة الكل؟ قالك لا يا سيدي، ميسالش خليها، المهم دبوزة الما ما تتعداش كي يكون على جثتهم!

ايه سيدي، ديجا انا واصلة مخر، و زدت تعطلت بالتفتيش و الحوار المتحضر هاذا... بالطبيعة خلطت ع الطيارة طايرة و عملتلها باي باي م الشباك متع قاعة الانتظار... اش بش نعمل اش بش نعمل، و زيد حتي كي نلقا طيارة مبعد لازمني نحاول نخلط ع الطيارة اللي في فرانكفورت بش نروح لتونس! ترصيليشي كيما توم هانكس ف اكا الفيلم الهايل متع ترمينال، عايشة ف المطارات؟

مشيت رميت القاتلة للجماعة متع الخطوط الجوية و جبتهالهم صحري بحري، اللي انا عثرت ف فاليجة متع واحد مسافر عل الخطوط متاعهم و دخت وصار فيا وهاذاكا علاه تعطلت. غادي وين يسمعو بهدرة كيف مانهكا يوليو يرقلو وحدهم. ياسر يخافو م العباد اللي تطلب التعويضات. يوليو يهزوك فوق روسهم، غير ارضى عليهم برك. قلبو الدنيا و لقاولي طيارة اخرى ماشية بعد خمسة سوايع علي "طيارة العين الحمرا" red eye flight وقيل اسمها هكا علي خاطرها توصل وجوه الصباح ، يعني توصل مدهشر و عينيك حمرا. قلت تي انا اعطيني نوصل برك! اما لازمني نعمل جرية باهية في مطار فرانكفورت بش نخلط ع الطيارة لتونس. وزادو عطاوني خمسين دولار تعويض عل الوقت الضايع لعلا نجوعشي ف اكا الخمسة سوايع! شوف يا سيدي قالو تونيسار قالو بلد الفرح الدائم...

ايا دخلت لداخل و بديت ندور، ماو مطاراتهم مش كيما متاعنا فري شوب و بوتيك متع قشاقش جايبينهم م السوق العربي يبيعو فيهم بكيح دم. لا شي اخر هاو مطاعم هاو كازينو هاو مساج هاو مكتبات... غير اصرف فليساتك برك. بالطبيعة تحليت ف الدورة، و يقوا علينا ربي، النسا متع العالم كامل قداه نربطو الخيوط و ندخلو ف الهداري الفارغة، بالطبيعة شعرة لا فلت الطيارة الاخرانية على خاطر طفلة من فنزويلا قعدت تحكيلي علي بنت جيرانهم كيفاش غدر بيها راجلها و صوحب عليها بنت خالة الجزار متع الحومة و انا نرعش ف بلاصتي تقولش عليها من بقية اهلي.

ما سيبتها و جريت كان كي سمعتهم ينبحو يا بنت عايلة وينك، يا بنت عايلة رانا بش نمشيو ونخليوك! الحاصل، مخ الهدرة كان نهار عطيتكم موعد الصباح، ايجاو لنفس البلاصة اما العشية.



كتبتها:bent 3ayla على الساعة: 2:40 م

تعليق غير معرف ...

الانونيمات الكل مضمضوا اليوم انا الي شديت البلاصة الاول هههه
والله ماصغر عقلي ساعاث !

2 فبراير 2009 في 5:22 ص

تعليق غير معرف ...

هاك طلعت "globe trotter" و احنا ما في بالناش زعمة غدوة تحكيلنا على مغامراتك في "بلاد الشنوا" ? انا الحق ما عاد نستغرب منك شئ !
حقنا نوليو نعيطولك "بنت بطوطة" موش بنت عايلة اما برجولية عجبتني كيف زلبحت الامريكان زايد يا ولدي العربي العربي كسكسلو يرجع لاصلو. العربي عمرو ما يصعب عليه شئ و عمرو ما يحير !

انا زادة ضيعت منقالة عامة الباك خليتها فوق الطاولة بعد "دوفوار الفيزيك" مالفجعة كيف قريت الاسئلة و ما تذكرتها كان العشية. ماذابيا نعرف شكون ولد الحلال الي يقرا معايا الي لقاها و طفا الضو ?

2 فبراير 2009 في 5:58 ص

تعليق غير معرف ...

9addech kadheba hal bannouta

2 فبراير 2009 في 7:35 ص

تعليق غير معرف ...

bent 3ayla, j'espère que tu voyageais avec un ma7ram sinon tu n'est plus bent 3ayla

2 فبراير 2009 في 10:09 ص

تعليق faten ...

ههه، شفت يا سي امين، و الله جو! ايا المرة الجاية فما جايزة مفاجاة للي يخلط لوّل...

بلاد الشنوة مازلت ما مشيتلهاش، اما عندي نكت مع الشنوة بيدهم. في يوم ما.. كان ع المنقالة، الخليفة عليها، تي بربي بلاش ارتح بلا ستراس بلا التزامات

غير معرف، الكذب ف المصالح جايز.. اما خير و لا ترصيلي نطلب ف المطارات و حتي حق تلفون لدارنا ماعنديش؟ و زيد هاذا اسمو استغلال الثغرات الدفاعية عند العدو، يعني مش كذب كذب!

منشو، ايه عندي محرم وه! انا كل ما يقلولي ف الديوانة حل الفاليجة نبدا نتغصور. اول ما يخرج، لا دبش لا كادوات. اول حاجة تتفرت ف القاعة هيا المخدة و الدبدوب الاعور اللي مصارنو خارجة اللي ما نجم نرقد كان بيه...

2 فبراير 2009 في 1:49 م

تعليق bent 3ayla ...

ooooops! hihihi,
fda7t rou7i... aya sidi esmi faten, tcharafna bikom!

2 فبراير 2009 في 1:52 م

تعليق bent 3ayla ...

ههه، شفت يا سي امين، و الله جو! ايا المرة الجاية فما جايزة مفاجاة للي يخلط لوّل...

بلاد الشنوة مازلت ما مشيتلهاش، اما عندي نكت مع الشنوة بيدهم. في يوم ما.. كان ع المنقالة، الخليفة عليها، تي بربي بلاش ارتح بلا ستراس بلا التزامات

غير معرف، الكذب ف المصالح جايز.. اما خير و لا ترصيلي نطلب ف المطارات و حتي حق تلفون لدارنا ماعنديش؟ و زيد هاذا اسمو استغلال الثغرات الدفاعية عند العدو، يعني مش كذب كذب!

منشو، ايه عندي محرم وه! انا كل ما يقلولي ف الديوانة حل الفاليجة نبدا نتغصور. اول ما يخرج، لا دبش لا كادوات. اول حاجة تتفرت ف القاعة هيا المخدة و الدبدوب الاعور اللي مصارنو خارجة اللي ما نجم نرقد كان بيه...

2 فبراير 2009 في 2:05 م

تعليق غير معرف ...

Zorboustra
يعطيك الصحة وااااااش تحكي, مش نرمال!sauf que intéressant

2 فبراير 2009 في 5:09 م

تعليق غير معرف ...

je ne sais pas pourkoi j ai l impression que tu juste inventes ces histoires
Amin lyoum lundi barcha travail 3ad 5allit lik inti le plaisir de commenter le premier, mais je te dis une chose je suis un docteur bac +10 donc 3a9li mouch sghir juste pour faire de l ambiance ici dans ce blog
haya ya bent 3ayla wella faten nestanna fel cadeaux mte3i
j aime ton prenom

2 فبراير 2009 في 9:04 م

تعليق bent 3ayla ...

يا مرحبا! ايا ع الاقل توا نسميوك الدكتور. يزينا من غير معرف.
لا و راسك الكل صحاح. تي مزلت ف السوفت. امالا لو نحكيلكم الدوسيات الكحلا؟؟ هههههه، يا جماعة ياخي للدرجة هاذي عاقلين و ماعملتو حتي عملة ف حياتكم؟؟؟

الجايزة انطلاقا من بوست غدوة!

الحمد الله اللي اسمي فاتن. وقيل كانو بش يسميوني هيفا، مع تحياتي لكل الهيفات، اما بعد الهيفا القومية... ماهوش مغري برشا.

2 فبراير 2009 في 9:11 م

تعليق kmr ...

le nombre de consultation du profil "faten": 15 consultations en 6 heures!!! on peut dire que tu éveilles la curiosité de tes lecteurs!! ;)



ya doctour, ya mte3 il bac plus 10, nchallah mabroukin 3lik, juste remarque: rahou 3omrou maken kobr la39al yet9as ba3wem il9raya, w a mon avis, ce que g lu dans le commentaire d'amin n'est nullement offensif a ton encontre, or il me semble que tu l'a mal pris, nchallah natla3 g tort...

2 فبراير 2009 في 9:50 م

تعليق bent 3ayla ...

تي شنوة يا جماعة، يزيو من شريان الشبوك بالله! ياخي حتي حد فيكم ماعندو un cote enfantin?? و هاكم الكل تبارك الله قارين و متثقفين. تي اقلبو علينا ها الصحن!

ايه بالحق، خسارة مانيش حاطة معلومات اخرى ف البروفيل متاعي... هههههه

2 فبراير 2009 في 9:58 م

تعليق غير معرف ...

نتشرفوا للا هيفاء يا ربي فاتن بلحق اسمك حلو اما اللقب متاعك FSJPS سامحني النطق متاعو صعيب ياسر هيهيهيه .

الحق ما حبتش تدخل طاسة مخي juriste ومازالت ترقد بالـ nonourse متاعها.

مزمزال فاتن الحق انا بديت نخاف منك لو كان تضليل السلطات الامريكية و مان دراك تسميه انت "سوفت" ملا الهارد "كيفاش" ?
تطلعش زادة عندك يد في حكاية 9.11 ?
Au fait كيف مشيت للstates مشيت تحوس والا تخدم buisiness or pleasure ?

خويا " قميرة " شفت بربي الدكتور شعل فيا كي فتيلة بلا زيت تي حتى كان جبدتو و لا قلتلو ما اصغر عقلك انا قلت "ماصغر عقلي".
يا دكتور هاك طلعت "susceptible" مشكلة لو كان تطلع طبيب نفساني ):
يا عزيزي Take it easy :)

3 فبراير 2009 في 1:07 ص