ها النهارين كانت فما ازمة على مستوى القمة في دارنا. نهارين لتالي الوالد و الوالدة صبحو كل واحد طايرتلو. اللي هاذا يستنا ف اي واحد يقلو صباح الخير بش يشريهالو. بالطبيعة فطور الصباح تحول الى الاتجاه المعاكس. الدوسيات المحممة الكل جبدوها. و ماغير ما تتساؤلو برشا، الدوسيات متع كل دار، المصروف اللي كثر و السهريات لعقاب الليل متع الطفل و المحبة و الصداقة اللي تربط امي بعموماتي. يعني لا شي خطير. تي قول نوع متع روداج يعملوه بين فترة و فترة، بش ينجمو يتسامحو مبعد.

انا وحدة م الناس ما فطنت بيهم تعاركو كان كي روحت العشية و ريت بوادر الصلحة. امي حضرت المّاكل اللي يحبها سي راجلها و بدات خدّمت الجزيرة على بكري بش تعملّو حوصلة و حاطة قدامها تقدلو ف التمر بالزوز. عمكم بو بنت عايلة روّح حتى هوا جايب الخيرات السبعة و دار علينا باسنا و زعمة زعمة هيا الاخرانية اهوكا طبس باسها من جبينها. ووفات الحكاية غادي. كلمة اعوذ بالله ما جاتش بيناتهم.

من ليمة غدوة تنوّرنا الحاجة كلوفية بزيارة .و اللي يتساءل اشكوني كلوفية نقولولو سامحنا ظاهر فيك مش ولد البلوغ اهوكا ارجع للارشيف، البلوغ شطرو عليها. ايا سيدي قعدت نحات فولارتها، نحات من ساقيها و لبستلي شلاكتي. انا عرفتها القعدة بش تطول و الحكايات بش تحلا. اما امي بدات تستعوذ في قلبها. ضيفناها و فرحنا بيها، المرا تقدّم توخر، تتلف لامي و تقلها

- ايه عاد، و علاه تعاركت انتي و بو بنت عايلة؟
-وووه! و انتي منين ليك؟؟
- تي يزي يا لاّ ام بنت عايلة. ما يخفى شي راهو! يقلك هموم مفرقة غير الحيوط مدرقة...
- ايه كي تعرف اللي احنا تعاركنا، خ نسألك انا علاه!
- لا عاد مش للدرجة هاذي. سمعت بيكم متنابزين اما علاه و كيفاه هاذي نسمعها من عندك.
- لا يا للاّ لا تعاركنا و لا تنابزنا و لا فما ما نحكيه. ربي يبقي علينا الستر!
- ربي يبقي الستر على جميع المومنين. اما انشالله ما صارش اللي في بالي. انتي لازمك تفيق بنتك من توا، و هاي تسمع فيا، يعيش بنتي حل وذنيك، ما تخليش راجلك يعفسلك على طرف. ما تخليهش يمد يدو عليك! نحبك لبوة كيف امك و كيفي هكا. النفس ياخو بمشورتك..
- هذاكا اش قعد و هذاكا اش مزال! لا يا لاّ كلوفية، لا راجلي ضربني لا بنتي بش يضربها راجلها. كان تعرس و تجي تحكيلي ها الحكاية الاما انا نزيد نضربها! مزالشي؟ متع هاذا نحنا؟
انا وحدي وحدي نطقت من اجنابي، قلتلها يا بنتي خليه يجي ومبعد يعمل الله دليل، كان تحب نضربوه انا وياك!

و شنعو ربع ساعة وحدهم. امي تقلها خاطينا ها الشي و كلوفية زعمة زعمة تقلها ايه نعرف وه، اما فما برشا نسا كيفك هكا يكذّبو و يغيطو على رجالهم، يعني بالعربي راو انا متاكدة اللي ضربك و اللي انتي تخبي عليا. و قاتلك ميسالش، يصير في احسن العايلات. و في اتعس الحالات ضرب الحبيب كي اكل الزبيب، احلى ع القلب م العسل. باللي قالتها و عاودتلها -ماي خايفة لا تنشرها اشاعة ف الحومة و تولى الحكاية بالرسمي- شي! اكا المعبوكة لا حبت تسيبها.

انا نغزلهم و عاملة جو، نحب ها الخوضات. بش نمنّع امي خير ما تتكى عليها تسفرلها بروحها، طلبتها من البرتابل على تلفون الدار، اهوكا زعمة زعمة جاها تلفون بش تمشي تبرد دمها شوية. اكاهو عاد، استفردت بيا كلوفية و لو انو الاصح استفردت بيها انا.

قلتلها ايه و الله بالحق، الواحد توا كي يحل الجرايد ما يرا كان ها الحكايات. اما الغريبة اللي الكلهم نسا عملو ف رجالهم. هاو وحدة صمتتو بالزيت يغلى، هاو لخرة قصتو طروف طروف و نشرتو عل العاصمة ف شكاير كحل...تي انا يظهرلي مساكن الرجال هوما اللي ولاو يخافو م النسا ويحسبولهم الف حساب.

كلوفية سكتت. سمعتني و تنهدت م القلب و قاتلي ما يغركش. يمكن على جيلكم انتوما الشي تحسن شويا. اما الغالب ف الديار اسمعو مني انا ما تسمعوش م الجرايد. النسا برشا منهم اللي يبلعو الكلمة المرزية و الوجه المكشبر، هاذا استانسو بيه. اما حتي اللي كملو كلاوها ف عظاهم مش شوية. لو كان نقعد نسميلك النسا اللي تعرفهم و تشوفهم مقيشين و هوما ياكلو ف المسبط ف التراكن الا ما تبهت. تي انتي عس ع النسا الي جمعة على جمعة ما يجيوش للحمام. علاه زعمة؟ ماو كان اللسان مربوط، الازرق يفضحهم! فما اللي تاكل ما كلا الطبل نهار العيد و تسكت، و فما اللي تطلق -كان عندها وين تكن راسها- و فما اللي يفيض عليها الشي و تعمل ها العمال.

زادت رشفة تاي، سرحت ف القاعة و كملت قالتلي، هوا كي تجي تشوف، ساعة ساعة يمد يدو خفافي، باقي مقبولة. ماهو الا راجل و الدنيا صعبت عليه. و المرا كي ما تستحملش راجلها ، اش كون بش يستحملو؟ زعمة احنا احسن من اماتنا ولا رجالنا خير من اباتنا؟ تي اش علينا... هاو كل واحد مشا في حالو...
انا بهت، قلت في مخي زعمة الحاج خاطيه راجلها السابق يطلع مش خاطيه برشا؟ قلت خ نسالها بالعكس..

- اما هاو انتي خالتي كلوفية، الحاج خاطيه ما كانش يمد يدو عليك...
- لااااا وه، الحاج خاطيه كان خيار الناس، عمرو ما اذاني بكلمة، تي دقة الشوكة ما يحملهاش فيا. و زيد انا بش نقبل ها الشي؟ لا لا ، الف و اعوذ بالله. صحيح ماعادش عند امالي و اللي مات مات و اللي هج هج، اما ماكنتش بش نسكت..

اما خسارة. وهيا تسرسط ف ها الطاروح، و بكلها ترعش، عينيها خانتها و الدمعة شعرة لا هبطت. مسكينة كلوفية، برشا ظلموها وقالو مرا قوية و ما ينجمها حد. اما يظهرلي قوية خاطر مافاق بيها حد. بالحق هموم مفرقة و حيوط مدرقة.

كتبتها:bent 3ayla على الساعة: 3:54 م

تعليق غير معرف ...

un subtile mélange d'humour et de mélancolie ! !
ايا إطلعلي بالكادو ;)

3 فبراير 2009 في 6:26 ص

تعليق غير معرف ...

صباح الخير يا آنسة بنت عائلة
موجود. العنف بالكلام و إلى الضرب موجود أكثر ملي نتصوروه. بخلاف كلمة " ما يجييييييييييييش " ما عندي ما نجاوب.
بالله من غير جبدان الرجولية و عدم وجود الشخصية على خاطر يظهرلي ما همش أسباب التصرفات هاذه. السبب أعظم. السبب في ربايتنا و في قداش نقدرو أنفسنا و نحترموها.
حتى حد ما يستاهل عشيرو يهز عليه يدو و حتى حد ما عندو حجة باش يهز يدو في عوض يتكلم.
بالله يا بنت عائلة تقولش عليك عطيتني كف (معنوي بالطبيعة!).
نهاركم طيب الكل.

3 فبراير 2009 في 6:43 ص

تعليق abu arabi ...

النسوان متيل السجاد..ساعى لا ساعى يلزمهن الطنفيد

3 فبراير 2009 في 7:44 ص

تعليق bent 3ayla ...

نوماد، انا يظهرلي اللي يمد يدو هوا اللي ناقص رجولية. ارجلكم الحليم اذا غضب. موجود وموجود برشا. ولات ظاهرة العنف مش كان ف الاسر، ولات حتي اللي مصوحب يمد يدو يهدهد الصاحبة. برشا نسا يخافو من نظرة العباد ويوليو يخبيو و ف قرارة نفسهم يحاولو بش يبررو للرجال.

هاو سي العربي -نتمنى اللي هوا يفدلك- عطانا راي هايل ياسر. انا رايي الوقت تبدل و جيب اسبيراتور خير.

سي امين، اليوم انتي اللي دبرتها. ايا سيدي بنت عايلة كلمتها كي السيف علي رقبتها. الجايزة هيا البوست متع السان فلنتان، حكاية نحب نحكيها و ف نفس الوقت ماذا بيا ما نحكيهاش. و بالتالي بش تعطيني الايميل متاعك، و نبعثهالك انتي برك. كان تحب من بعد تشارك الجماعة فيها، اعطيني الاوكي!
قول مش جايزة هايلة؟

3 فبراير 2009 في 11:19 ص

تعليق abu arabi ...

ماتاخوش فى خاطرك...والله نفدلك وبره...الوقت تبدل ..صحيح الخنيفري بين الزوجين اصبح حاجة عادية..مانتصورش انو جدودنا كانو جلادين متاع نساء...الاحترام والعشرة موجودة عند ناس بكرى رغم نسبة الامية المرتفعة فى هاكا الوقت...وعلى كل فى كل زمان العنف ضد المرأة يبقى حاجة ممجوجةوالمسؤول على العنف هو التوازن النفسى متاع الشخص وماهوش مربوط لا بمستوى تعليمى ولا اقتصادى

3 فبراير 2009 في 11:49 ص

تعليق abu arabi ...

الكلمة متاع النسوان والسجاد قالها نصرى شمس الدين فى مسرحية نسيت اسمها

3 فبراير 2009 في 11:51 ص

تعليق femme au foyer ...

thakartni ya bent 3ayla fi barnemej forum mte3 mosaique fm marra ya7kiw 3al 3onf bayn el azwej welle behetni ray wa7da w we7ed tkelmou kasrouli kraymi w 9loulek mela bech errajel rajel ken ma yadhrabch martou se3a se3a bech yraja3ha lethnya
http://www.mosaiquefm.net/index/a/Actif/Cat/40
el 7assilou chay ybahat w barra

3 فبراير 2009 في 12:23 م

تعليق femme au foyer ...

"هموم مفرقة و حيوط مدرقة"
ama rahou la7yout ma3edech mdar9a w wellina nessem3ou fil 5onnar el kol fil radio wel talevsa ama fil 7alet hethi leklem 5ir mel sket

3 فبراير 2009 في 12:29 م

تعليق غير معرف ...

إي هات الصحيح، علاش تعاركو بو بنت عائلة وأم بنت عائلة ?

3 فبراير 2009 في 5:30 م

تعليق غير معرف ...

sa5fetni éna

3 فبراير 2009 في 5:53 م

تعليق Free Eagle ...

أهلا بيك وخيتي بنت عايلة و يعطيك الصحة على ها الموضوع الهايل. بصراحة الراجل إلي يتجرأ و يضرب مرتو عندي آني مش راجل و ما يستحقش باش يكون قوام على أنثى تحمل مسؤولية إعالتها. بصراحة آني نرى إلي ضربان الراجل لمرتو ينجم يعود للتكاليف المشطة للعرس و العرس المزمر يوصل لعشرة ملايين لين الواحد يحساب المرا قطعة موبيليا يزين فيها دارو و يعمل فيها إلي يحب. عرس من غير حب حتى صحوبية ما يجيش. بنت عايلة مثبته إلي خالتي كلوفية ما عندهاش موقع إلكتروني كيما القوقل، القوة لربي بصراحة.

3 فبراير 2009 في 6:41 م

تعليق bent 3ayla ...

هههه. الكلنا في حملة تضامن مع كلوفية. و الله اكا المرا نهفة. توا نهار نحكيلكم على قدراتها الخارقة اما في ميدان اخر..

العرس بالحق غلا، و النسا زادو غلاوه، بش نكذبو؟ توا الطفلة ماعادش ترضى باللي يجي، تتحاكك هيا و اصحابها اش كون "تكلفت عليه" اكثر. الله يهدي و برا.

ايا كي سي ابو العربي طلع يفدلك، الدنيا مازالت بخير. و لو انو الخنار اللي سمعت عليه في موزاييك يقشعر البدن. انا الحلقة ما سمعتهاش و عفت روحي. كان سمعتها؟ بالله الا ما نهد عليهم ف مونبليزير...

3 فبراير 2009 في 6:48 م

تعليق غير معرف ...

الله الله عليك يعجبوني العباد الي عند كلمتهم !
oooooh شاخت عندي معناتها البوست تلقاوه حــصـريـــا عند
خوكم اميــن وانا عندي حقوق النشر !
ايا يا جماعة الي يحب يقرى البوست متاع "سان فلتان" يحضرعلى الاقل 5 دنناير و يبعثهملي في جواب مرفق بطابع جبائي قيمته ديناران عن طريق احد الوكلاء المعتمدين في كامل تراب الجمهورية و نوعدكم بقدرة ربي البوست يوصل في مدة اقصاها اسبوعان بدخول الغاية.
اي محاولة لقرصنة البوست او نشره في الشبكة العنكبوتية تعرضكم لتتبعات عدلية ومن انذر فقد اعذر.
هاني عملتكم سوم يظهرلي مش برشا على خاطر حكايات بنت عايلة يستاهلو اكثر من هكا و زيد هذا يدخل في باب سياسة الدولة في تشجيع المواهب الصاعدة تره عارضوا سياسة الدولة.

الحاصل زايد معاك يا بنت عايلة تي هاو جو كبير animation و كادوات ناقص كان forum+rubrique dedicaces
و كرهبة للربح كل شهر و mosaique وقتها تقيد فلسة هههههههه

3 فبراير 2009 في 7:25 م

تعليق غير معرف ...

Free Eagle يقول...
أهلا بيك وخيتي بنت عايلة و يعطيك الصحة على ها الموضوع الهايل. بصراحة الراجل إلي يتجرأ و يضرب مرتو عندي آني مش راجل


sa7li charab ezzit :)

3 فبراير 2009 في 7:48 م

تعليق غير معرف ...

سي امين، اليوم انتي اللي دبرتها. ايا سيدي بنت عايلة كلمتها كي السيف علي رقبتها. الجايزة هيا البوست متع السان فلنتان، حكاية نحب نحكيها و ف نفس الوقت ماذا بيا ما نحكيهاش. و بالتالي بش تعطيني الايميل متاعك، و نبعثهالك انتي برك. كان تحب من بعد تشارك الجماعة فيها، اعطيني الاوكي!
قول مش جايزة هايلة؟

ti lai 3ad
chenwa jit ma55er chway 3andi
barcha 5edma matelhitech

immela el marra ejeya ki nji ena louwel 7ather rou7ek
je veux un cadeau
9am9oum

3 فبراير 2009 في 7:52 م

تعليق bent 3ayla ...

ايه اش بيه، خاصة و انو سي الدكتور متقدم بعدد النقاط حتى لتوا. التعليق لول متع البوست الجاي، فيه جايزة هايلة زادة. هاو بش نجبد دوسي اكحل م الدوسيات. و ناكدلك اللي هوا صار حرفيا. و ماصاب هاذا بالذات الي يربحو ما يعطيش الاوكي للنشر... ربي يستر لا نتدمر في جرة ها البلوغ...

ع الفازة و لتكافئ الفرص، غدوة البوست مخر، انا بيدي نهار ازرق يستنا فيا.

اه حقا غير معرف اللي حبد خونا النسر، راهو ساحلي و يفتخر، و اهوكا حتي هوا عندو ما يقول بروحو ف التدوين، اعملو طلة ع البلوغ متاعو، برشا جو.

سي امين كي تتعدى خلي الايميل بش تتسلم الجايزة اهوكا ابعثلي طول م الايميل متع البروفيل . اما راهو بش نبعثهولك ليلة السان فلانتان بش نحكيلكم على النهار الاكثر رومنساية في حياتي، لازم وقفة ع الاطلال...

3 فبراير 2009 في 8:19 م

تعليق kmr ...

aya 3la slametkom ya jme3a!! hay wallet t7ell bikri il 9ahwa!!! ;))


bon, bennesba lil post 9bal koll chay, ya bent 3ayla rahou les femmes (et meme l'a3bed bsiffa 3amma) qui donnent l'impression l'impression d'etre forts et impassibles, hedhouka houma illi tal9ahom en vérité sensibles et fragile, netdhakker une prof 9rit 3andha fil fac, kenet mat5af min 7ad, w ga7retha barka te découraged de faire quoi que ce soit, kerhinha la3bed ilkoll 5ater ma3andhech win idour erri7... hekennhar nal9aha tebki fil parking, 3leh??? 5ater un autre prof masselha karhbetha, w kif jet tkallem fih sa7 3leha w sabbha... elle n'a pu que pleurer de "9ahra"...


pour ce qui est du cadeau, yallela inti 3oud 9oul chnowa il kadou mte3 il marra ejjeya, ti nwalli n3ess 3lik min chbbek bitek!! inti ticliki 3la "OK" pour publier w éna nod5el direc t ncommenti ... à condition que le cadeau m'intéresse!!!! :p


ya anonyme, om bent 3ayla w bou bent 3ayla t3arkou 3la bent 3ayla: howa y7ebb y3arrselha, w hia t7ebbha tzid totleb il3ilm fil madrsa ilkloufia 9bal makoll yedd tchedd o5tha!!! ;);)


aya innestou, et au prochain cadeau!!... euh, post!! :p




PS: hani le seizième, mathammech cadeau????

3 فبراير 2009 في 8:22 م

تعليق غير معرف ...

hani mazelt ched goal nestanna fel post, ema m3a 6h 3andi match je reviens a 8h

4 فبراير 2009 في 4:52 م

تعليق bent 3ayla ...

باهي باهي بعد الثمنية. اشكون يلعب؟

4 فبراير 2009 في 4:54 م

تعليق غير معرف ...

ani 7ata ana nestanna

4 فبراير 2009 في 5:42 م

تعليق bent 3ayla ...

ههههه، ايا باهي، انطلاقا م الثمنية حضرو رواحكم. ولو هو البوست تقريبا حاضر. اما الكلمة كلمة.

4 فبراير 2009 في 5:44 م

تعليق bent 3ayla ...

اه بالله اللي يعلق لول يحط علامة بش نفرقو بين غير المعرفين. بعد توليش مشكلة انا لول لا انا غير المعرف لول؟

4 فبراير 2009 في 5:44 م

تعليق bent 3ayla ...

بنت عايلة وقعت ضحية تحويل وجهة من طرف اصدقاءها. كي ترجع تبوستي. سامحونا ف العطالة.

4 فبراير 2009 في 6:58 م