راني عارفة بش نحل علي روحي باب بلا متع تعاليق و فتاوى، اما حبيت نشرّكم في فرحتي باني لقيت الحل اللي يرضى جميع الاطراف علمانيين و اصوليين و حتي ملحدين. الحاسيلو م الاخر، اختكم بنت عايلة اليوم ربي هداها و قررت بش تلبس! لا مش الحوايج، هاذاكا تحصيل حاصل، مزلت ما دخلتش لمنوبة -ولو انو علي قريب- اما قررت يا اخي بش نكمل نصف ديني و نلبس الحجاب.

صحوة الضمير و الوازع الديني هاذي ما جاتش بعد قراءة كتاب ولا الاستماع الي عمرو خالد ولا شي... ماو ديما ف ها الخطابات تنجم تلقى فكرة مضادة للحجج اللي يقدمو فيها الجماعة. اما جاءت ولله الحمد بعد ما تصادف انو تعرفت انا و شلة من اصدقائي علي انسان متحضر، متخلق، متدين، يحضر في الدكتوراه متاعو في حاجة اسمها صعيب، لا شديتو، لا فهمتو اصلا خليقة ولا صنيعة.

ايا سيدي تلمينا في قهوة و من هدرة لهدرة تحل موضوع الساعة و هو التوانسة و التدين. بدينا هذا مع و هذا ضد، واللي عندو حجة يجبدها، يا قران، يا سنة يا طالبي يا محمد عبده، يا الفة يوسف، يا الكواكبي، تي حتي من ابن رشد و البخاري و نيتشة و اتباعو حيرناهم في قبوراتهم و بربشناهم. مانيش بش نحكيلكم الحجج النظرية و الفلسفية و الكلامية اللي تحكات، على خاطركم تعرفو الكثير منها، و اللي ما يعرفش، فرصة بش يهبط للسنترفيل و ينفستي في كتاب (اهواكا نحب نخدم دور النشر لعلا نحولو دونهم ودون الافلاس المحقق).

اما بش نقلكم عل الحجة اللي مستلي وجداني م الداخل و خلاتني نراجع المواقف اللي كنت نستبسل ف الدفاع عنها. ماو الواحد باهي كي يبدا عندو مواقف، اما باهي زادة كي ساعة ساعة يعمللها revision moteur علي خاطر وقيل انو البهيم برك -حاشاكم- هوا اللي يكبش مايسيب. عاد سي الدكتور مع وقف التنفيذ، سمعنا زكرنا و طبلنا و من بعد قاللنا، انا مع الحجاب، و خلينا نحكيو برجولية و ما غير تبرقيش ف الفارغ و نرفعو برشا من مستوى الحوار زعمة زعمة.

قالك يا سيدي بالحرف الواحد، هوا مع الحجاب علي خاطر النسا السافرات وسيلة من وسائل التعذيب و المساس بحقوق الانسان، ولا هيا الرجل! قداه منو الواحد يغزر بعينو و العين زانية و الشي قدام عينيه و بعيد علي يديه! ماو العرس صعب، الواحد قبل كان يحافظ علي روحو بالعرس و الوازع الديني، اما توا العرس وينك ولّا produit de luxe اشكونو اللي يخلط عليه وحتي اللي يسمح لروحو بالعلاقات غير الشرعية ما "يتهناش" فيها، يبدا خايف لا يشوفوه ولا الجيران يشكيو لفرقة الاخلاق الحميدة. ولذلك فان النسا لازم يلبسو الحجاب بش يخففو عليهم شوية..

ماو اختكم قلبها رهيف، كي سمعت ها الماساة و الالم و المعاناة الكلها، قول انبوبة تحلت في دهاليز مخي و خرجتني م الجاهلية للنور. قلت يا اخي حتي كان مش من باب الايمان، ع الاقل من باب الانسانية. روحت و دمعتي علي خدي، مشيت اساعة للمكتبة متاعي -ايه عندي كتب! شوف يا سيدي، المرا اللي بلاصتها تغسل الماعون و فركة صابون عندها كتب! سبحان الخالق في خلقو- و بديت نلم فيهم خوه علي بوه، الكتب متع الحداثة و الفسق الكل لميتهم يا طاهر حداد، يا محمد الطالبي يا محمد الشرفي، يا كانت يا ابن رشد يا الغزالي، الخ الخ الخ ما خليت حتي شي. م الاول قلت نهز نحرقهم، و مبعد قلت لا نهزهم للحماص ع الاقل ندبر منهم حويجة و اهوكا retour sur investissement خير من بلاش و نزيد بسومهم نشري طرف قماش، ماو قادمة علي زهاز كامل عاد.

ايا سيدي و انا ماشية للحماص، ف الوقت بدل الضائع الشيطان يلعنو و يخزيه وسوسلي... اما كي تجي تشوف، كلامو معقول. قالي توا اش عملنا و جا مليح؟
النسا بش تتغطى درءا للمفاسد و اتقاءا من المعاصي و الشبهات، هاذي حاجة هايلة ياسر، اهوكا الشباب متاعنا ما عاد يلقى ما يشغبو لا يقهرو، و جماعة الدعاة اللي كثرو ها النهارين، ينجمو يتلهاو بحاجة اخري فيها منفعة للناس بعد ما بلّغو و ضمنولنا الجنة. امّا.......
و استناوني قبل ما نقلكم الـامّا شنية، بالله تبعوني للاخر، يمكن م الاول تظهرلكم خور اما انا متاكدة اللي هيا ما هيش ابهم فكرة في تاريخ الانسانية. وسعو بالكم وكملو البوست للاخر، و ماغير ما تهبطو تطسككو بالضحك و ما غير ما تحل عروقك بموس، اليوم سبت والاستعجالي معبي، لا فايدة.

ايه عاد قلتلكم، اذا كان هاذا السبب و العلة اللي علي خاطرها بش نغطيو النسا، و هو اخفاء جهامتهم حتي لا تنصرف الانفس الي الشهوة، ف رانا ما عملنا شي! خدمنا نص الخدمة! كيفاش؟ تبعني يرحم بوك...

الرجال ماعادش عندهم ما يغريهم، شكارة كحلا متعدية، لا تعرف اش فيها لا منظرها، حلو،حلو ياسر... اما..... (و الله لتوا مترددة) اما و النسا؟؟ معناها النسا بش تغزر للرجال السافرين... و النفس امارة بالسوء! ماو كيما حمينا الرجال من ها الفتنة ، لازم نحميو النسا من فتنة الرجال، والا بش تتقلب الاية و تولي ترا النسا خالطة تجري ورا الرجال اللي ولا عندهم sex appeal مضاعف بحكم الكبت...

توا بالله راجل لابس شورت ولا سدور عريان يحوس بين النسا، ما هوش فتنة؟ ماهمش زادا مسيكنات بش قلوبهم تتشوشط زادة؟ و حتي هوما العرس ما عادش خالطين عليه... خللي عاد م العلاقات غير المشروعة، كان الرجال توحوح ماهيش متهنية فيها، و خايفة علي سمعتها، فما بالك بالنسا؟؟

و ماغير ما تقولولي الراجل مافيه ما يغري المرا، لا يا سيدي يغري، امالا علاه نهار كامل و انتوما تلصقو ف شعوراتكم بالجال و البرفان يفحفح؟؟ لشكون؟ لبعضكم؟ و نزيدكم زيادة، كي تحلو اكا الفلستين متع السورية بش توريونا الغابات الامازونية اللي تربيو فيها علي سدركم، راهو عندو نفس تاثير الديكولتي علي الراجل. و لذا، انا اطالب من منطلق الدفاع علي الاخلاق الحميدة و درءا للشبهة و الوقوع في المحضور بش انو الرجال ما تلبس كان للكعبة و تغطي سدرها، وتغطي شعرها (هاذي مش على حاجة اما بش نرحمكم من تلبيز الجال) و خاصة خاصة فرض النقاب!

ايييه سيدي، المرا يمكن الحجاب برك يكفيها، علي خاطر وجها فيه عينين و فم وخشم، اما الراجل يا سيدي تلقاه عندو لحية ولا شارب، يعني مظهر صارخ من مظاهر الرجولة، يعني فتنة. و مهما بش تحجمو كل يوم، لعلا نهار تبدا شعرة هاربة ولا شلغومة مازالت كي طلعت؟ لذلك، انا اطالب و اشدد و اؤكد علي لزوم فرض النقاب علي الرجال حتي مع غياب حكم شرعي من باب الاحتياط.

خلاصة القول، بالله اللي عندو حجج نقلية ولا عقلية ولا كلامية ولا فلسفية ، تي برا حتي كروية، يحكيها، اما اللي بش يجبدلي ها الخنار، راني بش نقترح عليه انو يبدا معايا يجرب ها الاقتراح. ايا انستو ، عندي فركة صابون تستنا فيا.

كتبتها:bent 3ayla على الساعة: 2:03 م

تعليق kmr ...

hmmm... lè éna g une autre suggestion: mahou nghattiw ennsè bech ma ywalliwech fetna bin errjel, w errjel... euh... on pourrait rendre aveugle toutes les femmes!! comme ca elles ne verront ni la foret amazonienne ni les moustache stallinienne, ni les muscles taysonnienne!!! (na3ref majet chay, ama juste lil dharoura ache3reya..):p


essma3, fass5ou ilcommentaire hedha, wallah mayjinich 3jab yet3adda wa7ed mo5ou msakker min hnè, ye5edhhè bil jedd, w nsabb7ou 3la fatwa jdida "ta9dhi bi fa93i a3yon annyse2 7ifadhan 3ala charafihenn...

24 يناير، 2009 3:32 م

تعليق عياش مالمرسى ...

حلّين: يا إما النسا تشد الديار باش ما تتفتنش، و الرسول قال الّي المرا في الدار عندها أجر كبير، و إلاّ واحد ينحّي العقد و هاجس الجنس و الرجال و النسا تتفرج في بعضها و يتفتنوا و نوووورمال ..

24 يناير، 2009 3:36 م

تعليق bent 3ayla ...

شوف يا سيدي، هاو علاه النقاش بناء... والله فاتتني حكاية الفقء... عفسة هايلة. ولا بش ما يهيجوش علينا جماعة حقوق الانسان و الصليبيين، نعملولهم كي البغلة، حاجة كحلا علي عينيهم... زايد هاو تداعى الافكار ولا لوح :))

يا اخي عياش حتي ف الديار، ماو النسا تتكشف علي بعضها، و يتفتنو... نوليوش سعودية بيس و عنا مشكلة "البويات"

24 يناير، 2009 3:43 م

تعليق عاشور الناجي ...

لو كان يلقاو ها المكبوتين يا ما يخصيو الرجال الكل و يرتاحوا موش يسملولهم عينيهم ،

ناس تفكر بنصها اللوطاني ، و تعذب في رواحها و في العباد حذاهم ،

و نأكد لك الي يخمم هكه راهو عنده نقص في الرجولة و ارتخاء وقت اللازم يحاول يخبيهم بحزارته و كلامه عالحجاب

24 يناير، 2009 5:14 م

تعليق Amin ...

منعرفش علاش كيف قريت البوست تذكرت الحكاية هاذي :

يوجد معك خروف و ذئب وضمة عشب و تريد ان تعبر النهر في قارب الى الضفة المقابلة كيف تستطيع ان تعبر بهؤلاء؟
مساعدة:
أ-القارب لايتحمل اكتر من اتنين تحملهما معك
ب-لاتسطيع ان تترك الخروف والذئب معا او العشب والخاروف معا
ج-في اثناء تنقلاتك يجب ان لا يفرغ القارب (انت وشيئ واحد معك)
د- ارجو ان تعبر النهر ومن معك بامان.

انا نقترح انا نعملو كيفما في الحمام توقيت للنساء و توقيت للرجال و الا بلغة اخرى un couvre feu واحد للنساء وواحد للرجال من باب المساواة بين المرا و الراجل باش ما ينغر حد.

بالنسبة للي قالتو قمر يا ربي "كاف.ميم.نون" (كبيتو سعدو البسودو) فما حل اخر هو "المظلة الجربية" اللي كانو في جربة يستعملوها باش المرا تبدي عيناها مرشوقة فالوطا و ما تشوفش الرجال كيف تمشي اما مانضمنلكمش اللي الحل 100% على خاطرعندو بعض الاثار الجانبية كيفما زيادة نسبة حوادث الطرقات كما انو ينجم يتسبب في الام في الراس (لا مش المظلة تعمل الشقيقة ) اما احتمال انو المرا تسطع في poteau متاع ضو وهي لابسة المذكورة انفا يتضاعف بنسبة 65% الي 78% (من مصدر علمي موثوق).

24 يناير، 2009 5:46 م

تعليق kmr ...

@ amin: ce que je retiens surtout de ton commentaire: la possibilité qu'une femme portant elmdhallah ejjerbia tosdom fi poteau, c'est 78%, dans le cas d'une femme avec une vision totalmeent dégagée, la probabilité est de 65%!!! :DDD

7lowa yesser ;)


ah et encore une chose, ya weldi rahou il pseudo lahou 9mar, lahou KMN:
KKKKKKK
MMMMMMM
RRRRRRR
!!!!!!!!!!!!

w KMR dhkar! ouki!! :p

24 يناير، 2009 5:57 م

تعليق غير معرف ...

bon, ena manich khwenji amma juste un pti commentaire qui cincerne "l'égalité entre les hommes et les femmes" au niveau de séduction. Là, tu es à côté de la plaque. juste un exemple : al aflem al ibe7iyya : on peut trouver un film tourné par des femmes seulement et regardé par les hommes ou les lezb, peu importe. mais as tu vu un film gay regardé par les femmes? non vous êtes le premier produits des films porno et nous les hommes, la cibles de ctte marchandise. donc arretes une comparaison non faisable.
Ceci dit, je suis contre le trochon magique

24 يناير، 2009 6:08 م

تعليق غير معرف ...

حل باهي برشا للشذوذ الجنسي طلعت بيه يا بنت عايلة...تقضي على كل الوساوس المثلية بطريقتك:)

24 يناير، 2009 7:08 م

تعليق غير معرف ...

ولن ترضى عنك اليهود ولا النصارى حتى تتبع ملتهم

24 يناير، 2009 8:58 م

تعليق bent 3ayla ...

سي امين ذكرتني يا حاااااسرة بحكاية الباتو.. هههه
بقية الاقتراح انتي وحدك وحدك قلت فيه مخاطر ع الكراهب اللي تتعدي تزف و البوتوات الي يخلص فيهم المواطن. لذلك مازلت متمسكة بالاقتراح متاعي.

بالنسبة للاخ غير معرف اللي حكا علي المادة الاباحية الموجهة للاستهلاك، يا ولدي هاذايا ما اسموش حجة، اسمو مثال، و نزيدو نقولولك اللي هاذاكا راجع لعوامل سوسيولوجية و ثقافية كان فيها المجتمع الذكوري هوا اللي غالب. اما توا حتي النوادي المخصصة للنسا ما عندك ما تقول فيها، اهوكا الشي كي البطاطا ف بلاد العكري.

غير معرف متع اليهود و النصارى، بالله قداه من مرة بش نقعد ننبح و نقرالك الشهادة؟ يا سيدي شد عندك، لاني يهودية، لاني مسيحية لاني صليبية لاني هندوسية لا بهائية لا شيعية لا زينبية لا زيدية لا علوية لا درزية لا اسماعيلية لا حتي ملحدة. راني مسلمة، نقول اشهد ان لا الاه الاّ الله و ان محمدا رسول الله و الباقي يخصني و لو كي تجي تشوف اصلا ما عنديش علاه بش نقلك، اما بش نختصرو برشا حديث زايد و اتهامات مضحكة. و يعطيك الصحة.

ايا خويا حضر روحك للازمة المالية، الزبراط يعمل في مراجعة وبش يعطني فيزا للنشر او للتعديل.

24 يناير، 2009 9:18 م

تعليق غير معرف ...

انظروا حولكم و احسبوا في مجتمعنا و مجتمعات اخرى عربيه غيرنا كم هي النسبه العاليه للحجاب؟؟ ثم احسبوا كم هي النسبه المتدنيه للأخلاق و الاسلام الحقيقي؟
هل بالحجاب وحده ينصلح حال النساء و هل بدون الحجاب تفجر النساء ؟؟
أي فكر عقيم هذا؟؟
لقد صار الاهتمام الأكبر في زمننا الحالي بالمظهر منه أكثر من الجوهر
و صرنا مجرد بشر عنصريين ننقسم لحزبين لا ثالث لهما اما مع أو ضد
ألوم هؤلاء الذين ينظرون لغير المحجبه على انها فاسقه
و الوم هؤلاء الذين ينظرون للمحجبه على انها متخلفه
نحن نتجه بقوه في السنوات الأخيره نحو العنصريه و القبليه و التشدد الأعمى للرأي
و نرسم للآخر صوره مخزيه عن فكر المسلمين
و ننشغل بكل ما هو سطحي و بعيد عن الاسلام
و نحلل الاسلام بصورة تثير الخجل
هو الحجاب فرض كي يحمي المراه من الذبابه؟ أقصد الرجل؟؟
هل الله خالق الكون يفترض في المرأه المسلمه الضعف و الجهل و التخلف فيحميها من نفسها و من غيرها بالحجاب؟؟
هل الرجل الشرقي الذي تحيط به النساء المحجبات اكثر ورعا و صلاحا من الرجل الغربي الذي تحيط به نساء غير محجبات؟؟
كم رجل تعرف في حياتك عفيف حقا ؟ و كم رجل تعرف لم ينزلق الى الحب و ربما الجنس قبل الزواج " العلاقه الشرعيه الاسلاميه الوحيده" و كم امرأه تعرف محجبه و تعيش قصصا مخجله و كم امرأه تعرف غير محجبه و محترمه؟
....
الحجاب في رأيي الشخصي
هو عباده كالصلاه و اصيام .. درجة تقرب من الله عز و جل.

و للعلم أنا محجبة!

25 يناير، 2009 12:16 ص

تعليق bent 3ayla ...

و الله يا انسة او مدام، عينيا دمعت م الفرحة، عندي مدة ما لقيتش طفلة مستنيرة هكا..و خاصة انو متحجبة ومعتزة بالحجاب كقناعة و فخر مش منظر و تقليد اعمي، وزيد م الفوق محترمة الغير... ياسر طيارة الحكاية. يا للا انستنا!

25 يناير، 2009 1:08 ص

تعليق abu arabi ...

الحجاب وللى يمثل الماركة المسجلة متاع الحركات الاسلامية فى العالم الكل زيادة على كونو غطاء شرعى واصبح يمثل نوع من انواع الاسلحة الدفاعية امام المد العلمانى...بالضبط كيما دبوزة الشراب ولات فى المقدمة متاع اسلحة العلمانيين وبخصوصى التوانسة...اذا المعركة الحالية ننجموا نختزلوها مابين الحجاب ودبوزة الشراب وفى انتظار نتيجة المقابلة يلزم الطرفين ما يرقدوش النوم ويحاولوا يستوردوا اسلحة اكثر اهمية كيما الكلاشينكوف والدوشكا والار بى جى يعنى اسلحة خفيفة ما دمنا توانسة فى بعضنا ما يجوزلناش الثقيل ونضربولها مقابلة متاع العمر كله تدوم عشرين وللا خمسين سنة ومن بعد يجينا سى عمر بن موسى وللا الامم المتحدة تصالح بيناتنا ونمدوا ايدينا لبعضنا من فوق طاولة كبيرة ويادار ما دخلك شر ولو مقبرة الزلاز كبرت شوية وولات موش بعيدة من حدود برج السدرية...لكن الكل يهون من اجل تونس الغد...ونبداو نبنيو فى تونس الجديدة...وعين الحسود فيهاانتان تليكوم...ويا امة ضحكت من ....م

25 يناير، 2009 8:15 ص

تعليق bent 3ayla ...

عم ابو العربي، والله في جرة البوست متاعك زدت شربت قهوة اخرى بش نفهمو...

اولا ما فماش حرب و جوستمون، مانجمش نلخصها بالحجاب ولا دبوزة الشراب..
هذا من جهة، من جهة اخرى، كي تقلي الحجاب ماركة مسجلة متع الحركات الاسلامية، ربي معاهم، اما يا اخي انا يهمني الاسلام، و حسب علمي الحجاب ماهوش م الاركان الخمسة، ولا بش نعرفو خير من ربي؟

25 يناير، 2009 11:12 ص

تعليق غير معرف ...

كي تحلو اكا الفلستين متع السورية بش توريونا الغابات الامازونية اللي تربيو فيها علي سدركم،

on dit sadr
avec sad non sin
ok men tawa ma3adech n7ill lefles mte3 souriiti nwalli kil bouheli

26 يناير، 2009 12:19 ص

تعليق bent 3ayla ...

الي السيد غير المعرف،

تحية طيبة، اما و بعد،
فانني الفت انتباهكم الي ان المقال موضوع التعليق لم يرد بلسان عربي قح، و انما ورد بلهجة دارجة تونسية. و بالرجوع الي عرف اهل تونس، وقع التثبت انه درج الناس علي استعمال حرف السين عوض الصاد في كلمة "صدر" فاصبحت تلفظ "سدر" ، و لذلك فلا داعي للتصويب في هذا المجال للحفاظ علي روح النص.

و علاوة علي امر القميص الذي لا بد من اقفال جميع ازراره، فاني انتهز الفرصة لاؤكد علي وجوب لبس النقاب الشرعي و تغطية كامل الوجه.

تقبلوا سيدي فائق عبارات التقدير و الاحترام.

26 يناير، 2009 1:05 ص

تعليق Nomade ...

Je suis tout à fait de ton avis, Bent-3ayla . Bien que je ne compte pas le porter un jour, je n'ai rien contre celles qui portent le voile. Ce qui me dérange c'est lorsqu'on essaye de me convaincre avec des arguments aussi invraisemblables que ceux que tu cite dans ce billet. Le pire, c'est quand les femmes voilées revendiquent ces mêmes arguments. Ça n’en fait pas des faibles et des victimes à mes yeux. Ça n’en fait pas des pauvres filles qu’il faut protéger, bien au contraire. Ce que ça veut dire pour moi : 1) l' homme, le Mâle, est un être qui, de par le développement de son système limbique, se rapproche plus du lapin que du singe. 2) À cause de cette même partie du cerveau et de part l’absence de bon sens, de jugement et de raisonnement (lobe préfrontal très peu développé voir inexistant), le Mâle est, somme toute, un Saute-sur-tout-ce-qui-bouge.
Il est donc judicieux de lui mettre une laisse autour du cou et de bien le dresser. Dans des cas extrêmes, où il s’avère impossible de contrôler ses pulsions sexuelles, il est conseillé de le piquer. Ainsi, il ne pourra plus être objet de nuisance.
Enfin, bref. Voua avez compris, c’est ridicule de vouloir protéger les femmes en les voilant.
Ce qu’a écrit Mlle ou Mme anonyme fait plus que plaisir. On peut toujours espérer que toute les filles voilées soient aussi « bien » convaincues.

26 يناير، 2009 3:05 ص

تعليق Soufiene ...

أنا مانيش عارف شبيه كل مرة موضوع الحجاب يتجبد، تلقى الرجال هوما إلي يعطييو في أرائهم سوى كانو معى أو ضد.

أنا عمري ما سمعت نساء يتناقشو على الحجاب. ديما الرجال هوما إلي يعطييو في أرائهم.

يعني أنا مانيش فاهم شدخل عياش مالمرسى، عاشور ناجي، و أبو عرب، في موضوع نسواني قامت بطرحو بنت عايلة، إلي هي مرا على حسب ما نتصور.

الحجاب يخص المرأة، و المرأة التونسية حرة و تنجم تعطي رأيها و تختار شتحب. ماناش عايشين في فترة الإستعمار، و في فترة الطاهر حداد.

يعني الرجال ما عادش يلزمهم يتدخلو في هالمواضيع هاذي، لأنها مواضيع نسوانية.

الراجل ما يحترمش حرية المرأة، يحبها ديما تتصرف كيما هو يشتهي.

26 يناير، 2009 12:32 م

تعليق غير معرف ...

topic86, [url=http://www.chop.edu/forum/user/profile/8207.page]order klonopin no prescription[/url], :-( jul, http://www.chop.edu/forum/user/profile/8207.page buy klonopin ;-(, [url=http://www.chop.edu/forum/user/profile/8208.page]purchase xanax 2mg[/url], ;-( imm, http://www.chop.edu/forum/user/profile/8208.page xanax 2mg :-(, [url=http://forum.cprs.ca/default.aspx?g=posts&m=6]order adipex[/url], :-( tns, http://forum.cprs.ca/default.aspx?g=posts&m=6 order adipex *sorry*, [url=http://forum.cprs.ca/default.aspx?g=posts&m=7]buy alprazolam no prescription[/url], :-( nlz, http://forum.cprs.ca/default.aspx?g=posts&m=7 buy alprazolam without prescription :-), [url=http://forum.cprs.ca/default.aspx?g=posts&m=8]buy ambien without prescription[/url], :-( dza, http://forum.cprs.ca/default.aspx?g=posts&m=8 ambien no prescription ;-(

12 يناير، 2010 11:45 ص

تعليق غير معرف ...
أزال أحد مشرفي المدونة هذا التعليق.
25 يناير، 2010 10:44 ص

تعليق غير معرف ...

http://markonzo.edu http://riderx.info/members/avapro-75-mg-avapro-tabs.aspx http://aviary.com/artists/Zofran mcgeorge delaneyphila http://blog.bakililar.az/famvir/ http://aviary.com/artists/Zyprexa njit http://ciprofloxacin.indieword.com/

24 فبراير، 2010 5:24 م