اليوم جبتلكم حكاية سخونة اما بيدونة برشا. اللي عندو القلب ولاّ الدم ولاّ السكر، ما غير ما يكمل يقرى. لا يجعلني جرة. و اللي مازال شباب و عندو امال و طموحات عريضة، كيف كيف، يجعل صحوتك ع الدنيا على غير يديا، برا كمل احلم بالعصافير و الفراشات. و يرحم فمها في كلمة ميادة بسيليس "خلي كل شي ماشي لا تصحي غفلان"... 

ماو اختكم بنت عايلة ها النهارين ضربتها الفدة و تتالت المصائب و ارتفع عدد الاقارب و الاحبة المقيمين في مستشفياتنا من ثلاثة الى خمسة، قلت مافيها باس كان نبدل الجو و نروح ع النفس و نلحق شبابي قبل ما الشعرتين الكحل اللي في شعري ما يشيبو، وقتها بالحق ما عاد عندك ما ترى فيا. عملت اتصلاتي بشلة المرح متاعي و هي متكونة من اصدقاء يجمع بيننا مبدا بيعها بلفتة و xxxx بو اللي يفسدها. ورغم اللي الدنيا بعدتنا علي بعضنا، قعد بيناتنا الحرص انو نتلاقاو عل الاقل، مل الباب الواطي مرتين ف الجمعة. و هاذا علاه نجمنا في عمرنا هذا ما نلتجؤوش للطب النفسي ولا بيدون الجفال. 

الشلة هاذي المتكونة من ثلاثة جحيشات و وليد، هاذاكا خونا الكل، اقوي شبكة للتنسنيس و جيبان الاخبار، عاري و لابس. ما يسلم منا حد، لا اللي اللي نعرفوه لا اللي نسمعو بيه لا اللي نجهلو وجودو، لا الصغير لا الكبير الي يدبي ع الحصير. وهاني نوجه اقتراح للداخلية كان حاشتها بمعلومة ولا حاجة -تمشيش تسميوها قوادة-  نحن في خدمة الوطن. 

المهم يا سيدي بن سيدي، اليوم تلاقينا و بدينا، ديبيريفينغ علي حالو، واحد ورا لاخر يسرسط اللي عندو، النظام يعيش ولدي، بش ما نفلتو شي، ونتاكدو من وصول المعلومة و تعم الفايدة. عاد من حكاية لحكاية، بالطبيعة نسالو اللي كانو يقراو معانا اش عاملين و وين وصلو و خاصة لوين هجو. اخبار طفلة منهم طلعتلي الدم لراسي و خلاتني نندم ع النهار اللي جيت فيه للدنيا. ايا سيدي، تبعني م اللول. 

الطفلة هاذي حليلتها، مقارنة بالمعدل الوطني متع الجمال اللي هوا -ما غير مانكذبو علي بعضنا- تاعب برشا. متثقفة، دارهم متزمتين و علي قد حالهم. لكن المشكلة -قبل ما تبدا بصاقاتكم تتهابط عليها- ربي بلاها باختلال في تكوينها و هو انو عندها كمية الخبث اللي م المفروض كانت تتوزع علي ميات طفلة. هيا كل مرا وحدها ويا ربي تسلم منها، فما بالك بها القنبلة الذرية هاذي. الرحمة لا! عندها قدرة غريبة علي انها تشرب مخ اللي يحكي معاها و تتحكم فيه كيما تحب و توهمو باللي يحب. حتي م البنات، ما يفطنو بيها كان بعد مدة وبعد ما يتصدمو فيها مرة واثنين و تلاثة، فما بالك بالولاد! كان الله في عونهم. 

المهم، انا نعرفها قداه من عام توا، صحيح حارصة ع القدر و نعزو بعضنا من بعيد لبعيد اما باقي ما سلمتش من سمها. و بالرغم من هذا نقول البنات غايرين منها و يهولو.

عويم لتالي سمعت اشاعة عليها اللي هيا عملت علاقة مع استاذ في الكلية. علاقة من اكا النوع اللي تراه ف الافلام المصرية. الراجل كان خاطب و علي ابواب عرس، جات هيا تلهوثت عليه و حرصت بش انو خطيبتو تعلم بطريقة بشعة برشة، و بالطبيعة قامت القيامة و تخمرت الطفلة و قررت بش تفضها، اما والديها ناس ظاهر فيهم بعقلهم، ريضوها و عقلوها وخلاوها تسامح الراجل. اما المصيبة اللي هوا لا حشم لا جعر، مشالهم للدار و قالهم بنتكم ما تلزمنيش و ماهيش م النوع اللي بش يشرفني اجتماعيا. بنت دار و عاقلة وخاطيها. بالعربي طافية. و انا نحب وحدة قافزة و تشرفني قدام العباد. 

انا وحدة م الناس كذبت الحكاية و قلت يستحيل جملة  و تفصيلا. مش علي خاطر نعرفها خاطيها، اما علي خاطر نعرفها ما تطمعش في استاذ. طموحها اكبر ببرشا. و قداه من مرة تجي بش تتخطب لولد شكون و شكون، لكن بسترة ربي والديه ياقفولو ويقولولو الف واعوذ بالله. و غير هذا و دونو، ما يرضيش غرورها، بالعربي تحشم بيه علي خاطرو خليقة و راس كيما الناس. تحب المزيان ، القدع، اللي يغزرولو البنات و يدوخو. تحب اللي يحسدوها عليه، و تحمصهم هيا بيه. الله غالب، فما ناس مريضة. 

المهم اللي كانت اشاعة، اتدعمت منها هيا شخصيا وقالتلهم بالحرف: ايييه، انا عملت و قديت و بعدتهم علي بعضهم، و هوا ناوي ياخوني انا، مسكين! جدت عليه. ياخي ما راش روحو و ما رانيش انا؟ 

ايا سيدي، الحكاية لحد هنا ما تعنينيش وما تهمنيش. كي هوا بهيم -حاشا ها الوجوه- ضيع من يدو اللي تصونو ومشى للي فضحتو عند العباد و لتوا ما فطنش اللي هوا معاشر لفعى، ربي يزيدو، انا مستحلية فيه. اما اللي قهرني و خلاني نرحي دخلاني، هيا الـ mise a jour متع اليوم. 

ماو قالك الطفلة كملت الماستار متاعها ها النهارين. و خذات درجة تقدير عندنا سنين و منين ما سمعناش بيها. اخطانا يا سيدي م الظن العاطل و انو هوا تكلم عليها و اكا اللغة. لعلا هيا استغلت اكا العام و نصف و تجاوزت قدراتها اللي الناس الكل تعرفها توا ستة سنين، ولات بقدرة قادر تجنقل. اما اللي بهّم الناس الكل، و شعرة لا عمل ثورة ف الجامعة، هوا انو الطفلة هاذي اللي ما عندهاش نهارين مللي نجحت، تعلق اسمها في جداول طلبة السنة الرابعة بش تقريهم كاستاذة مساعدة!!!! 

ايييييييه يا سيدي! الطفلة اللي بين عشية و ضحاها ولات نابغة، اللهم زد وبارك، اكدتلك حرص الدولة علي توظيف و تشغيل اصحاب الشهائد العليا! نتحدى اليابان كان عملت اقصر من ها الاجل في التوظيف! و توشحلو نهار كامل وتقولو البطالة عاملة مسد! و كل واحد يكذب و يقول راني بطال عندي اعوام و قريب نهبط نمسح و نسيق بش ندبر خبزة ولا كي تزيدو تكذبو ع العباد و تقولو الاكتاف و الرشوة. هاو اللي ثني الركبة و حب يخدم هاو لقى خدمة، يزيتوشي عاد؟

مانيش بش نزيد نعلق، خليكم انتوما حللو و ناقشو وحدكم، على خاطر انا ماشية نقيس ضغط الدم متاعي الدنيا بدات تلعب بيا. و لاول مرة بش نتمنى انو لفعى هاذي و لاّ الوشقة اللي عملتو سلوم بش توصل للي حاشتها بيه يتعداو من هنا و يحشمو علي رواحهم و يعرفو اللي ولاو مضغة في افام لعباد! 


كتبتها:bent 3ayla على الساعة: 9:09 م

تعليق kmr ...

ehhh oui!! allah ghaleb, c com ca!!

éna manebkich 3alli blech 5dem, b9odret rabbi, w 7atta ken tal ezzmen, bech ye5dmou bech ye5dmou...

amma msa5finni zouz:

hek essghayrat illi bech t9arrihom, ech bech t3allemhom?? ettlahwith 3la errjel il m3arssin, wel utilisation de TOUs les avantages et les moyens dont on dispose pour parvenir a ses fins???

w men ne7ya o5ra, msa5efni errwijel illi bech tal3eblou b'mache3rou, bmo5ou, w ba3d beflousou... w yomkon b3omrou.... ili w ilou rabbi!!

(chbik btit inti ilyoum?????)

20 يناير 2009 في 10:36 م

تعليق bent 3ayla ...

كان علي مستوى التعليم، لا هاذيكا حكاية فهمناها و وفينا، من تعيس الي اتعس. و كان ع الراجل يستاهل و الله لو كان تزيد تعمل فيه، انا فرحانة، مراوح تمروح علي قلبي. بالله اش حلها توا؟؟ حتي ايترا قلاس بالشكلاطة الدنيا باردة... اففففف
بطيت علي خاطر كنت نلقط ف الاخبار و نسمع ف الدمار

20 يناير 2009 في 10:39 م

تعليق غير معرف ...

c est pour ca j ai deja decide de ne plus rentrer en tunisie
7alla kalba wallah

20 يناير 2009 في 10:53 م

تعليق resiros ...

tounes bled el gharayeb wel 3ajeyeb!!!
n7eb n3ref kifech dabret el wathifa?

20 يناير 2009 في 11:14 م

تعليق bent 3ayla ...

والله كان ما فهمتش.... ربي معاك!
ماي مش ترسمت، اما vacataire حسب ما فهمت. ما تستوفاش الشروط القانونية الاخرى.

20 يناير 2009 في 11:36 م

تعليق غير معرف ...

ااااااه يا قلبي ...
الله يهديك يا طفلة حيرتلي مواجعي يا ليتني سمعت كلامك و ما قريت هالتدوينة ماهو يقولك المثل : من انذر فقد... العصا ليه...
ماشي لبالي الي قلبي قلب صيد و حتي شي مايحركني يا خي طلعت فينووو !
الحاصل الله يصبرالتلامذة كيف ما قالت قمر.قاعد نشوف في معلمين واساتذة منهم برشة حالين مدونات لادين لا ملة ما يستاهلوش باش يكونوا حتى مسوءلين على مرحاض عمومي هاذيكا الي يقولولها "طوالاط" فما بالك باش يكونوامسوءلين علي تكوين شخضيات الجيل الجديد.
بالنسبة للطفلة ونجاحها ما يكون كان نتيجة للسياسة الرشيدة متاع سنة الحوار مع الشباب و الاخذ باسباب الرقي و الازدهار في مواجهة الهوة الرقمية باعتماد استراتيجية الري قطرة وهذا فخر لكل تونسي و عربي كما انو يدعم شعور الواحد بالمواطنة و يزيدو نخوة و اعتزاز ...نموت نموت و تحيا الوصولية و الانتهازية
انت قلت شنوة حلها انا بصراحة كيف نفد سعات انقول حلها 2 ميترو حبل و خلي اهل البلا في البلا اما اللطف عليك. الحل بين ايديك قالك فما عراف يدو تجمد الماء اي مالا كيفما نقلك شي لله سيدي "نونو" قالك السيد جاي من مصر و يداوي "بالبوخوخو" كان تحب تمشي تعمل طلة امشي بحذا مقر التجمع و اساءل على سيدي نونو المصري اول بنية مدهونة بالقزوردي اتوكل على ربي و ادخل وماتروح كان فرحانة وفي يدك كنتراتو متاع الخدمة الي تحب عليها و نعرف زادة الي انتي باش تموت و تاخوا وليد الحلال (ههههههههه راك تسب فيا بالمقلوب)اهوكا حاجة و حويجة تروح بكنتراتو خدمة في يد و شختور في اليد لخرا. برااا عاد قول خوك امين خايب و ما تنسانيش في دعيوة خير...

21 يناير 2009 في 12:04 ص

تعليق غير معرف ...

اختبار الفواكه ...الي يكشف خفايا النفس البشرية

تخيل نفسك في وسط غابة و انك وجدت كوخ بجانب نهر.
فتدخل الى الكوخ و ترى على يسارك 7 سرر صغيرة و على يمينك طاولة صغيرة و حوليها 7 كراسي.
على الطاولة توجد سلة تحتوي على 5 انواع من الفاكهة.
و هي:

-تفاح
-موز
-فريز
-خوخ
-برتقال

أي منها تختار؟ اختايرك سوف يكشف لك اشياء كثيرة.





النتائج:
-تفاح
اختيارك يدل على انك شخص من النوع الذي يحب اكل التفاح.
-موز
اختيارك يدل على انك شخص من النوع الذي يحب اكل الموز.
-فريز
اختيارك يدل على انك شخص من النوع الذي يحب اكل الفريز.
-خوخ
اختيارك يدل على انك شخص من النوع الذي يحب أكل الخوخ.
-برتقال
اختيارك يدل على انك شخص من النوع الذي يحب أكل البرتقال.


C’était le test psychotechnique qu’elle a passée
El3a9ba lelbattala elkol

21 يناير 2009 في 1:01 ص

تعليق bent 3ayla ...

سي امين، ايا يهديك ما تجبدش المدونين. مانيش ناقصة الارديناتور يعاود يتفرش مرة اخرى.
و كان على سي نونو، نعرفو مهدوي، بعيد علي اختك...
وكان الخدمة ما تجي كان من ها الطريق، هاني في دار بابا و لا يحطني لحد..

سي غير معرف الخضار، و الله انا البهلولة اللي جدت عليا و قعدت نتبع قلت يرحم من قرا و ورا، و لقيت روحي طلعت نحب الفريز! شوف يا سيدي! اهوكا احمر، زعمة يقبلوني ف دار الحزب؟

21 يناير 2009 في 1:10 ص

تعليق tarrouka ...

عادي الحكاية هاذي ولات منتشرة في الجامعات التونسية خاصة عند الناس اللي يعملو زعمة زعمة في البحث العلمي انا نعرف استاذ يقبل في المرحلة الثالثة متاعو 20 طفلة و وليد ولا ثنين و البنات كان الكعبة واختهامزيريا رقطة

21 يناير 2009 في 7:43 ص

تعليق kmr ...

ya a5 amin, min fadhlek, KMR, rahi mahich 9mar, w rahi mahich tofla jimla!!! faddit éna!!! :(



dhaherli lazemni nbaddel il pseudo :(

lool

21 يناير 2009 في 8:49 ص

تعليق عاشور الناجي ...

زايد

بالحرام زايد

التاريخ يعيد نفسه

21 يناير 2009 في 9:04 ص

تعليق Happyness ...

mal9it man9oul ken ahhhhh
netfakker fel faculté 9adech men 3arka 3maltha m3a assistant 5atrou n'est plus compétent, en plus 7atta el coorection de série ma ya3rafch ya3malha. w 3ala 9ad ma na3mlou chkéyét ennéfa3 rabi, ta3rfouchi 3léch?????????? 5ater 3andou CHKOUN......
ama erréjel yestahel w yéstéhel w yestéhl alf marra w marra o5ra, héka 7al elli ma yardhach belli 3tahoulou rabi

21 يناير 2009 في 9:19 ص

تعليق Happyness ...
أزال المؤلف هذا التعليق.
21 يناير 2009 في 9:20 ص

تعليق bent 3ayla ...

tarrouka ماو المصيبة اللي ولينا نقولو عادي!!!

kmr ياولدي بدلها mrk اصح و خير ترفع اللبس الكل.. وينك البارح في محطة التران؟؟؟

سي عاشور، من وقتاه وليت تحلف بالحرام؟؟؟ و الله غريبة منك هذي! سامحني وانتي معرس اصلا؟؟

انسة سعادة، كان انتي تقول ااااه، انا نقول ااااهيييين

21 يناير 2009 في 9:58 ص

تعليق غير معرف ...

ya a5 KMR matetghachech 3ad ena mellawel jit bech nekteb KMR mais ca ma parut bizarre comme pseudo hani sall7tha ca va hakka
?
bent3ayla j'ai pas cité de noms de bloggeurs mais je crois fhemtni 3la chkoun na7ki ;)

21 يناير 2009 في 11:42 ص

تعليق femme au foyer ...

ena na3raf wa7da 3and'ha maitrise "histoire-geo" w t9arri fil institut mte3 el moussi9a (t9arri fi des matiere e5taR3ouhom specialement liha)s7i7 hiya 3amla master fi nafs l'institut ama brabbi fesrouli kifech tji hethi aaaaaaaaaaaahhhhhhhhhhhhhh ya tounes fech t9assi!!!!!!!

21 يناير 2009 في 11:49 ص