١ جانفي ٢٠٠٩


ملا جو! البارح سهرية مش نرمال.... من اخبار غزة ومتابعة اخبار مجلس الامن ما خرجتش. تي حتى تفاهة سبعة و بقية الباقة المنورة من القنوات التونسية خرجولنا يا فيلم يا مسلسل، الحق الحق ما فهمتوش اش نوة.. تي المهم حاجة في الالوان الباهتة و الضوء الخافت و السونو المبحاح...
تي قول باقي فيهم الخير ما صمتوناش بسهرية ديبيل كي العادة و احترموا مشاعر الاخوة القومية والتضامن العربي مع اهلنا في غزة... تي هوة tellement الشعب التونسي اتضامن البارح حتىقريب نحرروها فلسطين... ياخي ما شفتوش المظاهرات في  الوتلا و البواتات و القهاوي؟؟؟ شي يعمل الكيف، الاحتجاج و التنديد بقلب و رب... الحقيقة انا ما شفتش بعيني... اما قالولي.. عاد انا بنت عايلة ..

ما قعدلك كان تخرج للبواتة! ca va pas???? متاع هاذا احنا؟؟؟؟؟؟
اللي يضحك في الحكاية ، انو الجملة الاخرينية هاذي، قالهالي خويا و هوا يحضر في روحو بش يخرج يسهر. قلت خليني نتدكك عليه و نقولو هزني معاك -و اللللللللللللله نفدلك، قالك عاش امرئ عرف قدر نفسه- ياخي خرجلي هال الجملة الشهيرة و شوية لا حط يدو على قلبو و لعبت عليه الدوخة- لا لا، هذيكا trademark متاع امي كي نخرج مع صحابي و نطول في السهرية و"نخرج من جلدي و نستغل الحرية اللي عطاتهالي" الموال هاذاكا كي نفوت التسعة متاع الليل في الشتا و الاثناش في الصيف... 

المهم، خلينا في خويا، عاد كي قالي هكا، انا قلت يا بنتي انتي زدمت زدمت، خرجلو نقشة تفحمو بيها... وخرت قدمت و خزرتلو في عينيه و قتلو... " و البنات اللي ماشين معاكم، ميسالش؟؟؟ " 
اما وينك... راني نلعب مع حمة وفي دار حمة. غزرلي و ضحك حتي زرسة العقل ظهرت و قاللللي " و انتي اش كون قالك اللي معانا بنات عايلات؟ اما انتي... بنت عايلة!"

كتبتها:bent 3ayla على الساعة: 3:14 م

تعليق غير معرف ...

3andou el 7a9
ton frere
mais c est la les hommes, nous sommes hypocrites je l admis

10 يناير 2009 في 12:43 ص

تعليق bent 3ayla ...

و هذاكا الدمار فاش!!!
اللي عندو مبدا يطبقو عل الكل! مش يلعب ببنات الناس و يحط حيط في عوض باب دارو

10 يناير 2009 في 12:45 ص