جميعة لتالي، بمناسبة زيارة عمتي من سوسة، و غياب الوالدة ع الدار، تم احتجازي من قبل عمتي انفة الذكر و الحاجة كلوفية في الكوجينة  بنية مبيتة انهم يعملو من بنت عايلة العره ،  مرا حرة (كيما اكا اللي في الاشهار متع الزيت). قالك يا سيدي كيفاه ما تعرف تطيب كان النزر اليسير من كتاب خالتك صنافة؟ و كي تاخو راجل شخناق -بمعني اخر كي تاخو راجل tout court ماو كل  راجل بعد  ما تتنقب معدتو  ف الدغاغر  الخامجة،  كي يعرس  يوليconnaisseur - نقعدو لدعاء الشر؟ 


و زيد فوق هاذا و دونو، قالك ناس قبل،  المرا اللي ما تحكمش معدة راجلها، الندم ياكلها. باللي حاولت نفهمهم الدنيا تبدلت (ولو كي تجي تشوف ما تبدلتش في هذي) و حكيت معاهم بلوغة المساواة بين الجنسين و حقوق و مكتسبات المراة في العهد الجديد و الرؤى الاستشرافية لجمعية امهات تونس (اللي لتوا ما فهمتش اش تعمل)، شي، النافع ربي! سمعوني و تثاوبو حتي دمعت عينيهم و مبعد قالك ايا طبليتك و كوجينتك!   

شدني الغزول و بديت ناكل في روحي اما صابرة و محتسبة، ماو كرو عليا والديا و قالك تسمع كلام كبيرك ما كانش الهم تدبيرك و قالك اكبر منك بليلة اعلم منك بحيلة... انا الكوجينة نكرها، و اصلا فما شكون يحبها؟ تبدا واقفة مصموتة صبحية كاملة بش يقعدو علي الطاولة اربعة دراج و يبداو، هذي بيها، هذي فيها، هذي ما تتكلش، هذي منين كعورتها. معناها لا يزي الجهد الطايح و الكلام الجارح. 

ايا سيدي جات عمتي و كلوفية قعدو ف الكوجينة و كملو عيطو لجارتنا. مرا قرهمانة، دهرية، خبيثة، تي اكا ام الزبراط . منها يعملو قهوة و منها تجيبلهم اخبار فرشكة و تشمت فيا. 

ماي درا شكوني ف الحومة عرست جديدة و ام الزبراط هيا اللي تلهاتلها "بالعرس". و اللفظة هذي في عرف النسا مش معناها قامتلها بالعرس ولا زغردت ولا شطحت. لا لا ... تي "العرس" افهوموها عاد! بالفلاقي الاساليب و الخدع و التقنيات المتوارثة بين عرق النسا بش من الليلة الاولي المرا تحكم راجلها و يولي كي الخاتم في صبعها! ماو هذا علم قائم الذات و يبعثو يستفسرو عليه من مدينة لمدينة و من قبيلة لقبيلة حتي من اخر الجمهورية. و لزيادة الاحتياط يجمعو بين التجربة التونسية و التجربة المهداوية و التجربة الكافية فرد مرة بش يضمنو النتيجة. 

بالطبيعة انا نحرك ف الفطور و راشقة وذنيا عندهم. رغم اللي انا م المفروض ما يوصلنيش علم باكا الشي من توا. اما ماو تعرفو الكلوف و التنسنيس غالب فيا و زيد ف هداري tabous قرون الاستشعار الكل تخدم. سمعت سمعت و لعبت عليا الدوخة. و قلت بالله كان هذي القارية المثقفة عملت هكا... امالا علاه نلومو علي عامة الشعب؟

 مانيش بش نقلكم علي ها الفرت اللي يعملوه لعدة اسباب. اولها اللي ما نضمنش واحد قاصر يتعدا من هنا. ثانيها انو c des trucs de fous! و بالحق متع عبد مهبول، مش في وعيو بش يوصل يعمل اكا الحاجات و يفكر اكا التفكير الاعوج المنحرف. انا نسمع فيهم و معدتي قلبت عليا و شعرة لا طحت دايخة. و ثالث سبب، انو كان نقلكم يا رجال اش يستنا فيكم الا ما تبطلو ع العرس و تحلفو عليه ميات يمين و تمشيو تتصوفو. اما نصيحة من اخت لاخواتها، ما تشربو شي ولا تاكلو شي م يدين نساكم الجمعة لولا وماذابيكم طول العمر زادة!

سكت سكت و بعد طفطف الهم علي قلبي، تلفتلهم و قلتهم،
- (بنت عايلة) يزيتوش م الخور متاعكم؟ توا هاذا كلام متع ناس تخاف ربي؟
- (عمتي ) و انتي يا مكبوبة السعد و الوعد راشقة وذنيك هنا و عندك ما تقول زادة؟
- (كلوفية) خليها تسمع يا حاجة خير مللي تقعد علي عماها. انا نحب الطفلة الفطينة. 
- (ام الزبراط) حلان العينين مش باهي. 
- توا المشكلة ف السمعان ولا ف ها الخنار؟ فما عبد بمخو يعمل هكا؟ هاذي فيها فينقة راهو!
- خلينالك العقل ليك يالاّ. و زيد هاذا شي مجرب... امالا تحب يعفس عليها راجلها و تمشي ف الساقين؟
- انا ساقين و انا يدين، ما يجيش هكا، العرس محبة و مودة مش ها الخزعبلات
- لا لا يا بنتي. انا كنت نقول كيفك و امي الله يسامحها ما علمتنيش ها الشي وقت اللي عرست، هاو رصاتلي مطلقة و دمعي علي خدي. الرجال و الزمان ما فيهمش امان و باللي نعلمو فيهم شوية. 
- يا كلوفية الحاج خاطيه طلقك بعد سنين و منين، معناها عدا معاك عمر. ما تفاهمتوش الله غالب هاذيكا حكاية اخري! 
- ايه ماو لو جات فطينة و مش علي نياتها راهي عرفت كيفاش تحكلو الدبرة و تخليه يحلف براسها. اما هيا قلبها حنين. ما فطنت كان بعد ما الفاس طاح ف الراس. 
- يا عمتي قول حاجة، راك مرا مصلية  و تخاف ربي! يجي منو ها الدمار؟ ترضاها لولدك يعملو فيه هكا؟ يشربوه ها الشي و يوكلوه ها البلا؟
- و الله بنتي السحر موجود. الحق الحق ما نرضاهاش، اما ماو حتي انا نوصيه و نحصنو، كان هوا زلق، صحة لامها! 
- ايا سيدي هاني بش نحلك عينيك علي خاطر معزة عمتك و بش ندلك علي باب العرش كانك بنت امك و بوك...


و بداو يحكيولي علي حكايات رجال و نسا، يتعاركو ف ظهورات بعضهم علي النفوذ فل couple و من ورا كل واحد امو ولا امها و حبيبات امو ولا امها. و زادو ذكرولي ناس نعرفهم بش ما نمشيوش لبعيد. و هيا بالحق حكاياتهم واحد مخو ياقف منها، اما انا كنت -ولا زلت- نقول اللي هذاكا قوة محبة مش سحر. هاو حكايتين ع الطاير.

طفلة بنت ناس بالقدا، حليلتها، قارية حتي معادش، حتي م الدكتوراه عندها، تخدم بشهرية باهية و امورها الكل هانية. باللي تقدمولها رجال بشلاغمهم قاتلك الف و اعوذ بالله لو كان تاخو. تقدملها ولد المرا اللي كانت تخدم عندهم قرا ووصل اما مش كيفها، و زيد حاشي خليقة الرحمان.  دارهم ضحكو حتي عينيهم دمعت... اما هيا وافقت! اش تحب تعمل، و عين الرضا عن كل عيب كليلة و عين السخط تبدي المساوئ
باللي حاولو باللي هددو، شي!  قاتلك ربي فوقي و انا تحتو ناخذو ناخذو. القيامة قامت و قالك امو عاملتلها عملة. باللي قالتلهم نحبو مللي كنت صغيرة و يجي يلعب معايا و نعرفو مش علي طمع، شي! هزت روحها و سافرت هيا وياه. 
امها عملت دقزت ، عزمت و ما ايستش انو بنتها يرجعلها شاهد العقل. و بالحق الطفلة طلقت. اما كي حكيت معاها، قاتلي اللي الندم كلاها علي حالة دارهم و ما نجمتش تتهنا مع رويجلها. اهيكا مسيكنة تراها تعطيها اكبر من عمرها اللي عداتو سلاطة. 

راجل اخر، حتي هوا دارهم ناس بقدرهم، مش طنطخة اما ناس معروفين و دار قديمة. طاح بوحدة ... مش متاعهم (مش لازم نقولو كلام سفاهة)،باللي حلّولو عينيه، و قالولو صحابو عليها، عبدها و المعبود ربي. تحمكت فيه كيما حبت و كملت صوحبت عليه قدام عينيه وهوا ما ينجمش يلوي العصا في يدها باقي عندو امل انو ترجع للثنية. ربي قدرلها انو يصيرلها حادث في ثنية الحمامات و هيا مروحة م السهرية مع الشلة متاعها، عجزت. ولات مربوطة ف الفرش لا تقوم لا تتحرك. الراجل بالرغم من هاذا الكل، ما سلمش فيها، حطها ف عينيه و قالك ربي قدرلي نتحرم م الصغار، اهيكا هيا بنتي و نعاود نحللها عينيها علي غلطها و فرصة بعثهالي ربي بش نربح جنتي و جنتها. حتي من دارهم سكتو و  ما عادش يمرجو فيه و حتي اكا المرا اللي كانو يكرهوها ولاو هكا هكا بيها.
 
برا احكي ها الكلام لكلوفية و ام الزبراط وقلهم ان الله غفور رحيم؟؟ هوما يفهموك ولا يطعموك؟ ماو قالك امها يديها تجمد الماء و عملتلهم عمل جماعي الناس الكل و ناوين يمشيولها علي قضية فرد مرة مادام طلعت efficace هكا!

ايست منهم و ايسو مني. و مشيت نقلب فاكا الماكلة و انا نتكرم وحدي على المخاخ المسوسة و النية الخامجة، الواحد يجي يتهني يحل على روحو واجهة و جبهة. السماح!
 بالطبيعة اكا الفطور اللي قديتو في حالة لاوعي جا ما يشبه لشي! السلاطة مفوحة بالزهر في عوض الخل علي خاطر الخل فوحت بيه القاتو، و الملوخية بالسكر و التاي بالملح و الطاجين جا مرقة فلايك. حاشا نعمة ربي اما شي متع تلويح، رصاتلنا في قدمة زيت و هريسة و تن. و انا جاتني بالصلاح، اعفاء م الكوجينة طول العمر...

 

كتبتها:bent 3ayla على الساعة: 11:45 م

تعليق Dr.Gnitekram ...

ce qui est desolant c'est que lahkeyet hedhi wallet courante , le3ouaj walla houa esshih fi koll shay, kellet lahyé heya l'exemple.

14 يناير، 2009 12:32 م

تعليق غير معرف ...

je suis le 2eme

14 يناير، 2009 1:02 م

تعليق غير معرف ...

ووووووه يا وخي غير معرف، راك مسطتها يااااااسر... هاني لول هاني الثاني، مكش ضامر جملة...

14 يناير، 2009 2:09 م

تعليق 3amrouch ...

Tu y crois toi ?
dommage

14 يناير، 2009 2:14 م

تعليق خرنان ...

باهي تو هكا بنت عايلة
هاك دخلتيلي ترنو في مخي
ترصيل تو نبدا ليلة العرس بfouille au Corps

14 يناير، 2009 3:20 م

تعليق bent 3ayla ...

سي عمروش نطبل و نزكر و ف الاخر تقلي انتي تامن خسارتك؟ يا سيدي لو جيت نمن راني مشيت كتبت اكا الدمار في ورقة و خبيتو ف البانكة الي ان يعمل ربي دليل. لا سيدي ما نمنش!

غير معرف اللول اللي ولا الثاني لاهي اخطاووه، يعطيه الصحة اللي يتعدا يرمي السلام!

غير معرف الثاني اللي يشري ف الشبوك مع غير معرف اللول، مرحبا بيك، اما اخطا خوك، انا عندي اقتراح، كل واحد يختار اسم حركي ع الاقل نعرف غير المعرفين نعرفوهم ولا غير معرفين بالحق غير معروفين.. لا لا انا بديت نهبل..

سي الخرنان.. انا نصحت و دليلكم ملك. اما المفروض الواحد ما ياخو الا ما فمة حد ادني م الثقة و الاطمئنان انو مرتو عندها مخ. علي خاطر اكا الشي بالحق متع مهبلة، متع مرسطان...

14 يناير، 2009 3:36 م

تعليق Z Y E D ...

je viens de decouvrir ton blog et il m a fallu 30 bonnes minutes pour pouvor m en extirper
j adore ton style spontane d ecrire
je reviendrai ca c sur :)

14 يناير، 2009 3:48 م

تعليق bent 3ayla ...

مرحبا بيك يا سي زياد. زارتنا البركة. حتي انا نحب نقرا اكا المجلة اللي تكتب فيها و نعمل عليها جو :))

14 يناير، 2009 3:58 م

تعليق 3amrouch ...

سعود ههه

14 يناير، 2009 4:08 م

تعليق bent 3ayla ...

شكون سعود يا سي عمروش؟؟ انا ناقصة نوم، اما يظهرلي حتي انتي كيف كيف

14 يناير، 2009 4:11 م

تعليق 3amrouch ...

بنت عايلة
خوذ مهلة للتفكير
تو نرجع بعد الفاصل

14 يناير، 2009 4:13 م

تعليق bent 3ayla ...

خليني نضرب اخماسي ف سداسي... سعود سلطان، سعود الفيصل...
لا ما عرفتش!

بالجاه حطو ايميل، نحب نحكي طول مع البشر ما غير ما نخربش ع الحيط...

14 يناير، 2009 4:14 م

تعليق 3amrouch ...

وانت فيبالك مزال شكون يحصل هو ويبعثلك ايميل هههههه
بعد اكا الفرشة الي عملتلها للانونيم العاشق الولهان وخليت الي مابيشتري يتفرج فيه ههههه

14 يناير، 2009 4:18 م

تعليق bent 3ayla ...

لا لا يظهرلي غالط ف البلوغ!! انا فرشت انونيم؟ تي هاك قلتها انونيم معناها ما عنديش ايميل متاعو و م الفوق، العاشق الولهان الوحيد اللي تعدا قالي ولا قالتلي راك بومة. و زيد كبيت علي راسو و طلبت السماح...

14 يناير، 2009 4:21 م

تعليق femme au foyer ...

chay ebahat!!! bsara7a ena wa7da menness n9oul elli dans les deux cas elli 7kit 3lihom c'est "amour aveugle" welli ne3tabrou naw3 min esse7r ama mouch be fi3li fe3el cad se7r rabbeni ma 3andouch tefsir

14 يناير، 2009 4:24 م

تعليق bent 3ayla ...

اكتشفت شيئا لا بد ان اقوله لك اليوم
الرغبة محض قضية ذهنية. ممارسة خيالية لا اكثر. وهم تخلقه في لحظة جنون نقع فيها عبيدا لشخص واحد و نحكم عليه بالروعة المطلقة لسبب غامض لا علاقة له بالمنطق. رغبة تولد هكذا من شيء مجهول ، قد يعيدنا الى ذكرى اخرى... لعطر رائحة اخرى... لكلمة، لوجه اخر... رغبة جنونية تولد في مكان اخر خارج الجسد، من الذاكرة او ربمامن اللاشعور، من اشياء غامضة تسللت اليها انت ذات يوم، و اذا بك الاروع، و اذا بك الاشهى

احلام مستغانمي

14 يناير، 2009 4:27 م

تعليق 3amrouch ...

اه
لشكون هذا؟؟؟
شبيك بنت عايلة

14 يناير، 2009 4:30 م

تعليق bent 3ayla ...

لا لا متخافش مش ليك. ماي femme au foyer جبدت ع السحر الرباني اللي ما يتفسرش، ياخي تذكرت ها الفقرة من كتاب ذاكرة الجسد و اللي هيا صحيحة الي ابعد الحدود...

14 يناير، 2009 4:33 م

تعليق 3amrouch ...

لا لا موش خوف اما معرفتش العلاقة وبرة

14 يناير، 2009 4:34 م

تعليق bent 3ayla ...

لووووووول، حلوة هاذي، الولاد ولاو يخافو م البنات كي تتغزل بيهم! ما غير ما تبرر. اما باقي ما لقيتش سعود...

14 يناير، 2009 4:35 م

تعليق 3amrouch ...

اي اما حلومة تحكي على الرغبة الي تنطفي بعد دقائق موش على الحب الي تحكي علية امراة في الدار
فرق كبير

14 يناير، 2009 4:36 م

تعليق 3amrouch ...

ماو العرض اكثر من الطلب هههه

14 يناير، 2009 4:37 م

تعليق bent 3ayla ...

لا لا يا سيدي، حلومة تحكي ع الحب المجنون اللي ما فيه حتي منطق. اكا الحب اللي يهز للفينقة و يهد ثوابت حياة كاملة... اللي الكلنا نحلمو بيه

14 يناير، 2009 4:38 م

تعليق 3amrouch ...

اكي الي اسمو ضربة صاعقة ههههه
اولا الحب عمرو ماكان فيه منطق لانو موش منطقي
كيف باش تبداها بالحسابات متمشيش بعيد برشة
مزيان ياخو مزيانة
خايب ياخو خايبة
غني ياخو غنية وهكذا
لحسابات هذيكة هي الي هالكة الدنيا
حكاية تيمينك الوقت المناسب اللحظة المناسبة المكان المناسب وشوية لسان حلو تسلك امورك ههه

14 يناير، 2009 4:43 م

تعليق bent 3ayla ...

يا اخي انتي من جماعة الحب surgele اللي يتباع في كارفور، خلي العباد اللي مازالت تلوج عليه فرشك تحرك...
هاك قلتها، حسابات مش مشاعر. توا الواحد بش يعيش مرة برك، يكمل يعيشها تضلع؟
لاه هكة؟

14 يناير، 2009 4:49 م

تعليق 3amrouch ...

vivre une seul fois ???
ça veut dire quoi au juste
c'est quoi vivre pour toi??
Il faut vivre pour profiter de la vie.se Défoulez
mais comment

14 يناير، 2009 4:55 م

تعليق bent 3ayla ...

vivre pour profiter de sa vie.... mmm non. on fait kom si on avait acces a un parc d'attraction et on essaie d'avoir the best value de cet acces. on joue au max de jeux. moi j dirais jouer aux jeux ki donnent le max de sensation, kite a se faire virer du parc plus tot.

14 يناير، 2009 4:59 م

تعليق 3amrouch ...

وكيف تجربهم الالعاب الكل وتصيرك تخمة وتفد اش تعمل؟

14 يناير، 2009 5:01 م

تعليق bent 3ayla ...

يظهرلك.. علي خاطر الجو مش ف اللعبة. الجو في مخك انتي.. و اذا كان جربت و كملت و ماعادش عامل جو و الا اصلا ما عملتش جو، المشكلة مش في الالعاب، المشكلة في نظرتك للعبة..
tout est dans le mental

الدنيا وهم كبير، اما المصيبة كي ماعادش نراوه وهم علي خاطر نفطنو بيه مجرد وهم..

14 يناير، 2009 5:05 م

تعليق 3amrouch ...

بنت عائلة
انا راني نتبع في التفكير متاعك انت
انت قتلي انا باش نعيش مرة واحدة عاد تحبني نعدي عمري سلاطة؟
معنها ثقافة قالو يقوي سعدك قالو توة توة
تحب تدخل لحديقة العاب وتنتهز الفرصة باش تلعب لاخر رمق احسن لعبة واعظم لعبة واقوى لعبة تاثير وديما هل من مزيد تماما كيف المخدرات تبدا بشمة ومبعد سيقارو ومن بعد تقوي الدوزة ومن بعد ماعادش يؤثر فيك تدورها البيضاء مون امور وكراك وكوكا وهيرو وتبكي على قلة الجهد وشكون عندو سوفل
ملاحظة:المخدرات تشبيه كل واحد فاش تجي حشيشتو ههه احسن كرهبة اكبر دار فوياج فتوقي اشب راجل ازين مرى كل واحد كيفاش

14 يناير، 2009 5:22 م

تعليق bent 3ayla ...

يا عم الراجل، الواحد الغاية متاعو مالدنيا شنوة؟ ماو السعادة! عندك غاية اخرى سميهالي؟ ماو الكلهم تولدو عاشو ماتو. و كل واحد سعادتو فاش..

اما عندك امثال يا لطيف! و تسميهم صنف صنف زادة!

14 يناير، 2009 5:26 م

تعليق 3amrouch ...

خالتي لمرى
جينهاشي تعبتني راك
الغاية اذ هي السعادة
باش توصل لغايتك لازمك تبني على قاعدة وتحفر الساس وتصب دالة حجوري
معناها كيف صاحبتك تعرف الي سعادتها باش تكون مع الجنان على خاطر شافت في غزرتو كيفاش يغزرلها وتعرف روحها باش تعيش مهينة معاها علاش الفوارق تراه ولا اش باش يقولو علية؟
المال والبنون زينة الحياة الدنيا
امى رد بالك منين تجيب فلوسك وبانه طريقة
رد بالك منين تجيب ولاد وشكون الشجرة
الباقي ناس بكري قالك الفايدة في الهناء وانت عشت البرة وريت على مااظن كيفاش فمة ساعات كوبلوات مكهبين على التسعين وسنيهم طايحة ومزال شادد عجوزتو من يدها ويحكي هو وياها تقول فرخ خمستاش سنة هذيكة السعادة بالنسبة لي انا انو مرتي تقعد حاملتني وتحبني لاخر يوم

14 يناير، 2009 5:35 م

تعليق femme au foyer ...

:-))))
3amrouch w bent 3ayla rabbi yhannikom ezzouz w enchallah tal9aw l'ame soeur elli tkamlou m3aha 7yetkom w tal9aw essa3ada el manchouda

14 يناير، 2009 6:06 م

تعليق 3amrouch ...

امراة في الدار
احكيلنا انت كان مفماش احراج تجربتك الخاصة
القيتها ام لا؟

14 يناير، 2009 6:13 م

تعليق 3amrouch ...

بنت عايلة
اعطيني عشرة في المائة يكفي مرابيح اليوم
عملتلك تنشيط وحفلتهالك
34 تعليق

14 يناير، 2009 6:14 م

تعليق femme au foyer ...

bent 3ayla chnouwa dima t7eb ta3raf kol chay?? ;-)
personnellement je peux dire que j'ai trouvé chatri welli ma netsawarch 7yeti blè bih! behichi hekka w ken t7eb ta3raf 7aja o5ra 9olli bark :-))))

14 يناير، 2009 6:24 م

تعليق femme au foyer ...

desolé mechi fibeli bent 3ayla hiya elli se2letni ki thabat tla3 3amrouch (fibeli ken bent 3ayla tmout 3al tnasniss) :-))))

14 يناير، 2009 6:30 م

تعليق bent 3ayla ...

استنا استنا انا هزني النوم و انتوما قمتو فيها الاذان؟؟

امان يا مدام البيت؟ انا نسناسة؟؟؟؟ (لااااا جملة!) ايه استناني امالا خليني نجي نسنس علي قاعدة هذا كعك ما يطير جوع!

سي عمروش، جيناهااااشييييي؟؟ هاذاكا شي ملتصق بالعقلية متاعنا. و في تونس يقولولو خوذ بنات الاصول راهو الزمان يطول

و كي انتي مصر ع العشرة بالميا، انا حشمت بش نقلك اما مادام انتي تحب، توا نبعثلك فاتورة التاليفون!

14 يناير، 2009 8:55 م

تعليق غير معرف ...

هههههههه... حلوة منك

14 يناير، 2009 9:49 م

تعليق غير معرف ...

من فوزية، سامي سابقا: يكب سعد الحب يا وخيتي هبلني هبلني هبلني هبلني هبلني هبلني، لين ما عادش، وأنا وخيتك عيني عشاقة، في النهار نتضرب في خمسة على الأقل. حب من جانب واحد يا وخيتي، يقولولي النسا ماهمش خالطات على الرجال خلي إنتي... إيجا نهار أعمل شعرك عندي توا نحكيو...

15 يناير، 2009 1:00 ص

تعليق bent 3ayla ...

يا فوزية ما تقليش تخدم في تونس؟ و بالامارة في لافايات؟؟ لا لا بالرسمي، غير قلي فين برك، نجيك نجري. ماني نموت عل الهداري! و اش تحبني نقلك، ناس قبل قالك المحبة تحب الدرقة...

15 يناير، 2009 1:28 ص

تعليق Ammouna ...

awél 7aja ya bent 3ayla c'est une mauvaise idée d'utiliser autant de couleurs
aïe aïe aïe !

15 يناير، 2009 11:40 ص

تعليق bent 3ayla ...

صباح النور امونة..
تي ماو فما اربعة من الناس، كيفاش تحبني نعمل و انا نفد كي في كل سطر نقعد نقول فلان قال علان سمي...

و ثاني حاجة؟

15 يناير، 2009 11:51 ص

تعليق Ammouna ...

haha je viens de lire le post flou9 dho7k ya bent 3ayla!! :))
Bon éna je pense que c'est la force des idées et des intentions qui dirige les actions qui viennent en consequence
je sais pas comment l'expliker éna.... Mais la femme, elle y croit tellement fort a son petit grigri qu'elle finit par lui transmettre cette energie et ce pouvoir. Ca vient d'elle, pas de l'objet ou de la nourriture ou je ne sais quoi d'autre, une force de la pensée qui peut etre soit negative soit positive, elle interréagit avec les composantes de l'univers et les hommes aussi.
Il se peut aussi que ca modèle leurs pensées ?! car les yeux, porte de l'âme, verront et percevront ce que tu montreras et ce que tu degageras. Son âme aussi va palper ce que tu laisseras en surface ou ton energie, et telle une eponge elle absorbera cela et comme une chaine, étant le second maillon, il suivra la ligne du premier forcement.

putain qu'est ce que je raconte moi? J'te jurre que j'ai rien fumé lol
Cho, s7i7 éna en 48heures je n'ai eu droit qu'a 5heures de sommeil et que je viens de passer un exam (tayara by the way!) mais je suis sure, que parmis ce que j'ai balancé, y a du vrai.
il faudrait just que j'aille cherche de ce coté là , les reponses y sont

15 يناير، 2009 11:56 ص

تعليق Ammouna ...

putain il est trop pertinent mon commentaire
aman a3mlou kwatrou :D

15 يناير، 2009 11:59 ص

تعليق bent 3ayla ...

معقول معقول، فما اللي يمنو بالكارما و ها الشي..

ايا انشالله موفقة ف الامتحان متاعك، ظاهر فيك عملت نقشات. j'espere كملتو و رتحتو..

15 يناير، 2009 12:02 م

تعليق Ammouna ...

kammalna?? TI RIGOLES!! :/ lé mazél fina tarf 3dham s7i7 donc mazél el dharb

15 يناير، 2009 12:23 م

تعليق غير معرف ...

بلوغ تافه و انتي اتفه منو

15 يناير، 2009 1:36 م

تعليق bent 3ayla ...

يعيشك، هاذا من حسن اخلاقك.
ماو قالك شكون قال اللي الديمقراطية تصلح للناس الكل. فما ناس ما لازمهاش تصوت ولا تعطي راي. لا مش عليك حاشاك، اما عليا انا... الله غالب، صحة ليا خلط علي زمان عطاوني فيه مجال بش نهر.
احتسب و امرك لله.

15 يناير، 2009 1:39 م

تعليق titof ...

هههههههههههههههههه
اي نسمع بيها الاساطير هاذي
يقلك وكلتو قلب بهيم و الا درا شمنسخطة
و الي عملتلو كوكتال وزغ
حالة في هالتخلف

15 يناير، 2009 2:06 م

تعليق titof ...

عمروش
نهارين قالبين عليك الدنيا و انتي محشي هنا ههههههههه

15 يناير، 2009 2:07 م

تعليق bent 3ayla ...

ما صاب يا سي محمد. هاذاكا خنار قديم. زادو ابدعو ف الـ les trucs tordus. ولا شي اخر يقزز اكثر...
حل عينيك و رد بالك

15 يناير، 2009 2:07 م

تعليق titof ...

شكون محمد؟؟؟؟

15 يناير، 2009 2:08 م

تعليق bent 3ayla ...

ياخي مش سي محمد تيتوف معايا؟

15 يناير، 2009 2:09 م

تعليق 3amrouch ...

تيتو
مرحبا بيك جيتووو
اسمع بصراحة قلقت من غادي جو متكهرب
هاو بنت عائلة فرحت بينا يعطيها الصحة
شنوة جديدكم غادي
شكرا على الايميل وحدك خويا
تيتوف
اشبيك حاقر روحك راهي شهرتك سبقتك

15 يناير، 2009 2:11 م

تعليق bent 3ayla ...

ايا سي عمروش ماك تحب الحسابات... مرحبا بيكم و الدار داركم، اما القعدة بالـ consommation
عنا بسيسة عنا حلبة عنا درع عنا طاجين لوصيف...

سي تيتوف، ماو قلنا بنت عايلة ما يخفي عليها شي. لازم كل مرة الواحد يعاودها؟ ماو يقولو عليا نفخة

15 يناير، 2009 2:14 م

تعليق titof ...

لا هذاكة عمروش موش انا

15 يناير، 2009 2:15 م

تعليق 3amrouch ...

بون
بسيسة ودرع نصف نهار لا موش حل متاع فطور صباح
الحلبة تعمل الريحة وانا عندي مواعيد مبعد موش حل
اش قعد؟
طاجين لوصيف؟
كيفاش هاذاي

15 يناير، 2009 2:16 م

تعليق bent 3ayla ...

في عقلك خويا. هاني نكمل ف البوست متع اليوم و مبعد نجي نشوف الجماعة اش تشرب

15 يناير، 2009 2:17 م

تعليق titof ...

بون الجو هادي هنا بلحق متع ركشة
موش كيما غادي خاصة وانو تصاور فلسطين تبدلت بدرابو الترجي يحتفلو ب 90 متع النادي العجوز
لفق في مقتضيات المرحلة

15 يناير، 2009 2:23 م

تعليق bent 3ayla ...

ماو قلنا خليني نكمل البوست علاه تبربشو فيا؟ كليمتين ع الطاير، خويا اقعدو قد ما تحبو احلي علي قلبي م العسل اما المبات لا! ما نسكنوش العزاب!

هاني راجعة. هبلتوني!

15 يناير، 2009 2:25 م

تعليق 3amrouch ...

ا
ايا كملتشي ؟
قلي شنوة طاجين لوصيف وشنوة مكوناتوا

15 يناير، 2009 2:47 م

تعليق bent 3ayla ...

ايه سيدي، اش قلنا توا..
اساعة كيفاش في محلي و تجبدو ع الترجي؟؟ ماو قلنا هذا اقليم تابع الافريقي. ايا ها الهدرة ماعادش تجبدوها

سي عمروش طاجين الوصيف نوع متع قاتو يعملوه بالدرع و الزبيب و بزايد زبدة. معانا تاكلو مع القهوة ماكانش تغص. و زيد طرف يبيتك صايم نهارين م القوة.
ما قلتوليش، اش نية حكايتكم، ضربتكم الفدة؟

15 يناير، 2009 2:49 م

تعليق titof ...

ملقيتوش غل القوقل

15 يناير، 2009 2:50 م

تعليق bent 3ayla ...

طاجين الوصيف بش تلقاه ف القوقل؟؟ لاااااا انتوما حالتكم ميؤوس منها!

15 يناير، 2009 2:51 م

تعليق titof ...

لا موش فدة انا عندي مدة معلقتش في المدونات
بون مقيتش حاجة تستحق التعليق ههههههه
هاني رجع في الكريدي في مدونتك

15 يناير، 2009 2:52 م

تعليق 3amrouch ...

اه اي عرفتو
طاجين دروع نقولو احنا في سبرنا بنين باهي
صار انت طلعت بنت جمعية امممممممم
شيء يفرح هذا
استنى يرجع فرفر من الكونجي وتو نعملو فوروم هوني
باهي ملا جيبلي موورسو وكاس تاي وشوف الاخ محمد اش يشرب وايجى اقعد بحثانا شوية

15 يناير، 2009 2:53 م

تعليق 3amrouch ...

بنت عائلة وينك عطشت راني جيبلنا حاجة نشربوها ولا خلي واحد يمشي على روحو
ملا سرفيس حموم(يخمم فيها بينو وبين روحو)

15 يناير، 2009 3:01 م

تعليق bent 3ayla ...

الطاجين و فهمنا تتوحم عليه فاكا البر، و التاي زادة؟ سي محمد يحبشي شيشة؟
ايا خويا كيما تقول امي، لم حناكك!

15 يناير، 2009 3:02 م

تعليق 3amrouch ...

هههه
خادم القوم سيدهم
بيك تغششت
شنوة لم حناكك

15 يناير، 2009 3:04 م

تعليق bent 3ayla ...

معناها كان صاحبك عسل ما تلحسوش الكل. لا سيدي راني ما نتغشش بالي واااااااسع.. و انتوما ف حسبة ولادي

15 يناير، 2009 3:06 م

تعليق foued ...

جاتني بالصلاح، اعفاء م الكوجينة طول العمر..لووول

15 يناير، 2009 10:30 م

تعليق غير معرف ...

éna n7ebb chicha!

19 يناير، 2009 2:23 م