اهوكا بش ما تقولوش اللي انا ما لاهية كان ف الحكايات الفارغة، قلت خ نعمل و معمولي لربي و نفيدكم بالنصايح السديدة متاعي بش ما ترصيليش حتى انا ف قايمة جديدة متع الغباء tout court . المهم عاد، جاتني وحدة من معارفي البارح قلبتلي مخي بالاسئلة. ماو قررت هيا و تعيس الحظ اللي طاح بيها بش يِتْزَوْزو و تفاهمو على كل شي الصلا ع النبي و عيني ما تضرهم، من مبدا العرس في حد ذاتو الكرية للدار للموبيلية للصالة للصياغة لكل شي. يعني اللي تبكي عليه العباد الكل تفاهمو عليه.

قعدلهم اشكال وحيد و ما نعرفش علاه لقاوه عويص وشعرة لا قامت حرب اهلية بين العايلتين في جرتو. الا و هو اي نظام يعتمدو، الاشتراك ولا الفصل ف الملكية؟ ايه عاد قلت مادام صرفت و صرفت و ريقي شاح و شاح، خ نحكيلكم انتوما زادة، بش اللي ناو ي يعرس يعرف راسو من ساقيه و اللي مش ناوي يعرس، ينصح اللي ناوي عليه.


ايا سيدي اساعة نقلكم اللي راهو اكا مبدا الاشتراك ف الملكية كيما تراوه ف المسلسلات الفرانساوية البالحة الكالحة و لاّ ف الافلام الامريكان، اكا اللي يقسمو كل شي شطر بالشطر ولا ساعات المرا تكمل تمسح فم الراجل من كل شي و تقعلعو زروسو، راهو خاطينا. يعني ماغير ما تترعبو م الفكرة. الاشتراك في الملكية في تونس فيه انواع. تبع يهديك.

اول حاجة راهو الاشتراك تنجم تختارو اما وقت اللي تكتب الزداق، فرد مرة و بانقص وجايع راس، و الا كان تحب بعد الزداق و كي يرتاح راسك م العوادة و التزنزين و التقطييع و الترييش وتحس روحك مزلت نافح ع الراجل ولا ع المرا. تمشي تعمل حجة عادلة و يكتبولك اللي انتي ف كامل مداركك العقلية و مستوعب اللي بش تعملو و تتحمل مسؤوليتك. توا نجيو للمضمون متع الاشتراك. يعني اش معناها؟ نقللكم اللي هوا فيه زوز انواع.

اول نوع اللي هوا forfait de base يعني كيما نقولو اسهل نوع و اللي كي تصحح الورقة ف البلدية ينطبق وحدو وحدو. النظام هاذا ما يهم كان -حل عينيك و افهمني يعيشك- المحل المعد للعايلة المكتسب بعد الزواج عن طريق الشراء. اش معناها؟؟
معناها اولا اللي الاشتراك مايهم كان الحجر، الباتيمة، مش الدبش و الاثاث و اكا الفرت، هذاكا فيه نظام واحد اخر. يعني الاشتراك ف الدار، سواء كانت فيلا ولا برتمان ولا كوخ.
و معناها ثانيا اللي هوا ما يهم كان الدار المعدة للاستعمال العايلي، اي لسكن العايلة. لا يهم حانوت ولا حجامة ولا تاكسيفون ولا بيرو. الدار المخصصة بش تْكِنّ فيها راسك و تجيب صغيرات و تكمل تتعارك مع ta douce moitie.

و معناها اخيرا اللي هوا ما ينطبق كان ع الدار اللي تشريوها، لا هبة لا ورثة. و لذلك كي الحما تحب تكتب حاجة لبنتها ولا لولدها و تبدى خايفة لا الكنة تقسم معاه و ف التراب ولا في كرش العدو، لا يا جماعة، راهو ما تقسم شي مادام تمت في اطار عملية هبة ولا ورثة. و بربي هنا نحب نحل قوس صغير. قبل الوالدين كانو كي يحبو يعطيو لولادهم حاجة يعملوها بيعة وشرية. خاطر الاداء اللي كان موظف على انتقال الملكية اقل م الهبة. و كانو العباد يحطو سوم رمزي و الاداء يطلع زوز صوردي. نحب نقللهم اللي توا ولات حسبة غالطة خاطر راهو القانون تبدل و الهبة ولات تطلع ارخص ببرشا م البيعة و الشرية. و زيد بخلاف بعبع الفيسك، راكم تاخذو ف الريسك متع انو الكنة تقسم مع دلولك. اه صحيح البيعة صورية ولا خذيت عليه لا صوردي لا قفصي، اما قانونيا تتسمى بيعة و الكنة تدخل ف الشطر.

ايا باهي، قلنا هذا النوع الّول متع الاشتراك. نجيو توا للانواع الاخرى. و هيا اللي ما تتطبق كان ما انتي تقراها و تفهمها و تصحح عليها و تقول ايييه هاذا اللي حبيت عليه و اللي جابتو ساقيه العصا ليه. تجي يا سيدي بن سيدي و تقول نصفي الاخر انسان عظيم برشا و نوثق فيه و نحس اللي هوا روح روحي و لذلك بش نجي نقسم معاه كذا وكذا و كذا و تسمي كل كذا. يادار اخرى يا كرهبة يا فرشيتا، ولا كان زدت ف دوزة الشاعرية تقول نقسم معاه كل شي على وجه الاطلاق. يعني توليو راسين ف شاشية.

باهي توا نكملو الاحتمال الاخير اللي قعد. و هوا يصير برشا ف الواقع. تلقا الراجل عندو طبة ارض ولا يورث دار خردة و يحط فلوسو على فليسات المرا و يحسنوا اكا الورث ولا يبنيو عشة فوق طبة الارض. و ف الحالة هاذي م المفروض انو المرا ما يوصللها شي م الحكاية و كان وفات بيناتهم العشرة تخرج بيدها على راسها. ماو فما مبدا ف القانون يقلك اللي الفرع يتبع الاصل. و بطريقة تبسيطية، الاصل ف القانون كلاسيكيا هيا الارض و اللي يتبنا فوقها يعتبروه مبدئيا متع مولى الارض. ايه اما جا قانون الاشتراك ف الملكية وقالك لا هذا ما يجيش. اذا الفلوس اللي حسنو بيها الدار ولا بناو بيها الدار متع الزوز، لازم نضمنو حق الزوز.

وقتها يقلك نهبطو خبير و نشوفو. كان قيمة اللي تبنا اكثر من قيمة الارض، تولي متاعهم الزوز. و كان العكس، يعني قيمة الارض اكثر و لا التحسينات اللي عملوها مش حاجة عظيمة، وقتها تقعد على ذمة مولاها اما نعطيو تعويض للي دخل بالفليسات.

بطريقة تبسيطية، هاذا هوا نظام الاشتراك ف الملكية. و برشا بش يقولو ايه هاو ما يبدل شي تقريبا. نقلكم اللي النظام الاول ما يبدلش حاجة كبيرة. اهوكا زعمة زعمة دار السكنى اللي يشريوها بعد العرس تولى متاعهم الزوز. ايه اناهوا نختارو؟ نقلكم و الله انتي و شريك حياتك. بصراحة انتي و نوع العلاقات اللي عندك معاه، يعني موازين القوة ف يد شكون. كان تعرف روحك انتي مرتك بش تصرف شهريتها ع المكياج و الدبش، و ماهيش بش تعاونك على قبر الحياة، شخصيا يظهرلي زايد بش تدخلها معاك شريك النص بالنص.

و نزيد نقلكم اللي الاشتراك صحيح يعطيك الشطر ف الدار، اما زادة يعطيك الشطر ف الكريدي ولا اللي هوا. اي مصروف تابع الدار راك شريك فيه بالنص، كيما الزبلة و الخروبة. و كي تتعارك انتي و السيد بعلك، و ما يحبش يخلص الديون، راهو من حق اللي يسالك فلوس في جرة حاجة تابعة الدار بش يقلك هات خلصني و منبعد اتفاهم انتي و السيد، اموركم!
معليناش، هاو الحكاية وضحتها لصاحبتي وليكم انتوما، و الباقي عاد عينكم ميزانكم، ولا يجعلنا جرة ف عركة.

كتبتها:bent 3ayla على الساعة: 1:18 م

تعليق kmr ...

hawka en direct w 3al blog!!! ech 9awlek??? cado doublme lezemha!!! ;)

21 فبراير 2009 في 1:31 م

تعليق غير معرف ...

ya amin hani 9ablek
mais le 2 eme

21 فبراير 2009 في 1:38 م

تعليق bent 3ayla ...

بصراحة قوة عظيمة. يقوى عليك المولى!! يا ولد الناس ما قعد كان بش تخرجلي لوّل ف الاحلام!

21 فبراير 2009 في 1:42 م

تعليق bent 3ayla ...

هههه، غير المعرف سبق امين و ك.م.ر سبق الكل، تي حتي سبقني انا

21 فبراير 2009 في 1:42 م

تعليق kmr ...

hhhhhhhh

ye3jbekchi!!?? veille concurretielle 9wia rahou, il marchi meklinou les concurrents w lezem ilwa7ed ygalla3 il part de marché mte3ou!!! ;)



ya bent, 3andik ghalta sghira rahou fil poste:
"كان قيمة الارض اكثر من قيمة اللي تبنا، تولي متاعهم الزوز. و كان العكس، يعني قيمة الارض اكثر و لا التحسينات اللي عملوها مش حاجة عظيمة، وقتها تقعد على ذمة مولاها اما نعطيو تعويض للي دخل بالفليسات."

bon, je suis sur que tt le monde a compris, mais ken tsalla7ha ce serait mieu qd meme! ;)

21 فبراير 2009 في 2:01 م

تعليق bent 3ayla ...

عندك الحق، عندك الحق، بالطبيعة العكس هو الصحيح يعني كان قيمة البنية اكثر.
اه يا جماعة الخير، اش كون مع الاشتراك و اش كون مع الفصل؟

21 فبراير 2009 في 2:04 م

تعليق Amin ...

صباح الخير الناس الكل.
غير معرف بصحتك اما هذا "ك.م.ر" لازم نشوفلو حل السيد ولا يعمللنا في منافسة جدية.
بنت انا مازلث مرهوج "بالنوم" و تزيد "تلعج" عليا بمقال في القانون و الحقوق و الواجبات الحاصل ما فهمت شي هاني قاعد نعاود نقرا في التدوينة و لو اني مقتنع الي "الشركة تركة".

21 فبراير 2009 في 2:29 م

تعليق غير معرف ...

ya bint el 3ayla ( lekbira, ya3ni Tounès)
Je vous lis avec plaisir
ama rak 3amla fixation 3la el 3irss wel ma3rouss. A mon avis:illi najem ya7ki kifek avec humour et awja3 décalés, yelzmou yeqoul il rou7ou, ya Rou7hi qalet Oum Kalthoum, illi le prix de la liberté fi bladna , nssa we rjal, anek tu oublies il 3irss et tu cherches la LIBERTE!
ma3naha, bladn'a 3amlet des monstres de sensibilté, d'intelligence et de liberté
ama ma 3tatnech le BONHEUR!

21 فبراير 2009 في 2:55 م

تعليق bent 3ayla ...

سي امين مبروك النومة. و الله نفرح كي نلقا شكون عندو ضمير ف النوم.

سي غير المعرف، و الله لاهي فيكساسيون ع العرس، تي اخر حاجة عندي ليها مخ و ووقت توا. و ما نعرفش علاه قلبي قايللي اللي هاذا من حسن حظي.
و كان ع الحرية و السعادة، هاني غارقة فيهم لوذنيا، قربت نغرق ويتقطع عليا النفس

21 فبراير 2009 في 11:04 م

تعليق البرباش ...

هههههههههه

فكرتني مرة حضرت في عرس، كتبان صداق في ريف م الأرياف، هاك اللي يقلولوا للعدول ايجي يجي

على خاطر احنا عندنا في البلاد، جرات العادة انو يمشيو للعدول بالمسبق و يفهموه ع العلة و بنتها و ساعات يصححوا بالمسبق و يعملوا الهيلولة متاع كتبان الصداق فقط للتصاور و الفيديو، حاجة تقعد سوفينير

عاد العدول تلفت للعريس (الراجل) و قاللو: توافق على مبدأ الإشتراك في الملكية

الراجل دوّح راسو و قاللو لا، ما نوافقش

و ينعن بو هاك العملة، ولات عرك و معروك و العروسة شعرة و لا قالت فيها ووه بطّلت

و دار فيها ضرب البونية و تكسير الكراسي...

و في الآخر بعد ما ركحت الاجواء و صفات القلوب، اتكتب الصداق مع عدم التنصيص على مبدأ الإشتراك في الملكية (بما انو جماعة العروس هوما اللي ربحوا العركة)

21 فبراير 2009 في 11:53 م

تعليق غير معرف ...

بااااااااااهييييييييي. المعلومات الكل خشّوا لدماغي لكن مازال عندي سؤال باش تكمل الformation: هل تسطتيع تبديل النّظام اللّي خِْترتُو؟
:)

22 فبراير 2009 في 2:45 ص

تعليق غير معرف ...

: bourne
merci bent 3eyla pour les informations, javé une idée sur le sujet mais maintenant c'est plus claire.
comme t'as fini ton article, le choix dépends du couple lui même et celui qui a le poids fort, par exemple ken lemra "lion" w autoritaire w kelmetha eli temchi, meskin bech ytabess rasou w ysa7e7 3el ichtirak, w fil cas contraire, rajel yeftel fi chlaghmou wela houma ezouz metfehmin w 9esset 7ob le yara echems,dans ce cas je crois el ichtirak e7sen 7eja, 5ater edeyem rabi w puisq houma 9admin ala 3echra w 7yet kemla de preference yebdewha b5ir,
c mon avis.

23 فبراير 2009 في 10:31 ص

تعليق bent 3ayla ...

و الله خايفة لا تقص قبل ما نرجع. يا جماعة يعطيكم الصحة ع التفاعل، و سؤال نوماد وجيه جدا، و الاجابة عليه معقدة شوية، خاطر فما برشا احتمالات. الاحتمال الابسط اللي التخلى ع انظام هاذا بالتراضي و ما ينجمو يتخلاو عليه كان بعد عامين.
الحالة الثانية ف حالة عدم التراضي. و الاشكال كي يبدا فما ديون خذاوها بمقتضي الاشتراك ف الملكية. توا غدوة نفسرلها اكثر كي نكونكتي م البيرو. خايفة لا تقص مرة اخرى

23 فبراير 2009 في 8:20 م

تعليق غير معرف ...

صباح الخير دكتورة،
بربي عندي سؤال ديما في نفس السياق :
كي الكوبل إختار الإشتراك في الملكية وربي تذكر الراجل وإلا المرا بلغة أخرى في صورة وفاة أحدهما، كيف سيكون تقسيم الميراث ؟ هل سيرث الأبناء نصف المنزل وترث الأم الثمن مع إحتفاظها بنصف المنزل الآخر ؟

26 فبراير 2009 في 11:58 ص

تعليق bent 3ayla ...

اهلا سي غير المعرف. ايه كيما ذكرت، احكام المواريث ما تنطبق كان ع النص اللي يملكو الراجل ولا المرا، يعني اللي عايش منهم يحتفظ بجزء متاعو و يدخل وارث ف الجزء متع المتوفى. كي يجي العدل يعمل الفريضة الشرعية، ما يدخل فيها كان النصف متع العقار. و الشريك حسب الوضعية، راجل/ مرا، صغار ولا لا، يعني اكا احكام المواريث المعقدة الكل تتطبق.

بالنسبة لسؤال نوماد اللي قلت بش نرجعلو وما لقيتش الوقت، حبيت جوست نقول اللي المسالة اللي طرحتها معقدة برشا. خاصة بالنسبة للديون القديمة، و السؤال المفروض انو الاعلان القانوني على قرار الفصل م المفروض انو يجابه به الغير، يعني اللي عندو حكاية يفضها ف الاجال القانونية من وقت الاعلان. لكن فقه القضاء المقارن برهن انو الوضعيات تنجم تكون اكثر تعقيد من هكا.
و ما نحبش نزيد نكسر كرايمكم بها الحكايات خير ما تقولو عليا قينيا. اما اللي عندو مشكلة، اهوكا الايميل، افاك بليزير.

26 فبراير 2009 في 5:26 م

تعليق غير معرف ...

مرسي على التوضيحات يا دكتورة.أما تي هاو قعباجي وبر.
أنا نتصور إلي d'ici peu وحتى تتوفي أول الدفعات متاع جيل الإشتراك في الملكية المحاكم بش تلقى روحها قدام وضعيات متاع ميراث EXTRA TERRESTRE

27 فبراير 2009 في 2:45 م

تعليق غير معرف ...

شكرا بنت عائلة على الإجابة :)

11 مارس 2009 في 11:51 م