نشكر ماي ماذر ان لو، السيدة ولادة على اللعبة اللي تاقاتني فيها. ورغم اللي ديجا لعبناها قبل ع الفايسبوك الا ان كل مرة نعاود نقرا الاسئلة نزيد نحير.


خمس هدايا نتمنّى يهديوهالي
١. شكارة شهايد ف القانون حاضرين مقربطين، خللي الواحد يتلهى يعيش عمرو. و ما تقولوش كيفاه، و شنوة ها الجيل الحتحت اللي طالع. فكما يولّى عليكم تكونون.
٢. سيارة الاحلام، كرهبة ديكابوتابل. اي نوع المهم ديكابوتابل، انشاء الله حتى موتور 103. انا نسوق و القمل الغجري المجنون يتطاير في كل الدنيا.
٣. مسودات الكتب اللي نحبهم مع اهداء كتابهم، و الكلو بالحبر الازرق يعيشك.
٤. . قراموفون قدييييييم اكا اللي بالبوق النحاس و لازمو يبدا يخشخش ماكانش خلي عندك
٥. رحلة حول العالم اما مش للمناطق السياحية، وين يعيشو العباد بالحق و نجم ندخل لديارهم حاجة كيما j'irai dormir chez vous
اما ماغير كاميرا بش كان كليت بونو بسترة ربي.
٦. انت صرفت صرفت خوذ بخاطري و زيدني السادسة: بطاقة اشتراك غير محدودة القيمة عند الحاج Laduree



خمس عباد ماذا بيّ نضربهم
ما نحب نضرب حد. نحب الناس الكل ونموت ع الناس الكل و خاصة خاصة بعض المدونين سليطي اللسان. شكون قال قلبي مغلل عليهم ولا نحب نعلقلهم مصارنهم قديد شايح على خيوط الضو اللي قدام شباك بيتي؟



خمسة إجراءات نتّخذها كان جيت رئيس
١. م اللول بالغباء المدقع متاعي قلت نسرح الجيش و البوليسية. اما مبعد كي جيت نحسب فيها، خمسة دقايق و نطير كي الجرانة اللي يحطوها فاكا الطاسة و يشعلو النار. ومانجم نحقق حتى شي من "الاصلاحات" الثورية اللي ناوية عليها. و لذلك قررت اني بالعكس، نزيد فيهم وكان لزم نستوردو كفاءات من دول شقيقة و صديقة تحت عنوان "بوليس لكل مواطن في بلد الشواطن".

٢. بعد ما ضمنا الامن و الامان (شوف يا سيدي من درج خيال بديت نحكي بنحن)، نستهلو فترة حكمنا الرشيدة اللي بش تطول فترة من الزمان، بفتح باب الحرقة لمن استطاع اليها سبيلا وماصاب حتى كان نكملو نأممو ها القطاع و نربحو منو شوية عملة صعبة في مكتوبي، نقصد مكتوب الدولة بالطبيعة. اهوكا نصدرو المجرمة و المحتحتين و المعارضين اللّي عنّا و ما يقعد كان اللي امورو هانية وكمشة نبارة. هاذوكم نحافظو عليهم و نعشعشوهم بش كل ما جماعة حقوق الانسان يحلّو افاهمهم، نخرجوهملهم و اللي ما عندو شاهد كذاب.

٣. حاجة من اثنين، يا نعمل سيري متع عمليات تجميل و الا الحل الاسهل، فوتوشوب و ديما يمشي. و نحط تصاوري في كل بلاصة. في الديار، ف التلفزة، فوق بطاقات التعريف، فوق مراول الملاعبية، فوق حكك الجبن، دبابز الجافال، اللي هوا. لازم وين تقبّل الرعية متاعي تصطبح بوجهي، ما نحبش نحرمهم من شخصي الرحيم بش يرحمو على والديا.

٤. توا بعد ما ضمنا الامن و الرخاء و الاستقرار لشخصنا الكريم، نبداو نتلهاو بامور الشعب. فيلا ترعب و خمسة كراهب بشوفور و عشرة ملاين شهرية كل يوم و صلاحيات غير مقيدة و حراسة شخصية و مقربة لافراد عايلتي و اصدقائي و العباد اللي نحبهم. ماهمش شعب هوما زادة؟ ما نحبش التعقيد يا اخي، تسالني؟ رئيس يحكي معاك. في دولة المؤسسات متاعي ما فما كان زوز مؤسسات. من جهة "انا وحاشيتي" و من جهة اخرى اللي ما يدخلوش في ها المؤسسة.

٥. م النهار لول، نعملو سيري متع فيديوات كل واحد بتبديلة. في كل واحد نعمل بلاي باك متع خطبة عصماء. نحرك فمي و يديا و كشاكشي خارجة و هايضة. و اهوكا جماعة التلفزة كل مرة يلصقو كلام يتماشى مع المناسبة، زعمة زعمة انا قلتو. علاه فاضية شغل بش نقعد نهار نهارين مادة وجهي طالعة عليكم بخطبة و زيد م الفوق نعرفكم خرشيين، ما يثمرش فيكم، انا نحكي و ننظر و انتوما يا تسكرو الراديو يا تبدلو تحطو روتانا بش تتفرجو في انا دانة انا دندن.



خمسة أشخاص نحبّ نعيش معاهم
١. دارنا ربي يفضلهم ولا يحرمهم مني.
٢. صحابي اللي عابدين خلقتي هنا المتنبية و الضايع و اللي مْنَشّرين في ارض الله الواسعة كي ولاد الحجلة، كعبول وظلام و شيروتيم.
٣. هاو بلاصة فارغة للراجل مكبوب السعد اللي والديه سحسحوه بدعاء الشر اللي بش يتبلى بيا.
٤. طبيب احتياط بش ما نقعدش نجري نهار نهارين في حالة طوارئ و مصارني في يدي.
٥. الكلب اللّي مات و تقهرت عليه




خمسة أشياء أفعلها لو علمت أنّي سأموت غدا
هي حويجة برك، الواحد ميت ميت و لا يضير الشاة سلخها بعد ذبحها. شاهية.... نعبّر!
ليلة كاملة و انا نعبر و نسمي و نقول. اما البلوى لو كان ما نموتش!


ايا سيدي نتاقي ف اللعبة هاذي الشيخان حفظهما الله و رعاهما عمروش و تيتوف، المدون المتواضع الزبراط، سي شهاب من دوز و صديق طفولتي سي الدكتور.

كتبتها:bent 3ayla على الساعة: 12:57 ص

تعليق غير معرف ...

1ère fois le premier. Weld rbatt

20 أبريل، 2009 2:07 ص

تعليق alopex ...

بنت عايلة أنا ما نحبش البقلاوة الافتراضية فما جائزة أخرى هكاكة نولي نبونتي الأول

20 أبريل، 2009 11:12 ص

تعليق غير معرف ...

continue té sur la bonne voie, mais attention aux marches, on a besoin encore de tes services

20 أبريل، 2009 12:14 م

تعليق غير معرف ...

bent 3ayla... winou berbèch?

20 أبريل، 2009 12:51 م

تعليق Nomade ...

بنت عائلة،
كيف العادة برش ضحك على أسلوبك في الكتيبة ـ يعمل ستّة و ستّين كيف ـ من بعد تردّد بين الضحك و النّديب على الهمّ اللّي فمّا. لكن في الأخير يغلب الهمّ ـ نقصد الضّحك .
أمّا حاجة برك ـ نعرف روحي باش نمصّطهالك و نعتذر مسبّقا ـ إشتهى حاجات أخرينا كان جيت رئيسة باللّه، عنّا منهم برشا...

:)
نهارك طيّب

20 أبريل، 2009 6:10 م

تعليق bent 3ayla ...

مرحبا بولد الربط. ايجا ديما تطل توا نبعثولك بقلاوة افتراضية. فما شكون يتبطر ع النعمة.
عم غير معرف، هاني رادة بالي. اناخلقة مش صحاب مع الدروج. ولاشي الواحد يشتهي يموت بش يعبر؟

اللي يسال ع البرباش، السيد ماخو عطلة طويلة الامد. حب يرتح اعصابو و يشوف حياتو. الراجل صحتو تهدت في جرة التدوين.

نوماد، وينو وزير الداخلية متاعي؟ وينهم البوليسية؟ اني ارى رؤوسا قد اينعت و اني لقاطفتها

20 أبريل، 2009 6:52 م

تعليق weld ayla ...

j compren pa prkoi tu insiste tant au fait ke tes laide
tu rate aucune occasion por le mentionner
meme si c vrai c tre bizzar de ta part

20 أبريل، 2009 7:59 م

تعليق bent 3ayla ...

يا ولد عايلة خويا انت تبارك الله عليك عاد، وقيل مزيان فلقة قمر. ربي يزيدك من جمالو.
م اللول كنت نحكي عادي، اما ملّي كثرت الاشاعات عليا هاو مرة عندي علاقة بفلان هاو بفلتان و تم اتهامي بكوني جيت للبلوقسفير نلوج على عريس، قلت خنوقف ها المخيلات الخصبة و نقلهم خاطي خوك

20 أبريل، 2009 8:28 م

تعليق غير معرف ...

loooooooooooooooool
msaken ya faten 3andek alf fans rjel w frou5 lkolhom ytab3ou w ya3mlou fi des comptes w jeybin ma 3andhom mak ta3ref e4kourra mte3na dragueurs par nature hihihi , ken t7ot taswirtek awwalan ykoun scoop el mawsem w mba3d enti w talltek el bahya ya emma el alf fans ywalliw 10000 wella yab9aw el 1% w menhom eni jens latif elli ytab3ouk

ti 7assel bonne chance w rani mouteb3a wafiyya yesser ema awel marra na3mel commentaire w n7eb n9ollek elli yesser ydha7kou tes blogs ema sa3at n7essek tek4eb chwaya wella barcha hihi

21 أبريل، 2009 1:20 ص

تعليق غير معرف ...

7kayet el 3riss netsawer 3awnek el blog wella 3alla9al bech y3awnek hihihi madem enti 3omrek ma sou7ebt w tawa ham kods ytabb3ou fik hihihi

21 أبريل، 2009 1:23 ص