skip to main |
skip to sidebar
|
الخميس، يناير 15، 2009
|
|
توا عندي مديدة نتلقي عل الايميل الرسمي (مش متع بنت عايلة، الاخرى اللي متخبية وراها) ايميلات تحكي ع الدين. و انتوما بيدكم راهو حلولكم عينيكم علي الطريقة الصحيحة للصلاة و هيا اليدين المطلوقة مش المكتفة و برهنولكم بطرق علمية لا تقبل الدحض اللي الحجاب يحمي المرا من سرطان الجلد و ضمنولكم الجنة كي تعاود تبعث الايميل للناس اللي غلطت و عطاوك الايميل متاعهم. هاذوما استانست بيهم و وليت نستني فيهم بالدقيقة و الدرج بش كل مرة نزيد نتفقه ف الدين و نعمل ضحكة فرد مرة. اما اللي ولاو يجيو جدد، هوما الايميلات المضادة. ايييه، ماو حتي جماعة الالحاد والردة غارو من جماعة الجهاد والسنة. قالك كان اللي يداويو السرطان بعسل النحل و بول الجمل وصلتهم التريسيتي و ولاو يستعملو الانترنيت ف الدعوة، امالا احنا لا و نحن احفاد العقلانيين الكل و علي عاتقنا تقع مهمة نشر رسالة الالحاد في الخلق. اكا الايميل ولا كي ماتش التنيس. عينيا حوالت، هاو مرة صلي، هاو قالك لشكون بش تصلي، هاو البس الحجاب، لا برا اسكر بالبيرة و منك شجع الصناعة الوطنية. يا ولادي نحج ولا لا هاذيكا ابيتة كانت معدة للبغاء ف الجاهلية... تجوجمت. ماو تعرفو المخ علي قدو و ما لاهي كان بالحكايات الفارغة، لوهلة خممت هل انو نجم نعمل هكا و هكا. حاجة كيما دبوزة الشمبوان 2 in 1 . معناها نصلي ماغير ما ننويها لربي، ولا نمشي نسكر بالحجاب... حاجة م النوع هاذا بش نضمن الاثنين. كان فما ربي اهوكا صليت ولبست (ماو المهم اللبسة مش حاجة اخرى) و كان ما فماش، هاني عشت حياتي بالطول و العرض. للاسف ما نجمتش. ماو طبيعتي واقفة و نحب الوضوح. يا ابيض يا اسود! الرمادي ما يلزمنيش... اما كي جاتني اكا الفكرة الجهنمية و قعدت نضحك عليها وحدي، بعد مديدة سكت و سرحت. علي خاطر فما عباد انا كنت مانيش فاطنة بالذكاء الخارق متاعهم و اللي هوما non seulement خممو فيها قبلي، و لكن مارسوها بالحق و سجلو براءة الاختراع باساميهم... عندي صاحبتي مقربعة، م النوع المقرعش (وهو النوع الغالب ف صحابي) هاي نهار لبست هاي نهار نحات، هاي نهار في جامع المعز، هاي نهار ف البلازا... هيا و النشرة الجوية و اش تقلها الدجاجة المقيلة في مخها. اما بعد فترة الحق الحق ركحت. شدت ثنية واضحة. لبست والتزمت علي خاطر خطيبها يحب المرا المتدينة. ولات ما تفلتش فرض. اما ف المقابل تكذب علي دارهم هاي بايتة بحذا درا شكون بش تقرا وهيا بايتة بحذا الخطيب. اما رد بالك! كي يذن الفجر يقومو في زوز يغتسلو م الجنابة و يصليوه حاضر و يرجعو الي ما كانو عليه. انا م الاول قلت الطفلة و خطيبها عندهم انفصام ف الشخصية الله لا يبلانا. اما وقت اللي تكررت الحالات المرضية قدامي، قلت ياخي بلاد كاملة متاخذة و تداوي عند البسي و انا ما فيباليش؟ ماو نعرف شكون كان عندو ولدو مريض و وصل لحالة خطيرة برشا، الله لا يمرضلكم عزيز لا غالي، لا خلا صلاة لا صدقة لا وعدة لا قران -بخلاف الطبيب و الدوا بالطبيعة- نهارت اللي ولدو برا، عملها ليلة و المزود خدام و المشروب الوطني يصبو فيه بالسطل. و غيرو و غيرو كيما المرا اللي مازالت كي روحت م الحج ياخي ولادها عملولها سهرية و هيا لولا قامت تشطح و تميل تقولش عليها نجوى فؤاد في زمانها. اما اكثر حكاية عجبتني و ضحكت عليها، هيا عايلة كانت ساكنة ف الحومة، راجل و مرتو متدينة و عندهم ولاد. المرا هاذي كانت المرجع الديني لعزايز الحومة الكل. تقية و ورعة و ما تحكي كان بقال الله و قال الرسول. و حتي م السخف كانت تسخفهم عليها من قلبها الحنين، ماي كانت تجي نهارت السبت لعشية تبعث راجلها وولادها و معاهم الطفلة اللي بالمبات بش يخرجو و يتفرهدو، و ميسالش تخدم هيا نهار السبت ف الدار بش تربح ثواب فاكا الطفلة اللي تخدم عندها. المصيبة اللي هيا طلعت تريقل في امورها مع دار مفروشة يكريوها لليبية و نهارها هوا نهار السبت! وقت اللي فاحت الحكاية وقتها النسا الكل ولاو كانو فاطنين بيها و راو الخبث في عينيها. و اللي كانت تبع في وصفاتها و في ادعيتها بطلت و رجعت للجاهلية. باهي معليناش من هذا الكل. على خاطر الناس حكاية و لو جا ما فماش ها الخنار الكل و الناس واضحة كيما وجها كيما قفاها، اش نوة الجو الي بش نلقاوه ف الدنيا؟ انا وحدة م الناس نقعد باهتة ف اللي ينتجو ف المسلسلات و يخسرو عليها المليارات. تي برا اتبرعو بيهم للبحث العلمي و في عوض تعملو ديكور و كاستينغ، اهبطو للشارع، للناس، للديار، اضمنولهم الانونيما و عس ع الشي اللي بش يخرج، بالله نتحدى اكبر سيناريست كان يخطر ببالو عشر اللي صاير ف الدنيا بالحق! توا انا حليت ها الباب - و الجماعة من غادي يلهيو فيا بالتعليق و يحبو يعرفو شنوة طاجين الوصيف - بش نقول كليمتين، للمومنين و للملحدين، راهو يا سيدي اللي تعملو فيه زايد. علي خاطر ماهيش ماتش كورة يا معانا يا ضدنا. فما ميات الف ملة و ملة و قريب كل دشرة تعمل دين لروحها، نجيو نختزلو ها الثراء والتنوع الانساني في زوز حضب و قول؟ و زيد فوق من هذا، حد نيتكم انو كي تبعثو هكا ولا هكا بش يهبط الوحي و الا بش يترفع (حسب انا ايكيب تلعب ف الميدان) بقدرة قادر؟ راهو الجماعة اللي وصلت عملت انترنيت عندها حد ادني م الثقافة العامة و يظهرلي عندها نضج يخوللها بش يكون عندها مواقف و قناعات ف الدنيا. و كان قاعدين تبعثو لبعضكم و شكون يطيح ع الاخر، راكم تنفخو في قربة مقطوعة لا حد يسمع في حد... نقصو م الدوة راكم تساهمو في الحفاظ عل البيئة http://www.silicon.fr/fr/news/2009/01/12/deux_recherches_sur_google_consomment_autant_qu_une_tasse_de_the |
|
كتبتها:bent 3ayla
على الساعة:
4:41 ص
|
|
الاشتراك في:
تعليقات الرسالة (Atom)
|
|
شكوني بنت عايلة
|
و الفتون اعزّك الله هو ما يذهب الشيرة و يعمي البصيرة و يسكن منك الفؤاد و يتركك تتدهمك في حيرة... و كما قال اش اسمو، الفتون جنون
|
|
للإتــصـال
|
|
شوية موزيكا
|
|
ملح و سكر:
كمنجة:
كمنجة:
إيقاع:
كلارينات:
قد أصبح عندي بندقية:
|
|
أهلا باللي زارونا
|
|
|
fakkartni fi nokta mta3 mahboul selou tbib kallou ki manchester w zarzouna yal3bou chkoun yervah, kallou manchester bettbi3a khaterha koueyya...sahhit kallou tbib behi fel tarikh kil koffar wel meslmine tharbou chkoun rbah ..kallou el moslmine bettbi3a khater jaichhom w imenhom akwa...ettbib kallou chnoua testantej..kallou doktour el moslmine w manchester ytihou finale
بصراحة حتي انا هاذاكا استنتاجي! هيهيهي... لا ما نعرفهاش!
famma etentej ekher : elkoffar w zarzouna yal3bou classement
ايه، بالحق هاذي فاتتني
ama ma 9oltelnech kifech hetha "tajin lewssif"
(-;
شنية لحكاية بالضبط؟؟؟؟
برا شوف اكا الحالة اللي حلوهالي ف البوست متع البارح . الجماعة تسخايب في روحها في قهوة
سي محمد حتي انا ما عاد فاهمة شي!
3mrouch et titof
pffffffffffffffffffff
pour la dernier fois 9inona bara 7arbo fi falastin
3ichou wsybona n3ichou
pffffffffffffffffff
vous savez pas que le net m7arma 3ala l5wanjia
bent 3ayla chbih hal si ghayr m3arraf wella hal nekira elli jey ya3mal fil mechekel fi bloguek ti brabbi fokkou 3lina men jebden ejboud w 5alliw blog bent 3ayla b3id 3la ejbedni w nejebdek w koulni w neklek!
tawa 3amrouch w titof ma 9alou chay w esseyed nekira ta7 fihom mouch jebden jboud hetha?
pfffffffffffffffff chay yfadad!
Pourquoi cet image sombre et médiocre des gens ? mazel elhkir fi eddenya rahou :-)
Sam
bras el3ayla latodkhol fi hal mdakhel rak jawiste w rik mta3 rabbi fama w mafamech khalih lihom rahou faddina
يا جماعة توا ريتوني دخلت نناقش ف الاسس و المفاهيم؟
تي بالعكس، قلت كل واحد دليلو ملك و اخطاونا... ناقصين احنا دمار ف الدنيا نزيدو نكملو نعملو بنقة ف البلوغ؟ تي هانا شايخين.
ايا شكون يحب قهيوة و طرف طاجين وصيف؟
الشيش عند عمروش..
النكرة
بلكش ريتني هازز سيف سيدنا علي و حاططهولك على راسك باش تسلم
ماني قلتهالك ليك ولغيرك من اك العام تسلم تكفر تعبد حتى حكة جلبانة امورك
اما نهارت الي تسولك نفسك الامارة بالسوء تتعرض للمعتقد متاعي و تجرح في النبي نعدلك جوك
و تحكي على فلسطين شرف لا استحقه اني نكون معا الناس هاكي الي جا الوقت و ببوشة بومصة كيفك ولى يجبد عليهم
وشنية حكاية الخوانجية الي ضربة ضربتين تجيبوهالنا من الحيط عملينها كي قانون الارهاب وين متعجبكمش حاجة لفق خوانجية
تعرفني سيادتك باش تقلي خوانجي
@bent 3ayla
مكنتش باش نجاوب اما كي ريتك مفسختش التعليق -في اطار حرية التعبير- وليت جاوبت
femme au foyer
هاك قلتها نكرة
je suis branche avec mayada el hennawi ce soir. j entend maintenant
حبينا وتحبينا allah allah ya 7lawet el ah lama i9oulha wa a9oulha m3ah
@titof
sidi echikh; 3andek el 7ak.. hani jit bech njeweb yekhi to7t fiya wel pc teplanta
@ mayada fan ; yezzi 3ib
دمت لنا مدونّة غزيرة الانتاج وطريفة النّصوص ،
ane onyme @
On ne t'a pas sonné ! On ne t'a pas demandé ton avis
je me permets d'être autant indélicat à ton endroit car tes interventions laissent deviner un ressentiment que tu n'arrives pas à justifier envers ceux qui te sont différents.
Il te faut gagner en pertinence et en maturité parler ainsi des gens en leurs absences et citer des gens qui n'ont même pas commenter ici franchement c'est fort de ta part
son être indiscret tu a quelle age??
J'attends toujours ton humble contribution à ce document... Arrête-donc de vociférer, de tempêter, et de t'emporter. Mais fais plutôt fonctionner ta raison
si vous aviez à juger quelque chose parce que vous avez lu et compris le texte de bent 3ayla, là on pourrait discuter, mais se baser sur les "on" et sortir avec un jugement et des préjugés c'est à mon avis inacceptable alors tes conseils tu te les appliques
@bent 3ayla
اسف مرة اخرى هاك تشوف
ايه البلاوي الي بتتحدف علينا
نجيب الولعة ونجي
..
بربي يا بنت عيلة لا تدخل هالمداخل هاذم راهم يهدوا عليك "des Anonymes" و يمرجوك و يمرجونا معاك.
أحنا ما صدقنا لقينا un blog qui fait l'exception dans cette blogsphère.
Donc يعيش أختي خوذها نصيحة مني و فك عليك انا راني نخاف لا نخسروك كيما خسرنا برشا bloggeurs قبلك!!
Au plaisir de te lire, Anyway!!
haya winou el post ejdid?
bent 3ayla, je suis tt a fait d'accord avec mara... et des bloggueurs qui ont fait cette expérience j'en connais plein.... w éna bidi g t dégouté de la blogo a un certain moment, rien que parce que je ne trouvé (presque ) plus personne à lire
hak rajja3telna il gout mte3 il blogging, brabbi kammel hakka w la tbaddel stylek ;)
" راهو الجماعة اللي وصلت عملت انترنيت عندها حد ادني م الثقافة العامة و يظهرلي عندها نضج يخوللها بش يكون عندها مواقف و قناعات ف الدنيا".
متنساش علاش هل ايميلات قاعدة ادور، ماو على خاطر لعباد اتصدق فيها و تبعث فيها!!
لعباد مازالوا مش ناضجين ..
ech men jdid?? hani okhtkom terzit fel kordinateur mte3i
li 3awdaton yaouma al ethnayn; ki yerja3li bard edouja ; my computer, salem ghanem b mokh jdid
chbih labess el pc mta3ek
juste un petit bonjour!
http://rachedelgreco.blogspirit.com/