skip to main |
skip to sidebar
|
الاثنين، فبراير 09، 2009
|
|
ااه، ما صبرتش، هاني مزلت كي دخلت، حتي م الكبوط على ظهري، نرقل بكلي و نغزل... لازمني ندون كانشي نطيح نستنقط.
سيدي خويا جاني البارح و قاللي دبر راسك، انا و جمهروش صحابي نحبو نمشيو للدربي، لازمك تشريلنا التساكر. تحب تشد الصف، تشريهم مرشي نوار، م الانترنات، المهم نهارت الدربي نتفرج فيه ف الستاد! ياولدي راني نخدم، ياولدي ماعادش عندي وسع بال، يا ولدي اخطاني، شي! رمالي الفلوس و حمّر عينيه. اليوم عاد خطفت روحي لاقرب بوسطة. اساعة ما فيباليش اللي هيا تحل ماضي تلاثة. م الساعتين واش و انا واقفة نستنى كي عبود البسيسة قدام الباب و ماجاش لمخي نقرا البلاكة الاّ وقت اللي قريب تصير ماضي تلاثة. مادام انا صبرت و صبرت، كملت نستنا. بالطبيعة حضبت الدنيا و خاصة اللي الجماعة ما اخلوش بسمعتهم و حلو مخر، بعد الوقت بربع ساعة. في حلة الباب، رغم اللي انا اول وحدة، يتعدا واحد يعطيني بمرفق يخليني نتخلف على ركب الحضارة. مادام مش متاكدة اللي هوا بالعاني ولا لا، سكتت. معليناش، دخلنا، و لقيت حضبة عل الموزع متع التساكر. استنيت استنيت، وقت اللي جا دوري، الماكينة قاتلك يرحمك الرحمان، علقت الصباط. شديت الصف قدام القيشي اللول و قعدت نستنا. وصل دوري. قالك لا، الدينار الالكتروني مش هنا، امشي لاخر شباك. وصلت لاخر شباك، شديت الصف، قعدت نستنا. وصل دوري، قالك لا، اولا مش هنا، و ثانيا لازمك تسكرة. يا بنتي الماكينة مافيهاش تساكر. لا، مادام فما شكون عندو تساكر (اللي دخلو م اللول) لازمك تسكرة. و الشباك اللي لاهي بالدينار الالكتروني هوا الشباك الرابع. شديت الصف قدام القيشي الرابع، وقعدت نستنا. وصل دوري. قالك ايه، بالحق اللي هنا الدينار الالكتروني، و اللي الماكينة مكسرة، اما منين بش تضمن اللي انتي جا دورك و ما تعديتش على حق غيرك. لا يعيشك. برا ارجع بالتوالي و شد الصف على ماكينة تساكر الصف حتي يجي رئيس الفرع م الفطور و يبدل الرولو بش تاخذو تساكركم و بالتساكر تعاودو تشدو الصف بش تقضيو قضيتكم! جيت بش نحل فمي بش نعترض، الموظفة فاحت فيا بطريقة استباقية، و قاتلك يعيشك، لا تحكي معايا لا نحكي معاك. عندك مشكلة امشي شد كريسي كي الناس الملاح و استنا رئيس الفرع، نحنا هنا نطبقو ف القانون و ما نحبوش الناس الفوضويين كيفك! بعد الاعصار الاستوائي هذا، فقدت كل قدراتي الصوتية، خرجت م البوسطة نضرب كف بكف، المشكلة بخلاف التساكر اللي جابوهم بش يسهلولنا حياتنا، زادو عقدوها، و بخلاف رئيس الفرع الي للاربعة مزال يفطر، المشكلة خاصة ف عقلية الموظف التونسي. ديما عقلية اللي هوا عندو خديمة محددة ما يتجاوزهاش. كرفي واقع عليه و ما عمرو لا يفكر انو يبدع ف خدمتو مهما تكون بسيطة. حبيت نحطلكم ليان متع فيديو (خسارة ما يخدمش ف تونس) اما اللي البرا ولا اللي يعبر ف الفوماتيك توا ينجم يشوفو، فيه بوليس متع سيركولاسيون اسمو Offier Floyd Johnson في جامعة فيلادفيا (راهو سي طارق الكحلاوي يعرفو) مجرد بوليس خدمتو انو يعدي الكراهب. العباد الكل تتعدا من غادي بالذمة بش تشوفو و تصورو، عمركم شفتو بوليس يزفر بالزفارة على ايقاع و يشطح ف الكياس و هوا يعدي ف الكراهب؟ و عندو معجبين و عباد تطلب منو ف اتوقراف؟ جرد خدمة بسيطة لكن هوا عامل عليها جو، لاهو ينقرز لا هارب من خدمتو لا مرتشي. انسان خلد اسمو بين العباد اللي عرفوه، و ماهوش مجرد جهامة واقفة تعدي ف الكراهب كيفها كيف بوتو الضو. المهم، ضمنت بلايص الدربي لخويا، و مشجعي الافريقي جايين. انشالله ما يحشموناش عاد. |
|
كتبتها:bent 3ayla
على الساعة:
4:07 م
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
Ton frère a de la chance d'avoir une soeur comme toi. Sans commentaiars 3la el karakouz mta3 el idarat. albousta, albladya walla wizaret ettarbia, kollo zay ba3dhou...
صحة عليه خوك... هذاكة ش انجم نستنتج.
سؤال: ياخي تساكر الدربي يتقصوا قبل بعشرين يوم تو ولاّو... تي هاو اتطورنا و ولينا كيف ما الدول الباهية ياسر.
ملا تساكر و ملا هموم زرقا. اليوم مشيت لطبيب العينين باش ناخو جواب لخالي - مسكين نظرو ماشي و ينقص و هوما يقولولوا تو نلقاو حل - المهم دخلت للعيادة و ضربت ربع ساعة واقف و حتى فرملية ما عبرتني و من بعد مشيت كي العاقل و قلتلها أعطيني الجواب و جاوبتني الفرملية إلي الطبيب مازال يكتب فيه و نص ساعة يحضر و من بعد نص ساعة بالمنقالة مشيت و نلقا المرا تعاود تسألني مرة أخرى علاش جيت و هي تحكي نلقاها عاملة كيف على طرح سوليتير و مولاة الدار مش هوني و ولات تعدي فيها بضحكة و آني وليت باشا و خذات رقم تليفوني باش تكلمني أكيد بخصوص الجواب. المهم إلي يمشي لأي إدارة تونسية لازمو يخصص نهار كامل بذمتها و ياخذ كونجي من الخدمة باش يطلع وراقو. نزيدك زيادة هاو حكاية أخرى، ماني وخيك كيما قلت سابقا نكره ما نكره الشمس و النهار بصيفة عامة و في رمضان مشيت باش نرسم في الكلية، أول مرة وقفت في ساعة زحمة على شباك طلع غالط و هوما نساو باش يبدلوا ورقة الإرشادات و قالولي الترسيم في قسم السبور و مشيت لقسم السبور و قالوا إلي سيدنا المكلف بالترسيم مازال ما جاش و كي جا سيدنا ضحكوا عليا و قالولي إنتي سنة ثانية و لازمك ترسم في قسم الماركيتنغ و مشيت للماركيتنغ و قعدت نستنا و من بعد قالولي اطلع للطاق الفوقاني و كي طلعت قالولي أهبط و كي هبطتت قالولي برا امشي لقسم الإنقليزية و كي وصلت نلقى حضبة أولها في شباك الترسيم و آخرها عندي - في هاذي نبالغ أما بالحق العباد تجي تعد تغلط - المهم خوكم النسر فد و لعن الترسيم و أيامات الترسيم و روحت مهدود و ما رسمت كان الجمعة إلي من بعد جمعة الترسيم. بالحق الموظفين لازمهم حاجتين
mise à jour ou patch 3al mouwadhfin 3alem loul
ما تقولوليش عداها عليا و خلاني هابطة ف حالة طوارئ و الماتش مازالو برشا!!! ناري على روحي، في بالي الجمعة الجاية و انا خارجة نتسابق انا و الوليدات متع الليسي بش نخلط قبلهم للبوبلينات لا توفى التساكر و ترصيلي نشري فيهم من عند بو شلطة قدام الستاد!
زايد، البهلول طول عمرو بهلول. لو جيت نشري ف الجرايد التونسية اللي شطرها كورة، راو في بالي. ولا نتفرج ف التلافر الوطنية.. خسارة، الاعلام قايم بدورو غير احنا ربي يهدينا.
سي النسر، بصراحة رغم تحفظاتي ع البطاقة متع البوسطة، الا انو يرحم والدين والدين اللي اخترعها، سهلولنا المامورية شوية. ماو الترسيم داه فلوس، تحب تجيب مبعد اكا التصاور البوليودية ميسالش. رحمونا يرحمهم دنيا و اخرة.
نرجع و نقول اللي تونس ماساتها ف عبادها. احنا و ثقافة الضمير المهني نسمعو ببعضنا سمع..
اول حاجة عجبتني برشة فازة واحد يعطيني بمرفق يخليني نتخلف على ركب الحضارة
و ثاني حاجة عجبني برشة زادا النظام اللي حكيت عليه المتبع في البوسطة .. مالا اشفيبالك يا بنت عايلة سايبة هيا و لا بلاد من غير نظام .. رد بالك تغلط عيش بنتي
وينك يا سي فؤاد؟ عنا مدة عليك.. لا ما عادش يساعد، فما قراء كي ما يطلوش نتغشش راهو..
فازة المرفق حلوه اه؟ و خاصة كي تجي ف جنبك و تقطع عليك النفس. اما اغلب الظن مسيكن متاثر بصف الخبز ولا الماتشوات، خاطر النظرة قعدت ملائكية مش متع شريان شبوك.
نظام هايل الحق. تولي تشد صف بش تاخو التسكرة اللي بيها بش تشد الصف.. بالله لتوا، كل ما تذكر نولي نغزل..
الله غالب ديما الظروف اقوى مني و هي اللي تتحكم في الواحد ..
هاني كل وين نتفاضى نعمل طلة خير من بلاش
نعرف وه، نتدكك عليك و برا. مرحبا بيك و بتعليقاتك