عدنا و العود احمد!!! ياخويا زايد البلوق ما كيفو شي! لا فايس بوك لا تعليق منا و من غادي... السماح، ها النهارين تعداو علي اختكم حالة manque ، نحكحك في جلدي تقولش عليا ضربت جربة. هبلت، ضبعت، ما عادش نعرف اش قاعدة نعمل ولا اش قاعدة نقول... 

حتي حبيت نعمل ضربتين تدوين في البوبلينات، تصبيرة علي ما ياتي. حضرت ماتريالي، و هو متمثل في ترموس تاي بالحليب و العسل (ماغير تعليق يرحم بوك يزي مرج خويا و التمقعير متاعو) و باكو macarons laduree جابوهولي الجمعة هاذي و تقولش عليا قلبي حاسسني، خبيتو للايام العصيبة بش نحس انو الدنيا مازال فيها ما يستحق الجهاد (و ماغير ما تقولولي تحبو تقسمو الباكو وفا، وحتي كان مزال الشي الوحيد اللي نقسمو هوا عصاة الزيتون على ظهر اللي يتجرا و يقللي يحب كعبة). الحاسيلو ماناقصني كان نكمل نهز زاورة بش نحطها على كتافي فاكا البوبلينات. اساعا بش لقيت وحدة ريقي شاح و التاي برد. ماو قالك التوانسة الكل ولاو بالانترنات ف ديارهم -اللهم لا حسد- و حتي اللي ماعندوش، ربي يبارك ف الويفي، تلقاها عمارة كاملة مرسكية مع واحد.  

وصلت لقيتها معبية تفغم. سقيفة حمام علي حالها. شباب العلا قاعد يشاتي مع وحدة و يقلها 
- alorrr mon amour, quand toi envoyer moi le certifika herger؟؟ (للترجمة بالعربي، يحب القاورية تبعثلو بش يجي بحذاها) 
و شلة متع مفرخة تلعب درا شنوة و تلحم عركة و ما ترا كان واحد قد الفقسة يسمع ف كلام انا ما فهمتو كان كي بديت نخدم. و بنية من غادي تبتسم للواب كام و تتلعوك كي اللوبانة. تميت خارجة و قلت مش لازم، السماح، استنا نهار الاثنين. 

استنا عاد نفهمك اش صار و بنت عايلة وين اختفات. و نهني العباد اللي تسال تسخايبني تنبزت و خذيت موقف، لا اختكم ما يحوك فيها شي و مازالو الجماعة فرحانين بيا ما عطاونيش الحس، و نهني الجماعة اللي بعثت تقللي ملا راحة من دوتك، لا راني مزلت قاعدة علي قلوبكم. مادام البلوقسبوت رزق البيليك، مادامني مزلت قاعدة فيه.

المهم يا جماعة، بعد اخر تدوينة، قاعدة في امان ربي نحل ف الايميل و نشوف اش فما و اش ما فماش، و ما راعني الا انو واحد غير معرف ركح في سي عمروش و في سيدي الشيخ تيتوف بطريقة مجانية. سيدي الشيخ تغشش و قالي كيفاش تخلي التعليق في اطار حرية التعبير. انا حشمت بش نقول اللي اصلا ما نعرفش كيفاش يتنحى تعليق، و زيد مل فوق، ماو غير معرف ياخي تاخو علي خوك؟  حليت بش نجاوب سيدي الشيخ، ياخي ما فطنت كان بالارديناتور متاعي حللي شباك -تي وندو بالعربي- و قاللي (اييه، تي كيما نقلكم)، 
- اش تعمل؟
-هاك تشوف بش نجاوب الشيخ تيتوف يمشيش يتنبز و يتخمر علينا..
-لا يا خويا جاوبو وحدك، اخطى خوك!
-كيفاه بش نجاوبو وحدي؟ ياخي ناخو كار المطار و نهبط لبنزرت و نبدا نعيط بالله ريتوش الشيخ؟ ماو من هنا و تفضت الحكاية..
-لا يا للا، دبر علي روحك، صحيح بيناتنا عشرة ، و ما ترقد كان بحذايا، بلاصة ليا و بلاصة ليك و قداه من مرة من قوة المعزة تكمل ترقد فوقي تسخايب روحك خفيّفة و ما تاكل قدمة الا ما توكلني معاك فتفاتة، و ما تشرب الا ما تبزع عليا قطيرتين تلاثة... هاذا الكل في شيرة و الدوانة مع الشيخ في جهة اخرى. ايا خويا انست ،انا بش ننتحر بكرامتي وحدي وحدي...
- يا ولدي استنا، يا ولدي اش بيك...
-...............
-يعيش خويا جاوب
-...............

سي الانديناتور متاعي سكت، لا عاد يتكلم لا يوري تصويرة، سكرت، حليت ، قلبت ، ضربتو علي ظهرو (ماني من جيل التلافز اللي كانو يضربوهم علي ظهرهم بش توضاح الصورة)، شي!!! مخو تحرق و مات! 
هيا ليلة عديتها نبكي و نمخط، و حالتي حليلة و كل ما نتذكر العشرة بيناتنا و الفضايح اللي كان هوا في بالو بيهم كل ما نزيد نتقهر. اما باقي مزال عندي امل. قلت غدوة نهزو لاماليه اتوا يقعدولو راسو و يقولو عيب ارجع جاوب بنت الناس.

ماكنتش م العاكسين، صبحت نسري ع الصباح قبل الطلاب (لا مش الايتوديونات، هاذوكم يحلو عينيهم الحداش، نحكي عللي يطلبو قدام قورمنديز، ماو طلبة الجوامع معادش توكل خبز). هازتو في يدي تقولش عليه مريض و ندادي هاو بش يحلو هاو بش يسعفوه. حلو الجماعة دخلت دمعتي علي خدي و شادة روحي بالسيف. مديت سي الشباب و قلتلهم اش صار و هوا كي تجي تشوف ما صار شي. خذاو الاسم و اللقب و نومرو التلفون و ما كفاهمش، كمل الراجل سالني سوال، حسيت بنفس الاحساس وقت اللي كنت ف الابتدائي و يجي الطبيب المدرسي و يقلك انزع قدام الخلق...
- و شنوة المو دو باس؟؟
- ..........، مهمهمهمهمهههه، صثستينب يهثقس
-اه؟؟
- لازم المو دو باس؟؟ ما تنجمش تحاول ماغيرو؟؟
- لا لا ، لازم. 
شديت ورقة و ستيلو و كتبتهولو و انا نرعش بكلي ووجهي حمار و العرق يسلت عليا. الراجل لا حشمة لا جعرة، قام يعيط 
-هاذا المو دو باس متاعك xxx xxx xx...
هوا ما كملش و انا ترميت علي فمو - و يحمد ربي ما ترميتلوش علي قرجومتو خنقتو منها- يا ولدي اسكت، ياخي ماكش ترا فيه؟ لازم امة محمد الكل تسمع؟؟
-لا نثبت و برا...
(في قلبي قتلو يعطك تثبيتة في حيط). 

عاد خرجت من بحذا الجماعة و انا حالتي حالة، طلعت ف الكرهبة و بحركة لا شعورية نزلت علي فلسة الراديو، ياخي جات ف الهوا، و مبعد تذكرت اللي البارح جماعة ولاد حلال كسرولي شباك الكرهبة و هزو البوست. اما الحق يقال، جماعة سراق بضمير، قبل ما يهزو البوست خرجو ديسك موعود متع عبد الحليم اللي كان فيه. الحق حشموني علي روحي، فاش قام عليا نحطلهم ديسك من عامت اللي حفرو البحر و ترصيلهم يرجعو فيه و نضيعلهم وقتهم؟! 

اخاطاونا من حكاية شباك الكرهبة و خللنا في الارديناتور، ماو حتي جاتني لحظة قلت ما صاب ما يرجعش جملة  و يتهلك، خير ماكا الفضايح الكل تخرج! بانا وجه بش نعاود نقابل الراجل بعد ما يحل و يخرجلو الخنار؟ لا لا مش البلوق برك، هاذاكا خفافي، و لا حتي التصاور.. ياخي مش قبل الكاميرا نوميريك كنت انا و صحابي نعملو "تصاور الفجر" و هيا تصاور نعملوها بعد تلاثة ولا اربعة ايام ما غير نوم يعني في حالة غير طبيعية. ماو كنا نهزوهم kan meme بش نطلعوهم -و لو نمشيو متنكرين سروال و فوقو جوب و حجاب مع كسكات مع مرايات الشمس، يعني اخترعنا الحجاب متع ها النهارين و ما فيبالناش، هاذاكا الكل بش المصور ما يعقلناش، وهوا تقولش عليه ماهوش بش يرا منظرنا في التصاور غير الذكا يحضر و يغيب و برا... 

و لا حتي اكا المواقع متع les grands joailliers نبدا نحل و نتنهد، و انا تقولش عليا بش نشري من عندهم بالقمل اللي في راسي، تي كيما الولاد عندهم غرام بالكراهب، البنات عندهم غرام باكا الفرت. اما المصايب لخرى. و هاو مثال على سبيل الذكر لا الحصر... 

الراجل كان حل الاردناتور، بش يلقى ملف كامل بالتصاور و التعاليق متاعي و جدول يلخص و يوضح طرق التعامل مع ثعابين المناطق الاستوائية... انا.... اللي الفار الوحيد اللي ريتو ف حياتي هوا متع ratatouille  و المنطقة الاستوائية اللي نحوس فيها هيا البلفيدار، حاطة في مخي بالحق انو كي نمشي نحوس ف الامازون، و يعرضني حنش anaconda و تمساح، نمشي للتمساح بساقيا علي خاطر يمكن فيه ما يتفض، لعلا نسكتو بيد ولا ساق. ماو قاللك الـ anaconda تغلب التمساح و تاكلو و تشرب بعدو قازوزة بوقا سيدر بش تهضم! ولا نذكر في روحي كي نحب نمشي نحوس في استراليا و يظهرلي نعمل غطسة، نثبت قبل ف اكا البلاصة فما كوبرا متع بحر ولا لا... ماو قالك فما كوبرا كيما اللي ف البر مسمامة و الكل، اما تعوم و تغطس. معناها ماعندك وين تهرب منها، قاتلك قاتلك!

 الله توا هذي طفلة بعقلها و مواطنة بش يبعثولها بطاقة ناخب بش تنتخب في 2009 ؟؟ فما عباد زايد معاهم الديمقراطية و يحلولهم الانترنيت. انا يا اخي  و انطلاقا من تجربتي الخاصة من مشجعي فخامة عمار 404 علي خاطرنا ناس ناقصين وعي، ناس ماعناش ثقافة هادفة و ملتزمة. و ماصاب حتي يعملولنا كيما مصر، قبل ما تحل بلوق تمشي للمركز يعملولك فيشة و تصحح علي روحك التزام. قداه منها الـ ATI نهار كامل وهوما يسترو ف الخنار  و العار اللي نعملو فيه! ربي يصبرهم علينا و برا! 

ايا سيدي، باب السما نهارتها طلع محلول، ربي استجاب دعائي و اكا الارديناتور طلع مخو تمسح، مات، مافيه ما يتفصل، معناها لازم يحطو ديسك دور جديد و يرجعلي الارديناتور جديد نبرة، و كان شيئا لم يكن! خدمتي متع سينين، و قرايتي و تصاوري و غناتي، الكووووول امسح مات... حياتي الكل قضاو عليها بجرة قلم. عزيني نقبل العزا. و نقول في قلبي اش لزني نخلي غير المعرفين يشريو الشبوك مع الشيخ تيتوف. 

لا، و نزيدكم زيادة، العملية هاذي، بش تتكلفلي جلدية، حاجة رخيصة بالكل! تلاثميات دينار برك!! اش بش نعمل اش بش نعمل... منين بش نجيب الفلوس بش نواجه ها المصاريف غير المحسوب حسابها... صحيح انا نسال برشا ناس شوية فلوس، اما مل العام الاول ف الجامعة تعلمت انو سيدي عربي كي تغلط و تسلفو اعتبرها صدقة علي صحتك و بدنك. زايد بش تقلو هات رجعلي متاعي علي خاطر ها الكلمة تتكلفلك غالية برشا! ماو عامتها طفلة كثرت علي ما وصاوها، نهار كامل و هيا مرسكية معايا هاني نخلص في قهوة هاني نخلص في فطور.. و انا تمانيك النسا ع النسا ما نحملوش... جيت نهار حشمتها قدام جماعة صحابنا و خليتها هيا تخلص. قدمت و خرت، نهار الاثنين صبحت تحكي للي يحب يسمع، بنت عايلة راتها نهار السبت العشية (ركز معايا، سبت و عشية، تي انا يجعلني بقية الايامات نجيلها اكا الخربة) راتها في حديقة ورا الكلية هيا و طفل درا اش نوة يعملو.. افهم وحدك! صحابي بالطبيعة ضحكو عليها، من جيهة علي خاطر يعرفو الريق هاذا ماعنديش، وحتي كان عندي م البهامة مانيش بش نجي لحديقة عمومية و ورا الكلية زادة، وخاصة خاصة علي خاطر اكا السبت بالذات كنا مع بعضنا في السينما.

المهم، كي تسلف، استخلف. 

ايا سيدي، غزرت يمين يسار و جاتني لوهلة فكرة انو نخرج شوية دبش قديم متاعي نبيعو فريب. اما كي جيت نحسب فيها، بش ندبر تلاثميا، لازمني نبيع دبشي ودبش دارنا و نكمل نسرق الصابون اللي ناشرينو الجيران... زايد. معناها الحل الكلاسيكي الوحيد. ماو باستبعاد الطرق المشروعة كيما الشهرية اللي وفات قبل ما تجي و الطرق غير المشروعة كيما السرقة ولا نسود وجهي و نهبط نطلب ف راس النهج، ما قعدلي كان الوالد ربي يفضلو. ايا وخرت قدمت و راجعت بعض التقنيات من كتاب عظيم كتبتو في يوم الايام، وهوا كتاب "اقصر السبيلين في التحيل علي الوالدين". بطبيعة الحال، الطرق متاعي الكل اثبتت نجاعتها من زمان، و تكللت جهودي بالنجاح و من ثابر نال، الوالد علي قد ما سخفتو و حممتلو قلبو علي بنتو اللي تطشفر ف الشوارع، عطاني اكثر مللي حاشتي بيه و زيد دمعة هبطتلو. 

و اكاهو عاد هاك حكيت كل شي بالبا و التا، يزي م الدوة ، المهم اللي انا رجعت و هاني بش نفرغ قلبي علي ها النهارين صيام ع التدوين. ايا في وديعة ربي.  

 

كتبتها:bent 3ayla على الساعة: 1:48 م

تعليق البرباش ...

هههههه....

جاتك جلدية تتسمّى، أنا عمناول اتضربلي الديسك متاع الاورديناتور، السيد اللي يصلّح طلب عليّ ثلاثمياة و خمسين بش يرجعلي الشي اللي فيه... لكن خوفا منو لا يبربش في الدوسيهات، استخلفت ربي حتى في خدمة السنين و مشيت شريت واحد جديد و برّه...

يخلف عليك ربّي...

19 يناير 2009 في 4:40 م

تعليق femme au foyer ...

3awda maymouna ya lella
5allit 3lina blasa kbira rak!

19 يناير 2009 في 4:41 م

تعليق غير معرف ...

ahla bent 3ayla w 3awda maymouna w enchalla hadhaka 7add ellbas
amma ana 7abbit kan thabbtina copie men elktab "اقصر السبيلين في التحيل علي الوالدين" surtout ba3d ma ettoro9 elli fih athbtou naja3ethom .. elwa7ed ya9ra 7sab lelayyem el3asiba elli jayya lol

19 يناير 2009 في 4:45 م

تعليق غير معرف ...

el hamdella 3la slamtek.bsaraha twahachnak barcha. ma 3adech t3awedha.

19 يناير 2009 في 5:48 م

تعليق Übermensch ...

نضم صوتي الى صوت فؤاد في المطالبة بنسخة من "اقصر السبيلين في التحيل علي الوالدين"
يا بنت عايلة اغيثينا تربح فينا ثواب خوك اوبرمنش ضاقت بيه الدنيا و ما عاد بيها وين !!

19 يناير 2009 في 5:58 م

تعليق bent 3ayla ...

يا مرحبا يا مرحبا، اهلت الاقمار واشرقت الانوار. تي هاي الجماعة الطيبة جات!!
و كانكم ع الكتاب، توا نهبط منو مقاطع مفيدة للعموم. ماو كان ما لقيتش شكون يشريه، ماو الكتب ماعادش توكل خبز، ع الاقل نربح دعيوة خير.

19 يناير 2009 في 6:35 م

تعليق غير معرف ...

makther 7issek ya tofla hahha aya behi ki rja3ti twa7achnek

19 يناير 2009 في 7:03 م

تعليق kmr ...

7amdellah 3la slamtek ya tofla, w 3la slemet il PC mte3ik... w brabbi hedha ma3adech tor9ed 3lih, w sois un peu égoiste, mafiha bèss: koul wa7dek, ochreb wa7dek



eyh ma9oltelnech 3ad, chnowa il mot de passe???;)(entre parenthèse, rahou howa madem tlab il mot de passe, c'est que newi ybarbech, 5ater en théorie ynajjem yod5el bil compte administrateur)






ahhh esma3, encore une chose:

thé bil 7lib wel 3sal?????????????
:s :s :s :s :s :s :s :s

19 يناير 2009 في 7:15 م

تعليق غير معرف ...

يا للا مرحبا ..رانا توحشناك برشا!!
الحمد الله على سلا مة "الشختور" ..يا ربي الأرديناتور!!
راهم les laptops لا دين لا ملة حاشاك و ديما يجبد بيك و يضيعلك ذكريات سنين.
انا ماللي عملها فيا عمناول, وليت je garde tous mes dossiers fel boîte mail mta3i!!
Au moins ils seraient tjrs accessibles!

19 يناير 2009 في 8:40 م

تعليق غير معرف ...

باش نرجع لتونس نهار الخميس باش نجيبلك les macarons اللي تحبهم. توا نبعثلم مايل...ضحكت ضحكة تستاهل عليها كل خير.

19 يناير 2009 في 9:13 م

تعليق bent 3ayla ...

ك.م.ر وينك يا ولدي هاني قريب نرقد. و التاي هاذيكا وصفة هندية. ضربة ضربة للبرد.

مرا، يا اختي و كي يدخلو يقلبوهالي اكا البواتا مايل؟؟

غير معرف، لا والله لا صارها يزي يا راجل، اما نحبهم بالكراميل و الزبدة المالحة

19 يناير 2009 في 9:16 م

تعليق kmr ...

éna hani, winek inti???

19 يناير 2009 في 9:20 م

تعليق bent 3ayla ...

ناكل و نقرا اش فما ف الدنيا

19 يناير 2009 في 9:23 م

تعليق غير معرف ...

باش نجيبهملك بلحق les macarons قلي برك المايل متاعك قبل متحط فيهم دوسياتك كيما قتلك مرا

19 يناير 2009 في 9:42 م

تعليق bent 3ayla ...

لا يا ولدي يعطيك الصحة تقولش عليك جبتهم، نفدلكو راهو!! كان ع المايل اهوكا ف ملف التعريف

هاو لهنا زيادة للتوضيح اما للتواصل البشري مش للماكارون. ملا حشمة!
bent.3ayla@gmail.com

19 يناير 2009 في 9:45 م

تعليق resiros ...

هيا أهلا بيك، طولت علينا الغيبة،
أما عندي ملاحظة صغيرة:
كان عندك الديسك دور القديم، normallement تنجم بشوية زهر تسترجع أكثرية الملفات(فما برشة برامج يعملوا هل خدمة، حط data recovery tutorial فالgoogle و تبع الخطوات)، و بدل صلاحك راهو غشاش، اسوامو مش معقولة.

19 يناير 2009 في 10:03 م

تعليق غير معرف ...

La réparation/changement du disque dur ne doit pas dépasser 100d au grand max..
si le Pc atteint l'étape ou on te demande le mot de passe windows alors le disque dur est intacte a moins que tu parlais du mot de passe Bios..
Enfin cette histoire de réparation ne colle pas :))

Bref, je te félicite pour ton blog amusant, un style hilarant malgré que parfois je me demande sur la véracité de tes propos mais même si ce ne sont que des mensonges (désolé pour ce mot pas trés sympa) c'est trés "entertaining"..

Bonne continuation..

19 يناير 2009 في 11:26 م

تعليق bent 3ayla ...

لا لا و راس خويا كيما نقلك. ماو انا الانديناتور متاعي مش وندوز، ماك، و زيد خذيت واحد 320 GO مع اللوجيسيالات اللي عاود صبهم، و الاداء ع القيمة المضافة تجي قد قد.
اما الحكايات الكلها صحيحة يمكن نبالغ كي نوصف اما لب الموصوع صحيح.

19 يناير 2009 في 11:35 م

تعليق غير معرف ...

Ahla bik bent 7oumti
Je vais faire des remarques si tu me permets

متمثل في ترموس تاي بالحليب و العسل
Tu sais le the est très bien pour la santé mais l ajout du lait réduit l absorption du catéchines. Donc ce que tu bois n est pas nutritionnel.

ما تقولولي تحبو تقسمو الباكو وفا،
Tu m a rappelle d un ami à moi, il est allé en Turquie et il nous a dit qu’il a ramené avec lui des pistaches et des fruits secs mais lorsqu’on lui a demande un peu il a dit ouffa !!

شديت ورقة و ستيلو و كتبتهولو و انا نرعش بكلي ووجهي حمار و العرق يسلت عليا
Aller c koi ton mot de passe !!! A ce point il est impolis hehehe !!!

اللي الفار الوحيد اللي ريتو ف حياتي هوا متع ratatouill
Ena je ne me rappelle plus combien des souris j ai tue !!! Je sais je suis un assassin !!!

ربي استجاب دعائي و اكا الارديناتور طلع مخو تمسح،
Dis moi tu as ouverts un email avec invitation comme titre?

اما مل العام الاول ف الجامعة تعلمت انو سيدي عربي كي تغلط و تسلفو اعتبرها صدقة علي صحتك و بدنك
Non seulement les arabes, même les européens, j ai donne a une personne 300 euros et elle est disparu (la personne avec l argent) le problème est que je ne suis pas du tt labes 3lya, ma3netha j ai besoin de mon argent. Cette histoire date presque 4 ans et jusqu’ a maintenant j ai du mal quand je me souviens de ca.

وحتي كان عندي م البهامة مانيش بش نجي لحديقة عمومية و ورا الكلية زادة،
Immella ween timchi 

Malla ta7lil nas 3maltou ena, tbarkallah 3laya !!!

19 يناير 2009 في 11:36 م

تعليق bent 3ayla ...

Tu sais le the est très bien pour la santé mais l ajout du lait réduit l absorption du catéchines. Donc ce que tu bois n est pas nutritionnel.

ياولدي كان ع التغذية انسا، ربي يسترني م السكر. و اللي مات بشبعة لا قام



Tu m a rappelle d un ami à moi, il est allé en Turquie et il nous a dit qu’il a ramené avec lui des pistaches et des fruits secs mais lorsqu’on lui a demande un peu il a dit ouffa !!
حتي انتوما زادة واقفينلو كي الشوكة في حلقو؟؟ والله انا متعاطفة معاه صاحبكم. وزيد الصحبة مش في كل شي! فكو عليه و عليا!!!


Aller c koi ton mot de passe !!! A ce point il est impolis hehehe!!!
بالعكس علي خاطرو متع ولاد صغار ولا نسا كباااار يخافو لا ينساوه...


Ena je ne me rappelle plus combien des souris j ai tue !!! Je sais je suis un assassin !!!
نو كومانت!!! فاروسيد


Dis moi tu as ouverts un email avec invitation comme titre?
هاذي سامحني ما فهمتهاش


Non seulement les arabes, même les européens, j ai donne a une personne 300 euros et elle est disparu (la personne avec l argent) le problème est que je ne suis pas du tt labes 3lya, ma3netha j ai besoin de mon argent. Cette histoire date presque 4 ans et jusqu’ a maintenant j ai du mal quand je me souviens de ca.
اش لزك تسلف؟؟؟تستاهل امالا! ولا انتي بيدك تسلف و تلف


السوال الاخير، قللي انتي و فيدني بخبرتك. ولو الموجود ما تقرش نفسك بش تسلم عليهم باليد، خلي حاجة اخري!

19 يناير 2009 في 11:51 م

تعليق غير معرف ...

Dis moi tu as ouverts un email avec invitation comme titre?
هاذي سامحني ما فهمتهاش

j ai entendu il y a quelques jours qu un email circule, il a comme titre dans l objet INVITATION mais c est un virus qui brule le disque dur

السوال الاخير، قللي انتي و فيدني بخبرتك
wallahi 7atta ena weld 3ayla
je rigole lorsque j ai pose la question

19 يناير 2009 في 11:59 م

تعليق bent 3ayla ...

لا لا ، ما حليت شي، تي يجعلني نحل الايمايلات اللي تهمني

يا ولدي حاشاك، نفدلكو... اما حتي انا نتنبز كي تقلي وين تمشي...

20 يناير 2009 في 12:01 ص

تعليق غير معرف ...

aller je te dis bonne nuit
et j attends ton prochain post
a bientot

20 يناير 2009 في 12:05 ص

تعليق غير معرف ...

ولو الموجود ما تقرش نفسك بش تسلم عليهم باليد، خلي حاجة اخري!

ken tchoufni ena tawa tbaddel rayek

20 يناير 2009 في 2:39 م

تعليق bent 3ayla ...

ايا بوزي و حط تصويرة و حط مل لوطي المهنة و قداه شهريتك...

20 يناير 2009 في 2:55 م

تعليق غير معرف ...

3ad ibda inti
7ot taswertek bech nchoufek et qu est ce que tu travailles
je ne veux pas savoir ton salaire
et chouf chouf nertha beek mani 9tolek ena mafamech menni 2

20 يناير 2009 في 4:31 م

تعليق غير معرف ...

@ tharbou fi rou7i

برش على تونس زوز كيفك. مالقطعة الأولى بطّلوا الإنتاج

20 يناير 2009 في 4:49 م

تعليق tamtouma ...

warariiii !
aya hamdoullah 3la slamtek yé benti wallah twa7achtek w twa7acht tadwinètek :D
hamdoulla 3la slèmet hak echenti 3indek (maw èna el pc msamyetou chenti lol)

7asilou lilla 3awda maymouna w allah lé ye7remna mennek

PS: w kèn ta3tini fasl men
كتاب "اقصر السبيلين في التحيل علي الوالدين"
ta3mel fi o5tek mzia

20 يناير 2009 في 6:44 م