ياجماعة ما اخترتش نقرى قانون. ناري على روحي كنت نحب نقرى علم آثار و ندخل نخدم مع الامم المتحدة ساك آ دو فوق ظهري و ساقيا في الطبعة و نهار كامل في الحفر... يا حسرة. الحقوق فُرضت عليا بطريقة ديمقراطية جدا جدا خلاتني ننطق من اجنابي و نقول بععععع هات الصفا خ نقراه. امى عملتلي جمعة chantage affectif بكاء و دموع و دايخة في فرش حتى لين صححت الورقة، انا صبيتها من هنا و سبحانو معظم شانو امي رجعت لعنفوان شبابها. المهم، ملّى حطيت ساقي ف اكا الخربة فهمت علاه ها الاصرار و الالحاح، وين نتلفت وين نقبّل امي تعالجني باكا السؤال الوجودي "ياخي هذا قانوني؟؟؟؟" م اللول على نيتي نقعد نفسرلها كان اي علاه و كان لا كيفاه. تسمعني تسمعني وفي نص الحكاية تقلي اخطاني م التفلسيف جاوبني قانوني ولا لا؟ ابَيْ؟ امالا اش قاعدة نعمل؟
حتى لين فهمت اللي المقصود بالسؤال مش قانوني ولا لا، و انما هل هو شرعي و عادل legalite/ legitimite. و ليومنا هذا ما حبتش تقتنع اللي القانوني مش بالضرورة عادل و اللي العدالة تقرب للقانون من جهة مرت البو برك.

المهم يا جماعة وين فما مشكلة في المحيط الضيق ولا الموسع، لازم يدخلوني في العجة رغم اللي العايلة فيها برشا رجال قانون لكن ما يوسعوش بالهم، كلمتين اش يقول النص و اش نوة الحل و سيب صالح. شكون عندو وسع بال (وحتى كان ما عندوش زادة، كلب جيفة على رقبتو) بالطبيعة انا. يشدو يمعسولي قلبي بالاسئلة اللي ما تخطرش على بال الشيطان. و زيد ما نعرفش كان فيكم شكون من رجال القانون اما توا يقلكم اللي بعد فترة نوليو نحكيو لغة وحدنا و ما نفهمو كان بعضنا و البديهيات لينا فما شكون يقعد يندب في خديه على القانون اللي مسخنين ظهرهم بيه.

البارح جات بحذانا كلوفية حالتها حليلة و غاصة بالدمعة. يا بنتي اش فما اش صار، قعدت تحكيلنا على وحدة حبيبتها مافي حالهاش، تخدم بالنهار لا ضمان اجتماعي لا كارني لا هم يحزنون و زيد كان تبطل هي نهار خدمة، ولادها يحلو افامهم للريح. المشكلة مش غادي، للاسف الشي هذا كثر حتى لين العباد ماعادش يستهجنوه. اما اللي بالحق غلبة، انو المرا مرضت مرضة قوية شوية، دخلوها لسبيطار في حالة استعجالية و عملولها عملية و ضيفوها ثلاثة ايام بحذاهم. ايا سيدي صححلها الطبيب بش تخرج، حطت سفساريها على راسها و جات بش تخرج، قالّك وين للّا الشابة؟ وكالة هيا؟ خلّص قبل.
يا ولادي ماعنديش، مافي حاليش، استنى نمشي نتسلف و نرجع نخلصكم، شي قالك هاك محجوزة لهنا حتى لين يجيو يخلصو عليك. رصاتلهاشي بنتها تدور من دار لدار بالله بالجاه حتى لين خرّجت امها؟
كلوفية تحكي و انا القاز بدا يطلع لراسي، خاطر الحكاية هاذي منبهتهم عليها من قبل و حالفة يمين اللي مزال يعملوها فيه الا ما نكمل انا نعطيه براس نرجعو للسبيطار يغرّز.

ايا سيدي هات خ نفركوها الرمانة. الحكاية هاذي معروفة في الكلينكات عاد، ملّي تدخل يا تحط سبعميات دينار تسبقة يا شيك على بياض ضمان. و حتى بها الاحتياطات الكل ما عندك الحق تخرج من قبر الحياة اللي اسمو بيت الاما تجيبلهم ورقة باصمينلك فيها شطر الجمهورية اللي انت خالص معاهم دنيا و اخرة، غير بالطبيعة اكا الليبية مسيكنات هاذوكم يكملو يحجزو عليهم الباسبورات جملة. اما هاو حتى السبيطارات كمّلو خلطو عليهم في ها الخنار. نعرف قبل اللي ما في حالوش ما يسيبوه الا ما يصحح على كمبيالات، اما ريق شد البيت و يجيبلك السوجيقات بش يحتجزك غادي قالتلهم اسكتو!!

مرّة حبو يعملوهالي، جاية م الصباح بش نخرج مريض م الكلينيك، صباح كامل و انا ريقي شايح في جرتهم بش يهبطو الدوسي و نخلصهم. صباح كامل و هوما يماطلو فيا حتى لين قربت ماضي ساعة، قالك توا سايي، ارجع للكاسة الساعتين اما راهو بش نقيدو عليك ليلة اخرى خاطر كي تفوت ماضي ساعة تعتبر دخلت في الليلة الجديدة! بالله؟
ايا تعرفشي كيفاه، هاني هابطة انا و المريض و اهوكا عندكم الادريسة ابعثولي الفاتورة و حلفت يمين اللي بش يتعرضلي الا ما نهبطلو الشرطة و الجيش وكان لزم عصابة م الحومة. ولاّوش يجبهيو و يبوسو في اليدين و الساقين؟

في الخارج يا جماعة، ع الاقل في البلدان اللي عندي تجربة في سبيطاراتهم، كي تدخل لمرفق عمومي اللي هوا سبيطار، و حتي كان انت اجنبي ولا عندك لا تغطية اجتماعية لا تأمين لا والو، ترميلهم تصويرة م الباسبور و ادريسة كان عندك في اكا البلاد، تدخل تداوي و تخرج على روحك. لا شيك ضمان لا هم يحزنون. تي حتى كي تجي خارج مافماش شكون يقلك خلص دورو، كان خلصت مرحبا، كان ما خلصتش توا يبعثولك الفاتورة مش مشكلة، انشاء الله لاباس و ما تشوف سَوْ.

المهم توا خرفت خرفت ونسيت بش نوضحلكم الصورة. ياجماعة الشيك ضمان راهو ممنوع لكن للاسف كي انت داخل و صبعك تحت الزرسة ما تنجمش تخرجلهم الرائد الرسمي مخطط بالفلوريسون و تقلهم هاو القانون. لكن وقت الخروج، سواء كنت حاطط شيك ولا فلوس ولا حتى فرنك راهو من حقك بش تخرج و ما يكلمك حد و ماينجمش يجبرك بش تصحح كمبيالات. راهم يسالوك فلوس ايه صحيح اما راهو مجرد دين. محلاه كل واحد يسال عبد فلوس يشدو رهينة عندو! اللي عندو بيك مصلحة و يسالك فلوس يمشي يبعثلك فاتورتو كان ماخلصتوش اهوكا باب بنات محلول و كلبو ينبح.

اخر حاجة قبل لا نمشي نعمل حاجة بالكشي ربي يجيب مني، يا جماعة اللي يجيك و يحط يديه في خواصرو و يقلك نجيبلك السوجيقات و الامن و الدرا شنوة، سيدي تهز روحك و تخرج و تقلو كان بوك بي جرب اعملها! السوجيقات ولّى بوليسية ولا شنوة؟ تي هوما البوليسية لازم يبدى عندهم عليك حجة قوية و ما ينجموش يشدوك في الوقف التحفظي اكثر من اربعة ايام الا باذن م النيابة. يجي واحد ملبسينو دنقري عليه شعار متع راس كلب يعمل هكا يشوط الدستور و القانون و يقلك ما تخرجش؟ تخرج و تمشي تشكي لاقرب مركز، هاو بش نعطيكم منطوق نص المجلة الجنائية و لا تعليق عليه بعد هذا:

Article 250
Est puni de dix ans d'emprisonnement et de vingt mille dinars d'amende, quiconque, sans ordre légal, aura capturé, arrêté, détenu ou séquestré une personne.

Article 251

La peine est de vingt ans d'emprisonnement et de vingt mille dinars d'amende

  • a) si la capture, arrestation, détention ou séquestration a été accompagnée de violences ou de menaces,
    b) si cette opération a été exécutée à main armée ou par plusieurs auteurs,
    (.....)
    d) si l'un de ces faits a été accompagné de menaces de tuer l'otage, de porter atteinte à son intégrité physique ou de continuer à le séquestrer, aux fins de contraindre une tierce partie, qu'elle soit un État, une organisation internationale gouvernementale, une personne physique ou morale ou un groupe de personnes, à faire un acte déterminé ou à s'y abstenir comme condition expresse ou tacite de remise en liberté de l'otage.
    (...)





كتبتها:bent 3ayla على الساعة: 3:29 م

تعليق Icarus ...

يعطيك الصحة علمعلومات القيمة. بربي وين تلقى الفضا زدنا معلومات قانونية خاطر إلي عايش في الدنيا ما يفهمش القانون تقول واحد يلعب في مونوبولي من غير ما يعرف كيفاش تتلعب، يعني إنجمو إكبولو أيامو لخرين هههه. شكرا.

19 مايو 2009 في 4:10 م

تعليق cactussa ...

haka fakartni ili ena zeda kont n7ib na3mil archeologie!!:(((
yna3n bou lbac w loriantation!!

19 مايو 2009 في 4:15 م

تعليق غير معرف ...

Merci pour ce post, en voila un qui joint l'agréable a l'utile. je me suis fait opéré passé 2 nuits ( prévu 3 nuits); la facture n'était pas prête, je l'ai reçue 3 semaines après et l'ai payée 2 mois après! mais ça se passe pas comme ça partout.5 ah en france!)
Hatim

19 مايو 2009 في 4:22 م

تعليق Amel ...

sayib 3lik ya binti mil archéologie :p Ena dima n9oul sa77lihoum les avocats yifihmoulha fi kol chay wou chay ma yit3adda 3lihoum. Déjà pour un simple citoyen il faut qu'il connait le code du travail, les lois relatives à la location ou la vente de biens, les lois bancaires pour ne pas se faire escroquer!! ,...

19 مايو 2009 في 4:37 م

تعليق غير معرف ...

j'ai été opéré aux USA il était prévu une seule opération mais il en a fallu trois j'ai payé la première
et puis avec mes ami Américains on a pris un bouquin de négo et on est parti voir la compta prêt à en découdre pour demander un crédit et voila que la directrice sort la tete de son bureau et nous dit "our policy is to be paid in the year" et c'est tout le problème était réglé la comptable nous a dis de partir et que tout été OK il a fallu que JE lui rappelle qu'il faudrait peut être mettre tout ça par écrit alors elle a écrit un bout de papier et j'ai signé avec mon ami Américain comme témoin et c'est tout
la baladiya w la légalisation de signature
y'en avait pour vingt mille dollars
j'ai payé aprés qq mois

19 مايو 2009 في 4:51 م

تعليق Legend Of The Fall ...

صار إنت بنت الدومان؟ يا مرحبا يا مرحبا ههههه

والله يعطيك الصحة على هالمقال. يعجبوني الناس اللي يفهومها و هي طاريا و ما يتعدّى عليهم شيء

سيّب عليك من الآثار و خط مخك في القانون و اختار المحاماة و اتذّكر خوك

بالنسبة للأجانب كلام و كلام الأوخايان صحيح. يسهلّو كل شيء عكسنا أحنا.أحنا لازمك ورقة باش تخرج بيها ورقة و الورقة هاذيكا لاومك تخرجلها ورقة أخرى و لازمك تعريف بالإمضاء و نسخة مطابقة للأصل و طابع الوالي و تمشي للوزارة....حاصيلو قربلاّ و هوما صحّح و امشي على روحك

لكن ما يلزمش الواحد ينسى اللي وقت اللي هو يخرج لبعض الدول يكون خلّص التأمين. هذاكا زادة عندو دخل باش يتساهلو معاك

19 مايو 2009 في 5:05 م

تعليق غير معرف ...

Ton post est magnifique et merci pour cette clarification ama brabbi, please stp nahi 3lina melougha mta3 elhogra mta3ek, c'est ce que je reproche dans tes posts dont je suis un grand fan, je donne un example est ce que cette phrase "يجي واحد ملبسينو دنقري عليه شعار متع راس كلب" a vraiment un apport, une valeur ajoutée pour ton text, je ne pnse pas sauf initi avec une telle phrase 9a3da ta79er fi 3bed hadhika khobzethom msaken !!!

19 مايو 2009 في 5:12 م

تعليق 24Faubourg ...

merci beaucoup pour les précisions :)

19 مايو 2009 في 5:38 م

تعليق Sonya ...

ينورك يا بنت عائلة

19 مايو 2009 في 7:00 م

تعليق Mon Massir ...

Pas aussi simple.
Les gens en Tunisie ont besoin de prendre des précautions pour se faire ayer. Nous n'avons pas la mentalité du bon payeur. Je le vois tous les jours dans mon travail: sans contraintes, rares sont les gens qui payent spontanément leurs factures.

Par ailleurs, tu as pris l'exemple de la France. Je voudrais rectifier un peu ce que tu as dit.

Lorsque j'ai été étudiante en France, j'ai été opérée de l'appendicite en urgence dans une clinique. J'avais à l'époque la sécurité sociale et une mutuelle. Je n'ai rien payé, j'ai juste rempli un dossier de prise en charge. Mais il m'a quand même été demandé un chèque de garantie qui m'a été retourné par la suite lorsque la sécu a payé.

Il y a 12 ans, mon fils a été admis à l'hopital Necker. Nous étions des étrangers, sans aucune prise en charge. Je payais à l'avance. C'était obligé. J'ai donné un acompte avant même l'admission, et j'étais obligée de payer à l'avance au fur et à mesure. Je payais en espèces, puisque nous n'avions pas de compte bancaire en France. Mais je payais à l'avance.

Il y a 4 ans, pareil pour ma belle-mère qui s'était faite opérée sur le coeur dans un établissement hospitalier à Paris. En tant qu'étrangers sans prise en charge, nous avons payé à l'avance.

20 مايو 2009 في 11:37 ص

تعليق fsala ...

bourne :
yar7em el om eli jebetek
w rabi ybe3ed alina esbitaret weli y3essou fisbitaret :-))))))

20 مايو 2009 في 11:54 ص

تعليق bent 3ayla ...

اهلا بالناس الباهية. كان عندي مشكلة في الجيميل مانجمتش نجاوب على تعليقاتكم.
مصير، ممكن انت تجربتك هكاكة اما انا بالعكس صارت قدامي توا يجي ستة مرات، و كل مرة الفاتورة اكسح ملّي قبلها، يعني ما تطيحش ع الثلاثة الاف اورو قرابة الستة ملايين تونسية و ما فما حتى مشكلة بالسلامة بالسلامة. والمريض لا عندو تامين لا شي، غير عطاهم ادريسة في باريس و نسخة م الباسبور.

و زيد الحكاية هاذي ريتها في امريكيا و في سوريا. بالطبيعة مش يداويوك ببلاش اما مش ما يسيبوك الا ما تخلص ولا تخلص بالمسبق.
و في فرانسا للاسف صارت برشا تجاوزات من قبل المغاربيين و غيرهم من الاقلييات كي فطنو بها النظام الهايل، لكن حسب علمي تشكاو و تبكاو اما ما بدلوش السيستام

20 مايو 2009 في 4:39 م

تعليق nasr ...

Mme Massir
Vous dites "Les gens en Tunisie ont besoin de prendre des précautions pour se faire ayer. Nous n'avons pas la mentalité du bon payeur.

Les hopitaux en Tunisie ri7et'hom jifa, ettobba oue7line akther mil mordha, ouelli ma 3ijbouch yemchi ychouf clinique mta3 . mercenaires y7ellou fi libiya elli jeyyine 3la angine
El mra te5dem binnhar tsakket fi jou3 sgharha, ken jet eddeni denia 3andha aide a la misere min hek il miliarat mta3 tachji3 el mostathmir
il s'agit de santé c'est un droit et meme pas un service
et c'est des tunisiens qui cotisent pour avoir ce droit

c'est evident que la mentalité bon payeur c'est de l'exotisme chez nous, mais elli ma fi7alouch nroufou 3lih, chwaya ra7ma ma fiha bés.

23 مايو 2009 في 10:40 م

تعليق غير معرف ...

merci bent bled

25 مايو 2009 في 12:14 م

تعليق غير معرف ...

interessant ce post, mais j´aurais une question : supposant que je me suis fait opéré dans un établissement hospitalier privé, puis j´aimerais bien sortir, mais on m´interdissent, avec l´aide de service de sécurité. comment je pourrais réagir concrètement. je vais pas leur dire que c´est interdit et blabla. donc téléphoner un loussier pour faire un constat de cette retension et pouvoir après porter plainte?
bref comment devrait on procéder dans un cas pareil

25 مايو 2009 في 12:19 م

تعليق bent 3ayla ...

عم الراجل كيما تحب، ولو انو الحكاية جناية يعني مش قضية مدنية بش تثبتها بعدل منفذ، شهادة الشهود، تتصل بالبوليسية، اللي هوا.

26 مايو 2009 في 9:32 م