البارح القايلة هبطت لتونس على قضية خفافي اما مستعجلة، نزرب و ريقي شايح. و زيد م الفوق مش شاربة قهوة. بعبارة اخرى دايخة نتدهشر. المهم، في وسط السركولاسيون اللي ما فهمتش مناش تكونت و الدنيا صلاعة و ربيع. لو جات الدنيا دنيا و تونس كيما نعرفها، راهم الكل فاصعين م الخدمة و يحوسو ف سيدي بوسعيد ولاّ فرد مرة قربص للتونسي الحر الاصيل اللّي متملح م الخدمة على اصولو.

المهم بش ما نطولش، تحصرت ف اكا الامبوتياج ورا كار صفراء اما هيا بيضا، يعني العلامة المسجلة كار صفرا اما داهنينها بالابيض و مكتوب عليها من تالي بالاكحل بالكبييييير "صبّح"!
م اللّول بهتت. و مبعد قلت زايد، هاو الاشهار الخلاّق الهادف، لازم جماعة الكيران تشكاو م التزمير و الاخلاق الفاسدة متع الناس اللي تحصرهم الاقدار وراهم، ياخي جماعة شركة النقل قالك نكتبولهم "صبّح" ها الصباح بش يفهمو رواحهم و اهوكا فيها نبرة تهديد شوية، متع كان ما تسكرش فمك نهبط نهدهولك.

ف الضو اللي مبعد، و انا باقي شادة جرة الكار و نصلّي ع النبي، زدت قربت ياخي الرؤية وضاحت اكثر. طلعت الكلمة المكتوبة بالكبييير مش "صبّح" و انّما "صيح"! و الجاه كيما نقوللكم!
كان الكلمة لولة بهتت فيها، هاذي حبتلّي الكراهب تزمر بش فقت و دمرجت. وقعدت نتبع ف الكار من محطة لمحطة و نحب نفهمها ها الصيح هاذي. علاه لقاونا ناقصين تهويرة و تعظريط بش يزيدو يقولونا صيحو؟
باقي شادة جرة الكار ونخمم. قلت هاذي ما تطلع كان نوع متع therapie de groupe لازم حسّو بحالة الاختناق متع التوانسة، قالك ندورو ف البلاد و نقولولهم صيحو، عبرو، نحيو خمجة على قلوبكم...

فرحت! بديت نتذكر و نستجمع ف الشي نحضر روحي بش نصيح، لازمني نسخن عاد! نتذكر البيروقراطية و نحس كعبورة تخنق فيا. نتذكر الرشوة و المعاملات من تحت الطاولة و نزيد نتخنق، نتذكر الاكتاف و المحسوبية و النفس ضاق عليا.. نتذكر البوليس اللي تجاوز سلطتو و بهذل بالشعب، نتذكر القمع و العباد اللي تعس على لساناتها ، نتذكر البطالة و الجريمة و المتشردين اللي قاعدين يكثرو، العباد اللي ايست و رمات روحها للبحر لعلا تلقى ف الموج و الحوت رحمة ما لقاتهاش ف بلادها..

كي صحت، الله غالب، ما خرجتش صيحة، ما فطنت بروحي كان نعوي!

كتبتها:bent 3ayla على الساعة: 1:13 م

تعليق kmr ...

عدنا و العود احمد!!!

je lis et je reviens!

24 مارس، 2009 1:46 م

تعليق kmr ...

ehhhh oui!!! on ne trouve pas la voix qd on en a le plus besoin!!!!

sinon, il pub hedhika 3abbet lebled hal ayamet (c normal, le budget communication de tunisie telecom est peut etre supérieur a celui de certain ministère...)

illi 3ijbouni, des panneaux maktoub 3lehom "ijri" brabbi ola3bed ne9sin jary fil bled??? w thamma zeda "naguez", j'aurais aimé, ama il karhba rzina w mannajemch nhezzha bech naguez beha!!! :p

24 مارس، 2009 1:53 م

تعليق غير معرف ...

bourne :
ya3tik ye bent 3eyla 9taltni betha7k !!!!!
eni hek el pub tji fi mosaiq weni ndawer echaine ki 3eref n7ot itha3et el monsatir :-p yeser kathroulha bel msata

24 مارس، 2009 2:42 م

تعليق غير معرف ...

قبل كل شئء عسلامة هل غيبة والله ما عندك علاش تحلفني البوست متاعك ولا كالحربوشة يلزم ناخذو قبل النوم كيدروق عفان وعفاكم الله

24 مارس، 2009 3:30 م

تعليق bent 3ayla ...

اللطف ع اللي يحبرشو بالبلوغ
و الله فاهمتك خاطر كنت كيفك كي نتبع البلوغات. اما عاجبتني الحكاية متع انو انا نتحكم فيه مش هوا. وزيد احسن هكاكة خاطر انا عملت معاكم كبر الكرام، قلتلكم هاتو خلصوني، ادخلو شركة و ادفعو دنوس دنوس، شي لا حد فيكم حب يربحني. ايه عاد هاني نتشمت شوية.

25 مارس، 2009 3:49 م

تعليق غير معرف ...

la je crois que tu as un nouveau fan :)

26 مارس، 2009 11:54 ص