skip to main |
skip to sidebar
|
الأربعاء، أبريل 29، 2009
|
|
مدام المسألة ولّى فيها رشوة و تهديد بش نكتب، هاني شديت ندون بالسيف و عريت عليكم راسي. نجري قدين ما نحلى في عين. كان كتبت لواه ها الحديث الكل ياسر تحكي، كان قصّرت نولّى نبلفط و مش لازم منو. كان سكتت و رتّحت فخار ربي، ايا وينك توحشناك. يرحم فمو في السماء و الارض اكا اللّى قال ارضاء الناس غاية لا تدرك. ظاهر فيه مليّع. المهم سيدي، خ ندخلو في الموضوع و يزي م الهزان و النفضان.
اكا البروفيل الحقيقي متاعي ع الفايسبوك عندي عليه مديدة. الحق كل مرة ندخل خفافي كان حاشتي بعبد في قضية، نلقى الحلقوم تكسر و الشي فايض. فوق الالف ميساج و الله اعلم قدام من notification و جماعة عاملين قروب يلوجو عليا مزلت حية ولا توكلت خلّى يرميو ورايا سبعة حجرات. البارح وسّعت بالي و قلت ايا ابدا صفّى و شوف لعل فما شكون حاشتو بيك و خلاّلك مساج، ما يجيش تبخّ بالناس، و افرش تلقى ما تتغطى و زيد ماغير تفشليم، انا من نوع العباد اللي سعادتي في سعادة الناس (بفففف باهي مشلّقة، هاني سحبتها). اي عاد فما منهم ميساج قديم شوية عندو توا شهر م الزمان ما فطنتش بيه. جماعة صحابي، صحاب متع صحّة صحّة، مش م النوع اللي ناخو راحتي معاهم، ياسر قواندوات و ناس comme il faut اما و الحق يقال هوما هكّا هكّا بيّا و كل ماعندهم حفلة ولا لمّة لا بد يستدعاوني. اي عاد الصحيبات هاذوما لقيتهم مستدعيني لحفلة متع بيجاما بارتي. اول ردة فعل حمدت ربي اللي الحكاية تعدات ووفات، خاطر اكره ما نكره اكا اختلاق الاعذار و سامحني مانجمش نجي خاطر جارة بنت خالة كواش حومتنا ولدت و ماشية بش نهني. ايا سيدي، شديت حرقست ميساج متع حُرْقَة و تلوّع كيفاش ربي حرمني من ها اللّمة اللي ما تتفلتش، بالعمل على قد ما سخفتني روحي هبّطت دمعتين. بعد اداء الواجب، ضربت في مخي قلت مدام عملوها ووفاو، و انا و الحمد لله ما حضرتهاش، خاطر كي تبدى قعدة رسمية نجّم نشد روحي اما كي تبدا بالبيجاما و نتشلقح على طولي، اكا اللّسيّن ما يهنيش و بش نشنّها حملة تلقيح ضد داء التمعجين ، زرارق يمين يسار. اما مدام تلمّو و تعدات على خير، خ ندخل نشوف التصيورات. ماو ولات لموضة، اللي هذا حاطط تصاورو، كان شرب قهوة يحطهالك، كان كلا كسكروت يصورهولك و حتى كي يِتِلْطَخْ يستنى في الكار، يأبى الا ان يخلد كشختو المحلولة بحذا اكا البوتو الاصفر، تقولش عليه متصور بحذا التور ايفيل. و بعد لعنت الشيطان قلت لا يستحيل يحطو تصاورهم في بيجاما، هذاكا اللي مزال و هذاكا اش بقى.اما التنسنيس دودة تاكل مولاها حتى يقف على الخبر اليقين. مشيت بديت ننّقب ف اكا التصاور، هاو فلانة تخطبت، نبعث نهنيها، تجاوبني بالوقت لا وينك سايي فسّخت! اي وعلاه مخلية التصاور؟؟ تحصّل في العباد؟ لا خاطرني طلعت مزيانة نهارتها! اي اكاهو، و انا نقز من البوم لالبوم و نضحك عل المخاخ مصغرها، ماراعني و ما هالني الا اني ريت ثلاثة البومات عنوانهم "بيجاما بارتي في دار فعلولة". اي ماو بنيّاتنا يحبو يتربجو برواحهم، هلوّلة، امولة، مهبولة، بكلو يمشي. ما نكذبش عليكم جاتني البهتة. نعرفهم خاطر من نوع يا شماتة ابله طازا فيا، كل شي يعطيوه كارو، كل حركة بحساب و تنقنيق. التلقائية و الاريحية متع لمّات كيف مانهكا ما يعرفوهاش. معليناش، نزلت ع التصاور وقلت خ نشوف لازم صارت فازات تضحك ولا اش من غلبة. ما نجم نقلّكم الا انو صارلتي اقوى صدمة سوسيو-ثقافو-اخلاقو-نفسية.نتفرج و ساعة ساعة نثبت هل اني غلطت دخلت للسيت متع ملابس داخلية. لا و الله لا، الوجوه هاذي نعرفها! اما ماترى كان النويزات و الدانتال و حاجات مكشكشة. ديجا التصاور في حد ذاتهم صدمة اما اللي زاد بهتني اللي ااكا البيجاما بارتي ولات بارتي tout court! مخلطة حمص و زبيب و عباد لابسة ماسكوات و هابطين يشطحو جايبين ما عندهم هدّو الهدود. بعد موجة تسونامي الذهول لولا قلت بالله ما نقيسش بمخي، كان بش نحكم عليهم بمقاييسي، الا ما نقيم عليهم الحد، انا نتسمى جماعة طالبان. و زيد بربي اش نوة الفرق بين اللي لابسة ملابس داخلية ولا وليدّ لابس بوكسر بالقلوب و بين تصاور بالبيكني و المايوه، بكلو ماغير هدوم. اما باقي منين نقلبها ما هضمتهاش. اخطاونا من حكاية الحشمة و الحياء خاطر بين شبيبتنا خاطر هاذم ماكا العام دفنوهم بحذا نصب الشهداء في السيجومي، اما انو واحد ولا وحدة لا بالك لا وسّع تقدم توخر تحط تصاورها في لباس داخلي و هيا تشطح و خطيبها ولا خوها هابط على ركبة و نص يصفقلها، في بلاصة عمومية وقفتلي مخي. اخطانا من دارها و صحابها، المخبي ع الاحباب عذاب، اما زملاءها في الخدمة؟ عرفها؟ جيرانهم؟ عطار الحومة؟ زعمة بش يغزرولها/ يغزرولو بنفس النظرة؟؟ يكشف حالك يا مارك يا ولد زوكربيرغ! |
|
كتبتها:bent 3ayla
على الساعة:
6:39 م
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
هو أخضر و مأستك
3al 9lila facebook ydahher la3badd 3ala h9i9etha :)
ملا قلة حياء. تراه حطلنا التصاور خلي نشوفو وين وصلت بيهم صحة الرقعة
:-)
yssir 3ala akbar bent 3ayla :)
لا عاد...بربي ما خير وللا يعيشو معقدين..اش فيها..كى بنيات ووليدات يعملو جو بالتصاور عالفايسبوك بالخلعة والبيكينى...تي ماهو بكللو تبديل جو وهروب من الستراس...يا شومى ..الواحد تحببوه ديما لابس دبشو..خلليهم يعببروا...خلليهم يفتتقوا مواهبهم..ما خير وللا يعيشو كومبليكسي...
لا يجعلني جرة في كشف حالة اخواني في الجنسية. توا اللي من صحابهم يعرف على شكون نحكي، لعل يرجعلهم شاهد العقل و ينحيوهم.
انا تربيت ملّي مشيت لطفلة كانت صاحبتي قبل حاطينلها تصاور و هي سكرانة ميتة و في وضعيات تعمل العار، كي مشيت قلتلها نحيهم ولا ع الاقل نحي اسمك، فاحت فيا.
الفايسبوك فضح برشا عباد، اما ما تنساش اللي هوما فضحو رواحهم. البرة يسميو ها الشي الـ digital dirt ويبداو ينبهو اكا الوليدات و الشباب بش ما يدمروش سمعتهم ولا يضيعو خدمة العمر بنوع م السمعة السيئة بتصوريتو و هوا سكران ولا حاجة و نحن نتبجحو بيها! ماينا
caches les visages et envois moi kelke fotos 5allini nchouf ween wselet tounes
للتوضيح أنا راني نفدلك على حكاية التصاور :-)
(ظاهرلي فما شكون يحكي بجدو)
:)
euh na7ki bjedddi chenwa el mochkel
pkoi on peut pas commenter ton dernier blog???
lotf ala okhti men صدمة سوسيو-ثقافو-اخلاقو-نفسي
loool
hadenya 3jayeb w barra
لا حول ولا قوة الا بالله العلي العظيم .. هاك آش ينجم الواحد يقول .. وأنت يعطك الصحة في المقال كلام في حقو والموضوع زادة زيد أكتب ونزيدو نقراو لك
تحياتي
حزم اللة خير