عمك بوالعايلة يوخر يقدم و يبعثلي شلاكة ارض جو، تفاديتها في الدقيقة تسعين، اما راسي شعرة لا تفرشخ ع الحيط! 
لا لا ما تستعجلوش و تجيبو amnesty int تهد عليه و تحقق في معاملة الاب العربي لبنتو قبل ما تسمعو الحكاية. انا لو منو  و عندي فقسة عملتلي ها العملة، نمهدها بمدلك العصيدة، شوف جماعة عزيزة عثمانة يخلطو على عظم صحيح و الا يتبرعولها بعظام من عندهم... 

الحكاية مجرد سوء تفاهم كبير. ايا تبعو من اللول، منها تعذروني، و منها تدعيوا  لاكا بو العايلة المسيكن، يبعثلو ربي واحد يهز عليه ها المصيبة قبل ما يتسلسل في جرتها.

خالتي كلوفية اللي حكيتلكم عليها قبل  مرا تحب ياسر لمة النسا و هات شاشيتك هات صباتك. و انا تعجبني ها القعدات، ترا فيها العجب و دمار كبير و تعمل ضحكة بوبلاش. ديما تجي بحذانا، اما كي تبدا عندها قعدة من نوع خاص، معناها امي رافضة جملة و تفصيلا انو اللي بش يصير فيها يصير في دارنا، ولات تعيطلي بالذمة لدارها هيا. ها القعدات المشبوهة متمثلة يا في اسطمبالي، يا وعدة، يا دقازة يا حاجة ماكا الخرم هاذاكا. و انا نفلت ها الشي؟؟ spectacle live يا بوقلب! 

المهم، المعزة اللي تعزهالي كلوفية شي يشبه للكذب، لدرجة انو عامت اللي بش نعدي الباك، طلبتني بالسرقة وحكات معايا بالشيفرة بش نسيب الماعون اللي في يدي و نجيها نجري. خرجت نجري مفجوعة، حتي من طبلية الكوجينة لابستها، مشيت لدارها، لقيتها جايبتلي دقازة بالذمة، قالك مرا سرها باتع و يدها تجمدالماء، بش تشوفلي بش ننجح و لا لا! ايا كتمت ضحكتي و شربت اكا الفنجان و سمعت الخرافة و من بعد تلفت لخالتي كلوفية و قلتلها صارا هاذي الحكاية؟ تي هاو انا خير منها! قالتلي اللطف اللطف، المرا عندها سر عظيم ما تقول ها الكلام! قلتلها هات اعمل فنجان و اتوا ترى! قالك المصري المية تكذب الغطاس! 
تعرفني هيا عندي نوع م الغموض في شخصيتي و عندي طلعات. مدت اكا الفنجان و انا بديت، نسرسط، نسمي، نقول، هاو طريق سفر لولدها، هاو طلقة بينها و بين راجلها، هاو فلوس جاية. هاذا الكل شي  منو نعرفو (على خاطر المرا حياتها مكشوفة للناس الكل) و الا شي نتوقعو و باهتة لتوا ما صار. 
على نهاية العام الدراسي، ولدها نجح و قالك نمشي نقرا البرا (و هاذي حاجة قالها لصاحبتو اللي هيا صاحبتي، وبالتالي سمعت بيها  و امو لا)، و راجلها الحاج خاطيه، اكا الفرخ اللي كان مستحمل عليه العوج و الجهل متاع مرتو  و صلو و زاد هج (بالله راجل يبدا يلوج علي مرتو من دار لدار، بالله عندكم و الا عند الجيران، لا نهار فرح بقدمة سخونة في دارو لا شي) روح عمك الحاج خاطيه مرة في الصيف، لقا الدار تملا و تفرغ، و زيد مرتو قاتلو برا لوج وين تبات، عندي نساء جايين م الابعاد عندهم وعدة في السيدة المنوبية، ضياقت عليهم الدار، عطيتهم بلاصتك في الفرش! مزال يزيد معاها دقيقة؟ طلق و بعثلها النفقة، و اهايكا الفلوس جات! 
وقت اللي سمعت، حسيت بالذنب، ايه صحيح انا ما عنديش دخل ولا عملت لا يدي لا ساقي، اما مهما كان، توا المرا تقول تفايلتلي و الا حاجة. اما قلت ميسالش نطل عليها و نمد وجهي و نواسيها. انا دخلت للدار و التزغريد قام! كلوفية راتني و هيا ترمات عليا تبوس في الجبهة والكتف و تقللهم اهيا اهيا! 
المرا ما تابتش، و ما فهمتش! قالتلك انا بالحق عندي سر عظيم و دقة التحليل متاع الفنجان متاعي وحدها، لا شافتها عند سواسية لا عند كوافية، بنت عايلة مكشوف عليها الحجاب و تعملك analyse detailee متع وضعيتك. 
انا نحلف و نتكتف ونقلها نفدلك و هيا تقلي كيفاش طلعت امالا اللي الحاج خاطيه راجلي بش يطلقني بعد ها العمر؟ حشمت بش نقلها اللي هيا مرا ما تتعاشرش و اللي ربي لازم يكتبلو الجنة عللي عداه معاها من عمر... 

ايا سيدي ولاتش في هاك الحضبة النسا تبوس و تجبهي اقرالنا اقرالنا، راني ولية، راني مضامة، راني مكسورة جناح.. و انا قلبي حنين، بعثنا جبنا renfort متاع قهوة م العطار و بدينا. كل وحدة نحكيلها تبهت، فمها يتحل، و هيا ناسية اللي حكاياتها نهار م النهارات حكاتها لمرا ما، في بلاصة ما، انشالله في قفصة. تونس صغيرة راو، و اللي يطيب مدفونة في مدنين يسمعوا بيه في عين دراهم من غدوة. و انتوما هكم تراو، ضربان اللوغة عندي و الحمد لله مع طرف نظرة ثاقبة و شوية برستيج، ما نحكيلكمش عللي صار في هكا العشوية. 

روحت للدار، نلقي امي محضرة عصاة زيتون و مدلك عصيدة و يد مهراس. قاتلي هاني بش نعطيك الاختيار، و انتي دليلك ملك. اللطف يا ربي، الحكاية ما بردتش جاتها كيما هيا، باردة و سخونة. وهيا اللعب هاذا معندهاش! المرا معلمة في مكتب و من جماعة ماي 68 تحارب في الجهل والظلامية، تصبح بنتها تنشر فيه؟؟ 

الحق ما ضربتنيش، ولا عمرها عملتها لا هي لا بو العايلة، كليمة حق الواحد يتحاسب عليها نهار اخر. اما صارت عركة للسما السابعة، جماعة التلفزة في بوقرنين سمعوا السواط و الزياط. تي هيا جارتنا اللي مقابلة خرجت للناس كراسي في الشارع و فرقت القازوز، اش قال عليك بنت عايلة كلات طريحة نباش القبور (ماي حاقدة عليا على خاطرني هبلت في يوم ما و رفست النعمة اللي جاتني و رفضت ولدها شهر زلاط، اللي يسكر تحت الحيوط في الخربة القديمة).  اما الحق خالتي كلوفية سكتتها و قالتها هاذيكا جات نوبتها و حضروا الاسياد و رد بالك لا تطيح فيك!

الحق، تبت، بطلت. اما عويمين و ربي بلاني بوحدة بنت حومتي معايا في الكلية و اتعرفت الحكاية. البنات اللي جاوني الكل باللي قلت باللي فهمت، شي، قاللك انتي اقرالنا و اش عليك صحيح و الا لا. نحنا يا سيدي نحبو اللي يتمنيك علينا، تسالنا؟ 
شرطت عليهم العملية تكون محدودة النطاق، يعرفوها كعيبات برك، و نمشيوا لبلاصة بعيدة ع العينين،   cafe maure في وتيل في قمرت، فارغ بعيد، عنا مقصورة محجوزة، نهبطو الريدو و نحيوا من ساقينا و نبدا نخرف و نستهبل معاهم. الحكاية عجبتني، يولي عندك نوع من السلطة عليهم الكل. و كل وحدة تجي تحكيلك دينها و دنيتها، و بالطبيعة ع البنات الاخرين، و هاذي معلومات انتي نفسك تعاود تستخدمها بش تبهر البنات الاخرين. وقد ما قلتلهم راني نبهبر، راني نكذب، لا من صدقني. ايا كي انتوما ناس تحبوا اللي يستغفلكم، اتحمل ما يجيك.

 
بالطبيعة اغلب توقعاتي كانت صحيحة. و هاو بش نعطيكم زوز امثلة بسيطة، بش نهار اخر يا لبنات خاصة وحتي الولاد ميسالش، كان جا واحد حكالكم ها الريق ابعثوه يشيت. 

الاولي، طفلة عندها خمسة سنين مع طفل، دارهم قالولها مش متاعنا فك عليك، شي، قاتلك الحب اعمي.. كي جات في اكا الحلقة المضيقة، سرحت سرحت في الفنجان و قلتلها اللي هي بش تبطل م هاك الخطيب اللي حاربت عليه و وقفت في وجه عايلتها علي خاطرو و تاخو واحد اخر! الطفلة قاتلي يزي م التخضريط، هاذا عمرو ما يصير. اما هذاكا اللي صار. علاه؟؟؟ 
 المسيكنه المدة طوالت عليها، و زيد مرج دارهم في اللاوعي خلاها تراجع برشا حاجات وحكات مرة للحجامة، اللي هي نفس حجامتي، انو هيا بدات تفد والراجل ملت منو. و الطفلة كي تبدا تحب تحارب، اما كي تبدا هيا م الداخل ماعادش مقتنعة، ماو تسيب! و الطفلة حليلتها، ما هيش بش يفلتوها الرجال و بش تاخو واحد اخر. فيها دقازة هذي؟؟؟ 

القصة الثانية احلى. اخت صاحبتي عندها مدة مللي تخرجت، كل عام تعدي الكاباس و ما تنجحش بالطبيعة. ضربت البطالة حتي فدت. ولات مدمنة متاع تلفزة، ما تفلت شي. تي حتى النواب متاع فرانسا تسميهملك واحد واحد، ماي تتفرج في المداولات متاعهم كل نهار تلاثا في القايلة. الحاسيلو ولات عندها ثقافة عامة هايلة. وقتها بتفدليك اقترحت عليها تشارك في برنامج جورج قرداحي و تجرب زهرها. ياخي فكرت و قاتلي، لا توا نشارك في اخر قرار و كان ربحت، نستثمر اكا الفلوس في تسكرة طيارة و نمشي للبنان. شوف يا سيدي، هاو اعادة استثمار المرابيح في راس المال! و جماعة الاتحاد العام لطلبة تونس يوشحلوا نهار كامل قاللك برامج الجامعة ماعادش مسايرة الواقع و ما تصلحش.. لا سيدي، هاي تصلح والتصاق بالواقع اكثر من هكا يحرم! 

المهم، بعد ما قبلوها في الموزع الصوتي، ليلة البرنامج جاتني و قاتلي نعملو قهيوة. انا فكرت فكرت، نقصد قريت قريت و من بعد قلتلها. المرحلة الاولي بش تتعداها، الثانية شوية صعوبة، اما تتعداها، اما الثالثة لا، م السوال الثاني و الا الثالث بش تخرج. قاتلي ما تقول ها الكلام! اما هذاكا اللي صار بالباء و التاء. علااااه؟؟ سري باتع؟ لا! هاو اللي صار... 

الطفلة ذكية و مثقفة، الاسئلة متاع المرحلة الاولى من نوع الانسان عندو قداه من صبع في يدو و الا يمشي على ساقيه ولا راسو، م البديهيات بش تنقزها. المرحلة الثانية فيها شوية صعوبة اكيد. اما ع الاقل عندها 50% حظوظ نجاح. بقا المرحلة الثالثة، واللي هيا اصعب مرحلة، و الشخص المعاون اللي بش تهزوا عندو قيمة كبيرة. و هيا شكون بش تهز؟ هيا ما قالتليش، اما و الحمد الله  كل شي يصب عند كلوفية. خوها مهدها بطريحة قاللها كان ما تهزنيش ناكلك قلبك قالك يحب خطيبتو تشوفو ف التلفزة و يقسم معاها الفلوس بش يعرس فيسع.

توا بالله واحد ماشي لاخر قرار هازز معاه سطل في جنبو نقبة، اش بش يوصل يعمل؟ خوها المرجع العلمي متاعو الملحق الرياضي في جريدة الاعلان و الا الحدث، و وكالة الاخبار اللي يوثق فيها قدور القهواجي متاع الحومة. ماو بش يخليها تحكي تحكي و هوا يبتسم للكاميرا، اول سؤال متاع كورة ينقز ينحيها و من بعد يخربها و يقعد على تلها! و هاذاكا اللي صار! 

توا حكيت حكيت و ما قلتلكمش سر الشلاكة الطائرة متع عمك بو العايلة. ماو كان عندي موعد مع طفلة بم بم في هاكا الوتيل المحنون، قالك متقدملها واحد طنطخة اما كبير في العمر. تحب تشوف. انا ما نجمتش نمشي، سيدي خويا قالي حاشتي بالكرهبة. ياخي اللا صاحبتي تجيبهالي للدار. انا حليت الباب و انا لعبت عليا الدوخة، اش بش نعمل اش بش نعمل ، دخلتها للبيت، سكرت الباب و حرودت القهوة و بلفطتهم في زوز و انا قلبي ما قايللي خير لا يخلطوا عليهم بابا وامي و ترسيلي الطريحة اللي هربت منها ناكلها اليوم بالانتيريس متاعها. 

الطفلة و هيا خارجة حبت تعطيني حويجة، قلتلها يزي بلا ريق! و شعرة لا ضربتها. على خرجتها تجي كف و غرزة مع ام عايلة داخلة. و امي م ناس بكري، اكا اللي تفرح بالضيف و ما يخرج كان فاطر و الا متعشي، دخلت فيها فرندس " يا مرحبا يا مرحبا، زارنا النبي، ها الخطوة السعيدة..." هيا مزالت تغني في ها الموال، و اكا الطفلة يا تتفرج في عزة متاع شوفلي حل يا   ياسر تمشي للدقازات. تسخايب امي الصانعة متاعي ولا حاجة، توخرتقدم، تبوسها وتقلها يعطيها الصحة بنت عايلة هناتني وعطاتني الرسمي في الرسمي و تحطلها لكموتة فلوس في يدها. 
امي ما قالت كان كلمتين : وه علي سعدي، وه علي ايامي! و تطيح علي بو العايلة. الراجل قحر للطفلة و قالها هز فلوسك و اتبرم م هنا، وانا رما يدو عللي جا قدامو و سخطني بيه... اكا الشلاكة المحنونة. 


خلاصة القول، فكرة جابهالي سيدي خويا، ماو قاري في اكا الجامعة متاع التجارة، اللي في اخر الحاضرة، اكا اللي يحبلها خبزة و بوقال ماء بش توصللها. قاللك، انتوما اشربو القهوة في دياركم و وريوهالي ع الواب كام والا تصيورات ع الفايس بوك، انا نعمل التحليل متاعي و نبعثو بالمايل. و اهاوكا بيضولي كفي بالدينار الالكتروني اللي يقعد في الكارتة متاع البوسطة وقت التقييد، ماو قالولكم اشريوا كارتة بـميات دينار بش تقيدو في الجامعة بتلاثين و الباقي يصلحلكم، اي هاو صلح! 


كتبتها:bent 3ayla على الساعة: 1:09 م

تعليق kmr ...

el7assilou, ya9wa 3lik rabbi fil tma93ir!!!!9wiya, 9wiiiiiiiiiiyaaaaaa!!!!!!!!!!!;)

bonne continuation ;)

4 يناير 2009 في 8:28 م

تعليق غير معرف ...

artikle 7low barcha kif bent el3ayla :))

bonne continuation

4 يناير 2009 في 8:30 م

تعليق 3amrouch ...

behi
3ejebni barcha ousloubek

4 يناير 2009 في 9:14 م

تعليق غير معرف ...

@3amrouch
ousloubha akahou :))

5 يناير 2009 في 2:43 م

تعليق resiros ...

hahaha, merci 3lik 3al ebtisema elli jebthenna.

5 يناير 2009 في 4:01 م

تعليق bent 3ayla ...

مرحبا بيكم يا سيدي، زارتنا البركة. خسارة مانيش هنا وقت اللي تعديتو، الواحد يضيفكم قهيوة، كعيبة قازوز...

5 يناير 2009 في 5:33 م

تعليق 3amrouch ...

هههييه
قهوة ؟
شنوة تلوج على حرفاء بين القراء؟

5 يناير 2009 في 5:39 م

تعليق Unknown ...

Ahawka machrou3 bahi w mochtarak, Ana n7el 9ahwa winti l mohemma mta3ek 9rayet l fenjan ......HHHHHAAAAAHHH hay ETTIJARA walla lawa7 :P

15 أبريل 2009 في 6:39 م

تعليق bent 3ayla ...

اذا الخلاص باهي و الايسونس عليك، مانقولش لا

15 أبريل 2009 في 6:40 م