skip to main |
skip to sidebar
|
الجمعة، يناير 09، 2009
|
|
دارنا كيما سبق و فهمتو، مش من النوع اللي مسيب الماء ع البطيخ، و ما همش جماعة طالبان زادة. ايه صحيح كي نخرج ف الليل امي تمرجلي القلب متاعي م الداخل و تخليني نحن لتسكرة الطيارة و الهجة. اما يا اخي انا نشوف هكاكة احسن مللي تهبط معايا بش نشري nuisette sexy نحضر بيها pyjama party مخلطة حمص و زبيب في دار الله اعلم شكون (و هذايا دمار توا نحكي عليه نهار اخر) ! الله غالب، مربطة، اش تحبو تعملو؟ المهم يا سيدي بن سيدي، هاني مكهبة عل.... 99 سنة و لا نهار تجبدت ريحة العرس في دارنا كان مرة برك و هيا التي سياتي تفصيلها. كان علي عمكم بو بنت عايلة في مخو بنتو مازالت كي "خرجب م المكتب" لا نهار قالها جامعة، ومازالت دلولتو و تلبس ف البيجاما rose bonbon ما قعد كان بش يرجع يحطني في حجرو و لم يخامره و لو لوهلة انو انا وليت مرا و نحظ الزواز. و كان علي امي، نهار بتفدليك قلتلها شبيك ماكش تزهزلي كي بقية البنات، قاتلي اللي يحب يكب سعدو بيدو اش كون يسالو؟ برا عرس كان تحب، و انشالله ربي يبعثلك فروخ يعملو فيك ما عملتو فيا انتي وخوك! هاذاكا نهار و هذا نهار لا عاودت جبدت علي الحكاية حتي بتفدليك، الحق الحق ترعبت م فكرة انو ربي يعاقبني بمفرخة م الشتلة متاعي انا وخويا. العايلة السعيدة هاذي، المتفاهمة ف الثوابت و الاختيارات الاساسية متاعها، خذاوها الناس بالعين. جاها زلزال مدمر ف نهار م النهارات متمثل في مؤتمر وحدة بين خالتك كلوفية حسنة الذكر و عمتي اللي عايشة في سوسة مع راجلها و تجي ساعة ساعة تنورنا بزيارة، و لو ماجاش العيب راهي امي تخليلها الدار و تهج بحذا خالتي، علي خاطر كي تجي تشوف هيا مش تنورنا برك، تشعلنا شعيل! عمتي، بالرغم اللي هيا و خالتك كلوفية بعاد علي بعضهم بعد السما ع الارض، الا انهم كي يتحطوا مع بعضهم يعملو القهر! عمتي بش نسميها "يا سعد من وفق راسين ف الحلال" همها ف الدنيا هاذي بش الناس الكل تعرس. ما تحملش شكون يبدا خلقت طليقا كطيف النسيم. هيا مرا مصلية و ما عندهاش لا ريق دقازة لا دجل لا شعوذة كيما كلوفية. اما ساعات يبدا بيناتهم تحالف استراتيجي، علي خاطر تعرف كلوفية عاملتها البلدية back-up لدائرة الحالة المدنية متاعها. تعرف شكون خذا شكون ف انا عام و قداه جابو صغار و صغارهم قداه عمارهم و ش يخدمو و شنية اخلاقهم و دينهم و دنيتهم. اللعب لا! عاد كي تجي عمتي من سوسة مرة علي مرة تبدا جايبة معاها يا عروض يا طلبات متع زواج. و تقعد هيا و كلوفية، قهيوة عربي بالزهر ولا قشور البردقان، صحين كعك ورقة متع زغوان ولا مقروض قروان و ام كلثوم تشرقع و هوما ورقة و ستيلو. يعملو مجموعة للرجال و مجموعة للنسا، و يعملو تمرين اربط بسهم! و علي يديهم صارت برشا عروسات، و علي يدين كلوفية زادت كملتلهم SAV اي Service Apres Vente و تسبتلهم ف الطلقة زادة. في مرة منهم، ماو ما نحبش ها القعدات جملة، و خاصة اكا الفيتو اللي تستعملو هاذي علي المترشح متع الاخرى، هاو هاذي عندها سنة مكسرة، هاو لاخر عندو خوه ف الحبس، هاو هذا سوكارجي، لواه نكرو علي ولاد و بنات الناس ونقعدو لدعا الشر؟ اسلمك نظيف تسلمني نظيف! ايه عاد جيت قعدت، نسمع و نضحك، و ساعة ساعة نرمي كليمة كان يحكيو علي عبد نعرفو. بعد شوية ريتهم سكتو، غزرو لبعضهم ملييييح و عاودو غزرولي. انا باقي نقهقه وما علباليش... ياخي كلوفية قالت: -ياخي الماء الماشي للسدرة مش الزيتونة اولي بيه؟ - ايه، الاقربون اولى بالمعروف! ما فهمتش امها ونيها عليها؟ حتي تظفر الشيب؟ - يا حسرة علي نسا بكري، ما يخرجوش م الدار و الخطاب عليهم بالصف... غير اش تحبني نقول، السيبة و الخيبة! انا كي فهمت، قلتلهم انا معروف و انا حلوف، الف و اعوذ بالله! الحكاية هذي انساوها. اما هيا كل وحدة وحدها و يا ربي نجمها، خلي في زوز! وحدة تتحي و وحدة تزكي، وحدة تزيد ف الماء لخرى تزيد ف الدقيق... يا اخي مقواهم في الماركتينغ! انا بعد اكا الطاروح قلت شبيني ما في باليش العرس حلو هكا؟ و فيه السعادة و الهنا هذا الكل، هاو محبة هاو راحة بال،هاو شهر عسل هاو دولاشة، هاو حاجات اخرى... قريب بش نقوم نبكي و نقلهم عرسولي تربحو فيا ثواب! و انا ناسية اللي وحدة طلقت و لخرى نهار كامل تسحسح في روحها اللي عرست! ايا سيدي، سخرو جهودهم الكل، خممو، قاسو، كمبسو، و جابولي ليستة متع عشرة رجال. قلتلهم لاااا، حدكم حد المسقي، عشرة ياسر، زيدو صفيوا. نحب الممو! زادو طبسو علي الطاولة و خربشوا شوية، حكاو بالشيفرة و رجعولي بليستة فيها اربعة زوز على كل مدرب! لا يا سيدي، علاه، وكالة دارنا، هاو واحد داخل واحد خارج؟ اش بش يقولو الجيران، هوا واحد ولا انساو الهدرة! شعرة لا صارت حرب متع انا فريق بش يختارو. ف الاخر، غلبت عمتي بالـ KO. الراجل اللي جابتو، كامل مكمل، ما فيه ما يتعيب. هيا تحكي وانا ريقتي سايلة، لو كان مش العيب نقلها توا نكتب عليه. هاو طول هاو عرض، هاو زين، هاو خلق و خلوق، ولد ناس قماقم، قاري لبرة و متفتح، خدمتو تضرب تصرع، كريم و حنين و بار بالوالدين، و حتي م الفلوس، لاباسن عليه. اش عندك ما تقول؟ تبع الجرة... اساعة امي جبدولها الهدرة، و هيا شعرة لا قامت تندب، - يا لّلا يا سعد من وفق راسين ف الحلال، ما يجيش هكا، انا ما ربيتهاش علي ها الريق، تي انا و في جيلي اخترت سيدي خوك وحدي. نجي بعد ها العمر ندلل علي بنتي؟ -علاه تدلل بيها، الراجل بش يجي بساقيه لهنا. هوا و اميمتو زادة. بعد عمر طويل لشكون بش تخليوها الطفلة، وهيا هاي سبهلالا، هاي قراية، هاي خدمة و الطفلة علي قدام ماشية علي عماها! - اي هاك قلتها، خليها لاهية في خدمتها، كي يبدى عندها مستقبل و فلوس تحت راسها، تعمل ما تريد. و تطور الحديث بالطيبعة و شعرة لا صارت ازمة ديبلوماسية حادة. اما امي خضعت ف الاخر، خير مللي عمتي تقول تستقوى عليا على خاطرني في دارها. اما اتفقوا انو عمك بو بنت عايلة ما يسمعش بها الهدرة. من غادي لغادي، يصفيوها نسا ف بعضهم، و كان تآلفت القلوب، يعمل الله دليل. و الحمدولله جاتهم ها اللمحة البراقة متع الذكا، مكانش راهو صار موتى في نهارة اكا الزيارة. ايا سيدي النهار الموعود جا، و عمتي و كلوفية تقولش عليهم هوما اللي بش يعرسو... غيبو امي مشات تقري و تكافح و انا احتجزوني قالك ما فماش خدمة . وزادو الدار قلبوها ساسها علي راسها. هاو تنظيف هاو مسحان غبرة، هاو بدلو disposition متع الصالة و خرجو السرفيس متع زهازها، هاو صنفوا الحلو و التاي والقهوة و شراو القاتو و الـ macarons و الجو هاذاكا الكل. هوما يحطو وانا نزيد نفرح و نقول، باللي بش ياكلو بش يقعدلي (كل واحد يغني على ليلاه). حجمت، سشورت، مكيجت، لبست قديت، عندي مديدة ما فرحتش بروحي باكا الطريقة هذيكا. نغزر لروحي ونقول زين القردة تولي غزالة... و هاذي نصيحة للرجال، ما تقول زين حتي تشوف الوجه مغسول بالماء و الصابون. جات امي ، دخلت و عاودت خرجت ثبتت اللي هيا ماهيش غالطة في دارها. اي هيا، وه؟ لقات الشي عاد. اش بش تقول و الناس علي وصول... بلعت السكينة بدمها و شدت تركينة تستنا. جاو الجماعة من سوسة، و هذا تفصيل امي مافي بالهاش بيه، مكانش راهي قالت لا م الاول. لا يزي يدللّو علي بنتها لا يزي بش يهزها للابعاد؟ المرا هيا شافت عمتي وهيا ترمات عليها هات يا بوس يا تعنيق، تقولش عليها عندها عام ما راتهاش، هزت امي م لفوق اللوطى ماي تقولش عليها جاية تعزي و تعدات تسلم علي كلوفية في بالها هيا امي م الشي اللي لابستو و الفرحة اللي ف عينيها. انا عملتلي تقييم بصري ع السريع و ضحكتلي ضحكة "غير استني عليا برك"... جبدت قعدت و ركزت اكا الـ Birkin قدامها! انا لعبت عليا الدوخة من هاكا المشهد السريالي! على مرتين بش نقلها ميسالش نعمل معاه تصويرة مبعد قلت ارزن، اثقل عملت العار! اما سي الشباب اللي وراها ما نجمش نوصفهولكم. اول مرة ف حياتي تهبط عليا حشمة مرضية. مللي دخلو الجماعة ما نجمتش نهز عينيا و لا نقول كلمة، اللي يتلفتلي، نمهمه حاجة الله اعلم شنوة هيا، انا بيدي ما نعرفش. اما ريت الـcostume burberry و الصباط Gucci ظاهرين يعيطو يا بابا يامي. جبدو النسا يحكيوا ويهروا، و فرد مرة يضحكو عليا، ماراو مني كان الشعر، الراس مطبس ف القاعة ما تهزش. و نسمع في صوت ذكوري يحكي معاهم، كلام موزون. هزيت راسي بالشوية ، و بديت نستقصي في الحكاية. اييه، والله حليلتو، مش م النوع اللي يلّعب عليا الدوخة، اما وجه نظيّف و مقدود. ابيض احمر (انا نحب السمر) و عنين شهل (انا نحب الكحل) و وجهو rase de pres (و انا نحب اللحية الخفيفة مش متع بو لحية، متع drity look ). اما عليه عينين!! يا لطيف اللطف، يلقطو الحمص من قاع الطنجرة، لا يفوتو تحريكة لا تفريكة. جات العين ف العين و عملي ابتسامة سميتها ابتسامة القرش! اكا الضحكة متع واحد بش يا كلك بحشيشك و ريشك... يقلب فيك و يعاين و هوا يحرك ف السكر في فنجان القهوة و لا علي بالو. باللّي حاولو فيا الجماعة بش نقوم نجيب حاجة، ما قمت كان بالسيف و نمشي علي جنب كي عقرب الحيوط، خايفة منو لا يعملي ضريبة تفحيص عل verso متاعي! اي سيدي تسرحت انا و بديت نهر معاهم، ولو علي مرتين عمتي تعمللي اشارات ضوئية بعينيها كي الكو دو فار بش ما نزيدش نتحل كي عادتي. من حديث لحديث، درا كيفاش جات هدرة السبور، اساعة بطبيعة الحال سي القرش ايتواليست، وانا كليبيست، قلت الخليفة عليه، مانا كلنا توانسة، اما بيني و بين روحي قلت الحمدولله مش مكشخ! دارلي و سالني سؤال من نوع اللي يسالو عمك رضوان ف التلفزة، "و انتي انا نوع م الرياضة تمارس؟" علي نية ربي قتلو كنت نلعب تنيس، اما توا ناتاسيون. امو شرقت بكعبة الحلو و قاتلي : - تعوم؟؟؟؟ - ااا..مهمهه.... ايه! -باش؟ -شنوه باش، بالشمبرار؟ ماو وحدي! (عمتي تغمز من غادي و انا مش فاهمة) - لا، شنوة لابسة؟ -..... (بخوف قلتلها) مايو! امو ظاهر فيها كانت ناوية تعمللي زريقة ف العظم، اما سي القرش قحرلها و تلفتلي، و ضرب بشوية عل البلاصة اللي بحذاه، متع ايجا اقعد بحذايا يعيش بنتي. تلفت لامي، لقيتها الدخان خارج من وذنيها و قادمة لسانها بش ما تقول شي. عمتي عملتلي براسي ايه ميسالش... مشيت قعدت، و سي القرش طبس عليا ضحكلي ضحكة متاع راني ناخو فيك علي قد عقلك: - و انتي فاش قام عليك البيسين؟ نخاف عليك لا تمرض... -......... - تعرف كيفاه؟ الجمعة الجاية اني بش نمشي للندرة، اتوا نجيبلك معايا خاتمك و الـ Wii Fit اهوكا اترانا ف الدار.. راني نغار عليك! - .......... (في قلبي هاو الكذب المفلق، من وقتاه تعرفني بش تغير بابا؟) زاد طبس و قالي بشوية خبث : - زيد انتي هكا عاجبتني، فاش قام السبور من اصلو؟ انا نحب المرا تلقى فيها ما يتمشمش! بعد ها الجملة الغزلية التشبيبة جاتلي حالة الثور... ما عاد نرى في شي قدامي... الدنيا حمارت في عينيا، و ضربني الطرش و العما.. ما نرى كان ف بقراج التاي السخون اللي مازالو كي جابوه، ما غير تفكير ولا قاعدة نستوعب الي نعمل فيه، قمت، هزيت البقراج و طبست علي القرش بش نصبلو ف فنجانو و نعمل فررررت و نبزعهولو علي حجرو! و تميت هاربة للبيت! نسمع ف الزيطة و العيطة، و عمتي تلحلح بيهم ع الاقل بش تشوفلو سروال يروح بيه، كيفاش بش تروح، و امو تتكرم وحدها و تعمللها، هزوها للمرسطان هاذي متع ماخذة و جيبان صغار؟ من وقتها لا عاد تحلت ها السيرة ف الدار، و عمتي بعد ما غسلتني و شللتني و بردت، تحلفت الا ما في عرسي ترجعلي الفازة وقدام العباد.. هاني من توا حاطة في مخي نجيب معايا سروال rechange لولد الناس!
|
|
كتبتها:bent 3ayla
على الساعة:
5:43 م
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
tres drole
mais tu es dangerouse toi
ca y est je suis le premier
et men tawa je serai parmi les premier
والله عندي ذكريات خااااااايبة مع ''نحب فيها مايتمشمش'' ههههههههههههههههههههههههههههه
anonyme 1 : premier pour? et parmi ki??
zabrat: ايييه انتي عاد! لا متاكدة اللي عندك. كان تحب اهاوكا احكيلنا اما بطريقة سوفت!
premiers qui mettent les commentaires
c est ca mon probleme je ne m exprime pas bien
premiers qui mettent les commentaires
c est ca mon probleme je ne m exprime pas bien
ايه، بالحق! توا فهمتها!
يا سيدي مرحبا بيك، م اللولانين ولا الخرانين، ماو جات ماضي ساعة و طرف الذكا متاعي وفا!
Depuis le coup que tu m'as fait je fais attention chaque fois que je demande la main d'une fille;) mais j'aimerai bien reprendre contact avec toi
bravo! pour ton recit et bravooo!! pour le coup du thé chaud w rabbi yestehel behia hethi errajel y7eb etmachmich belikchi mechi fi belou jey yechri fi kilou l7am w y7ebou bel 3dham bech yal9a ma yetmachmach :-)))
3andek el 7a9 mela ki 9omt temchi 3la jneb bech si echbeb ma ya3malch taf9ida coté "verso" kima 9olt ;-)
الزّح ماكش مزهارة, انا اسمر و عينيّ كحل و ما نحبش التمشميش...اما جيت اصغر منّك :(
mdr
très beau texte j'ai adoré
Bon courage ( pas pour le mari mais pour les posts )
الـcostume burberry
و الصباط Gucci + ويخاف عليك لتمرض
ويغير على اللحم متاعك بش ما يضعفش
بش يلقى مايمشمش = شيء مقرف .. قلو اللبسة هاذيكا
تليق كان علي يمشمش دماغ المرا على خاطرو داليكاتاس وأشهى من اللحم..ههههههههه
حوتة عليك يابنت عائلة!!
MeTaLLisTiC يقول...
الزّح ماكش مزهارة, انا اسمر و عينيّ كحل و ما نحبش التمشميش...اما جيت اصغر منّك :(
10 يناير, 2009 02:26 ص
et c est koi le prob
moi j etais avec 2 filles mais pas au meme temps. la premiere etait 6 ans plus grande que moi et l autre 7 ans
donc ce n est pas un prob pour toi
c koi للمرسطانstp
LOL
3ala sirét el 5otba, ye3ejbouni elli i9ollik "Mes parents et moi t'invitons a dejeuner" ... !!!
pff trop degueu, bérasmi t7ess rou7eb un morceau de chaire w béch tétmachméch!
Ama s'il a vraiment parlé comme ca, et de surcoit devant ta famille, yesser go3r hédha!
يا مرحبا، عسلامة يا جماعة.
زعمة غير معرف اللي يحب يرجع يتواصل معايا هوا سي القرش؟؟ يا ذنوبي! كان هوا، راهو يحب يعمللي بعض العملة.
نشكر تعاطفكم معايا، ولو انو انا حسيت اللي كثرتلها ها المرة. اما si c t a refaire..... هيهيهي...
لا يا امونة، قالهالي بالشوية. هذاكا علاه امو قالت هزوها للمرسطان، و انا حشمت بش نقلهم اش قال.
المرسطان يا سي غير معرف الاخير، لفظة تركية قديمة يقصدو بيها المؤسسة اللي كانو يحطو فيها المهبلة. قبل الرازي توا. اما قعدت الكلمة تتقال لليوم علي الرازي زادة.
ميتالاستيك، قبل العمر اساعا، عندك لحية خفيفة؟؟ كان ما عندكش لحية خسرتك.. وكان عندك، صحة لصاحبتك. يا خويا انا مزلت traumatisee مل الماخذة و انتي مزلت شباب و انا مهبولة!
غير معرف اللي خرج مع زوز بنات اكبر منو... احكيلي بربي علي هاالتجربة. حتي ع الخاص يعني ايميل مش تعليق، كان ما يقلقكش..
امونة و سيدة البيت، يا سيدي وليت نتوحشكم كي ما تتعداوش!
غير معرف اللي خرج مع زوز بنات اكبر منو... احكيلي بربي علي هاالتجربة. حتي ع الخاص يعني ايميل مش تعليق، كان ما يقلقكش..
inchallah durant la semaine prochaine je t envois un email avec tte l histoire
ahla b'bent el 3ayla
walahi 7keyetek chab3a dho7k
ama vu le nombre elkbir mte3 elhoukech fi hal elbled nans7ek bech tna99es mil 7keyet 3al 3ers w mouchta99atou 5ir ma trasilek fi kamcha jboura w na9sin 7anen mkoukchin 3al blog mte3ek betta3ali9 il7oula wil ri9 elmereg
fhemetha kiféééh, aaaah?
rod belek fariyad