ايا سيدي، هانا رقدنا و العينين بدات تتحل، و الواحد مافيها باس كي يعمل تدوينة خفيفة بعد ما شد المخدة بكل ضمير و تفاني و عوّض نقص نوم متع سبعة ايام. و خاصة انو اليوم ما ريت المخدة كان ما شعري شاب. ماو رصاتلي نخدم baby sitter ف العشية وشادة جن م الجنون، نقصد ملاك رقيق وحمل وديع، ولد جارتنا. مش طفرة ف مشاعر الامومة متاعي لا شي..

المرا تعدات رمات الغشير وقاتلي شدو عندك خ نمشي نقضي قضيات و نفهم روحي. و زيد تسخايبش اللي انتي عاملة مزية؟ لا، رجّع شوية ملّي يسالهولك الطفل! اه، قالك ماو وقت اللي كان ملايكة بالحق نقبتلو حناكو بالبسبوس، ايه، كل خطوة بحسنتها. و الصغار مش بوس و تعنيق برك. وقتها اشري عروسة العب بيها. معليناش، قلت قعد الطفل ما خذاش فيا باي ها العشية، هات برك. الواحد يعمل الخير و يحتسب.


اكاهو، دخلت الطفل اللي عمرو ولّى خمسة سنين، تلفتت يمين يسار، قلت الصغار ف ها العمر شنوة النشاطات اللي الواحد يعدي بيهم الوقت معاهم؟ هوا بصراحة اعز نشاط ليا و ليه نخرجو نعمل بعض العمايل ف الحومة، يا نسرقو برقدان، يا نطيشو فوشيك ف ساك مرا يا نتخباو لراجل كبير نفجعوه نسقطولو قلبو... حويجة متع جو. اما الحق الحق الدنيا باردة و انا باخلة. امالا حلّها النشاطات الهادفة. اخطانا م التلفزة خير ما يهزني النوم قدامها و خ نعملو جو مع بعضنا.

-اه، تلعب غميضة؟
- لا متع صغار.
- تلعب حانوت عطار؟
- لا متع صغار.
- تلعب معلم و تلميذ؟
- لا ما نحبش القراية.
- تلعب شدة؟ في هاذي انا وحدي وحدي قلت لا، خير ما تجيني crise cardiaque
- باهي... اش تحب تلعب؟
- عندك بلاي ستايشن؟
- لا عنا XBox متع خويا و حتي تخديم ما نعرفش نخدمها.
- باهي حطلي درا شنوة نمبر درا قداه ع البيسيي.
- و الله ما نعرفهاش. و ما نعرفش كان عنا اصلا.
-اووووف اش تعرف؟؟؟
- ايجا نحطو غنايات و نقعدو نشطحو و نغنيو...
- باهي، هات.

شديت نبربش نبربش و نحاول نتذكر ف الروضة اش كانو يحطولنا. حطيت playlist هايلة من ميّ ميّ يا محلاها لمنتصب القامة امشي مرورا بيا نسمة الحرية. انا خدمتها و الطفل قعد مشدوها فاغر الفاه زاعز العينين. و من بعد اطرشق بالبكا و قاللي ما نحبش اغاني الاخبار! و ما عادش يحب يقعد معايا، هزو لانستي متع الروضة، هيا يحبها و انا لا. باهي يا ولدي قللي انستي اش تعمل معاكم خ نعملو كيفها، منين بش نجيبهالك توا؟

قالك انستي تحطلو غنايات حلوة، العب العب متع ماريا و شخبط شخابيط متع نانسي. رصاتليشي نحل ف الانترنات عقاب عمري نلوج عليهم؟ ميسالش خلّي ها العشوية تتعدا. انا حطيت الغناية و الطفل الصلاة ع النبي طاح يشطح و يميل بكل رشاقة تقولش نجوى فؤاد ف زمانها. و كمل قاللي هات فولارة بش نتحزم، هكاكة الشطحة تطلع خير!


هبلت! خرجت من عقلي. قتلو هكّا تعملو ف الروضة؟ قالّي ايه و نعملو جو مش نرمال. و اللي يشطح خير انستي تعطيه الحلوى. قعدت نغلي وحدي و طارت النفحة، رميتلو قْلمّات ووراق بش يقعد يخنتب وحدو و قعدت نستنا في امو. جات المرا، فرحانة مشرقة، جبدتها على شيرة ف الكوجينة و قلتلها بش نحكيلك حكاية grave. انا قلتلها الداقزة و المرا عينيها شعّت م الفرحة وقاتلي ريت محلاه شطيحو؟ يهبل! عندو موهبة كبيرة. شي رباني...

بصراحة مرة م المرات القليلة اللي اسقط في يدي و لساني يتربط. ما لقيت ما نجاوبها. مدام الطفل فرحان و انستي فرحانة و الام فرحانة، اش بش نزيد نقول؟؟ اللهم زد وبارك ف ها الجيل مش الصاعد و انما البارك. دخلت بش نجيب الطفل يروح نلقاه عمل بنصيحة تتا نانسي و شد اكا القلمات و الفوتر شخبط بيهم ع الحيط، عمل لوحة تجريدية اعجوبة. ماطيح ع الشطيح الرباني كان التصاور الخليعة اللي صورهملي ع الحيط!

كتبتها:bent 3ayla على الساعة: 10:51 م

تعليق غير معرف ...

ayya hani ana awel waèed ellila enchalla looool

21 فبراير 2009 في 11:07 م

تعليق kmr ...

aya barra sa7a 3lik!!

5allini na9ra il post 9bal mancommenti! le titre semble tentant!!! ;)

21 فبراير 2009 في 11:13 م

تعليق kmr ...

wallah ken jet fil ghnè fil hamm 3zè!!! ama ma3andekch fekra winn wsselna!

thamma video 3al FB, brabbi illi ynajjem yal9a il lien mte3ha y7ottou hnè, feha un enfant de 5 ans au grand grand grand maximum, yetkayeff fi sigarou atwel mennou, w dhaher hekelli 3andou des mois yetkayef 3al a9all...

min ne7ya o5ra, mart 5ouya matal9a mat7ott il bentha fil télé, t7ottelha 9anet "toutyour aljanna", éducation islamiste (je dis bien islamiste et pas islamique) complète: lavage de cerveau, destruction de toute logique raisonnable, inculcation (je ne c pa si le mot existe :p) des valeur de l'islam extrémiste, raid, aveugle... cet islam que je n'aimepas et auquel je ne crois pa


ps: je ne crois pas a cet islam la, mais je suis musulman, croyant, sans nul doute, mais jamais de cette religion que cette chaine prone, qui n'est pas mon islam

22 فبراير 2009 في 12:26 ص

تعليق غير معرف ...

يـا بـو قـلـب...تـي هـانـا بـالـرّسـمـي داخـلـيـن فـي حـيـط !!! لـو كـان يـجـيـنـي طـفـل هـكّـا يـا نـدخـل في جـرّتـو لـلـحـبـس يـا نـنـتـحـر ... هـيّـا بـاللازمـة نـاقـص مـنّـو الـعـرس و الـسّـمـاح فـيـهـم الـصّـغـار..!

22 فبراير 2009 في 12:30 ص

تعليق Amin ...

شخبط شخابيط ...
لخبط لخابيط ....
مسك الالوان ...
ورسم ع الحيط ...
الدنيا تتطور و احنا ما في بالناش
هي الغناية هاذي مهبلة الكبار كيفاش تحب الصغار ما يتغرموش بيها ?
اش قولك ياللا قراو معايا زوز عزلكة الي هذا بشلاغمو حاطين غناية "اه و نص" في الكرهبة و يصفقوا و يغنيوا حاصيلوعاملين ربوخ تقولش في عرس انا قلتلهم حطولنا حاجة اخرى و هوما يا لطيف قحرولي قحرة تجمد الدم في العروق.
في هاك اللحظة حسيت بوحدة كبيرة كيما يقولوا القورة :
"un grand moment de solitude"
تقولش عليا جاي من كوكب اخر,قلت بالك انا ما نفهمش في الفن و الا الغناية هذي تحمل في طياتها معاني وجودية ثلاثية الابعاد قوية على طاسة مخي.

صحيح الاذواق الواحد ما ينجمش يناقشها
tous les gouts sont dans la nature
و للناس فيم يعشقون مذاهب
اما اذا كان الفن يولي مقتصر كان على النوعية هذه متاع "باحبك يا حمار" و "البرتقالة" ودمار اكاديمي" فانا نشوفها مشكلة كبيرة.
ما نعرفش كان في بالكشي الي بعد المسابقات متاع جماعة الخليج (هاك الي الكلهم لابسين بالابيض و يدوحو في روسهم تقولش دجاج الحاكم تي هذوكم الي يلعبوا بالمقارن )
توة في لبنان عملوا مسابقات لاحسن "فنانة" في اختصاص الرقص الشرقي و المشاركات مش كان عرب برك برشة منهم من اوروبا الشرقية. ما اقوى سعدنا العرب الاشعاع الحضاري متاعنا وصل حتى لاوروبا الشرقية...

انا ما نحبش نتكلم كالعزايز و نقول يا حسرة على ايامات بكري اما هذاك الواقع الجيل الي جاي اتعس ملي قبلو كان في القرايا و الا في الفن.شوية مالحنة و شويا من المشرفين على البرامج التلفزية و الاذاعية الي حقهم يتحاكمو بتهمة افساد الذوق العام.
شتان بين البرامج الي تفرجنا فيهم و احنا صغار و بين الي يتعداو تو; برامج و اغاني سخيفة
و تستبله في المتفرج الكبير قبل الصغير,الصغار راهو عندهم قدرة غير عادية على الاستيعاب في عوض ما يستغلو الفرصة باش يمررورلهم اكبر كم من المعلومات من خلال البرامج الترفيهية لا هوما يستغلوا فيهم باش يمرورلهم اكبر كم من الومضات الاشهارية و الاعلانات من قبيل صوت لنجمك المفضل...
في اليابان عندهم ورشات لصناعة الروبوتات و نوادي للموسيقي و العلوم و الرياضة الواحد منهم تلقى طموحو انو يولي مؤلف الموسيقى و مخترع و الا باحث و احنا طموحنا انا نوليو "سطل" سامحوني نقصد STAR و الا "كوارجي" .....

بنت عايلة فاش قام عليك المزايا المرة الجاية كي المرا هذي تجيبلك الغشير متاعها قلها برا حطو في اقرب salle de jeux والا publinet.

سامحوني كان طولت اما قلبي ياسر معبي و انت حطيت صبعك عالجرح و شكرا على التدوينة.

22 فبراير 2009 في 12:45 ص

تعليق Free Eagle ...

بوس الواوا
الله يهديك يا بنت عايلة تحب تعقد الطفل بنسمة الحرية و مي مي يا محلاها تربي عروسة و تجري وراها و تقوللها تي ... سامحوني كان سرحت و قعدت نغني، هههههههههه. بصراحة صغار توة حالة حليلة و تجي تلوم تعذر على خاطر التلفزة ياسر فسدت أذواق الصغار و مرة الصغير يتعلم السرقة و التبهنيس من إشهار قوشو و مرة واحد حب يقلد باطمان رصاتلو مات مخنوق و مساكن الله يصبرهم كي يصبحوا على الفتن ما ظهر منها و ما بطن و إبدى من بوس الواوا حتاكشي رجب حش صاحبك عني إلى عتريس و مشتقاتو. و بللي يعملوا هالصغار نقولوا صغار و تو ثمة أمل باش يترباوا أما نزيد هالشباب إلي كرهوني في كلمة شباب و النهارين غاطس في دار ميت و رينا لعجب و هاك الطفل ما حفظ كان البوس و التعنيق قال شنوة حزين و يعزي في جارتو بالبوس و التعنيق و زيد رينا رهوط حاشاكم حاصرين حواجبهم كيف النسا و خلي من البرسينغ إلي قاللهم أسكتوا و إلخ. الحمد لله و الدنيا بخير من شبابنا إلى طفولتنا

22 فبراير 2009 في 1:02 ص

تعليق غير معرف ...

juste haja barka habbit n9oullha el si KMR:
yezzi mettnouffi99 enta3ekk 9allou islam nta3ek !
em3arress wettdourr bensé ghirek (matkhallinich nejbedd el hkeya wenti fahem)
taffi rouhekk fel hkeyett hedi wefhemm rouhek !

22 فبراير 2009 في 2:12 ص

تعليق kmr ...

lè wallahi madhabia tejbedha éna le7keya, 5ater a vrai dire nsitha chowaya, dhakerni 5allini (5allina ilkoll) na3mlou dho7ka!!! ;)

eyh w 7wija o5ra, ndour bnsè o5rin w éna m3arress???? bon peut etre que c vrai, nsit, ama d'une part inti ech 7ra9 ch3irek??? marti w sou7ebt 3lik wela rajel fakkitlek martek??? w d'une autre part ech mda5el il islam fi hedha??? sa3 hedheka tatbi9 7arfi lil chari3a il 2islamiya: mahou 9alou 3andek il 7a9 fi arb3a!!! ;)






aya hani nestanna fik 3ad, nawerni bklimtine spirituelle belgdè, 5allini na3tik klimtik n5allilek isspiritou yaghli fi mo5ekk!!!! ;)

@+

22 فبراير 2009 في 8:08 ص

تعليق femme au foyer ...

brabbi chkoun yal9ali ghneyet "3andi dbayad ya ma7leh" 3andi 9addech nlawej 3liha el benti 3morha 14mois sinon rani bech n7otelha "cha5bat cha5abit" rahou w thenebha fi ra9betkom ;-)

22 فبراير 2009 في 11:21 ص

تعليق Stupeur ...

والله أش باش نقلك يا بنت عايلة, صدقني هاذا شيئ يحمم القلب و نزيدك أكثر من هكا ولدي في نفس هالعمر الي تحكي عليه و كل حديثي و بلابزي أنا و أمو و معلماتو عالحكاية هاذي
سياسة التبهيم المتقع هذي سياسة مرغوب فيها و تخدم مصالح المشرع
الحمدلله جاو بعض الوالدين فايقين و مقتنعين بخطورة هالآفة الي تنخر فالمجتمع و يحاولو يقومو بواجب مضاعف باش يلقفو ولادهم

أول مرة نعلق عندك أما ديما نقرالك و تعجبني كتابتك و مواضيعك
يعطيك الصحة

22 فبراير 2009 في 11:29 ص

تعليق Kibitz ...

الحقيقة شيء يخوف
زعما الوليد بوه في بالو؟ ما ناقص كان هو بش يبارك التوجه متع انستي(تربيلنا في اجيال الغد، الي بش يخلصو التقاعد متاعي ومتاعك يا ك.م.ر)

22 فبراير 2009 في 1:08 م

تعليق Kibitz ...

خارج على الموضوع : ك.م.ر ياخي تعرس وماتقليش؟

22 فبراير 2009 في 1:12 م

تعليق kmr ...

a@kibitz: fil mawdhou3: etta9a"od??? mezel bekri 3lih, mezel wa9tou!!



5arej al mawdhou3: 9olt lrou7i éna bech n9ollik lik inti!!!

éna nans7ek ya weldi, barra thabbet 3la rou7ik, tatla3chi bawledek w w fibélik mezelt tlawej!!! barra ya weldi rahou illi 3and rabbi mouch b3id!!! ;)

22 فبراير 2009 في 2:24 م

تعليق AntikoR ...

Hé Hé, tu devrais faire plus de baby sitting , je t'assure que c'est le meilleur moyen pour ne pas etre
totalement out :p !!!

Je pense que les garderies scolaires sont différentes, j'ai une cousine qui a une fille , elle est dans une garderie, et ils apprennent plein de truc et font beaucoups d'activités.. il y a donc deux points :
1- les parents doivent se renseigner avant d'inscrire leurs enfants.
2- des inspections fréquentes doivent être effectué à ces établissement ou l'on prépare les futures générations

22 فبراير 2009 في 3:37 م

تعليق Amin ...

@femme au foyer:
الله لا يجعلنا جرة
هاو compil متاع غنايات كانو يسمعهولنا في الروضة نشاء الله يعجبوك:
ـ محمد ثروت :منى/رشا/عيد الميلاد/بسم الله/جدو علي عندو ضيعة/عيون بابا.
ـ محمد فوزي : ماما زمنها جاية
ـ وردة:كل سنة و انتي طيبة يا مامتي
ـ لطفي بوشناق: مي مي
ـ رضا: ديكي ديكي
ـ الصيادي : يابابا الله يخليك/يطول عمرك يا ميمة يا حنينة.
الله غالب "عندي دبيب يا محلاه" قلبت عليها الانترنيت شي ما فماش ريحتها !!
غنايات للاطفال

22 فبراير 2009 في 5:10 م

تعليق femme au foyer ...

amin@
merci
bent 3ayla@
yodhhorli bech nwalli netseba9 m3a ejme3a bech n3alla9 loula bech ma tensenech w t3abbarna 3la 5ater j'ai remarqué fi les postes le5renin tetfe3el m3a elli y3al9ou mel loul w taffi le5renin :-( keyenek t3a9eb fina 5ater jina en retard

22 فبراير 2009 في 5:25 م

تعليق femme au foyer ...

nfadlak rahou yemchichi yjed 3lik na3raf elli enti ki tal9a el wa9t bech teketbelna kol youm post ta7foun tfarahadna bih c deja pas mal ;-)))

22 فبراير 2009 في 5:29 م

تعليق غير معرف ...

ya bent familia, ti chnowwa eddifirinsa bin qball w tawwa. ti mahou lkollha ghné masrawi w lobneni. ken diin rahou men 3andhom, ken ghné à la mode rahou men 3andhom, ken ghné za3ma za3ma mta3 fann, rahou men 3andhom. on est et on restera des suiveuuuuuuuuuuuuuur.
w ta7ya al we7da al 3orribiyya.

22 فبراير 2009 في 7:22 م

تعليق غير معرف ...

: bourne
bent 3eyla, enti jebet exemple ytrès concret de la réalité,
eni weld o5ti mch b3id 3el wled hetha, nhar w toulou w houwa ydawer fi 7zemouw yel3eb m3a lebnet w cheded sberka ynadhef fidar,
o5ti 9oltelha kemlou heka tawa yweli 3ena PD fidar !
rahou ynervezni mch normal bel ghna eli y7otou w hew nansi hew star ac ... bech yjeneni, fema nhar chedet bouh 9otlou ekbess weldek chweya chnouwa heri9 hetha! 9ali ki ndedou !!!!!!!!!!!!!!!!!!!!!

23 فبراير 2009 في 10:39 ص

تعليق غير معرف ...

http://www.hiphopgalaxy.com/Busta-Arab-Money-Remix-ft-Ron-Browz-Diddy-Swizz-Beatz-hip-hop-7858.html

23 فبراير 2009 في 4:59 م

تعليق غير معرف ...

les paroles sont une scandale pour tout arabe libre..

23 فبراير 2009 في 5:01 م

تعليق غير معرف ...

salem
awel marra j vois ce blog
wallahi idhahr bnaya dhamra tbarcallah 3lic w ça change des blog illi fi siyessa w biologie w chimie w economie...
emma j voulais vous dire si vous regardez sur tv 7 le soufien chow de sbou3i w sghayrat taw vraiment vous allez etre illi il3alem dekhel fi 7it.

24 فبراير 2009 في 12:27 ص