بادئ ذي بدء، سامحوني يا جماعة الخير ع العنوان. اما التدوينة هاذي بذمة قارئة معينة (ايه و الله البنات ولاو يقراولي و يبعثولي! هاي الروح رجعت فيا) ف خصوص حكاية جبدناها وهيا حكاية البلايص الهاي، البم بم، الفخفخة و الذخامات و يا من ادراك. برشا منكم مرسمين غادي و وحدكم وحدكم توا تستعرفو اللي نقول فيه صدق مش كذب.

نحب م اللول ناكد انو اللي يمشيو للبلايص الهاي مش بالضرورة هوما بيدهم يكونو هاي، يعني بكل بساطة و ماغير طبقية، مش جايين من كوكب اخر ولا احسن الناس ولا اغناهم ولا اثقفهم ولا اعلاهم مراكز. مرة على مرة تبدا ف بلاصة و ترا عباد تقلبلك معدتك م اللسان الحلو و المنظر النظيف و الخلق و الخلوق، و يبدا مشروع فاشي يرتسم ف خيالك بش تقطع خبرهم م الدنيا.

معليناش توا م العباد، و خ نتلهاو بالبلايص. ما نعرفش من حسن ولا من سوء حظي، ربي بلاني بصحبة عباد باهيين، هايلين ما عندي ما نقول فيهم الا حبهم المبالغ للفخفخة. و ف جرتهم كركروني لبرشا بلايص يجيني شلل نصفي كل ما يمدو الفاتورة. مش م الغلا ف حد ذاتو، خاطر و لله الحمد بقية الانسانية تلوج ف احسن rapport qualite/prix و احنا في تونس نلوجو اغلى بلاصة بش نمشديو يعديوها علينا. نقول يعديوها علينا على خاطر ما عندهاش كلمة اخرى. هاو مانيش بش نطول عليكم بالحديث و نختار سلكسيون، برشا عابو عليا قالولي ايه و الله نحبو نربحو فيك ثواب و نقراولك، اما انتي ارفق بالعباد، ياسر تخرف، نقص شوية. خ نبدا بالتجارب اللبرة، بش مبعد نتلها بالصناعة الوطنية. و نقلكم و نهنيكم اللي الشي هذا وين بش تقبلو تنجمو تلقاوه.

المرة الوحيدة اللي دخلت فيها لبواتة كانت في جرة شلة المرح. البرة، في بلاصة هايلة معروفة متع ثم ثم، حق الدخلة متع اربعة بنيات كيفنا كان ينجم يخلي الصومال تستغنى على ايعانات البنك العالمي، اما اش تعمل للي يزغردولهم ف وذنيهم؟ باللي قلتلهم وزقدحت، قالك البواتة هاذي بالذات فرصة العمر، مشهورة برشا و يا سعد من عفس الموكيت متاعها. و بالامارة مثل فيها درا شكونو اكا العام مع درا اش اسمها و خلدت شاشات السينما كيفاش شرب كاس بيرة و تقرع في وجهها. حاجة mythique اش فهمك انتي يا جاهلة؟ و الواحد قداه من مرة ف عمرو بش ينول ها الشرف؟

ايا سيدي، اقنعوني. قلت زايد لعلا شي كبير انا مانيش فاهمتو ومستوعبتو، خ نجرب، ياخي بش ياكلوني؟ اما من باب الاحتياط، ماو عندي عقد م الاشاعات اللي نسمعها على البواتات في تونس، قلتلم امالا هانا اربعة، يعني زوز كوبلوات، ريق البلادة لا! و كذلك كان. اساعة البواتة مفهوم باااايخ جدا. يعني ظلام و لمام، لا تفهم وين تعفس لا شكون بحذاك و زيد الروايح الهايلة متع العروقات و كي تمشي من نقطة "ا" لنقطة "ب" لازم عندك ساقين كوارجي بش تنجم تقلعهم م الموكات اللي تتلبق م النظافة.

م الربع ساعة لولا فديت. الحس يطرش و الظلام يعمي و زيد انا agoraphobe شوية، ما نحكيلكمش، شعرة لا هبلتلهم غادي. و العباد تتنطوط تقولش ضاربها الضو. هزيت روحي مشيت للتواليت -حاشاكم- بش نغسل وجهي و نتنفس شوية م الزحمة. لقيت صف غادي على مرتين نسخايب روحي غلطت و مشيت للبار. بعد ربع ساعة وصلت، دخلت، تفجعت!

اخطانا م السكارى و اللي ترد و اللي ظاهر فيها تكيفت ولا زرقت حاجة و ملوحة كي شكارة الزبلة بحذا الحيط، اللي رعبني هوا الحالة الماساوية متع النظافة. بالله تقولش دخلت لتواليت كيوسك مطيش ف طريق وطنية 17 في بوتسوانا. بيبان مخلعة و وسخ و خمج و زرارق مطيشة و بلار متع دبابز مكسر، و الماء مقلت... كلمة وحدة تغنى ع الوصف هاذا الكل، معدتي قلبت عليا و شعرة لا كملت طبست معاهم نرد.

هذايا بالنسبة للتجربة خارج حدود الوطن. الواحد يقول مهما كان، ماك ماشية لبواتا، و معروف الخمج اللي فيها م اللول. اما كي تمشي في تونس لقهوة بم بم، الفاتورة القليلة لاربعة اشخاص ما تطيحش تحت الستين دينار -ماغير ذكر اسماء- الواحد يقول فما حد ادنى م الذخامة و الكلاس!

اساعة بالطبيعة تملا و تفرغ، و بش تلقا بلاصة لازمك تشد الصف ولا توصي السرفور. بعد ما يتحلك باب العرش و يدخلوك، تلقا الضيق و التزرزيق، محشور ف كريسي و اللي قاعد ف الطاولة اللي جنبك تقولش عليه قاعد في حجرك و قريب يمد يدو يعمل رشفة م الفنجان ولا يرمي كليمة ف الموضوع معاكم. السرفورات تبارك الله عليهم، شياكة و اناقة و يحكي معاك بكل احترام تقولش يسربي في قهوة الحاج شمنططو متع باب الجديد.

نحنا قعدنا و جانا قالنا، اه لبناويت، اش تشربو؟ قلنالو يجيبلنا المونو. و قعدنا نحكيو و نضحكو. عاود رجع، وحدة كمنادات ولخرى حللها مستوج اش لازمها تاخو بالسيف، انا قتلو قهوة نسبرسو و عطيتو لون الكبسول بش ما يكسرليش كرايمي. الرابعة فينا تحكى ف التاليفون. جا لصقتها، مد يدو خضها وقاللها "اه ربح، اش تاخو؟"

الطفلة عينيها خرجو من بلاصتهم، و قاتلو نحي كسرتك (ايه مانا حتي نحنا نبدعو ف الكلام الباهي) و اللي طاحت تتسكك بالضحك و اللي فمها طاح م البهتة. المهم، كمندينا و قعدنا نستناو، درجين، ربع ساعة، نصف ساعة، ساعة غير ربع... بعد الحاح و تزقديح، جانا سي الشباب، رمالنا شطر الكوموند و مشا. قالك الباقي ف الطريق. الكيسان ملقشة و الفراقط مش نظيفة برشا، يعني ك اي خدمة في قهاوينا العزيزة علينا. انا وحدة م الناس، من سعيدي الحظ اللي وصلتني قهوتي. انا م الناس المغرومة بالقهوة، عندي يا كيف يا مش لازم منو. اول حاجة نعملها ديما، هيا انو نشم ريحة القهوة و نحس ف الـ arome. انتي و القهوة مرة fruite مرة boise اما بالحق لحظة نشوة مش طبيعية.

انا قربت الفنجان بش نقوم بطقوسي و تضربني ريحة حمص مندي. عينيا حمارت و عرق ولا يضرب في راسي. البنات يجبهيو، بالله لا تتكلم، حشمتنا ف القهاوي الكل، اللي نمشيولها ماعادش نرجعو. قلتلهم انا ما عنديش استعداد نحط اربعة دينارات ف ماء ازرق مسمينو قهوة. توا نخلصو عليك، اسكت برك، شي، قلتلهم الحكاية حكاية مبدا.

عيطلو وقتلو، هز عليا ها الخليط و جيبلي قهوة نسبرسو. حطلي يديه ف خواصرو، قاللي هاذيكا هيا. غير انتي ما تعرفهاش.. قتلو يرحم بوك عدي ها الليلة على خير و برا بدلي القهوة. شي، كبش و انا كبشت.. جانا مولى القهوة يجري، اش فمة؟ حكيتلو الحكاية. وقتلو تعرفش كيفاه، برا جيبلي الكبسول المستعملة بش نصدق اللي هيا نسبرسو و نعطيك عليها خمسة لاف مش اربعة. تبهذل و قالي لا وفاتلنا و نسينا بش نحيوها م الليستة. ماعنا كان متع تونس.

ايا قول القهوة و تعدات على خير، و الكراب متع صاحبتي وصلت، بعد ساعة و نص و فارغة مافيها لا جبن لا سومون، اما وصلت، خير من بلاش. نحنا قاعدين للدفا و العيشة، ماو حلو الباب ف ظهوراتنا بش يهويو البلاصة و نتصردو نحنا فرد مرة، و نحس في حركة بحذا ساقي. سخايبت وحدة م البنات. بعدت ساقي. زادت جهامة لصقتني. هزيت الناب و عملت طلة. نلقا قطوس تحت الطاولة! مكركر كعبة جونبون م الكوجينة وجاي ياكل فيها تحت ساقي. عملت كس كس، شي، ما حبش يتحرك. عيطت للراجل، قتلو خرجو علينا علاه هكا الوسخ؟ قالك لا، هذاكا قطوس القهوة و متربي. ياكل م الكوجينة و يقعد فوق الطواول، قطوس ولد فاميليا...

معدتي عصرت عليا عصرة خايبة، و روحت مريضة بالحق، طبيب ودوا. من نهارتها القهوة الي نمشيلها، لا ناكل لا نشرب. غير نقعد مع البنيات وبرا. لا يزي الفليسات اللي تقولش عليك حاططهم ف التراب، لا يزي تعرف مستوى النظافة و العفافة متاهم.

كتبتها:bent 3ayla على الساعة: 10:17 م

تعليق غير معرف ...

C'est un peu exagéré, pas un seul café n'est à la hauteur!!!
3aber

11 فبراير 2009 في 1:26 ص

تعليق bent 3ayla ...

سميلي يا خويا عابر و نحج على يدك!

11 فبراير 2009 في 1:36 ص

تعليق غير معرف ...

a vrai dire, pour moi tout est relatif,je ne m'attend pas a un service spécial du moment que la chicha est bonne, mais c'est clair que tu es exigeante ceci dit c'est ton droit de l'être avec des tarifs pareils.
3aber

11 فبراير 2009 في 1:53 ص

تعليق resiros ...

9taltni beltha7k ki 7kite 3al boita,
ltawa lafhemt le3bed chem3ajjabhom lel machia lelboitete, ti matnajjamchi ta7ki kelmtine woura b3athom, tzanzine.com

amma 3al 9hawi, bon ki lanonyme ena ehtimemeti tetwa99ef fel chicha, wou 7asb el tajrba el 9hawi el "cha3bia" 3andhom a7sen chicha, donc chattabt naw3an me 3al "salon de the", amma yo93od famma dima 9hawi de qualité, 3andek "la palme" fel lac 3alamya, service wenthafa wou 9a3da wou 7atta el aswem morf9a naw3an ma.
(haw el pub walla tayyech)

houa tji tchouf 3anna fi tounes tha9afa wou ta9alid 3ari9a fel 9hawi:
el serveur lahoutou el kol bel clienéte mta3 kol nhar, elli yafr7ou bih bechouaia pourboire, donc ki el we7ed iched fi 9ahwa wou yafra7 bel sonne3, yothomone service khare9 lel 3ada: 3al 3ayn el mithel, saretli enni kassart chicha marra yekhi jebouli wa7da okhra fi blassetha fi 9ahwouti el e3tiedia, 7keya matal9ech la fi florida la fi oughanda.


3ala khir

11 فبراير 2009 في 2:21 ص

تعليق kacem ...

1- اولا على السلامة ...في الواقع ما فاتتني حتى تدوينة متاعك ...الكل قريتهم ...و إنحب إنقولك يعطك الصّحّة في برشة منهم .

2- اليوم حبيت إنعلّّق عندك لأن البلوق ولى يعجبني و الكتيبة واضحة و النقشة صاحبها معلّم كبير ..المهّم توه ، نقرى و العنين ما يجعونيش ..و زيد إنت تكتب برشة ...موش شوية ...طيّحتي على قاسم في الكتيبة ...لسيّن

3- في ما إخص التدوينة هذه ! عجبتني الجرأة متاعك ...و الواقعية المشومة ! الي إتعيشها البلاد ...و خاصة في الملاهي ألي كان لازمها إتكون بلايص باش الواحد يرتاح ...و إنحي الستراس ...و لكن و حسب تجربتك إتوضح بالي ...ما عاش ثمة بلاصة وين الواحد إنجم يقعد ..بلاد و ضاقت بأهلها ..

4- حكاية المخدّرات هذه ، أصبحت شيئ عجيب في تونس ....و موضوع لازمو يتناقش و ييتطرح على الساحة

5- حكاية السرفيس المعوّج ، ذكرني بزوز حاجات ...ذكرّني بسرفيس التيلكوم ..الفيديو الشهير ...و السّرفار : ذكرّني بمدّون ...أش علينا فيه ..

6- باش نقعد إتبع في كتاباتك ..حتى أني نكتشفك ..أكثر و أكثر ...و رّبما باش ..نبروفوكيك ...حتى نتمكّن من الشخصّية ..علاش ؟

7- لأني باش نكتب فيلم جديد ...و البطل متاعو راهو ..إزواو سامنديل ، سي علي سعيدان ...و إنت حطّك في بالي ..باش تلعبي دور ..إنشاء يعجبك.

و أخيرا ..

تحياتي ..

11 فبراير 2009 في 7:20 ص

تعليق kmr ...

ya bent 3ayla, la route nationale 17 mte3 bouteswana, rahi chere3 ilbiéa mte3hom, tet3adda mil capitale wel chef d'etat mte3hom yjibha marrtine finnhar!!! ;)


sinon, bennesba lil 9hawi, wallahi thamma illi yafr7ou bil client... bon thazmma illi chocolat chaud 3and'hom crima bechoclata, w thamma illi echicha 3andhom echappement mte3 karhba, w thamma illi il crepe 3andhom malmsou9a, w thamma illi il pizza 3andhom a9reb lil frisbee... l7assilou, thamma...


7aja o5ra, une amie na3refha belgdè, koll win nemchiw il 9ahwa, t7ott sak'ha w direct temchi littwalet, marra s2eltha 3la hal 3ada ilghariba, 9atli rahou min naw3 il twalet tefhem il 9ahwa chnia: ndhifa wela lè, ghalia wela lè, bnina wela lè...

min wa9tha wel7keya fi mo5i, nal9aha c vrai, avec un peu d'expérience, ynajjem ilwa7ed ya3ref il qualité mte3 il9ahwa min twaletha...


@ kacem: "ama 3leh noumrou sab3a!?? (dixit cinecitta! ;))

11 فبراير 2009 في 8:11 ص

تعليق غير معرف ...

j'adore ton style d'ecriture, brabbi matghibech dima ektbenna

11 فبراير 2009 في 12:59 م

تعليق غير معرف ...

برجولية يتعدا نهار ما نلقاش فيه حكاية من حكاياتك نفد !
وليت تابعة بروغرامي :ـ)
بالنسبة للقهاوي عندك مليون حق, عندي صاحبي جا من فرنسا قلي يستحيل نخسر فيهم فلوسي, ندفع 500 فرنك في قهوة عادية و ما نمشلهومش,
و هو تجي تشوف العيب فينا نمشيو و هكاكة ديمة يخدمو!
امه بالله تصورني مستدعيك لقهوة? نهزك تتمشا في اللاك? بينسير باش ترصيلي يا سكوسا يا البالم !!!
مكره اخاك :ـ(

11 فبراير 2009 في 1:37 م

تعليق غير معرف ...

بالنسبة للي قال بواته ما نلقاش راحتي و كلمتين ما نحكيهومش راهي هي بواته ! متاع حس و شطيح معناها اشطح و روح موش جاي باش تحلڨ !
حكاية التواليت توة ساعات بالفلوس !!! كي قهوة اوتيل الهنا ! خلستو و قريب باش إنقلو بطلت رجعولي وسخي و فلوسي !!! لا يزي ڨازوزة متاع 500 فرنك ب 2500 لا يزي تواليت بالفلوس ! هذا الكل علاجال هاك المنظر الخلاب إلي في الافيني حاكم ماش جاي.
امة نرجع وينقول ما فماش حل كي نخرج مع صاحباتي كونش إنعرس ونشرب قهوة من يدها !!
شكرا و غدوة جيبلنا حكاية اخرى خاصة جارتك هاك النسناسة :ـ)

11 فبراير 2009 في 1:43 م

تعليق abu arabi ...

http://abuarabi.blogspot.com/

11 فبراير 2009 في 2:36 م

تعليق bent 3ayla ...

اشرقت الانوار و اهلت الاقمار، مرحبا بزوارنا الكرام،

اساعة بالنسبة لحكاية الاستيناس بالقهوة، جربناها و ولا عنا مقر خاص مش مرة مش ثنين. اما زايد، بعد مدة و ما تطير النفحة و تقدام القهوة شوية، تي عام ولا ثنين، مولى القهوة ما يحب يجدد شي و يحب المربوح خالي م المصروف. مشكلتي مع الكيسان الملقشة مش متع سنوبيزم، و انما مشكلة صحة، ماو يلمو الميكروبات من فم لفم و من يد ليد..

سي روسيروس يعطك الصحة ع الاشهار، اما القهوة هاذيكا لتوا لافهمت علاه يحبوها. جاية فصالتها غريبة و ما استغلوش موقعها كما يجب. اما اعتراضي عليها انو برشا ناس نعرفهم يقعدو غادي و ترصيلي لاسقة فيهم بالسيف، و برشا مواضيع من نوع انا بباتي جابلي درا شنوة بدراقداه تخلي الدم يطلعلي.
سكوسا مش خايبة، اما نوعية المالكة قاعدة في تراجع و انحدار مخيف. مرة قلنا ميسالش، المرة الثانية قلنا هفوة، اما مبعد ولا تمانيك. خسارتها.

سي قاسم، مرحبا بيك، اول مرة تخلي تعليق و اول مرة نتاكد اللي انتي تقرالي. خاطر في فترة قلت زعمة؟ و مبعد قلت لا، انا الغالطة. معليناش. يمكن انا جديدة عل الحومة و مش مستانسة ببرشا مدونين ولاو معروفين و ما نجمتش نقرا بين السطور.
نشكرك مرة اخرى ع المرور و ع الثناء.
حكاية المخدرات بالحق قاعدة تاكللي في قلبي م الداخل و قداه من مرة نحب نحكي عليها اما تخوني الكلمات. نحس الّي موضوع ما نجمش نجبد عليه في قالب فدلكة. و زيد نحب نحكي اكثر مع اهل الذكر بش ما نبداش كيما جرايد بودورو ونحكي من راسي. هاك حطيتهالي في مخي..

واش نوة حكاية الفيلم؟ و علاه اش عمتلك تبروفوكي فيا؟ يا وخي، قلي اش تحب تعرف و انا نقلك.. راهو يجد عليا!

سي ك.م.ر، ايا هاني نستنا ف القايمة. و كان وحدة منهم تخيب امالي نبعثلك الفاتورة! رد بالك، راني صعيبة.

غير المعرفين، مرحبا بيكم. و بالنسبة للدعوة، مشكور، اما و الله و مانيش نفدلك، انا الخرجات اللي نحبها، يا ثقافية ولا متع صحبة سنين نتلمو ف اي تركينة، انشالله حتي في قهوة دارنا.و لا خرجة لبلاصة بعيدة كيما قربص ولا بنزرت، نعملو جو ونفطرو و نروحو.

و عندي امنية لتوا لا لقيت شكون يحققها معايا م اصحابي الانذال، هيا محواسة ف البلفيدار!
و الله شاهيتها توا سنين، لا حد حب يمشي معايا.. و ماكم تعرفو في تونس، بش تهز روحك وحدك و ايكوتور في وذنيك... بش تولي فيها مرج صافي.

غير معرف الاخير، و الله فكرة هايلة حكاية العرس للتصدي لها الظاهرة. اما توا البنيات طيحو ع الرجال ف قعدة القهاوي.. بففففف

سي ابو العربي، مبروك عليك المدونة، حتي هوا وقيت، عندك مدة ف البلوغوسفير...

11 فبراير 2009 في 6:12 م

تعليق femme au foyer ...

bent 3ayla dima mchay5etna bedho7k
bravo!

11 فبراير 2009 في 7:13 م

تعليق غير معرف ...

غير معروف الاخير هو غير معروف قبل الاخير Bourne:surnom
نقرا البوست الجديد ونجيك !!

12 فبراير 2009 في 11:03 ص