استانست كيما راكم لاحظتو انو كي نحب نحكي علي حاجة، مهما كانت، في عوض نظّرها و نقعد نحكي في الدغمائيات و الشايح، انو نحكيها في قالب قصة. ها الشي تعلمتو ف درس من دروس communication skills و زاد اتدعم بالتجربة. كي تحكي حكاية تبدى اعمق و اشد تاثير و خاصة اعلق ف الاذهان من درس نظري كامل... 
الواحد يقول اش نوة الجديد اللي جبتو؟ لا، حتي شي، الا انو ها المرة بش نعمل استثناء. مانيش بش نحكي حكاية اما بش نخمم بصوت عالي. 

اليوم جات زارتني صاحبتي (ولو انوالمصطلح الاصلح هدت عليا في غطايط نومي) بش تفرغ قلبها من بوها. و لو الواحد ما يلزمش يحكي اسرار دارهم، اما يعرفوني سرهم في بير (لا ظاهر! هاك عملتلها زيطة  بترنبيطة! لا لا سيدي مش بش نقول اش قالتلي، اما بش نحكي ع الشكوى في حد ذاتها).. 
المهم باللي قالت باللي شكات... انا اش لقيت بش نقوللها، ماو وسع بالك، ماو بوك، ماو كبر و اش كون بيه، الكلنا كيف كيف و هات من ها الكلام... و حتي مل الانقليز قالولك By the time we find our parents were right, we have children who think we're wrong!

كي ما قتنعتش... و باقي تندب علي سعدها... ترددت قبل ما نحكيلها حكاية (علي خاطرني م النوع اللي يسمع و ما يحكيش) خاصة و انو حكاية اثرت فيا برشا و بدلتلي من طبيعتي برشا برشا علي الرغم من تفاهتها. 

عمناول ، او بالاحري السنا في اول الصيف، جانا حاشا ها المحل خبر واحد يقربلنا من بعيد. ولا حد كان متوقع انو بش يتوفي. الراجل لقبل ما يموت بجمعة و هوا واقف علي ساقيه. انا بطبيعة الحال اتطرشقت بالبكاء. اما ما كنتش نبكي علي خاطرو مات.. كنت نبكي علي حكاية قديمة صارت عندها فوق الاربعة سنين ولا اكثر. 
مرة و انا ف الدار، جا قريبنا هذا حاشتو ببابا. و مالقاني كان انا ف الدار. دخلتو لبيت القعاد، حليتلو التلفزة و مشيت للكوجينة بش نشوف اش عنا. لقيت عنا نوعين متع jus. واحد بنين قعد منو عباية كاس، ولاخر مش بنين برشا مزال منو باكو. نعمل هكا نصب الكاس البنين لروحي و نحطلو  هوا كاس مللي مش بنين. و جا بابا و قضى قضيتو و تعدات سنين و منين و اكا الهدرة نسيتها جملة. 

كي سمعت بخبر الراجل، الحاجة الوحيدة اللي جاتني في مخي هيا اكا كاس الـjus. لا تذكرت ايامتنا معاه ولا المشي و الجي و لا ماخذتو بالخاطر ولا ماخذتنا بخاطرو. و حسيت بنار تكوي فيا م الداخل. احساس بالذنب فظيع. و اكا العجز انو نجم نتدارك اكا الغلطة اللي عملتها، و انو بجلت روحي عليه، و اني كنت انانية و طمعت في فرحتي انا بكاس الـjus. 
اللي بكيتو عليه ما بكاوهش ولادو... علاه؟ ما نعرفش!
 
اما من وقتها اي حاجة يطلبوها امي ولا بابا و لا خويا خاصة، و انا تفددني ولا نكرهها و لا يكثرو عليا بالمشي والجي... كل ما تطلع لفمي كلمة لا ولا نحب نعمل عركة، نتذكر اكا الاحساس اللي جاني و كيفاش تشويت كي ما نجمتش نتدارك الوضع. و كل مرة وليت نحط قدام عينيا احتمال انو الله لا يقدر نتحرم من واحد منهم، اش بش نحس لو كان نبيتهم منرفزين عليا ولا ننطر عليهم؟
من وقتها حتي كي نفور نفور دخلاني، و نوسع بالي و نزيد نوسع بالي. 

الطفلة كي اللي درا شكون حللها عينيها علي شي ما كانش في بالها بيه. سكتت، كملت فنجان قهوة و قاتلي يعمل الله دليل. باللي حاولت تكركرني نخرجو، قلتلها لا. 
الحق، عيني بش نخرج و ندور، ناخو كلمة و نعطي كلمة و نعمل ضحكة. اما ما نجمتش.

 امي مريضة شوية مش حتي مريضة، متقلّقة. هيا ما قالتليش اقعد، اما انا حطيت روحي في بلاصتها، نهار سبت عشية مبومة وحدها، الراجل يخدم و الولاد كل واحد سرح في شيرة. انا لو جيت ف بلاصتها و نتلفت نلقى روحي بعد ما فنيت عمري عليهم، مريضة وحدي في دار، لا واحد ياخو كلمة لا يردها، يمكن الا ما نشرب باكو حرابش ونرتاح.

هاني اختكم شادة فرش بحذا امي وهيا راقدة. بيت ظلمة و انا نخنتب و نفكر  en meme temps . و قعدت نفكر ف الوالدين. 

توا جيل والدينا كبر، يعني وصل للستينات ولا قربلهم. انا والديا مازالو ، و مازالو يخدمو. اما حاولت نعمل projection لروحي علي حياتهم. الواحد وقت اللي يوصل لاكا العمر، شنوة الـ bilan des desillusions اللي ينجم يعملو. ماو كانو كيفي ف نهار م النهارات، و يحبو و يحبو و بش يعملو و بش يغيرو... اش صار منو هاذاكا الكل؟ قبل و انا صغيرة كان يظهرلي انو c une evidence بش انهم يكونو والديا. او بمعني اخر انو هذاكا قدرهم، انهم اتخلقو لغاية انهم يكونو والديا. اما وقت اللي كبرت و فهمت انو حتي الوالدين ما كانوش ديما والدين، كانو كيفنا شباب و عندهم احلام و عندهم تصورات، وانو انا مجرد حادث ف حياتهم، اما ما نختصرش حياتهم، صارلي زلزال ف كياني. 
و ولالي السؤال، هل انو انا مل النجاحات متاعهم ولا م الفشل؟ 

تحب ولا تكره، الولاد حمل ثقيل تقعد تكركرو معاك حتي تكبر و تطيح. مش حكاية لهوة و فلوس برك. اما حتي تفرغ. هاو مثال، امي من كثر ما كانت mere poule تفرغتلنا انا و خويا، لا عاد عندها لشكون تمشي لا لشكون تجي بخلاف اختها. سفرة لبرا ما تسافرش علي خاطر بابا خدمتو ما تسمحش، او بالاحري هوا workaholic و ما نتذكرش نهار ف حياتو خذا عطلة بخلاف العطل الرسمية. هاو تلاثة وتلاثين سنا خدمة وماهوش بش يبطل غدوة ربي يطول في عمرو. 
هل انو كانت امي la jeune fille branchee بنت الليسي كارنو متع جيل السبعينات وما ادراك، تتخيل انو نهار اخر، حياتها تنحصر في زوز ولاد و راجل شبه غايب؟ 

الشي هاذا اثر عليا بطريقة عكسية. وليت مانمنش انو حياة المرا راجل و صغار. باللي قالولي سنة الحياة و ما نعرفش شنوة، بديت نلوج اش نوة تنجم تكون غايتي في الدنيا؟ الخدمة؟ الطموح العلمي؟ التطوع في  اعمال خيرية؟ نلم برشة فلوس؟ نخلد اسمي في حاجة؟

 ما نعرفش... و هاني مزلت نلوج.... 
اما يا خوفي نهار م النهارات نبدا راقدة مريضة في فرش و بنتي تكتب في بوست كيما هذا! 

كتبتها:bent 3ayla على الساعة: 9:04 م

تعليق غير معرف ...

je t ai dis je suis le premier encore une fois
wallahi j aime bien tes textes
occupes bien de ta mere et bonne nuit

10 يناير 2009 في 11:16 م

تعليق bent 3ayla ...

merci, c tres gentil de suivre de pres mes sautes d'humeur.

w enti 3leh samedi soir online???

10 يناير 2009 في 11:22 م

تعليق غير معرف ...

bared el barra, s7abi sont encore en vaccances mte3 noel mazelou majewech ey en plus je n aime pas les bars et ces trucs.
3ad je me suis dis aumoins je lis quelques posts sur tn blogs.
mais tu sais j etais tres content de voir que tu as ecris un post aumoins je trouve kelke chose a lire.
je m enuie, stp continues comme ca et merci

10 يناير 2009 في 11:29 م

تعليق غير معرف ...

post 7low kif el3ada :)
enchalla rabbi yfadhellek elwalda w ykabberna fi ta3tou

10 يناير 2009 في 11:29 م

تعليق bent 3ayla ...

غير معرف: علاه انتي وينك؟ كان في غربة ربي معاك
اما بالله اعملو ايميل الواحد ينجم يبعث للغير معرفين عليه. مانجم نجاوب كان هنا.. c frustrant

سي فؤاد، امين امين امين

10 يناير 2009 في 11:36 م

تعليق غير معرف ...

غير معرف: علاه انتي وينك؟ كان في غربة ربي معاك
اما بالله اعملو ايميل الواحد ينجم يبعث للغير معرفين عليه. مانجم نجاوب كان هنا.. c frustrant

wallahi quand je rentre en tunisie je sens que je suis fel ghorba
g plus de 5 emails mais je veux rester anonyme
miselech mahou?

10 يناير 2009 في 11:40 م

تعليق bent 3ayla ...

على راحتك بالطبيعة. اما تنجم كان تحب، تعمل ايميل خاص بالمدونات. يعني تحل واحد اختارو اسم لا علاقة بشخصك و تقعد انونيم و ف نفس الوقت اللي حاشتو بيك يلقاك :))
هذا مجرد اقتراح. و اللي انتي ترتاحلو يوفا الحديث:))

10 يناير 2009 في 11:43 م

تعليق resiros ...

والله قداش تغرمت بالبلوغ متاعك ، قداش تابعتو و قداش ضحكت وانا نقرا فيه، أما هل بوست أزين واحد كتبتو.
آش بش انقلك.. ربي يخليك لوالديك

10 يناير 2009 في 11:45 م

تعليق غير معرف ...

Vous avez un style unique est très attractif !!
En attendant d'autres posts je souhaite un prompt rétablissement pour ta mère!

10 يناير 2009 في 11:52 م

تعليق bent 3ayla ...

resiros ما غير ما نرمي ورود، اما انا اللي نشكركم عل الكللام الحلو.. نحس اللي مانيش نحكي و جناحي يرد عليا...

الدينا صعيبة ع الناس الكل، و يقلك هموم مفرقة و حيوط مدرقة.. الواحد مافيها باس كي يعمل ضحكة... اما ماصاب الدنيا كيما البلوغ!

10 يناير 2009 في 11:54 م

تعليق tamtouma ...

èna 9ayadni parmi tes fans! nji dima na9ra na3mel copie parfois w nafsa3 lol

vraiment tiik essa7a ben 3ayla!! beau texte comme toujours!
ça m'a énormément touché
bonnes continuations

mach'houra rak houni:
http://ta7t-essour.forumchti.com/blablabla-f2/un-chef-d-oeuvre-une-blague-mais-surtout-une-verite-t1145.htm#21969

11 يناير 2009 في 1:13 ص

تعليق kmr ...

encore une fois: bravo

nchallah nekteb un post sur mon blog en réponse a celui ci, c'est du loin ton texte qui m'a le plus touché

bonne continuation

11 يناير 2009 في 2:28 م

تعليق bent 3ayla ...

kmr, vivement ce post. je vois ke ca fait un bail ke t'as rien poste sur ton blog...

tamtouma, comme j'adore ton nickname! (je peux avoir la ptite histoire ki va avec??)
merci pour avoir mis le lien. ca m'a cidere! je t'assure ke kan j'ai pris la peine de poster pele mele mes posts, je pensais pas avoir tant de commentaires positifs. essaies toi meme un peu pour voir... w kammil samih, bent 3ayla w nos ;p
:))))) 

11 يناير 2009 في 3:14 م

تعليق غير معرف ...

Excellent post Bent 3ayla,
Marrant et profond à la fois, J'ADORE!!
On dit que "Les enfants commencent par aimer leurs parents. En grandissant, ils les jugent,quelquefois ils leur pardonnent".
en lisant, tu m'as donné envie d'appeler ma mère, elle est un peu loin ces jours ce qui fait que j'ai dû être à sa place pour s'occuper de mon père et mon frère, je m'aperçois donc à quel point c'est DUR d'être une mère!! Moi qui passait la matinée sur Internet, je ne trouve plus le temps bech nhezz yeddi lrassi!! ma bin koujina w ménage et beaucoup d'autres tâches interminables!!
Rod bélek je ne suis pas une fille gâtée, "I used to help her" ama kont na3melha bmziyya et parfois je critique ..Mais là je devrais dire que J'ai beaucoup de remords !!
Un grand Merci bent 3ayla, 7attit yeddek 3al jar7!!
P.s: Mets-moi aussi sur la liste des fans, je reviendrai inchallah par ici souvent !!

11 يناير 2009 في 3:56 م

تعليق tamtouma ...

bent 3ayla يقول...

tamtouma, comme j'adore ton nickname! (je peux avoir la ptite histoire ki va avec??)
merci pour avoir mis le lien. ca m'a cidere! je t'assure ke kan j'ai pris la peine de poster pele mele mes posts, je pensais pas avoir tant de commentaires positifs. essaies toi meme un peu pour voir... w kammil samih, bent 3ayla w nos ;p
:)))))

===
pas mal "bent 3ayla w noss" ça me tente tu sais? ! :p
Merci d'avoir répliquer .. surtout fais nous part toujours de ton beau talant . Moi en tt cas je te kife . ken jit tfol w asmar w 3inaya k7ol rani hrabt bik 3la 7san :))))
aya lilla sbèdrik el 9am9oum w ija ba7dhéna nafr7ou bik rahou.
au plaisir de te lire encore 1 fois.
:)

11 يناير 2009 في 8:13 م

تعليق غير معرف ...

salut
tu devrais scenariser tes posts ou demander à qqun de le faire ils feraient de très bons sketch et nous debarrasserais de tous les trucs affligeants qu'on voit à la télé (Tunisienne
Merci

12 يناير 2009 في 9:28 ص

تعليق femme au foyer ...

waja3etli 9albi w 5allitni nfakar fi barcha 7ajet w nraja3 rou7i fi les choix elli 3malt'hom w mezelt ma 3malet'homch :-(

12 يناير 2009 في 10:23 ص

تعليق غير معرف ...

بوست ممتاز كالعادة، لسانك ياسر حلو ، و زيد متمكنة برشة من اللهجة التونسية وأسرارها عكسي أنا,الحسيلو يا سعد إلي بش ياخذك

غير معرف 1: تقولش علينا خوات حتى أنا نحس بروحي متغرب في تونس ، ما نحكيش عادة البرة ...

12 يناير 2009 في 8:07 م

تعليق Haykel AZAK ...

El hassilou ce qui est sure, enti khalda 3andna..w traket esmek fi adhHenna a 3oukoulna...Bent 3ayla mashallah alik

14 يناير 2009 في 9:08 ص