|
الأربعاء، فبراير 11، 2009
|
|
شوف يا سيدي، الحاجة كلوفية ولا عندها معجبين، و العباد تحب تسمع اخبارها! انا عاجبتني الحكاية خاطر لا بد بطريقة ما، راهي تعرفكم واحد واحد و اذا مش انتوما، اهاليكم. و بالتالي من منطلق توازن التنسنيس، نحس اللي حتى انا لازم نجيبلكم اخبارها و طرايفها. و بما انو عندي احساس انو اكتشافها لها البلوغ ما عادش يبطا على خاطر عمرها لا خفا عليها شي، ووقتها مشات فيا و ف الحشاشة، لازم نرتب السيرة لا تتقطع العلاقة الحميمة اللي تربط بيناتنا. على خاطر و الله نعزها برشا، نرا فيها برشا حاجات متع ناس بكري ماشية و تضمحل. و اهم حاجة تعجبني فيها هيا حماسها للمات الجماعية و كرم الضيافة...
كيما اكتشفتوا -ولاّ كما كشفت روحي- انا نسكن ف الزهراء. مدينة صغيرة و تحفونة غير لو يبدلولنا البلدية اللي عنّا ما هملولها كان هوما. في حين انو كانت في عهد الاستعمار يعيطولها سان جرمان و كان شكون و شكون يخلط عليها. لكن مهما كان فيها ميزة هامة، انو تعطي ع البحر.  و رغم اللي صارت برشا مشاكل و البحر متاعها قالك تلوث و ما نعرفش شنوة و لتوا لا عرفنا صدق ولا كذب، من منطلق شفافية الادارة مع المواطنين، تقعد ماهي الا مدينة ساحلية. و خاصة التران يوصللها، يعني تتعبى بالزوار ف الصيف، و اللي يسكن ف الضاحيات اللي تعطي ع البحر، لْكُلْهم يزدادو زوارهم و احبائهم ف الصيف. و الصيف، ماهو الا ضيف! و صيف على صيف، لازمنا فترة نقاهة بش نرتاحو م الدهك متع الضياف و التاطيب و العرك والمعروك و العروسات و الحس و اكا الجو متاعنا الكل. اما صيفية منهم كانت تاريخية. بخلاف الضياف العاديين اللي كانو يجيو ع الطريقة القديمة اي دز الباب و ادخل، و عسلامة هاني جيتك، لا تاليفون لا شي، و اللي يجيوك مش على حاجة، بش ياخذو بخاطرك وبرا،صيفيتها جانا ضيف م الوزن الثقيل. خال امي و يامن ادراك. راجل زمني مصرانة على حالها ما فيه ما يتفصل، خاصة وانو بدا يكبر و الالزايمر بدا يظهر عليه. من عوايدو انو يعدي نهيرين و يروح، مرتو توفات بحياة روسكم الكل و قعد يدور من دار لدار، ولا ساعة ساعة ياقف على رزقو. ما ينجم يقعد في كل دار كان نهارين خاطر طاق لا يطاق. كل مرة باللي يعملولو يزمبكها مع الناس الكل و تولى عركة تثبت ع الجد لوّل و تتجبد هدرة الرزق و الورثة متع جدو الّي لتوا لا تفضت. نهارت اللي جا، امي وجها صفار وخضار، اساعة تعرفو شخناق ممراق، كي تشعل صوابعك العشرة شمع محال يرضى عليك. يحبها في سخانة اوت تصنعلو طابونة عربي ف الجردة و تعملو طاجين بين نارين و اكا الريق متع ناس بكري الكل ماكانش يعتبرها عرة. نحنا مزلنا كي دخلناه و حطينالو البسيسة بالفاكية (ماو ما يشربش القازوز) تبردو من عرق الثنية على دخلة كلوفية... امي تمتمت وحدها وقالت كانت تشخر زادت بف! الحق انا و التفاؤل و الانشكاح متاعي قلت خلات! كان ما يهبطوش القبعات الزرق لدارنا و يسيبو حرب لبنان (ماو صيفيتها حرب لبنان) و يتلهاو بينا، و ترصيلنا نضيفو في مزمزال رايس ف البسيسة ما نتسماش بنت عايلة... كلوفية دخلت، على سلامتك يا حاج، و بدات تخرف هيا وياه، و تْبَتْبِت عل الاصل و المفصل و المرا الله يرحمها و الانساب الخ الخ. طلعت بالصدفة تعرف دار مرتو و كانو حبيبات يتلمو في دارهم في المدينة العربي بش يضربو العود و البيانو. وبدات عاد تحكيلو عليها ف صغرها و قداهاشي كانت الله ينعمها و يرحمها في كل تشقليبة، كيسة و حليلتها... هيا تحكي و الراجل عينيه تزغلل بالدموع و التنهيدة قريب بش تقطعلو النفس. غلبتو باللسان الحلو! الجولة لوّلا، كلوفية 1 شخناق 0 من ليمت غدوة الصباح، ع الفجر، الحاج شخناق قام و قاللي "دورلي" التاليفون واضرب لاكا المرا الفاضلة تجي تشرب معايا قهوة الصباح. هيا بيدها ماي مطلقة و ولدها ف اخر الدنيا، وحدانية، جات تجري. و مللي كانت قهوة ولاّت طاولة فطور منصوبة لا نودكم لا نشهيكم. و الحاج ما يحبش ها الشي، جملة! وزيد عندو طريقة مميزة ف الحديث عل الماكلة تخليك بالسيف تتشهى و معدتك تحرك عليك. هاو ورقة ملسوقة كي التفتا، هاو تن فصوص فصوص، هاو زيت كرهبان، هاو سردينة تْلِجْ، هاو لحم طري حبق... لانودكم لا نشهيكم. الحاسيلو، اكا الصيف عداوهولي شقلالة، نهار كامل و انا نكركر و نجيب و الحاج قول رجعولو ايام شبابو، و ايام عزو، كل شي دياري، حتي م الفطاير و الفريكاسي. الجولة الثانية : كلوفية 2 شخناق 1 الحاج شخناق ولا هكا هكا بالمرا، و نهارت اللي الكلنا عرفنا عين الشيخ جات ف الشحمة هوا نهارت اللي قاعدين يتفرجو ف التلفزة و تعدات نانسي ف كليب. الراجل نعرفوه يحبها و يموت عليها، بذمتها يخرج العكاز، يتركز عليه بش يقرب للتلفزة يلبس مراياتو و يبدا يصلي ع النبي. نهارتها، نانسي طلعت من هنا و هوا تلفت لكوفية و قاللها، تي هاي اللي قتلك عليها تشبهلك! كلوفية تقضى علي شخناق بالـ K.O انا وين تلقاني بالضحك؟ بش نموت! ما عادش نجم...قلت ووه على سعودنا بنات توا... انا حتي اكا شرين متع اه يا ليل ما خلطش بش يشبهوني بيها، خلي عاد نانسي..اما الراجل طلع مش يفدلك. ما كملت الصيفية الا الراجل طالب يدها بالرسمي! اما هيا قالتلو، مش متاعنا يا حاج، راهو المرا في سبرنا تاخو مرة برك. انا خذيت و تطلقت اكاهو، هاذاكا اش هزت مغرفتي. باللي لحلح و زقدح، شي... المصيبة اللي الحكاية وصلت لولادو الرجال ماو عندو زوز ولاد و طفلة، و جاو يتجاراو للدار و صارت عركة للسما و ولات امي تخطط بش تمسحلهم شواربهم م الرزق و سحرو الراجل و عملولو... و خاصة مرت ولدو شدت كلوفية في تركينة و حاولت تعطيها الحس لله في سبيل الله. اما وينك، طايحة مع كلوفية، مسحت بيها القاعة و فرتتها على راسها كرشة. و تقولش بردت على داها؟؟ عقارها قوي يا ولدي، جات للحاج و بالحق دارت بيه، اما مش على حاجة ليها، اقنعتو انو يكتب ثلث الرزق بيع و شرا لبنتو ويعدل بيناتهم الكل بصينية مدموجة و كعبات محنشة... |
|
كتبتها:bent 3ayla
على الساعة:
8:05 م
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
Tawa ya bent 7oumti matnajemech ta3ref b7ar ezzahra mlaweth walla le ,walla nsit ha elloun lasfer eli yabda fih t9oul broudou walal khalini setkta ou hak erri7a eli t3aj3ej ?ama 7keyet el baledia 5allini sekta ou barra netdhakerha ezzahra ki enet ndhayfa thabel , rabbi yehdi ma5La9 ou barrah kol 3am at3ess melli 9ablou.Ena ghalbou 3lia ifeh 7yetna kol 3anna 7AWEYET 9amou le ta7 le dezzouh na7awhom ou lewe7 chkayrek fel eyess tawa ennes t9addem wa7na nwa5rou?
Tawa ya bent 7oumti matnajemech ta3ref b7ar ezzahra mlaweth walla le ,walla nsit ha elloun lasfer eli yabda fih t9oul broudou walal khalini setkta ou hak erri7a eli t3aj3ej ?ama 7keyet el baledia 5allini sekta ou barra netdhakerha ezzahra ki enet ndhayfa thabel , rabbi yehdi ma5La9 ou barrah kol 3am at3ess melli 9ablou.Ena ghalbou 3lia ifeh 7yetna kol 3anna 7AWEYET 9amou le ta7 le dezzouh na7awhom ou lewe7 chkayrek fel eyess tawa ennes t9addem wa7na nwa5rou?
قاللو يا ضيف قداش قاعد بحذانا ..قال عام..قاللو اممالا اقعدو فوق راسى...خال الوالدة ضححكت عليه لعباد يا بنت عايلة.....
لينا، و الله حرت يا لينا، البحر قدام عينيك ما يعجبش، تمشي للبلدية يقولولك لا، هانا نحللو فيه كل نهارين و يعوّم. ترجع للبحر تلقا بلاكة من جيهة الواد تقلك ممنوع السباحة ترجعلهم يقلك لا عوم، هاذيكا حاطينها عل الحجر! برا افهم.
اما الحق السنا عملت غطسة ظهرلي باهي، بدا يرجع بحر الزهرا متع قبل، احسن من اكا الاعوام ببرشا.
عم ابو العربي، الصيف و اضيافو احلى على قلوبنا م العسل، اش خير م اللمة و الشيخات؟ علاه ضحكت عليه العباد؟ هوا هكاكة الراجل صحيح طبيعتو واقفة اما كي تزهالو، كنز على حالو..
ya binti houta ala bnet banlieue sud w ana nkoul hal dhmar hadha mnin :)))
ta3ref éna je ne connais pas ezzahra, mais j'imagine que c'est près de hamam linf et mourouj et manouba, de ce coté là, doooooonc nji na3mél 3lik talla :D
ma7léhhh bloguek wallaaaa! ghért mennou éna :P
ma7léha kloufia en tt cas!! :))
أهلا بيكم.
بخصوص البحر في تونس بصفة عامة كان ما صابوش التلوث الحسي يصيبوا التلوث الخلقي. من 2005 ما نتفكرش روحي مشيت للبحر بخلاف مرتين بردت فيهم ساقيا على خاطر ثمة برشة رهوط كرهونا في البحر من كلامهم الماصط إلي ما يكون كان على وزن الزاء و الراء و خللي كان مشات معاك أنثى تكون منك و تو تسمع هاك الرويق البارد متاع إلي يسميوا رواحهم البزناسة و هوما في الواقع ما أثقل دمهم و ما أركهم و ما أقل همتهم. بخصوص بابا الحاج شوهه نشهدلوا قداش قلبو مازال صحيح و حارص باش يعاود يكمل نص ديني من أول و جديد كيما يقولوا المصاروة غير خالتنا كلوفية قاعدة تتمنع و تتدلل و تبع في سبر التوانسة.
بوست حلو كيف العادة
زايد معاك بنت عايلة
ema dsl 3al divorce bent 3ayla
mella kloufiya hethi kol marra nektachfou fiha mawehba jdida!
ken yet3adda un réalisateur men hna netsawar elli kloufiya bech tkoun batalat mousalsalet romdhan el 3am ejjey
;-)
bien sure enti le scénariste bent 3ayla
bravo encore une fois!