skip to main |
skip to sidebar
|
الأربعاء، يناير 07، 2009
|
|
كيما وعدتكم بالبارت الثاني متاع صولاتي و جولاتي في الكلينيكات هاو جا. قلت مني نفرغ قلبي اللي طفطف عليه الهم، و مني ننصحكم بشوية نصايح تفيدكم، اذا الله لا يقدر و لا يوريكم و يبعد عليكم ، نهار واحد تعرفوه دخل للكلينيك. ولو في حد راي المتواضع، تقعد الكلينيك اهون شوية م السبيطار. الـstatut متاعك كحريف ماهوش قاعد يدفع ف الكروية يخولك انك تنجم تستنفع بشوية خدمات ضرورية لصحة المريض. كيما حقك اللامشروط في مخدة و غطاء مثلا! ماو الكلينيك اقرب منو للوتيل منو لمكان استشفاء. علي سبيل المثال، ما نعرفش كان مشيتو مرة لكلينيك سكرة، اكا اللي حاطين في مدخلو حجرتين زلزلة، تقولش عليك داخل للـ Grand Canyon في لاميريك. وهوا انا بصراحة قداش من مره نبدا شادة ثنية اكا الكيلينيك و هازة معايا باسبور احتياط. نقول لعلا من جمعة لجمعة حطو غادي ديوانة و شرطة حدود، و نسمعو اللي اكا المصحة الدلولة اعلنت استقلالها على تونس! ماو غادي التوانسة اقلية مضطهدة. ما تراو كان الليبية والانقليز و الفرنسيس. و حتي اسوامها تقول اسوام الخارج! التوانسة اللي يمشيو لغادي نوعين. جماعة الماي باخ و القلالة متاع البورش كيان، و الا النوع الثاني اللي الكنام حاطتهم ع الليستة الكحلا، و تحب تمللهم، لعلا في الثنية لاكا قطع الرقبة يترماوا تحت سومي-رومورك في ثنية المرسي. اشتهيت مرة و انا مصموتة ف اكا الاستقبال الهايل المذخم متاعهم ، الي تقولش عليه Dancing مش كلينيك، اشتهيت نهار، مرة يجيهم مواطن عندو prise en charge من عند الدولة، يدخلوه يعمل التصويرة ولا العملية اللازمة. لاااازم يحفيوه، يتوبوه، يقطعو ريحتو و سلالتو م البلاد. هاو مرة التصحاحة مش واضحة، هاو ورقة ناقصة، هاو الكلينيك معبية، هاو لازم موافقة طبيب اخر... عندهم خيال خصب و خلاق في اختلاق الاعذار لاكا المواطنين اللي ما في حالهمش، و تلقاه حتي حق التاكسي لاكا البر متسلفو. اما البقية، ما نحكيلكمش، البم بم داخلين خارجين، قالك هوما لاباس عليهم اما هاو جاو يعملو في فترة نقاهة، يعملو بيلان و يرتحو اعصابهم و يروبولي اعصابي انا. الساكانار معبي وعليه الصف علي خاطر مدام زعبانة صبحت رقبتها معنوزة، ياخي دخلوها تعمل full check-up علي بدنها و راسها، علي ما ياتي. ماو التصيويرة القليلة م التلاث ميا و انتي ماشي، طالع، علي قدام. اما اللي بالحق بدعو بيهم و عملوهم خبزتهم هوما الليبية! مساكن اش يقاسيوا، ربي بلاهم بثور يقود في ثورة متاع سبتمبر هاي لتوا لا وفات. يبعثو فيهم خوهم على بوهم لتونس. و ساعات كي يقل الديبي، يمشي مولا الكلينيك ولا مديرو، يعملو طلة علي ليبيا و يقولولهم تي وينكم عندكم فترة ما مرضتوش؟ ويبداو يوسقو ف المرضى.. اما حسب السنين اللي عديتهم غادي، ناكدلكم اللي فما برشا ليبية ماهيش الدولة باعثتهم، واللي فيهم اللي باع صياغتو و دارو و كرهبتو بش يجي يداوي. الليبية خبزة للطبة التوانسة، صحيح غلاو علينا الخبز، وولات الطبة ما عادش تلعبها اكا الخمسين دينار، لا هاذيكا في الـ cabinet و سوم ولاد بلاد (كيما اللي يعملوهولك ف البلاد العربي) اما سوم التوريست ، اللي هوما الليبية مرتين تلاثة قدو. نعرف طبيب يجي يكشف غادي، كل مريض يقعد معاه درج بالحساب، ياخذ عليه، ايا حل وذنيك سيدي... مائة و خمسون دينارا !!! عدا و نقدا!!! و ساعات كي تبدا الكلينيك معبية، و ما يلقاش salle de consultation يعدي عليه في الباركينغ متع المصحة، ايه شبيه، حتي الواحد نفسيتو تنشرح في اكا القازون و الحجر و الضو والهيلمان اللي البرا. ويزيد يدخل علي عينو، يكمل يزيد بنطاطا بعد ما هز مريول الخلعة ف الطبيعة بش يسمعلو دقات القلب. هاو la creation de la demande! و زيد قالك بعض الفرامل اكا اللي يسميوهم ملائكة الرحمة، يحبو حتي هوما بايهم ف القاطو. يجيو للمريض، و يقولولو، صحيح انتي مخلص بيت بقرابة الميات دينار في الليلة، بخلاف الطبيب بخلاف الدوا، بخلاف ماتريال الكلينيك، ماو غادي الخطوة بحسنتها، و درا شنوة بوضوها، كان عندك chimio اللطف عليكم الكل، تخلص الدوا الرخيص اكا اللي الزريقة بزوز ملاين، وحتي الـ pousse seringue تكريها من عند الكلينيك و تخلص عليها خمسين ف النهار. زيد معاه الطبيب اللي بـميا و خمسين، زيد الزرارق والقوانداوت والترموماتر و البيتادين، و ال وال وال... الحاصيلو كرية البيت اللي هيا الليلة بميا، ما فيها كان الحيوط والفرش و الـ papier toilette حاشا ها الوجوه. علي ذكر القواندوات و البيتادين، يا جماعة، كان مرة لقيتو ف الفاتورة اللي استعملولكم une paire عندكم الحق تطالبو بش تروحو بالباكو، و البيتادين زادة و الترموماتر وكل باكو دوا تشرب منو حربوشة. راهو حقكم. علي خاطر راهم ما يمشيوش بنظام عندهم ستوك و كل مريض يفكترولو ما يستعمل. لا! كل مريض قالك يخلص باكوه. وعلي سبيل المثال ، ماو نحنا نقولو السماح اما ما تعرفوش اللي باكو متع القواندوات اللي هوا يتكلف 15 دينارا و فيه مائة قفاز يتعاود يتفكتر علي عشرين مريضباكو واحد يستعملوه لقبيلة و يتفكتر علي كل واحد منهم!! . اعمل وحدك الحسبة وهاذا القواندوات برك! هزوهم اغسلو بيهم الماعون و التمانيك لا! قلنا عاد الفرامل عندهم موضة. يجي للمريض يقلو، انا راهو لهوتي بيك ماهيش تابعة البيت، لاااااا، انا جهدي نخلص عليه وحدي، و يحوف منو من ثلاثين الي سبعين دينار! هوا و امكانية استغفال المريض. يا اخي و هاذا و دونو، و الله لو فيهم مهارات طبية الواحد يقول الخليفة عليه، الواحد يكت علي صحتو. قالك خوذ ميا و موت.. قالو لشكون بش نخليهم! اما اللي ريتو م l'incompetence متاعهم شي يتورخ ف الكتب! مرة واحد قعد واقف يستني ف الاسانسور، حتي تحل الباب، دخل..... وعاود خرج م الجهة الاخري. يعني ضيع دقيقتين في حين انو كان يحل الباب اللوح اللي بحذا الاسانسور، يلقا روحو م الجهة الاخرى! ايا هاو مثال ع الطاير، ماعندوش حتي جمعتين، ولا لازمو شهادة في التمريض لا شي، لازمو مرايات و مخ يشرجي. ماو الكلينكات الكل، م الامان للمرسى، لعليسة للاك، لسكرة - الا المنار و التوفيق- عندهم في المدخل دروج للعباد و بحذاه زرزيحة للفروشات متاع المرضى والا الكراسي المتحركة. بربي فرملي عندو عام يخدم ف الكلينيك، يعني ع الاقل دخل و خرج م اكا الباب ع القليلة ع القليلة 680 مرة. م الباب الواطي. نهار جا يخرج ف مريض على فرش بش يهزوه في سيارة الاسعاف، في عوض يهبطو ماكا الزرزيحة، يهبطو في الدروج -ايه نعم الكلمة اللي قرتيها صحيحة ما تزيدش تعاود تقرا- وهوا راقد فاكا الفرش، يجيبو مبلوط ف القاعة. اش تسميوه؟؟؟؟؟؟؟؟ عمى؟ بهامة؟ euthanasie؟ انا لتوا مانيش فاهمة، بربي فماش واحد قاري علم نفس يتعدى من هنا يفهمهالي. فرملية داخلة ف الليل للبيت تتسرسب، بش تزرق لمريض، الحمد لله انو بحذاه accompagnant فايق. داخلة بزريقة و باهتة تغزرلها، و تزيد تلوج وين بش تحطها. هيا مدت يدها بش تدخلها في العرق، نقز المرافق وقالها شنوة تعمل، قاتلو ما تعرفش وين نزرقهالو هاذي؟ الراجل بهم و قالها نطلبو الطبيب. اش تتطلع الحكاية؟؟ غالطة ف البيت! هاذيكا زريقة مريض اخر لازمو ياخذها مع دوا اخر. لو كان مش الطاف الله مش عصفورين بحجرة؟ اللي زرقتهالو و اللي كارها زرقتهالو، قولو الله يزرق عينيها لعلا تولي تدل! بخلاف اللي تعرفوه من حكايات عللي توفى وما قالوش لاهلو بش يزيدو ليلة ف الفاتورة و الطبيب اللي يتعدى م الكولوار يقلك صباح الخير تخلص فيزيتة، هاذا الكل راو في بالكم بيه. نزيدكم زيادة، مرة واحد داخل بش يعمل عملية، لازمو قبل العملية يشرب كيما نقولو سيتة ايترات ماء مخلطين بالدوا بش مصارنو تنضاف ماكانش اقل عملية تتسبب في تعفن و يمشي فيها. شرب شرب تعب. دخلتلو فرملية شخطورة تلعب بالبورتابل، قاتلو ميسالش، فك عليك. الحمدو الله الطبيب قبل ما يحطلو البنج سالو شربت و لا لا. قالو زوز ايترا و تعبت! الطبيب هبل. عيطلها و فاح فيها ، و تاجلت العملية. اما المريض خلص الكلينيك و المبنج و فزيتة الطبيب رغما عن انفو! ماو ف الدخول ياخذو عليك اكا الشيك علي بياض، ولو انو في القانون هذيكا جريمة، اي سيدي جريمة و يعاقب عليها القانون، اهوكا امشيو للبيغ تراب بوي، ماو رجل قانون توا يقلكم اللي الشيك وسيلة دفع ماهوش وسيلة ضمان. خليني نكمل نوصيكم على حويجا برك و نمشي نرقد علي روحي. راهو في الكلينيكات متع الامان، يعني اللي في متيال فيل و الي ولات تابعة ، متع المرسى سابقا، بش يغنيولكم غناية انو المرافق اي accompagnant صحيح يدفع اربعين ولا خمسين دينار زايدة، ما عادش نتذكر، بش يبات علي سدة اكسح م حجر المسرح متع كرتاج، اما ما عندوش الحق الا ف العشا. لا فطور صباح لا قايلة لا قوتي ف الاربعة. و يقلك اللي هيا اتفاقية عملتها الـ UTICA مع الكلينيكات الكل. كان تحب يجيبولك بلاتو فطور ب 10 دينارات و فطورالصباح و القوتي ب 5 علي مانتذكر.لا سيدي، ما فماش منها الحكاية، الغاية منها واضحة ماكمش سي الفرملي متع الدروج بش نزيد نفهمكم! |
|
كتبتها:bent 3ayla
على الساعة:
1:40 ص
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
يعطيك الصحة يا بنت عائلة ، كلامك الكل صحيح ، و تأكيد لقولك ، على حكاية الزرزيحة و الفرملي إلّي هبّط المريض من الدروج بالفرش متاعو ، هاذاك اختصاص تونسي 100 في 100 و موجود في جميع الإدارات ، انزيد انفسر ، مثلا تمشي لشباك إدارة و فيها عون يخدم في نوع واحد من الخدم عندو سنين يعاود في نفس الخدمة ، و كيف اتجيه انت و تطلب منو الخدمة هاذيك يستغرب و يندهش و ما يفهمكش كأنو أول مرّة يتعرض للموضع ، و ها لحكاية يلزمها مختصين باش يفهموهانّا
samahni ya mazmazelle mais je ne suis pas d'accord sur certains points...je ne sais pas si tu travaillais ou pas dans cette clinique mais les honoraires des médecins ne sont pas les me^me partout, ceci d'une part et que d'une autre part il existe des cliniques honnêtes et dont le personnel est compétent. la chèreté des cliniques est tout un autre sujet.
صباح الخير يا جماعة، ولو هوا وقت فطور، اهوكا انويولي معاكم.
بالحق اللي فما طبة مازال الخير فيهم، الواحد بش يقعد يسمي؟ اللي يبهت، و c revelateur انو ولينا نقولو الكلام صحيح اما فما.... معناها المبدا و الاستثناء اتقلبو.
انا رايي انو كل شي نقبل فيهم الخبث و التجارة و استغلال الطرف المقابل، الا ثلاثة خدم، هاذوكم لا! حدك حد المسقي، اللي هوما اولا الميدان الطبي، ماو ميسالش كارفور يتمنيك عليا و يشريني بالـbon d'achat بالسيف علي سلعة رجعتها و ما عجبتنيش انا جيتو بساقايا بش يتمنيك، اما طبيب نسلملو روحي و يا عالم قاعد يتعلم ف الحجامة في راسي و لا يداوي فيا لا، هذي ما نقبلهاش!
و الثانية هيا المحاماة و القضاء، ماو هاذوكم اللي متكلفلينلي بحقي بش mon integrite physik ما تتمسش وحقوقي ما تضيعش و ترصيلي نمرض بالقلب و نمشي بساقيا للنوع الاول.
و الثالث اكا المقاولين متع الاشغال العامة و المدارس، ترصيلناش هو مدرسة طاحت هاو قنطرة رخت؟؟
اما اذا كان ع الكلينكات الhonnetes بالله دلني، قلني اناهيا، انا حرت و دليلي حتار. حتي الي كانت تعجبني و اللي هيا متع المرسي، ولات تابعة الامان..
chay youjaj3 el 9alb surtout ki nzid netfaraj fi les reportages fitalvza el fransawiya elli ya7kiw 3la sbitarat'hom w kliniket'hom n9oul 3leh houma 3bed wa7na mouch 3bed? ama ki netfaraj fi les series americaines kima "urgence" wella "grey's anatomy" nzid nfed w nakrah rou7i )-:
t'exagères quand mm bent 3ayla ama je trouve que comme image caricaturale, c'est réussi et c'est assez divertissant
tu as just oublié de nuancer
a+++
La médicine est normalement une mission" humaine"!!!!mais on voit qu'elle est devenue commerciale.
C'estle rêve de tout ceux qui veulent vite devenir riches.
C'est pourquoi -à mon avis bien sûr- qu'on ne trouve plus un bon service aux hopitaux, et que ce bon service nous coûte très cher chez les privés.
devenir "vite" riche?
vite!!
VITE ???
ايا سيدي ركح اللعب، امونة تغششت و ما يساعدناش!
لا veet لا blond'epil !
Merci Bent-3ayla pour ce post et le précédent.
Chab3a dho7k 7tta ken echay inatta9 millajneb :)