skip to main |
skip to sidebar
|
الخميس، يوليو 09، 2009
|
|
كتبت لكم بنت عايلة من المعهد الاعلى للقضاء... ههه اش قولكم في ها العنوان متع جرايد بودورو؟ لا في تطور و الحمد لله. على ترانيم انغام صوت قطار الضاحية الجنوبية و وسط عبق ريحة بسكويت سيّدة بالشكلاطة، حلّ ركبي بمكتبة هذه المؤسسة العريقة. الغاية بالطبيعة مش لبيع دبابز الماء البارد للطلبة و الاساتذة الّي لعبت عليهم الدوخة بش وصلو لحرم ها الصرح القضائي الاكاديمي و انما لتسوّل حق الاطلاع على بعض المراجع. م الصباح و انا ريقي لايث بالجاه، يكون منكم، يجعللكم و تلقاوه في صحتكم و صغاركم وسّعوا بالكم و هز راسك لفوق تلقاشي ها الكتاب اللي حاشتي بيه ولاّ مد يدك بش تعطيني اكا الكاتالوج، يراك ممدود في الجنة... بالطبيعة بعد تلحليح و تزقديح و تذوبين عند المسؤول ع المكتبة، الحق متع ربي وسّع بالو و جاء يزعق ع الراجل اللي لاهي يمد بش وسّع بالو (مكره اخاك لا بطل) و الكتاب اللي م الصباح لا سمع بيه، لا وْصِلْهم لا راه في حلم لا علم، طلع مطيش فوق راسو توا قرابة العام، غير مالقاش الوقت بش يقيدو في الكاتالوج.. قداه ظالمينها ها الدولة يا خويا... هاو يصرفو، هاو يعملو في الندوات و ينشرو و يجبهيو ايجاو اقراو و حلو طاسة مخكم، زايد مدام ماعناش الضمير المهني على مستوى هياكل التنفيذ، عملنا نقبة في الماء. باهي، توا كي فرغت ها القلب شوية، انجّم نبدى ندوّن على روحي... اي سيدي اساعة اختفائي المباغت من الساحة (ناري على تدوينات الحملة اللي ما كملتش) راجع لحلول ركب اخت كلوفية شهرت "كلوشوهاجية" بالبلاد التونسية. مش للاحتفال بمقدم طلعتها البهية ولا لتطير الوحش منها و انما بكل بساطة مشيت نهارة وصولها بش نسلّم و ناخو بخاطر كلوفية و نكمّل نعاونها في تهبيط القش اللي جايبتو تتمزّى بيه على اختها، زعمة زعمة دبش فرانسا. و لولا الحشمة راني هزّيتها لسوق الخميس في الزهراء توا تلقاه مطيش في النصب على خمسيماة فرنك و تتسمى حْصُلت زادة. المهم سيدي، طبّست نعاون فيها و انا نقرى في المعوذتين و الحصن الحصين و دعاء السفر و دعاء الشفاء و صلاة الاستسقاء و هازة سبورة فيها آية الكرسي معلقتها كي البادج في رقبتي و مريول مكتوب عليه "ان ينصركم اللّه فلا غالب لكم" و بندانا مصوّر عليها نصر اللّه و ساك آ دو فيه صحيحي مسلم و البخاري و باقي قلبي ما قايلّي خير و ركايبي ترعش... ايا سيدي طبست نعاون فيها و هي ترحّم على والديا، يعطيك الصحة، استحفظ على شبابك و صحة بدنك، الخ الخ الخ...ما كملتش العشية، اختكم صياحي قْبُبْ و نتلوّى بالوجايع متع ظهري. عديتهم ثلاثة ايام في الفرش نتحرك كي ماجد لعبة خشبية. قول انا جاتني خفافي ثلاثة ايام و رجعت نبرطع كي الحصان، اما قايمة الضحايا لحد الآن تشمل زوز تسمم غذائي، يد مكسّرة، كرهبة مفشّخة و كوبل على وجه طلاق قبل العرس. اي كتبو الصداق و م المفروض عرسهم الجمعة هاذي، هاو كل شي بطل كيما نرى عندكم. و بمناسبة اقامتي الجبرية في الفرش، نجّمت نرى عن كثب الجهود الحثيثة اللّي قايمة بيها الحكومة متاعنا. بصراحة ماكنتش نتخيل عندهم ها الضمير المهني و ها التفاني في خدمة الصالح العام. و ها الشي راهو ريتو منّي ليهم، ما تقولوش لا تلفزة لا بروباقندا لا تهلويس سخانة لا شي. هوا كي تجي تشوف، اول نهار، دايخة بالدواء و قلّة النوم بفضل العروسات و الربوخات اللي عند راسي تضرب للصباح، مشى في بالي اللي البلدية استجابة لاحتياجات المواطنين و قاعدة تداوي في الناموس بالطيارات. نسمع في الفننننن عننننن و الهيليكوبتر و الـآف ثلطاش كي البطاطا و نصلّي ع النبي. يجي اربعة سوايع و الطيارات تزفّ عند راسي، من قرابة الستة للعشرة متع الصباح. لين دخلّي الشك و قلت ياخي هذا الكل عنّا ناموس؟ تي ها الكمية تقضى ع الناموس و تبيد المتساكنين فرد مرّة. لا لا في الحكاية انّ... زعمة اعلنّو الحرب على تونس الجنوبية؟ زعمة جماعة سليمان عاودو طلعو كي الحُّرِيقَة؟ حتى لين بشوية تبتبيت و تنسنيس، جاني الخبر اليقين اللّي ها الجسر الجوي اللي يتعدى يمرًّرلي الصبحية ماهي الا الحكومة و الوزراء ماشية اتدب، تِكْلِت على سعدها ع الفجاري بش تهبط للحمّامات تعمل الاجتماعات اليومية. اش قولكم في الضمير؟ اش قولكم في التفاني؟ اش قولكم في الاستجابة لتطلعات المواطن؟ ماو قبل كانو يجيو للاوتوروت يسّكرو بوها م الفجر لقرابة التسعة متع الصباح. و الّي غلط شد الثنية متع الاتوروت يلقى روحو متبلوكي في امبوتياج متع يوم الحشر. للحداش متع الصباح و العباد تزحف، ما نحكيلكمش ع الحوادث المريعة اللي تصير بالتنرفيز و الجري ، و اللي مزروب يعمل قصة في الزيتونات متع ستاد رادس ترصيلو يعمل في آبار ارتوازية بش يخرج عجالي الكرهبة م الرمل و التًّفِزًّة. و لذلك لا يسعني الا ان اشكر حكومتنا الجليلة على الاصغاء لمشاكل المواطنين و تحمّلهم مشاق التنقل بالطيارات العمودية، خاصة و انو حسب عدد الطيارات اللّي تتعدي، يظهرلي يجيو ع الصباح يقصو بونوات و يقعدو مقعفرين على كرسي سيمان يستناو في طرحهم. بالعمل ضربني الشك و مشيت نتأكد قداه عنّا من وزير و من كاتب دولة، كي جيت نحسب فيها، قلت لازم يعملو طيارة لكل وزير و طيارة يهزو فيها لكل وزير كُرسيه يخلطوه عليه، تجي الحسبة قد قد. اش بيه؟ ما يصُحّلهمش يتدللو عل المجموعة الوطنية؟ مش شاقين و تاعبين في جرتكم؟ اما خير ولاّ يلموهم في كار متع رحلات ولاّ يحجزولهم تران كامل ليهم ع الفجر؟ و تقعدو انتوما مْعَوّقِين؟؟ ياخي بفلوس ناس اغراب؟ ماو منّا ليهم، ربي يخليهم... |
|
كتبتها:bent 3ayla
على الساعة:
11:28 ص
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
يا مرحبا يا مرحبا بنوارة القايلة
قبل كل شي ان شاء الله عودة ميمونة و ان شاء الله لاباس.
صارلنا بارشة على تدوينة حلوة كيف متاع اليوم اهوكا ديما جيبلنا اخبار كلوفوشوهاجية.
ااااه فماش حويجة (نقصد كادو :صباح الخير اعطيني كعكة)
Voyons bent ayla, c parce qu'ils ont trop de responsabilités: ils ne peuvent plus supporter les embouteillages et les feux, ils ne peuvent pas supporter ça, par contre nous oui, . Tu sais en Suisse, les ministres n''ont aucune faveur, supplémentaire vue leur poste, et on un salaire équivalent à celui d'un enseignat universitaire. Je pense qu'il ne faut beaucoup de temps pour espérer en arriver là.
fleur d'interdit
أختاااااااااه٠٠٠ إحذري !
طيّارات...
أختاااااااااااااه أين أنتِ منه؟؟؟
it's smells like BTB
et si tté parmi la foule,tu ne fera pas pareil?
نصوصك.... من أجمل ما قرأت قي تونس
أختااااااه النقاب أو العقاب يا أزين طفلة علبلوقوسفير
je t'aime
نحبك برشا راني يا بنت عائلة، و ربي معاك في البحوث متاعك.
تعليق غير معرف ...
أختااااااه النقاب أو العقاب يا أزين طفلة علبلوقوسفير
je t'aime
billehi kifech 3rafet illi hiya mizyana
كيما قال بوشناق، نخترعك بخيالي و بيك نعيش
تخيلتها يا خويا الأنونيم!
Ama rod belek ya sa7bi rahi
عمري 99 عام، سودة شعري تل و جلدي خيشة، ثرثارة و كلوفية و شوهة و مانيش نلوج علي راجل... باهيشي هكا؟؟
hakka hiya 9alet
ama entre nous ena je suis sur qu elle est tres belle rahi bent ezahra iselni ena rani na3refhom tbarkallah 3lihoum
Anonyme
j'appelle la présentation qu'a fait bent ayla de la fausse modestie, elle ne peut qu'etre belle. Crois moi
je te crois
Pour la prochaine fois, je propose d'utiliser un yacht car on peut parfaitement faire du trés bon travail sur le trajet aller retour de Sidi Bousaid à Hammamet
Il faut réduire la consommation d'énergie par les temps qui courent et le kéroséne ne cesse de ... s'envoler
Merci pour cette "Nakcha" Ben 3ayla
barra lemm sa9ik wala chouf 7ata bannéy ylemmek. Andédek medda ydiha lel 7enna wenti ydik nhar lkol marbouta fi clavier! ellotf ya rabbi
بنت عائلة مادة يديها يا كلب، مادة يديها و تعمل في بحوث و بالكش تقري أولادك كان اختارو يعملو قانون٠
أمايا ذنوبي خاتر أمثالك ماركة كلية الشريعة و الدين و ظاهر من منطقك يا جحش.
shit barcha klem zayed haya bent 3yla winou lem9ass
انا ظاهرلي والله اعلم انو الي قاعد تهاجم في بنت عايلة بحكاية مدان اليدين ماتكون كان طفلة ولا مرى كيفها
mella tafaha 3and barcha ness.kif entouma bhel mostawa choufou blog e5er seybou fih ta5allofkom mouch hna blastou
qu'est ce qu'elle a fait bent ayla pour meriter tout ca? je met mes dix doigts dans le feu si ce n'est pas un autre blogueur qui a fait tout ca
جيت بش نعلق ياخي جاتني حالة احباط... مش لازم
الصمت في حرم الجمال جمال
bent 7oumti chihemek fihom hethika ghira w barra
اقتراح اليخوت هايل ياسر... اما الخوف من اكا الصيادة و الحراقة اللي ينجمو يخططو و يتآمرو عليهم... انا من رايي نقطعو ساقيهم م البحر
سي امين و سي محمد الخامس و غير المعرفين اللي لاهين بطلعتي البهية، يعيشكم و شكرا ع المرور و ع التعاليق اللطيفة و كيما يقولو فيها كل اناء بما فيه ينضح، بالمسك و الطيب او القول الرهيب
غير المعرف السلفي العاشق الولهان.... اخيييييي و من قال لك انى فتاة؟
غير المعرف اللي قالك شاممها ريحة البيغ تراب بوي، و الله نقلك شخصيا انا ما شميتوش الاخ بيغ، و لذلك انت اعلم بريحتو
غير ذلك من التعاليق اللي تحب تستدرجني عنوة لمستوى مش متاعي، نعبرلهم على اسفي الشديد و هاو دينار يركبو بيه في المناج بش يعملو جو
سلام
اشنوا هل العشاق الي طاحوا عليك
على العموم موصوعك يعني الي ماعادش فما امبوتاياج و هذي حاجة باهية ياسر.
بالنسبة للكتابات متاعك أنا نتبع فيها من بعيد لبعيد يعطيك الصحّة و واصل.
7louwa hethi
أختااااااه
اخيييييي
على ذكر اليخوت: اتذكرت طليعة قديمة نوعا ما... أما ميسالش نتذكروها tronquee "...غرق اليخت اللي فيه الثلاثة، آشكون منع؟..."