عيدكم مبروك و سنين دايمة و انشاء الله السنة خير من عمناول. و بين قوسين، مازلت مش متأكدة النحس متاعو موجه ضدي شخصيا ولاّ حالة عامة. الشي الاكيد انو ما تعداش عليّا في حياتي كاملة، عام اتعس منّو. وقت اللي خرج، قريب بش نخرّج عشانا و قازنا و صالتنا وكان لزم بابا و امي صِدقة، غير جات حشمة م الضياف و اكاهو... الحاسيلو، ها العام أَبَى ان يفارقنا الاّ ما يزيد يمركي حضورو. في آخر ايامو كمّل هزّ معاه وحدة حبيّبتنا، الله يرحمها و ينعمها.
المرا مسيكنة كان عندها "اكا المرض الخايب"، اهوكا مراعاة لحساسيات بعض العباد اللي يخافو م الفال و يخافو لا تنقزلهم العدوى حتى م الايكرون، ما سمّيناهش (ولو لتوّا نحب نفهم ها النظرية شكون طلع بيها، و كيفاش ينجم واحد "يِتعدَى" بيه، و اللي يمرض مسيكن، الناس الكل فِرْ فِرْ من بحذاه).
الحاسيلو، المرا مسيكنة ما اتقصفتش في شبابها بيه. يا ريتو. ع الاقل الواحد يقول عمل اللي عليه و الباقي على ربي. اما مشات ضحية بهامة العباد...
توّا فماشي انسان يداوي بالكيمياوي (مش متع صدّام) و المناعة متاعو في الحضيض و الكريات البيضا تلعب ع السقوط، تمشي انت تهز روحك و تلصقو و تبدا تبوس و تعنّق و تتلبّق... خاصة وانت عندك في داركم شكون مريض بانفلونزا الخنازير؟؟؟ الانسان الواعي يقلّك، لا ما نمشيش خاطر انجم نكون porteur sain !
باااهي، يجيشي منو انسان يداوي بالكيمياوي و المناعة متاعو ضاربها بو سخسوخ و انت لا يزي porteur sain و تزيد ضمانا للنجاعة الهجومية تكمل تهزّلو واحد هوا بيدو مريض بانفلونزا الخنازير؟؟؟ الانسان الواعي يقلك نلطخ راسي على حيط!
و هذاكا اللي صار. مرا حبيبتها مشات تطل و تزور و هزّتلها في يدها بنتها مريضة بالانفلونزا و تعمللها بوس تتّا.... يعطيك و الله وباء... نهارين في الانعاش و العناية المركزة و صاحب الامانة هزّ امانتو...
توا المرا توفات و الله يرحمها. لكن اللي نحب نفهمو، شنوة قلّة الوعي الصّحي اللي عنّا؟ علاه اللي تقلو يا اخي ما نحبش نسلم بالبوس نخاف لا نتعدى ولاّ لا ننقل الجرثومة لعبد مريض، يشيخ عليك بالضحك و يقلك يا قننّو. ولاّ يطيح يحب يبرهنلك اللي ما فماش منها الحكاية و اللي هي خطة صهيونية بش المسلمين ماعادش يبوسو بعضهم و تتقطع بيناتهم اواصر المحبة و صلة الرحم؟
يا سيدي، اوصلني من بعيد لبعيد، ما نحبش ناخو الريسك بش نحط عبد في الحنديرة (انا لقّحت و وفيت) بش سيادتك تشيخ كي تدبغلي وجهي بالحميّر. تسالني؟
علاه ولّى الخمج و العفن عنّا حاجة عادية جدّا، و علاه اللي يعترض ع الخمج يولّى تكركيرة عند العباد؟ توّا يا رسول الله معقول تدخل لمطعم تلقى قطوس مجراب يتدحنس ع الطواول و ساعة ساعة ينقز فوق طاولة ياخو و يعطي معاك في الكلام و كي تتجرأ و تعترض، يقولولك قطوس الرستوران؟
تي في المطار الدّولي متاعنا، اي اي اكا مطار تونس قرطاج اللي يهبطو فيه التوريست، واجهة البلاد، ماو وين الاسانسور، فما قعدة بالكراسي و وراها فمّا حوض حاطين فيه شوية نباتات بلاستيك مغروسين في طرف حُصحاص؟ يجيشي لمخك انت قاعد في امان ربي و يدخل قطّوس، يحفر حفرة في اكا الحصحاص و يعمل عملة و يردمها و العباد تتفرج عاااااادي و لا تحركتلهم شعرة...
يخطرشي على بالك، انّو في مؤسسة طبيّة عريقة كيما الرابطة، في العمق الهجومي لقسم القلب، في الحصن الحصين متع العناية المركزّة، اكا اللي العباد بيدهم ما يدخلولهاش، و يطلّو على إمّاليهم م الشباك من وراء القضبان تقولش عليهم يزورو فيهم في المرناقية، و وسط ها الاجراءات المشددة، يخطرشي على بالك انو قسم العناية المركزة عندو "قطّوسو"؟؟ و يبات في خزانة الملاحف المعقمة؟ و الصباح يتدحنس ع المرضى و ينقز يستقات باللّى فيه النصيب م البلاتوات متع المرضى؟
اش كون يعرف يا اخي، لعل عنّا عرق فرعوني و نقدسو القطاطس و مافيباليش...
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
وععععععععععععععع
شنيّا هالتعاسة
تي أنا الي نحب القطاطس ما صارتش و خلّت ٌقطوس يدخل لدار
" ينقز يستقات باللّى فيه النصيب م البلاتوات متع المرضى؟"
شنوا خير ولا يستقات من فواضل العمليات ؟
j'avais pourtant pris la résolution d'arrêter l'humour de mauvais gout en 2010...
Bonne année à tous
le titre du billet est trop con bent
اهلا بسامي الثالث عشر. وسع بالك يا خويا. انه زمن القطط
غير معرف، التزم بقراراتك خير
غير معرف لاخر، مش مشكلة هات عنوان توا نبدلوه
la relation tunisien-katouss peut s'imposer malgré toutes les règles de l'hygiène. Dans le fameux restaurant: Chez Achour, Hamamet, J'ai vu les chats qui sautent les murs, en venant de la rue, se balader sur les tables, inspecter les vases, lécher les couverts…
J’ai posté les photos que j’ai prise de chez Achour, l’empire des félins,
Et j’ai commenté sur sa pag Facebook en réclamant un minimum d’hygiène. Vous savez ce qui s’est passé : mes commentaires et photos ont été censurés
ya kathéba
حتى انت يا سي غير المعرف! معقول اللي عملتو؟ ماو هذيكا كانو عاملينها سوربريز للحرفاء، ياخي انت حرقت الفيلم
غير معرف لاخر، علاه عطيتك موعد و جبدت بيك؟ ولا قتلك توا نبعثلك دينار لايت و تلّفت الجرة؟
sa3dk yé tounes bil moudawnin li 3andek . à bon entendeur
chofet ya bent ayla, ettounsi défend sa relation priviligée avec les chats bec et ongles, errahma lee
ET un post comme le tien suscite des commentaires du genre, ya katheba, we meskina tounees tsadmet fil moudawnine mtaaeha au lieu de susciter une reflexion surieuse
نحن نفدلكو بيها الحكايات خاطر ما عناش وعي بالصحة العمومية و بالايجيان. هاو في جرة بوستين المرا مشات من غادي لغادي و ترزات في عمرها
فما بالك بقطوس يحوس في عناية مركزة و يا من ادراك، و الطبة فرحانين، قالك قطوس السرفيس
قداه من عبد مشا في الساقين على حكايات فارغة نشّ الهايشة و عدي خيشة بالجافال و راو برشا ناس مازالو بين اماليهم
يعطيك الصحة في الملاحظتين و انزيد نأكد إلّي فمه جهل عام ماشي أو يكبر و يغماق و ما نعرفشي علاش الشعوب هذه يأثر عليها الجهل و التخلف و يصعب توعيتها ، نعرف وحده جارتنا ماتت عندها مدة على خاطر شعره متاع قطوس شمتها و هي صغيرة و قعدت تحوس في بدنها حتان ركحت في المخ و عملت لحمه ، و ماتت بيها ، انزيدك مثال آخر ، قريبتي عندها مشكل صحي في عينها و بعد الفحوص و التحاليل ظهرت شعرت قطوس داخل العين
je me demandai toute la journée: d'ou est-ce que ce mauvais temps sort? ce vent et cette pluie? maintenant, après avoir lu le commentaire de (3onsor) tout devient clair pour moi.
Bonne année
Que 2010 soit pour toi une année spéciale, que des milliers de petites joies viennent embellir ta vie, que l'amitié et l'amour ne te fassent jamais défaut, que la prospérité s'invite chez toi, Que 2010 soit pour toi l'année de toutes les réussites. En 2010, je te souhaite d'être entourée de ceux que tu aimes, de vivre des moments intenses et de savourer le quotidien.
malheureusement ,on est pas assez concient de ce que necessite la saine vie de qqn qui fait de la chimiotherapie!!:(
lol
ben ayla mnine jebthom elma3loumette hethi ?
?
mthabta femma 9attous fi sbitar ?
mella 7ala
فتوووووووووووووووون عامك مبروك اختي و شنيه احوالك حلوه الصوره الكاريكاتوريه إلي قدمتها و لو اني تحمل في ابعادها برشا تعاسه في تفكير و تخمام جل التوانسه توحشت كتيبتك يا طفله "افحمينا" كيف ما قال الآخر...
حقا صحيحه حكاية الخطبه ؟؟؟ ايا كان هكا ان شاء الله كل شي بالبركه و لو اني نعرفك مش من هواة العروسات ههههههههه
و مادامك جبدت ع الانفلونزا هاو المدونه متاعك خلطتلها عدوى انفلونزا المدوّنات ههههه قالو مثبته!!! ناس ما تحشمش
سلام اختي الغاليه
si la nouvelle de ton fiançailles est vraie , je serais vraiment triste, moi qui t'attendais depuis un bon moment pour faire apparaitre ma candidature.je souhaite ke ca ne sera pas le cas et si c'est vrai je souhaite a ton prochain la patience.bonne année
yezi metanguiz wetdhoumir il massét;; al klila aamel qdar il rajlek ma aadech ywetik tfouri5
اخشى فيما اخشاه ان تكوني وامثالك من المهرجين تصدقون انكم مدونون وان صفحات التشات هذه مدونات.