على اول ما حليت البلوغ، برشا مدونين سابقين حذروني من لغة "الحوار" اللي قاعدة تنتشر بين المدونين و القراء التوانسة... انا قلتلهم يا جماعة صليو ع النبي، ياخي المدونة ماهي الاّ صفحة خاصة نحط فيها راي، نحط فيها تصاوري، خطاب سياسي، بيشة و فرهود، انا حرة. و اللي ما يعجبوش يعمل كيما نعمل انا، يا يرمي كليمة رصينة يا امّا -اذا الحالة مستعصية برشا يعني عوج يزوك منو البقر- فما اختراع هايل اهوكا مربع احمر فيه قاطع و مقطوع، سكر العزا و خلي التركة غادي.

ما نجمش نفهم انسان تجي تحكيلو شرق يجبدك غرب. تقلو يا ولدي عنا مشكلة ف المجتمع يقلك المشكلة ف مخك الخامج يا اللي بيك يا اللي عليك. تقلو ميسالش كان الواحد يحط روحو ف بلاصة الاخر و ما ينقادش ف حوار عنف متبادل، يقلك والله طحت من عيني برا اتلها بحكاياتك الفارغة ولاّ برا اغسل الصابون فرد مرة. برا عاد خللي م اللي لا نهار كلمتو لا خليتلو تعليق لا قريتلو حرف اصلا. يعني حتي وجودو تجهلو، يجي يقلك راني بش نعمللك و بش نقدلك و بش نحطمك!

بربي اش خليتو لجماعة الراي الواحد و الحزب الواحد و الكلنا على فرد كلمة؟ ع الاقل هاذوكم يتعاركو ويكمبصو علي حاجة تسوى، علي كرسي، علي فلوس، علي منصب... و انتوما؟؟ اش ضرك كي نحكي علي حاجة ماتهمكش و ماهيش من اولوياتك؟ اش قلقك كي راي مناقض تماما لرايك؟

فهموني، بالله قولولي، ياخي فما شكون قاعد يخلص معايا ف فاتورة الانترنيت ولا مصحح كمبيالات ف بلاصتي ع الارديناتور ولا شكون قاللهم اللي انا حالتها جريدة انلاين؟ يا ولاد الحلال، راهو محلي، بلاصة خاصة، نحط فيها تصويرة بقرة وراس علوش انا حرة! نقول اللي القرد هو منحدر م الانسان، انا حرة... ناقشلي افكاري، ادحض الحجة بالحجة، فند اقوالي، بالله احلى علي قلبي م العسل و من تعاليق الشكر. لكن اش مدخلك في شخصي، و اش بيك تحب تملي عليا اش نكتب؟ ياخي برنامج ما يطلبه المدونون؟

اليوم 29 جانفي، يعني حتي شهر ع التدوين مزلت ما غلقتوش... انا نحيي المدونين اللي عندهم اعوام. بصراحة ربي يقويكم و يشدلكم ف صحتكم، التدوين يحبلو راس من نحاس، نضال و جهاد للنفس بش ما تنزلش بروحك لمستويات حوار الشارع و تناقض مبادئك... ايا سيدي، البلوغ و مانيش مسكرتو، و حكاياتي الفارغة و شادة فيها، و افكاري و بش نحكيها بكل حرية و اللي عندو ريح....

كتبتها:bent 3ayla على الساعة: 10:06 ص

تعليق غير معرف ...

yaaaa! chkoun narvzelna bent 3ayla la3ziza?!!
ils sont pas possible, il y a vrmt des tarés qui circulent sur le net
t'as qu'a just les ignorer

29 يناير 2009 في 11:09 ص

تعليق bent 3ayla ...

يعيشك يا امونة و هذاكا اش بش نعمل، بعد التدوينة هاذي اختك عزوزة ما يهمها قرص... الدم البارد و الوذن الطرشا..

ركز ف قرايتك يا وخيتي، و انشالله هاذيكا خاتمة الاحزان.

29 يناير 2009 في 11:11 ص

تعليق cactussa ...

wasa3 belik wtafi lkazi lkol !!! t'es bien parmis nous sur tnblogs ,ken bkolna bech nijbdou rwe7na mabichyab9aw ken lmastin ilastin !!!

29 يناير 2009 في 11:31 ص

تعليق WALLADA ...

الّي يحبّ الورد يتحمّل شوكه
البلوغسفار صورة مصغّرة على المجتمع التونسي فمّة الّي يعطيك وذنه و يفهم و يناقش بالعقل و المنطق و فمّة الّي ينحب على فراق غزالي موش لاهي بيك جملة و فمّة الّي لا طاحت لا دزّوها يدخل فيك فركة و عود حطب .
شدّ صحيح و ما ترخّش و خاصّة ما تهبطش على مستواك الّي تعرفت بيه الفايدة موش في كثافة النّشر و طول النّصوص بقدر ماهي في جرأة المواضيع و طرافتها
أيا برّة ربّي معاك

29 يناير 2009 في 11:38 ص

تعليق Legend Of The Fall ...

ايييييييييييييه يا ما عانيت و انعاني منهم يا بنت عايلا. عندي توّا سنوات في تن-بلوغز. مناها من المناضلين و من اول من حضر في ميت أب و من اول من دوّن و كتب. كل يوم انقول هذا النهار اللاخر و من بعد انقول: لا. والله لاما انكمل و انكتب و انقول اللي انا انحب انقولوا و اللي هوما مايحبوش يسمعوه واللي عينوا يناقشني على افكاري مش يسبني و يسب اصلي. المهم يا بنت عايلا، ننصحك باش ما اتفدش و ما اتسيّبش...واصلي و ثابري إن الله مع الثابرين

29 يناير 2009 في 12:06 م

تعليق 3amrouch ...

ديانا مجلة
ايييييييه نتذكر نتذكر اش كنت عامل فيك
لحقيقة انت كنت زادة تشري في الشبوك بحكايات فارغة وتستفز
مبعد تحسنت افكارك ولا عندك نضج وطريقة تحليل ممكن نختكف فيها معاك لكنها محترمة
فازة هشام رحمه الله ساندتك وعطيتك الحق اهوكة نفحو بيه شوية وسكتوا
وزيد من نهارت الي اكتشفت انو عندنا (انت وانا) حادثة مشتركة رخيت قبضتي عليك ههه

29 يناير 2009 في 12:35 م

تعليق 3amrouch ...

ديانا مجلة
تتذكر وقتلي طلبو منك تجي لميت اب؟ باش يعطيوك طريحة هههه
انت تتسمى سلكتها بنت عيلة

29 يناير 2009 في 12:41 م

تعليق abu arabi ...

عندك مليون حق فى اللى كتبتو...ومانتوقعشى ثمة اشكون ما يوافقشى عليه...بوستاتك متنوعة وحتى اذا حما فيها الجدال ساعة ساعة ما يوصلشى باش ينهار للمستنقع...اما اذا انتى تشوف فى حوار الطرشان فى مدونات اخرين...هاذيكا حالات خاصة فى مدونات خاصة...هاذيكه مدونات من اول ما حلت هدفها معروف وبوستاتها يمشيو فى اتجاه واحد من اجل غرض واحد وسلاحهم فى ذلك اسلحة الدمار الشامل اللغوية ولذلك ما تستغربشى كيف واحد يواجه حملة الرصاص المسكوب من عندهم بكعبات هاون وللا اربى جى...هاكى اللوغة اللى يفهموها...حدث القوم بما يفهمون...اما اللى يحل مدونة على روحو ويعمل فيها حاجة قابلة للنقاش والنية متاعو هى الحوار مانتوقعشى انو يلقى مشكلة حتى ولو يدافع على الشيطان...ملخص لحكاية انو اللى فاتح بلوغ للحوار معروف واللى فاتح جبهة للقذف والقصف كيف كيف معروف...هاذاك يتسمى مقاتل والمقاتل ما ينتظرشى ان لعباد باش يكتفوا يديهم...مع تحياتى

29 يناير 2009 في 12:54 م

تعليق Unknown ...

يقلك كان سكاتك خير من كلامك، سكر فمك! هاذا مثل شعبي نتصوّر أنو ينتطبق حتى مع البلوقوسفار.

و ها الجماعة إلي يدّعيُو معرفة أداب الحوار، عندهم كان رميان الكلام و المعنى من غير تحمل مسؤوليتو، التهرب من الأجابة على التسائلات، السطحية و قلة الموضوعية، السفسطة و التلوعيب في الحديث (التزلبيط كيما يقولو)

لكن عندهم فن المسكنة، والبكاء، و لعب لعبة الضحية.

أقعدو أحكيو للحيوط، و أنبحو كالكلاب في بلوقاتكم. خاطركم أحرار، و عندكم الحق تقولو شتحبو!

29 يناير 2009 في 1:40 م

تعليق غير معرف ...

Salut Bent Ayla,
eh bien, bienvenue dans l'arrière chambre de la blogosphère ce que tu viens de décrire n'est qu'un petit aperçus,
t'a pas fait l'expérience des meet up, des faux semblants , des clans qui se font et se défont, des plans dragues douteux, des frustrés qui te balancent leur aigritudes. De l'anonymat une fois revendiqué une fois facilement remplacé par l'exhibitionnisme. La nuance manque de plus en plus , le confiance fait défaut dans les débat, la culpabilisation et la ridiculisation de l'autre priment malheureusement, et ce n'est qu'un aperçu des complexes de notre société. Cela dis il reste quelques personnes vraiment profondes avec un réel point de vue et une sincérité rassurant .Alors continue à écrire et à t'exprimer c'est la meilleur réponse que tu peux leur donner .

29 يناير 2009 في 1:54 م

تعليق resiros ...

bon, le7keya mahiech ma7soura bel blogosphére tunisienne, win matdour fel internet tal9 el commentaire el debile, tkounchi moudawna walla el new york times.
amma hawka, ki la3bed anonyme, tothher 3la 79i9etha.
el 7al el we7ed ytaffi elli maye3jbouch, hawka 3andou 7orriet el ta3bir wou 3andek 7orriet el tatfia

29 يناير 2009 في 2:24 م

تعليق Unknown ...

يعني نحب نقلك يا بنت عايلة، أنا راهو ما ناقشتكش في مدونتك. ناقشتك في مدونة ما هيش متاعك، و نا قشتك على تعليق متاعك، إلي إنت حطّيتو و من بعد بديت تتهرب من التسائلات، و حبيت تبدل الموضوع.

المشكلة أنو صاحب المدونة إلي صار فيها التبادل مابيناتنا ما تشكّاش. لكن إنت هربت لمدونتك و تشكّيت في البوست هذا، و كأنو فما شكون تهجّم عليك في المدونة متاعك. يعني لعب متاع فروخ.

هانو باش لعباد تعرف حقيقة المدونين زادة. هذا كان خليت التعليق بالطبيعة.

29 يناير 2009 في 2:43 م

تعليق femme au foyer ...

bent 3ayla ena 9rit eta3li9 elli 9al9ek w 5allek tekteb hal post w ena bjoudi tfeje2t w ma 3raftech 3leh si kecem yejbed fik w yhaddad fik ama rahou si el moudawwen hetha dima yhez mel 5abiya w y7ot fil jebiya w yhez w yosbot ma3neha bel 3arbi ma te5ouch 3lih w rabbi yfarraj (-;

29 يناير 2009 في 3:16 م

تعليق غير معرف ...

Ya bent 3ayla ykoun menek le39al!!
5alli y9oulou wech yhimm...

Bent 3ayla c'est un pseudo qui representre une fenêtre à partir de laquelle tu laisse passer ce que tu veux de toi même: la vraie toi.
donc en principe "dhatek le3ziza" 7add ma ye9der ymesshalek, non? 7atta ki wa7ed bech y9oul 7aaja "kida walla kida" tu peux te dire qu'il s'attaque à la fenêtre qui laisse passer tes rayons ya bent 3ayla ya chams leblogsphère.

Donc kima 9atlek ammouna "t'as qu'à just les ignorer"

Peace.
Minzo

29 يناير 2009 في 3:22 م

تعليق bent 3ayla ...

ايا سيدي، انا نطلب السماح علي خاطر c t un coup de gueule

هاني عملت شبعة شكلاطة الدنيا ولات وردية ف عينيا. و اللي يحب يعارك مرحبا بيه. نشكركم علي الدعم المعنوي و خاصة كي حكيتولي التجارب القاسية متاعكم. و بالتالي اللي يشوف مصيبة غيرو تهون عليه مصيبتو.

كليمة وحيدة لسي سفيان، يا ولدي نبكي و نشكي علاه؟ اللي يتعدا بش نسخفو يرميلي دينار ياخي؟ لا مش منك انتي برك، اما كثر عليا الشي ها النهارين.
و بخصوص التعاليق راني ما نحي شي. و انا اللي غاظني اني قتلك اجا نحكيوا، ايجا نتناقشو قتلي اسكت و خمم قبل.. معليناش، انتي قلت الموضوع ما يهمكش، و ما تحبش تزيد تحكي فيه، انتي حر.

سي منزو كيف كيف، الاختلاف لا يفسد للود قضية.نشكرك ع الكلام اللي يهز المورال.

ايا سيدي عندي طبلية شكلاطة مزالت، شكون يقسم؟

29 يناير 2009 في 3:39 م

تعليق Unknown ...

لا يا بنت عايلة، إنت رميت كلمة و حصلت فيها. و من بعد بديت تتزلبط، و حبيت تخرج تمشي بيا لمواضيع أخرى ما عندها حتى علاقة بالتعليق متاعك، و بالبوست إلي طرحتّو المدونة. و ما فيها بأس، كي تتعلم تخمم قبل ما تتكلم، و تتحمل مسؤولية كلامك، حتى في المدونات.

و ربي يصبرك على كل حال، ما كنتش نعرف إلي إنت تقاسي للدرجة هاذي.

29 يناير 2009 في 4:20 م

تعليق Legend Of The Fall ...

اي يا عمروش، نتذكر.
صحيح...كلامي طلع صحيح على هشام الله يرحمو و ينعمو. أهاوكا انساوه و قعدو شادين في السفاسف، باش اوريّك حقيقة الناس هاذوكا و المتاجرين بالقضايا الوطنية و العربية
أما على الميت اب و الطريحة، أنا وقت اللي مامشيتش مش على خاطرني خايف، بالعكس، خلّي واحد برك يمسني و أتوا يلقاو ارواحهم في قلبو. ياخي البلاد ما فيهاش قانون؟ لكن هذاكا دليل على انهم ناس ما يقبلوش الراي الآخر و ناس متعصبة و كان توصل للسلطة في تونس نهار لما يكونو اكبر دكتاتورية...ربي يستر علينا

29 يناير 2009 في 5:34 م

تعليق MERKHI souheil ...

بنت عايلة .... ما تنرفزيش روحك ... مش باهي لصحتك

كي ما يعجبكش الكلام ديري وذن عريس ( حتى يجي العريس)

29 يناير 2009 في 6:19 م

تعليق Haykel AZAK ...

Bonsoir bent 3ayla, je vais voler quelques minutes pour poster ce com, je suis trop pris par le travail mais 3al 3echra au moins hani 3malt talla :p ..malheureusement il existe un type de lecteurs qu'ils soient nakira wala bel alif wellem dont la specialté est de faire chier les bloggeurs, genre ils connaissent tout, critiquent tous et meme quand leurs remarques sont pertinentes ils utilisent un langage mta3 ana rabbokom el a3la ..Ya bent 3ayla hedhouma lezemna nseysou alihom khater boldenhom b3ida barsha :))) hachek w hacha kadrek..bonne continuation, et puis sache que bent 3ayla rocks mouch normal

29 يناير 2009 في 8:40 م

تعليق bent 3ayla ...

pffffffff زايد، يا سي سفيان، نتوقع اللي انتي ع الاقل عندك باك، برا يهديك اعمل تحليل نص للكلمتين اللي كتبتهم انا، توا تلقا شوية سوسيولوجيا علي شوية قانون دولي علي شوية مداخل انسانية. و اعمل تحليل للي قلتو انتي توا تلقا ثلب و شتم و رفض للخوض ف نقاش. و يهديك، كان بش تعاود ترجع لهنا بش تحكي معايا ف ها الموضوع، وفر جهدك، على خاطر انفخ في واد غير ذي زرع، اهاوكا الايميل، هاو التشات كان تحب نتناقشو للصباح، اما مفهوم طحت من عيني و ملحدة و خمم قبل ما تحكي ببهامة، من فضلك، لطفا، رجاء، ترفع عليه، ماهوش متاعنا يا سيدي.
bent.3ayla@yahoo.fr

سي خرنان، اش نية وذن عريس هاذي؟

سي زميل الطفولة، وينك ها الغيبة؟ و الله اليوم برك بش نبعثلك ايميل و نقلك وينك.. هاني موسعة بالي.

29 يناير 2009 في 10:05 م

تعليق Haykel AZAK ...

mon abscence est due au travail qui me fait negliger ma vie sociale! zah mes deux blogs tla3 fihom laHchich wel a3sheb toufayleyya!! hammaltou zahh!! Ti hatta Consomotor wallit nebki ki yebda 3andi manekteb ama ma3andish wakt..esma3 ekteb houija fi consomotor mani khouk?! :p zah nahki 3al les produits w blogui entahet soulouheytou mdrrr...dis moi chfamma jdid? mazelt theb trajja3li triha? tethbet ala bit el 3alloush?? w les tartines fi jarida, w les assiettes mlakchyn mta3 el habs??? brabbi ektbenna billet 3ala kel epok :p donne de tes news...ah stanna finou bellehi kel anonyme kellli yekhdem compteur houni?? chbih rakh 3al martba loula?

29 يناير 2009 في 10:40 م

تعليق Unknown ...

هانو باش يكونلك درس على الأقل، و المرة الجاية تولي تعرف كيفاش تتدخل في البلوغات، و تعرف تخمم قبل ما تحط تعليق.

أنا نفضل بلاش باك، خير مِلي يبدى عندي شهادة بوحلوق ما تعلمنيش حتى كيفاش نعرف نتحدث، و نرد على العباد، أما نخير إني نهرب و نمشي نبكي و نولول للأخرين.

أنا توجهلتك في مدونة، لذلك يلزمك تجاوبني في نفس المدونة، مش قالو هاك الإيمايل متاعي، نندب بيه، ...

قالو أنا نحكي بالسوسيولوجية، هيا صحيت عيش بنتي.

30 يناير 2009 في 12:35 م

تعليق bent 3ayla ...

و كل اناء بما فيه ينضح

30 يناير 2009 في 12:47 م

تعليق Haykel AZAK ...

el haggar ymout fi a3mek el bihar rahou

30 يناير 2009 في 3:28 م

تعليق غير معرف ...

يا سي "سوسو" يهديك بنت عايلة ما تقصدش راهي بجاه ربي لا تتغششش عليها اختك بنت عايلة صغيرة و ما تعرفشي.
و انت للا بنت عايلة يكونلك درس و عبرة وما عادش تعاود صنعتك قالو حوار و ما حوار الريق هذايا ما يتصرفش عندنا.

خويا سوسو "عجبني" الحماس متاعك و اللهجة الي تتكلم بيها و انت داخلها "فركة و عود حطب" و"الي فيها ما يفريها" تقولش عزوزة و شدت سارق, ايا برا سيدي نقولو الي هي غلطت و ما تعرفش الي هي تتعامل مع واحد "دمدوم" و "يفهملها" كيف سيادتك تي ما هو يكون منك العقل لازم "تفهمها قدرها" ? ماهو كيما يقولو"الي يغلب يعف".

"أنا نفضل بلاش باك، خير مِلي يبدى عندي شهادة بوحلوق ما
تعلمنيش حتى كيفاش نعرف نتحدث، و نرد على العباد"
انا نحب نشكرك لانك علمتنا كيفاش نردو على الناس بطريقة حضارية و في كنف المودة و الاحترام المتبادل..

العروي مرة قال لمستمع ما يحبش حكاياتو "بيني و بينك "بطنة" معناه "BOUTON" والقورة قالوا :
Les chiens aboient...la caravane passe
والفهـــيـــم يــفـــهـــم.

"الحقار يمووت فى اعماق البحار" ;) حلوة منك شكون قالها المتنبي ?

30 يناير 2009 في 8:12 م

تعليق bent 3ayla ...

هههه، متنبي الضاحية الجنوبية... حلوة منك
سي امين، اخطاك يا خويا.
انا حلفت يمين اللي ما عادش نرد عليه.

30 يناير 2009 في 9:00 م

تعليق Unknown ...

يا سي أمين المرة الجاية حاول تجي بكري شوية، من الأول يعني باش تفهم الهدرة، و ما تدخلش و تبدا تهز و تنفض، و تخلوض.

أختك بنت عائلة قالت إلي هي تفهم في
القانون، لذلك نتصور إلي ما حاجتهاش بخفّاص يحامي عليها.

لكن إلي بهّتني هو أنو عجبها التخفيص متاعك، هانو باش نزيد نفهم مدى معرفتها و حذاقتها، تبرك الله عليك و عليها.

31 يناير 2009 في 4:23 م

تعليق غير معرف ...

عندك الحق بنت عايلة ماشاء الله عليها تفهم مش كان في القانون برك تفهم في كل شئ و ما تستحقش شكون يدافع عليها على خاطرها حاذقة و بنت امها.

اما اش تحب تعمل انا حاشاك و حاشا قدرك مريض بهزان القفة كيف ما قال "قصة اون لاين" انسان حاط خيشة على وجهو.
و كانك على "التـخـفـيـص" و نتصورك تقصد "الـتـغـفـيـص" هاني قاعد ناخذ في دروس محاماة بالمراسلة باش نحسن مستوايا وانقص "مالتخفيص" وان شاء عن قريب نولي"باش محامي اد الدنيا".

"لكن إلي بهّتني هو أنو عجبها التخفيص متاعك" جيناهاشي هاك قلتها بفمك :
"انا راضي و هي راضية مالك انت و مالنا يا قاضي ?"

ايا سايس روحك و في وديعة ربي :)

31 يناير 2009 في 9:02 م

تعليق Unknown ...

شمدخلني؟ كان ما جبدتنيش راني ما تدخلتش، المرة الجاية دافع على و خيّتك كيما يضهرلك، بالقانون و إلا بالفلاقي كيما تحب، أما من خير ما تجبدني.

31 يناير 2009 في 9:10 م

تعليق غير معرف ...

سفيان ديمه يعمل في العرك
في المدونات الكل
لسانو سليط موش في دقة التحاليل و عمقها .. اما في : ياللي بيك ياللي عليك
يموت على الشكوى و فيسع ما يتبلنجا على كرسي الضحية
راجع روحك يا سفيان .. نشاله راك ماكش شوكاع و عدواني الطباع هكه في الدنيا
:)

31 يناير 2009 في 9:32 م

تعليق Unknown ...

إشنوة ياخي أختكم بنت عايلة خدمت مفتش كعبورة يتبع فيا في المدونات و يعس عليّا كيش نتحدث. هاذاكا علاش حتى هو غير معرف، بوليسي سيفيل. زيد إشريلو رايبان متاع ليبيا يا بنت عايلة باش تولي عندو شوية وهرة.

31 يناير 2009 في 9:41 م

تعليق غير معرف ...

ماني قتلك راك تزرب تتبلنجا من غير تفكير
ياخي اللي يعلّق و الا يعمل مدوّنه .. ماي الناس الكل اتّبـّعو .. و الناس الكل تشوفو كيفاش يحكي .. هل معنى هاذا اللي الناس الكل بوليسيّة ؟؟؟؟؟؟
أرزن شويّه
انا راني ما عنديش بيك غاية و الا عداوة شخصية .. اما مجرد ملاحظة و برّه

1 فبراير 2009 في 1:53 م

تعليق bent 3ayla ...

خويا غير معرف، فك عليك اخطاك. اربح راحة بالك و اعمل جو خير. الحديث مع اللي ما يفهمكش ينقص م الاعمار. و نحنا دنيتنا صعيبة بطبيعتها، لواه النكد حتي ع الانترنيت؟

1 فبراير 2009 في 1:58 م

تعليق غير معرف ...

moi ausi je suis nouveau dans la blogosphere.
J'ai parcouru un peu ce qui se faisait a droite et a gauche et je trouve que blogguer est un bon exercice de liberté d'expression.
Il est clair qu'on ne peut pas toujours plaire a tout le monde et l'exercice consiste aussi à apprendre a reagir avec ceux qui ne comprennent pas qu'on puisse avoir des avis différents
:-)

1 فبراير 2009 في 2:42 م

تعليق غير معرف ...

بنت عايلة

شكرا

1 فبراير 2009 في 3:42 م

تعليق Unknown ...

Ce qui s'est passe entre moi et BintAyla, est entre moi et BintAyla

Alors arretez SVP avec vos lecons a 2 centimes, et les discours du marche au puce, sur le droit d'avoir un avis different. Parce que vous n'avez aucun avis

1 فبراير 2009 في 4:00 م