skip to main |
skip to sidebar
|
الثلاثاء، فبراير 03، 2009
|
|
هاو الضمير ف التدوين، حاطة الارديناتور و ندون. رغم اللي فمي تشق م التثاويب و عينيا تغمض وحدها. ايا سيدي مادام البوست هاذا فيه جايزة عظيمة للي يعلق لوّل، و الجايزة متمثلة في دوسي اكحل classe top secret في صندوق مصدّد ف الكاف متع الدار، بش يخرج يمشي للايميل متع المعلق لول و يعمل معمولو لربي كان يحتفظ بيه لروحو ولا يربح دعيوة خير كان يكمل يلغيه.
المهم، بش مانطولش ف البوست و تقراوه فيسع فيسع و تمشيو تعلقو، خ ندخلو ف الحكاية. برشا تفاعلو و تضامنو مع الحاجة كلوفية ف البوست السابق، و برشا فدّو من القدرات الخاصة اللي عندها ف التنسنيس. امالا بش الناس الكل تولّي على فرد كلمة وتولّي تحب كلوفية او لا احد، بش نحطكم ف الاطار و نحكيلكم علي اللي اتعس من كلوفية بش تعرفو قيمتها و تحمدو ربي اللي هيا جارتي مش اختها. اختها سبق و حكيت عليها مرة عرضا (نسيت وين و ماعنديش وسع بال بش نلوج، اهوكا البلوغ للي فاضي شغل) و قلتلكم اللي هيا عايشة البرا، في فرانسا تحديدا و تخدم مراسلة قارة لكلوفية ف امور التنسنيس. انا تعرفت عليها بمناسبة عودتها لربوع الوطن ف الصيف، توا فوق الخمسة سنين و لوْ صيفها طويل، من ماي حتي لاخر سبتمبر. و من تجربة العام لول اخترتلها الاسم الحركي كلوشوهاجية. يعني فوق الموهبة الطبيعية اللي عندها ف الكلوف و شمان الخبر قبل وقوعو -حتى الواحد ولىّ يقول تستفايل- عندها اوبسون متع عرك و معروك و تحب المصارن متع الناس الكل تفرتها ف الشارع علنا و جهرا بش يكون عبرة لمن يعتبر. لكن تبقى المميزة الي تنفرد بيها على نظيراتها ف ها الميدان، هيا عينيها. اساعة يا جماعة، هاو م اللّول بش نستبق برشا تعاليق ماهيش ف محلها، راني انسانة عقلانية الى ابعد الحدود و نامن اللي le hasard n'est que l'intersection de deux series causales . و الماورائيات و الميتافيزيقيا نحاول نفهمهم بالعقل. و بالرغم من هذا نشهدلها! احرش من عينها ما راتش عيني! كان نهار تعديتو ف الزهرا ع الصباح و ريتو حومة كاملة اللي هذا خارج يتسرسب من دارو بالسرقة و يوصل لراس النهج يعطيها جرية باهية ولا واحد هابط ف الدروج و مغمض عينيه بش ما يشوف حد، اعرفو اللي انتوما في نهج دارنا و اللي الحاجة كلوشوهاجية شرفت من فرانسا. ايا سيدي تبعني م اللول و اللي ماعندو شاهد كذاب. نبداو بالخفّافي، واحد ولد جيرانا عندو كميون يخدم بيه، يهز و يجيب للناس ف السلعة، يقوم الفجر و يصبح يسترزق عل البرود. علاه مش جمعة كاملة هوا يحل الباب بش يخرج الكميون، تخرجلو كلوشوهاجية بش تصبحّ عليه بالذمة. جمعة كاملة و الحكاية موثّقة بالوراق، كل نهار مزال ما وصلش بش يشد الاوتوروت، يوقفوه البوليسية و يعطيوه خطية، كل مرة على سبب... م اللي ولّى يبيت الكميونة بعيد ف دار صاحبو و ينقز من سور دارهم كي السارق بش يخرج وما يفطن بيه حد، امورو الكل لاباس. قول يا اخي صدفة ولا بالحق هوا يستاهل اكا الخطايا اللي تلمولو بقدرة قادر ف سبعة ايام.خ نزيدو نقدمو. عنا جارتنا مازالت تعوّل و تقطّر الزهر و العطرشية و تكسكس بالعوادة و اكا الجو الكل. علاه مش اول عام سكنت كلوفية بحذانا و جاتها اختها بش تصيّف، ما استدعاتهاش بش يتلمّو نسا صافي و هات شاشيتك هات صباطك؟ كلوشوهاجية على دخلتها تقللها اييه محلاها ريحة كوجينتك بالزهر المقطر. هيا كملت الجملة من هنا و زوز فاشكات محطوطين عل الخزانة م الفوق يتطرشقو و القزاز هابط ع النسا شعرة لا جرحهم. الجماعة استغفرو المولى و قالو دفعت البلا، صدفة ولا مقدّر و لا خذاو الشر و راحو. من ليمت غدوة، تعاود تتلم اكا النسا و يمدو يخدمو على رواحهم، هاو يشيحو فلفل هاو كسكسو، و كلوشوهاجية ف هاو النسا الحاذقة ف هاو الفلفل الهايل، هاو الكسكسي النملي... المهم، حصيلة العولة متع المرا اكا العام صفر! الفلفل خمج و الكسكسي صبت عليه شتا ف جويلية و اللي بقا شايح دخلت عليه النمالة حتى ولّى نملي بالحق... المرا عافت و شعفت و بطلت، و ولات تعول في سوسة في دار اختها. يقول القايل حتى لتوا باقي ما فما شي اكيد. مجرد صدف ولا حاجات تصير ديما لكل عبد و صادف اللي هيا غادي ياخي لصقتوها في راسها. نوصلو لبيت القصيد. الشي هاذا في دارنا صار و علي عينينا و ما نجم نقلكم كان لا قوة الا قوة ربي. عامتها انا و ولد خالتي، فرد عمر، نعديو الباك. جا نهارين قبل الباك زعمة زعمة بش نديستراسيو (ولو احنا كارنا ستراسينا ع التكركير اللي كركرناه عامتها) و نعملو جو. صبح نهارتها ظهرلو يعمل "دورة" عل البحر. امو اللي هيا خالتي، خمسة و تلاثين سنة نضال ف صفوف التعليم، الخبث تشمو في دايرة قطرها ستين كيلومتر. قالتلو و وصاتو تعمل دورة فقط، لا نحب ماتش كورة لا عومان لا شي. راك تعدي بعد نهارين ولا فايدة. انا لو جيت مامشيتش معاه وعلى عيني، راني قلت ولد خالتي عملها بيدو. و انا وياه و خويا خارجين، تعرضنا كلوشوهاجية. حلتلنا مستوج شكونو و لوين ماشين و سكسيون شنوة و اش حضرنا و اش ناقصنا الخ الخ الخ. ما تلفناها و فصعنا كان بالسيف. اما الحق زودتنا بدعواتها بالنجاح و الصحة و خاصة لولد خالتي اللي يذكرها في ولدها. مشينا حوسنا، ف ثنية الرجوع، ولد خالتي يدعثر ف ربايط صباطو يطيح. ساقو ويدو ولى بالسيف يمشي عليهم و صياحو قبب. رجعنا للدار مفجوعين، و قلنالهم، حلفنالهم بالايمانات السبعة اللي لا لعب كورة لا طلع فوق الصقالة لا شي. عثر ف ربايط صباطو! و احنا خارجين بش نهزوه لعزيزة عثمانة، و الطفل هازينو ع اليدين، تعرضنا كلوشوهاجية. لوين على خير، للسبيطار. اااه، لا ما تهزوش انتي يا مدام، انتي داخلة بعضك، قول لخوه الكبير خير، كرهبتو احسن و اجد و حتى م النظر احسن عينيه شباب مزال لاباس عليهم. ايا سيدي شد عندك على ها الجملة اش صار. ولا نزيد عليكم حرف.... ولد خالتي الكبير وهوا جاي مربوث، فجعوه، تطرشق عجلة الكرهبة بيه و هوا يجري ف الميا و خمسين. كان مش كرهبتو رزينة، راهو -اللطف عليه- كمل كلا راسو. سيب الكرهبة مرمية و خلط يجري ف تاكسي. هز خوه الصغير لعزيزة عثمانة. الطفل طلع عندو شد عندك، يد مكسرة و قصبة ساقو فيها double fracture . كي جاو يحطولو الجبس حطوهولو و يدو معوجة. رصاتلهمشي ينحيو فيه والطفل يتلوى موجوع، دخل خوه بش يشدو بش ما يتحركش. تتنطر لكموتة جبس تدخل ف عينو شعرة لا خرجتهالو من بلاصتها. رصاتلو حتي هوا ف طبيب و دوا. ايه عاد اش مزال بش نحكيلكم؟ الطفل عدّا الباك وهوا تقولش عليه من ضحايا الحرب العالمية الثانية بكلو مجبس، اما الحمدلله نجح، هاوتوا تخرج و يخدم و ما قعدتلو كان الذكرى المريرة. خوه كيف كيف، العين منعت اما الكرهبة ترزى فيها. حتى تصليحها تكلف قد حقها و باقي تكوع. الشي الاكيد انو من صيفيتها، ماعادش يجيونا كان ف الشتا. و حومتنا الكل، اعتمدت سياسة تسرسب و اعطى علي ساقيك! |
|
كتبتها:bent 3ayla
على الساعة:
9:02 م
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
sma3t famma cadeau lelli 3alle9 louel, donc hawka 3alla9t 9bal mana9ra el post, amma el 7a9 lesm you7i bel khayr :)
و الفائز هوا سي روسيروس... الله غالب ع البقية. ايا سيدي قللي وقتاش تحب تتسلم البوست متاعك؟
lezemha khitab zghuir 3ad:
awalan n7eb n7ayy siedet ra2is ghanna wou nochkrou 3ala el majhoudet el khari9a wal moutakethifa elli 9adretenna hal forsa al 3athima wou hal entisar el sa7e9.
amma ba3d, haw tawa kammalt 9rite el poste, tawa ena kifek manemmench bel 7keyet hethouma, amma bel7a9 famma soudaf ghriba tsir fel 7yet, mana3rach abset 7aja mia fel mia sartelkom, tkhamme fi 3abd maritouch 3andek fatra twila wou makhammamtech fih men 9ouroune, draj ekher tal9ah metplanti ba7thek!
ena el 7a9 aghreb (a7zen) 7aja saretli fi 7yeti , kenet fel college, awal 7essa francais 7eme walla 8eme, li sabab nsitou el profa sa7et a3liyah wou marmdetni nw3an me, tnarvazt bsifa ghriba, wou d3it 3liha bech tmout bel 3ali( ma3netha s7abi sam3ouni), men ghodwa n9ayel (wou hetha moch men 3adti fel wa9t hetheka), ne7lem biha metet, ydo9 el na99ouz y9awamni sa7bi, wejhou aswed, ynabba2ni benha twaffet, ta7et mel drouj, alla yar7amha.
ltawa mannensa elli 7assitou, el we7ed mezel zghuir, 7assite le7keya ghaltti, amma fel niheya mahyya el sodfa .
akhiran hawka taw nab3athlek emaili, wou nchallah netsallem el post fi a9reb wa9t :)
اللطف و برا، مخيبها صدفة... يصير و يصير. الصبر وبرا. ولو انو انا م الناس اللي بصراحة ولاو يتفادو بش يصبحو عليها بعد فصعة ف الساق و حادث مروري و شعرة لا تحرق وجهي بالقاز
أهلا ببنت عايلة و ربي يفضللها خالتي أخت خالتي كلوفية ( سامحني إسمها طويل و ما حفظتوش ) توة من حقي نسمي خالتي كلوفية قوقل تن و أختها قوقل أف أر. بخصوص القصة و وواقعيتها إلا أني لتو ما اقتنعت بحكاية العين و مش علاش لتو ما نامنش بيها بالرغم يقولو العين حق - ما أكثر الحقوق في الوقت هذا - المهم حسب درايتي و فلسفتي في الحياة تبقى الأحداث المتزامنة مع سطوع نجم الخالة قوقل أف أر مجرد حوادث لإختبار إيمان المومن. أخيرا فكرتني يا بنت عايلة ببعض الثقافة التونسية الشعبية كيما ممنوع المشط الأفرم إلي ناقص سنة و ممنوع تنسى ضو الدار طافي في المغرب و القايمة تطول و مش لازم نكعرروا و نعاودوها. نقترح على خالتي قوقل أف أر باش تدخل عالم التدوين و تشرفنا بمغامراتها
brabbi rodd belek ta3tiha nhar ta9ra hal blog, lè t9ollik ya3tikk essa7a ech therr... wmin ghodwa tasba7 init bekcha w il blog msanser ... ywallichi elle3b ba3chena!!!??? :p
rit kifech wa7dek jitha, haw ismek faten we tosken fi ezzahra
sinon allah ghaleb 3andi chwaya irtibatat manajamtech nji lowel
القصص الكلها واقعية. و بالعكس، اخترتلكم باست اوف. كي تجي تشوف هيا عندها اكثر من هكا ببرشا. انا بيدي و الله باهتة. اما بش نتربطو و نعاديو المرا؟ تي لا ، اهوكا الواحد تجيه باللطف و يضحك منها وبرا.
سي ك.م.ر، ما تخافش، ما توصيش حريص. هاني متكتمة ع الموضوع، ولو كيما قال الاخ الغير معرف (اللي نتوقعو الدكتور) هاني بديت نفضح في روحي. الله غالب حبل الكذب قصير... اما متهنية على خاطر الزهرا فيه فاتنات غيري!
يا نسر، انا اكا الخرافات ما نمنش بيهم. لا غنا ف الحمام لا ضو وقت غروب لا تصفير لا شي. اما بصراحة خالتي كلوشوهاجية و هي مشتقة من كلوفية-شوهاجية حالة فريدة من نوعها الله لا يكثر منها الناس.
meme si ya bcp des faten ds ton cartier il y'aurait pa bcp qui ont été aux usa, bent ayla j'aime bien ton blog et je partage bcp d'idées avec toi c pourquoi jai voulu te dire il vaut mieux faire attention ya des psychopathes dehors bisou et bonne continuation
jihene
أهوكة اتحل البلوغ
wallah fja3tni ya barbech fi beli bent 3ayla m3addech t7ibni na9aralha
bent 3ayla haya mabrouk el look ejdid
ايا اش قولكم ف ها الذخامات الكل؟ زايد مع البرباش!
OOOh صحة صحة الNEW LOOK !
يعطيه الصحة البرباش ملا جو احمر و ابيض هاو الوطنية ولا لوح و لا تطلعوش الزوز "كلوبيستية' clubistes ?
بالله شعبة هاذي شسمها
ya cho ma7leha bent 3ayla
malla taswira
مبروك النيو لووك
تعرف كيف ما تحلتليش المدونة و نلقاها مفتوحة كان للمدعوين قلت اللعب احراش و الطبقية ولات تحوس في المدونة غدوة نهبط للـavenue ونمشي نعمل مظاهرة الي هيا :
"لا قراية لا تعليم حتى بنت عايلة تحل المدونة من جديد" و كان لزم نعمل اضراب جوع و نعتصم قدام وزارة الداخلية.
(توالعباد يقولو شبيه هذا مهبول ولا شنية حكايتو? و شكوني هذي بنت عايلة ?)
ياخي الحكاية طلعت ترميم و اشغال صيانة تي ما هوالمرة الجاية اعلمنا قبل بنهار يا مزمزال بنت عايلة ولا هبط بلاغ في الاذاعة علاش هكة ?
AYA KOL CHAY BEL BARKA W ENCH'ALLAH 3ATBA MABROUKA
très reussi el look ejdid!
bravo berbech!
يا خسارة اتبدل اللوك الساعة كان حليلتو البلوغ قبل simple et joli حتى النفس تقراه وهي مشرحة ....
توا علاش التبربيش الزائد يا سي البرباش مش كان خليتها رايضة خير
أوّلا مبروك التّأثيث الجديد ،حيث تبرز بصمة خونا البرباش ،ثمّ ابارك عودتك للتدوينات الممتعة والتّي جمعت بين الواقع والطّرافة .
ايا سيدي هاني تلهيت بيكم توا...
يا سي ياسين، البرباش مسيكن ريقو شاح ف جرتي. و زيد اللون الاحمر انا قتلو عليه، ماو قلنا نحب الاحمر برشا. التصويرة م الفوق وقتية...
البقية مرحبا بيكم و نستفتحو البلوغ غدوة الصباح ببوست جديد احمر :))